کتاب 8: كتاب الصلاة
صحیح بخاری
صحیح بخاری 349
ہم سے یحییٰ بن بکیر نے بیان کیا، کہا: لیث نے ہمیں بتلایا۔ انہوں نے یونس سے، یونس نے ابن شہاب سے، ابن شہاب نے حضرت انس بن مالکؓ سے روایت کی۔ انہوں نے کہا: حضرت ابوذرؓ بیان کرتے تھے کہ رسول اللہ ﷺ نے فرمایا: میں مکہ میں ہی تھا کہ میرے گھر کی چھت کھولی گئی اور جبرائیل اُترے اور انہوں نے میرے سینے کو کھولا۔ پھر اسے آب زمزم سے دھویا۔ پھر وہ ایک سونے کا طشت لائے جو حکمت اور ایمان سے بھرا ہوا تھا اور اس کو میرے سینہ میں انڈیل دیا۔ پھر اسے بند کردیا پھر میرا ہاتھ لیا اور سب سے ورلے آسمان کی طرف مجھے اٹھا کر لے گئے جب میں ورلے آسمان پر پہنچا تو جبرائیلؑ نے آسمان کے محافظ سے کہا: کھولو۔ تو اس نے پوچھا: کون ہے؟ کہا: جبرائیلؑ۔ اس نے کہا: کیا تمہارے ساتھ کوئی ہے؟ کہا: ہاں میرے ساتھ محمد ﷺ ہیں تو اس نے کہا: کیا ان کو بلوا بھیجا ہے؟ کہا: ہاں۔ پس جب اس نے کھولا تو ہم ورلے آسمان کے اوپر گئے تو میں کیا دیکھتا ہوں کہ ایک شخص بیٹھا ہوا ہے اس کے دائیں طرف بھی بہت سے آدمی ہیں اور بائیں طرف بھی بہت سے آدمی ہیں۔ جب وہ اپنے دائیں طرف دیکھتا تو ہنستا اور جب اپنے بائیں طرف دیکھتا تو روتا۔ اس نے کہا: اس نیک نبی اور اس نیک بیٹے کا آنا خوشی سے ہو۔ جبرائیلؑ سے میں نے پوچھا: یہ کون ہیں؟ انہوں نے کہا: یہ آدمؑ ہیں اور یہ لوگ جو اس کے دائیں اور بائیں طرف ہیں یہ اس کی اولاد کی روحیں ہیں۔ ان میں سے دائیں طرف والے جنتی ہیں اور وہ لوگ جو اِن کی بائیں طرف ہیں دوزخی ہیں۔ جب وہ دائیں طرف دیکھتے ہیں تو ہنستے ہیں اور جب وہ بائیں طرف دیکھتے ہیں تو روتے ہیں۔ اسی اثناء میں وہ مجھے دوسرے آسمان پر لے گئے اور اس کے محافظ سے کہا: کھولو۔ اور اس کے محافظ نے بھی اُن سے اسی طرح کہا جس طرح کہ پہلے نے کہا تھا۔ تب اس نے کھول دیا۔ حضرت انسؓ کہتے تھے کہ (حضرت ابوذرؓ نے) ذکر کیا کہ آپؐ نے آسمانوں میں حضرت آدمؑ، حضرت ادریسؑ، حضرت موسٰیؑ، حضرت عیسٰیؑ اور حضرت ابراہیم علیہم الصلوٰۃ کو پایا۔ اور انہوں نے معین طور پر بیان نہیں کیا کہ ان کے مقامات کیسے تھے۔ سوائے اس کے کہ انہوں نے یہ ذکر کیا کہ آپؐ نے حضرت آدمؑ کو سب سے نچلے آسمان میں اور حضرت ابراہیمؑ کو چھٹے آسمان میں پایا۔ حضرت انسؓ نے کہا کہ جب جبرائیلؑ نبی ﷺ کو حضرت ادریسؑ کے پاس سے لے کر گزرے تو انہوں نے کہا: خوشی سے آئیں یہ نیک نبی اور نیک بھائی۔ تو میں نے کہا: یہ کون ہیں؟ جبرائیلؑ نے کہا: یہ ادریسؑ ہیں۔ پھر میں حضرت موسٰیؑ کے پاس سے گزرا۔ اور انہوں نے کہا کہ خوشی سے آئیں یہ نیک نبی اور نیک بھائی۔ میں نے کہا: یہ کون ہیں؟ انہوں نے کہا: موسٰیؑ ہیں۔ پھر میں حضرت عیسٰیؑ کے پاس سے گزرا اور انہوں نے کہا: خوشی سے آئیں یہ نیک بھائی اور نیک نبی۔ میں نے کہا: یہ کون ہیں؟ انہوں نے کہا: عیسٰیؑ ہیں۔ پھر میں حضرت ابراہیمؑ کے پاس سے گزرا۔ انہوں نے کہا: خوشی سے آئیں یہ نیک نبی اور نیک بیٹا۔ میں نے کہا: یہ کون ہیں؟ انہوں نے کہا: ابراہیم ﷺ ہیں۔ ابن شہاب نے کہا: مجھے ابن حزم نے بتلایا کہ حضرت ابن عباسؓ اور حضرت ابو حبّہ انصاریؓ کہتے تھے کہ نبی ﷺ نے فرمایا: پھر مجھے اوپر لے گئے۔ اور آخر میں ایک بلند ہموار جگہ پر چڑھا جہاں میں قلموں کے لکھنے کی آواز سنتا تھا۔ ابن حزم اور حضرت انس بن مالکؓ کہتے تھے کہ نبی ﷺ نے فرمایا: اللہ تعالیٰ نے میری امت پر پچاس نمازیں مقرر کیں اور اس حکم کو لے کر میں واپس لوٹا۔ جب میں حضرت موسٰیؑ کے پاس سے گزرا تو اُنہوں نے پوچھا: آپؐ کی امت پر اللہ تعالیٰ نے آپؐ کے لیے کیا فرض کیا ہے؟ میں نے کہا: پچاس نمازیں فرض کی ہیں۔ تو انہوں نے کہا: اپنے ربّ کے پاس لوٹ جائیں کیونکہ آپؐ کی امت اس کی طاقت نہیں رکھے گی۔ اس پر میں نے واپس جاکر نظر ثانی کے لئے کہا تو اللہ تعالیٰ نے اس میں سے نصف کم کردیں اور میں حضرت موسٰیؑ کی طرف لوٹا اور میں نے کہا کہ اللہ تعالیٰ نے ان میں سے نصف کم کردی ہیں تو انہوں نے کہا: اپنے ربّ سے جاکر دوبارہ کہیں کیونکہ آپؐ کی اُمت (اس کی) طاقت نہیں رکھے گی۔ اس پر میں نے جاکر دوبارہ عرض کی تو اللہ تعالیٰ نے آدھی کم کردیں۔ پھر میں ان کی طرف واپس آیا اور انہوں نے کہا: اپنے ربّ کے پاس واپس جائیں کیونکہ آپؐ کی امت اس کی بھی طاقت نہیں رکھے گی۔ پھر میں نے اللہ تعالیٰ سے دوبارہ عرض کی تو فرمایا: وہ پانچ بھی ہیں اور پچاس بھی ہیں۔ میرے ہاں بات تبدیل نہیں ہوتی۔ تب میں حضرت موسٰیؑ کے پاس لوٹ آیا اور انہوں نے کہا: جائیں اپنے رب سے پھر کہیں۔ میں نے کہا: اب میں اپنے رب سے شرما گیا ہوں۔ پھر جبرائیلؑ مجھے لے کر چل پڑے اور آخر مجھے سدرۃ المنتہیٰ تک لے گئے اور کئی رنگوں نے سدرہ المنتہیٰ کو ڈھانپا ہوا تھا۔ میں نہیں جانتا کہ وہ کیا چیز تھی؟ پھر مجھے جنت میں داخل کیا گیا تو کیا دیکھتا ہوں کہ اس میں موتیوں کی لڑیاں ہیں اور کیا دیکھتا ہوں کہ اس کی مٹی کستوری ہے۔
صحیح بخاری 350
ہم سے عبداللہ بن یوسف نے بیان کیا، کہا: مالک نے ہمیں بتلایا۔ انہوں نے صالح بن کیسان سے۔ صالح نے عروہ بن زبیر سے۔ عروہ نے حضرت عائشہ ام المؤمنین سے روایت کی۔ وہ کہتی تھیں کہ اللہ تعالیٰ نے نماز جب مقرر کی تو دو دو رکعتیں حضر اور سفر میں مقرر کی تھیں پھر سفر کی نماز برقرار رکھی گئی اور حضر کی نماز بڑھائی گئی۔
