سُوْرَۃُ الْعَنْکَبُوْتِ
تفسیر کبیر (جلد ۱۰), حصہ 9
یہ سمجھے کہ تُو خدا تعالیٰ کو دیکھ رہا ہے اور اگر تجھے یہ مقام حاصل نہیں تو تُو یہ سمجھے کہ خدا تعالیٰ تجھے دیکھ رہا ہے اس کے متعلق یہ سوال پیدا ہوتا ہے کہ خدا تو ہر انسان کو ہر حالت میں دیکھ رہا ہے۔کیا اسلام کے رُو سے یہ کہنا جائز ہو گا کہ خدا فلاں کو دیکھ رہا ہے اور فلاں کو نہیں دیکھ رہا۔یا خدا عیسائیوں کو نہیں دیکھ رہا۔ہندوؤں کو نہیں دیکھ رہا۔سکھوں کو نہیں دیکھ رہا لیکن مسلمانوں کو دیکھ رہا ہے۔یا زیدؔ نماز نہ پڑھنے والے کو خدا نہیں دیکھ رہا اور زید ؔ نماز پڑھنے والے کو خدا تعالیٰ دیکھ رہا ہے۔اگر ایسا ہو تا کہ جب بندہ نماز کے لئے کھڑا ہوتا تبھی خد ا اسے دیکھتا تو کئی لوگ جان بوجھ کر نماز چھوڑ دیتے اور سمجھتے کہ نہ ہم نما ز پڑھیں گے اور نہ خد ا ہمیں دیکھے گا۔پس جب رسول کریم صلی اللہ علیہ وسلم نے یہ فرمایا کہ نماز کاادنی مقام یہ ہے کہ انسان یہ سمجھے کہ خدا اسے دیکھ رہا ہے تو اس کے یہ معنے تو نہیں ہوسکتے کہ انسان یہ سمجھے کہ خدا تعالیٰ نماز پڑھنے والے کو تو دیکھتا ہے اور جو نما ز نہیں پڑھتا اسے نہیں دیکھتا کیونکہ اس صورت میں کمزور لوگ نماز نہ پڑھنے کو اپنے لئے زیادہ برکت کو موجب سمجھتے اور وہ خیال کرتے کہ نہ ہم نماز پڑھیں گے اور نہ ہمیں خدا دیکھے گا۔پھر اور معنے بھی اس کے لئے جاسکتے ہیں اور وہ یہ کہ فی الواقعہ تو خدا تعالیٰ انسان کو نہیں دیکھ رہا لیکن تم یہ سمجھو کہ خدا تمہیں دیکھ رہا ہے۔اگر یہ معنے لئے جائیں تو یہ جھوٹ بن جاتا ہے۔اگر خدا ہمیں نہیں دیکھ رہا او رہم یہ سمجھ رہے ہیں کہ خدا ہمیں دیکھ رہا ہے تو ہم اپنے نفس کو دھوکا دیتے ہیں۔اور ایک جھوٹا تصور اپنے ذہن میں پیداکرتے ہیں۔پس یہ دونوں معنے نہیں لئے جاسکتے۔نہ یہ معنے لئے جاسکتے ہیں کہ خدا تعالیٰ ہم کو عا م طور پر نہیں دیکھتا لیکن جب ہم نما ز پڑھتے ہیں تو وہ ہمیں دیکھتا ہے۔اور نہ یہ معنے لئے جاسکتے ہیں کہ خدا تعالیٰ ہم کو حقیقتاً نہیں دیکھ رہا لیکن ہمیں یہ سمجھنا چاہیے کہ وہ ہمیں دیکھ رہا ہے۔جب یہ دونوں معنے غلط ہیں تو لازماً ہمیں اس کے کوئی اور معنے لینے پڑیں گے جو قرآن کریم کی تعلیم کے مطابق ہوں۔اور وہ معنے یہی ہیں کہ اس جگہ سمجھ لو کے معنے یقین کر لینے کے ہیں۔گویارسول کریم صلی اللہ علیہ وسلم کایہ فرماناکہ تم سمجھ لو کہ خداتمہیں دیکھ رہاہے اس کے معنے یہ ہیںکہ تمہیں یقینی طور پر اس بات کومحسوس کرناچاہیے کہ خداتمہیں دیکھ رہاہے اوریقینی علم اورمحض خیال اوروہم میں زمین و آسمان کا فرق ہے۔ایک آدمی صرف خیا ل کرتاہے کہ خدااسے دیکھ رہا ہے۔اورایک آدمی اس یقین کامل پرقائم ہوتاہے کہ خدااسے دیکھ رہاہے۔بظاہردونوں یہی سمجھتے ہیں کہ خداانہیں دیکھ رہاہے لیکن ایک کاتصور محض وہم پر مبنی ہوتا ہے جوجھوٹ بھی ہو سکتا ہے اوردوسرایقین کی مضبوط بنیادوں پر قائم ہوتاہے۔ایک کو بڑی آسانی کے ساتھ متزلزل کیاجاسکتاہے اوردوسراشخص جوا پنے اندر کامل یقین پیداکئے ہوئے ہوتاہے اسے دنیا کی کوئی طاقت متزلزل نہیں کرسکتی۔پس رسول کریم صلی اللہ علیہ وسلم کے اس ارشاد کا یہ مطلب نہیں کہ گویہ واقعہ تو نہیں کہ خداتمہیں دیکھ رہاہے مگرتم نماز پڑھتے وقت یہ تصور کرلیا کرو کہ خداتمہیں دیکھ
