کتاب 63: كتاب مناقب الأنصار
صحیح بخاری, حصہ 2
صحیح بخاری 3796
آدم نے ہم سے بیان کیا کہ شعبہ نے ہمیں بتایا۔ حُمَید طویل سے روایت ہے۔ (انہوں نے کہا:) میں نے حضرت انس بن مالک رضی اللہ عنہ سے سنا۔ انہوں نے کہا: انصار خندق کے روز یہ شعر پڑھتے تھے: ہم وہ ہیں جنہوں نے محمدؐ سے یہ بیعت کی کہ جب تک ہم زندہ رہیں گے ہمیشہ جہاد کرتے رہیں گے یہ سن کر آنحضرت ﷺ نے ان کو یہ جواب دیا: اے اللہ ! زندگی تو آخرت کی ہی زندگی ہے اس لئے انصار اور مہاجرین سے کریمانہ سلوک فرمائیو۔
Urdu translation: Hazrat Syed Zain-ul-Abidin Waliullah Shah
صحیح بخاری 3797
محمد بن عبیداللہ نے مجھ سے بیان کیا کہ ابن ابی حازم نے ہمیں بتایا۔ انہوں نے اپنے باپ سے، ان کے باپ نے حضرت سہلؓ (بن سعد) سے روایت کی۔ انہوں نے کہا: ہمارے پاس رسول اللہ ﷺ آئے اور ہم خندق کھود رہے تھے اور مٹی اپنی پیٹھوں پر ڈھو رہے تھے۔ یہ دیکھ کر رسول اللہ ﷺ نے فرمایا: اے اللہ ! زندگی تو آخرت ہی کی زندگی ہے اس لئے مہاجرین اور انصار کو مغفرت سے نواز۔
Urdu translation: Hazrat Syed Zain-ul-Abidin Waliullah Shah
صحیح بخاری 3798
مسدد نے ہم سے بیان کیا کہ عبداللہ بن داؤد نے ہمیں بتایا۔ انہوں نے فضیل بن غزوان سے، فضیل نے ابوحازم سے، ابوحازم نے حضرت ابوہریرہ رضی اللہ عنہ سے روایت کی کہ ایک شخص نبی ﷺ کے پاس آیا۔ آپؐ نے اپنی ازواج کی طرف (کسی کو) بھیجا۔ انہوں نے جواب دیا: ہمارے پاس سوائے پانی کے اور کچھ نہیں۔ رسول اللہ ﷺ نے فرمایا: اس مہمان کو کون اپنے ساتھ رکھے گا؟ یا فرمایا: اسے کون مہمان ٹھہرائے گا؟ انصار میں سے ایک شخص بولا: میں۔ چنانچہ وہ اسے اپنے ساتھ لے کر اپنی بیوی کے پاس گیا اور کہا: رسول اللہ ﷺ کے مہمان کی نہایت اچھی خاطر تواضع کرو۔ وہ بولی: ہمارے پاس کچھ نہیں مگر اتنا ہی کھانا جو میرے بچوں کیلئے مشکل سے کافی ہو۔ اس نے کہا: اپنے اس کھانے کو تیار کرلو اور چراغ بھی جلاؤ اور اپنے بچوں کو جب وہ شام کا کھانا مانگیں سلادینا۔ چنانچہ اس نے اپنا کھانا تیار کیا اور چراغ کو جلایا اور اپنے بچوں کو سلادیا۔ پھر اس کے بعد وہ اٹھی جیسے چراغ درست کرتی ہے۔ اس نے اس کو بجھا دیا۔ وہ دونوں اس مہمان پر یہ ظاہر کرتے رہے کہ گویا وہ بھی کھا رہے ہیں مگر ان دونوں نے خالی پیٹ رات گزاری۔ جب صبح ہوئی تو وہ رسول اللہ ﷺ کے پاس گیا۔ آپؐ نے فرمایا: آج رات اللہ ہنس پڑا، یا فرمایا: تمہارے دونوں کے کام سے بہت خوش ہوا، اور اللہ نے یہ وحی نازل کی: انصار اپنے آپ پر دوسروں کو مقدم کرتے ہیں اگر چہ خود انہیں محتاجی ہی ہو اور جو اپنے نفس کی کنجوسی سے بچائے جائیں وہی ہیں جو بامراد ہونے والے ہیں۔