صحیح بخاری 351
ہم سے موسیٰ بن اسماعیل نے بیان کیا، کہا: یزید بن ابراہیم نے ہمیں بتلایا۔ یزید نے محمد بن سیرین سے، انہوں نے حضرت ام عطیہ سے روایت کی۔ وہ کہتی تھیں کہ ہمیں حکم دیا گیا کہ ہم حیض والیوں کو عیدوں کے روز نکالا کریں اور پردے والیوں کو بھی تاکہ وہ مسلمانوں کی جماعت اور ان کی دعا میں شریک ہوں، اور حیض والیاں اپنی نماز گاہ سے الگ رہتیں۔ ایک عورت نے کہا: یا رسول اللہ! ہم میں سے کسی ایک کے پاس جلباب نہ ہو تو کیا کرے؟ فرمایا: اس کی ساتھن اسے اپنے جلباب کا ایک حصہ اوڑھائے۔ اور عبداللہ بن رجاء نے کہا: عمران نے ہم سے بیان کیا کہ محمد بن سیرین نے ہمیں بتلایا کہ حضرت ام عطیہ نے ہم سے بیان کیا کہ میں نے نبی ﷺ سے یہ سنا تھا۔
صحیح بخاری 352
ہم سے احمد بن یونس نے بیان کیا، کہا: عاصم ابن محمد نے ہم سے بیان کیا، کہا: واقد بن محمد نے مجھے بتلایا کہ محمد بن منکدر سے مروی ہے۔ انہوں نے کہا: حضرت جابر نے تہ بند میں نماز پڑھی جس کو انہوں نے اپنی گدی پر گرہ دی ہوئی تھی اور ان کے کپڑے کھونٹی پر دھرے ہوئے تھے۔ کسی کہنے والے نے ان سے کہا: کیا آپ صرف ایک تہ بند میں ہی نماز پڑھتے ہیں؟ تو انہوں نے کہا: میں نے تو اسی لئے یہ کیا تھا کہ تجھ جیسا احمق مجھے دیکھے اور نبی کے زمانہ میں ہم میں سے کس کے پاس دو کپڑے ہوتے؟
صحیح بخاری 353
ہم سے مطرف ابومصعب نے بیان کیا، کہا: عبد الرحمن بن ابوالموالی نے ہمیں بتلایا۔ انہوں نے محمد بن منکدر سے روایت کی۔ وہ کہتے تھے کہ میں نے حضرت جابر بن عبد اللہ کو ایک ہی کپڑے میں نماز پڑھتے دیکھا اور حضرت جابر نے کہا: میں نے نبی صلى الله علیہ وسلم کو ایک کپڑے میں نماز پڑھتے دیکھا۔
صحیح بخاری 354
ہم سے عبید اللہ بن موسیٰ نے بیان کیا، کہا: ہشام بن عروہ نے ہمیں بتلایا۔ انہوں نے اپنے باپ ہے، اُن کے باپ نے حضرت عمر بن ابو سلمہ سے روایت کی کہ نبی ﷺ نے ایک ہی کپڑے میں نماز ادا کی۔ آپ نے دونوں کناروں کو مخالف سمت سے لا کر ڈالا ہوا تھا۔
صحیح بخاری 355
ہم سے محمد بن مثنیٰ نے بیان کیا۔ کہا: بیٹی نے ہمیں بتلایا۔ انہوں نے کہا: ہشام نے ہم سے بیان کیا، کہا: میرے باپ نے حضرت عمر بن ابی سلمہ سے روایت کرتے ہوئے مجھے بتلایا کہ انہوں نے نبی ﷺ کو دیکھا کہ آپ حضرت ام سلمہ کے گھر میں ایک ہی کپڑا اوڑھے ہوئے نماز پڑھ رہے ہیں۔ اور آپ نے اس کے دونوں کناروں کو اپنے کندھے کے اوپر ڈالا ہوا تھا۔
صحیح بخاری 356