رہاہے۔بلکہ اس کے معنے یہ ہیں کہ نماز کاادنیٰ درجہ یہ ہے کہ انسان اس یقین کامل پرقائم ہوجائے کہ خدااسے دیکھ رہاہے۔یہاں دیکھنے کے عام معنے توہونہیں سکتے۔کیونکہ وہ کافر کوبھی دیکھ رہاہے اورمومن کو بھی دیکھ رہاہے عیسائی کو بھی دیکھ رہاہے اورہندوکوبھی دیکھ رہا ہے۔نماز پڑھنے والے کو بھی دیکھ رہاہے اور نماز نہ پڑھنے والے کو بھی دیکھ رہاہے۔ایسی صورت میں ایک نماز پڑھنے والابھی اگر یہ سمجھ لیتا ہے کہ خدااسے دیکھ رہاہے تواس میں اسے کوئی خصوصیت حاصل نہیں ہوسکتی۔کیونکہ خداجس طرح اسے دیکھ رہاہے اسی طرح ایک کافراو رمنافق کو بھی دیکھ رہا ہے۔خصوصیت اسے تبھی حاصل ہوسکتی ہے جب دیکھنے والے کے بھی اَورمعنے لئے جائیں او روہ معنے حفاظت اور مددکرنے کے لئے اس کی طرف متوجہ ہونے کے ہیں۔جیسے قرآن کریم میں اللہ تعالیٰ ایک دوسرے مقام پر رسول کریم صلی اللہ علیہ وآلہٖ وسلم کی نسبت فرماتا ہے کہ فَاِنَّکَ بِاَعْیُنِنَاوَسَبِّحْ بِحَمْدِ رَبِّکَ حِیْنَ تَقُوْمُ ( طور:۴۹)یعنی تُو ہماری آنکھوں کے سامنے ہے۔پس چاہیے کہ جب تُو نماز کے لئے کھڑاہو توہماری تسبیح کیاکر۔اب آنکھوں کے سامنے ہونے کایہ مطلب تونہیں کہ رسول کریم صلی اللہ علیہ وسلم تو خدا تعالیٰ کی آنکھوں کے سامنے تھے لیکن رسول کریم صلی اللہ علیہ وآلہٖ وسلم کا دشمن خدا تعالیٰ کی آنکھوں کے سامنے نہیں تھا۔بلکہ اس کامطلب یہی ہے کہ تُوایسے مقام پر پہنچ گیا ہے کہ اب ہم تیر اخاص خیال رکھتے ہیں کوئی تجھ کو چھیڑ نہیں سکتا۔کوئی تجھ پر حملہ نہیں کرسکتا۔کوئی تجھے ذلیل اوررسوانہیں کرسکتا۔جیسے حفاظت کے لئے اگر کسی کی ڈیوٹی مقررہو تووہ حملہ آورکودیکھ کرچپ نہیں رہ سکتا۔اسی طرح ہماراتیرے ساتھ ایساتعلق قائم ہوچکا ہے کہ اب ہم تجھ پرحملہ ہوتے دیکھ کر چپ نہیں رہ سکتے۔دنیا میں بھی انسان جب کسی معاملہ میں دخل دینا مناسب نہیں سمجھتا توآنکھیں پھیرلیتا ہے۔اورجب دخل دیناچاہتاہے تو کہتا ہے۔’’ میں دیکھ رہاہوں۔‘‘بہرحال جب رسول کریم صلی اللہ علیہ وسلم نے فرمایاکہ ادنیٰ سے ادنیٰ درجہ نماز کایہ ہے کہ انسان یہ سمجھے کہ خدااسے دیکھ رہاہے تو اس کے معنے یہی ہیں کہ اسے یہ یقین کامل حاصل ہوناچاہیے کہ میری نماز اتنی درست ہے کہ اب میرے ساتھ کوئی شخص ایساسلوک نہیں کرسکتاجسے خدانظر انداز کردے۔جیسے حضرت مسیح موعود علیہ الصلوٰۃ والسلام کواللہ تعالیٰ نے الہاماً فرمایاکہ اِنِّیْ مُعِیْنٌ مَّنْ اَرَادَ اِعَانَتَکَ وَاِنِّیْ مُھِیْنٌ مَّنْ اَرَادَ اِھَانَتَکَ کہ جوشخص تیری مدد کاارادہ کرے گا میں اس کی مدد کروں گا۔اورجوشخص تیری اہانت کاارادہ کرے گا میں اس کی اہانت کروں گا۔گویااس مقام پر اللہ تعالیٰ کی طرف سے نیکی اوربدی دونوں کاردّعمل ظاہرہو جاتا ہے اوروہ اپنے بند ے سے نیکی کرنے والے کی نیکی کوضائع نہیں ہونے دیتا۔اورنہ اپنے بندے کے ساتھ برائی کرنے والے کی برائی کو نظر انداز کرتاہے۔اگر کوئی اس سے نیکی کرتاہے تووہ اس سے بڑھ کراس کےساتھ نیک سلوک کرتاہے اوراگر کوئی اس کے
ساتھ بدی کرتاہے توو ہ اس سے بڑھ کراس کے ساتھ براسلوک کرتاہے اوریہ ادنیٰ درجہ ہے جو رسول کریم صلی اللہ علیہ وسلم کے ارشاد کے مطابق ہرمومن کوحاصل ہوناچاہیے۔اس کے بعد رسول کریم صلی اللہ علیہ وآلہٖ وسلم نماز کے اعلیٰ درجہ کی طرف مومنوں کوتوجہ دلاتے ہیں اورفرماتے ہیں اصل مقام یہ ہے کہ تُو نماز پڑھتے وقت یہ سمجھے کہ میں خدا کو دیکھ رہاہوں۔یہاں بھی کَاَنَّکَ تَرَاہُ کے الفاظ استعمال کئے گئے ہیں۔اب اس کے بھی یہ معنے نہیں ہوسکتے کہ تُوفرض کرلے کہ میں خدا کودیکھ رہاہوں۔کیونکہ یہ جھوٹ بن جاتاہے۔اول توجو چیز ہے ہی نہیں اس کے متعلق کسی نے سمجھنا ہی کیا ہے۔