کتاب 27: باب لاَ يَدْخُلُ الدَّجَّالُ الْمَدِينَةَ
صحیح بخاری
صحیح بخاری 7132
ابوالیمان نے ہم سے بیان کیا کہ شعیب نے ہمیں بتایا۔ اُنہوں نے زہری سے روایت کی کہ عبیداللہ بن عبداللہ بن عتبہ بن مسعود نے مجھے خبر دی کہ حضرت ابوسعیدؓ نے کہا: ایک دن رسول اللہ ﷺ نے ہم سے دجال کے متعلق ایک لمبی بات بیان کی منجملہ اس کے جو آپؐ ہم سے بیان کیا کرتے تھے یہ بات بھی ہے آپؐ نے فرمایا: دجال آئے گا اور اس پر حرام ہوگا کہ مدینہ کے راستوں سے داخل ہو تو وہ ان کھاری زمینوں میں سے کسی زمین پر اُترے گا جو مدینہ کے قریب ہیں اور اُس وقت ایک شخص جو عام لوگوں سے بہتر ہو گا یا فرمایا: بہترین لوگوں میں سے ہوگا، نکل کر اس کے پاس جائے گا اور وہ کہے گا میں جانتا ہوں کہ تم وہی دجال ہو جس کا ذکر رسول اللہ ﷺ نے ہم سے فرمایا۔ تو دجال کہے گا: بھلا بتاؤ تو سہی کہ اگر میں اس کو مار ڈالوں اور پھر اسے زندہ کروں تو کیا تم اس امر میں شک کرو گے۔ لوگ کہیں گے نہیں۔ چنانچہ وہ اس کو مار ڈالے گا اور پھر اسے زندہ کرے گا اور وہ شخص کہے گا اللہ کی قسم! جتنی بصیرت مجھے آج تمہارے متعلق ہوئی ہے اس سے پہلے نہ تھی۔ دجال چاہے گا کہ اس کو مار ڈالے۔ مگر اس کو اس پر قدرت نہ دی جائے گی۔
صحیح بخاری 7133
عبداللہ بن مسلمہ نے ہم سے بیان کیا۔ اُنہوں نے مالک سے، مالک نے نعیم بن عبداللہ مجمر سے، نعیم نے حضرت ابوہریرہ ؓ سے روایت کی اُنہوں نے کہا: رسول اللہ ﷺ نے فرمایا: مدینہ کے رستوں پر فرشتے ہیں نہ طاعون اس میں داخل ہوگی اور نہ دجال۔
صحیح بخاری 7134
یحيٰ بن موسیٰ نے مجھ سے بیان کیا کہ یزید بن ہارون نے ہمیں بتایا۔ شعبہ نے ہمیں خبر دی۔ شعبہ نے قتادہ سے، قتادہ نے حضرت انس بن مالکؓ سے، حضرت انسؓ نے نبیؐ سے روایت کی۔ آپؐ نے فرمایا: مدینہ میں دجال آئے گا تو وہ فرشتوں کو پائے گا کہ اس کا پہرہ دے رہے ہیں تو انشاء اللہ نہ دجال اس کے قریب پھٹکے گا اور نہ طاعون۔