کتاب 8: كتاب الصلاة
صحیح بخاری, حصہ 9
صحیح بخاری 509
ہم سے ابو معمر نے بیان کیا۔ انہوں نے کہا کہ عبد الوارث نے ہمیں بتلایا۔ انہوں نے کہا: یونس نے ہم سے بیان کیا۔ انہوں نے حمید بن ہلال سے، حمید نے ابو صالح سے روایت کی کہ حضرت ابو سعید نے کہا: نبی ﷺ نے فرمایا۔۔۔ نیز ہم سے آدم بن ابی ایاس نے بیان کیا، کہا: سلیمان بن مغیرہ نے ہمیں بتلایا۔ کہا: حمید بن ہلال عدوی نے ہم سے بیان کیا، کہا: ابو صالح سمان نے ہم سے بیان کیا۔ انہوں نے کہا: میں نے حضرت ابو سعید خدری کو جمعہ کے دن دیکھا کہ وہ ایک چیز کی طرف (منہ کئے ہوئے) نماز پڑھ رہے ہیں جس نے اُن کو لوگوں سے اوٹ میں کیا ہوا ہے۔ بنی ابی معیط میں سے ایک نوجوان نے چاہا کہ آپ کے سامنے سے گزرے تو حضرت ابو سعید نے اُس کو ہٹایا۔ اس نوجوان نے دیکھا تو سوائے ان کے سامنے سے گزرنے کے کہیں گزرنے کی جگہ نہ پائی۔ پھر اس نے دوبارہ گزرنا چاہا تو حضرت ابو سعید نے پہلے کی نسبت سختی سے اس کو ہٹایا تو وہ حضرت ابو سعید کو بُرا بھلا کہنے لگا۔ پھر وہ مروان کے پاس گیا اور جو تکلیف اُسے حضرت ابو سعید سے پہنچی تھی، اس کی ان کے پاس شکایت کی۔ حضرت ابو سعید اس کے پیچھے ہی مروان کے پاس اندر پہنچ گئے۔ مروان نے ان سے کہا: ابو سعید! آپ کا اور آپ کے بھتیجے کا کیا معاملہ ہے؟ حضرت ابو سعید نے جواب دیا۔ میں نے نبی ﷺ کو یہ فرماتے سنا ہے کہ جب تم میں سے کوئی ایسی چیز کی طرف نماز پڑھے جو اسے لوگوں سے اوٹ میں کر دے اور کوئی شخص اس کے سامنے سے گزرنے کا ارادہ کرے تو وہ اسے ہٹائے۔ اگر وہ نہ مانے تو اس سے لڑے، کیونکہ وہ شیطان ہے۔
Urdu translation: Hazrat Syed Zain-ul-Abidin Waliullah Shah
صحیح بخاری 510
ہم سے عبد اللہ بن یوسف نے بیان کیا، کہا: مالک نے ہمیں بتلایا۔ انہوں نے عمر بن عبید اللہ کے مولى ابو نضر سے، ابو نضر نے بسر بن سعید سے روایت کی کہ حضرت زید بن خالد نے اس کو حضرت ابو جہیم کے پاس بھیجا کہ وہ ان سے پوچھے کہ نمازی کے سامنے سے گزرنے والے کے متعلق انہوں نے رسول اللہ ﷺ سے کیا سنا تھا۔ اس پر حضرت ابو جہیم نے کہا: رسول اللہ ﷺ نے فرمایا: اگر نمازی کے سامنے سے گزرنے والے کو علم ہو کہ اس پر کیا گناہ ہے تو چالیس۔۔۔ کھڑا رہتا یہ اس کے لیے بہتر ہوتا بہ نسبت اس کے کہ وہ آگے سے گزر جائے۔ ابو نضر نے کہا کہ میں نہیں جانتا کہ آیا آپ نے چالیس دن یا مہینے یا سال فرمایا۔
Urdu translation: Hazrat Syed Zain-ul-Abidin Waliullah Shah
صحیح بخاری 511
