کتاب 40: باب اسْتِعْمَالِ فَضْلِ وَضُوءِ النَّاسِ
صحیح بخاری
صحیح بخاری 187
ہم سے آدم نے بیان کیا، کہا: شعبہ نے ہم سے بیان کیا۔ انہوں نے کہا حکم نے ہمیں بتلایا۔ کہا: میں نے حضرت ابو جحیفہ سے سنا۔ وہ کہتے تھے کہ نبی ﷺ دو پہر کو ہمارے پاس آئے اور آپ کے لئے وضو کا پانی لایا گیا۔ (جس سے) آپ نے وضو کیا۔ پھر لوگ آپ کے وضو کا بچا ہوا پانی بدن پر ملنے لگے۔ اس کے بعد نبی ﷺ نے ظہر کی دو رکعتیں اور عصر کی دو رکعتیں پڑھیں اور آپ کے سامنے ایک برچھی تھی۔
صحیح بخاری 188
اور حضرت ابو موسیٰ کہتے تھے نبی ﷺ نے ایک پیالہ منگوایا جس میں کچھ پانی تھا۔ آپ نے اپنے ہاتھ اور منہ اس میں دھوئے اور اس میں کلی کی۔ پھر ان دونوں سے فرمایا: اس میں سے پی لو اور اپنے مونہوں اور سینوں پر ڈالو۔
صحیح بخاری 189
ہم سے علی بن عبد اللہ نے بیان کیا، کہا: يعقوب بن ابراہیم بن سعد نے ہم سے بیان کیا کہ ابراہیم نے کہا: میرے باپ نے ہمیں بتلایا۔ انہوں نے صالح سے، صالح نے ابن شہاب سے روایت کی کہ انہوں نے کہا: حضرت محمود بن ربیع نے مجھے خبر دی۔ (ابن شہاب نے) کہا: یہ وہی محمود ہیں جن کے منہ پر رسول اللہ ﷺ نے ان کے کنوئیں سے (پانی لے کر کلی کی تھی اور وہ اس وقت لڑکے تھے۔ نیز ابن شہاب نے کہا:) عروہ نے مسور اور ان کے علاوہ (لوگوں) سے (بھی) روایت کی۔ ان دونوں میں سے ہر ایک اپنے ساتھی کی تصدیق کرتا تھا کہ جب نبی ﷺ وضو کرتے تو قریب ہوتا کہ صحابہ آپ کے وضو کے پانی پر آپس میں لڑ پڑیں۔
صحیح بخاری 190
ہم سے عبد الرحمن بن یونس نے بیان کیا ، کہا: حاتم بن اسماعیل نے ہمیں بتلایا۔ انہوں نے جعد سے روایت کی۔ جعد نے کہا: میں نے حضرت سائب بن یزید سے سنا۔ وہ کہتے تھے کہ میری خالہ نبی علیؑ کے پاس مجھے لے گئی اور کہا: یا رسول اللہ ﷺ! میری بہن کا بیٹا بیمار ہے۔ تو آپ نے میرے سر پر ہاتھ پھیرا اور میرے لئے برکت کی دعا کی۔ پھر آپ نے وضو کیا اور میں نے آپ کے وضو سے بچا ہوا پانی پیا اور پھر میں آپ کی پیٹھ کے پیچھے کھڑا ہوگیا اور میں نے نبوت کی مہر آپ کے دونوں کاندھوں کے درمیان دیکھی ، چھپر کھٹ کی گھنڈی کے مانند تھی۔