کتاب 8: كتاب الصلاة
صحیح بخاری, حصہ 4
صحیح بخاری 409
ہم سے موسیٰ بن اسمعیل نے بیان کیا، کہا: ابراہیم بن سعد نے ہمیں بتلایا۔ کہا: ابن شہاب نے حمید بن عبدالرحمن سے روایت کرتے ہوئے ہمیں بتایا کہ حضرت ابو ہریرہ اور حضرت ابو سعید دونوں نے انہیں بتلایا کہ رسول اللہ ﷺ نے مسجد کی دیوار پر کھنکار دیکھا تو آپ نے ایک کنکری لی اور اسے کھرچ دیا اور فرمایا: اگر تم میں سے کوئی کھنکارے تو اپنے منہ کے سامنے کھنکار نہ پھینکے اور نہ ہی اپنی دائیں طرف اور چاہئے کہ وہ اپنی بائیں طرف یا اپنے بائیں قدم کے نیچے تھو کے۔
Urdu translation: Hazrat Syed Zain-ul-Abidin Waliullah Shah
صحیح بخاری 410
ہم سے یحیٰ بن بکیر نے بیان کیا، کہا: لیث نے ہمیں بتلایا۔ انہوں نے عقیل سے، عقیل نے ابن شہاب سے، ابن شہاب نے حمید بن عبد الرحمن سے روایت کی کہ حضرت ابو ہریرہ اور حضرت ابو سعید دونوں نے انہیں بتلایا کہ رسول اللہ ﷺ نے مسجد کی چاردیواری میں کھنگار دیکھا تو رسول اللہ ﷺ نے ایک کنکری لی اور اُسے کھرچ دیا۔ پھر فرمایا: جب تم میں سے کوئی کھنگارے تو اپنے منہ کے سامنے نہ تھوکے اور نہ ہی اپنے دائیں طرف۔ اور چاہئے کہ اپنے بائیں طرف یا اپنے بائیں پاؤں کے نیچے تھوکے۔
Urdu translation: Hazrat Syed Zain-ul-Abidin Waliullah Shah
صحیح بخاری 411
ہم سے یحیٰ بن بکیر نے بیان کیا، کہا: لیث نے ہمیں بتلایا۔ انہوں نے عقیل سے، عقیل نے ابن شہاب سے، ابن شہاب نے حمید بن عبد الرحمن سے روایت کی کہ حضرت ابو ہریرہ اور حضرت ابو سعید دونوں نے انہیں بتلایا کہ رسول اللہ ﷺ نے مسجد کی چار دیواری میں کھنگار دیکھا تو رسول اللہ ﷺ نے ایک کنکری لی اور اُسے کھرچ دیا۔ پھر فرمایا: جب تم میں سے کوئی کھنگارے تو اپنے منہ کے سامنے نہ تھوکے اور نہ ہی اپنے دائیں طرف۔ اور چاہئے کہ اپنے بائیں طرف یا اپنے بائیں پاؤں کے نیچے تھوکے۔
Urdu translation: Hazrat Syed Zain-ul-Abidin Waliullah Shah
صحیح بخاری 412
ہم سے حفص بن عمر نے بیان کیا، کہا: شعبہ نے ہم سے بیان کیا، کہا: قتادہ نے مجھے بتایا۔ کہا: میں نے حضرت انس سے سنا۔ انہوں نے کہا کہ نبی صلی اللہ علیہ وسلم نے فرمایا: تم میں سے کوئی نہ اپنے سامنے اور نہ ہی اپنے دائیں طرف تھوکے۔ البتہ اپنی بائیں طرف یا اپنے پاؤں کے نیچے۔
Urdu translation: Hazrat Syed Zain-ul-Abidin Waliullah Shah
صحیح بخاری 413
ہم سے آدم نے بیان کیا، کہا: شعبہ نے ہم سے بیان کیا، کہا: قتادہ نے ہمیں بتلایا۔ کہا: میں نے حضرت انس بن مالک سے سنا۔ انہوں نے کہا: نبی صلى اللہ علیہ وسلم نے فرمایا: مومن جب نماز میں ہوتا ہے تو وہ اپنے رب سے راز و نیاز کی باتیں کر رہا ہوتا ہے اس لئے وہ نہ اپنے سامنے اور نہ ہی اپنی دائیں طرف تھو کے لیکن اگر تھوکنا ہی ہو تو اپنی بائیں طرف یا۔ اپنے پاؤں کے نیچے۔