اگر کوئی ایساکمزور دل ہو جو اپنے دل پر بارباراثر ڈالنے کی کوشش کرے کہ میں خدا کو دیکھ رہاہوں تواس کافائدہ کیاہو سکتا ہے۔پس کَاَنَّکَ تَرَاہُ کے یہ معنے تونہیں ہوسکتے کہ تُو یہ فرض کرلے کہ تُوخدا کودیکھ رہاہے۔درحقیقت اس کے معنے یہ ہیں کہ پہلامقام حاصل ہوجانے کے بعد مومن ایسے مقام پر پہنچ جاتاہے کہ اللہ تعالیٰ کے نشانات کی حقیقت اس پر واضح ہوجاتی ہے اوروہ خدا تعالیٰ کے سلوک اور اس کے رحم و کرم کواپنی آنکھوں سے بھی دیکھ لیتا ہے۔پس نماز کااعلیٰ مقام یہ ہے کہ انسان جب نماز پڑھنے کے لئے کھڑاہو تواسے یہ یقین کامل ہو کہ وہ خدا تعالیٰ کودیکھ رہاہے۔اس کے یہ معنے نہیں کہ جیسے ہندوکہتے ہیں کہ انسان عبادت کے وقت یہ سوچنا شروع کردے کہ ایک بت جو اس کے سامنے ہے وہ خداہے اسی طرح وہ مسلمان بھی یہ سوچنا شروع کردے۔کیونکہ اسلام وہم نہیں سکھاتا۔اسلام کوئی جھوٹاتصور انسانی ذہن میں پیدا نہیں کرتا۔اسلام یہ سکھاتاہے کہ جب تم نماز کے لئے کھڑے ہوتو تمہیں اس امر کی معرفت حاصل ہو کہ تم سے نیک سلوک کرنے والے سے خدا تعالیٰ نیک سلوک کرتاہے اور تم سے براسلوک کرنے والے سے خدا تعالیٰ براسلوک کرتاہے اگر تم کو بھی یہ نظر آجائے اور تم کو بھی یہ محسوس ہونے لگ جائے کہ جس نے تمہارے ساتھ نیک سلوک کیاتھا اس کے ساتھ خدا تعالیٰ نے نیک سلوک کیا اور جس نے تمہارے ساتھ براسلوک کیاتھااس کے ساتھ خدا تعالیٰ نے براسلوک کیا تواس کانتیجہ یہ ہوگا کہ تمہاری محبتِ الٰہی کامل ہوجائے گی اور تمہاری نماز اپنی ذات میں مکمل ہوجائے گی۔غر ض اسلام واہمہ کی تعلیم نہیں دیتا۔اسلام ہمیں یقین اور معرفت کے مقام پرپہنچاناچاہتاہے۔اسلام ہم سے تقاضاکرتاہے کہ ہم اپنی نمازوں کواس طرح سنوار کراداکریں اورانہیں اتنا اچھااوراعلیٰ درجہ کابنائیں کہ ایک طرف تو خدا تعالیٰ ہم سے اتناتعلق رکھے کہ ہمارے ساتھ حسن سلوک کرنے والے سے وہ حسن سلوک کرے اور ہمارے ساتھ براسلوک کرنے والے سے وہ براسلوک کرے اوردوسری طرف ہماری اپنی آنکھیں اتنی روشن ہوں اورہمارے دل میں اتنا نور بھراہو کہ ہم کو خود بھی نظر آجائے کہ خدا تعالیٰ ہماری تائید میں اپنے نشانات ظاہر کرتاہے۔جب یہ مقام کسی کوحاصل ہوجائے تووہ ہرقسم کے شکوک و شبہات سے بالاہوجاتا ہے۔
اللہ تعالیٰ کے روشن نشانات اس کی تائید میں ظاہر ہونے لگتے ہیں اوروہ اس یقین سے لبریز ہو جاتا ہے کہ خدااسے ضائع نہیں کرے گا۔کیونکہ وہ خدا تعالیٰ کے نشانات کو دیکھ رہاہوتاہے وہ اس کے حسن سلوک اور انعامات کامشاہدہ کررہاہوتاہے اوروہ اس یقین پر مضبوطی سے قائم ہوتاہے کہ دنیا اسے چھو ڑدے مگر خدااسے نہیں چھوڑے گا۔نادان اس کونہیں سمجھ سکتا مگروہ جس نے خدا تعالیٰ کو اپنی آنکھوں سے دیکھ لیاہو وہ ایسی مضبوط چٹان پر قائم ہوتاہے کہ دنیا کی کوئی طاقت اس کے عزم کو متزلزل نہیں کرسکتی۔افسوس ہے کہ اس زمانہ میں مسلمانوں میں ایک بہت بڑاطبقہ ایساہے جو نماز نہیں پڑھتااس لئے نہیں کہ وہ نماز کاقائل نہیں بلکہ اس لئے کہ وہ سمجھتاہے کہ اللہ تعالیٰ رحمٰن اوررحیم ہے اگرہم نماز نہیں پڑھیں گے تووہ ہمیں بخش دے گا۔آخر اس نے گناہگاروں کوہی بخشناہے۔اگرگنا ہ کرنے والے نہ ہوئے تو وہ بخشے گاکن کو ؟ یہ جواب غلط ہے یا صحیح اس کے متعلق بحث نہیں۔بہرحال یہ ایک جواب ہے جو انہوں نے سوچاہواہے۔لیکن ایک طبقہ ایسابھی ہے جوسمجھتاہے کہ یہ احکام پرانے زمانہ میں محض عربوں کی اصلاح کے لئے دیئے گئے تھے۔عرب لوگ بالکل وحشی تھے۔اوروہ گندے اور غلیظ رہتے تھے۔