کتاب 35: باب الرَّجُلِ يُوَضِّئُ صَاحِبَهُ
صحیح بخاری
صحیح بخاری 181
مجھ سے محمد بن سلام نے بیان کیا، کہا: یزید بن ہارون نے ہمیں بتلایا: انہوں نے یحییٰ سے، یحییٰ نے موسیٰ بن عقبہ سے، موسیٰ نے حضرت ابن عباس کے مولیٰ کُریب سے، کُریب نے حضرت اسامہ بن زید سے روایت کی کہ رسول اللہ ﷺ جب عرفات سے واپس ہوئے تو راستہ چھوڑ کر گھاٹی کی طرف گئے اور قضائے حاجت کی۔ حضرت اسامہ نے کہا: میں آپ پر پانی ڈالنے لگا اور آپ وضو کرتے تھے۔ میں نے پوچھا: یا رسول اللہ! آپ نماز پڑھیں گے؟ فرمایا: نماز آگے (پڑھی جائے گی۔)
صحیح بخاری 182
ہم سے عمرو بن علی نے بیان کیا، کہا: ہم سے عبد الوہاب نے بیان کیا۔ انہوں نے کہا: میں نے یحي بن سعید سے سنا۔ وہ کہتے تھے: سعد بن ابراہیم نے مجھے بتایا کہ نافع بن جبیر بن مطعم نے ان سے بیان کیا کہ انہوں نے عروہ بن مغیرہ بن شعبہ کو حضرت شعبہ سے روایت کرتے سنا کہ وہ رسول اللہ ﷺ کے ساتھ ایک سفر میں تھے۔ آپ حاجت کے لئے گئے اور یہ کہ حضرت مغیرہ آپ پر پانی ڈالنے لگے اور آپ وضو کرتے تھے۔ آپ نے اپنا منہ اور اپنے دونوں ہاتھ دھوئے (اور اپنے سر پر مسح کیا ہے) اور موزوں پر بھی مسح کیا۔