ہم سے اسماعیل بن خلیل نے بیان کیا کہ ہمیں علی بن مسہر نے اعمش سے اور اعمش نے مسلم یعنی صبیح کے بیٹے سے۔ انہوں نے مسروق سے، مسروق نے حضرت عائشہؓ سے روایت کرتے ہوئے بتلایا کہ حضرت عائشہ کے پاس اُن چیزوں کا ذکر کیا گیا جو نماز کو توڑتی ہیں تو لوگوں نے کہا کہ اُسے کتا اور گدھا اور عورت توڑتے ہیں۔ تو حضرت عائشہ نے کہا: تم نے تو ہمیں کہتے بنا دیا۔ میں نے خود نبی علیہ السلام کو دیکھا کہ آپ نماز پڑھتے اور میں آپ کے اور قبلہ کے درمیان ہوتی اور چار پائی پر لیٹی ہوتی اور مجھے کوئی حاجت ہوتی تو میں ناپسند کرتی کہ آپ کے سامنے ہوں۔ اس لیے میں آہستگی سے سرک کر نکل جاتی۔ اور (علی بن مسہر نے) اعمش سے، اعمش نے ابراہیم سے، ابراہیم نے اسود سے، اسود نے حضرت عائشہ سے اسی طرح روایت نقل کی۔
Urdu translation: Hazrat Syed Zain-ul-Abidin Waliullah Shah
صحیح بخاری 512
ہم سے مسدد نے بیان کیا، کہا: بسیجی نے ہمیں بتلایا۔ کہا: ہشام نے ہم سے بیان کیا، کہا: میرے باپ نے حضرت عائشہ سے روایت کرتے ہوئے مجھے بتلایا۔ کہتی تھیں کہ نبی ﷺ نماز پڑھتے اور میں آپ کے بستر پر چوڑائی میں لیٹے ہوئے سوئی ہوتی اور جب آپ وتر پڑھنا چاہتے تو مجھے جگا دیتے تو میں بھی وتر پڑھتی۔
Urdu translation: Hazrat Syed Zain-ul-Abidin Waliullah Shah
صحیح بخاری 513
ہم سے عبید اللہ بن یوسف نے بیان کیا، کہا: ہمیں مالک نے عمر بن عبید اللہ کے مولیٰ ابو نضر سے، انہوں نے ابو سلمہ بن عبد الرحمن سے، ابو سلمہ نے نبی ﷺ کی بیوی حضرت عائشہ سے روایت کرتے ہوئے بتایا کہ وہ کہتی تھیں: میں رسول اللہ ﷺ کے سامنے سویا کرتی تھی اور میری دونوں ٹانگیں آپ کے قبلہ میں ہوتیں۔ جب آپ سجدہ کرتے تو مجھے دبا دیتے اور میں اپنی ٹانگوں کو سکیڑ لیتی اور جب کھڑے ہوتے تو اُن کو پھیلا دیتی۔ کہتی تھیں کہ ان دنوں گھروں میں چراغ نہیں ہوتے تھے۔
Urdu translation: Hazrat Syed Zain-ul-Abidin Waliullah Shah
صحیح بخاری 514
ہم سے عمر بن حفص بن غیاث نے بیان کیا، کہا: میرے باپ نے ہمیں بتلایا۔ کہا: اعمش نے ہم سے بیان کیا، کہا: ابراہیم نے ہمیں بتلایا۔ انہوں نے اسود سے، اسود نے حضرت عائشہؓ سے روایت کی۔ نیز اعمش نے کہا: اور مسلم نے مجھ سے بیان کیا کہ مسروق سے مروی ہے۔ انہوں نے حضرت عائشہ سے نقل کیا کہ اُن کے پاس جو چیزیں نماز کو توڑتی ہیں ان کا ذکر کیا گیا؛ کتا اور گدھا اور عورت۔ تو انہوں نے کہا تم نے ہم کو کتوں اور گدھوں جیسا بنا دیا ہے۔ اللہ کی قسم! میں نے خود نبی ﷺ کو نماز پڑھتے دیکھا اور میں چار پائی پر آپ کے اور قبلہ کے درمیان لیٹی ہوئی ہوتی۔ مجھے کوئی حاجت پیش آتی تو میں بیٹھنا نا پسند کرتی، مبادا کہ نبی ﷺ کو تکلیف دوں۔ اس لیے میں چار پائی کے پاؤں کی طرف سے کھسک جاتی۔