رسول کریم صلی اللہ علیہ وسلم نے انہیں حکم دے دیا کہ تم اپنے کپڑوں اوربدن کوصاف رکھاکرو۔اسی طرح ان میں کوئی تنظیم نہیں تھی۔وہ بالکل پراگندہ حالت میں تھے۔اسلام نے ان کو حکم دے دیاکہ وہ پانچ وقت مسجد میں اکٹھے ہو جایاکریں۔اس طرح گو بظاہرنماز کاحکم دیاگیا مگردراصل یہ غرض تھی کہ وہ خدا تعالیٰ کے ڈر کے مارے جب مسجد میں آئیں گے اورانہیں قوم اور ملک کے حالات بتائے جائیں گے۔توا ن میں سیاسی بیداری پیداہوجائے گی اوروہ دنیا پر غالب آنے کی کوشش کریں گے۔مجھے یاد ہے۔میں بچہ تھا کہ میں نے ایک اخبار میں ایک دفعہ اسی کے متعلق ایک مضمون پڑھا۔ایک صاحب جومسلمانوں کے مبلغ سمجھے جاتے تھے اورجاپان او رامریکہ میں تبلیغ کرکے آئے تھے انہوں نے واپس آنے پر علی گڑھ میں ایک لیکچردیا جواخبار میں شائع ہوا۔اورمیں نے بھی پڑھا اس لیکچر میں انہوں نے بیان کیا کہ یہ جو کہاجاتاہے کہ نماز بڑی ضروری چیز ہے اورپانچ وقت مسجد میں باجماعت اداہونی چاہیے دراصل ایساکہنے والے حقیقت پر کبھی غور نہیں کرتے۔وہ یہ نہیں سمجھتے کہ اسلام ایک عالمگیر مذہب ہے۔پرانے زمانہ کے لحاظ سے اس کے احکام اور رنگ رکھتے تھے اوراس زمانہ کے لحاظ سے اس کے احکام اوررنگ رکھتے ہیں۔بیشک احکام وہی رہیں گے مگرحالات کے لحاظ سے ان کی ہیئت بدلتی چلی جائے گی۔عرب لوگ جاہل تھے و ہ ننگے پائو ں رہتے تھے۔کپڑے ان کے پاس بہت کم ہواکرتے تھے۔اس لئے ان کو سجدہ اور رکوع کاحکم دے دیاگیا۔مگر اب وہ زمانہ ہے کہ اگر سجدہ کیاجائے یارکوع کےلئے جھکاجائے تو پتلونوں
کی کریزیں بالکل خراب ہوجائیں۔اس زمانہ میں اگر محمدرسول اللہ صلی اللہ علیہ وسلم ہوتے تووہ یقیناً اس حکم میں ترمیم کرتے اور یقیناً وہ یہی کہتے کہ بنچ پر بیٹھے بیٹھے اگر سر جھکالیاجائے تواتناہی کافی ہے رکو ع اورسجدہ کی کوئی ضرور ت نہیں۔اسی طرح روزہ ہے۔یہ روزہ ان لوگوں کے لئے ہے جو بہت کھا جاتے ہیں۔عرب لوگ وحشی تھے اوروہ اپنے معدوں کا خیال نہیں رکھتے تھے اس لئے اسلام نے انہیں روزوں کاحکم دے دیا۔مگراب تہذیب کادور دور ہ ہے۔اب لوگ اپنے معدہ کا خا ص طور پر خیال رکھتے ہیں۔اب اگر صبح و شام صرف ناشتہ کرلیاجائے اورکیک بسکٹ کھالئے جائیں لیکن دن بھر کچھ نہ کھایاجائے توروزہ کے لئے اتنا ہی کافی ہے۔غرض مسلمانوں میں ایسے لوگ بھی موجود ہیں جوان عبادات کے متعلق سمجھتے ہیں کہ یہ آئوٹ آف ڈیٹ OUT OF DATEہیں۔موجودہ زمانہ میں ان کی ضرورت نہیں۔اورایک طبقہ ایساہے جو کہتاہے کہ نماز تودل کی ہی نماز ہے ظاہری حرکات کی کیا ضرورت ہے۔حقیقت یہ ہے کہ نماز ظاہر کی بھی ہے اوردل کی بھی۔اوران دونوں چیزوں کامجموعہ انسان کے لئے برکت کاموجب ہوتاہے۔اگرہم دل میں خداخداکرتے ہیں مگرظاہر میں نماز نہیں پڑھتے توہمار اد ل سے خداخداکہنا محض دھوکا اور فریب ہوگا۔کیونکہ محبوب کی با ت ماناکرتے ہیں۔ردّنہیں کیاکرتے۔عجیب بات یہ ہے کہ ایک طرف تو ہم خدا تعالیٰ سے اپنی محبت کااظہار کرتے ہیں اوردوسر ی طرف ہم اپنی محبت کاکوئی ثبوت پیش کرنے کے لئے تیار نہیں ہوتے۔ہم یہ بھی مانتے ہیں کہ اس نے کہا ہے سجدہ کرو۔مگرہم سجدہ کرنے کے لئے تیار بھی نہیں ہوتے۔یاظاہر میں تونماز پڑھی جائے مگر دل خدا کی طرف متوجہ نہ ہو۔تویہ بھی کوئی نماز نہیں ہو گی بلکہ محض ایک ورزش کہلائے گی۔جیسے ورزش سے سپاہی کاجسم مضبوط ہوتاہے۔اسی طرح نماز سے اس کاجسم بھی مضبوط ہوگا۔مگراس کے دل میں نور ایمان پیدا نہیں ہوگا۔کچھ عر صہ کی بات ہے۔