کتاب 68: باب الرَّجُلُ يَأْتَمُّ بِالإِمَامِ وَيَأْتَمُّ النَّاسُ بِالْمَأْمُومِ
صحیح بخاری
صحیح بخاری 713
قتیبہ بن سعید نے ہم سے بیان کیا، کہا: ہمیں ابومعاویہ نے بتایا۔ انہوں نے اعمش سے، اعمش نے ابراہیم سے، ابراہیم نے اسود سے، اسود نے حضرت عائشہؓ سے روایت کی۔ وہ کہتی تھیں: جب رسول اللہ ﷺ سخت بیمار ہوئے تو حضرت بلالؓ آپؐ کو نماز کی اطلاع دینے کے لئے آئے۔ آپؐ نے فرمایا: ابوبکرؓ سے کہو کہ لوگوں کو نماز پڑھائیں۔ تو میں نے کہا: یا رسول اللہ! حضرت ابوبکرؓ تو نرم دل آدمی ہیں۔ جلدی ہی غمگین ہو جاتے ہیں اور وہ تو جب آپؐ کی جگہ کھڑے ہوں گے تو لوگوں کو کچھ سنائیں گے نہیں۔ اس لئے اگر آپؐ حضرت عمرؓ کو فرمائیں۔ اس پر آپؐ نے فرمایا: ابوبکرؓ سے کہو لوگوں کو نماز پڑھائیں۔ میں نے حفصہؓ سے کہا کہ آپؓ آنحضرت ﷺ سے کہیں کہ حضرت ابوبکرؓ درد مند آدمی ہیں۔ جب آپؐ کی جگہ کھڑے ہوں گے، لوگوں کو سنا نہیں سکیں گے۔ آپؐ حضرت عمرؓ سے کہیں۔ آپؐ نے فرمایا: تم تو یوسف والی عورتیں ہو۔ ابوبکر سے کہو کہ لوگوں کو نماز پڑھائیں۔ جب انہوں نے نماز شروع کی تو رسول اللہ ﷺ نے اپنے آپؐ میں افاقہ محسوس کیا اور آپؐ اُٹھ کر دو آدمیوں کے درمیان ٹیک لگائے آہستہ آہستہ چلے۔ یہاں تک کہ آپؐ مسجد میں داخل ہوئے۔ آپؐ کے دونوں پائوں زمین پر لکیر ڈال رہے تھے۔ جب حضرت ابوبکرؓ نے آپؐ کی آہٹ سنی تو حضرت ابوبکرؓ پیچھے ہٹنے لگے۔ اس پر رسول اللہ ﷺ نے اُنہیں اشارہ کیا۔ رسول اللہ ﷺ آئے اور حضرت ابوبکرؓ کے بائیں طرف بیٹھ گئے۔ حضرت ابوبکرؓ کھڑے ہو کر نماز پڑھتے تھے اور رسول اللہ ﷺ بیٹھ کر پڑھتے تھے۔ حضرت ابوبکرؓ رسول اللہ ﷺ کی اقتدا کرتے اور لوگ حضرت ابوبکر رضی اللہ عنہٗ کی اقتدا کرتے۔