Urdu translation: Hazrat Syed Zain-ul-Abidin Waliullah Shah
صحیح بخاری 414
ہم سے علی نے بیان کیا، کہا: سفیان نے ہم سے بیان کیا، (کہا:) زہری نے ہمیں بتلایا۔ انہوں نے حضرت ابوسعید سے روایت کی کہ نبی ﷺ نے مسجد کے قبلہ میں کھنگار دیکھا تو آپ نے ایک کنکری سے اُسے کھرچ ڈالا۔ پھر آپ نے منع فرمایا کہ آدمی اپنے سامنے یا اپنی دائیں طرف تھوکے۔ البتہ اپنی بائیں طرف یا اپنے بائیں قدم کے نیچے تھوک لے۔ زہری سے مروی ہے کہ انہوں نے حمید سے سنا۔ وہ حضرت ابوسعید خدری سے اسی طرح روایت کرتے تھے۔
Urdu translation: Hazrat Syed Zain-ul-Abidin Waliullah Shah
صحیح بخاری 415
ہم سے آدم نے بیان کیا، کہا: شعبہ نے ہمیں بتلایا، کہا: قتادہ نے ہم سے بیان کیا، کہا: میں نے حضرت انس بن مالک سے سنا۔ وہ کہتے تھے۔ نبیؐ نے فرمایا: مسجد میں تھوکنا غلطی ہے اور اس غلطی کا کفارہ اُس تھوک کو مٹی میں دبا دینا ہے۔ باب ۳۸: مسجد میں کھنگار کو مٹی میں دبا دینا ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 416
ہم سے اسحاق بن نصر نے بیان کیا، کہا: عبدالرزاق نے ہمیں بتلایا۔ انہوں نے معمر سے، معمر نے ہَمّام سے روایت کی کہ انہوں نے حضرت ابوہریرہ کو نبیﷺ سے روایت کرتے ہوئے سنا۔ آپ نے فرمایا: جب تم میں سے کوئی نماز کے لئے کھڑا ہو تو اپنے سامنے نہ تھوکے، کیونکہ جب تک وہ اپنی نمازگاہ میں ہے اللہ تعالیٰ سے مناجات کر رہا ہوتا ہے۔ اور نہ ہی اپنے دائیں طرف کیونکہ اس کی دائیں طرف فرشتہ ہوتا ہے، اور چاہیے کہ اپنی بائیں طرف یا اپنے پاؤں کے نیچے تھوک دے اور اسے دفن کر دے۔
Urdu translation: Hazrat Syed Zain-ul-Abidin Waliullah Shah
صحیح بخاری 417
ہم سے مالک بن اسمعیل نے بیان کیا، کہا: زہیر نے ہم سے بیان کیا، کہا: حمید نے حضرت انسؓ سے روایت کرتے ہوئے ہمیں بتلایا کہ نبی ﷺ نے قبلہ میں کھنگار دیکھا تو آپ نے اس کو اپنے ہاتھ سے کھرچ ڈالا اور آپ کے چہرہ پر ناپسندیدگی نمایاں تھی یا کہا کہ دیکھا گیا کہ آپ نے اسے ناپسند فرمایا ہے اور آپ کو سخت ناگوار گزرا اور آپ نے فرمایا: تم میں سے جب کوئی اپنی نماز میں کھڑا ہوتا ہے تو وہ اپنے رب سے مناجات کر رہا ہوتا ہے یا فرمایا: اُس کا رب اُس کے اور اُس کے قبلہ کے درمیان ہوتا ہے اس لئے وہ اپنے قبلہ میں نہ تھوکے۔ البتہ اپنی بائیں طرف یا اپنے قدم کے نیچے۔ پھر آپ نے اپنی چادر کا کنارہ لیا اور اس میں تھوکا اور پھر اس کو تہ کر دیا۔ فرمایا: یا وہ اس طرح کرے۔
