اطاعت اولی الامر

خطبات مسرور جلد نهم
153
13
خطبہ جمعہ فرمودہ مورخہ یکم اپریل 2011ء
خطبہ جمعہ فرمودہ مورخہ یکم اپریل 2011ء بمطابق یکم شہادت 1390 ہجری شمسی
بمقام مسجد بیت الفتوح ،لندن (برطانیہ)
تشہد و تعوذ اور سورۃ فاتحہ کی تلاوت کے بعد حضور انور ایدہ اللہ تعالیٰ بنصرہ العزیز نے فرمایا:
چند جمعہ پہلے فروری کے آخری جمعہ میں میں نے خطبہ میں عالم اسلام کے لئے دعا کی تحریک کرتے ہوئے
احمدی کو اپنی ذمہ داری سمجھنے کی طرف توجہ دلائی تھی کہ ہمارے پاس ذرائع نہیں ہیں، طاقت نہیں ہے، مسلمان
ملکوں کے بادشاہوں تک کھل کر بر اور است آواز نہیں پہنچا سکتے کہ انہیں سمجھائیں کہ تم اپنے بادشاہ ہونے یا حکمران
ہونے کا صحیح حق ادا کرو۔چند جگہوں پر ہو سکتا ہے کسی ذریعہ سے آواز پہنچ جائے لیکن واضح پیغام پہنچ سکے کہ نہ ، یہ علم
نہیں۔بہر حال یہ میں نے اس لئے کہا تھا کہ احمدی جو دعا پر یقین رکھتے ہیں انہیں دعا کی طرف خاص توجہ دینی چاہئے
کہ اللہ تعالیٰ ان حکمرانوں کو عقل دے اور یہ اسلامی ممالک ہر قسم کی شکست وریخت سے بچ جائیں۔اسی طرح عوام
کو بھی پیغام تھا کہ وہ بھی اپنی ذمہ داریاں سمجھیں اور اپنے ملکوں کو شدت پسندوں کی یا غیروں کی جھولی میں نہ
گرائیں۔بہر حال میں اس خطبہ میں اِن ملکوں میں رہنے والے احمدیوں کو بھی دوبارہ پیغام دیتا ہوں ، پہلے بھی پیغام دیا
تھا کہ دعاؤں کی طرف توجہ دیں اور جس حد تک دونوں طرف کو یہ عقل دلا سکتے ہیں دلائیں کہ شدت پسندی کسی
مسئلے کا حل نہیں ہے اور جو سب سے بڑا ہتھیار ہے وہ دعا ہے۔احمدیوں کی اکثریت نے اس پیغام کو سمجھ لیا تھا اور اللہ
کے فضل سے احمدی تو عموماً اس توڑ پھوڑ میں حصہ نہیں لیتے۔اس لئے انہوں نے عموماًنہ فساد میں حصہ لیا، نہ جنگ و
جدل میں حصہ لیا۔لیکن بعض ایسے بھی ہیں جن کے ذہنوں میں سوال اٹھتے ہیں کہ ہم جابر اور ظالم حکمران کے
خلاف یا اس کی غلط پالیسیوں کے خلاف کس حد تک صبر دکھائیں ؟ کیا رد عمل ہمارا ہونا چاہئے ؟ یا بعض افریقن ممالک
میں انتقالِ اقتدار میں روکیں ڈالنے والوں کے خلاف کیا رد عمل ہونا چاہئے ؟ مثلاً جس طرح آئیوری کوسٹ میں ہو
رہا ہے کہ اقتدار منتقل نہیں ہو رہا۔اور کس حد تک احمدیوں کو باقی عوام کے ساتھ مل کر اس شدت پسندی میں شامل
ہونا چاہئے جس کا رد عمل عوام دکھا رہے ہیں۔یا حکومت کے خلاف جلوسوں میں شامل ہونا چاہئے۔کیونکہ بعض
پڑھے لکھے ہوئے بھی میرے پیغام کی روح کو نہیں سمجھے تھے اور سوال کرتے رہتے ہیں۔وہ بعض دفعہ دوٹوک

154
خطبہ جمعہ فرمودہ مورخہ یکم اپریل 2011ء
خطبات مسرور جلد نهم
جواب چاہتے ہیں کہ ہم پر یہ واضح کریں کہ ہم سختی سے اپنے حق کو حاصل کرنے کی مہم میں حصہ لے سکتے ہیں یا
نہیں ؟ اور کس حد تک ظلموں کو برداشت کریں۔اس سلسلے میں میں نے جو عرب ممالک ہیں یا افریقن عربی بولنے
والے جو ممالک ہیں اور جنہیں ہمارا عربک ڈیسک ڈیل کرتا ہے ، اُن کے بارہ میں عربک ڈیسک کے ساتھ اور ہانی
طاہر صاحب کے ساتھ میٹنگ کی تھی۔انہیں بڑا واضح طور پر ، بڑا تفصیلی طور پر سمجھایا تھا کہ ان حالات میں ایک
احمدی کارڈ عمل اور کردار کیا ہونا چاہئے؟ دونوں طرف کے اچھے اور بُرے پہلو کیا ہوں گے ؟ اس طرف ہمیں نظر
رکھنی چاہئے۔اور پھر یہی میں نے کہا تھا کہ یہ باتیں قلمبند کر کے جو بھی متعلقہ ملک ہیں یا ہمارے وہ لوگ جن کا ان
سے رابطہ رہتا ہے اُن تک یہ پہنچائیں تا کہ احمدی کو حقیقی صورت حال کی سمجھ آجائے۔لیکن بعض خطوط اور سوالات سے مجھے لگتا ہے کہ بعض لوگوں کو جماعت احمدیہ کے نقطہ نظر جس کی بنیاد
قرآن اور حدیث اور حضرت مسیح موعود علیہ الصلوۃ والسلام کے ارشادات پر ہے اُس کی واضح طور پر سمجھ نہیں آئی۔اسے واضح کرنے کی ضرورت ہے۔اس لئے میں نے اس بارہ میں کچھ مواد جمع کروایا ہے، کچھ باتیں اکٹھی کی ہیں جو
آپ کے سامنے رکھنا چاہتا ہوں تا کہ ہر قسم کے ابہام دور ہو جائیں۔سب سے بنیادی چیز قرآنِ کریم ہے۔اس میں بھی ہمیں دیکھنا ہے کہ قرآنِ کریم حکمرانوں کے ساتھ
تعاون اور اطاعت کے بارے میں کیا حکم دیتا ہے۔پھر یہ کہ عمومی فسادات میں ایک مسلمان کا رد عمل کیا ہونا
چاہئے۔کس حد تک اُس کو اپنا حق لینے کے لئے حکومت کے خلاف مہم میں حصہ لینا چاہئے۔پھر احادیث کیا کہتی ہیں۔حضرت مسیح موعود علیہ الصلوۃ والسلام نے کیا ارشاد فرمایا۔بہر حال اللہ تعالیٰ قرآنِ کریم میں فرماتا ہے کہ وَ يَنْھی
عَنِ الْفَحْشَاءِ وَالْمُنْكَرِ وَالْبَغْيِ (النحل: 91) یہ حصہ آیت جو ہے ہم ہر جمعہ کو عربی خطبہ میں پڑھتے ہیں۔اور اس
کے معنے یہ ہیں کہ ہر قسم کی بے حیائی، ناپسندیدہ باتوں اور بغاوت سے تمہیں اللہ تعالیٰ روکتا ہے۔حضرت مسیح موعود
علیہ الصلوۃ والسلام نے ”بغی“ کے لفظ کی وضاحت کی ہے۔آپ فرماتے ہیں کہ ”بغی اس بارش کو کہتے ہیں جو حد
سے زیادہ برس جائے اور کھیتوں کو تباہ کر دے“۔فرمایا ” حق واجب میں کمی رکھنے کو بغی کہتے ہیں اور یا حق واجب
سے افزونی ( زیادتی) کرنا بھی بغی ہے۔“
اسلامی اصول کی فلاسفی روحانی خزائن جلد نمبر 10 صفحہ 354)
تو یہ ہے قرآنِ کریم کے احکامات کی خوبصورت تعلیم کہ ہر پہلو اور ہر طبقے کے لئے حکم رکھتا ہے۔اس حکم
میں یہ خیال نہیں آسکتا کہ ایک طبقے کو حکم ہے اور دوسرے طبقے کو نہیں ہے۔اس آیت کی مکمل تفسیر تو اس وقت
بیان نہیں کر رہا، صرف بغاوت کے لفظ کی ہی وضاحت کرتا ہوں۔جیسا کہ حضرت مسیح موعود علیہ الصلوۃ والسلام نے
فرمایا ہے ، حق واجب میں کمی کرنے اور حق واجب میں زیادتی کرنے دونوں سے اللہ تعالیٰ روکتا ہے۔یعنی جب حاکم
اور محکوم کو حکم دیا جاتا ہے تو دونوں کو اپنے فرائض کی ادائیگی کا حکم دیا جاتا ہے۔نہ حاکم اپنے فرائض اور اختیارات
میں کمی یا زیادتی کریں، نہ عوام اپنے فرائض میں کمی یا زیادتی کریں۔اور جو بھی یہ کرے گا اللہ تعالیٰ کی حدود کو توڑنے

