کتاب 36: باب انْشِقَاقِ الْقَمَرِ
صحیح بخاری
صحیح بخاری 3868
عبداللہ بن عبد الوہاب نے مجھے بتایا کہ بشر بن مفضل نے ہم سے بیان کیا۔ سعید بن ابی عروبہ نے ہمیں بتایا کہ انہوں نے قتادہ سے، قتادہ نے حضرت انس بن مالکؓ سے روایت کی کہ اہل مکہ نے رسول اللہ ﷺ سے مطالبہ کیا کہ آپؐ انہیں کوئی نشان دکھلائیں۔ چنانچہ آپؐ نے ان کو چاند دو ٹکڑے دکھلایا۔ یہاں تک کہ انہوں نے ان ٹکڑوں کے درمیان حراء پہاڑ کو دیکھا۔
صحیح بخاری 3869
عبدان نے ہمیں بتایا۔ انہوں نے ابو حمزہ سے، ابو حمزہ (محمد بن میمون) نے اعمش سے، اعمش نے ابراہیم (نخعی) سے، ابراہیم نے ابو معمر سے، ابو معمر نے حضرت عبداللہ (بن مسعود) رضی اللہ عنہ سے روایت کی۔ انہوں نے کہا: چاند پھٹا اور اس وقت ہم منیٰ میں نبی ﷺ کے ساتھ ہی تھے۔ آپؐ نے فرمایا: دیکھو گواہ رہو۔ ایک ٹکڑا پہاڑ کی طرف گیا۔ ابو الضحیٰ نے مسروق سے، مسروق نے حضرت عبداللہ (بن مسعودؓ) سے روایت کرتے ہوئے یوں کہا: چاند مکہ میں پھٹا اور ابراہیم نخعی کی طرح محمد بن مسلم نے بھی ابن ابی نجیح سے، انہوں نے مجاہد سے، مجاہد نے ابو معمر سے، ابو معمر نے حضرت عبداللہ (بن مسعودؓ) سے یہ حدیث روایت کی۔
صحیح بخاری 3870
عثمان بن صالح نے ہمیں بتایا کہ بکر بن مضر نے ہم سے بیان کیا۔ انہوں نے کہا: جعفر بن ربیعہ نے مجھے بتایا۔ انہوں نے عراک بن مالک سے، عراک نے عبیداللہ بن عبداللہ بن عتبہ بن مسعود سے، انہوں نے حضرت عبداللہ بن عباس رضی اللہ عنہما سے روایت کی کہ چاند رسول اللہ ﷺ کے زمانہ میں پھٹا۔
صحیح بخاری 3871
عمر بن حفص (بن غیاث) نے ہم سے بیان کیا کہ میرے باپ نے ہمیں بتایا۔ اعمش نے ہم سے بیان کیا کہ ابراہیم نے ابو معمر سے، ابو معمر نے حضرت عبداللہ (بن مسعود) رضی اللہ عنہ سے روایت کی۔ انہوں نے کہا: چاند پھٹ گیا تھا۔