کتاب 5: باب مَا يُكْرَهُ مِنْ لَعْنِ شَارِبِ الْخَمْرِ وَإِنَّهُ لَيْسَ بِخَارِجٍ مِنَ الْمِلَّةِ

صحیح بخاری

صحیح بخاری 6780

حَدَّثَنَا يَحْيَى بْنُ بُكَيْرٍ حَدَّثَنِي اللَّيْثُ قَالَ حَدَّثَنِي خَالِدُ بْنُ يَزِيدَ عَنْ سَعِيدِ بْنِ أَبِي هِلاَلٍ عَنْ زَيْدِ بْنِ أَسْلَمَ عَنْ أَبِيهِ عَنْ عُمَرَ بْنِ الْخَطَّابِ أَنَّ رَجُلاً عَلَى عَهْدِ النَّبِيِّ صلى الله عليه وسلم كَانَ اسْمُهُ عَبْدَ اللَّهِ وَكَانَ يُلَقَّبُ حِمَارًا وَكَانَ يُضْحِكُ رَسُولَ اللَّهِ صلى الله عليه وسلم وَكَانَ النَّبِيُّ صلى الله عليه وسلم قَدْ جَلَدَهُ فِي الشَّرَابِ فَأُتِيَ بِهِ يَوْمًا فَأَمَرَ بِهِ فَجُلِدَ فَقَالَ رَجُلٌ مِنَ الْقَوْمِ اللَّهُمَّ الْعَنْهُ مَا أَكْثَرَ مَا يُؤْتَى بِهِ. فَقَالَ النَّبِيُّ صلى الله عليه وسلم " لاَ تَلْعَنُوهُ فَوَاللَّهِ مَا عَلِمْتُ أَنَّهُ يُحِبُّ اللَّهَ وَرَسُولَهُ ".

یحيٰ بن بکیر نے ہم سے بیان کیا کہ لیث نے مجھے بتایا۔ اُنہوں نے کہا: خالد بن یزید نے مجھے بتایا۔ خالد نے سعید بن ابی ہلال سے، سعید نے زید بن اسلم سے، زید نے اپنے باپ سے، اُن کے باپ نے حضرت عمر بن خطابؓ سے روایت کی کہ نبی ﷺ کے زمانہ میں ایک شخص ہوا کرتا تھا۔ اُس کا نام عبداللہ تھا اور حمار کے لقب سے بلایا جاتا تھا اور وہ رسول اللہ ﷺ کو ہنسایا کرتا تھا اور نبی ﷺ نے اُس کو شراب کی وجہ سے کوڑے بھی لگائے تھے۔ ایک دن اس کو لایا گیا۔ آپؐ نے اس کو سزا دینے کا حکم دیا تو اُس کو کوڑے لگائے گئے۔ لوگوں میں ایک شخص بولا۔ اے اللہ! اس کو اپنی رحمت سے دور رکھنا۔ کتنی ہی بار اسے پکڑ کر لایا گیا۔ نبی ﷺ نے فرمایا: اس پر لعنت نہ کرو۔ اللہ کی قسم! میں تو یہی جانتا ہوں کہ وہ اللہ اور اس کے رسول سے محبت رکھتا ہے۔

صحیح بخاری 6781

حَدَّثَنَا عَلِيُّ بْنُ عَبْدِ اللَّهِ بْنِ جَعْفَرٍ حَدَّثَنَا أَنَسُ بْنُ عِيَاضٍ حَدَّثَنَا ابْنُ الْهَادِ عَنْ مُحَمَّدِ بْنِ إِبْرَاهِيمَ عَنْ أَبِي سَلَمَةَ عَنْ أَبِي هُرَيْرَةَ قَالَ أُتِيَ النَّبِيُّ صلى الله عليه وسلم بِسَكْرَانَ فَأَمَرَ بِضَرْبِهِ فَمِنَّا مَنْ يَضْرِبُهُ بِيَدِهِ وَمِنَّا مَنْ يَضْرِبُهُ بِنَعْلِهِ وَمِنَّا مَنْ يَضْرِبُهُ بِثَوْبِهِ فَلَمَّا انْصَرَفَ قَالَ رَجُلٌ مَالَهُ أَخْزَاهُ اللَّهُ. فَقَالَ رَسُولُ اللَّهِ صلى الله عليه وسلم " لاَ تَكُونُوا عَوْنَ الشَّيْطَانِ عَلَى أَخِيكُمْ ".

علی بن عبداللہ بن جعفر نے ہم سے بیان کیا کہ انس بن عیاض نے ہمیں بتایا۔ (عبداللہ) بن ہاد نے ہم سے بیان کیا۔ اُنہوں نے محمد بن ابراہیم سے، محمد بن ابراہیم نے ابوسلمہ (بن عبدالرحمٰن) سے، ابوسلمہ نے حضرت ابوہریرہؓ سے روایت کی۔ وہ کہتے تھے کہ نبی ﷺ کے پاس ایک شرابی لایا گیا۔ آپؐ نے اس کو مارنے کا حکم دیا۔ تو ہم میں سے وہ بھی تھا جو اُس کو اپنے ہاتھ سے مار رہا تھا اور ہم میں سے وہ بھی تھا جو اُس کو اپنے جوتے سے مار رہا تھا اور ہم میں سے کوئی ایسا بھی تھا جو اُس کو اپنے کپڑے سے مار رہا تھا۔ جب وہ واپس لوٹا تو ایک شخص بولا: اس کو کیا ہوگیا۔ اللہ اس کو رسوا کرے۔ تو رسول اللہ ﷺ نے فرمایا: تم اپنے بھائی کے خلاف شیطان کے مددگار نہ بنو۔

10 von 10 heute frei