کتاب 7: ذکر الٰہی اور دعا کی اہمیت
حدیقۃ الصالحین, حصہ 2
حدیقۃ الصالحین 5095
حضرت انس بن مالکؓ سے روایت ہے کہ نبی ﷺ نے فرمایا جب کوئی آدمی اپنے گھر سے نکلے تو کہے ’’اللہ کے نام کے ساتھ (شروع کرتا ہوں) میں اللہ پر ہی توکل کرتا ہوں، اللہ کے سوا نہ (برائی) ہٹانے کی طاقت اور نہ (بھلائی) دینے کی قوت ہے‘‘۔
حدیقۃ الصالحین 4884
حضرت عبداللہؓ سے روایت ہے کہ نبی ﷺ یہ دعا کیا کرتے تھے اے اللہ! میں تجھ سے ہدایت اور تقویٰ اور عفّت اور غناء طلب کرتا ہوں۔
حدیقۃ الصالحین 1487
نبی ﷺ کی زوجہ مطہرہ حضرت عائشہؓ فرماتی ہیں کہ جب آندھی چلتی تو نبی ﷺ کہتے اے اللہ! میں تجھ سے اس کی بھلائی چاہتا ہوں اور اس کی خیر جو اس میں ہے اور وہ خیر جس کے ساتھ یہ بھیجی گئی ہے اور میں تجھ سے اس کے شرّ سے پناہ چاہتا ہوں اور اس کے شر سے جو اس میں ہے اور اس شر سے جس کے ساتھ یہ بھیجی گئی ہے۔
حدیقۃ الصالحین 3449
حضرت عائشہ ؓ بیان کرتی ہیں کہ رسول اللہ ﷺ جب آندھی کو دیکھتے تو یوں دعا کرتے ’’اے میرے خدا! تجھ سے اس آندھی کی خیر چاہتا ہوں اور وہ بھلائی چاہتا ہوں جو اس میں ہے اور جس کے لئے اسے بھیجا گیا ہے۔ اور میں تجھ سے اس آندھی کے شر سے پناہ چاہتا ہوں اور اس نقصان سے پناہ چاہتا ہوں جو اس میں مخفی ہے اور جن شر انگیز اور نقصان دہ حالات کے لئے اسے بھیجا گیا ہے ان سے بھی پناہ چاہتا ہوں‘‘۔
حدیقۃ الصالحین 3562
حضرت عمرؓ بیان کرتے ہیں کہ عمرہ کے لئے میں نے آنحضرتﷺ سے اجازت چاہی۔ آپﷺ نے فرمایا میرے بھائی! ہمیں اپنی دعاؤں میں شامل رکھنا اور ہمیں بھول نہ جانا۔
حدیقۃ الصالحین 195
حضرت عمرؓ بیان کرتے ہیں کہ عمرہ کے لئے میں نے نبی ﷺ سے اجازت چاہی۔ آپ ﷺ نے اجازت مرحمت فرمائی اور ساتھ ہی فرمایا میرے بھائی! ہمیں اپنی دعاؤں میں بھول نہ جانا۔ اور بعد میں فرمایا میرے بھائی! اپنی دعاؤں میں ہمیں بھی شریک کرنا۔ حضرت عمرؓ کہتے تھے حضور ﷺ کی اس بات سے (کہ ’’اے میرے بھائی‘‘) مجھے اتنی خوشی ہوئی کہ اگر اس کے بدلے میں مجھے ساری دنیا مل جائے تو اتنی خوشی نہ ہو۔
حدیقۃ الصالحین 3448
حضرت ابوہریرہ ؓ بیان کرتے ہیں کہ رسول اللہ ﷺ نے فرمایا تین دعائیں بلا شک قبول ہوتی ہیں۔ مظلوم کی دعا، مسافر کی دعا اور باپ کی بیٹے کے متعلق دعا۔