کتاب 6: باب الإِزَارِ الْمُهَدَّبِ
صحیح بخاری
صحیح بخاری 5792
ابوالیمان نے ہم سے بیان کیا کہ شعیب نے ہمیں بتایا۔ انہوں نے زہری سے روایت کی کہ مجھے عروہ بن زبیر نے خبر دی کہ حضرت عائشہ رضی اللہ عنہا نبی ﷺ کی زوجہ فرماتی ہیں: رفاعہ قرظیؓ کی بیوی رسول اللہ ﷺ کے پاس آئی اور میں بیٹھی ہوئی تھی اور حضرت ابوبکرؓ بھی آپؐ کے پاس تھے، کہنے لگی: یا رسول اللہ! میں رفاعہؓ کے نکاح میں تھی اور اس نے مجھے طلاق دے دی اور میری طلاق کو قطعی قرار دیا۔ میں نے اس کے بعد عبدالرحمٰن بن زبیرؓ سے نکاح کیا اور یا رسول اللہ بات یہ ہے اللہ کی قسم اس کے ساتھ تو ایسا ہی ہے جیسے یہ حاشیہ اور اس نے اپنی اوڑھنی کا حاشیہ پکڑا۔ حضرت خالد بن سعید (بن عاصؓ) نے جو باہر دروازے پر کھڑے تھے ابھی ان کو اندر آنے کی اجازت نہیں دی گئی تھی اس کی یہ بات سنی تو خالدؓ بولے۔ ابوبکرؓ کیا آپ اس عورت کو اس بات سے نہیں روکتے جو یہ رسول اللہ ﷺ کے پاس کھول کر بیان کر رہی ہے؟ اللہ کی قسم رسول اللہ ﷺ نے اور کچھ نہیں کہا آپؐ صرف مسکراتے ہی رہے۔ اور رسول اللہ ﷺ نے اُسے فرمایا: شاید تم چاہتی ہو کہ رفاعہؓ کی طرف لوٹو۔ اس وقت تک نہیں کہ وہ تجھ سے مزہ نہ اٹھائے اور تو اس سے مزہ نہ اٹھائے، تو اس کے بعد یہی قاعدہ ہوگیا۔