Urdu translation: Hazrat Syed Zain-ul-Abidin Waliullah Shah
صحیح بخاری 515
ہم سے اسحاق (بن ابراہیم) نے بیان کیا، کہا: یعقوب بن ابراہیم نے ہمیں بتلایا۔ کہا: میرے بھائی ابن شہاب کے بیٹے نے مجھ سے بیان کیا کہ انہوں نے اپنے چچا سے نماز کے متعلق پوچھا کہ کیا کوئی چیز اسے توڑ دیتی ہے؟ تو انہوں نے کہا: اُسے کوئی چیز نہیں توڑتی۔ عروہ بن زبیر نے مجھے بتلایا کہ نبی ﷺ کی بیوی حضرت عائشہ کہتی تھیں کہ رسول اللہ ﷺ رات کو اُٹھ کر نماز پڑھتے اور میں آپ کی بیوی کے بستر پر آپ کے اور قبلہ کے درمیان چوڑائی میں پڑی ہوتی۔
Urdu translation: Hazrat Syed Zain-ul-Abidin Waliullah Shah
صحیح بخاری 516
ہم سے عبداللہ بن یوسف نے بیان کیا، کہا: ہمیں مالک نے عامر بن عبد اللہ بن زبیر سے، عامر نے عمرو بن سلیم زرقی سے، انہوں نے حضرت ابو قتادہ انصاری سے روایت کرتے ہوئے بتلایا کہ رسول اللہ ﷺ نماز پڑھتے اور حضرت امامہ کو اُٹھائے ہوئے ہوتے جو کہ آپ کی صاحبزادی حضرت زینب کی بیٹی تھیں جو ابو العاص بن ربیعہ بن عبدالشمس سے تھیں۔ جب آپ سجدہ کرتے تو اُسے نیچے رکھ دیتے اور جب کھڑے ہوتے تو اُسے اٹھا لیتے۔
Urdu translation: Hazrat Syed Zain-ul-Abidin Waliullah Shah
صحیح بخاری 517
ہم سے عمرو بن زرارہ نے بیان کیا، کہا: ہمیں بشیم نے شیبانی سے، شیبانی نے عبد اللہ بن شداد بن ہاد سے روایت کرتے ہوئے بتلایا۔ کہا: میری خالہ حضرت میمونہ حارث کی بیٹی نے مجھے بتلایا۔ کہتی تھیں کہ میرا بستر نبی ﷺ کی نماز گاہ کے قریب ہوتا۔ بسا اوقات آپ کا کپڑا مجھ پر پڑتا اور میں اپنے بستر میں ہوتی۔
Urdu translation: Hazrat Syed Zain-ul-Abidin Waliullah Shah
صحیح بخاری 518
ہم سے ابونعمان نے بیان کیا، کہا: عبدالواحد ابن زیاد نے ہمیں بتلایا۔ کہا: شیبانی سلیمان نے ہم سے بیان کیا کہ عبداللہ بن شداد نے ہمیں بتلایا۔ کہا: میں نے حضرت میمونہ کو کہتے سنا کہ نبی ﷺ نماز پڑھا کرتے تھے اور میں آپ کے قریب آپ کے پہلو میں سوئی ہوتی۔ جب آپ سجدہ کرتے تو مجھے آپ کا کپڑا لگتا۔ حالانکہ میں حائضہ ہوتی۔ اور مسدد نے خالد سے روایت کرتے ہوئے یہ زائد کیا، کہا: ہم سے سلیمان شیبانی نے بیان کیا: "حالانکہ میں حائضہ ہوتی۔"
Urdu translation: Hazrat Syed Zain-ul-Abidin Waliullah Shah
صحیح بخاری 519
