کتاب 25: باب اللِّعَانِ

صحیح بخاری

صحیح بخاری 5300

حَدَّثَنَا قُتَيْبَةُ حَدَّثَنَا لَيْثٌ عَنْ يَحْيَى بْنِ سَعِيدٍ الأَنْصَارِيِّ أَنَّهُ سَمِعَ أَنَسَ بْنَ مَالِكٍ يَقُولُ قَالَ رَسُولُ اللَّهِ صلى الله عليه وسلم " أَلاَ أُخْبِرُكُمْ بِخَيْرِ دُورِ الأَنْصَارِ ". قَالُوا بَلَى يَا رَسُولَ اللَّهِ. قَالَ " بَنُو النَّجَّارِ ثُمَّ الَّذِينَ يَلُونَهُمْ بَنُو عَبْدِ الأَشْهَلِ ثُمَّ الَّذِينَ يَلُونَهُمْ بَنُو الْحَارِثِ بْنِ الْخَزْرَجِ ثُمَّ الَّذِينَ يَلُونَهُمْ بَنُو سَاعِدَةَ ". ثُمَّ قَالَ بِيَدِهِ فَقَبَضَ أَصَابِعَهُ ثُمَّ بَسَطَهُنَّ كَالرَّامِي بِيَدِهِ ثُمَّ قَالَ " وَفِي كُلِّ دُورِ الأَنْصَارِ خَيْرٌ ".

قتیبہ (بن سعید) نے ہم سے بیان کیا کہ لیث نے ہمیں بتایا۔ انہوں نے یحيٰ بن سعید انصاری سے، یحيٰ نے حضرت انس بن مالکؓ سے سنا۔ وہ کہتے تھے: رسول اللہ ﷺ نے فرمایا: کیا میں تمہیں انصار کے گھرانوں میں سے بہتر گھرانہ نہ بتاؤں؟ صحابہ نے کہا: کیوں نہیں یا رسول اللہ! ضرور بتائیں۔ فرمایا: بنو نجار، پھر جو اُن سے قریب رہتے ہیں یعنی بنو عبد الاشہل، پھر جو اُن کے قریب یعنی بنو حارث بن خزرج، پھر وہ جو اُن کے قریب ہیں یعنی بنو ساعدہ۔ پھر آپؐ نے اپنے ہاتھ سے اشارہ کرکے بتایا اور اپنی انگلیوں کو اکٹھا کر لیا پھر اُن کو کھولا جیسے پھینکنے والا اپنے ہاتھ کو کھولتا ہے۔ پھر فرمایا: انصار کے سارے گھرانوں میں بھلائی ہے۔

صحیح بخاری 5301

حَدَّثَنَا عَلِيُّ بْنُ عَبْدِ اللَّهِ حَدَّثَنَا سُفْيَانُ قَالَ أَبُو حَازِمٍ سَمِعْتُهُ مِنْ سَهْلِ بْنِ سَعْدٍ السَّاعِدِيِّ صَاحِبِ رَسُولِ اللَّهِ صلى الله عليه وسلم يَقُولُ قَالَ رَسُولُ اللَّهِ صلى الله عليه وسلم " بُعِثْتُ أَنَا وَالسَّاعَةَ كَهَذِهِ مِنْ هَذِهِ أَوْ كَهَاتَيْنِ ". وَقَرَنَ بَيْنَ السَّبَّابَةِ وَالْوُسْطَى.

علی بن عبداللہ نے ہم سے بیان کیا کہ سفیان (بن عیینہ) نے ہمیں بتایا۔ ابوحازم (سلمہ بن دینار) نے کہا: میں نے حضرت سہل بن سعد ساعدیؓ سے جو رسول اللہ ﷺ کے صحابی تھے، یہ سنا۔ وہ کہتے تھے: رسول اللہ ﷺ نے فرمایا: میں اور وہ گھڑی یوں مبعوث ہوئے ہیں جیسے یہ انگلی اس انگلی سے۔ یا (فرمایا:) اِن دو انگلیوں کی طرح۔ اور آپؐ نے شہادت کی انگلی اور درمیانی انگلی کو ملا دیا۔