155
خطبہ جمعہ فرمودہ مورخہ یکم اپریل 2011ء
خطبات مسرور جلد نهم
والا ہو گا اور خدا تعالیٰ کی حدود کو توڑنے والا پھر خدا تعالیٰ کی گرفت میں بھی آسکتا ہے۔اللہ تعالیٰ کو نہایت نا پسند ہے۔پس آج کل چونکہ عوام حکومتوں کے خلاف سختی سے قدم اٹھانے کا جوش رکھتے ہیں اس لئے عوام کی حد تک آج بات
کروں گا۔اس بارے میں کئی احادیث ہیں جو حکمرانوں کے غلط رویے کے باوجود عوام الناس کو، مومنین کو صبر کی
تلقین کا حکم دیتی ہیں۔بخاری کتاب الفتن کا ایک باب ہے کہ آنحضرت صلی اللہ علیہ وسلم کا انصار سے یوں فرمانا کہ تم میرے
بعد ایسے ایسے کام دیکھو گے جو تم کو بُرے لگیں گے۔اور عبد اللہ بن زید بن عامر نے کہا کہ آنحضرت صلی اللہ علیہ
وسلم نے انصار سے یہ بھی فرمایا: تم ان کاموں پر حوض کوثر پر مجھ سے ملنے تک صبر کئے رہنا۔( بخاری کتاب الفتن باب
قول النبی صلی یکم سترون بعدی اموراً تنكرونها) زید بن وہب نے کہا کہ میں نے عبد اللہ بن مسعودؓ سے سنا۔وہ کہتے تھے کہ
آنحضرت صلی اللہ علیہ وسلم نے ہم سے فرمایا: تم میرے بعد دیکھو گے کہ تمہاری حق تلفی کر کے دوسروں کو ترجیح
دی جارہی ہے۔نیز ایسی باتیں دیکھو گے جن کو تم بُرا سمجھو گے۔یہ سن کر صحابہ نے عرض کی کہ یارسول اللہ ! پھر
ایسے وقت میں آپ کیا حکم دیتے ہیں۔فرمایا: اس وقت کے حاکموں کو اُن کا حق ادا کرو اور تم اپنا حق اللہ سے مانگو۔ها الله
(بخاری کتاب الفتن باب قول النبى الله الله سترون بعدی اموراً تنكرونها حديث 7052)
پھر ایک حدیث میں آتا ہے حضرت ابنِ عباس رضی اللہ تعالیٰ عنہ نے آنحضرت صلی اللہ علیہ وسلم سے
روایت کی ہے کہ آپ نے فرمایا: جو شخص اپنے امیر کی کسی بات کو نا پسند کرے تو اس کو صبر کرنا چاہئے۔اس لئے کہ
جو شخص اپنے امیر کی اطاعت سے بالشت برابر بھی باہر ہو تو اس کی موت جاہلیت کی سی موت ہو گی۔(بخاری کتاب الفتن باب قول النبى الله الله سترون بعدی اموراً تنكرونها حديث 7053)
پھر اُسید بن حضیر سے روایت ہے کہ ایک شخص آنحضرت صلی اللہ علیہ وسلم کے پاس آیا۔کہنے لگا
یارسول اللہ (صلی اللہ علیہ وسلم) آپ نے فلاں شخص کو حاکم بنادیا اور مجھ کو حکومت نہیں دی۔آپ نے فرمایا: تم
میرے بعد دیکھو گے کہ تم پر دوسروں کو ترجیح دی گئی ہے۔پس تم قیامت کے دن مجھ سے ملنے تک صبر کئے جاؤ۔(بخارى كتاب الفتن باب قول النبي عل الله سترون بعدی امورا تنكرونها حديث 7057)
سلمہ بن یزید الجعفی نے رسول پاک صلی اللہ علیہ وسلم سے عرض کی۔یا رسول اللہ ! اگر ہم پر ایسے
حکمران مسلط ہوں جو ہم سے اپنا حق مانگیں مگر ہمارا حق ہمیں نہ دیں تو ایسی صورت میں آپ ہمیں کیا حکم دیتے ہیں؟
رسولِ پاک صلی اللہ علیہ وسلم نے اس سے اعراض کیا۔اُس نے اپنا سوال پھر دہرایا۔آپ نے پھر اعراض کیا۔اُس
نے دوسری یا تیسری دفعہ پھر اپنا سوال دہرایا۔جس پر اشعث بن قیس نے انہیں پیچھے کھینچا ( یعنی خاموش کروانے کی
کوشش کی کہ حضور صلی اللہ علیہ وسلم کو یہ سوال پسند نہیں آیا )۔تب رسولِ پاک صلی اللہ علیہ وسلم نے فرمایا: ایسے
حالات میں اپنے حکمرانوں کی بات سنو اور اُن کی اطاعت کرو۔جو ذمہ داری اُن پر ڈالی گئی ہے اُس کا مواخذہ اُن سے
ہو گا اور جو ذمہ داری تم پر ڈالی گئی ہے اس کا مؤاخذہ تم سے ہو گا۔(مسلم كتاب الامارة باب فى طاعة الامراء وان منعوا الحقوق حديث 4782)

خطبات مسرور جلد نهم
156
خطبہ جمعہ فرمودہ مورخہ یکم اپریل 2011ء
جنادہ بن امیہ نے کہا کہ ہم عبادہ بن صامت کے پاس گئے۔وہ بیمار تھے۔ہم نے کہا اللہ تمہارا بھلا کرے
ہم سے ایسی حدیث بیان کرو جو تم نے آنحضرت صلی اللہ علیہ وسلم سے سنی ہو۔اللہ تم کو اس کی وجہ سے فائدہ دے۔اُنہوں نے کہا کہ آنحضرت صلی اللہ علیہ وسلم نے ہم کو بلا بھیجا۔ہم نے آپ سے بیعت کی۔آپ نے بیعت میں
ہمیں ہر حال میں خواہ خوشی ہو یا نا خوشی، تنگی ہو یا آسانی ہو اور حق تلفی میں بھی یہ بیعت لی کہ بات سنیں گے اور
مانیں گے۔آپ نے یہ بھی اقرار لیا کہ جو شخص حاکم بن جائے ہم اُس سے جھگڑانہ کریں سوائے اس کے کہ تم اعلانیہ
اُن کو کفر کرتے دیکھو جس کے خلاف تمہارے پاس اللہ کی طرف سے دلیل ہو۔(صحیح مسلم کتاب الامارة باب وجوب طاعة الامراء في غير معصية۔۔حدیث 4771)
ان احادیث میں اُمراء اور حکام کی بے انصافیوں اور خلافِ شرع کاموں کی طرف اشارہ کیا گیا ہے لیکن
پھر بھی آپ نے یہ فرمایا کہ ان کے خلاف بغاوت کرنے کا تمہیں حق نہیں ہے۔حکومت کے خلاف مظاہرے ، توڑ
پھوڑ اور باغیانہ روش اختیار کرنے والوں کا طرزِ عمل خلافِ شریعت ہے۔اس آخری حدیث کی مزید وضاحت کر دوں کہ اس حدیث کے آخری الفاظ میں جو عربی کے الفاظ ہیں کہ
وَأَنْ لَّا نُنَازِعَ الْأَمْرَ أَهْلَهُ إِلَّا أَن تَرَوْا كُفْرًا بَوَاحًا عِنْدَكُمْ مِنَ اللهِ فِيهِ بُرْهَانُ۔یعنی آنحضرت صلی اللہ
علیہ وسلم نے ہم سے یہ اقرار بھی لیا کہ جو شخص حاکم بن جائے ہم اُس سے جھگڑا نہیں کریں گے سوائے اس کے کہ
تم اعلانیہ اس کو کفر کرتے ہوئے دیکھو جس پر تمہارے پاس اللہ کی طرف سے دلیل ہو۔حدیث کے یہ جو آخری الفاظ ہیں ان کے معنی بعض سلفی وہابی اور باقی متشد د دینی جماعتیں یا جو فرقے ہیں
وہ یہ لیتے ہیں کہ صرف اُس وقت تک حکام سے لڑائی جائز نہیں جب تک کہ اُن سے کفر بواح نہیں ظاہر ہو جاتا۔(کھلا
کھلا کفر ظاہر نہیں ہو جاتا) اگر حاکم سے کفر بواح نظر آجائے تو پھر اس کے ازالے کے درپے ہونا اور اُس سے حکمرانی
چھین لینا فرض ہے۔یہی متشدد جماعتیں ہیں جنہوں نے اس پر یہ دلیل سوچ رکھی ہے کہ حکومتوں کے خلاف
بغاوت کی جاسکتی ہے۔بلکہ بعض اپنے فتوؤں کو آپس میں ہی اتنا مضبوط کرنے کی کوشش کرتے ہیں کہ فتوے دینے
والے یہ کہتے ہیں کہ جن کو ہم نے کافر قرار دے دیا اُن کو جو کافر نہ سمجھے وہ بھی کافر ہے۔اور کافر کو کافر نہ سمجھنے والا
بھی کافر ہے۔تو یہ جو تکفیر ہے اس کا ایک لمبا سلسلہ چلتا چلا جاتا ہے۔بہر حال اس حدیث میں اصل الفاظ یہی ہیں کہ تم نے اطاعت کرنی ہے سوائے اس کے کہ ایسی بات کی
جائے جو کفر کی بات ہو یا تمہیں کفر پر مجبور کیا جا رہا ہو۔اس کے علاوہ ہر معاملے میں اطاعت ہونی چاہئے اور اُس
صورت میں بھی بغاوت نہیں ہے بلکہ وہ بات نہیں مانتی۔بہر حال یہ ان لوگوں کا نظریہ ہے، احمدیوں کا نہیں۔ہاں اطاعت نہ کرنے کی بعض حالات میں جیسا کہ میں نے کہا سوائے اس کے کہ کفر پر مجبور کیا جارہا ہو ، جو ہمیں
جماعت میں ایک مثال نظر آتی ہے وہ یہ ہے کہ جب پاکستان میں یا بعض دوسرے ممالک میں احمدیوں کو کہا جاتا ہے

