کتاب 39: باب قَوْلِ النَّبِيِّ صلى الله عليه وسلم: «بُعِثْتُ أَنَا وَالسَّاعَةَ كَهَاتَيْنِ»
صحیح بخاری
صحیح بخاری 6503
سعید بن ابی مریم نے ہم سے بیان کیا کہ ابوغسان نے ہمیں بتایا کہ ابوحازم نے ہمیں حضرت سہلؓ سے روایت کرتے ہوئے بتایا۔ اُنہوں نے کہا رسول اللہ ﷺ نے فرمایا: میری بعثت اور وہ گھڑی یوں ہے اور آپؐ اپنی دونوں انگلیوں سے اشارہ فرماتے تھے اور دونوں کو لمبا کرتے تھے۔
صحیح بخاری 6504
عبداللہ بن محمد نے جو کہ جُعفی ہیں مجھ سے بیان کیا کہ وہب بن جریر نے ہمیں بتایا۔ شعبہ نے ہم سے بیان کیا۔ شعبہ نے قتادہ اور ابو تیاح سے، ان دونوں نے حضرت انسؓ سے، حضرت انسؓ نے نبی ﷺ سے روایت کی۔ آپؐ نے فرمایا: میری بعثت اور وہ گھڑی اِن دونوں کی طرح ہے۔
صحیح بخاری 6505
یحيٰ بن یوسف نے مجھ سے بیان کیا کہ ابوبکر (بن عیاش) نے ہمیں خبر دی۔ اُنہوں نے ابو حصین سے، ابو حصین نے ابو صالح سے، ابو صالح نے حضرت ابو ہریرہؓ سے، حضرت ابو ہریرہؓ نے نبی ﷺ سے روایت کرتے ہوئے بیان کیا۔ آپؐ نے فرمایا: میری بعثت اور وہ گھڑی ایسی ہے جیسے یہ دونوں یعنی دونوں انگلیاں۔ (ابوبکر بن عیاش کی طرح) اسرائیل نے بھی ابو حصین سے اس کو روایت کیا۔