کتاب 42: باب الْقُبَّةِ الْحَمْرَاءِ مِنْ أَدَمٍ
صحیح بخاری
صحیح بخاری 5859
محمد بن عرعرہ نے ہم سے بیان کیا۔ انہوں نے کہا کہ عمر بن ابی زائدہ نے مجھے بتایا۔ انہوں نے عون بن ابی جحیفہ سے، عون نے اپنے باپ سے روایت کی۔ ان کے باپ نے کہا: میں نبی ﷺ کے پاس آیا اور آپؐ اس وقت چمڑے کے ایک سرخ خیمے میں تھے اور میں نے بلالؓ کو دیکھا کہ انہوں نے نبی ﷺ کے وضو سے بچا ہوا پانی لیا اور لوگ اس پانی کے لئے لپک رہے تھے۔ جس نے اس میں سے کچھ پایا اسے اپنے بدن پر مل لیا اور جس نے اس میں سے کچھ نہ پایا اس نے اپنے ساتھی کے ہاتھ کی تری کو ہی لے لیا۔
صحیح بخاری 5860
ابوالیمان نے ہم سے بیان کیا کہ شعیب نے ہمیں بتایا۔ انہوں نے زہری سے روایت کی کہ حضرت انس بن مالک ؓ نے مجھے بتایا۔ اور لیث (بن سعد) نے کہا کہ مجھے یونس نے بتایا۔ یونس نے ابن شہاب سے، ابن شہاب نے کہا: مجھے حضرت انس بن مالک رضی اللہ عنہ نے بتایا۔ وہ کہتے تھے: نبی صلی اللہ علیہ وسلّم نے انصار کو بلا بھیجا اور ان کو چمڑے کے ایک خیمے میں جمع کیا۔