کتاب 7: كتاب التيمم
صحیح بخاری
صحیح بخاری 334
ہم سے عبداللہ بن یوسف نے بیان کیا کہا: مالک نے ہمیں بتلایا۔ انہوں نے عبدالرحمن بن قاسم سے، انہوں نے اپنے باپ سے، ان کے باپ نے حضرت عائشہ نبی ﷺ کی بیوی سے روایت کی۔ وہ کہتی تھیں کہ ہم رسول اللہ ﷺ کے ساتھ آپ کے سفروں میں سے کسی ایک سفر میں نکلے۔ جب بَيْدَاء يا ذاتُ الْجَيْش مقام میں پہنچے تو میرا ایک ہار ٹوٹ کر گر گیا۔ رسول اللہ ﷺ اس کے ڈھونڈنے کے لیے ٹھہر گئے اور لوگ بھی آپ کے ساتھ ٹھہر گئے اور وہ پانی کے نزدیک نہ تھے۔ اس پر لوگ حضرت ابو بکر صدیق کے پاس آئے اور کہا: کیا آپ نہیں دیکھتے کہ حضرت عائشہ نے کیا کیا؟ رسول اللہ ﷺ اور لوگوں کو ٹھہرا دیا اور وہ پانی کے نزدیک نہیں ہیں اور نہ اُن کے ساتھ پانی ہے۔ اس پر حضرت ابو بکر آئے اور رسول اللہ ﷺ نے اپنا سر میری ران پر رکھا ہوا تھا۔ آپ سو گئے تھے۔ کہنے لگے تم نے رسول اللہ ﷺ اور لوگوں کو روک دیا ہے اور وہ پانی کے نزدیک نہیں ہیں اور نہ ان کے ساتھ پانی ہے۔ حضرت عائشہ کہتی تھیں کہ حضرت ابو بکر مجھے ملامت کرنے لگے اور جو اللہ نے کہلانا چاہا، انہوں نے کہا۔ اور میرے پہلو میں اپنے ہاتھ سے مجھے چوک دینے لگے اور ہلنے جلنے سے صرف یہی بات مجھے روکتی تھی کہ نبیؐ میری ران پر آرام کر رہے تھے۔ جب صبح ہوئی تو آپ اُٹھے مگر پانی نہ تھا۔ اس پر اللہ تعالیٰ نے تیمم کی آیت نازل کی اور لوگوں نے تیمم کیا۔ اُسید بن حضیر نے کہا: اے ابو بکر کی اولاد تمہاری برکتوں میں سے یہ کوئی پہلی برکت نہیں۔ حضرت عائشہ کہتی تھیں کہ ہم نے اس اونٹ کو اٹھایا جس پر میں سوار تھی تو ہم نے وہ ہار اُس کے نیچے پایا۔
صحیح بخاری 335
ہم سے محمد بن سنان نے بیان کیا کہا: بشیم نے ہم سے بیان کیا۔ نیز (ابوعبداللہ بخاری) نے کہا کہ مجھ سے سعید بن نضر نے بیان کیا کہا: بشیم نے ہمیں بتلایا۔ انہوں نے کہا: ہمیں سیار نے بتلایا کہا: یزید فقیر نے، جو کہ صہیب کے بیٹے ہیں، ہم سے بیان کیا کہتے تھے: حضرت جابر بن عبداللہ نے ہمیں بتلایا کہ نبی ﷺ نے فرمایا: پانچ ایسی باتیں مجھے دی گئی ہیں کہ مجھ سے پہلے وہ کسی کو بھی نہیں دی گئیں۔ رعب سے میری مدد کی گئی ہے جو مہینہ بھر کی مسافت تک اثر کرتا ہے اور ساری زمین میرے لیے سجدہ گاہ اور پاک کرنے والی بنائی گئی ہے۔ پس میری امت میں سے جس شخص کو بھی (جہاں بھی) نماز کا وقت آجائے وہ وہیں پڑھ لے اور میرے لیے غنیمتیں حلال کی گئی ہیں اور مجھ سے پہلے کسی کے لیے حلال نہیں تھیں اور مجھے سفارش کرنے کا اختیار دیا گیا ہے اور نبی پہلے محض اپنی قوم کی طرف ہی بھیجا جاتا تھا اور میں تمام لوگوں کے لئے بھیجا گیا ہوں۔