157
خطبہ جمعہ فرمودہ مورخہ یکم اپریل 2011ء
خطبات مسرور جلد نهم
کہ تم اپنے آپ کو مسلمان نہ کہو تو ہم یہ بات ماننے کو تیار نہیں۔ہم مسلمان کہتے ہیں۔یا کلمہ نہ پڑھو۔ہم پڑھتے ہیں۔یا
ایک دوسرے کو سلام نہ کہو، یا قرآن کریم نہ پڑھو۔تو یہ ہمارے مذہب کا اور دین کا معاملہ ہے۔اس بارہ میں جیسا کہ
حدیث سے ظاہر ہے اطاعت کی ضرورت نہیں۔لیکن یہاں بھی ہم بغاوت نہیں کرتے۔صرف ان معاملوں میں ہم
کبھی کسی قسم کے قانون کو مان ہی نہیں سکتے کیونکہ یہ شریعت کا معاملہ ہے۔اللہ اور رسول کے حکموں کا معاملہ ہے۔جہاں تک ملک کے دوسرے قوانین کا تعلق ہے، اس کے باوجود ہر احمدی ہر قانون کی پابندی کرتا ہے۔ہمارے نظریہ کی تائید میں پرانے ائمہ میں سے بھی ایک کا حوالہ ہے جو میں پیش کرتا ہوں۔اس
حدیث کی شرح میں حضرت امام النووی رحمہ اللہ تحریر کرتے ہیں کہ کفر بواح کا مطلب ظاہر کفر ہے، اور اس
حدیث میں کفر سے مراد گناہ ہے“۔پھر مزید فرماتے ہیں کہ تم ارباب حکومت سے اُن کی حکومت کے اندر رہ کر جھگڑا نہ کرو اور نہ اُن پر
اعتراض کر و۔سوائے اس کے کہ تم اُن سے کوئی ایسی بُری بات دیکھو جو ثابت اور متحقق ہو، جس کا بُرا ہونا تم اسلام
کے قواعد یعنی قرآن اور حدیث کی رُو سے جانتے ہو۔اگر تم ایساد دیکھو تو اُن کی اس بات کا بُرا مناؤ اور تم جہاں بھی ہو
حق بات کہو۔لیکن ایسے حکمرانوں کے خلاف بغاوت کرنا، اُن کے ساتھ لڑائی کرنا، مسلمانوں کے اجماع سے حرام
ہے۔خواہ وہ حکمران فاسق اور ظالم ہوں“۔لکھتے ہیں کہ ”اس حدیث کا معنی جو میں نے بیان کیا ہے ، دیگر احادیث
نبویہ اس کی تائید کرتی ہیں۔اہل سنت نے اس بات پر اجماع کیا ہے کہ فسق کے بناء پر حکمر ان کو معزول کرنا جائز
نہیں علماء کہتے ہیں کہ فاسق اور ظالم حکمران کو معزول نہ کرنے اور اُس کے خلاف لڑائی نہ کرنے کا سبب یہ ہے
کہ ایسی صورت میں مزید فتن ، خونریزی اور آپس میں فساد پیدا ہو گا۔پس فاسق اور ظالم حکمر ان کا بر سر اقتدار رہنا کم
فساد پیدا کرے گا بہ نسبت اس کے جو اُسے معزول کرنے کی کوشش کے نتیجے میں پید ا ہو گا“۔(المنهاج بشرح صحيح مسلم كتاب الامارة باب وجوب طاعة الامراء في غير معصية صفحہ 1430 دار ابن حزم 2002ء)
اور یہ بات آج ہم دیکھ رہے ہیں کہ سچ ثابت ہو رہی ہے۔دونوں طرف سے لڑائیاں ہو رہی ہیں۔بندوقیں چل رہی ہیں۔جانیں ضائع ہو رہی ہیں۔مسلمان مسلمانوں کو قتل کر رہے ہیں۔پھر بخاری کی ایک حدیث ہے کہ رسولِ پاک صلی اللہ علیہ وسلم فرماتے ہیں کہ حدود اللہ میں سستی کرنے
والے اور حدود اللہ میں گر پڑنے والے افراد کی مثال اُس قوم کی طرح ہے جنہوں نے کشتی کی بابت قرعہ ڈالا جس
کے نتیجے میں بعض کشتی کے اوپر والے حصے پر قیام پذیر ہوئے اور بعض کشتی کے نچلے حصے میں۔جب کشتی کے نچلے
حصے والے لوگ اوپر والوں کے پاس سے پانی لے کر گزرتے تھے تو وہ اس سے تکلیف محسوس کرتے تھے۔جس پر
نچلے حصے والوں میں سے ایک نے کلہاڑا پکڑا اور کشتی کے پیندے میں سوراخ کرنے لگا جس سے اوپر کے حصے والے
اس کے پاس آئے اور اُس سے پوچھا تمہیں کیا ہوا ہے ؟ اس نے جواب دیا کہ میرے اوپر جا کر پانی لانے سے تمہیں
تکلیف ہوتی ہے اور پانی کے بغیر میر اگزارا نہیں۔پس اگر اوپر والے اس کا ہاتھ پکڑ لیں تو وہ اُسے بھی ڈوبنے سے بچا
لیں گے اور اپنے آپ کو بھی ڈوبنے سے بچالیں گے۔اگر وہ اسے چھوڑ دیں گے اور کشتی کے پیندے میں سوراخ

خطبات مسرور جلد نهم
158
خطبہ جمعہ فرمودہ مورخہ یکم اپریل 2011ء
کرنے دیں گے تو وہ اُسے بھی ہلاک کر دیں گے اور اپنے آپ کو بھی ہلاک کر دیں گے۔(صحیح بخاری۔کتاب الشهادات باب القرعة فى المشكلات حديث 2686)
اس حدیث سے بعض لوگ یہ استدلال کرتے ہیں کہ عوام بدی کرنے والوں کو ، بدی کے ارتکاب سے یا
غلط کاموں سے زبر دستی روک دیں جو درست نہیں ہے کیونکہ اس طرح باہم جھگڑا اور فساد پیدا ہو جائے گا۔اگر اس
سے مراد حکومت کے خلاف بغاوت میں تو وہ بھی آنحضور صلی اللہ علیہ وسلم کے خلاف ارشاد بات ہوتی ہے۔حدیث
یہ ہے۔دوبارہ واضح کر دوں۔اگر کشتی والے اُن
کا ہاتھ پکڑ لیں تو وہ اسے ڈوبنے سے بچائیں گے اور اپنے آپ کو بھی
ڈوبنے سے بچالیں گے۔اگر چھوڑ دیں گے تو پیندے میں سوراخ ہو گا وہ آپ بھی ہلاک ہو گا، اُن کو بھی ہلاک کرے
گا، اس سے ایک تو یہ لیا جاتا ہے کہ اگر کوئی فساد پیدا ہو رہا ہو ، اگر نقصان پہنچ رہا ہو تو اس کا قلع قمع کرنے کے لئے
زبر دستی روک دینا جائز ہے لیکن یہ باقی احادیث سے خلاف ہے۔حکومتوں کے معاملے میں یہ چیز نہیں ہے۔اس کی
تائید میں پھر آنحضرت صلی اللہ علیہ وسلم کی ایک اور حدیث پیش کی جاتی ہے اور اُس کے حوالے سے یہ استنباط کیا
جاتا ہے کہ آنحضرت صلی اللہ علیہ وسلم نے خود سختی کا حکم دیا ہے۔آنحضرت صلی اللہ علیہ وسلم ایسی کوئی بات فرما ہی
نہیں سکتے جو قرآن کی تعلیم کے خلاف ہو۔یقینا اس کے سمجھنے میں بھی لوگوں کو غلطی لگی ہے۔روایت یہ ہے۔ابوسعید خدری رضی اللہ تعالیٰ عنہ بیان کرتے ہیں کہ میں نے رسول اللہ صلی اللہ علیہ وسلم کو یہ فرماتے
سنا کہ تم میں سے جو کوئی ناپسندیدہ کام دیکھے وہ اسے اپنے ہاتھ سے بدل دے۔اگر اسے طاقت نہ ہو تو پھر اپنی زبان
سے اور یہ طاقت بھی نہ ہو تو پھر اپنے دل سے اور یہ کمزور ترین ایمان ہے۔“
(صحیح مسلم کتاب الایمان۔باب بیان كون النهي عن المنكر من الايمان حديث 177)
( اس حدیث کی شرح میں ) امام مُلا علی قاری لکھتے ہیں، جس کا ترجمہ یہ ہے کہ : ہمارے بعض علماء کہتے ہیں
کہ ناپسندیدہ کام کو ہاتھ سے تبدیل کرنے کا حکم حکمرانوں کے لئے ہے۔زبان سے تبدیل کرنے کا حکم علماء کے لئے
ہے اور دل سے ناپسندیدہ بات کو نا پسند کرنے کا حکم عوام مؤمنین کے لئے ہے۔(مرقاۃ شرح مشكاة جز 9 ـ كتاب الاداب باب الامر بالمعروف الفصل الاول حدیث 5137 صفحہ 324 دار الكتب العلمية بيروت 2001ء)
پس یہ اس حدیث کی بڑی عمدہ وضاحت ہے کہ تین باتیں تو ہیں لیکن تین باتیں تین مختلف طبقوں کے
لئے اور صاحب اختیار کے لئے ہیں۔وہاں بھی اگر کشتی میں روکنے کی بات ہے تو اس کو ڈوبنے سے بچانے کے لئے
صاحب اختیار کو ہی روکنے کا حکم ہے۔اگر ہر کوئی اس طرح روکنے لگ جائے گا تو پورا ایک فساد پیدا ہو جائے گا۔اور
فساد اور بدامنی کے بارے میں اللہ تعالیٰ فرماتا ہے کہ وَاللهُ لَا يُحِبُّ الْفَسَادَ۔سورۃ بقرۃ کی آیت 206 ہے کہ اللہ
تعالیٰ فساد کو پسند نہیں کرتا۔اگر یہ مراد لی جائے کہ عوام حکمران کی کسی بات کو نا پسند کریں تو وہ حکومت کے خلاف
اُٹھ کھڑے ہوں اور توڑ پھوڑ اور فتنہ و فساد اور قتل و غارت اور بغاوت شروع کر دیں تو یہ مفہوم بھی شریعت کی
ہدایت کے مخالف ہے۔اس بارہ میں قرآنِ کریم کا جو حکم ہے ، فیصلہ ہے وہ میں پہلے بیان کر آیا ہوں کہ
وَيَنْهَى عَنِ الْفَحْشَاءِ وَالْمُنْكَرِ وَالْبَغْي (النحل: 91)

