جسمانی اور روحانی دو سلسلے اور ان کی باہمی مطابقت
ارشادات نور (جلد اوّل۔ قبل از خلافت)
ادائیگی نماز کسوف اس لئے یہاں دارالامان میں کسوف شروع ہوتے ہی نماز کی تیاری شروع ہوگئی اور ساڑھے دس کے قریب حکیم الامت سلمہ ربہ نے نماز باجماعت جہری قرأت سے پڑھائی۔پہلی رکعت میں سورہ الم السجدہ پڑھ کر رکوع کیا اور رکوع سے سر اٹھا کر سَمِعَ اللّٰہُ لِمَنْ حَمِدَہٗ کہہ کر سورہ احقاف پڑھی اور پھر رکوع کیا۔دوسری رکعت میں پہلے سورہ محمد کو پڑھ کر رکوع کیا اور پھر رکوع سے سر اٹھا کر اِنَّا فَتَحْنَا پڑھی اور پھر رکوع کیا۔غرض ہر رکعت میں دو دو رکوع کئے۔اسی طرح زیادہ بھی رکوع کر سکتے ہیں۔یہ نماز ایک گھنٹہ میں ختم ہوئی۔حدیث شریف میں آیا ہے کہ بعض صحابہ کو اس نماز میں طوالت قراء ت کے سبب غشی ہو جاتی تھی۔جسمانی اور روحانی دو سلسلے اور ان کی باہمی مطابقت نماز ختم ہونے کے بعد مولوی صاحب مکرم نے خطبہ پڑھا جو نہایت ہی لطیف تھا۔آپ نے فرمایا کہ دو کارخانے ہیں جسمانی اور روحانی۔پہلے اپنی حالت کو دیکھو کہ دل سے بات اٹھتی ہے تو ہاتھ اس پر عمل کرتے ہیں جس سے روح و جسم کا تعلق معلوم ہوتا ہے۔غمی و خوشی ایک روحانی کیفیت کا نام ہے مگر اس کا اثر چہرہ پر بھی ظاہر ہوتا ہے کسی سے محبت ہو تو حرکات و سکنات سے اس کا اثر معلوم ہو جاتا ہے۔انبیاء علیہم السلام نے بھی اس نکتہ کو کئی پیرایوں میں بیان کیا۔مثلاً حدیبیہ کے مقام پر جب سہیل آیا تو آنحضرت صلی اللہ علیہ وسلم نے فرمایا سَھْلُ الْاَمْرِ (اب یہ معاملہ آسانی سے فیصل ہو جائے گا)دیکھئے بات جسمانی تھی نتیجہ روحانی نکالا۔اسی طرح نبی صلی اللہ علیہ وسلم کی تعلیم کی طرف خیال کرو کہ پاخانے جاتے وقت ایک دعا سکھائی اَللّٰھُمَّ اِنِّیْ اَعُوْذُبِکَ مِنَ الْخْبْثِ وَ الْخَبَائِث (صحیح البخاری کتاب الوضو ما یقول عند الخلاء حدیث نمبر ۱۴۲)یعنی جیسے پلیدی ظاہری نکالی اسی طرح باطنی نجاست کو بھی نکالنے کی توفیق دے۔پھر جب مومن فارغ ہوجائے تو پڑھے غُفْرَانَکَ(سنن ابن ماجہ کتاب الطھارۃ و سنتھا باب مایقول اذا خرج من الخلاء حدیث نمبر ۳۰۰)
اس میں بھی یہ اشارہ تھا کہ گناہ کی خباثت سے جب انسان بچتا ہے تو اسی طرح کا روحانی چین پاتا ہے۔نماز ،روزہ ، حج ، زکوٰۃ سب ارکان اسلام میں جسمانیت کے ساتھ ساتھ روحانیت کا خیال رکھا ہے اور نادان اس پر اعتراض کرتے ہیں۔مثلاً وضو ظاہری اعضاء کے دھونے کا نام ہے مگر ساتھ ہی دعا سکھلائی ہے اَللّٰھُمَّ اجْعَلْنِیْ مِنَ التَّوَّابِیْنَ وَاجْعَلْنِیْ مِنَ الْمُتَطَہِّرِیْنَ (سنن الترمذی ابواب الطھارۃ باب مایقال بعد الوضوء حدیث نمبر ۵۵) کہ جیسے میں نے ظاہری طہارت کی ہے … مجھے باطنی طہارت بھی عطا کر پھر قبلہ کی طرف منہ کرنے میں یہ تعلیم ہے کہ میں اللہ کے لئے سارے جہان کو پشت دیتا ہوں۔یہی تعلیم رکوع و سجود میں ہے۔وہ تعظیم جو دل میں اللہ تعالیٰ کی ہے وہ جسمانی اعضاء سے ظاہر کی جارہی ہے۔