صحیح بخاری 336
ہم سے زکریا بن بیٹی نے بیان کیا کہا: عبد اللہ بن تمیر نے ہم سے بیان کیا۔ انہوں نے کہا: ہشام بن عروہ نے ہمیں بتلایا۔ انہوں نے اپنے باپ سے، ان کے باپ نے حضرت عائشہؓ سے روایت کی کہ انہوں نے حضرت اسماء سے گلے کا ہار عاریہ لیا وہ (ہار) گم ہو گیا تو رسول اللہﷺ نے ایک شخص کو بھیجا اور اس نے وہ ڈھونڈ لیا۔ اسی اثناء میں ان کو نماز کا وقت بھی آ گیا اور ان کے ساتھ پانی نہ تھا۔ انہوں نے نماز پڑھ لی اور رسول اللہﷺ کے پاس اس کی شکایت کی۔ اس پر اللہ تعالی نے تیم کی آیت نازل فرمائی۔ اور اسید بن حضیر نے حضرت عائشہ سے کہا: اللہ آپ کو بہتر بدلہ دے۔ بخدا آپ کے ساتھ کوئی وقوعہ بھی ایسا نہیں ہوا، جسے آپ نے برا منایا ہو اور اللہ تعالیٰ نے اس میں آپ کے لیے اور مسلمانوں کے لیے بھلائی نہ رکھی ہو۔
صحیح بخاری 337
ہم سے یحیی بن بکیر نے بیان کیا کہا: لیٹ نے ہمیں بتلایا۔ انہوں نے جعفر بن ربیعہ سے، جعفر نے اعرج سے روایت کی کہ میں نے حضرت ابن عباس کے غلام عمیر سے سنا۔ وہ کہتے تھے: میں اور نبی ﷺ کی بیوی حضرت میمونہ کے (آزاد کرده) غلام عبداللہ بن سیار آئے اور ہم حضرت ابو جہیم بن حارث بن صمہ انصاری کے پاس اندر گئے تو حضرت ابو جہیم نے کہا کہ نبی ﷺ پیر جمل کی طرف سے آ رہے تھے کہ ایک شخص آپ سے ملا اور اس نے آپ کو سلام کیا۔ نبی ﷺ نے اس کو جواب نہیں دیا۔ آپ سامنے دیوار کی طرف آئے اور اپنے منہ اور دونوں ہاتھوں کا مسح کیا اور پھر آپ نے اس کو سلام کا جواب دیا۔
صحیح بخاری 338
ہم سے آدم نے بیان کیا کہا: شعبہ نے ہم سے بیان کیا۔ (انہوں نے کہا: ) حکم نے ہمیں بتلایا۔ انہوں نے ذر سے، ذر نے سعید بن عبدالرحمن بن ابزگی سے، انہوں نے اپنے باپ سے روایت کی۔ انہوں نے کہا کہ ایک شخص حضرت عمر بن خطاب کے پاس آیا اور کہنے لگا میں جنبی ہوں اور مجھے پانی نہیں ملا تو حضرت عمار بن یاسر نے حضرت عمر بن خطاب سے کہا: کیا آپ کو یاد نہیں کہ ہم یعنی میں اور آپ ایک سفر میں تھے۔ آپ نے تو نماز نہ پڑھی اور میں تو مٹی میں (جانور کی طرح) لوٹا تھا اور نماز پڑھ لی تھی۔ میں نے نبی ﷺ کے پاس اس کا ذکر کیا تو نبی ﷺ نے فرمایا: تم کو صرف اس طرح کافی تھا اور آپ نے اپنے دونوں ہاتھ زمین پر مارے پھر اُن میں پھونکا اور اپنے منہ اور دونوں ہاتھوں کا مسح کیا۔
