کتاب 33: باب هَلْ يَدْخُلُ فِي الأَيْمَانِ وَالنُّذُورِ الأَرْضُ وَالْغَنَمُ وَالزُّرُوعُ وَالأَمْتِعَةُ
صحیح بخاری
صحیح بخاری 6707
اسماعیل نے ہم سے بیان کیا، کہا: مالک نے مجھے بتایا۔ انہوں نے ثور بن زید دیلی سے، ثور نے ابوالغیث سے، جو ابن مطیع کے غلام تھے۔ ابوالغیث نے حضرت ابوہریرہؓ سے روایت کی۔ انہوں نے کہا: ہم خیبر کی جنگ میں رسول اللہﷺ کے ساتھ نکلے اور ہم نے نہ سونا غنیمت میں لیا اور نہ چاندی، صرف جائیدادیں اور کپڑے اور اسباب ہی لئے۔ بنو ضُبَیب میں سے ایک شخص نے جسے رفاعہ بن زید کہتے تھے رسول اللہﷺ کو ایک غلام ہدیہ میں دیا جسے مدعم کہتے تھے، رسول اللہﷺ نے اس کو وادی القریٰ کی طرف بھیجا۔ جب آپؐ وادی القریٰ میں پہنچے تو اسی اثنا میں کہ مدعم رسول اللہﷺ کا کجاوہ نیچے رکھ رہا تھا، ایک تیر آیا جس کا مارنے والا معلوم نہ ہوا اور اس نے مدعم کو مار ڈالا۔ لوگوں نے کہا: اس کو جنت مبارک ہو۔ رسول اللہﷺ نے فرمایا: ہرگز نہیں، اس ذات کی قسم جس کے ہاتھ میں میری جان ہے کہ وہ چادر جو اس نے خیبر کی جنگ میں غنیمت کے ان مالوں سے لی تھی جو ابھی تقسیم نہیں ہوئے تھے، وہ اس پر آگ ہو کر بھڑک رہی ہے۔ جب لوگوں نے یہ سنا تو ایک شخص جوتی کا ایک تسمہ یا دو تسمے نبیﷺ کے پاس لایا۔ آپؐ نے فرمایا: یہ آگ کا ایک تسمہ تھا یا فرمایا: یہ آگ کے دو تسمے تھے۔