Urdu translation: Hazrat Syed Zain-ul-Abidin Waliullah Shah
صحیح بخاری 418
ہم سے عبد اللہ بن یوسف نے بیان کیا، کہا: مالک نے ہمیں بتلایا۔ انہوں نے ابوزناد سے، ابوزناد نے اعرج سے، اعرج نے حضرت ابوہریرہ سے روایت کی کہ رسول اللہ ﷺ نے فرمایا: کیا تم دیکھتے ہو کہ میرا منہ اس طرف ہے۔ اللہ کی قسم! مجھ پر تمہاری خشیت (گدازِ قلب) اور تمہارا رکوع پوشیدہ نہیں رہتا۔ میں تو تمہیں اپنی پیٹھ کے پیچھے سے دیکھ رہا ہوتا ہوں۔
Urdu translation: Hazrat Syed Zain-ul-Abidin Waliullah Shah
صحیح بخاری 419
ہم سے یحی بن صالح نے بیان کیا، کہا: فلیح بن سلیمان نے ہمیں بتلایا۔ انہوں نے ہلال بن علی سے، بلال نے حضرت انس بن مالک سے روایت کی، کہا: نبیﷺ نے ہمیں نماز پڑھائی۔ پھر منبر پر چڑھے اور نماز اور رکوع کے متعلق نصیحت فرمائی کہ میں تمہیں اپنی پیٹھ کے پیچھے سے دیکھ رہا ہوتا ہوں؛ ایسا ہی جیسا کہ تمہیں اب دیکھ رہا ہوں۔
Urdu translation: Hazrat Syed Zain-ul-Abidin Waliullah Shah
صحیح بخاری 420
ہم سے عبداللہ بن یوسف نے بیان کیا، کہا: مالک نے ہمیں بتلایا۔ انہوں نے نافع سے، نافع نے حضرت عبداللہ بن عمرؓ سے روایت کی کہ رسول اللہ ﷺ نے حفیاء سے اُن گھوڑوں کے درمیان گھڑ دوڑ کرائی جو تیار کیے گئے تھے اور اُن کی انتہائی حد ثنیۂ الوداع تھی، اور ثنیہ سے بنی زُریق کی مسجد تک اُن گھوڑوں کے درمیان گھڑ دوڑ کرائی جو تیار نہیں کیے گئے تھے، اور حضرت عبداللہ بن عمرؓ ان لوگوں میں سے تھے جنہوں نے ان (گھوڑوں) پر گھڑ دوڑ کی۔
Urdu translation: Hazrat Syed Zain-ul-Abidin Waliullah Shah
صحیح بخاری 421
اور ابراہیم نے عبدالعزیز بن صہیب سے، انہوں نے حضرت انس رضی اللہ عنہ سے نقل کیا۔ انہوں نے کہا کہ نبی ﷺ کے پاس بحرین سے مال لایا گیا تو آپ نے فرمایا: اسے مسجد میں ڈال دو۔ یہ سب سے زیادہ مال تھا جو رسول اللہ ﷺ کے پاس لایا گیا۔ رسول اللہ ﷺ نماز کے لئے نکلے اور آپ نے اس کی طرف توجہ نہ کی۔ جب آپ نماز ختم کر چکے تو آکر اس (مال) کے پاس گئے اور جس کسی کو بھی دیکھتے اس کو دیتے۔ اتنے میں آپ کے پاس حضرت عباس آئے اور کہا: یا رسول اللہ! مجھے بھی دیجئے کیونکہ میں نے بدر کے دن اپنا فدیہ دیا تھا اور عقیل کا بھی فدیہ دیا تھا۔ رسول اللہ ﷺ نے انہیں فرمایا: لے لو۔ تو انہوں نے دونوں ہاتھوں سے بھر بھر کر اپنے کپڑے میں ڈالا۔ پھر لگے اس کو اٹھانے مگر نہ اٹھا سکے تو انہوں نے کہا: یا رسول اللہ! ان میں سے کسی کو حکم دیجئے کہ اس کو مجھے اٹھوا دے۔ فرمایا: نہیں۔ انہوں نے کہا: پھر آپ ہی اٹھا کر مجھ پر رکھ دیں۔ فرمایا: نہیں۔ اس پر انہوں نے اس میں سے کچھ نکال دیا۔ پھر اسے اُٹھانے لگے (مگر اُٹھا نہ سکے) تو انہوں نے کہا: یا رسول اللہ! اِن میں سے کسی کو حکم دیجئے کہ اس کو مجھے اُٹھوا دے۔ آپ نے فرمایا: نہیں۔ انہوں نے کہا: پھر آپ ہی اُٹھا کر مجھ پر رکھ دیں۔ فرمایا: نہیں۔ اس پر انہوں نے اس میں سے کچھ (اور) نکال دیا۔ پھر اُسے اٹھا کر اپنے کندھے پر رکھ لیا اور چل دیئے۔ رسول اللہ ﷺ نے اپنی آنکھ اُن سے نہیں ہٹائی، جب تک کہ وہ ہم سے اوجھل نہ ہو گئے۔ اُن کی حرص پر تعجب میں تھے۔ رسول اللہ ﷺ نہیں اُٹھے یہاں تک کہ وہاں اس (مال) سے ایک درہم بھی نہ رہا۔
Urdu translation: Hazrat Syed Zain-ul-Abidin Waliullah Shah
صحیح بخاری 422
ہم سے عبد اللہ بن یوسف نے بیان کیا کہ مالک نے اسحاق بن عبد اللہ سے روایت کرتے ہوئے ہمیں بتلایا۔ انہوں نے حضرت انس سے سنا۔ وہ کہتے تھے کہ میں نے نبی ﷺ کو مسجد میں پایا اور آپ کے ساتھ کچھ لوگ تھے۔ میں کھڑا ہوا تو آپ نے مجھ سے پوچھا کہ تمہیں ابوطلحہ نے بھیجا ہے؟ میں نے کہا: جی ہاں۔ پھر فرمایا: کھانے کے لیے؟ میں نے کہا: جی ہاں۔ تو آپ نے اُن کو جو آپ کے ساتھ تھے فرمایا: اُٹھو۔ اور آپ چل پڑے اور میں ان کے آگے آگے چلا۔
Urdu translation: Hazrat Syed Zain-ul-Abidin Waliullah Shah
صحیح بخاری 423
ہم سے یحیٰ نے بیان کیا، کہا: عبدالرزاق نے ہمیں بتایا، کہا: ابن جریج نے ہمیں بتلایا، کہا: ابن شہاب نے حضرت سہل بن سعد سے روایت کرتے ہوئے مجھے بتایا کہ ایک شخص نے کہا: یا رسول اللہ! بھلا بتلائیں تو سہی، ایک مرد اپنی بیوی کے ساتھ کسی مرد کو پائے، آیا وہ اسے قتل کر دے؟ تب ان دونوں (مرد و عورت) نے مسجد میں لعان کیا اور میں اس وقت حاضر تھا۔
Urdu translation: Hazrat Syed Zain-ul-Abidin Waliullah Shah
صحیح بخاری 424
ہم سے عبداللہ بن مسلمہ نے بیان کیا، کہا: ابراہیم بن سعد نے ہمیں بتلایا۔ انہوں نے ابن شہاب سے، ابن شہاب نے محمود بن ربیع سے، محمود نے حضرت عتبان بن مالک سے روایت کی کہ نبی ﷺ اس کے پاس اُس کے گھر میں آئے تو آپ نے فرمایا: تم کہاں چاہتے ہو کہ میں تمہارے گھر میں تمہارے لئے نماز پڑھوں؟ (عتبان کہتے تھے:) میں نے آپ کو ایک جگہ کی طرف اشارہ کیا۔ اور نبی ﷺ نے تکبیر کہی اور ہم آپ کے پیچھے صف بستہ کھڑے ہو گئے۔ اور آپ نے دو رکعت نماز پڑھی۔
Urdu translation: Hazrat Syed Zain-ul-Abidin Waliullah Shah
صحیح بخاری 425