میں سند ھ گیا تو ایک ہندو مجھ سے ملنے کے لئے آیا۔پارٹیشن کے موقعہ پر وہ وہاں سے بھاگانہیں تھا۔کیونکہ اس کے مسلمانوں سے تعلقات تھے۔میں نے اس سے کہا کہ تمہارے مسلمانوں سے دیر سے تعلقات چلے آرہے ہیں۔کبھی تم نے ان کے دین پر بھی غور کیا۔وہ کہنے لگا۔سب مذاہب اچھی باتیں کہتے ہیں۔ہمارامذہب بھی اچھا ہے اورآپ کامذہب بھی اچھا ہے۔میں نے کہا۔اگرسب میں ایک جیسی اچھی باتیں ہیں تو پھر تم مسلمانوں کے ساتھ مل کیوں نہیں جاتے۔آخرکوئی نہ کوئی فرق ہی ہے جس کی وجہ سے تم ہندوہو اور ہم مسلمان۔اگران دونوں مذاہب میں ایک جیسی باتیں پائی جاتی ہیں تویاتم مسلمان بن جاتے یا ہم ہندو بن جاتے۔بہرحال کوئی نہ کو ئی فرق ضرور تسلیم کرنا پڑے گا۔جس کی وجہ سے ہم سمجھتے ہیں کہ ہمیں اپنا علیحدہ وجودقائم رکھناچاہیے۔پھر میں نے اس سے کہا کہ کبھی تم نے نماز اوردیگر عبادات کااپنے مذہب کی عبادات سے مقابلہ کیا۔اوریہ دیکھا کہ ان
میںسے کون سی عبادت زیادہ بہتر ہے۔اس پر وہ کہنے لگاکہ کعبہ اوردَیر تودونوں دل میں ہیں۔کسی ظاہری نماز کی کیاضرورت ہے۔میں نے اس سے پوچھا۔فرمایئے۔آپ شادی شدہ ہیں۔اس نے کہا۔ہاں۔میں نے کہا۔بچے بھی ہیں۔اس نے جواب دیا کہ بچے بھی ہیں۔میں نے کہا۔آپ نے کبھی بیوی بچوں کوپیار بھی کیاہے۔اس نے کہا۔کیوں نہیں کیا۔میں نے کہا اصل پیار تودل میں ہوتاہے پھرآپ ظاہر میں پیارکیوں کرتے ہیں۔اسی لئے کہ آپ سمجھتے ہیں اس پیار کی کوئی ظاہر ی علامت بھی ہونی چاہیے۔اگربیوی سے پیار کرنے کے لئے آپ صرف دل کا پیار کافی نہیں سمجھتے۔بچوں سے پیار کرنے کے لئے صرف دل کاپیار کافی نہیں سمجھتے۔بلکہ انہیں بوسہ بھی دیتے ہیں۔تو خداکے پیار کے معاملہ میں یہ آپ کیوں کہتے ہیں کہ کعبہ اوردَیر تو دونوں دل میں ہیں۔کسی ظاہری عبادت کی ضرورت نہیں۔بات یہ ہے کہ ظاہر اورباطن دونوں چیزیں مل کر انسان کوکامل بناتی ہیں۔اگریہ دونوںچیزیں ملائی نہ جائیں توکوئی نتیجہ پیدا نہیں ہوسکتا۔اگراچھی سے اچھی چیز آپ لوگ ایسے برتن میں لیں گے جوغلیظ ہوگاتوو ہ چیز بھی غلیظ ہوجائے گی۔اوراگربغیر برتن کے اس چیز کو لے لیں گے تووہ گرجائےگی۔گویابرتن کی بھی ضرورت ہے اورپھر اس بات کی بھی ضرور ت ہے کہ و ہ برتن اچھا ہو۔اوراس کے اندر کوئی اچھی چیز ہو۔اسی طرح نما ز اورروزہ اور حج اورزکوٰ ۃ اوردوسری عبادتوں کاحال ہے۔قرآن کریم میں اللہ تعالیٰ نے ادھر یہ فرمایا ہے کہ قربانی کرو۔مگرادھر یہ بھی فرما دیا ہے کہ تم یہ مت سمجھو کہ قربانی کاگوشت اورخون خدا کو پہنچتاہے۔خدا کو صرف دل کااخلاص پہنچتاہے۔مگرباوجوداس کے کہ قربانی کاگوشت اور خون خدا تعالیٰ تک نہیں پہنچتا۔خدا تعالیٰ نے یہ نہیںکہا کہ قربانی نہ کرو بلکہ کہاہے کہ قربانی توکرو مگریہ سمجھتے ہوئے کرو کہ میں خدا تعالیٰ کے حکم کے ماتحت اپنے محبوب کی بات پوری کرنے کے لئے اوران مقاصد کی تکمیل کے لئے جوخدا تعالیٰ نے مقرر فرمائے ہیں قربانی کررہاہوں۔مثلاً و ہ غریب آدمی جو فاقے کرتاہے یاوہ غریب آدمی جو ہمیشہ دال روٹی کھاتاہے اس ذریعہ سے اسے بھی گوشت مل جاتاہے گویادل بھی صاف ہوتاہے۔ہمسایوں اور غرباء کے لئے محبت کے جذبات بھی پیدا ہوتے ہیں اورخدا تعالیٰ کاحکم بھی پوراہو جاتا ہے۔پس مسلمانوں کے لئے سب سے زیادہ ضروری امر یہ ہے کہ وہ اپنے آپ کو نماز باجماعت کاپابند بنانے کی کوشش کریں۔جوشخص اپنے محبوب کو بھول جاتاہے اوراس کی یاد اپنے دل میں تازہ نہیں رکھتا۔و ہ یہ دعویٰ نہیں کرسکتاکہ مجھے اپنے محبوب سے محبت ہے۔سچی محبت ہمیشہ اپنے ساتھ بعض ظاہری علامات بھی رکھتی ہے اورمحبت کی ایک بڑی علامت یہ ہے کہ انسان اٹھتے بیٹھتے اپنے محبوب کا ذکر کرتاہے اوراس کی یاد اپنے دل میں تازہ رکھتا ہے۔جب کوئی شخص اپنے
