کتاب 1: باب سُنَّةِ الأُضْحِيَّةِ
صحیح بخاری
صحیح بخاری 5545
محمد بن بشار نے ہمیں بتایا کہ غندر نے ہم سے بیان کیا کہ شعبہ نے ہمیں بتایا۔ انہوں نے زبید ایامی سے، زبید نے شعبی سے، شعبی نے حضرت براء (بن عازب) رضی اللہ عنہ سے روایت کی۔ انہوں نے کہا: نبی ﷺ نے فرمایا کہ ہم اپنے اس دن میں پہلا کام جو شروع کرتے ہیں یہ ہے کہ ہم نماز پڑھتے ہیں پھر وہاں سے لَوٹ کر قربانی کرتے ہیں جس نے ایسا کیا تو اس نے ہمارے طریقہ کے مطابق عمل کیا اور جس نے پہلے ذبح کیا تو وہ صرف گوشت ہی ہے جو اس نے اپنے گھر والوں کے لئے پہلے کیا ہے عبادت سے اسے کچھ تعلق نہیں۔ اس پر حضرت ابوبردہ بن نیارؓ کھڑے ہوئے اور وہ ذبح کر چکے تھے، کہنے لگے: میرے پاس ایک سال کا بکری کا بچہ ہے۔ آپؐ نے فرمایا: اسی کو ذبح کر لو اور تمہارے بعد کسی کی طرف سے ایسا پلوٹھا قربانی کے قائمقام نہیں ہو گا۔ مطرف نے عامر سے نقل کیا۔ عامر نے حضرت براءؓ سے کہ نبی ﷺ نے فرمایا: جس نے نماز کے بعد ذبح کیا تو اس کی قربانی پوری ہوئی اور اس نے مسلمانوں کے طریقہ پر عمل کیا۔
صحیح بخاری 5546
مسدد نے ہم سے بیان کیا کہ اسماعیل (بن علیہ) نے ہمیں بتایا۔ انہوں نے ایوب (سختیانی) سے، ایوب نے محمد (بن سیرین) سے، انہوں نے حضرت انس بن مالک رضی اللہ عنہ سے روایت کی۔ انہوں نے کہا: نبی ﷺ نے فرمایا: جس نے نماز سے پہلے ذبح کیا تو اس نے صرف اپنے لئے ذبح کیا اور جس نے نماز کے بعد ذبح کیا تو اس کی قربانی پوری ہوئی اور اس نے مسلمانوں کے طریقے پر عمل کیا۔