کتاب 81: باب
صحیح بخاری
صحیح بخاری 4421
یحيٰ بن بکیر نے ہمیں بتایا۔ انہوں نے لیث (بن سعد) سے, لیث نے عبدالعزیز بن ابی سلمہ سے, عبدالعزیز نے سعد بن ابراہیم سے, سعد نے نافع بن جبیر سے, نافع نے عروہ بن مغیرہ سے, عروہ نے اپنے باپ حضرت مغیرہ بن شعبہؓ سے روایت کی, کہا: نبی ﷺ اپنی حاجت کے لئے گئے۔ میں اُٹھا کہ آپؐ (کے ہاتھوں) پر پانی ڈالوں۔ میں یہی جانتا ہوں کہ حضرت مغیرہؓ نے کہا: یہ واقعہ غزوۂ تبوک میں ہوا۔ آپؐ نے اپنا منہ دھویا اور اپنے بازوؤں کو دھونے لگے تو جبے کی آستین اتنی تنگ تھی کہ (آپؐ اس کو چڑھا نہ سکے۔) آپؐ نے بازوؤں کو جبے کے نیچے سے نکال کر اُن کو دھویا پھر آپؐ نے پاؤں پر مسح کیا۔
صحیح بخاری 4422
خالد بن مخلد نے ہمیں بتایا کہ سلیمان (بن بلال) نے ہم سے بیان کیا, کہا: عمرو بن یحيٰ نے مجھے بتایا کہ انہوں نے عباس بن سہل بن سعد سے, عباس نے ابو حمید (ساعدی) سے روایت کی۔ انہوں نے کہا: ہم نبی ﷺ کے ساتھ غزوۂ تبوک سے لَوٹ کر آئے۔ جب مدینہ کے قریب پہنچے تو آپؐ نے فرمایا: یہ طابہ آن پہنچا اور یہ اُحد پہاڑ ہے۔ ہم سے محبت رکھتا ہے اور ہم اس سے محبت رکھتے ہیں۔
صحیح بخاری 4423
احمد بن محمد نے ہم سے بیان کیا کہ عبداللہ (بن مبارک) نے ہمیں خبر دی کہ حمید طویل نے ہمیں بتایا۔ حضرت انس بن مالک رضی اللہ عنہ سے مروی ہے کہ رسول اللہ ﷺ غزوۂ تبوک سے لَوٹے اور جب مدینہ کے قریب پہنچے تو آپؐ نے فرمایا: مدینہ میں کچھ لوگ ایسے ہیں کہ تم جو بھی سفر کرتے ہو اور جس وادی کو عبور کرتے ہو تو وہ تمہارے ساتھ ہوتے ہیں۔ لوگوں نے کہا: یا رسول اللہ! وہ مدینہ میں ہی رہتے ہیں۔ آپؐ نے فرمایا: وہ مدینہ میں رہتے ہیں, عذر نے اُن کو روک رکھا ہے۔