ہم سے عمرو بن علی نے بیان کیا، کہا سبھی نے ہمیں بتلایا۔ کہا: عبید اللہ نے ہم سے بیان کیا، کہا: قاسم نے حضرت عائشہ رضی اللہ عنہا سے روایت کرتے ہوئے ہمیں بتایا۔ کہتی تھیں: کیا ہی بُری بات ہے کہ تم نے ہمیں کتّے اور گدھے کے برابر کر دیا ہے۔ میں نے خود اپنے آپ کو دیکھا کہ رسول اللہ ﷺ نماز پڑھ رہے ہوتے اور میں آپ کے اور قبلہ کے درمیان لیٹی ہوئی ہوتی۔ جب سجدہ کرنا چاہتے تو میرے پاؤں کو دبا دیتے تو میں اُن کو سکیڑ لیتی۔
Urdu translation: Hazrat Syed Zain-ul-Abidin Waliullah Shah
صحیح بخاری 520
ہم سے احمد بن اسحاق سرماری نے بیان کیا، کہا : عبد الله بن موسیٰ نے ہم سے بیان کیا، کہا: اسرائیل نے ابو اسحاق سے، ابو اسحاق نے عمرو بن میمون سے، عمرو نے حضرت عبد اللہ سے روایت کرتے ہوئے ہمیں بتلایا۔ انہوں نے کہا: ایک بار رسول اللہ ﷺ کعبہ کے قریب کھڑے نماز پڑھ رہے تھے اور قریش کا ایک گروہ مجلس لگائے ہوئے تھا۔ اتنے میں ان میں سے کسی کہنے والے نے کہا: کیا تم اس ریا کار کو نہیں دیکھتے؟ تم میں سے کون آل فلاں کی قربانی کی اونٹنی کی طرف جائے اور اس کی لید اور خون اور اوجھڑی کو اکٹھا کر کے لے آوے۔ پھر اس کو اتنی ڈھیل دے کہ جب وہ سجدہ کرے تو اس کو اس کے دونوں کندھوں کے درمیان رکھ دے۔ اس پر اُن میں سے سب سے بدبخت جلدی سے اُٹھ کھڑا ہوا اور جب رسول اللہ ﷺ نے سجدہ کیا تو اُسے آپ کے دونوں کندھوں کے درمیان رکھ دیا اور نبی ﷺ سجدہ کی حالت میں ہی پڑے رہے اور وہ ہنسے یہاں تک کہ ہنسی کے مارے وہ ایک دوسرے پر جھک جھک پڑتے تھے۔ (یہ دیکھ کر) کوئی جانے والا حضرت فاطمہ علیہا السلام کی طرف گیا اور وہ اس وقت لڑکی تھیں تو وہ بھاگتی ہوئی آئیں اور نبی ﷺ سجدہ کی حالت میں پڑے ہوئے تھے یہاں تک کہ حضرت فاطمہ نے آپ سے اس کو اتار کر پھینک دیا۔ وہ ان کی طرف متوجہ ہو کر اُن کو بُرا بھلا کہنے لگیں۔ جب رسول اللہ ﷺ نماز پڑھ چکے تو آپ نے فرمایا: اے اللہ! تو ہی قریش سے سمجھ، اے اللہ! تو ہی قریش سے سمجھ، اے اللہ! تو ہی قریش سے سمجھ۔ پھر آپ نے نام لیا۔ اے اللہ! عمرو بن ہشام اور عتبہ بن ربیعہ اور شیبہ بن ربیعہ اور ولید بن عتبہ اور امیہ بن خلف اور عقبہ بن ابی معیط اور عمارہ بن ولید سے سمجھ۔ حضرت عبداللہ کہتے تھے اللہ کی قسم! میں نے خود اُن کو بدر کے دن پچھڑے ہوئے دیکھا۔ پھر ان کو بدر کے کنوئیں میں گھسیٹ کر پھینکا گیا۔ پھر رسول اللہ ﷺ نے فرمایا کہ کنوئیں والے لعنت کے نیچے ہیں۔
Urdu translation: Hazrat Syed Zain-ul-Abidin Waliullah Shah