کتاب 6: كتاب الحيض
صحیح بخاری
صحیح بخاری 294
ہم سے علی بن عبد اللہ نے بیان کیا، کہا: سفیان نے ہمیں بتلایا، کہا: میں نے عبد الرحمن بن قاسم سے سنا۔ انہوں نے کہا: میں نے قاسم سے سُنا۔ وہ کہتے تھے۔ میں نے حضرت عائشہ سے سُنا۔ وہ کہتی تھیں کہ ہم (سفر پر نکلے۔ ہم یہی سمجھتے تھے کہ حج کریں گے۔ جب ہم سرف مقام میں پہنچے تو مجھے حیض آگیا۔ رسول اللہ ﷺ میرے پاس آئے اور میں رو رہی تھی۔ فرمایا تمہیں کیا ہوا؟ کیا تمہیں حیض آیا ہے؟ میں نے کہا: ہاں۔ فرمایا: یہ ایک ایسا امر ہے جو اللہ تعالیٰ نے آدم کی لڑکیوں کے لئے مقدر کیا ہے۔ پس تم جو کچھ حاجی کرتا ہے کرو، سوائے اس کے کہ بیت اللہ کا طواف نہ کرو۔ کہتی تھیں: رسول اللہ ﷺ نے اپنی بیویوں کی طرف سے گائے کی قربانی کی۔
صحیح بخاری 295
ہم سے عبداللہ بن یوسف نے بیان کیا، کہا: مالک نے ہمیں بتلایا۔ انہوں نے ہشام بن عروہ سے، ہشام نے اپنے باپ عروہ سے، انہوں نے حضرت عائشہ سے روایت کی۔ وہ کہتی تھیں: میں رسول اللہ ﷺ کے سر میں کنگھی کیا کرتی تھی۔ حالانکہ میں حائضہ ہوتی۔
صحیح بخاری 296
ہم سے ابراہیم بن موسیٰ نے بیان کیا، کہا: ہشام بن یوسف نے ہمیں بتلایا کہ ابن جریج نے انہیں خبر دی۔ وہ کہتے تھے کہ ہشام نے عروہ سے روایت کرتے ہوئے مجھے بتلایا کہ ان سے کسی نے پوچھا: کیا حائضہ میری خدمت کرے یا کیا عورت میرے قریب آئے اس حالت میں کہ وہ جنبی ہو؟ تو عروہ نے کہا: یہ سب مجھ پر آسان ہے اور ہر ایک ان میں سے میری خدمت کرتی ہے اور کسی پر بھی اس میں کوئی حرج نہیں۔ مجھے حضرت عائشہ نے بتلایا کہ وہ کنگھی کیا کرتی تھیں۔ یعنی رسول اللہ ﷺ کے سر کو، حالانکہ وہ حائضہ ہوتیں اور رسول اللہ ﷺ اس وقت مسجد میں اعتکاف بیٹھے ہوئے ہوتے۔ آپ اپنے سر کو ان کے نزدیک کر دیتے اور وہ اپنی کوٹھڑی میں ہوتیں۔ اور آپ کو کنگھی کرتیں حالانکہ وہ حائضہ ہوتیں۔
صحیح بخاری 297
ہم سے ابو نعیم فضل بن دکین نے بیان کیا کہ انہوں نے زہیر سے سنا۔ وہ منصور بن صفیہ سے روایت کرتے تھے کہ اُن کی ماں نے ان کو بتلایا کہ حضرت عائشہؓ نے ان سے بیان کیا کہ نبی ﷺ میری گود میں سر رکھ کر لیٹ جاتے حالانکہ میں حائضہ ہوتی۔ پھر آپ قرآن مجید پڑھتے۔
صحیح بخاری 298
ہم سے مکی بن ابراہیم نے بیان کیا، کہا: ہشام نے ہمیں بتلایا۔ انہوں نے یحییٰ بن ابی کثیر سے، یحییٰ نے ابو سلمہ سے روایت کی کہ حضرت ام سلمہ کی لڑکی زینب نے ان سے بیان کیا کہ حضرت ام سلمہ نے انہیں بتایا۔ کہتی تھیں: ایک بار میں نبی ﷺ کے ساتھ ایک چادر میں لیٹی ہوئی تھی کہ اتنے میں مجھے حیض آیا تو میں سرک گئی اور اپنے حیض کے کپڑے لئے۔ آپ نے فرمایا: کیا تجھے خون نفاس آیا ہے؟ میں نے کہا: ہاں۔ تو آپ نے مجھے بلایا اور میں اسی چادر میں آپ کے ساتھ لیٹ گئی۔