صحیح بخاری 339
ہم سے حجاج نے بیان کیا کہا: شعبہ نے ہمیں بتایا۔ انہوں نے حکم سے، حکم نے ذر سے، ذر نے سعید بن عبد الرحمن بن ابزیؒ سے، انہوں نے اپنے باپ سے روایت کی کہ حضرت عمارؓ نے یہی کہا: اور شعبہ نے اپنے دونوں ہاتھ زمین پر مارے اور پھر اپنے منہ کے نزدیک کئے پھر اپنے منہ اور اپنے ہاتھوں کا مسح کیا۔ اور نضر کہتے تھے کہ شعبہ نے حکم روایت کرتے ہوئے ہمیں بتلایا۔ کہا کہ میں نے ذرّ کو ابن عبد الرحمن بن ابزیؒ سے روایت کرتے ہوئے سنا کہ حکم کہتے تھے کہ میں نے ابن عبد الرحمان بن ابزیؒ سے سنا۔ وہ اپنے باپ سے روایت کرتے تھے کہ حضرت عمارؓ نے کہا: { پاکیزہ مٹی مسلمان کے لیے وضو (کی قائم مقام) ہے جو اس کی پانی کی ضرورت کو پورا کر دیتی ہے۔ }
صحیح بخاری 340
ہم سے سلیمان بن حرب نے بیان کیا کہا: شعبہ نے ہمیں بتلایا۔ انہوں نے حکم سے، حکم نے ذر سے، ذر نے ابن عبد الرحمان بن ابری سے، انہوں نے اپنے باپ سے روایت کی کہ وہ حضرت عمرؓ کے پاس حاضر ہوئے اور حضرت عمار نے انہیں کہا: ہم ایک دستہ فوج میں تھے اور ہم جنبی ہوئے تھے اور انہوں نے بجائے ”تَفَلَ فِيهِمَا“ کے ”نَفَخَ فِيهِمَا“ کہا۔ یعنی (آپ نے) اُن دونوں (ہاتھوں) میں زور سے پھونکا۔
صحیح بخاری 341
ہم سے محمد بن کثیر نے بیان کیا کہ شعبہ نے ہمیں بتلایا۔ انہوں نے حکم سے، حکم نے ذرّ سے، ذرّ نے ابن عبد الرحمن بن ابزگی سے روایت کی۔ انہوں نے (اپنے باپ) عبدالرحمن سے، انہوں نے کہا کہ حضرت عمار نے حضرت عمرؓ سے کہا کہ میں مٹی میں لوٹا تھا اور پھر نبیﷺ کے پاس آیا تو آپ نے فرمایا: منہ اور ہاتھوں کا مسح کرنا ہی تمہارے لئے کافی ہے۔
صحیح بخاری 342
ہم سے مسلم (بن ابراہیم) نے بیان کیا (کہا:) شعبہ نے ہمیں بتلایا۔ انہوں نے حکم سے، حکم نے ذر سے، ذر نے ابن عبد الرحمن (بن ابزگی) سے، انہوں نے عبدالرحمن سے روایت کی۔ کہتے تھے کہ میں حضرت عمر کے پاس حاضر ہوا اور اُن کو حضرت عمار نے کہا۔۔۔۔۔اور پھر ساری حدیث بیان کی۔
صحیح بخاری 343
ہم سے محمد بن بشار نے بیان کیا کہا: غندر نے ہم سے بیان کیا۔ (انہوں نے کہا:) شعبہ نے ہمیں بتلایا۔ انہوں نے حکم سے، حکم نے ذر سے، ذر نے ابن عبدالرحمن بن ابر علی سے، انہوں نے اپنے باپ سے روایت کی۔ کہتے تھے کہ حضرت عمار نے کہا: نبی ﷺ نے زمین پر اپنا ہاتھ مارا اور پھر اپنے منہ اور اپنے دونوں ہاتھوں کا مسح کیا۔
