کتاب 4: باب الضَّرْبِ بِالْجَرِيدِ وَالنِّعَالِ

صحیح بخاری

صحیح بخاری 6775

حَدَّثَنَا سُلَيْمَانُ بْنُ حَرْبٍ حَدَّثَنَا وُهَيْبُ بْنُ خَالِدٍ عَنْ أَيُّوبَ عَنْ عَبْدِ اللَّهِ بْنِ أَبِي مُلَيْكَةَ عَنْ عُقْبَةَ بْنِ الْحَارِثِ أَنَّ النَّبِيَّ صلى الله عليه وسلم أُتِيَ بِنُعَيْمَانَ أَوْ بِابْنِ نُعَيْمَانَ وَهْوَ سَكْرَانُ فَشَقَّ عَلَيْهِ وَأَمَرَ مَنْ فِي الْبَيْتِ أَنْ يَضْرِبُوهُ فَضَرَبُوهُ بِالْجَرِيدِ وَالنِّعَالِ وَكُنْتُ فِيمَنْ ضَرَبَهُ.

سلیمان بن حرب نے ہم سے بیان کیا کہ وہیب بن خالد نے ہمیں بتایا۔ اُنہوں نے ایوب سے، ایوب نے عبداللہ بن ابی ملیکہ سے، عبداللہ نے حضرت عقبہ بن حارثؓ سے روایت کی کہ نبی ﷺ کے پاس نعیمان کو یا نعیمان کے بیٹے کو لایا گیا اور وہ نشہ میں تھا۔ آپؐ کو یہ سخت ناگوار گزرا اور آپؐ نے ان لوگوں کو جو گھر میں تھے حکم دیا کہ اس کو ماریں اور انہوں نے اس کو چھڑیوں اور جوتوں سے مارا اور میں بھی اُن لوگوں میں تھا جنہوں نے اس کو مارا۔

صحیح بخاری 6776

حَدَّثَنَا مُسْلِمٌ حَدَّثَنَا هِشَامٌ حَدَّثَنَا قَتَادَةُ عَنْ أَنَسٍ قَالَ جَلَدَ النَّبِيُّ صلى الله عليه وسلم فِي الْخَمْرِ بِالْجَرِيدِ وَالنِّعَالِ وَجَلَدَ أَبُو بَكْرٍ أَرْبَعِينَ.

مسلم (بن ابراہیم) نے ہم سے بیان کیا کہ ہشام (دستوائی) نے ہمیں بتایا۔ قتادہ نے ہم سے بیان کیا۔ قتادہ نے حضرت انسؓ سے روایت کی۔ اُنہوں نے کہا: نبی ﷺ نے شراب کی وجہ سے چھڑی اور جوتوں سے پٹوایا اور حضرت ابوبکرؓ نے چالیس کوڑے لگوائے۔

صحیح بخاری 6777

حَدَّثَنَا قُتَيْبَةُ حَدَّثَنَا أَبُو ضَمْرَةَ أَنَسٌ عَنْ يَزِيدَ بْنِ الْهَادِ عَنْ مُحَمَّدِ بْنِ إِبْرَاهِيمَ عَنْ أَبِي سَلَمَةَ عَنْ أَبِي هُرَيْرَةَ ـ رضى الله عنه ـ أُتِيَ النَّبِيُّ صلى الله عليه وسلم بِرَجُلٍ قَدْ شَرِبَ قَالَ " اضْرِبُوهُ ". قَالَ أَبُو هُرَيْرَةَ فَمِنَّا الضَّارِبُ بِيَدِهِ وَالضَّارِبُ بِنَعْلِهِ وَالضَّارِبُ بِثَوْبِهِ فَلَمَّا انْصَرَفَ قَالَ بَعْضُ الْقَوْمِ أَخْزَاكَ اللَّهُ. قَالَ " لاَ تَقُولُوا هَكَذَا لاَ تُعِينُوا عَلَيْهِ الشَّيْطَانَ ".

