کتاب 7: باب قَوْلِ الرَّجُلِ لأَخِيهِ انْظُرْ أَىَّ زَوْجَتَىَّ شِئْتَ حَتَّى أَنْزِلَ لَكَ عَنْهَا
صحیح بخاری
صحیح بخاری 5072
محمد بن کثیر نے ہم سے بیان کیا۔ انہوں نے سفیان (ثوری) سے، سفیان نے حمید طویل سے روایت کی۔ انہوں نے کہا: میں نے حضرت انس بن مالکؓ سے سنا۔ وہ کہتے تھے: حضرت عبدالرحمٰنؓ بن عوف (مدینہ میں) آئے تو نبی ﷺ نے اُن کو اور حضرت سعد بن ربیع انصاریؓ کو آپس میں بھائی بھائی بنا دیا۔ انصاری (بھائی) کے پاس دو عورتیں تھیں تو اُنہوں نے حضرت عبدالرحمٰنؓ کے سامنے یہ پیش کیا کہ وہ اپنی بیویاں اور اپنی جائیداد سے آدھوں آدھ بانٹ دیتے ہیں۔ (حضرت عبدالرحمٰنؓ نے سن کر) کہا: اللہ تمہیں تمہاری بیویوں اور تمہاری جائیداد میں برکت دے۔ تم مجھے منڈی کا پتہ دو۔ وہ منڈی میں آئے اور کچھ پنیر اور کچھ گھی نفع میں لائے۔ پھر نبی ﷺ نے حضرت عبدالرحمٰنؓ کو کئی دنوں کے بعد دیکھا۔ اُن پر زرد رنگ کے دھبے تھے۔ آپؐ نے پوچھا: عبدالرحمٰن یہ کیسے؟ انہوں نے عرض کیا: میں نے ایک انصاری عورت سے شادی کر لی ہے۔ آپؐ نے فرمایا: مہر کیا دیا ہے؟ انہوں نے کہا: گٹھلی کے برابر سونا۔ آپؐ نے فرمایا: ولیمہ کرو گو ایک ہی بکری سے۔