ہم سے عبید بن اسماعیل نے بیان کیا کہ ابو اسامہ نے ہمیں بتلایا۔ انہوں نے ہشام سے، ہشام نے اپنے باپ سے روایت کی کہ حضرت عمر بن ابو سلمہ نے انہیں بتایا۔ کہا: میں نے رسول اللہﷺ کو حضرت ام سلمہ کے گھر میں ایک ہی کپڑا پہنے نماز پڑھتے دیکھا۔ آپ اس میں لیٹے ہوئے تھے اس کے دونوں کنارے اپنے کندھوں پر ڈالے ہوئے تھے۔
صحیح بخاری 357
ہم سے اسماعیل بن ابی اولیس نے بیان کیا۔ کہا: مالک بن انس نے مجھے بتلایا۔ انہوں نے عمر بن عبد اللہ کے آزاد کردہ غلام ابو نضر سے روایت کی کہ ابو طالب کی بیٹی حضرت اُم ہانی کے آزاد کردہ غلام ابو مُرہ نے ان کو بتلایا کہ انہوں نے ابو طالب کی بیٹی حضرت ام ہانی سے سنا۔ کہتی تھیں کہ جس سال مکہ فتح ہوا میں رسول اللہ ﷺ کے پاس گئی تو معلوم ہوا کہ آپ نہار ہے ہیں اور حضرت فاطمہ آپ کی بیٹی آپ کو پردہ کئے ہوئے تھیں۔ کہا کہ میں نے آپ کو سلام کیا تو آپ نے فرمایا: یہ کون ہے؟ میں نے کہا: میں ابو طالب کی بیٹی ام ہانی ہوں۔ آپ نے فرمایا: خوشی سے آئیں ام ہانی۔ جب آپ اپنے غسل سے فارغ ہوئے تو آپ کھڑے ہو گئے اور آٹھ رکعت نماز ایک ہی کپڑے میں لیٹے ہوئے ادا کی۔ جب آپ نماز سے فارغ ہوئے تو میں نے کہا: یا رسول اللہ ﷺ میری ماں کا بیا (علی) کہتا ہے کہ وہ فلاں شخص کو جو کہ ہبیرہ کا بیٹا ہے قتل کر دے گا اور میں نے اُسے پناہ دی ہے۔ تو رسول اللہ ﷺ نے فرمایا: ام ہانی! جس کو تو نے پناہ دی ہم نے بھی اس کو پناہ دی۔ حضرت ام ہانی نے کہا: اور یہ چاشت کا وقت تھا۔
صحیح بخاری 358
ہم سے عبداللہ بن یوسف نے بیان کیا، کہا: مالک نے ہمیں بتلایا۔ انہوں نے ابن شہاب سے، ابن شہاب نے سعید بن مسیب سے، سعید نے حضرت ابو ہریرہ سے روایت کی کہ کسی پوچھنے والے نے رسول اللہ ﷺ سے ایک ہی کپڑے میں نماز پڑھنے کے متعلق پوچھا تو رسول اللہ ﷺ نے فرمایا: کیا تم میں سے ہر ایک کے پاس دو دو کپڑے ہیں؟
صحیح بخاری 359
ہم سے ابو عاصم نے بیان کیا۔ انہوں نے مالک سے، مالک نے ابوالزناد سے، ابوالزناد نے عبد الرحمن اعرج سے، عبد الرحمن نے حضرت ابو ہریرۃؓ سے روایت کی۔ انہوں نے کہا: نبی ﷺ نے فرمایا: تم میں سے کوئی ایک ہی کپڑے میں نماز نہ پڑھے در آنحالیکہ اس کے کندھوں پر کچھ نہ ہو۔
صحیح بخاری 360
ہم سے ابونعیم نے بیان کیا، کہا: شیبان نے ہمیں بتلایا۔ انہوں نے یحیی بن ابی کثیر سے، بیٹی نے عکرمہ سے روایت کی، کہا کہ میں نے ان سے سنا یا (کہا) میں نے ان سے پوچھا تو انہوں نے کہا: میں نے حضرت ابو ہریرہ کو یہ کہتے ہوئے سنا کہ میں یہ شہادت دیتا ہوں کہ میں نے رسول اللہ ﷺ سے یہ سنا۔ آپ فرماتے تھے کہ جو ایک ہی کپڑے میں نماز پڑھے تو چاہئے کہ وہ مخالف سمت سے دونوں کناروں کو اُلٹ دے۔
صحیح بخاری 361
