کتاب 49: باب لاَ تُتْرَكُ النَّارُ فِي الْبَيْتِ عِنْدَ النَّوْمِ
صحیح بخاری
صحیح بخاری 6293
ابو نعیم نے ہم سے بیان کیا کہ ابن عیینہ نے ہمیں بتایا۔ انہوں نے زہری سے، زہری نے سالم سے، سالم نے اپنے باپ سے، ان کے باپ نے نبی ﷺ سے روایت کی۔ آپؐ نے فرمایا: جب تم سونے لگتے ہو تو اپنے گھروں میں آگ نہ رہنے دیا کرو۔
صحیح بخاری 6294
محمد بن علاء نے ہم سے بیان کیا کہ ابو اسامہ نے ہمیں بتایا۔ انہوں نے بُرید بن عبداللہ سے، بُرید نے ابو بُردہ سے، ابو بردہ نے حضرت ابو موسیٰ رضی اللہ عنہ سے روایت کی۔ انہوں نے کہا: مدینہ میں رات کو ایک گھر جل گیا جس میں گھر والے تھے تو نبی ﷺ کو اُن کے متعلق بتایا گیا۔ آپؐ نے فرمایا: یہ آگ تمہاری دشمن ہے۔ اس لئے جب تم سونے لگو تو اس کو بجھا کر بے فکر ہو جایا کرو۔
صحیح بخاری 6295
قتیبہ (بن سعید) نے ہم سے بیان کیا کہ حماد (بن زید) نے ہمیں بتایا۔ انہوں نے کثیر سے جو ابن شنظیر ہیں، کثیر نے عطاء (بن ابی رباح) سے، عطاء نے حضرت جابر بن عبداللہ رضی اللہ عنہما سے روایت کی۔ انہوں نے کہا: رسول اللہ ﷺ نے فرمایا: برتنوں کو ڈھانپ دیا کرو اور دروازوں کو بند کر لیا کرو اور چراغوں کو بجھا دو کیونکہ چوہا کبھی کبھی بتی گھسیٹ کر لے جاتا ہے اور گھر والوں کو جلا دیتا ہے۔