زکوٰۃ روحانی بادشاہ کے حضور ایک نذر ہے اور جان و مال کو فدا کرنے کا ایک ثبوت ہے جیسا کہ ظاہری بادشاہ کے لئے کیا جاتا ہے اور حج کے افعال کو سمجھنے کے لئے اس مثال کو پیش نظر رکھیئے کہ جیسے کوئی مجازی عاشق سن لیتا ہے کہ میرے محبوب کو فلاں مقام پر کسی نے دیکھا تو وہ مجنونانہ وار اپنے لباس وغیرہ سے بے خبر اٹھ کر دوڑتا ہے ایسا ہی یہ اس محبوب لم یزل کے حضور حاضر ہونے کی ایک تعلیم ہے غرض جسمانی سلسلہ کے مقابل ایک روحانی سلسلہ بھی ضرور ہے اور اس کو نہ جاننے کے لئے بعض نادانوں نے اس سوال پر بڑی بحث کی ہے کہ مرکز قویٰ قلب ہے یا دماغ اصل بات فیصلہ کن یہ ہے کہ جسمانی رنگ میں مرکز دماغ ہے کیونکہ تمام حواس کا تعلق دماغ سے ہے اور روحانی رنگ میں مرکز قلب ہے۔انبیاء علیہم لسلام چونکہ روحانیت کی طرف توجہ رکھتے ہیں اس لئے وہ ظاہری نظارہ سے روحانی نظارہ کی طرف متوجہ ہوجاتے ہیں۔نبی کریم صلی اللہ علیہ وسلم کو اللہ تعالیٰ نے سراجاً منیراً فرمایا ہے اور آپ سراج منیر کیوں نہ ہوتے جبکہ آپ نے دعا فرمائی اَللّٰھُمَّ اجْعَلْ فَوْقِیْ نُوْرًا وَ شَمَالِیْ نُوْرًا وَاجْعَلْنِیْ نُوْرًا(یہ بڑی لمبی دعا ہے)خیر جب اس حقیقی سورج نے دیکھا کہ سورج کو گرہن لگ گیا یعنی کچھ ایسے اسباب پیش آگئے جن سے سورج کی روشنی سے اہل زمین مستفید نہیں ہوسکتے تو اس نظارہ سے آپ کا دل بھڑک اٹھا کہ کہیں میرا
فیضان پہنچنے میں بھی کوئی ایسی ہی آسمانی روک نہ پیش آجائے۔اس لئے آپ نے اس وقت تک صدقہ دعا استغفار نماز کو نہ چھوڑا جب تک سورج کی روشنی باقاعدہ طور سے زمین پر پہنچنی شروع نہ ہوگئی۔اب چونکہ ہر ایک مومن شخص بھی بقدر اتباع نبی کریم صلی اللہ علیہ وسلم نور رکھتا ہے جیسے باپ بیٹے کا اثر چنانچہ اس لئے فرمایا (الاحزاب :۴۱) یعنی رسول اللہ صلی اللہ علیہ وسلم کا جسمانی بیٹا نہیں تو روحانی بیٹے بے شمار ہیں اس لئے ہر مومن بھی ایسے نظارہ پر گھبراتا ہے اور گھبرانا چاہئے کہ کہیں ایسے اسباب پیش نہ آجائیں جس سے ہمارا نور دوسروں تک پہنچنے میں روک ہوجائے۔اس لئے وہ ان ذرائع سے کام لیتا ہے جو مصیبت کے انکشاف کے لئے استعمال کئے جاتے ہیں یعنی صدقہ خیرات کرتا ہے استغفار پڑھتا ہے اور نماز میں کھڑا ہوجاتا ہے جیسا کہ نبی کریم صلی اللہ علیہ و سلم کسی مشکل کے وقت نماز میں کھڑا ہوجاتے … آخر اللہ تعالیٰ کا دریائے رحمت جوش میں آتا ہے اور جیسے وہاں حرکت و دور سے وہ اسباب ہٹ جاتے ہیں جن سے سورج کی روشنی باقاعدہ زمین پر پہنچنی شروع ہو جاتی ہے اسی طرح دعا و استغفار سے مومن کے فیضان پہنچنے میں جو روکیں پیش آجاتی ہیں دور ہو جاتی ہیں شیشے پر سیاہی لگا کر یا برہنہ آنکھ سے اپنی آنکھوں کو نقصان پہنچانے کے لئے تماشے کے طور پر اس نظارہ کو دیکھنا مومن کی شان سے بعید ہے۔تم سراج منیر کے بیٹے ہو پس اپنے انوار کو دوسروں تک پہنچانے میںتمام مناسب ذرائع استعمال کرو چونکہ آپ نے ان آیات پر وعظ شروع کیا تھا جن میں حضرت نبی کریم صلی اللہ علیہ و سلم کو سراج منیر کہا گیا ہے اس لئے ضمن میں بعض اور باتیں بھی بعض الفاظ کی تشریح میں آگئی تھیں ایک بات خصوصیت سے قابل ذکر ہے جو سَبِّحُوْا کی تفسیر میں فرمائی کہ مشرک لوگوں نے ظاہری سلسلہ پر نظر کر کے کہ بادشاہ کے پاس سوائے وسیلہ کے نہیں جاسکتے۔اللہ تعالیٰ تک اپنی عرض لے جانے کے لئے پیر پرستی شروع کردی اور وہ سمجھتے ہیں کہ یہ لوگ گو مرچکے ہیں مگر ہماری غرضیں انہیں کی راہ سے اوپر پہنچتی ہیں۔یہ خطرناک غلطی ہے خدائے پاک کے حضور