کسی عزیز کو یاد کرلیتا ہے تواس کی محبت دل میں تازہ ہوجاتی ہے۔اوراس کی صورت آنکھوں کے سامنے آجاتی ہے اسی لئے کہتے ہیں اَلْمَکْتُوْبُ نِصْفُ الْمُلَاقَاۃِ یعنی جب انسان اپنے کسی دوست یارشتہ دار کوخط لکھتاہے توگویاوہ اس سے نصف ملاقات کرلیتا ہے۔جب وہ السلام علیکم لکھتاہے اورپھر وہ اپنے حالات بتاتاہے اوراس کے حالات دریافت کرتاہے۔تو ایک رنگ میں وہ ایک دوسرے کے سامنے ہوجاتے ہیں او ران کی محبت تازہ ہوجاتی ہے۔گویا جس طرح ملاقات سے آپس کے تعلقا ت بڑھتے ہیں۔اسی طرح خط لکھنے سے بھی آپس کے تعلقات بڑھتے ہیں اورخط لکھنا ملاقات کاقائم مقام ہو جاتا ہے۔نماز بھی خدا تعالیٰ کی ملاقات کا ایک ذریعہ ہے اور چونکہ نماز خدا تعالیٰ کی ملاقات کاایک ذریعہ ہے اس لئے اسلام نے یہ ضروری قرار دیا ہے کہ انسان تھو ڑے تھوڑے وقفہ کے بعد خدا تعالیٰ کانام لے اور نماز کے لئے کھڑاہوجائے۔خواہ جنگ ہورہی ہو۔دشمن گولیاں برسارہاہو۔پانی کی طرح خون بہہ رہاہو۔پھر بھی اسلام یہ فر ض قرار دیتاہے کہ جب نماز کا وقت آجائے تواگر ممکن ہو مومن اسی وقت اللہ تعالیٰ کے حضور جھک جائے۔(نہایت خطرناک حملہ کی صورت میں وہ نمازیں جو جمع نہیں کی جاسکتیں ان کو بھی جمع کرنے کاحکم ہے خود رسول کریم صلی اللہ علیہ وسلم نے ایک موقعہ پر چار نماز یں جمع کی ہیں ) بیشک جنگ کی وجہ سے نماز کی ظاہر ی شکل بدل جائے گی لیکن یہ جائز نہیں ہوگا کہ نماز میں ناغہ کیاجائے۔مگرآج کل مسلمانوں میں جہاں اوربہت سی خرابیاں پیداہوچکی ہیں وہاں ان میں ایک نقص یہ بھی پیداہوگیا ہے کہ وہ ریل میں آرام سے بیٹھے سفرکررہے ہوں گے مگرنماز نہیں پڑھیں گے اورجب پوچھا جائے کہ تم نماز کیوں نہیں پڑھتے ؟ توکہیں گے سفرمیں کپڑوں کے پاک ہونے کاکوئی اعتبار نہیں ہوتا ا س لئے ہم نماز نہیں پڑھتے۔حالانکہ سفرتوالگ رہا۔میراعقیدہ تویہ ہے کہ اگر سر سے پیر تک کسی شخص کے کپڑے پیشاب میں ڈوبے ہوئے ہوں اور اس کے پاس اورکپڑے نہ ہوں جن کو بدل سکے اورنماز کا وقت آجائے تووہ انہی پیشاب آلودہ کپڑوں کے ساتھ نماز پڑھ لے۔یااگرپردہ ہے توکپڑے اتار کرننگے جسم کے ساتھ نماز پڑھ لے اوریہ پرواہ نہ کرے کہ اس کے کپڑے پاک نہیں یاجسم پرکوئی کپڑانہیں۔کیونکہ نماز کی اصل غر ض یہ ہے کہ تھوڑے تھوڑے وقفہ کے بعد خدا تعالیٰ کانام لیاجائے اوراس طرح اس کی یاد اپنے دل میں تازہ کی جائے۔جس طرح گرمی کے موسم میں تھوڑے تھوڑے وقفہ کے بعد انسان ایک ایک دودوگھونٹ پانی پیتارہتاہے تاکہ اس کا گلہ تررہے اوراس کے جسم کو تراوت پہنچتی رہے۔اسی طرح کفر اور بے ایما نی کی گرمی میں انسانی روح کو حلاوت اورتروتازگی پہنچانے کے لئے اللہ تعالیٰ نے تھوڑ ے تھوڑے وقفہ کے بعد نماز مقرر کی ہے۔تاکہ وہ گرمی اس کی روح کو جھلس نہ دے اوراس کی روحانی طاقتوںکو مضمحل نہ کردے۔خداتعالی کانام لینے سے اس کی محبت تازہ ہوجاتی ہے