خطبات مسرور جلد نهم
159
خطبہ جمعہ فرمودہ مورخہ یکم اپریل 2011ء
انبیاء کا حکومت وقت کی اطاعت کے بارے میں کیا نمونہ رہا ہے ؟ ایک حدیث میں آیا ہے کہ ایک لاکھ
چو میں ہزار انبیاء دنیا میں آئے۔(کنز العمال کتاب الفضائل باب الثانی فی فضائل سائر الانبیاء۔۔۔الفصل الثانی الا کمال جلد 6 صفحہ 219 حدیث 32274 دار الكتب العلمیة بیروت 2004ء)
قرآنِ کریم نے دو درجن کے قریب انبیاء ہیں پچیس انبیاء کے حالات بیان فرمائے ہیں مگر کسی نبی کی
بابت یہ ذکر نہیں فرمایا کہ اُس نے دنیاوی معاملات میں اپنے علاقے کے حاکم وقت کی نافرمانی یا بغاوت کی ہے۔یا اُس
کے خلاف اپنے متبعین کے ساتھ مل کر مظاہرے کئے ہوں یا کوئی توڑ پھوڑ کی ہو۔دینی امور کے بارے میں تمام انبیاء
نے اپنے اپنے علاقوں کے حکمرانوں کے غلط عقائد کی کھل کر تردید کی اور سچے عقائد کی پرزور تبلیغ کی۔حضرت
یوسف کی مثال لیتا ہوں جو عموما بیان کی جاتی ہے۔حضرت خلیفہ المسیح الاول نے بیان کی ہے، حضرت مسیح موعود نے
بھی، حضرت خلیفتہ المسیح الثانی نے بھی۔اس کے شروع میں ہی اللہ تعالیٰ فرماتا ہے کہ نَحْنُ نَقُصُّ عَلَيْكَ اَحْسَنَ الْقَصَصِ بِمَا أَوْحَيْنَا إِلَيْكَ
هذَا الْقُرْآنَ وَإِنْ كُنْتَ مِنْ قَبْلِهِ لَمِنَ الْغُفِلِينَ ( یوسف (4) کہ ہم نے جو یہ قرآن تجھ پر وحی کیا ہے اس کے
ذریعے ہم تیرے سامنے ثابت شدہ تاریخی حقائق میں سے بہترین بیان کرتے ہیں۔جبکہ اس سے پہلے اس بارہ میں تو
غافلوں میں سے تھا۔ثابت شدہ تاریخی حقائق کیا ہیں جو قرآن کریم واضح بیان فرمارہا ہے۔سورۃ یوسف میں جو اکثر
حضرت یوسف علیہ السلام کے حالات پر مشتمل ہے ، ان حالات کا خلاصہ یہ ہے کہ حضرت یوسف علیہ السلام نے
مصر کے کافر بادشاہ فرعونِ مصر کی کابینہ میں وزیر خزانہ کے طور پر ، مال کے نگر ان کے طور پر کام کیا۔اگر بادشاہ کو یہ
خیال ہو تا کہ یوسف علیہ السلام اس کے وفادار نہیں ہیں اور نعوذ باللہ محض منافقانہ طور پر اس کی اطاعت کرتے ہیں تو
وہ ہر گز اپنی کابینہ میں شامل نہ کرتا۔اور ویسے بھی حضرت یوسف علیہ السلام کے بارے میں یہ خیال کرنا بھی بے
ادبی میں داخل ہے کہ نعوذ باللہ وہ دل سے تو فرعونِ مصر کے خلاف بغض و عناد رکھتے تھے مگر ظاہری طور پر منافقانہ
رنگ میں اُس کی اطاعت کرتے تھے اور اس سے وفاداری کا اظہار کرتے تھے۔اللہ تعالیٰ فرماتا ہے كَذَلِكَ كِدْنَا لِيُوسُفَ مَا كَانَ لِيَأْخُذَ أَخَاهُ فِي دِينِ الْمَلِكِ إِلَّا أَنْ يَشَاءَ
اللہ (یوسف: 77)۔اس طرح ہم نے یوسف کے لئے تدبیر کی۔اس کے لئے ممکن نہ تھا کہ اپنے بھائی کو بادشاہ کی
حکمرانی میں روک لیتا سوائے اس کے کہ اللہ چاہتا۔یعنی حضرت یوسف علیہ السلام بادشاہ مصر کے قانون کے مطابق
اپنے حقیقی بھائی کو مصر میں روکنے کا اختیار نہیں رکھتے تھے۔اس لئے اللہ تعالیٰ نے یہ تدبیر کی کہ حضرت یوسف علیہ
السلام سے بھلوا کر شاہی پیمانہ جو تھا اپنے بھائی کے سامان میں رکھوا دیا اور تلاشی لینے پر اُن کے بھائی کے سامان میں
سے ہی وہ پیمانہ نکل آیا۔اس سے معلوم ہوتا ہے کہ حضرت یوسف علیہ السلام مصر کے کافر اور مشرک بادشاہ کے
قانون کے پابند تھے۔دنیاوی معاملات میں حضرت یوسف علیہ السلام کا فر بادشاہ کے قانون کی پابندی اور وفاداری
سے اطاعت کے باوجود دینی امور میں اس کے غلط عقائد کی پابندی اور اطاعت نہیں کرتے تھے۔