ہم سے یحیی بن صالح نے بیان کیا کہا، فلح بن سلیمان نے ہمیں بتلایا۔ انہوں نے سعید بن حارث سے روایت کی۔ کہا: ہم نے حضرت جابر بن عبد الله سے ایک ہی کپڑے میں نماز پڑھنے کے متعلق پوچھا تو انہوں نے کہا: میں نبی ﷺ کے ساتھ آپ کے سفروں میں سے ایک سفر میں نکلا اور میں رات کو اپنے کسی کام کے لیے آیا تو آپ کو نماز پڑھتے ہوئے پایا۔ اور میرے بدن پر ایک ہی کپڑا تھا تو میں نے اپنے آپ کو اس میں لپیٹ لیا اور آپ کے پہلو میں کھڑے ہو کر نماز پڑھی۔ جب آپ نماز سے فارغ ہوئے تو آپ نے فرمایا: اے جابر ! یہ رات کا آنا کیسے؟ میں نے آپ کو اپنی ضرورت بتلائی۔ جب میں نے بات ختم کی تو آپ نے فرمایا: یہ کپڑا لپیٹنا کیا ہے جو میں نے دیکھا؟ میں نے کہا: ایک ہی کپڑا تھا۔ آپ نے فرمایا: اگر فراخ ہو تو اس کو اپنے اردگرد لپیٹ لو اور اگر تنگ ہو تو اس سے تہ بند باندھو۔
صحیح بخاری 362
ہم سے مسدد نے بیان کیا، کہا: بیٹی نے ہمیں بتلایا کہ سفیان سے مروی ہے۔ انہوں نے کہا: ابو حازم نے مجھے بتلایا کہ حضرت سہل سے مروی ہے کہ انہوں نے کہا: کچھ لوگ بچوں کی طرح اپنی گردنوں پر اپنے نہ بند باندھے ہوئے رسول اللہ ﷺ کے ساتھ نماز پڑھا کرتے تھے۔ اور عورتوں سے کہا جاتا تھا کہ اپنے سر اُس وقت تک نہ اٹھا ؤ جب تک کہ لوگ سیدھے ہو کر نہ بیٹھ جائیں۔
صحیح بخاری 363
ہم سے یحییٰ نے بیان کیا کہا: ابو معاویہ نے ہمیں بتلایا۔ انہوں نے اعمش سے، اعمش نے مسلم سے، مسلم نے مسروق سے، مسروق نے حضرت مغیرہ بن شعبہ سے روایت کی۔ انہوں نے کہا میں نبی ﷺ کے ساتھ ایک سفر میں تھا۔ آپ نے فرمایا: مغیرہ! چھا گل لو۔ میں نے وہ لے لی اور رسول اللہ لے چل پڑے۔ اتنی دور گئے کہ مجھ سے پوشیدہ ہو گئے۔ آپ نے قضائے حاجت کی اور آپ شامی جبہ پہنے ہوئے تھے۔ اس کی آستین سے اپنا ہاتھ نکالنے لگے تو وہ تنگ تھی اس لئے آپ نے اپنے ہاتھ کو اس کے نیچے سے نکالا اور میں نے آپ پر پانی ڈالا۔ اور آپ نے اسی طرح وضو کیا جس طرح کہ نماز کے لیے کیا کرتے اور آپ نے موزوں پر مسح کیا۔ پھر آپ نے نماز پڑھی۔
صحیح بخاری 364
ہم سے مطر بن فضل نے بیان کیا کہا: روح نے ہمیں بتلایا۔ کہا: زکریا بن اسحاق نے ہم سے بیان کیا کہ عمرو بن دینار نے ہم کو بتلایا۔ انہوں نے کہا: میں نے حضرت جابر بن عبداللہ سے سنا۔ وہ بیان کرتے تھے کہ رسول اللہ ﷺ ان کے ساتھ پتھر اٹھا کر کعبہ کے لئے لے جاتے تھے۔ اور آپ تہ بند پہنے ہوئے تھے۔ اس پر آپ کے چچا حضرت عباس نے کہا: بھتیجے! اگر اپنا تہ بند کھول کر اسے اپنے کندھوں پر پتھروں کے نیچے رکھو (تو تمہیں تکلیف نہ ہو)۔ (حضرت جابر) کہتے تھے کہ انہوں نے آپ کا تہ بند کھول کر آپ کے کندھوں پر ڈال دیا۔ اور آپ غش کھا کر گر پڑے۔ پھر اس کے بعد آپ کو کبھی ننگا نہ دیکھا گیا۔