صحیح بخاری 5302

حَدَّثَنَا آدَمُ حَدَّثَنَا شُعْبَةُ حَدَّثَنَا جَبَلَةُ بْنُ سُحَيْمٍ سَمِعْتُ ابْنَ عُمَرَ يَقُولُ قَالَ النَّبِيُّ صلى الله عليه وسلم " الشَّهْرُ هَكَذَا وَهَكَذَا وَهَكَذَا ". يَعْنِي ثَلاَثِينَ ثُمَّ قَالَ " وَهَكَذَا وَهَكَذَا وَهَكَذَا ". يَعْنِي تِسْعًا وَعِشْرِينَ يَقُولُ مَرَّةً ثَلاَثِينَ وَمَرَّةً تِسْعًا وَعِشْرِينَ.

آدم (بن ابی ایاس) نے ہم سے بیان کیا کہ شعبہ نے ہمیں بتایا کہ جبلہ بن سُحَیم نے ہم سے بیان کیا کہ میں نے حضرت ابن عمرؓ سے سنا۔ وہ کہتے تھے: نبی ﷺ نے فرمایا کہ مہینہ اتنا اور اتنا اور اتنا ہوتا ہے یعنی تیس دن کا۔ پھر فرمایا: اتنا اور اتنا اور اتنا یعنی ۲۹ دن کا۔ آپؐ کی مراد یہ تھی کبھی ۳۰ کا کبھی ۲۹ کا۔

صحیح بخاری 5303

حَدَّثَنَا مُحَمَّدُ بْنُ الْمُثَنَّى حَدَّثَنَا يَحْيَى بْنُ سَعِيدٍ عَنْ إِسْمَاعِيلَ عَنْ قَيْسٍ عَنْ أَبِي مَسْعُودٍ قَالَ وَأَشَارَ النَّبِيُّ صلى الله عليه وسلم بِيَدِهِ نَحْوَ الْيَمَنِ " الإِيمَانُ هَا هُنَا ـ مَرَّتَيْنِ ـ أَلاَ وَإِنَّ الْقَسْوَةَ وَغِلَظَ الْقُلُوبِ فِي الْفَدَّادِينَ حَيْثُ يَطْلُعُ قَرْنَا الشَّيْطَانِ رَبِيعَةَ وَمُضَرَ ".

محمد بن مثنیٰ نے مجھ سے بیان کیا کہ یحيٰ بن سعید (قطان) نے ہمیں بتایا۔ انہوں نے اسماعیل (بن ابی خالد) سے، اسماعیل نے قیس (بن ابی حازم) سے، قیس نے حضرت ابومسعود (انصاریؓ) سے روایت کی۔ انہوں نے کہا: نبی ﷺ نے اپنے ہاتھ سے یمن کی طرف دو دفعہ اشارہ کرکے بتایا کہ ایمان یہاں ہے اور سنگدلی اور اکھڑ پن ان شتربانوں میں ہوتی ہے جہاں شیطان کی دو چوٹیاں نمودار ہوں گی یعنی ربیعہ اور مُضَر (قبیلوں) سے۔

صحیح بخاری 5304

حَدَّثَنَا عَمْرُو بْنُ زُرَارَةَ أَخْبَرَنَا عَبْدُ الْعَزِيزِ بْنُ أَبِي حَازِمٍ عَنْ أَبِيهِ عَنْ سَهْلٍ قَالَ رَسُولُ اللَّهِ صلى الله عليه وسلم " أَنَا وَكَافِلُ الْيَتِيمِ فِي الْجَنَّةِ هَكَذَا ". وَأَشَارَ بِالسَّبَّابَةِ وَالْوُسْطَى وَفَرَّجَ بَيْنَهُمَا شَيْئًا.

عمرو بن زُرارہ نے ہم سے بیان کیا کہ عبد العزیز بن ابی حازم نے ہمیں بتایا۔ انہوں نے اپنے باپ سے، اُن کے باپ نے حضرت سہل (بن سعد ساعدیؓ) سے روایت کی کہ رسول اللہ ﷺ نے فرمایا: میں اور یتیم کی پرورش کرنے والا جنت میں یوں ہوں گے اور آپؐ نے شہادت کی انگلی اور درمیانی انگلی سے اشارہ کیا اور ان کے درمیان کچھ تھوڑا سا فاصلہ رکھا۔

10 von 10 heute frei