Urdu translation: Hazrat Syed Zain-ul-Abidin Waliullah Shah
صحیح بخاری 3799
محمد بن یحيٰ ابوعلی نے مجھ سے بیان کیا کہ عبدان کے بھائی شاذان نے ہمیں بتایا کہ میرے باپ نے ہم سے بیان کیا کہ شعبہ بن حجاج نے ہمیں بتایا کہ ہشام بن زید سے روایت ہے۔ انہوں نے کہا: میں نے حضرت انس بن مالکؓ سے سنا۔ کہتے تھے: حضرت ابوبکر اور حضرت عباس رضی اللہ عنہما انصار کی ایک مجلس پر سے گزرے اور وہ لوگ رو رہے تھے۔ انہوں نے پوچھا: تمہیں کیا بات رُلا رہی ہے؟ انہوں نے کہا: نبی ﷺ کا ہم میں بیٹھنا ہمیں یاد آیا ہے۔ یہ دیکھ کر وہ نبی ﷺ کے پاس اندر گئے اور انہوں نے آپؐ کو یہ بتلایا۔ حضرت انس بن مالکؓ کہتے تھے: اس پر نبی ﷺ باہر آئے اور آپؐ نے اپنے سر پر چادر کا کنارہ باندھا ہوا تھا۔ آپؐ منبر پر چڑھے۔ پھر اس دن کے بعد آپؐ اس منبر پر نہیں چڑھے۔ آپؐ نے اللہ کی حمد و ثناء بیان کی۔ پھر اس کے بعد فرمایا: انصار کے متعلق میں تمہیں وصیت کرتا ہوں کیونکہ وہ میری پونجی ہیں اور میرے محرم راز ہیں۔ ان کے ذمہ جو حق تھا وہ اس کو ادا کر چکے ہیں اور جو اُن کا حق ہے وہ باقی ہے۔ ان میں جو نیک ہو اُس کی قدر کرنا اور جو بُرا ہو اُس سے درگزر کرنا۔
Urdu translation: Hazrat Syed Zain-ul-Abidin Waliullah Shah
صحیح بخاری 3800
احمد بن یعقوب نے ہم سے بیان کیا کہ (عبدالرحمٰن بن سلیمان بن عبداللہ) بن (حنظلہ) غَسیل نے ہمیں بتایا کہ میں نے عکرمہ سے سنا۔ وہ کہتے تھے: میں نے حضرت ابن عباس رضی اللہ عنہما سے سنا۔ کہتے تھے: رسول اللہ ﷺ باہر آئے اور آپؐ پر ایک چادر تھی جسے آپؐ اپنے دونوں مونڈھوں پر لپیٹے ہوئے تھے اور سر پر ایک چکنے کپڑے کی پٹی باندھی ہوئی تھی، آ کر منبر پر بیٹھ گئے۔ آپؐ نے اللہ کی حمد و ثنا بیان کی۔ پھر فرمایا: اما بعد، اے لوگو! آدمی تو بڑھتے جاتے ہیں اور انصار کم ہو رہے ہیں۔ کم ہوتے ہوتے کھانے میں نمک کی طرح رہ جائیں گے۔ اس لئے تم میں سے جو بھی امارت کا والی ہو جس کی وجہ سے وہ کسی کو نقصان پہنچا سکے یا نفع دے سکے تو چاہیے کہ انصار میں جو اچھا ہو اس کی قدر کرے اور جو بُرا ہو اس سے درگزر کرے۔
Urdu translation: Hazrat Syed Zain-ul-Abidin Waliullah Shah
صحیح بخاری 3801