خطبات مسرور جلد نهم
160
خطبہ جمعہ فرمودہ مورخہ یکم اپریل 2011ء
پھر قرآنِ کریم میں ایک جگہ اللہ تعالیٰ فرماتا ہے کہ یاَيُّهَا الَّذِينَ آمَنُوا أَطِيعُوا اللَّهَ وَأَطِيعُوا الرَّسُولَ وَ
أولِي الْأَمْرِ مِنْكُمْ ۚ فَإِنْ تَنَازَعْتُمْ فِي شَيْءٍ فَرُدُّوهُ إِلَى اللهِ وَالرَّسُولِ إِنْ كُنْتُمْ تُؤْمِنُونَ بِاللَّهِ وَالْيَوْمِ الْآخِرِ
ذلِكَ خَيْرٌ وَ اَحْسَنُ تَأْوِيلاً (النساء : 60)
اس بارہ میں حضرت مسیح موعود علیہ الصلوۃ والسلام فرماتے ہیں کہ ”یعنی اللہ اور رسول اور اپنے بادشاہوں
کی تابعداری کرو“۔یہ شہادۃ القرآن میں فرمایا۔شہادت القرآن روحانی خزائن جلد 6 صفحہ 332)
پھر ایک دفعہ فرمایا کہ : ” یعنی اللہ اور اس کے رسول اور ملوک کی اطاعت اختیار کرو“۔بادشاہوں کی
اطاعت اختیار کرو۔(احکم 10 فروری 1901ء جلد 5 نمبر 5 صفحہ 1 کالم نمبر 2)
پھر ایک جگہ فرماتے ہیں: ”اے مسلمانو ! اگر کسی بات میں تم میں باہم نزاع واقعہ ہو تو اس امر کو فیصلہ
کے لئے اللہ اور رسول کے حوالہ کرو۔اگر تم اللہ اور آخری دن پر ایمان لاتے ہو تو یہی کرو کہ یہی بہتر اور احسن
(ازالہ اوہام۔روحانی خزائن۔جلد 3 - صفحہ 596)
تاویل ہے“۔فرمایا کہ: ” یعنی اگر تم کسی بات میں تنازع کرو تو اس امر کا فیصلہ اللہ اور رسول کی طرف رڈ کرو اور صرف
اللہ اور رسول کو حکم بناؤ ، نہ کسی اور کو “۔الحق مباحثہ دہلی۔روحانی خزائن جلد 4۔صفحہ 184)
اور اللہ اور رسول کا فیصلہ جیسا کہ پہلے میں بیان کر آیا ہوں یہی ہے کہ عام دنیاوی حالات میں ایک
مومن پہ جو بھی حالات گزر جائیں تو بغاوت نہ کرو۔اگر کفر کو دیکھو یا کفر کا حکم سنو تو اطاعت اس حد تک واجب ہے
جہاں تک اس کے علاوہ باتیں ہیں۔ان باتوں میں اطاعت نہیں ہے۔لیکن بغاوت کی تب بھی اجازت نہیں۔پھر حضرت مسیح موعود علیہ الصلوۃ والسلام ایک جگہ فرماتے ہیں کہ ”قرآن شریف میں حکم ہے اَطِیعُوا اللَّهَ وَ
اطِيعُوا الرَّسُولَ وَأُولِي الْأَمْرِ مِنْكُمْ - (النساء:60) یہاں اولی الامر کی اطاعت کا حکم صاف طور پر موجود
ہے۔اور اگر کوئی شخص کہے کہ مینگھ میں گورنمنٹ داخل نہیں تو یہ اُس کی صریح غلطی ہے۔گورنمنٹ جو حکم
شریعت کے مطابق دیتی ہے وہ اُسے منکم میں داخل کرتا ہے۔مثلاً جو شخص ہماری مخالفت نہیں کرتا وہ ہم میں
داخل ہے۔اشارۃ النص کے طور پر قرآن کریم سے ثابت ہوتا ہے کہ گورنمنٹ کی اطاعت کرنی چاہئے اور اس کے
حکم مان لینے چاہئیں“۔فرمایا: "اگر حاکم ظالم ہو تو اُس کو بُرا نہ کہتے پھر و بلکہ اپنی حالت میں اصلاح کرو، خدا اُس کو بدل دے گا یا
اُسی کو نیک کر دے گا۔جو تکلیف آتی ہے وہ اپنی ہی بد عملیوں کے سبب آتی ہے۔ورنہ مومن کے ساتھ خدا کا ستارہ
ہوتا ہے ، مؤمن کے لئے خدا تعالیٰ آپ سامان مہیا کر دیتا ہے۔میری نصیحت یہی ہے کہ ہر طرح سے تم نیکی کا نمونہ
بنو۔خدا کے حقوق بھی تلف نہ کرو اور بندوں کے حقوق بھی تلف نہ کرو۔“
( ملفوظات جلد اوّل صفحہ 171 مطبوعہ ربوہ)
(الحکم 24 مئی 1901ء۔نمبر 19 جلد 5 صفحہ 9 کالم نمبر 2)
b

خطبات مسرور جلد نهم
161
خطبہ جمعہ فرمودہ مورخہ یکم اپریل 2011ء
یہ نیکی کے نمونے ہیں جو احمدیوں کو بھی قائم کرنے چاہئیں بلکہ احمدیوں کو ہی قائم کرنے چاہئیں۔أولى الأمر منكم سے مراد صرف مسلمان حکمران نہیں۔اس بارے میں حضرت خلیفہ المسیح الثانی وضاحت کرتے
ہوئے فرماتے ہیں کہ ”بعض مسلمان غلطی سے اس آیت کے معنی یہ سمجھتے ہیں کہ یہ حکم صرف مسلمان حکام کے حق
میں ہے کہ اُن کی اطاعت کی جاوے۔لیکن یہ بات غلط ہے اور قرآن کریم کے اصول کے خلاف ہے۔بیشک اس جگہ
لفظ منکھ کا پایا جاتا ہے۔مگر منکھ کے معنی یہ نہیں ہیں کہ جو تمہارے ہم مذہب ہوں بلکہ اس کے یہی معنی ہیں کہ
جو تم میں سے بطور حاکم مقرر ہوں۔من ان معنوں میں استعمال ہوتا ہے۔قرآنِ کریم میں اللہ تعالیٰ کفار کو مخاطب
کر کے فرماتا ہے کہ اَلَمْ يَأْتِكُمْ رُسُلُ مِنْكُمُ (الانعام : 131)۔اس آیت میں منکھ کے معنی اگر ہم مذہب
کریں تو اس کے یہ معنی ہوں گے کہ نَعُوذُ بِالله مِنْ ذَالِكَ رسول کفار کے ہم مذہب تھے۔پس ضروری نہیں کہ
منگھ کے معنی ہم مذہب کے ہوں۔یہ اور معنوں میں بھی استعمال ہوتا ہے اور اس جگہ اس کے یہی معنی ہیں کہ وہ
حاکم جو تمہارے ملک کے ہوں یعنی یہ نہیں کہ جو حاکم ہو اُس کی اطاعت کرو بلکہ اُن کی اطاعت کرو جو تمہارا حاکم ہو۔اور فَإِنْ تَنَازَعْتُمْ فِي شَيْءٍ فَرُدُّوهُ إِلَى اللهِ وَالرَّسُولِ کے یہ معنی نہیں کہ قرآن و حدیث کی رُو سے فیصلہ کرلو۔بلکہ اس کے یہ معنی ہیں کہ اگر حکام کے ساتھ تنازع ہو جائے تو خدا اور اُس کے رسول کے احکام کی طرف اُس کو لوٹا
دو۔اور وہ حکم یہی ہے کہ انسان حکومت وقت کو اُس کی غلطی پر آگاہ کر دے۔اگر وہ نہ مانے تو پھر اللہ تعالیٰ پر معاملہ
کو چھوڑ دے۔وہ خود فیصلہ کرے گا اور ظالم کو اُس کے کردار کی سزا دے گا“۔جیسا کہ حضرت یوسف کے واقعہ میں بیان کر آیا ہوں، آپ بھی یہی دلیل دے رہے ہیں۔پھر فرماتے
ہیں کہ ” قرآنِ کریم میں حضرت یوسف کا واقعہ جس طرح بیان ہوا ہے وہ بھی دلالت کرتا ہے کہ حاکم خواہ کسی
مذہب کا ہو اُس کی اطاعت ضروری ہے۔بلکہ اگر اُس کے احکام ایسے شرعی احکام کے مخالف بھی پڑ جاویں جن کا
بجالانا حکومت کے ذمہ ہوتا ہے تب بھی اُس کی اطاعت کرے۔چنانچہ حضرت یوسف کی نسبت اللہ تعالیٰ فرماتا ہے
کہ جب اُن کے بھائی اُن کے پاس چھوٹے بھائی کو لائے تو وہ اُن کو وہاں کے بادشاہ کے قوانین کی رو سے اپنے پاس
نہیں رکھ سکتے تھے اس لئے خدا نے اُن کے لئے خود ایک تدبیر کر دی۔اسی طرح آپ آگے جا کر فرماتے ہیں
کہ یہ جو آیت ہے اجعلني عَلى خَزَانِ الْأَرْضِ (یوسف: 56) اس کے نیچے تفسیر فتح البیان میں لکھا ہے۔اس نے
اس کی تفسیر بیان کی ہے۔یعنی اس آیت سے استدلال کیا گیا ہے کہ ”ظالم بلکہ کافر بادشاہ کی طرف سے عہدوں
کا قبول کرنا اس شخص کے لئے جائز ہے جو اپنی جان پر اعتبار رکھتا ہے کہ وہ حق کو قائم رکھ سکے گا۔یاد رکھنا چاہئے کہ
حق کے قیام سے یہ مطلب نہیں کہ وہ اپنی شریعت کو چلا سکے۔کیونکہ جیسا کہ حضرت یوسف کے بھائی کے معاملہ
سے ظاہر ہے ، کافر کی ملازمت کے لئے یہ شرط نہیں کہ مومن اپنا ذاتی خیال چلا سکے۔پس حق کی حفاظت سے یہی
مراد ہے کہ ظلم کی باتوں میں ساتھ شامل نہ ہو جائے۔پس حضرت یوسف کے معاملہ سے بھی ظاہر ہے کہ خواہ
گورنمنٹ کا فر ہی کیوں نہ ہو، اُس کی وفاداری ضروری ہے۔“
ترک موالات اور احکام اسلام، بحوالہ انوار العلوم جلد 5 صفحہ 259، 260 )