ہم سے سعید بن عفیر نے بیان کیا، کہا لیث نے ہمیں بتلایا۔ کہا: محمود بن ربیع انصاری نے مجھ سے بیان کیا کہ حضرت عتبان بن مالک جو کہ رسول اللہ ﷺ کے اُن انصاری صحابہ میں سے تھے جو بدر میں شریک ہوئے تھے، رسول اللہ ﷺ کے پاس آئے اور کہا: یا رسول اللہ! میری بینائی کمزور ہوگئی ہے اور میں اپنی قوم کو نماز پڑھاتا ہوں۔ جب بارشیں ہوتی ہیں تو اس نالہ میں جو میرے اور ان کے درمیان ہے سیلاب آجاتا ہے اور میں ان کی مسجد میں آکر انہیں نماز نہیں پڑھا سکتا، اور یا رسول اللہ! میری خواہش ہے کہ آپ میرے پاس آئیں اور میرے گھر میں نماز پڑھیں اور میں اُسے مسجد بنا لوں۔ کہتے تھے: رسول اللہ ﷺ نے فرمایا: اگر اللہ نے چاہا تو آؤں گا۔ کہتے تھے کہ رسول اللہ ﷺ اور حضرت ابو بکر صبح جس وقت دن چڑھا آئے اور رسول اللہ ﷺ نے اجازت مانگی۔ میں نے آپ کو اجازت دی۔ جب گھر میں آئے آپ بیٹھے نہیں! فرمایا: تم اپنے گھر میں کہاں چاہتے ہو کہ میں نماز پڑھوں؟ کہتے تھے: میں نے گھر کے ایک طرف اشارہ کر کے آپ کو بتایا۔ رسول اللہ ﷺ کھڑے ہو گئے اور تکبیر کہی اور ہم بھی کھڑے ہو گئے اور صف باندھ لی۔ آپ نے دو رکعت نماز پڑھی پھر سلام پھیرا۔ کہتے تھے: ہم نے آپ کو حلیم کے لیے روک لیا جو ہم نے آپ کے لیے تیار کیا تھا۔ کہتے تھے: گھر میں محلہ کے چند آدمی ادھر اُدھر سے آگئے۔ جب وہ اکٹھے ہو گئے تو اُن میں سے کسی کہنے والے نے کہا کہ مالک بن دخیشن یا ابن دخشن کہاں ہے؟ تو ان میں سے کسی نے کہا: وہ تو منافق ہے۔ اللہ اور اس کے رسول سے محبت نہیں رکھتا۔ رسول اللہ ﷺ نے فرمایا: یہ مت کہو۔ کیا تم اُسے نہیں دیکھتے کہ اُس نے لا إله إلا الله کا اقرار کیا ہے؟ اس سے اللہ کی رضا مندی ہی چاہتا ہے۔ اس نے کہا: اللہ اور اُس کا رسول بہتر جانتے ہیں۔ اس نے کہا: ہم تو اُس کی توجہ اور اُس کی خیرخواہی منافقین کے لئے ہی دیکھتے ہیں۔ رسول اللہ ﷺ نے فرمایا: اللہ تعالیٰ نے یقیناً اس شخص پر آگ حرام کر دی ہے جس نے لا إله إلا الله کا اقرار کیا (بشرطیکہ) وہ اس اقرار سے اللہ کی رضامندی چاہتا ہو۔ ابن شہاب نے کہا: پھر میں نے حسین بن محمد انصاری سے، جو بنی سالم سے ایک شخص تھے اور ان کے سرداروں میں سے تھے، حضرت محمود بن ربیع کی حدیث کے متعلق پوچھا تو انہوں نے اس میں اُن کی تصدیق کی۔
Urdu translation: Hazrat Syed Zain-ul-Abidin Waliullah Shah
صحیح بخاری 426
ہم سے سلیمان بن حرب نے بیان کیا، کہا: شعبہ نے ہمیں بتلایا۔ انہوں نے اشعث بن سلیم سے، انہوں نے اپنے باپ سے، اُن کے باپ نے مسروق سے، اور مسروق نے حضرت عائشہ سے روایت کی۔ وہ کہتی تھیں کہ نبی ﷺ جہاں تک آپ سے ہو سکتا اپنے تمام کاموں میں یہی پسند کرتے کہ داہنی طرف سے پہل کی جائے؛ اپنے نہانے، کنگھی کرنے اور جوتا پہنے میں۔
Urdu translation: Hazrat Syed Zain-ul-Abidin Waliullah Shah