صحیح بخاری 365
ہم سے سلیمان بن حرب نے بیان کیا کہا: حماد بن زید نے ہمیں بتلایا۔ انہوں نے ایوب سے، ایوب نے محمد سے، محمد نے حضرت ابو ہریرہ سے روایت کی۔ انہوں نے کہا: ایک شخص نبی ﷺ کے پاس اٹھ کر آیا۔ اور اُس نے ایک ہی کپڑے میں نماز پڑھنے کے متعلق آپ سے پوچھا: آپؐ نے فرمایا: کیا تم میں سے ہر ایک کو دو دو کپڑے مل جاتے ہیں؟ پھر ایک شخص نے حضرت عمر سے پوچھا تو انہوں نے کہا: جب اللہ تعالیٰ کشائش کرے تو تم بھی کشائش سے کام لو۔ کوئی آدمی ایک سے زیادہ اکٹھے کپڑے پہن لے۔ کوئی آدمی تہ بند اور چادر میں نماز پڑھے۔ کوئی نہ بند اور قمیض میں، تہ بند اور چونے میں، پاجامے اور چادر میں، پاجامے اور قمیض میں، پاجامے اور چوغے میں۔ جانگیے اور چوغے میں۔ جانگیے اور قمیض میں۔ (حضرت ابو ہریرہؓ) کہتے تھے اور میرا خیال ہے انہوں نے یہ بھی کہا کہ جانگیے اور چادر میں۔
صحیح بخاری 366
ہم سے عاصم بن علی نے بیان کیا کہا: ابن ابی ذئب نے ہمیں بتلایا۔ انہوں نے زہری سے، زہری نے سالم سے، سالم نے حضرت ابن عمرؓ سے روایت کی۔ انہوں نے کہا کہ ایک شخص نے رسول اللہ ﷺ سے پوچھا۔ کہا: احرام باندھنے والا کیا پہنے؟ آپ نے فرمایا: قمیض نہ پہنے اور نہ پاجامہ اور نہ ہی کنٹوپ اور نہ ہی ایسا کپڑا جسے زعفران یا ورس لگا ہو اور جو شخص جوتا نہ پائے وہ موزے ہی پہن لے اور چاہئے کہ انہیں اتنا کاٹ لے کہ وہ ٹخنوں کے نیچے تک ہوجائیں اور نافع سے بھی اسی طرح مروی ہے۔ انہوں نے حضرت ابن عمر سے۔ حضرت ابن عمرؓ نے نبی ﷺ سے اسی طرح روایت کی۔
صحیح بخاری 367
ہم سے قتیبہ بن سعید نے بیان کیا کہا لیث نے ہمیں بتلایا۔ انہوں نے ابن شہاب سے، ابن شہاب نے عبید اللہ بن عبد اللہ بن عتبہ سے، انہوں نے حضرت ابو سعید خدری سے روایت کی۔ وہ کہتے تھے کہ رسول اللہ ﷺ نے (نماز میں) اشتمالِ صمّاء سے منع فرمایا ہے اور یہ کہ آدمی ایک ہی کپڑا پہنے ہوئے زانو اُٹھا کر اس طرح بیٹھے کہ اس کی شرمگاہ پر اس کپڑے میں سے کچھ نہ ہو۔
صحیح بخاری 368
ہم سے قبیصہ بن عقبہ نے بیان کیا، کہا: سفیان نے ہمیں بتلایا۔ انہوں نے ابو زناد سے، ابو زناد نے اعرج سے، اعرج نے حضرت ابو ہریرہؓ سے روایت کی کہ نبی ﷺ نے دو قسم کی خرید و فروخت سے منع فرمایا ہے لِمَاس اور نَبَاذ سے۔ نیز اس سے منع فرمایا ہے کہ آدمی (نماز میں) کپڑے کو اس طرح پر لیٹے کہ ہاتھ بغیر نکلنے کے باہر نہ نکال سکے اور اس سے کہ ایک ہی کپڑے میں ہو اور وہ گھٹنے اُٹھا کر بیٹھے۔