کتاب 19: باب الأَكْسِيَةِ وَالْخَمَائِصِ
صحیح بخاری
صحیح بخاری 5815
یحيٰ بن بکیر نے مجھ سے بیان کیا کہ لیث (بن سعد) نے ہمیں بتایا۔ انہوں نے عقیل سے، عقیل نے ابن شہاب سے، ابن شہاب نے کہا: مجھے عبیداللہ بن عبداللہ بن عتبہ نے خبر دی کہ حضرت عائشہ اور حضرت عبداللہ بن عباس رضی اللہ عنہم دونوں کہتے تھے کہ جب رسول اللہ ﷺ پر بیماری کی شدت ہوئی تو آپؐ اپنی چادر کو اپنے چہرے پر ڈال لیتے اور جب گھبراہٹ محسوس کرتے تو اسے اپنے چہرے سے ہٹا دیتے۔ آپؐ اسی حالت میں تھے کہ آپؐ نے فرمایا: یہود و نصاریٰ پر اللہ کی لعنت کہ انہوں نے اپنے نبیوں کی قبروں کو مسجدیں بنا لیا۔ جو انہوں نے کیا اس سے بچنے کیلئے آپؐ متنبہ فرماتے۔
صحیح بخاری 5816
یحيٰ بن بکیر نے مجھ سے بیان کیا کہ لیث (بن سعد) نے ہمیں بتایا۔ انہوں نے عقیل سے، عقیل نے ابن شہاب سے، ابن شہاب نے کہا: مجھے عبیداللہ بن عبداللہ بن عتبہ نے خبر دی کہ حضرت عائشہ اور حضرت عبداللہ بن عباس رضی اللہ عنہم دونوں کہتے تھے کہ جب رسول اللہ ﷺ پر بیماری کی شدت ہوئی تو آپؐ اپنی چادر کو اپنے چہرے پر ڈال لیتے اور جب گھبراہٹ محسوس کرتے تو اسے اپنے چہرے سے ہٹا دیتے۔ آپؐ اسی حالت میں تھے کہ آپؐ نے فرمایا: یہود و نصاریٰ پر اللہ کی لعنت کہ انہوں نے اپنے نبیوں کی قبروں کو مسجدیں بنا لیا۔ جو انہوں نے کیا اس سے بچنے کیلئے آپؐ متنبہ فرماتے۔
صحیح بخاری 5817
موسیٰ بن اسماعیل نے ہمیں بتایا کہ ابراہیم بن سعد نے ہم سے بیان کیا کہ ابن شہاب نے ہمیں بتایا ، ابن شہاب نے عروہ سے، عروہ نے حضرت عائشہؓ سے روایت کی۔ انہوں نے کہا : رسول اللہ ﷺ نے اپنی ایک اُونی حاشیہ دار چادر میں نماز پڑھی جس پر نقش تھے۔ آپؐ نے اس کے نقوش کو ایک نظر دیکھا۔ جب آپؐ نے سلام پھیرا تو فرمایا: میری یہ چادر ابوجہمؓ کے پاس لے جاؤ کیونکہ اس نے ابھی میری نماز سے توجہ ہٹائی اور ابو جہمؓ کی سادہ چادر میرے پاس لے آؤ۔ ابوجہمؓ حذیفہ بن غانم کے بیٹے تھے جو بنو عدی بن کعب میں سے تھے۔
صحیح بخاری 5818
مسدد نے مجھے بتایا کہ اسماعیل (بن علیہ) نے ہم سے بیان کیا کہ ایوب نے ہمیں بتایا، ایوب نے حمید بن ہلال سے، حمید نے ابوبردہ سے روایت کی۔ اُنہوں نے کہا: حضرت عائشہؓ ہمارے پاس ایک چادر اور ایک موٹا تہ بند نکال کر لائیں اور کہنے لگیں کہ جب نبی ﷺ کی وفات ہوئی آپ نے یہی دو (چادریں) پہنی ہوئی تھیں۔