صحیح بخاری 344
ہم سے مسدد نے بیان کیا کہا: بیچی بن سعید نے مجھ سے بیان کیا۔ انہوں نے کہا: عوف نے ہم سے بیان کیا، کہا: ابو رجاء نے حضرت عمران سے روایت کرتے ہوئے ہمیں بتلایا۔ کہا: ہم نبی ﷺ کے ساتھ ایک سفر میں تھے اور ہم رات کو چلے۔ جب رات کا آخری حصہ ہوا تو ہم ایسی نیند پڑ گئے کہ مسافر کے نزدیک اس سے زیادہ میٹھی اور کوئی نہ ہوگی۔ پھر ہمیں سورج کی گرمی ہی نے جگایا اور سب سے پہلے جو جاگا؛ فلاں تھا۔ پھر فلاں، پھر فلاں۔ ابو رجاء ان کا نام لیتے تھے مگر عوف بھول گئے۔ پھر حضرت عمر بن خطاب چوتھے تھے اور نبی ﷺ کو جب آپ سوتے نہ جگایا جاتا۔ یہاں تک کہ آپ خود ہی جاگتے۔ کیونکہ ہمیں پتہ نہ ہوتا کہ آپ کی نیند میں آپ کو کیا کچھ پیش آرہا ہے۔ جب حضرت عمر جاگے اور انہوں نے جو کچھ لوگوں پر گذرا تھا دیکھا؛ اور وہ دلیر آدمی تھے۔ انہوں نے اللہ اکبر کہا اور تکبیر کے ساتھ اپنی آواز بلند کی اور وہ اللهُ أَكْبَرُ کہتے رہے اور تکبیر کے ساتھ اپنی آواز بلند کرتے جاتے تھے۔ یہاں تک کہ نبی ﷺ اُن کی آواز سے جاگ پڑے۔ جب آپ جاگے تو لوگوں نے جو اُن کے ساتھ ہوا تھا اُس کی آپ کے پاس شکایت کی۔ آپ نے فرمایا: کوئی ضرر نہیں۔ لَا ضَيْرَ یا لَا يَضِيرُ۔ کوچ کرو اور آپ نے کوچ کیا۔ کچھ دُور نہیں گئے تھے کہ آپ اُترے اور وضو کا پانی منگوایا اور وضو کیا اور نماز کی منادی کی گئی اور آپ نے لوگوں کو نماز پڑھائی۔ جب آپ اپنی نماز پڑھ کر پھرے تو کیا دیکھتے ہیں کہ ایک شخص ہے جو الگ تھلگ بیٹھا ہے۔ اُس نے لوگوں کے ساتھ نماز نہیں پڑھی تھی۔ آپ نے فرمایا: اے فلاں! لوگوں کے ساتھ نماز پڑھنے سے کس بات نے روکا ہے؟ اُس نے کہا کہ مجھے جنابت ہوگئی ہے اور پانی نہیں۔ فرمایا: مٹی کو لو؛ وہ تمہیں کافی ہے۔ پھر نبی ﷺ چل پڑے اور لوگوں نے آپ کے پاس پیاس کی شکایت کی۔ آپ اُترے اور کسی شخص کو بلایا۔ ابو رجاء اس کا نام لیتے تھے اور عوف بھول گئے۔ اور حضرت علی کو بلایا اور فرمایا کہ تم دونوں جاؤ اور پانی ڈھونڈ کر لاؤ۔ اس پر وہ دونوں چل پڑے اور ایک عورت کو اپنے ایک اونٹ پر (سوار) پانی کے دو مشکیزوں یا دو پکھالوں کے درمیان (بیٹھے ہوئے) دیکھا۔ اور انھوں نے اس سے پوچھا: پانی کہاں ہے؟ اس نے کہا: میں نے پانی کل اس وقت دیکھا تھا اور ہمارے آدمی پیچھے ہیں۔ ان دونوں نے اس سے کہا: چلو۔ اُس نے کہا: کہاں؟ انہوں نے کہا: رسول اللہ ﷺ کے پاس۔ اس نے کہا: وہی جسے صابی کہتے ہیں؟ انہوں نے کہا: وہی ہے جو تمہاری مراد ہے۔ پس چلو۔ وہ اسے نبی ﷺ کے پاس لے کر آئے اور آپ کو سارا واقعہ بتایا۔ حضرت عمران کہتے تھے کہ انہوں نے اس کو اُس کے اونٹ سے نیچے اُتارا اور نبی ﷺ نے ایک برتن منگوایا اور اس میں اُن دو مشکیزوں یا پکھالوں کے دہانوں سے پانی ڈالا اور ان کے اوپر کے دہانے تسمہ سے بند کر دیے اور نیچے کے دہانے چھوڑ دئے اور لوگوں میں منادی کی گئی: پیو پلاؤ اور پانی لے لو۔ پس جس نے چاہا پیا، پلایا اور جس نے چاہا پانی لیا اور آخر یہ ہوا کہ آپ نے اُس شخص کو پانی کا برتن دیا جسے جنابت ہو گئی تھی اور فرمایا: جاؤ اور اسے اپنے اوپر ڈال لو اور وہ جو کچھ اس کے پانی کے ساتھ کیا جارہا تھا؛ کھڑی دیکھ رہی تھی اور اللہ تعالیٰ کی قسم ہے کہ اُن پکھالوں سے ہمیں معلوم ہوتا تھا کہ وہ اس وقت سے بھی زیادہ بھری ہوئی ہیں کہ جب آپ نے ان سے پانی لینا شروع کیا تھا۔ نبی ﷺ نے فرمایا: اس کے لیے کچھ اکٹھا کرو تو اس کے لیے کچھ خشک کھجور میں اور کچھ آٹا اور کچھ ستو اکٹھے کئے۔ یہاں تک کہ اس کے لیے بہت سی خوراک جمع کردی اور ایک کپڑے میں ڈال کر اس عورت کو اس کے اونٹ پر سوار کیا اور وہ کپڑا اُس کے سامنے رکھ دیا۔ آپ نے فرمایا: تم جانتی ہو کہ ہم نے تمہارے پانی سے کچھ بھی کم نہیں کیا ہے۔ لیکن اللہ ہی ہے جس نے ہمیں پلایا ہے۔ اس کے بعد وہ اپنے گھر والوں کے پاس آئی اور وہ اُن سے رکی رہی تھی۔ کہنے لگے: اے فلانی! تجھے کس چیز نے روکا تھا۔ کہنے لگی: عجیب بات ہوئی۔ مجھے دو آدمی ملے اور وہ مجھ کو اُس (شخص) کے پاس لے گئے جسے صابی کہا جاتا ہے اور اُس نے اللہ کی قسم ایسا ایسا کیا اور وہ اس اور اُس کے درمیان تمام لوگوں سے بڑھ کر جادو گر ہے اور اپنی درمیانی انگلی اور سبابه یعنی انگوٹھے کے پاس والی انگلی سے نیچے کو اشارہ کیا اور پھر ان دونوں کو اوپر کو اٹھایا اور اس کی مراد آسمان و زمین تھے۔ یا یہ کہ وہ یقینا اللہ کے سچے رسول ہیں۔ اس کے بعد مسلمان اس عورت کے ارد گرد مشرکوں پر حملہ کرتے اور جس قبیلہ سے وہ تھی اس کو نقصان نہ پہنچاتے۔ ایک دن اس نے اپنی قوم سے کہا: میں سمجھتی ہوں کہ یہ لوگ تم کو عمداً چھوڑتے ہیں۔ پس کیا تمہیں اسلام میں داخل ہونے کی خواہش ہے؟ اس پر انہوں نے اس کی بات مان لی اور وہ اسلام میں داخل ہو گئے۔ ابو عبد اللہ نے کہا: صبا کے معنی ہیں ایک دین سے نکل کر دوسرے دین میں چلا گیا اور ابوالعالیہ نے کہا: الصَّابِئِينَ اور ایک نسخہ کے مطابق الصَّابِؤُونَ کہا۔ اہل کتاب کا ایک فرقہ ہے جو زبور پڑھا کرتے تھے۔ { (سورہ یوسف آیت ۳۴ میں جو) اصبُ (آیا ہے اس کے معنی ہیں) جھک جاؤں گا۔}