فرشتے قریب آتے ہیں اورشیطان دور بھاگتاہے۔بیشک حکم یہی ہے کہ کپڑے پاک رکھو۔لیکن فرض کرو کسی کے پاس اورکپڑے نہیں توبھی اس کے لئے یہ اجازت نہیں ہوگی کہ وہ نماز نہ پڑھے بلکہ اسے یہی کہا جائے گا کہ خواہ تمہارے کپڑے گندے اور ناپاک ہیں پھر بھی تم انہی گندے اورناپاک کپڑوں کے ساتھ نماز پڑھ لو۔مثلاً کسی شخص کے پاس صرف ایک ہی تہ بند ہے اوراسے شبہ ہے کہ وہ تہ بند پاک نہیںرہا تواس کے متعلق شریعت کایہ حکم نہیں ہوگاکہ وہ نماز نہ پڑھے۔بلکہ اس کے متعلق حکم یہ ہوگاکہ وہ اسی تہ بند کے ساتھ نماز پڑھ لے۔کیونکہ کپڑوں کی پاکیزگی سے دل کی پاکیزگی بہرحال مقدم ہے مگرہمارے ملک میں لوگ کپڑوں کاتو خیال رکھتے ہیں اوراپنے دل کوناپاک ہونے دیتے ہیں۔اگرہم کپڑے کی ناپاکی کاخیال کرکے نماز چھو ڑدیتے ہیں تواس کے معنے یہ ہیں کہ ہم کپڑے کے پاک کرنے کاخیال توکرتے ہیں لیکن اپنے دل کوپاک کرنے کاخیال نہیں کرتے اوریہ سراسر حماقت ہے۔پس اس وقت جو کپڑامیسر ہو اسی کے ساتھ نماز پڑھ لینا جائز ہوگا۔مگریہ جائز نہیں ہو گاکہ کپڑے کی ناپاکی کے خیال سے اپنے دل کو ناپاک کرلیاجائے اورنماز کوچھوڑ دیاجائے۔نماز روحانی جسم کی اصلاح کا ایک ذریعہ ہے۔جس طرح ایک بیمار جسم محض یہ کہہ کر موت سے بچ نہیں سکتاکہ وہ بیمار ہے اوربیمار ہونے کی وجہ سے وہ روٹی نہیں کھا سکتا اسی طرح ایک روحانی جسم بھی یہ کہہ کرموت سے نہیں بچ سکتاکہ وہ بیمار ہے اورنماز نہیںپڑھ سکتا۔باوجودا س کے کہ ایک شخص بیمار ہے اور کھانا نہیں کھاسکتا۔مثلاً اس کے گلے میں ورم ہوگیا ہے۔یاجبڑاجُڑ گیا ہے۔یامعدہ غذاکواپنے اندر رکھ نہیں سکتا۔یاغذا کو انتڑیوں کی طرف دھکیل دیتاہے۔یامنہ کی طرف سے باہر پھینک دیتاہے۔یاکوئی رسولی پیداہوگئی ہے۔یاسرطان ہوگیاہے۔اورغذامعدہ میں ٹھہرتی نہیں بلکہ قے ہوجاتی ہے۔یاغذامعدہ کے اند رجاتی نہیں یاانتڑیوں میں کوئی بیماری لاحق ہے اس لئے انتڑیوں میں غذاٹھہرتی نہیں یاپچتی نہیں۔پھر بھی ہم یہ نہیں کہہ سکتے کہ وہ مرے گا نہیں اس لئے کہ روٹی کے بغیر انسانی جسم بچ نہیں سکتا۔اسی طرح باوجود اس کے کہ ایک شخص کسی عذ ر کی وجہ سے نماز نہیں پڑھتا وہ مرے گا۔بعض لوگ عد م فراست کی وجہ سے یہ خیال کرلیتے ہیں کہ چو نکہ وجہ جائز ہے اس لئے نتیجہ نہیں نکل سکتا۔حالانکہ ان کا یہ خیال درست نہیں۔وجہ جائز ہو یاناجائز نتیجہ ضرور نکلے گا۔تم اپنے سر پر اپنی کمائی سے خرید اہواتیل لگائو یاچوری سے حاصل کیاہواتیل لگائو سرضرور چکنا ہوگا۔یہ نہیں کہ اپنی کمائی سے حاصل کردہ تیل سے سرچکناہو جاتا ہے اورچوری کے تیل سے سر سوکھارہ جاتاہے۔یہ نہیں کہ اپنی کمائی سے حاصل کئے ہوئے کپڑے سے تمہاراجسم ڈھک جائے اور چوری کئے ہوئے کپڑے سے جسم نہ ڈھکے۔کپڑاچاہے چوری کاہویااپنی کمائی سے خریداہوااس سے جسم ڈھک جائے گا۔جیسے اپنی
کمائی سے خریدے ہوئے کپڑے سے جسم ڈھک جاتاہے اسی طرح چوری سے حاصل کئے ہوئے کپڑے سے بھی جسم ڈھک جاتاہے۔نتیجے دونوں کے ایک سے ہوں گے۔روٹی کانہ کھاناتوانسان پھر بھی برداشت کرسکتاہے۔مثلاً وہ خیال کرسکتاہے کہ اگر وہ مرجائے گا توکیاہوگااسے اگلے جہان میں تو زندگی مل جائے گی۔یعنی اسے موت کے بعد اگلے جہان کی زندگی مل جاتی ہے۔لیکن روحانی موت کاکوئی قائم مقام نہیں۔جسمانی موت کے متعلق تم کہہ دوگےکہ سارے لوگ مرتے ہیںہمیں موت آجائے گی توکیاہوا۔اگلے جہان میں ہمیں زندگی مل جائے گی۔لیکن اگرتمہیں روحانی موت آجائے توتم کیاکروگے۔روحانی موت کاتوکوئی قائم مقام نہیں۔پس نماز باجماعت کی عادت ڈالواور اپنے بچوں کو بھی اس کاپابند بنائو۔کیونکہ بچوں کے اخلاق اور عادات کی درستی اوراصلاح کے لئے میرے نزدیک سب سے زیادہ ضروری امر نماز باجماعت ہی ہے۔