کتاب 20: باب مَنِ اغْتَسَلَ عُرْيَانًا وَحْدَهُ فِي الْخَلْوَةِ، وَمَنْ تَسَتَّرَ فَالتَّسَتُّرُ أَفْضَلُ
صحیح بخاری
صحیح بخاری 278
ہم سے اسحاق بن نضر نے بیان کیا، کہا: عبد الرزاق نے ہمیں بتلایا۔ انہوں نے معمر سے۔ معمر نے ہمام بن منبہ سے، ہمام نے حضرت ابو ہریرہ سے۔ حضرت ابو ہریرہ نے نبی ﷺ سے روایت کی کہ آپ نے فرمایا: بنی اسرائیل جنگے نہایا کرتے تھے (اور) وہ ایک دوسرے کو دیکھا کرتے تھے اور حضرت موسیٰ اکیلے نہایا کرتے تھے تو انہوں نے کہا: اللہ کی قسم موسیٰ کو ہمارے سامنے نہانے سے سوائے اس کے اور کوئی بات نہیں روکتی کہ وہ فتق سے بیمار ہے۔ ایک دفعہ حضرت موسیٰ نہانے کے لیے گئے اور اپنے کپڑے حجر کے پاس رکھے اور حجر آپ کے کپڑے لے کر بھاگ گیا تو حضرت موسیٰ اس کے پیچھے دوڑے اور یہ کہتے جاتے تھے: حجر! میرا کپڑا، میرا کپڑا۔ آخر بنی اسرائیل نے حضرت موسیٰ کو دیکھ لیا اور انہوں نے کہا کہ اللہ کی قسم موسیٰ کو تو کوئی بیماری نہیں۔ آپ نے اپنے کپڑے (اس سے) لے لیے اور حجر کو مارنے لگے۔ حضرت ابو ہریرہ نے کہا: اللہ کی قسم اس حجر پر چھ یا سات زخم کے نشان ہیں اس مار کی وجہ سے جو حجر کو پڑی۔
صحیح بخاری 279
اور حضرت ابو ہریرہ سے روایت ہے کہ نبی ﷺ نے فرمایا کہ ایک دفعہ حضرت ایوب ننگے نہا رہے تھے کہ سونے کی مکڑیاں ان پر آگریں اور حضرت ایوب انہیں اپنے کپڑے میں لپیں بھر بھر کر ڈالنے لگے۔ اس پر ان کے رب نے انہیں پکارا: ایوب! کیا میں نے تجھے اس سے جس کو تو دیکھ رہا ہے، بے نیاز نہیں کر دیا؟ انہوں نے کہا: ہاں، بے شک تیری عزت کی قسم، لیکن مجھے تیری برکت سے بے نیازی نہیں ہے۔ یہ روایت ابراہیم نے موسیٰ بن عقبہ سے، موسیٰ نے صفوان بن سلیم سے، صفوان نے عطاء بن یسار سے۔ عطاء نے حضرت ابو ہریرہ سے۔ حضرت ابو ہریرہ نے نبی ﷺ سے روایت کی۔ انہوں نے یوں کہا: اسی اثناء میں کہ حضرت ایوب ننگے نہا رہے تھے۔