صحیح بخاری 299
ہم سے قبیصہ نے بیان کیا۔ انہوں نے کہا کہ سفیان نے ہمیں بتلایا۔ انہوں نے منصور سے، منصور نے ابرہیم سے، ابراہیم نے اسود سے، اسود نے حضرت عائشہؓ سے روایت کی۔ کہتی تھیں کہ میں اور نبی ﷺ ایک ہی برتن سے نہایا کرتے تھے اور ہم جنبی ہوتے۔
صحیح بخاری 300
اور آپ مجھ سے فرماتے تو میں تہ بند باندھ لیتی اور آپ میرے ساتھ بدن سے بدن لگا کر لیٹ جاتے حالانکہ میں حائضہ ہوتی۔
صحیح بخاری 301
اور آپ متکلف ہوتے اپنا سر میری طرف نکالتے تو میں اسے دھوتی حالانکہ میں حائضہ ہوتی۔
صحیح بخاری 302
ہم سے اسماعیل بن خلیل نے بیان کیا۔ انہوں نے کہا: علی بن مسہر نے ہمیں بتلایا۔ انہوں نے کہا: ابواسحق شیبانی نے ہم سے بیان کیا۔ انہوں نے عبد الرحمان بن اسود سے، عبدالرحمان نے اپنے باپ سے، ان کے باپ نے حضرت عائشہ سے روایت کی۔ وہ کہتی تھی: ہم میں سے جب کوئی حائضہ ہوتی اور رسول اللہ ﷺ اس کے ساتھ بدن لگا کر لیٹنا چاہتے تو آپ اس کو تہ بند باندھنے کے لئے فرماتے؛ در آنحالیکہ اس کا حیض جوش میں ہوتا۔ پھر اس کے ساتھ بدن لگا کر لیٹتے۔ حضرت عائشہ کہتی تھیں تم میں سے کون اپنی شہوت قابو میں رکھ سکتا ہے جس طرح کہ رسول اللہ ﷺ اپنی شہوت کو قابو میں رکھتے۔ اور جریر نے بھی شیبانی سے اس حدیث کو روایت کیا۔
صحیح بخاری 303
ہم سے ابو نعمان نے بیان کیا، کہا: عبدالواحد نے ہم سے بیان کیا۔ انہوں نے کہا: شیبانی نے ہمیں بتلایا۔ انہوں نے کہا: عبدالله بن شداد نے ہم سے بیان کیا، کہا: میں نے حضرت میمونہ سے سنا۔ وہ کہتی تھیں کہ رسول اللہ صلی اللہ علیہ وآلہ وسلم جب اپنی عورتوں میں سے کسی عورت کے ساتھ بدن سے بدن لگا کر لیٹنا چاہتے تو اسے فرماتے اور وہ تہ بند باندھ لیتیں حالانکہ وہ (اس وقت) حائضہ ہوتیں۔ اور سفیان نے بھی شیبانی سے یہ حدیث روایت کی۔
صحیح بخاری 304
ہم سے سعید بن ابی مریم نے بیان کیا، کہا: محمد بن جعفر نے ہمیں بتلایا۔ انہوں نے کہا: زید بن اسلم نے مجھے بتلایا۔ انہوں نے عیاض بن عبداللہ سے، عیاض نے حضرت ابوسعید خدری سے روایت کی۔ انہوں نے کہا: رسول اللہ ﷺ عید اضحی کی۔ یا عید فطر میں عید گاہ کی طرف گئے اور عورتوں کے پاس سے گذرے اور فرمایا: اے عورتوں کی جماعت! صدقہ دو۔ کیونکہ دوزخیوں میں تم ہی مجھے زیادہ تعداد میں دکھلائی گئی ہو تو انہوں نے کہا: یا رسول اللہ! کس وجہ سے؟ فرمایا: تم لعنت زیادہ کرتی ہو۔ اور اپنے خاوندوں کی ناشکری کرتی ہو۔ میں نے ناقص عقل اور ناقص دین اشخاص میں سے تم سے زیادہ کسی کو بھی دوراندیش انسان کی عقل ضائع کرنے والا نہیں دیکھا۔ کہنے لگیں: یا رسول اللہ! ہمارے دین اور عقل میں کیا نقص ہے؟ فرمایا: کیا عورت کی شہادت مرد کی شہادت کے نصف کے برابر نہیں۔ انہوں نے کہا: ہاں۔ آپ نے فرمایا: تو یہ اس کی عقل کی کمی ہے۔ کیا یہ نہیں ہے کہ جب اُسے حیض آئے تو وہ نماز نہیں پڑھتی اور روزہ نہیں رکھتی۔ انہوں نے کہا: ہاں۔ فرمایا: یہی اس کے دین کی کمی ہے۔
صحیح بخاری 305
ہم سے ابو نعیم نے بیان کیا، کہا: عبد العزیز بن ابی سلمہ نے ہمیں بتلایا۔ انہوں نے عبدالرحمن بن قاسم سے، عبدالرحمن نے قاسم بن محمد سے، قاسم نے حضرت عائشہؓ سے روایت کی۔ انہوں نے کہا کہ ہم نبی ﷺ کے ساتھ نکلے اور ہم حج کا ہی ذکر کرتے تھے۔ جب ہم سرف مقام میں آئے تو مجھے حیض آگیا۔ نبی ﷺ میرے پاس آئے اور میں رو رہی تھی۔ آپ نے فرمایا: تمہیں کیا بات ڈرا رہی ہے؟ میں نے کہا: بخدا میری تو یہ آرزو ہے کہ اس سال حج کو نہ آئی ہوتی۔ فرمایا: شاید تمہیں حیض آگیا ہے؟ میں نے کہا: ہاں۔ فرمایا: یہ تو ایک ایسی بات ہے جو اللہ تعالیٰ نے آدم کی بیٹیوں کے لئے مقدر کردی ہے۔ اس لئے جو کام حاجی کرتا ہے وہ تم کرو، سوائے اس کے کہ بیت اللہ کا طواف نہ کرنا تا وقتیکہ خون بند ہو جائے۔
صحیح بخاری 306
ہم سے عبداللہ بن یوسف نے بیان کیا، کہا: مالک نے ہمیں بتلایا۔ انہوں نے ہشام بن عروہ سے، ہشام نے اپنے باپ سے، اُن کے باپ نے حضرت عائشہ سے روایت کی۔ وہ کہتی تھیں کہ ابو حبیش کی لڑکی حضرت فاطمہ نے رسول اللہ ﷺ سے کہا: یا رسول اللہ! میرا تو خون بند نہیں ہوتا۔ کیا میں نماز چھوڑ دوں؟ تو رسول اللہ ﷺ نے فرمایا: یہ تو ایک رگ کا خون ہے، حیض نہیں۔ پس جب حیض آئے تو نماز چھوڑ دو۔ جب اس کا مقررہ وقت گزر جائے تو اپنے بدن سے خون دھو ڈالو اور نماز پڑھو۔
صحیح بخاری 307
ہم سے عبداللہ بن یوسف نے بیان کیا، کہا: مالک نے ہمیں بتلایا۔ انہوں نے ہشام بن عروہ سے، ہشام نے منذر کی بیٹی فاطمہ سے، فاطمہ نے حضرت ابو بکر کی بیٹی حضرت اسماء رضی اللہ عنہا سے روایت کی۔ وہ کہتی تھیں کہ ایک عورت نے رسول اللہ ﷺ سے پوچھا۔ اس نے کہا: یا رسول اللہ! بتلائیں اگر ہم میں سے کسی کے کپڑے کو حیض کا خون لگ جائے تو وہ کیا کرے؟ رسول اللہ ﷺ نے فرمایا: اگر تم میں سے کسی کے کپڑے کو حیض کا خون لگ جائے تو چاہیے کہ وہ اس کو کھرچ ڈالے۔ پھر اس کو پانی سے اچھی طرح دھو ڈالے۔ اس کے بعد اس میں نماز پڑھ لے۔
صحیح بخاری 308