صحیح بخاری 427
ہم سے محمد بن مثنی نے بیان کیا، کہا: یحییٰ نے ہمیں بتلایا۔ انہوں نے ہشام سے روایت کی۔ انہوں نے کہا: میرے باپ نے حضرت عائشہ سے روایت کرتے ہوئے مجھے بتایا کہ حضرت اُمِّ حبیبہ اور حضرت اُمِّ سلمہ نے ایک گرجے کا ذکر کیا جسے انہوں نے حبشہ میں دیکھا تھا۔ اُس میں تصویریں تھیں اور انہوں نے نبی ﷺ کے پاس اس کا ذکر کیا تو آپ نے فرمایا کہ یہ لوگ اگر ان میں کوئی نیک آدمی ہو اور وہ مر جائے تو اُس کی قبر پر عبادت گاہ بنا دیتے ہیں اور اُس میں یہ تصویریں بناتے ہیں۔ ایسے لوگ قیامت کے دن اللہ تعالیٰ کے نزدیک تمام مخلوقات سے بدترین ہوں گے۔
Urdu translation: Hazrat Syed Zain-ul-Abidin Waliullah Shah
صحیح بخاری 428
ہم سے مسدد نے بیان کیا، کہا: عبدالوارث نے ہمیں بتلایا۔ انہوں نے ابو طیاح سے۔ ابو طیاح نے حضرت انس (بن مالک) سے روایت کی۔ انہوں نے کہا: نبی ﷺ مدینہ آئے اور مدینہ کے اوپر کے حصہ میں ایک قبیلہ میں جنہیں بنو عمرو بن عوف کہا جاتا تھا؛ اُترے۔ نبی ﷺ ان میں چودہ راتیں ٹھہرے۔ پھر بنو نجار کو بلا بھیجا۔ وہ تلواریں پہنے ہوئے آئے (اور یہ واقعہ مجھے ایسا یاد ہے) گویا کہ میں نبی ﷺ کو (اب بھی) اپنی سواری پر سوار دیکھ رہا ہوں اور حضرت ابو بکر آپ کے پیچھے سوار تھے اور بنو نجار کا جتھا آپ کے ارد گرد تھا۔ آخر آپ نے حضرت ابو ایوب کے صحن میں ڈیرہ ڈالا اور آپ پسند کرتے تھے کہ جہاں آپ کو نماز کا وقت ہو جاتا وہیں نماز پڑھیں اور آپ (پہلے) بکریوں کے باڑہ میں نماز پڑھا کرتے تھے اور آپ نے مسجد کے بنانے کا حکم دیا۔ آپ نے بنو نجار کے زعماء کو بلوایا اور فرمایا: بنی نجار! تم مجھ سے اپنی اس چار دیواری کی قیمت کرو۔ انہوں نے کہا: نہیں۔ بخدا ہم اس کی قیمت کا مطالبہ اللہ ہی سے کریں گے۔ حضرت انس نے کہا: جو بات میں تمہیں بتلاتا ہوں وہ یہ ہے کہ اس میں مشرکوں کی قبریں تھیں اور اس میں کچھ کھنڈرات تھے اور اس میں کچھ کھجوریں تھیں تو نبی ﷺ نے مشرکوں کی قبروں کے متعلق حکم دیا تو ان کو کھود کر ہڈیاں وغیرہ نکال دی گئیں۔ پھر کھنڈرات کے متعلق حکم دیا اور وہ برابر کر دیے گئے اور کھجوروں کے متعلق حکم دیا اور وہ کاٹی گئیں اور کھجوریں مسجد کے قبلہ کی طرف قطار میں کھڑی کر دیں اور اس کی چوکھٹ پتھروں سے بنائی اور وہ پتھروں کو اٹھا اٹھا کر لانے لگے اور وہ شعر پڑھتے تھے اور ان کے ساتھ نبی ﷺ بھی۔ آپ فرماتے تھے: اے اللہ! بھلائی تو دراصل آخرت کی ہی بھلائی ہے سو تو انصار اور مہاجروں کی کمزوریوں پر پردہ پوشی فرمائیو۔
Urdu translation: Hazrat Syed Zain-ul-Abidin Waliullah Shah