محمد بن بشار نے مجھ سے بیان کیا کہ غندر نے ہمیں بتایا کہ شعبہ نے ہم سے بیان کیا۔ انہوں نے کہا: میں نے قتادہ سے سنا کہ حضرت انس بن مالک رضی اللہ عنہ نبی ﷺ سے روایت کرتے تھے۔ آپؐ نے فرمایا: انصار میرا سرمایہ اور میرے محرم راز ہیں اور لوگ عنقریب بڑھتے جائیں گے اور یہ کم ہو جائیں گے۔ اس لئے ان میں جو اچھا ہو اس کی قدر کرنا اور جو برا ہو اس سے درگزر کرنا۔
Urdu translation: Hazrat Syed Zain-ul-Abidin Waliullah Shah
صحیح بخاری 3802
ہمیں محمد بن بشار نے بتایا کہ غندر نے ہم سے بیان کیا۔ شعبہ نے ہمیں بتایا۔ ابواسحاق سے روایت ہے۔ انہوں نے کہا: میں نے حضرت براء (بن عازب) رضی اللہ عنہ سے سنا۔ کہتے تھے: نبی ﷺ کو ایک جوڑا ریشمی کپڑے کا ہدیہ دیا گیا۔ آپؐ کے صحابہؓ اس کو چھونے لگے اور اس کی نرمی سے تعجب کرنے لگے۔ آپؐ نے فرمایا: کیا اس کپڑے کی نرمی سے تمہیں تعجب ہے؟ سعد بن معاذؓ کے رومال تو اس سے بہتر ہوں گے، یا فرمایا: زیادہ نرم ہوں گے۔ یہ حدیث قتادہ اور زہری نے بھی روایت کی۔ ان دونوں نے حضرت انسؓ سے سنا۔ حضرت انسؓ نے نبی ﷺ سے روایت کی۔
Urdu translation: Hazrat Syed Zain-ul-Abidin Waliullah Shah
صحیح بخاری 3803
محمد بن مثنیٰ نے مجھ سے بیان کیا کہ ابوعوانہ کے داماد فضل بن مساور نے ہمیں بتایا کہ ابوعوانہ نے ہمیں بتایا۔ انہوں نے اعمش سے، اعمش نے ابوسفیان سے، ابوسفیان نے حضرت جابر رضی اللہ عنہ سے روایت کی کہ میں نے نبی ﷺ سے سنا۔ آپؐ فرماتے تھے: سعد بن معاذؓ کی وفات پر عرش کانپ گیا۔ اور اعمش سے مروی ہے۔ (انہوں نے کہا:) ابوصالح نے ہمیں بتایا۔ انہوں نے حضرت جابرؓ سے، حضرت جابرؓ نے نبی ﷺ سے اسی طرح روایت بیان کی تو کسی شخص نے حضرت جابرؓ سے کہا: حضرت براءؓ تو یوں کہتے ہیں کہ اِھْتَزَّ الْعَرْشُ سے مراد یہ ہے کہ وہ تختہ جس پر حضرت سعدؓ کو رکھا گیا تھا وہ کانپنے لگا۔ اس پر حضرت جابرؓ نے کہا: بات یہ ہے کہ ان دو قبیلوں (یعنی اوس اور خزرج کے) کے دلوں میں دشمنی تھی۔ میں نے نبی ﷺ سے سنا۔ آپؐ فرماتے تھے: سعد بن معاذؓ کی موت سے رحمٰن کا عرش تھرّا گیا۔
Urdu translation: Hazrat Syed Zain-ul-Abidin Waliullah Shah
صحیح بخاری 3804
محمد بن عرعرہ نے ہم سے بیان کیا کہ شعبہ نے ہمیں بتایا۔ انہوں نے سعد بن ابراہیم سے، سعد نے ابوامامہ بن سہل بن حنیف سے، ابوامامہ نے حضرت ابوسعید خدری رضی اللہ عنہ سے روایت کی کہ کچھ لوگ حضرت سعد بن معاذؓ کے فیصلہ کو قبول کرنے کی شرط پر قلعہ سے اتر آئے۔ آنحضرت ﷺ نے حضرت سعدؓ کو بلا بھیجا۔ وہ ایک گدھے پر سوار ہو کر آئے۔ جب مسجد کے قریب پہنچے تو نبی ﷺ نے فرمایا: تم اپنے میں سے بہتر کے استقبال کو اٹھو، یا فرمایا: اپنے سردار کے استقبال کو اٹھو۔ پھر آپؐ نے فرمایا: سعدؓ! یہ لوگ آپؓ کے فیصلہ پر اترے ہیں۔ انہوں نے کہا: پھر میں ان کے متعلق فیصلہ کرتا ہوں۔ یہ کہ ان میں جو لڑنے والے تھے انہیں قتل کر دیا جائے اور ان کے اہل و عیال قید کر لئے جائیں۔ آپؐ نے فرمایا: تم نے الٰہی منشاء کے مطابق فیصلہ کیا ہے، یا فرمایا: تم نے شاہانہ فیصلہ کیا ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 3805
علی بن مسلم نے ہم سے بیان کیا کہ حبان بن ہلال نے ہمیں بتایا۔ ہمام نے ہم سے بیان کیا کہ قتادہ نے ہمیں بتایا کہ حضرت انس رضی اللہ عنہ سے روایت ہے کہ دو آدمی ایک اندھیری رات میں نبی ﷺ کے پاس سے نکلے۔ وہ کیا دیکھتے ہیں کہ ان کے سامنے ایک روشنی ہے۔ جب وہ جدا ہوئے تو وہ روشنی بھی دو حصوں میں ہو گئی۔ اور معمر نے ثابت سے، ثابت نے حضرت انسؓ سے روایت کرتے ہوئے بتایا کہ یہ حضرت اسید بن حضیرؓ اور ایک اور انصاری شخص تھے۔ حماد نے کہا: ثابت نے حضرت انسؓ سے روایت کرتے ہوئے بتایا۔ حضرت اُسید بن حضیرؓ اور حضرت عباد بن بشرؓ نبی ﷺ کے پاس تھے۔
Urdu translation: Hazrat Syed Zain-ul-Abidin Waliullah Shah
صحیح بخاری 3806
محمد بن بشار نے ہمیں بتایا کہ غندر نے ہم سے بیان کیا۔ شعبہ نے ہمیں بتایا۔ انہوں نے عمرو (بن مرہ) سے، عمرو نے ابراہیم (نخعی) سے، ابراہیم نے مسروق سے، مسروق نے حضرت عبداللہ بن عمرو رضی اللہ عنہما سے روایت کی۔ (انہوں نے کہا:) میں نے نبی ﷺ سے سنا۔ آپؐ فرماتے تھے: چار شخصوں سے قرآن سیکھو۔ ابن مسعودؓ اور ابو حذیفہؓ کے غلام سالمؓ اور اُبَیّ (بن کعبؓ) اور معاذ بن جبلؓ سے۔
Urdu translation: Hazrat Syed Zain-ul-Abidin Waliullah Shah
صحیح بخاری 3807
اسحاق (بن منصور) نے ہمیں بتایا کہ عبدالصمد نے ہم سے بیان کیا۔ شعبہ نے ہمیں بتایا۔ قتادہ نے ہم سے بیان کیا۔ انہوں نے کہا: میں نے حضرت انس بن مالک رضی اللہ عنہ سے سنا کہ حضرت ابو اسیدؓ نے کہا: رسول اللہ ﷺ نے فرمایا: انصار کے گھرانوں میں سے بہترین (گھرانہ) بنو نجار ہیں۔ پھر بنو عبدالاشہل، پھر بنو حارث بن خزرج، پھر بنو ساعدہ اور انصار کے تمام گھرانوں میں ہی بھلائی ہے۔ یہ سن کر حضرت سعد بن عبادہؓ بولے اور وہ اسلام میں اعلیٰ پایہ کے تھے کہ میں سمجھتا ہوں: رسول اللہ ﷺ نے انہیں ہم سے افضل قرار دیا ہے۔ اس پر ان سے کہا گیا: آنحضرت ﷺ نے آپ کو بھی تو بہت سے لوگوں پر فضیلت دی ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 3808