خطبات مسرور جلد نهم
162
خطبہ جمعہ فرمودہ مورخہ یکم اپریل 2011ء
اس کی مزید وضاحت کہ حکمرانوں سے اختلاف کی صورت میں کیا کیا جائے؟ جیسا کہ پہلے بھی ذکر ہو چکا
ہے کہ کیا حکمران صرف مسلمان ہیں جن کی اطاعت کرنی ہے۔یا یہ جو حکم ہے یہ دونوں کے لئے آتا ہے۔آنحضرت صلی اللہ علیہ وسلم نے اس بارہ میں کیا ارشاد فرمایا؟ آپ نے پہلے خلفاء کی بابت فرمایا کہ ” میں تمہیں
وصیت کرتا ہوں کہ تم اللہ تعالیٰ کا تقویٰ اختیار کرو اور اطاعت اور فرمانبرداری کو اپنا شیوہ بناؤ خواہ کوئی حبشی غلام ہی
تم پر حکمران کیوں نہ ہو۔جو لوگ میرے بعد زندہ رہیں گے ، وہ لوگوں میں بہت بڑا اختلاف دیکھیں گے۔پس ایسے
وقت میں میری وصیت تمہیں یہی ہے کہ تم میری سنت اور میرے بعد آنے والے خلفاء راشدین کی سنت کو اختیار
کرنا۔تَمَسَّكُوا بِھا۔تم اس سنت کو مضبوطی سے پکڑ لینا اور جس طرح کسی چیز کو دانتوں سے پکڑ لیا جاتا ہے، اسی
طرح اس سنت سے چھٹے رہنا اور کبھی اس راستے کو نہ چھوڑنا جو میرا ہے یا میرے خلفاء راشدین کا ہو گا“۔مسند احمد بن
حنبل کی یہ حدیث ہے۔(مسند احمد بن حنبل - مسند العرباض بن ساريه جلد نمبر 5 صفحہ 842- حدیث نمبر 17275 عالم الكتب بيروت 1998ء)
اور دنیاوی حکام کی بابت کیا تعلیم ہے؟ یہ بخاری میں ہی ہے۔فرمایا کہ ” تم میرے بعد ایسے حالات دیکھو
گے کہ تمہارے ساتھ بے انصافی ہو گی“۔( اس کا پہلے بھی ذکر آچکا ہے۔جو دنیاوی حکام ہیں یہ اُن کے لئے ہے۔)
”تمہارے حقوق دبائے جائیں گے اور دوسروں کو تم پر ترجیح دی جائے گی۔اور ایسے امور دیکھو گے
جنہیں تم نا پسند کرو گے۔صحابہ نے عرض کی کہ یارسول اللہ ! ایسے حالات میں آپ ہمیں حکم کیا دیتے ہیں؟ آپ
نے فرمایا۔اُن کا یعنی ایسے حکمرانوں کا حق اُنہیں دینا اور اپنا حق اللہ سے مانگنا“۔(صحیح بخاری۔کتاب الفتن باب قول النبی الله سترون بعدی اموراً تنكرونها حديث 7052)
مسلم میں بھی اس سے ملتی جلتی ایک حدیث ہے جس کا ترجمہ یہ ہے کہ خواہ حکمران بہت ظالم اور غاصب
ہو ، اس کی اطاعت کرنی ہے۔(صحيح مسلم كتاب الامارة باب في طاعة الامراء وان منعوا الحقوق حديث4782)
پس ظالم حکمران کی بھی اطاعت کا حق ادا کیا جائے۔اُس کے خلاف بغاوت نہ کی جائے اور اُس کی اطاعت
سے انکار نہ کیا جائے۔بلکہ اُس کی تکلیف اور شر کے دور کرنے اور اُس کی اصلاح ہونے کے لئے اللہ تعالیٰ کے حضور
تفرع کے ساتھ دعا کی جائے۔ایک احمدی کو یہ بھی یاد رکھنا چاہئے کہ اُس نے کن شرائط پر حضرت مسیح موعود علیہ الصلوۃ والسلام کی
بیعت کی ہے ؟ شرط دوم مثلاً یہ ہے کہ جھوٹ اور زنا اور بد نظری اور ہر ایک فسق و فجور اور ظلم اور خیانت اور فساد
اور بغاوت کے طریقوں سے بچتارہے گا۔اور نفسانی جو شوں کے وقت اُن کا مغلوب نہیں ہو گا اگر چہ کیسا ہی جذبہ
پیش آوے“۔اور چوتھی شرط یہ ہے کہ ”یہ کہ عام خلق اللہ کو عموماً اور مسلمانوں کو خصوصاً اپنے نفسانی جو شوں سے کسی
نوع کی ناجائز تکلیف نہیں دے گا، نہ زبان سے نہ ہاتھ سے نہ کسی اور طرح سے “۔( مجموعہ اشتہارات جلد اوّل صفحہ 159 مطبوعہ ربوہ)

خطبات مسرور جلد نهم
163
خطبہ جمعہ فرمودہ مورخہ یکم اپریل 2011ء
پھر حضرت مسیح موعود علیہ الصلوۃ والسلام فرماتے ہیں کہ :
” وَالْفِتْنَةُ أَكْبَرُ مِنَ الْقَتْلِ ( البقرۃ: 218)۔۔۔۔۔اور بغاوت کو پھیلانا یعنی امن کا خلل انداز ہونا
قتل سے بڑھ کر ہے“۔(جنگ مقدس۔روحانی خزائن۔جلد 6 صفحہ 255 )
فرمایا کہ اولی الامر سے مراد جسمانی طور پر بادشاہ اور روحانی طور پر امام الزمان ہے۔اور جسمانی طور پر
جو شخص ہمارے مقاصد کا مخالف نہ ہو اور اُس سے مذہبی فائدہ ہمیں حاصل ہو سکے وہ ہم میں سے ہے“۔(ضرورت الامام۔روحانی خزائن جلد 13 صفحہ 493)
پھر فرمایا کہ ”خدا نخواستہ اگر کسی ایسی جگہ طاعون پھیلے جہاں تم میں سے کوئی ہو تو میں تمہیں ہدایت کرتا
ہوں کہ گورنمنٹ کے قوانین کی سب سے پہلے اطاعت کرنے والے تم ہو۔اکثر مقامات میں سنا گیا ہے کہ پولیس
والوں سے مقابلہ ہوا۔میرے نزدیک گور نمنٹ کے قوانین کے خلاف کرنا بغاوت ہے جو خطر ناک جرم ہے۔ہاں
گورنمنٹ کا بیشک یہ فرض ہے کہ وہ ایسے افسر مقرر کرے جو خوش اخلاق، متدین اور ملک کے رسم و رواج اور
مذہبی پابندیوں سے آگاہ ہوں۔غرض تم خود ان قوانین پر عمل کرو اور اپنے دوستوں اور ہمسایوں کو ان قوانین کے
( ملفوظات۔جلد اول۔صفحہ 134۔جدید ایڈیشن)
فوائد سے آگاہ کرو۔“
پھر ایک دفعہ کالج میں ، یونیورسٹی میں ایک ہڑتال ہوئی۔اس کے بارہ میں فرمایا کہ ”مفسد طلباء کے ساتھ
شمولیت کا جو طریق اختیار کیا ہے یہ ہماری تعلیم اور ہمارے مشورہ کے بالکل مخالف ہے۔لہذا وہ اس دن سے اس
بغاوت میں شریک ہے۔“ (یعنی جو بھی اپنے ایک عزیز کے بارے میں فرمایا)۔پھر آپ فرماتے ہیں کہ۔۔۔جب
طلباء نے لاہور میں اپنے پروفیسروں کی مخالفت میں سٹرائیک کیا تھا تو جو لڑکے اس جماعت میں شامل تھے اُن کو میں
نے حکم دیا تھا کہ وہ اس مخالفت میں شامل نہ ہوں اور اپنے استادوں سے معافی مانگ کر فوراً کالج میں داخل ہو جاویں۔چنانچہ انہوں نے میرے حکم کی فرمانبرداری کی اور اپنے کالج میں داخل ہو کر ایک ایسی نیک مثال قائم کی کہ
دوسرے طلباء بھی فوراداخل ہو گئے۔“ (ملفوظات۔جلد پنجم۔صفحہ 173،172۔جدید ایڈیشن)
حضرت خلیفتہ المسیح الاول رضی اللہ عنہ کی اس بارہ میں کیا وضاحت ہے۔آپ فرماتے ہیں کہ
" ہر ایک مسلمان کے لئے اطاعت اللہ و اطاعت الرسول و اطاعت اولی الامر ضروری۔اگر اولی
الامر صریح مخالف فرمانِ الہی اور فرمانِ نبوی کی کرے تو بقدر برداشت مسلمان اپنی شخصی و ذاتی معاملات میں اولی
الامر کا حکم نہ مانے یا اُس کا ملک چھوڑ دے۔اَطِيْعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمُ صاف نصّ ہے۔أُولِي
الامر میں حکام و سلطان اول ہیں اور علماء و حکماء دوم درجہ پر ہیں“۔( البدر نمبر 8۔جلد 9۔16 دسمبر 1909ء۔صفحہ 4 کالم 2)

