کتاب 38: باب مَوْتُ النَّجَاشِيِّ
صحیح بخاری
صحیح بخاری 3877
ابوالربیع (سلیمان بن داؤد) نے ہم سے بیان کیا کہ (سفیان) بن عیینہ نے ہمیں بتایا۔ انہوں نے ابن جریج سے، ابن جریج نے عطاء (بن ابی رباح) سے، عطاء نے حضرت جابرؓ سے روایت کی کہ جب نجاشی فوت ہوا نبیﷺ نے فرمایا: آج ایک نیک شخص فوت ہوا ہے، اٹھو اور اپنے بھائی اصحمہ کی نماز جنازہ پڑھو۔
صحیح بخاری 3878
عبدالاعلیٰ بن حماد نے ہمیں بتایا کہ یزید بن زُریع نے ہم سے بیان کیا۔ سعید (بن ابی عروبہ) نے ہمیں بتایا کہ قتادہ نے ہم سے بیان کیا کہ عطاء نے حضرت جابر بن عبداللہ انصاری رضی اللہ عنہما سے روایت کرتے ہوئے ان کو بتایا کہ نبی ﷺ نے نجاشی کے لئے نماز جنازہ پڑھی۔ آپؐ نے ہمیں اپنے پیچھے صف وار کھڑا کیا۔ میں دوسری یا تیسری صف میں تھا۔
صحیح بخاری 3879
عبداللہ بن ابی شیبہ نے مجھ سے بیان کیا کہ یزید بن ہارون نے ہمیں بتایا کہ سلیم بن حیان سے روایت ہے کہ سعید بن میناء نے ہمیں بتایا کہ حضرت جابر بن عبداللہ رضی اللہ عنہما سے مروی ہے کہ نبی ﷺ نے اصحمہ نجاشی کا جنازہ پڑھایا اور آپؐ نے اس کے لئے چار تکبیریں کہیں۔ (یزید بن ہارون کی طرح) عبدالصمد (بن عبدالوارث) نے بھی اس سند سے یہ روایت بیان کی ہے۔
صحیح بخاری 3880
زہیر بن حرب نے ہمیں بتایا کہ یعقوب بن ابراہیم نے ہم سے بیان کیا۔ (کہا:) میرے باپ نے ہمیں بتایا۔ انہوں نے صالح (بن کیسان) سے، صالح نے ابن شہاب سے روایت کی کہ انہوں نے کہا: ابوسلمہ بن عبدالرحمٰن اور ابن مسیب نے مجھ سے بیان کیا کہ حضرت ابوہریرہ رضی اللہ عنہ نے ان دونوں کو بتایا۔ رسول اللہ ﷺ نے نجاشی شاہِ حبشہ کی موت کی خبر اس دن دی جس دن کہ وہ فوت ہوا اور آپؐ نے فرمایا: اپنے بھائی کے لئے تم دعائے مغفرت کرو۔
صحیح بخاری 3881
اور (اسی سند سے) صالح (بن کیسان) سے مروی ہے۔ صالح نے ابن شہاب سے روایت کی۔ انہوں نے کہا: سعید بن مسیب نے مجھ سے بیان کیا کہ حضرت ابوہریرہ رضی اللہ عنہ نے انہیں بتایا۔ رسول اللہ ﷺ نے عیدگاہ میں لوگوں کو صف بستہ کھڑا کیا اور پھر نجاشی کا جنازہ پڑھایا اور آپؐ نے چار تکبیریں کہیں۔