کتاب 27: باب الْمَرْأَةِ تَحِيضُ بَعْدَ الإِفَاضَةِ
صحیح بخاری
صحیح بخاری 328
ہم سے عبداللہ بن یوسف نے بیان کیا، انہوں نے کہا: مالک نے ہمیں بتلایا۔ انہوں نے عبد اللہ بن ابی بکر بن محمد بن عمرو بن حزم سے، عبد اللہ نے اپنے باپ سے، انہوں نے عمرہ بنت عبدالرحمان سے، عمرہ نے حضرت عائشہ نبی ﷺ کی بیوی سے روایت کی کہ انہوں نے رسول اللہ ﷺ سے کہا: یا رسول اللہ! صفیہ کو حیض آگیا ہے تو آپ نے فرمایا: شاید وہ ہمیں روک رکھے گی۔ کیا اس نے تمہارے ساتھ طواف نہیں کیا تھا؟ انہوں نے کہا: ہاں۔ فرمایا: پھر چلو۔
صحیح بخاری 329
ہم سے معلی بن اسد نے بیان کیا۔ انہوں نے کہا: وہیب نے ہمیں بتلایا۔ انہوں نے عبداللہ بن طاؤس سے، عبداللہ نے اپنے باپ سے، ان کے باپ نے حضرت عبداللہ بن عباس سے روایت کی۔ انہوں نے کہا کہ حائضہ کو اجازت دی گئی ہے کہ اگر اسے حیض آئے تو وہ کوچ کرے۔
صحیح بخاری 330
(ابن طاؤس نے کہا ) اور حضرت ابن عمر ابتداء میں کہا کرتے تھے کہ وہ کوچ نہ کرے۔ پھر میں نے ان کو کہتے سنا کہ وہ کوچ کرے۔ رسول اللہ ﷺ نے انہیں اجازت دی ہے۔