قتیبہ (بن سعید) نے ہم سے بیان کیا کہ ابو ضمرہ انس (بن عیاض) نے ہمیں بتایا۔ اُنہوں نے یزید بن ہاد سے، یزید نے محمد بن ابراہیم سے، اُنہوں نے ابو سلمہ سے، ابو سلمہ نے حضرت ابوہریرہ رضی اللہ عنہ سے روایت کی۔ اُنہوں نے کہا کہ نبی ﷺ کے پاس ایک شخص لایا گیا جس نے شراب پی تھی۔ آپؐ نے فرمایا: اس کو مارو۔ حضرت ابوہریرہ رضی اللہ عنہ کہتے تھے: ہم میں سے وہ بھی تھا جو اپنے ہاتھ سے مار رہا تھا اور وہ بھی تھا جو اپنے جوتے سے مار رہا تھا اور وہ بھی تھا جو اپنے کپڑے سے مار رہا تھا۔ جب وہ واپس لوٹا تو لوگوں میں سے کسی نے کہا: اللہ تمہیں رسوا کرے۔ آپؐ نے فرمایا: ایسا مت کہو۔ شیطان کو اس پر قابو پانے میں مت مدد دو۔

صحیح بخاری 6778

حَدَّثَنَا عَبْدُ اللَّهِ بْنُ عَبْدِ الْوَهَّابِ حَدَّثَنَا خَالِدُ بْنُ الْحَارِثِ حَدَّثَنَا سُفْيَانُ حَدَّثَنَا أَبُو حَصِينٍ سَمِعْتُ عُمَيْرَ بْنَ سَعِيدٍ النَّخَعِيَّ قَالَ سَمِعْتُ عَلِيَّ بْنَ أَبِي طَالِبٍ ـ رضى الله عنه ـ قَالَ مَا كُنْتُ لأُقِيمَ حَدًّا عَلَى أَحَدٍ فَيَمُوتَ فَأَجِدَ فِي نَفْسِي إِلاَّ صَاحِبَ الْخَمْرِ فَإِنَّهُ لَوْ مَاتَ وَدَيْتُهُ وَذَلِكَ أَنَّ رَسُولَ اللَّهِ صلى الله عليه وسلم لَمْ يَسُنَّهُ.

عبداللہ بن عبدالوہاب نے ہم سے بیان کیا کہ خالد بن حارث نے ہمیں بتایا۔ سفیان (ثوری) نے ہم سے بیان کیا۔ ابوحصین (عثمان بن عاصم اسدی) نے ہمیں بتایا کہ میں نے عمیر بن سعید نخعی سے سنا۔ وہ کہتے تھے: میں نے حضرت علی بن ابی طالب رضی اللہ عنہ سے سنا۔ اُنہوں نے کہا: میں جو کسی کو شرعی سزا دوں اور وہ مر جائے تو میں اپنے نفس میں کوئی رنج محسوس نہ کروں سوائے شرابی کے کیونکہ اگر وہ مر جائے تو میں اس کی دیت دوں اور یہ اس لئے کہ رسول اللہ ﷺ نے اس کے لئے (ایسی) کوئی سزا مقرر نہیں کی۔

صحیح بخاری 6779

حَدَّثَنَا مَكِّيُّ بْنُ إِبْرَاهِيمَ عَنِ الْجُعَيْدِ عَنْ يَزِيدَ بْنِ خُصَيْفَةَ عَنِ السَّائِبِ بْنِ يَزِيدَ قَالَ كُنَّا نُؤْتَى بِالشَّارِبِ عَلَى عَهْدِ رَسُولِ اللَّهِ صلى الله عليه وسلم وَإِمْرَةِ أَبِي بَكْرٍ وَصَدْرًا مِنْ خِلاَفَةِ عُمَرَ فَنَقُومُ إِلَيْهِ بِأَيْدِينَا وَنِعَالِنَا وَأَرْدِيَتِنَا حَتَّى كَانَ آخِرُ إِمْرَةِ عُمَرَ فَجَلَدَ أَرْبَعِينَ حَتَّى إِذَا عَتَوْا وَفَسَقُوا جَلَدَ ثَمَانِينَ.

مکی بن ابراہیم نے ہم سے بیان کیا۔ اُنہوں نے جعید (بن عبدالرحمٰن) سے، جعید نے یزید بن خصیفہ سے، یزید نے سائب بن یزید سے روایت کی۔ اُنہوں نے کہا: رسول اللہ ﷺ کے زمانہ میں اور حضرت ابوبکرؓ کی خلافت میں اور حضرت عمرؓ کی خلافت کی ابتدا میں ہمارے پاس شرابی لایا جاتا تو ہم اس کی سزا دہی کے لیے اٹھ کھڑے ہوتے۔ اپنے ہاتھوں اور اپنی جوتیوں اور اپنی چادروں سے اس کو مارتے۔ جب حضرت عمرؓ کی خلافت کا آخری زمانہ ہوا تو اُنہوں نے چالیس کوڑے لگوائے۔ جب لوگ سرکش ہوگئے اور احکام الٰہی سے نکل گئے تو وہ اَسّی کوڑے لگوانے لگے۔

10 von 10 heute frei