ہم سے اصبغ نے بیان کیا، کہا: ابن وہب نے مجھے بتلایا۔ انہوں نے کہا: عمرو بن حارث نے عبد الرحمان بن قاسم سے روایت کرتے ہوئے مجھے بتلایا۔ انہوں نے اپنے باپ سے، اُن کے باپ نے حضرت عائشہؓ سے روایت کی۔ کہتی تھیں کہ ہم میں سے ایک کو حیض آتا تو وہ حیض بند ہونے پر اپنے کپڑے سے خون کھرچ دیتی اور اسے دھوتی اور پھر سب پر پانی بہا کر اس کو جھاڑتی پھر اس میں نماز پڑھتی۔
صحیح بخاری 309
ہم سے اسحٰق نے بیان کیا، کہا: خالد بن عبد اللہ نے ہمیں بتلایا۔ انہوں نے خالد سے، خالد نے عکرمہ سے، عکرمہ نے حضرت عائشہ رضی اللہ عنہا سے روایت کی کہ نبی ﷺ کے ساتھ آپ کی بیویوں میں سے کوئی اعتکاف بیٹھیں اور وہ استحاضہ سے بیمار تھیں۔ خون دیکھتیں بلکہ کبھی خون کی وجہ سے اپنے نیچے طشت رکھتیں۔ اور عکرمہ کا خیال ہے کہ عائشہ نے کئم کا پانی دیکھا تو کہا: گویا کہ یہ وہ چیز ہے اسے فلانی پایا کرتی تھیں۔
صحیح بخاری 310
ہم سے قتیبہ نے بیان کیا، کہا: یزید بن زریع نے ہمیں بتلایا۔ انہوں نے خالد سے، خالد نے عکرمہ سے، عکرمہ نے حضرت عائشہؓ سے روایت کی کہ نبی ﷺ کے ساتھ آپ کی بیویوں میں سے ایک بیوی اعتکاف بیٹھیں تو وہ خون اور زردی دیکھتیں اور طشت ان کے نیچے ہوتا اور وہ نماز پڑھتیں۔
صحیح بخاری 311
ہم سے مسدد نے بیان کیا، کہا: معتمر نے ہمیں بتلایا۔ انہوں نے خالد سے، خالد نے عکرمہ سے، عکرمہ نے حضرت عائشہ سے روایت کی کہ ایک ام المؤمنین اعتکاف بیٹھیں اور وہ استحاضہ سے بیمار تھیں۔
صحیح بخاری 312
ہم سے ابو نعیم نے بیان کیا کہا: ابراہیم بن نافع نے ہمیں بتلایا۔ انہوں نے ابن ابی بھیج سے۔ ابن ابی بھیج نے مجاہد سے روایت کی۔ وہ کہتے تھے کہ حضرت عائشہ نے کہا: ہم میں سے کسی کے پاس ایک ہی کپڑا ہوتا جس میں اسے حیض آتا۔ اگر اسے کچھ خون لگ جاتا تو اپنا تھوک لیتیں اور اپنے ناخن سے اُسے دور کر دیتیں۔
صحیح بخاری 313
ہم سے عبد اللہ بن عبدالوہاب نے بیان کیا۔ کہا: حماد بن زید نے ہمیں بتلایا۔ انہوں نے ایوب سے، ایوب نے حفصہ سے، ابوعبداللہ (بخاری) نے کہا: یا (ایوب نے) ہشام بن حسان سے، انہوں نے حفصہ سے، حفصہ نے حضرت ام عطیہ سے، انہوں نے نبی ﷺ سے روایت کی۔ کہتی تھیں ہمیں یا جاتا تھا کہ ہم میت پر تین دن سے زیادہ سوگ کریں مگر خاوند پر چار مہینے اور دس دن۔ اور نہ سرمہ لگائیں اور نہ خوشبو لگائیں اور نہ رنگا ہوا کپڑا پہنیں، سوائے اس کپڑے کے کہ جو بننے سے پہلے رنگا گیا ہو۔ اور طہر کے وقت جب ہم میں سے کوئی اپنے حیض سے فارغ ہونے پر نہائے تو ہمیں تھوڑی سی قسط کی خوشبو لگانے کی اجازت دی گئی اور ہمیں جنازوں کے ساتھ جانے سے منع کیا جاتا تھا۔ (ابوعبداللہ بخاری نے) کہا کہ اس کو ہشام بن حسان نے حفصہ سے روایت کیا۔ حفصہ نے حضرت ام عطیہ سے۔ حضرت ام عطیہ نے نبی ﷺ سے۔