کتاب 42: باب حِفْظِ الْعِلْمِ
صحیح بخاری
صحیح بخاری 118
ہم سے عبدالعزیز بن عبداللہ نے بیان کیا، کہا: مالک نے مجھے بتلایا۔ انہوں نے ابن شہاب سے، ابن شہاب نے اعرج سے، اعرج نے حضرت ابو ہریرہ سے روایت کی۔ انہوں نے کہا: لوگ کہتے ہیں کہ ابو ہریرہ بہت حدیثیں بیان کرتا ہے۔ اگر کتاب اللہ میں دو آیتیں نہ ہوتیں تو میں ایک بھی حدیث بیان نہ کرتا۔ یہ کہہ کر انہوں نے یہ آیت پڑھی: إِنَّ الَّذِينَ يَكْتُمُونَ مَا أَنْزَلْنَا مِنَ الْبَيِّنَاتِ۔۔۔۔وَاَنَا التَّوَّابُ الرَّحِيمُ تک۔ ہمارے بھائی مہاجرین کو تو منڈیوں میں خرید و فروخت کرتی اور ہمارے بھائی انصار کو ان کی جائدادوں کے متعلق کام کاج مصروف رکھتا تھا اور ابو ہریرہ اپنا پیٹ بھر کر رسول اللہ ﷺ سے لپٹا رہتا تھا اور وہ ان موقعوں پر حاضر رہتا جہاں وہ حاضر نہ ہوتے اور وہ باتیں یاد رکھتا جو وہ یاد نہ رکھتے۔
صحیح بخاری 119
ہم سے احمد بن ابی بکر ابو مصعب نے بیان کیا، کہا: محمد بن ابراہیم بن دینار نے ہمیں بتلایا۔ انہوں نے ابن ابی ذئب سے، انہوں نے سعید مقبری سے، سعید نے حضرت ابو ہریرہ سے روایت کی۔ وہ کہتے تھے میں نے کہا: یا رسول اللہ ﷺ! میں آپ سے بہت باتیں سنتا ہوں۔ انہیں بھول جاتا ہوں۔ فرمایا: اپنی چادر پھیلا دی۔ حضرت ابو ہریرہ کہتے تھے: آپ نے اپنے دونوں ہاتھوں سے چلو بھر کر ڈالا۔ پھر فرمایا: اس کو اکٹھا کر لو۔ میں نے اسے اکٹھا کر لیا۔ اس کے بعد میں کوئی بات نہ بھولتا تھا۔ ہم سے ابراہیم بن منذر نے بیان کیا، کہا کہ ہم سے ابن ابی فریک نے یہی حدیث بیان کی۔ انہوں نے یا یہ لفظ کہے: آپ نے اپنے ہاتھ سے چلو بھر کر اس میں ڈال دیا۔
صحیح بخاری 120
ہم سے اسماعیل نے بیان کیا، کہا: میرے بھائی نے مجھے بتلایا۔ انہوں نے ابن ابی ذئب سے، انہوں نے سعید مقبری سے، سعید نے حضرت ابو ہریرہ سے روایت کی۔ انہوں نے کہا: میں نے رسول اللہ ﷺ سے دو طرح کی یاد داشتیں محفوظ رکھی ہیں۔ ان میں ایک جو ہے اس کو تو میں نے پھیلا دیا ہے اور دوسری جو ہے اگر اس کو پھیلاتا تو یہ نرخرا کاٹ دیا جاتا۔ { ابو عبد اللہ نے کہا: بَلْعُومُ جہاں سے کھانا گزرتا ہے۔}