کتاب 2: باب وُجُوبِ النَّفَقَةِ عَلَى الأَهْلِ وَالْعِيَالِ
صحیح بخاری
صحیح بخاری 5355
عمر بن حفص (بن غیاث) نے ہم سے بیان کیا کہ میرے باپ نے ہمیں بتایا۔ اعمش نے ہم سے بیان کیا کہ ابو صالح (ذکوان) نے ہمیں بتایا، کہا کہ حضرت ابو ہریرہ رضی اللہ عنہ نے مجھے بتایا۔ وہ کہتے تھے: نبی ﷺ نے فرمایا: سب سے بہتر صدقہ وہ ہے جو ضرورت پوری کرنے کے بعد ہو۔ اور اوپر کا ہاتھ نچلے ہاتھ سے بہتر ہی ہوتا ہے۔ اور پہلے اُن کو دے جن کی تم پرورش کر رہے ہو۔ بیوی کہتی ہے یا تم مجھے کھلاؤ یا مجھے آزاد کر دو۔ اور غلام کہتا ہے مجھے کھلاؤ اور مجھ سے کام لو۔ اور بیٹا کہتا ہے مجھے کھانے کو دو، مجھ کو کس پر چھوڑے جا رہے ہو؟ لوگوں نے کہا: ابو ہریرہؓ ! کیا تم نے یہ رسول اللہ ﷺ سے سنا تھا؟ انہوں نے کہا: نہیں، یہ ابو ہریرہؓ کی عقل سے ہی ہے۔
صحیح بخاری 5356
سعید بن عُفَیر نے ہمیں بتایا، کہا: لیث (بن سعد) نے مجھ سے بیان کیا۔ انہوں نے کہا: عبدالرحمٰن بن خالد بن مسافر نے ہم سے بیان کیا۔ انہوں نے ابن شہاب سے، ابن شہاب نے (سعید) بن مسیب سے، سعید نے حضرت ابوہریرہؓ سے روایت کی کہ رسول اللہ ﷺ نے فرمایا: بہتر صدقہ وہی ہے جس کے دینے کے بعد وہ خود محتاج نہ ہو۔ اور پہلے اُن لوگوں کو دو جن کی تم پرورش کر رہے ہو۔