خطبات مسرور جلد نهم
164
خطبہ جمعہ فرمودہ مورخہ یکم اپریل 2011ء
اب بعض لوگ یہ بھی سوال اُٹھا دیتے ہیں کہ کشمیریوں کے حق میں حضرت مصلح موعود رضی اللہ تعالیٰ
عنہ نے ہندوستان کے مسلمانوں کے ساتھ مل کر جو جلسہ اور جلوس کیا تھا اور اُس کی اجازت دی تھی۔لوگ سمجھتے
ہیں کہ یہ جو طریق تھا یہ بھی وہی طریق ہے جو آج کل حکومت کے خلاف بغاوت ہے اور اس لئے جائز ہے۔حالانکہ
یہ ایک باہر کی آواز تھی۔جلوس اور جلسے اُن کے حقوق دلوانے کے لئے تھے۔کوئی لڑائی نہیں تھی۔کوئی توڑ پھوڑ
نہیں تھی۔حکومت کو توجہ دلائی گئی تھی کہ کشمیریوں کے جو حقوق غصب کئے جارہے ہیں وہ دیئے جائیں۔اُن کی
جائیدادیں اُن کے نام برائے نام ہیں، اور ساری جائیداد کی جو آمد ہے وہ راجہ کے پاس چلی جاتی ہے تو اُن حقوق کی
طرف توجہ دلائی گئی تھی کہ اُن کے حقوق اُن کو دلوائے جائیں۔بہر حال حضرت مصلح موعود رضی اللہ تعالیٰ عنہ سے
1929ء میں 29 نومبر کی ہڑتال کے متعلق دریافت کیا گیا کہ احمدیوں کا اس کے متعلق کیا رویہ ہونا چاہئے ؟ تو آپ
نے فرمایا کہ ” ہڑتال میں شامل نہیں ہونا چاہئے۔ہاں، جلسے اور جلوس وغیرہ میں شامل ہو جانا چاہئے“۔حقوق کے
لئے جہاں تک جلسے جلوس کا تعلق ہے ٹھیک ہے کیونکہ اس کی حکومت نے ایک حد تک اجازت دی ہوئی ہے۔لیکن
ہڑتال اور دکانیں بند اور توڑ پھوڑ، یہ چیزیں جائز نہیں۔پھر ایک صاحب نے کہا کہ شہروں میں احمدیوں کی دکانیں چونکہ بہت کم ہوتی ہیں اس لئے اگر وہ کھلی
رہیں تو حملہ کا خطرہ ہوتا ہے اور لوگ ڈنڈے سے بند کرواتے ہیں“۔اس پر فرمایا کہ "اگر ڈنڈے سے کوئی بند کرائے
تو کر دی جائے اور پولیس میں جاکر اطلاع دے دی جائے کہ ہم دکان کھولنا چاہتے ہیں لیکن ہمیں فلاں آدمی نہیں
کھولنے دیتے۔اگر پولیس حفاظت کا ذمہ لے تو کھول دی جائے ورنہ نہ سہی“۔ایک صاحب نے عرض کیا کہ کیا ہڑتال قانونا ممنوع ہے؟ تو جواب میں آپ نے فرمایا کہ ” قانون کا
سوال نہیں۔یہ یوں بھی ایک فضول چیز ہے جس سے گاہک اور دکاندار دونوں کو نقصان پہنچتا ہے۔اب 29 تاریخ کو
جو مسلمان باہر سے لاہور یا اپنے قریبی شہروں میں سودا وغیرہ خریدنے جائیں گے وہ مجبوراً ہندوؤں کی دکانوں سے
سودا خریدیں گے (کیونکہ مسلمانوں نے ہڑتال کی ہوئی ہے) جس سے مسلمانوں کو نقصان پہنچے گا۔“
(ماخوذ از اخبار الفضل قادیان مؤرخہ 10 دسمبر 1929ء نمبر 47 جلد 17 صفحہ 6 کالم 1)
پھر آپ نے ایک دفعہ فرمایا کہ قانون شکنی کی تلقین کرنے والوں سے ہم کبھی تعاون نہیں کر سکتے۔بعض جماعتیں ایسی ہیں جو بغاوت کی تعلیم دیتی ہیں۔بعض قتل وغارت کی تلقین کرتی ہیں۔بعض قانون کی پابندی
کو ضروری نہیں سمجھتیں۔ان معاملات میں کسی جماعت سے ہمارا تعاون نہیں ہو سکتا۔کیونکہ یہ ہماری مذہبی تعلیم کے
خلاف امور ہیں۔اور مذہب کی پابندی اتنی ضروری ہے کہ چاہے ساری گورنمنٹ ہماری دشمن ہو جائے اور جہاں
کسی احمدی کو دیکھے اُسے صلیب پر لٹکانا شروع کر دے پھر بھی ہمارا یہ فیصلہ بدل نہیں سکتا کہ قانونِ شریعت اور
قانونِ ملک کبھی نہ توڑا جائے۔اگر اس وجہ سے ہمیں شدید ترین تکلیفیں بھی دی جائیں تب بھی یہ جائز نہیں کہ ہم
اس کے خلاف چلیں“۔الفضل 6 اگست 1935ء جلد 23 نمبر 31 صفحہ 10 کالم 3)

خطبات مسرور جلد نهم
165
خطبہ جمعہ فرمودہ مورخہ یکم اپریل 2011ء
پس ہڑتالوں کے بارہ میں بڑے واضح طور پر یہ سارے احکامات سامنے آگئے ہیں۔میں نے پہلے بھی
حدیث کی وضاحت میں سورۃ بقرۃ کی آیت 206 کا ایک حصہ سنایا تھا کہ وَاللهُ لاَ يُحِبُّ الْفَسَادَ - اللہ تعالیٰ فساد کو پسند
نہیں کرتا۔جب زبر دستیاں شروع ہوتی ہیں تو فساد پیدا ہوتا ہے۔اس وقت بد قسمتی سے اس فساد کی حالت میں سب
سے زیادہ مسلمان ممالک اس کی لپیٹ میں ہیں۔یہ مکمل آیت جو ہے یوں ہے کہ وَإِذَا تَوَلَّى سَعَى فِي الْأَرْضِ لِيُفْسِدَ
فِيهَا وَ يُهْلِكَ الْحَرْثَ وَالنَّسْلَ وَاللهُ لاَ يُحِبُّ الْفَسَادَ (البقرة : 206) اور جب وہ صاحب اختیار ہو جائے تو زمین
میں دوڑا پھر تا ہے تا کہ اس میں فساد کرے اور فصل اور نسل کو ہلاک کرے جبکہ اللہ فساد کو پسند نہیں کرتا۔تو جب ظالم حکمران ہو جاتے ہیں تو وہ دوسروں کی جو مخالفین ہیں اُن کی جائیدادوں کو، اُن کی فصلوں کو،
اُن کی نسلوں کو بے دریغ نقصان پہنچانے کی کوشش کرتے ہیں۔اب یہ پوری آیت جو ہے یہ حکمرانوں کو تنبیہ کر رہی
ہے۔کیونکہ اللہ تعالیٰ کا ایک عمومی فرمان بھی ہے کہ وَاللهُ لَا يُحِبُّ الْفَسَادَ۔اس لئے بغاوت کرنے والوں کے لئے
بھی یہی حکم ہے۔پس جیسا کہ میں نے شروع میں کہا تھا کہ قرآنِ کریم صرف عوام الناس کو یہ حکم نہیں دیتا بلکہ حکمرانوں
کو بھی یہی کہتا ہے کہ اپنے اقتدار پر تکبر کر کے ملک میں فساد پیدا نہ کرو۔عوام کے حقوق تلف نہ کرو۔امیر اور
غریب کے فرق کو اتنا نہ بڑھاؤ کہ عوام میں بے چینی پیدا ہو جائے اور اس کے نتیجے میں پھر بغاوت کے حالات پیدا
ہوں اور اس طرح تم اپنے اس عمل کی وجہ سے بھی خدا تعالیٰ کی پکڑ میں آؤ۔اب دیکھیں جو حالات سامنے آرہے ہیں، بلا استثناء ہر جگہ یہی آواز اُٹھ رہی ہے کہ قومی دولت لوٹی گئی
ہے اور عوام کو اُن کے حقوق سے محروم کیا گیا ہے۔کس قدر بد قسمتی ہے کہ جن لوگوں کو اللہ تعالیٰ نے خاص طور پر
نصیحت کی اور تنبیہ فرمائی تھی، انہی میں سے سب سے آگے یہ لوگ ہیں جو آج کل مسلمان ملکوں کے حکمران ہیں ، جو
اس قسم کی غلط حرکتیں کر رہے ہیں۔عوام کے جان و مال کی حفاظت کی ذمہ داری حکمرانوں کی ہے، اُن کی
اقتصادیات کی بہتری کی ذمہ داری حکمرانوں کی ہے۔اُن کی صحت کی ذمہ داری حکمرانوں کی ہے اور اس طرح
دوسرے بہت سارے حقوق ہیں۔غرضیکہ یہ سب حکومتوں کے کام ہیں۔اُن کو یہ ادا کرنے چاہئیں۔ان کو سر انجام نہ
دے کر یہ لوگ فساد پیدا کر رہے ہیں اور فساد اللہ تعالیٰ کی نظر میں جیسا کہ اللہ تعالیٰ فرماتا ہے انتہائی ناپسندیدہ ہے۔پس ہمارے حکمرانوں کو اللہ تعالیٰ کے انعاموں کی قدر کرتے ہوئے اُن اصولوں اور اُسوہ پر چلنے کی
کوشش کرنی چاہئے جس کی مثالیں ہم دیتے ہیں۔حضرت عمرؓ نے جب حکومت تھی تو کس طرح انصاف قائم فرمایا تھا
کہ عیسائی، عیسائیوں کی حکومت دوبارہ قائم ہونے پر رو رو کر یہ دعا کرتے تھے کہ مسلمان دوبارہ ہمارے حکمران بن
جائیں۔اور یہاں یہ حال ہے کہ مسلمان رعایا مسلمان حکمرانوں کے خلاف کھڑی ہے کہ انصاف قائم نہیں ہو رہا۔پس اُس تقویٰ کی تلاش کی ضرورت ہے جو آج مسلمانوں میں مفقود ہے، ختم ہو چکا ہے۔حکمران ہیں یا عوام ہیں
دونوں اگر اس اصل کو پکڑیں گے تو کامیاب ہوں گے۔بہر حال احمدیوں کے لئے یہ واضح ہدایت ہے کہ اپنے آپ کو

