کتاب 12: باب مَنْ ذَبَحَ قَبْلَ الصَّلاَةِ أَعَادَ
صحیح بخاری
صحیح بخاری 5561
علی بن عبداللہ (مدینی) نے ہم سے بیان کیا کہ اسماعیل بن ابراہیم نے ہمیں بتایا۔ انہوں نے ایوب سے، ایوب نے محمد (بن سیرین) سے، انہوں نے حضرت انسؓ سے، حضرت انسؓ نے نبی ﷺ سے روایت کرتے ہوئے بتایا۔ آپؐ نے فرمایا: جس نے نماز سے پہلے ذبح کیا وہ دوبارہ کرے۔ یہ سن کر ایک شخص نے کہا: یہ ایسا دن ہے جس میں گوشت کی خواہش ہوتی ہے۔ اس نے اپنے پڑوسی کی محتاجی کا ذکر کیا تو یہ سن کر نبی ﷺ نے اس کو معذور سمجھا۔ (اور اس نے کہا:) میرے پاس ایک سال کا بکروٹا ہے جو دو بکریوں سے بہتر ہے؟ نبی ﷺ نے اس کو اجازت دی۔ میں نہیں جانتا کہ یہ اجازت ہو گئی یا نہیں۔ پھر آپؐ نے واپس آ کر دو مینڈھے لئے یعنی ان کو ذبح کر دیا اور لوگ بھی بکریوں کے گلوں میں گئے اور ان کو ذبح کیا۔
صحیح بخاری 5562
آدم (بن ابی ایاس) نے ہم سے بیان کیا کہ شعبہ نے ہمیں بتایا کہ اسود بن قیس نے ہم سے بیان کیا۔ (انہوں نے کہا:) میں نے حضرت جندب بن سفیان بجلیؓ سے سنا۔ انہوں نے کہا کہ میں قربانی کی عید میں نبی ﷺ کے ساتھ موجود تھا۔ آپؐ نے فرمایا: جس نے نماز پڑھنے سے پہلے ذبح کیا تو وہ اس کی بجائے ایک اور قربانی کرے اور جس نے ذبح نہ کیا ہو تو وہ اسے ذبح کرے۔
صحیح بخاری 5563
موسیٰ بن اسماعیل نے ہم سے بیان کیا کہ ابوعوانہ (وضاح) نے ہمیں بتایا۔ انہوں نے فراس (بن یحيٰ) سے، فراس نے عامر (شعبی) سے، عامر نے حضرت براءؓ (بن عازب) سے روایت کی۔ انہوں نے کہا: رسول اللہ ﷺ نے ایک دن نماز پڑھائی۔ آپؐ نے فرمایا: جس نے ہماری نماز کی طرح نماز پڑھی اور ہمارے قبلے کی طرف منہ کیا تو وہ اس وقت تک ذبح نہ کرے جب تک نماز سے فارغ نہ ہو جائے۔ یہ سن کر حضرت ابوبردہ بن نیارؓ کھڑے ہوئے اور کہنے لگے: یا رسول اللہ! میں نے ایسا کیا ہے۔ آپؐ نے فرمایا: تم نے اس میں کچھ جلدی ہی کی۔ انہوں نے کہا: میرے پاس ایک برس کا بکروٹا ہے وہ دو دو برس کی دو بکریوں سے بہتر ہے میں اسے ذبح کئے دیتا ہوں؟ آپؐ نے فرمایا: ہاں پھر تمہارے بعد کسی کے لیے (کم عمر بکروٹا قربانی کے) قائم مقام نہ ہوگا۔ عامر نے کہا: یہ اس کی دو قربانیوں سے بہتر قربانی تھی۔