کتاب 9: باب دُعَاءُ النَّبِيِّ صلى الله عليه وسلم أَصْلِحِ الأَنْصَارَ وَالْمُهَاجِرَةَ
صحیح بخاری
صحیح بخاری 3795
آدم (بن ابی ایاس) نے ہم سے بیان کیا کہ شعبہ نے ہمیں بتایا کہ ابو ایاس معاویہ بن قرہ نے حضرت انس بن مالک رضی اللہ عنہ سے روایت کی۔ انہوں نے کہا: رسول اللہ ﷺ نے فرمایا: زندگی تو آخرت کی ہی زندگی ہے تو انصار اور مہاجرین کی حالت سنوار دے اور قتادہ نے بھی ایسی ہی روایت حضرت انسؓ سے بیان کی ہے، حضرت انسؓ نے نبی ﷺ سے روایت کیا۔ اس میں یوں ہے: آپؐ نے فرمایا: فَاغْفِرْ لِلْأَنْصَارِ بجائے فَأَصْلِحْ کے۔ یعنی انصار اور مہاجرین کی کمزوریوں پر پردہ پوشی فرما۔
صحیح بخاری 3796
آدم نے ہم سے بیان کیا کہ شعبہ نے ہمیں بتایا۔ حُمَید طویل سے روایت ہے۔ (انہوں نے کہا:) میں نے حضرت انس بن مالک رضی اللہ عنہ سے سنا۔ انہوں نے کہا: انصار خندق کے روز یہ شعر پڑھتے تھے: ہم وہ ہیں جنہوں نے محمدؐ سے یہ بیعت کی کہ جب تک ہم زندہ رہیں گے ہمیشہ جہاد کرتے رہیں گے یہ سن کر آنحضرت ﷺ نے ان کو یہ جواب دیا: اے اللہ ! زندگی تو آخرت کی ہی زندگی ہے اس لئے انصار اور مہاجرین سے کریمانہ سلوک فرمائیو۔
صحیح بخاری 3797
محمد بن عبیداللہ نے مجھ سے بیان کیا کہ ابن ابی حازم نے ہمیں بتایا۔ انہوں نے اپنے باپ سے، ان کے باپ نے حضرت سہلؓ (بن سعد) سے روایت کی۔ انہوں نے کہا: ہمارے پاس رسول اللہ ﷺ آئے اور ہم خندق کھود رہے تھے اور مٹی اپنی پیٹھوں پر ڈھو رہے تھے۔ یہ دیکھ کر رسول اللہ ﷺ نے فرمایا: اے اللہ ! زندگی تو آخرت ہی کی زندگی ہے اس لئے مہاجرین اور انصار کو مغفرت سے نواز۔