166
خطبہ جمعہ فرمودہ مورخہ یکم اپریل 2011ء
خطبات مسرور جلد نهم
اس فساد سے بچانا ہے۔دعائیں کریں۔اگر دل سے نکلی ہوئی دعائیں ہوں گی تو ایک وقت میں جب اللہ تعالیٰ چاہے گا
قبولیت کا درجہ پائیں گی اور ان ظالموں سے اگر ظالم حکمران ہیں تو نجات ملے گی جیسا کہ حضرت مسیح موعود علیہ
الصلوۃ والسلام نے فرمایا ہے۔آگے بھی جو تبدیلیوں کے بعد حالات نظر آرہے ہیں وہ شاید عارضی امن کے تو ہوں لیکن مستقل امن
کے نہیں ہیں۔اس طرح جو تبدیلیاں ہوتی ہیں، جو ظلم کر کے اقتداروں پر قبضہ کیا جاتا ہے یا انقلاب لائے جاتے ہیں
تو اُن میں بھی ایک مدت کے بعد پھر ظالم حکمران پیدا ہونے شروع ہو جاتے ہیں۔ایک ظالم کے جانے کے بعد
دوسرے ظالم آجاتے ہیں۔اس لئے یہ دعا بھی کریں کہ اللہ تعالٰی ہم پر کوئی ظالم حکمران کبھی مسلط نہ کرے۔اللہ
کرے کہ عامتہ المسلمین بھی اور حکمران بھی اپنے اپنے فرائض اور حقوق کو پہچانیں اور پھر اُن کو ادا کرنے کی کوشش
کریں اور اسلام کی خوبصورت تعلیم دنیا کے سامنے پیش کریں۔اس وقت جمعہ کی نماز کے بعد میں (چند) جنازے غائب بھی پڑھاؤں گا۔پہلا جنازہ امۃ الودود صاحبہ
اہلیہ مکرم سید عبدالحئی شاہ صاحب ناظر اشاعت انجمن احمد یہ ربوہ کا ہے۔دو دن پہلے اچانک بلڈ پریشر ہائی ہوا اور
ہسپتال میں داخل تھیں کہ برین ہیمبرج ہو گیا اور وہیں 25 مارچ کو اُن کی وفات ہو گئی۔اِنَّا لِلَّهِ وَإِنَّا إِلَيْهِ رَاجِعُوْنَ۔اُن کی عمر 72 سال تھی۔محترم شیخ محبوب الہی صاحب ساکن سری نگر کی بیٹی تھیں جو ایک برہمن تھے اور ہندو
مذہب ترک کر کے خود احمدی ہوئے تھے۔اُن کا پہلا نام رادھا کرشن تھا۔حضرت مصلح موعودؓ نے شیخ صاحب کو
قادیان بلا کر دینی تعلیم دلوائی، اور پھر انہوں نے خدمت دین کی۔مرحومہ کی والدہ محترمہ خواجہ عبد العزیز ڈار
صاحب ابن حضرت حاجی عمر ڈار صاحب صحابی حضرت مسیح موعود علیہ السلام کی بیٹی تھیں۔اچھے آسودہ حال گھرانے
سے تھیں لیکن واقف زندگی سے شادی ہوئی ہے تو اپنے وقف کو خوب نبھایا ہے اور ہر حالت میں خوشی سے گزارہ کیا
ہے۔ملنسار اور غریب پرور تھیں۔ایک چھ سات سال کی بچی کو لے کر پالا۔تربیت کی ، پرورش کی، اُسے تعلیم دلوائی
وری طور پر اس کی شادی کی
اور اپنے خرچ پر اُس کی شادی کی۔ہمارے جو احمد يحيی صاحب ہیں Humanity First کے چئیر مین، یہ ان کی
والدہ تھیں۔دوسر اجنازہ محمد سعید اشرف صاحب ابن چوہدری محمد شریف صاحب لاہور کا ہے۔یہ ایک سڑک عبور
کرتے ہوئے 27 مارچ کو ایک ایکسیڈنٹ کا شکار ہو گئے۔تین موٹر سائیکل سواروں نے آپ کو ٹکر ماری۔آپ اور
آپ کی اہلیہ دونوں جارہے تھے۔اہلیہ کو تو چوٹیں لگیں۔یہ وہیں سائیڈ پر گر گئے اور موٹر سائیکل ان کے اوپر سے
گزر گیا۔بہر حال سہارے سے اٹھے اور رکشہ کو رکوایا۔ہسپتال جا رہے تھے لیکن جب وہاں ہسپتال جا کے مرہم پٹی
کی ہے تو ابھی دس منٹ بھی نہیں گزرے تھے کہ سانس رکنے لگا اور وہیں وفات ہو گئی۔اِنَّا لِلَّهِ وَإِنَّا لَيْهِ رَاجِعُوْن۔آپ کے نانا حضرت فضل دین صاحب اور نانی حسن بی بی صاحبہ دونوں حضرت مسیح موعود علیہ السلام کے
صحابی تھے۔اور جماعت سے وفا اور خلافت سے انتہائی وفا اور اخلاص کا تعلق تھا۔جماعتی کاموں میں حصہ لینے والے

167
خطبہ جمعہ فرمودہ مورخہ یکم اپریل 2011ء
خطبات مسرور جلد نهم
تھے۔ان کے ایک بیٹے محمد احسن سعید صاحب مربی سلسلہ ہیں۔جامعہ احمد یہ جرمنی میں بطور استاد کام کر رہے ہیں۔یہ جانے لگے تھے تو اُن کی والدہ نے کہا کہ وقف کا تقاضا یہی ہے کہ تم یہاں نہ آؤ اور اپنے فرائض انجام دو تو دوسرا
جنازہ ان کا ہے جو ادا ہو گا۔تیسرا جنازہ نعیمہ بیگم صاحبہ کا ہے۔اوہائیو امریکہ میں ان کی وفات ہوئی ہے۔ڈاکٹر حشمت اللہ خان
صاحب رضی اللہ تعالیٰ عنہ جو حضرت خلیفتہ المسیح الثانی رضی اللہ تعالیٰ عنہ کے معالج خاص تھے اُن کی بیٹی تھیں اور
خلافت ثانیہ سے لے کر اب تک خلافت سے ان کا بڑا تعلق تھا اور ذاتی تعلق تھا اور بڑا اخلاص و وفا تھا۔حضرت خلیفہ
المسیح الثانی کے کہنے پر انہوں نے ایم اے ہسٹری کیا ہے۔جامعہ نصرت میں کچھ عرصہ پڑھایا۔پھر آج کل اپنے بیٹے
کے پاس امریکہ میں مقیم تھیں۔وہاں بھی یہ لجنہ کے کاموں میں بڑھ چڑھ کر حصہ لینے والی تھیں۔اللہ کے فضل سے
موصیہ تھیں۔اللہ تعالیٰ ان کے درجات بلند کرے۔اگلا ایک اور جنازہ نعیم احمد وسیم صاحب کا ہے جو 6 مارچ کو امریکہ میں وفات پاگئے۔إِنَّا لِلَّهِ وَإِنَّا إِلَيْهِ
رَاجِعُون۔یہ حضرت حاجی محمد دین صاحب تہالوی رضی اللہ تعالیٰ عنہ صحابی حضرت مسیح موعود علیہ السلام کے بیٹے
تھے جو قادیان میں“ دعاؤں کی مشین ” کے نام سے معروف تھے۔نہایت مخلص، متوکل اور فدائی خادم سلسلہ تھے
اور سب جماعتی تحریکات میں بڑھ چڑھ کر حصہ لیتے تھے۔حضرت خلیفہ المسیح الثالث ، حضرت مرزا ناصر احمد خلافت
سے پہلے جب خلافت ثانیہ میں حفاظت مرکز کی نگرانی کا کام ان کے سپرد تھا تو اس وقت یہ اُن کے ساتھ بھی کام
کرتے رہے ہیں۔ربوہ کی سنگ بنیاد کی تقریب میں بھی یہ شامل ہوئے تھے۔اُس کے بعد یہ امریکہ چلے گئے۔وہاں
امریکہ میں بھی انصار اللہ کے قائد مال کی حیثیت سے کام کرتے رہے۔چند مہینے پہلے ان کو دل کا حملہ ہوا تھا اور کافی
حالت خراب ہو گئی تھی۔اُس وقت بھی مسجد کے لئے انصار اللہ کی کوشش تھی اور چندہ اکٹھا کر رہے تھے تو ہوش میں
آتے ہی جو پہلا سوال کیا وہ یہی تھا کہ مسجد کے چندے کا حساب کتاب ٹھیک کر لیا گیا ہے کہ نہیں ؟ یا فلاں فلاں بل
کی ادائیگی ہوئی تھی وہ کر دی ہے کہ نہیں کر دی۔اللہ تعالیٰ ان سب مرحومین کے درجات بلند فرمائے ، اور ان کی نیکیاں ان کی نسلوں میں جاری
رکھے۔نماز جمعہ کے بعد ان کی نماز جنازہ ہو گی۔الفضل انٹر نیشنل 22 اپریل تا 28 اپریل 2011ء جلد 18 شمارہ 16 صفحہ 5 تا 9)

آج 10 میں سے 10 باقی