صحیح بخاری 345
ہم سے بشر بن خالد نے بیان کیا کہا: محمد غندر نے ہمیں بتلایا۔ انہوں نے شعبہ سے، شعبہ نے سلیمان سے، سلیمان نے ابو وائل سے روایت کی۔ وہ کہتے تھے کہ حضرت ابو موسیٰ نے حضرت عبداللہ بن مسعودؓ سے کہا کہ جب پانی نہ پائے تو نماز نہ پڑھے؟ حضرت عبد اللہ نے کہا: ہاں اگر میں مہینہ بھر پانی نہ پاؤں تو نماز نہ پڑھوں کہ اگر میں انہیں اس کے متعلق اجازت دے دیتا تو نوبت یہاں تک پہنچتی کہ جب ان میں سے کوئی سردی محسوس کرتا تو وہ اسی طرح کر لیتا یعنی تیمم کرتا اور نماز پڑھ لیتا۔ حضرت ابو موسیٰ کہتے تھے کہ میں نے کہا کہ حضرت عمار کی وہ بات کہاں جائے گی جو انہوں نے حضرت عمرؓ سے کی۔ انہوں نے جواب دیا کہ میں نہیں سمجھتا کہ حضرت عمار کی بات پر وہ مطمئن ہو گئے۔
صحیح بخاری 346
ہم سے عمر بن حفص نے بیان کیا کہا: میرے باپ نے ہم سے بیان کیا۔ انہوں نے کہا: اعمش نے ہمیں بتلایا۔ کہا: میں نے شفیق بن سلمہ سے سنا، کہتے تھے: میں حضرت عبداللہ اور حضرت ابو موسی کے پاس تھا تو حضرت ابو موسی نے ان سے کہا: عبد الرحمن کے باپ! بھلا بتائیں کہ جب جنبی ہو اور پانی نہ پائے تو وہ کیا کرے؟ حضرت عبداللہ نے کہا: نماز نہ پڑھے یہاں تک کہ پانی پالے۔ تو حضرت ابو موسی نے کہا: آپ حضرت عمار کی بات کو کیا کریں گے؟ جبکہ نبی ﷺ نے ان سے فرمایا تمہیں (تیم ہی) کافی تھا۔ انہوں نے کہا: کیا تم نے حضرت عمر کو نہیں دیکھا کہ وہ اس بات پر مطمئن نہیں ہوئے تھے۔ حضرت ابو موسیٰ نے کہا: حضرت عمار کی بات رہنے دو۔ اس آیت کو تم کیا کرو گے؟ تو حضرت عبداللہ کو کچھ نہ سوجھا کہ کیا جواب دیں تو انہوں نے کہا کہ اگر ہم ان کو اس کے متعلق اجازت دے دیں تو قریب ہے کہ جب کسی کو پانی ٹھنڈا لگے تو وہ اسے چھوڑ دے اور تیم کر لے۔ اس پر میں نے شفیق سے کہا: تو پھر حضرت عبداللہ نے صرف اس وجہ سے نا پسند کیا ؟ کہا: ہاں۔
صحیح بخاری 347