ابوالولید نے ہم سے بیان کیا کہ شعبہ نے ہمیں بتایا۔ انہوں نے عمرو بن مرہ سے، عمرو نے ابراہیم سے، ابراہیم نے مسروق سے روایت کی کہ انہوں نے کہا: حضرت عبداللہ بن عمروؓ (بن عاص) کے پاس حضرت عبداللہ بن مسعودؓ کا ذکر کیا گیا۔ حضرت عبداللہ بن عمروؓ نے کہا: وہ ایسے شخص ہیں کہ مجھے ان سے ہمیشہ محبت رہی ہے۔ میں نے نبی ﷺ سے سنا۔ آپؐ فرماتے تھے: چار شخصوں سے قرآن سیکھو: عبداللہ بن مسعودؓ سے، پہلے ان کا نام لیا اور سالمؓ سے جو ابو حذیفہؓ کے آزاد کردہ غلام تھے اور معاذ بن جبلؓ اور اُبَیّ بن کعبؓ سے۔
Urdu translation: Hazrat Syed Zain-ul-Abidin Waliullah Shah
صحیح بخاری 3809
محمد بن بشار نے مجھے بتایا۔ غندر نے ہم سے بیان کیا، کہا: میں نے شعبہ سے سنا۔ (انہوں نے کہا:) میں نے قتادہ سے، قتادہ نے حضرت انس بن مالک رضی اللہ عنہ سے سنا کہ نبی ﷺ نے اُبَیّؓ سے فرمایا: اللہ نے مجھے حکم دیا ہے کہ میں تمہیں سورة لَمْ يَكُنِ الَّذِيْنَ كَفَرُوْا پڑھ کر سناؤں۔ حضرت اُبَيؓ نے پوچھا: کیا میرا نام لیا تھا؟ آپ نے فرمایا: ہاں۔ حضرت اُبَيّؓ یہ سن کر رو پڑے۔
Urdu translation: Hazrat Syed Zain-ul-Abidin Waliullah Shah
صحیح بخاری 3810
محمد بن بشار نے مجھے بتایا کہ یحيٰ (بن سعید) نے ہم سے بیان کیا۔ شعبہ نے ہمیں بتایا۔ انہوں نے قتادہ سے، قتادہ نے حضرت انس رضی اللہ عنہ سے روایت کی کہ چار شخصوں نے نبی ﷺ کے زمانہ میں قرآن سارے کا سارا حفظ کیا۔ یہ سب انصاری تھے: حضرت اُبَیّ (بن کعبؓ) اور حضرت معاذ بن جبلؓ اور حضرت ابوزیدؓ اور حضرت زید بن ثابتؓ۔ میں نے حضرت انسؓ سے پوچھا: حضرت ابو زیدؓ کون تھے؟ انہوں نے کہا: میرے چچاؤں میں سے ایک تھے۔
Urdu translation: Hazrat Syed Zain-ul-Abidin Waliullah Shah
صحیح بخاری 3811
ابو معمر نے ہمیں بتایا کہ عبد الوارث نے ہم سے بیان کیا کہ عبد العزیز (بن صہیب) نے ہمیں بتایا۔ حضرت انس رضی اللہ عنہ سے مروی ہے۔ انہوں نے کہا: جب اُحد کی جنگ ہوئی لوگ شکست کھا کر نبی ﷺ سے ہٹنے لگے اور حضرت ابو طلحہؓ نبی ﷺ کے سامنے اپنی ایک چمڑے کی ڈھال سے آپؐ پر آڑ کئے رہے اور حضرت ابو طلحہؓ بڑے تیر انداز اور کمان کو زور سے کھینچنے والے تھے۔ انہوں نے اس دن دو یا تین کمانیں توڑ دیں اور جو کوئی آدمی تیروں کی ترکش لئے ادھر سے گزرتا آپؐ اسے فرماتے: ابو طلحہؓ کے لئے تیر بکھیر جاؤ۔ نبی ﷺ جو لوگوں کو دیکھنے کے لئے سر اٹھا کر جھانکتے تو حضرت ابو طلحہؓ کہتے: اے نبی اللہ! میرے ماں باپ آپؐ کے قربان۔ جھانکیں نہ، مبادا لوگوں کا تیر کہیں آپؐ کو لگ جائے۔ میرا سینہ آپؐ کے سینے کے آڑے ہے۔ اور میں نے حضرت عائشہؓ بنت ابی بکرؓ اور حضرت امّ سلیمؓ کو جو اپنی پنڈلیوں سے کپڑا چڑھائے ہوئے تھیں اور ان کے پاؤں کے زیور دکھائی دیتے تھے دیکھا کہ وہ پانی کی مشکیں اپنی پیٹھوں پر اٹھائے انہیں اچھالتے جلدی جلدی آتیں اور لوگوں کے منہ میں انہیں انڈیلتی جاتی تھیں۔ پھر وہ واپس جاتیں اور ان کو بھرتیں اور پھر آ کر لوگوں کے منہ میں ڈالتیں اور (اس دن) حضرت ابو طلحہؓ کے ہاتھوں سے تلوار دو یا تین دفعہ گر گئی تھی۔
Urdu translation: Hazrat Syed Zain-ul-Abidin Waliullah Shah
صحیح بخاری 3812
عبداللہ بن یوسف نے ہم سے بیان کیا، کہا: میں نے مالک سے سنا۔ انہوں نے عمر بن عبید اللہ کے غلام ابوالنضر سے، انہوں نے عامر بن سعد بن ابی وقاص سے، عامر اپنے باپ سے روایت کرتے تھے۔ انہوں نے کہا: میں نے نبی ﷺ کو کسی شخص کے متعلق جو اس زمین پر چلتا ہو یہ کہتے نہیں سنا کہ وہ جنتی ہے سوائے حضرت عبداللہ بن سلامؓ کے۔ حضرت سعدؓ نے کہا: انہی کے متعلق یہ آیت اتری: بنی اسرائیل میں سے ایک شاہد نے اپنے جیسے کے متعلق شہادت دی۔ عبداللہ بن یوسف نے کہا: میں نہیں جانتا، مالک نے یہ آیت اپنی طرف سے پڑھی یا حدیث میں ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 3813
عبداللہ بن محمد نے ہم سے بیان کیا کہ ازہر سمان نے ہمیں بتایا۔ انہوں نے (عبداللہ) بن عون سے، ابن عون نے محمد (بن سیرین) سے، انہوں نے قیس بن عباد سے روایت کی کہ انہوں نے کہا: میں مدینہ کی مسجد میں بیٹھا ہوا تھا کہ ایک شخص اندر آیا۔ اس کے چہرے پر فروتنی کے آثار نمایاں تھے۔ لوگوں نے کہا: یہ شخص جنتیوں میں سے ہے۔ اس نے دو رکعت نماز پڑھی۔ انہیں مختصر کیا۔ پھر وہ نکل گیا اور میں اس کے پیچھے ہو لیا۔ میں نے کہا: جب آپ مسجد میں آئے تھے لوگ کہنے لگے: یہ شخص اہل جنت میں سے ہے۔ اس نے کہا: اللہ کی قسم! کسی کو بھی نہیں چاہیے کہ وہ ایسی بات کہے جسے وہ جانتا نہیں اور میں تمہیں بتلائے دیتا ہوں کہ ایسا کیوں کہتے ہیں۔ میں نے نبی ﷺ کے زمانے میں ایک خواب دیکھا تھا جو میں نے آپؐ سے بیان کیا۔ میں نے دیکھا جیسے کہ میں ایک باغ میں ہوں اور انہوں نے اس باغ کی کشادگی اور سرسبزی کا ذکر کیا۔ اس کے درمیان لوہے کا ایک ستون ہے۔ پایا اس کا زمین میں ہے اور چوٹی اس کی آسمان میں۔ اس کے اوپر ایک کنڈا ہے۔ مجھے کہا گیا: چڑھ جاؤ۔ میں نے کہا: میں نہیں چڑھ سکتا۔ اتنے میں ایک خادم میرے پاس آیا۔ اس نے میرے کپڑوں کو میرے پیچھے سے اٹھایا۔ میں چڑھ گیا۔ یہاں تک کہ میں اس ستون کی چوٹی پر پہنچ گیا اور میں نے اس کنڈے کو پکڑ لیا۔ مجھ سے کہا گیا کہ اسے تھامے رکھو۔ میں جاگ پڑا جبکہ وہ میرے ہاتھ میں ہی تھا۔ میں نے نبی ﷺ سے یہ خواب بیان کیا۔ آپؐ نے فرمایا: وہ باغ ’’اسلام‘‘ ہے اور وہ ستون ’’اسلام کا ستون‘‘ ہے اور وہ کنڈا ’’عُرْوَةُ الْوُثْقٰی‘‘ ہے۔ تم مرنے تک اسلام پر ہی رہو گے اور وہ شخص حضرت عبداللہ بن سلامؓ تھے۔ اور (امام بخاریؒ کہتے تھے:) خلیفہ (بن خیاط) نے مجھ سے کہا: معاذ (عنبری) نے ہم سے بیان کیا کہ ابن عون نے ہمیں بتایا۔ محمد (بن سیرین) سے روایت ہے کہ قیس بن عباد نے ابن سلام سے روایت کی۔ انہوں نے مِنْصَف کی جگہ وَصِیْف کا لفظ بیان کیا جس کے معنے جوان خادم کے ہیں۔
Urdu translation: Hazrat Syed Zain-ul-Abidin Waliullah Shah
صحیح بخاری 3814
سلیمان بن حرب نے ہم سے بیان کیا کہ شعبہ نے ہمیں بتایا۔ انہوں نے سعید بن ابی بردہ سے، سعید نے اپنے باپ (ابو بردہ عامر بن ابی موسیٰ) سے روایت کی۔ انہوں نے کہا: میں مدینہ میں آیا اور حضرت عبداللہ بن سلام رضی اللہ عنہ سے ملا۔ انہوں نے کہا کہ کیا تم نہیں آؤ گے؟ میں تمہیں ستو اور کھجوریں کھلاؤں گا اور تم ایسے گھر میں داخل ہوگے (کہ جس میں آنحضرت ﷺ بھی تشریف لائے تھے۔) پھر کہنے لگے: تم ایسے ملک میں رہتے ہو جہاں سود پھیلا ہوا ہے۔ اگر کسی شخص کے ذمہ تمہارا کوئی حق ہو اور وہ تمہیں توڑی (بھوسہ) یا جَو یا چارے کا گٹھہ ہدیہ بھیجے {تو تم اسے نہ لینا۔} کیونکہ وہ سود ہے اور نضر (بن شمیل) اور ابو داؤد (طیالسی) اور وہب (بن جریر) نے شعبہ سے گھر کا ذکر نہیں کیا۔
Urdu translation: Hazrat Syed Zain-ul-Abidin Waliullah Shah
صحیح بخاری 3815
محمد (بن سلام) نے مجھ سے بیان کیا کہ عبدہ (بن سلیمان) نے ہمیں بتایا۔ انہوں نے ہشام بن عروہ سے، ہشام نے اپنے باپ سے روایت کی کہ انہوں نے کہا: میں نے عبداللہ بن جعفر سے سنا۔ کہتے تھے: میں نے حضرت علیؓ سے سنا۔ وہ کہتے تھے: میں نے رسول اللہ ﷺ سے سنا۔ آپؐ فرماتے تھے۔ اور صدقہ (بن فضل) نے (بھی) مجھ سے بیان کیا کہ عبدہ (بن سلیمان) نے ہمیں بتایا۔ انہوں نے ہشام بن عروہ سے، ہشام نے اپنے باپ سے روایت کی۔ انہوں نے کہا: میں نے عبداللہ بن جعفر سے سنا۔ وہ حضرت علی بن ابی طالب رضی اللہ عنہم سے، حضرت علیؓ نبی ﷺ سے روایت کرتے تھے۔ آپؐ نے فرمایا: اپنے زمانہ میں دنیا کی عورتوں میں سے بہترین مریمؑ تھیں۔ اسی طرح اپنے زمانے میں دنیا کی عورتوں میں سے بہتر خدیجہؓ تھیں۔
Urdu translation: Hazrat Syed Zain-ul-Abidin Waliullah Shah