ہم سے محمد بن سلام نے بیان کیا، کہا: ابو معاویہ نے ہمیں بتلایا انہوں نے اعمش سے، اعمش نے شقیق سے روایت کی کہ میں حضرت عبداللہ اور حضرت ابوموسیٰ اشعری کے پاس بیٹھا ہوا تھا کہ حضرت ابوموسی نے ان سے کہا: اگر ایک شخص جنبی ہو اور وہ مہینہ بھر پانی نہ پائے تو کیا وہ تیمم نہیں کرے گا اور نماز نہیں پڑھے گا۔ پھر تم سورۂ مائدہ کی اس آیت کو کیا کرو گے (فَلَمْ تَجِدُوا مَاءً) اور تم پانی نہ پاؤ تو پاکیزہ مٹی کا قصد کرو۔ اس پر حضرت عبداللہ نے کہا: اگر انہیں اس کی اجازت دی گئی تو قریب ہے کہ جب ان کو پانی ٹھنڈا لگے گا تو وہ مٹی کا ہی قصد کریں گے۔ میں نے کہا: تو آپ نے اس کو صرف اس لئے برا منایا ہے؟ جواب دیا: ہاں۔ اس پر حضرت ابو موسی نے کہا: کیا حضرت عمار کی بات آپ نے نہیں سنی جو انہوں نے حضرت عمر بن خطاب سے کہی تھی کہ رسول اللہ ﷺ نے مجھے ایک کام کے لیے بھیجا اور میں جنبی ہو گیا اور مجھے پانی نہ ملا۔ اس لئے میں مٹی میں لوٹا جیسا کہ چار پایہ ہوتا ہے۔ پھر میں نے نبی ﷺ کے پاس اس کا ذکر کیا تو آپ نے فرمایا: تمہارے لئے صرف یہی کافی تھا کہ تم اس طرح کرتے اور آپ نے اپنے دونوں ہاتھ زمین پر ایک بار مارے پھر انہیں جھاڑا۔ پھر دونوں ہاتھوں سے مسح کیا، اپنے بائیں ہاتھ سے اپنی ہتھیلی کی پشت پر یا اپنی تھیلی سے اپنے بائیں ہاتھ کی پشت پر۔ پھر ان دونوں سے اپنے منہ پر مسح کیا؟ تو حضرت عبداللہ نے کہا: کیا آپ نے حضرت عمرؓ کو نہیں دیکھا کہ وہ حضرت عمار کی بات سے مطمئن نہیں ہوئے تھے۔ اور یعلی نے اعمش سے، اعمش نے شقیق سے روایت کرتے ہوئے یہ بات زائد بیان کی ہے کہ میں حضرت عبداللہ اور حضرت ابو موسی کے ساتھ تھا تو حضرت ابو موسیٰ نے کہا: کیا آپ نے حضرت عمار کو حضرت عمرؓ سے یہ کہتے ہوئے نہیں سنا کہ رسول اللہ ﷺ نے مجھے اور آپ کو بھیجا تھا اور میں جنبی ہو گیا تھا تو میں مٹی میں لوٹا۔ پھر ہم رسول اللہ ﷺ کے پاس آئے اور ہم نے آپ کو یہ بات جتلائی تو آپ نے فرمایا تمہیں صرف اس طرح کافی تھا اور آپ نے اپنے منہ اور دونوں ہاتھوں کا مسح کیا۔
صحیح بخاری 348
ہم سے عبدان نے بیان کیا کہا: عبداللہ نے ہمیں بتلایا۔ انہوں نے کہا: عوف نے ہمیں بتلایا کہ ابورجاء سے مروی ہے کہ انہوں نے کہا: حضرت عمران بن حصین خزاعی نے ہم سے بیان کیا کہ رسول اللہ ﷺ نے ایک شخص کو الگ تھلگ بیٹھے دیکھا، اس نے جماعت کے ساتھ نماز نہیں پڑھی تو آپ نے کہا: اے فلاں! جماعت کے ساتھ نماز پڑھنے سے تم کو کس بات نے روکا ہے؟ تو اس نے کہا: یا رسول اللہ! میں جنبی ہوں اور پانی نہیں۔ تو آپ نے فرمایا مٹی لو، وہ تمہاری ضرورت کو پورا کر دے گی۔