مجھے اپنی زندگی میں اتنے لوگوں سے ملنے اور مختلف حالات کی جانچ پڑتال کاموقع ملا ہے اورساتھ ہی خدا تعالیٰ نے میری طبیعت کو ایساحساس بنایاہے کہ سوسال کی عمر پانے والے بھی اپنی عمر کے تجربوں کے بعد دنیا کی اونچ نیچ اور اچھے برے کو اتنا محسوس نہیں کرسکتے جتنا میں محسوس کرتاہوں۔اورمیں نے اپنے تجربہ میں نماز باجماعت سے بڑھ کر اورکو ئی چیز نیکی کے لئے ایسی مؤثر نہیں دیکھی۔سب سے بڑھ کر نیکی کااثر کرنے والی نماز باجماعت ہی ہے۔اگر میں اِنَّ الصَّلٰوةَ تَنْهٰى عَنِ الْفَحْشَآءِ وَ الْمُنْكَرِ کی پوری پوری تشریح نہ کرسکوںتومیں اپناقصور سمجھوں گا۔ورنہ میرے نزدیک نماز باجماعت کاپابند خواہ اپنی بدیوں میں ترقی کرتے کرتے ابلیس سے بھی آگے نکل جائے پھر بھی میرے نزدیک اس کی اصلاح کاموقعہ ہاتھ سے نہیںگیا۔ایک شمّہ بھر اورایک رائی کے برابربھی میرے خیال میں نہیں آتاکہ کوئی شخص نماز باجماعت کاپابند ہواورپھر اس کی اصلاح کاکوئی موقعہ نہ رہے۔خواہ وہ کتنا ہی بدیوں میںمبتلا کیوں نہ ہوگیاہو۔نیکی کے متعلق نماز کے مؤثرہونے کا مجھے اتنا کامل یقین ہے کہ میں خدا تعالیٰ کی قسم کھا کر بھی کہہ سکتاہوں کہ نماز باجماعت کاپابند خواہ کتنا ہی بداعمال کیوں نہ ہوگیا ہو اس کی ضرور اصلاح ہوسکتی ہے اوروہ ضائع نہیں ہوتا۔اورمیں شرح صدر سے کہ سکتاہوں کہ آخری وقت تک اس کے لئے اصلاح کا موقعہ ہے مگر وہ نماز باجماعت کاپابند اس رنگ میں ہو کہ ا س کو اس میں لذت اور سرور حاصل ہو۔مجھے اپناواقعہ یاد ہے۔ایک دفعہ حضرت مسیح موعود علیہ الصلوٰۃ والسلام کچھ بیمار تھے اس لئے جمعہ کے لئے مسجد میں نہ جاسکے۔میں اس وقت بالغ نہیں تھا کہ بلوغت والے احکام مجھ پرجاری ہوں۔تاہم میں جمعہ کے لئے مسجد کوجارہاتھا کہ ایک دوست مجھے ملے اس وقت کی عمر کے لحاظ سے توان کی شکل اس وقت تک یاد نہیں رہ سکتی تھی۔مگر
اس واقعہ کااثر مجھ پر ایسا ہواکہ اب تک مجھے ان کی صور ت یاد ہے۔محمد بخش ان کانام تھا۔میں نے ان سے پوچھا۔آپ واپس آرہے ہیں کیا نماز ہوگئی ہے؟ انہوں نے کہا۔آدمی بہت ہیں مسجد میں جگہ نہیں تھی اس لئے میں واپس آگیاہوں۔میں بھی یہ جواب سن کر واپس آگیا۔اورگھر میں آکر نماز پڑھ لی۔حضرت مسیح موعود علیہ السلام نے یہ دیکھ کر مجھ سے پوچھا مسجدمیں نماز پڑھنے کیوں نہیں گئے۔خدا تعالیٰ کافضل ہے کہ میں بچپن سے ہی حضرت مسیح موعود علیہ الصلوٰۃ والسلام کاادب ان کے نبی ہونے کی حیثیت سے کرتاتھا۔میں نے دیکھا۔آپ کے پوچھنے میں ایک سختی تھی اورآپ کے چہرہ سے غصہ ظاہرہوتاتھا۔آپ کے اس رنگ میں پوچھنے کا مجھ پر بہت ہی اثر ہوا۔جواب میں میں نے کہا۔میں گیاتوتھا لیکن جگہ نہ ہونے کی وجہ سے واپس آگیا۔آپ یہ سن کر خاموش ہوگئے۔لیکن جس وقت جمعہ پڑھ کر مولوی عبدالکریم صاحب آپ کی طبیعت کاحال پوچھنے کے لئے آئے توسب سے پہلی بات جو حضرت مسیح موعود علیہ الصلوٰۃ والسلا م نے آپ سے دریافت کی وہ یہ تھی کہ کیا آج لوگ مسجد میں زیادہ تھے۔اس وقت میرے دل میں سخت گھبراہٹ پیداہوئی۔کیونکہ میں خود تومسجد میں گیا نہیں تھا۔معلوم نہیں بتانے والے کوغلطی لگی یامیری سمجھ میں غلط مفہوم آیا دونوں صورتو ں میں الزام مجھ پر آئے گا کہ میں نے جھو ٹ بولا۔مولوی عبدالکریم صاحب نے جواب دیا۔ہا ں حضو ر! آج واقعہ میں بہت لوگ تھے۔میں اب بھی نہیں جانتاکہ اصلیت کیاتھی۔خدا نے میری بریت کے لئے یہ سامان کر دیا کہ مولوی صاحب کی زبان سے بھی اس کی تصدیق کرادی یا فی الواقعہ اس دن غیر معمولی طورپر زیادہ لوگ آئے تھے۔بہرحال یہ ایک واقعہ ہواجس کاآج تک میرے قلب پر ایک گہرااثر ہے۔اس سے معلوم ہو سکتا ہے کہ حضرت مسیح موعود علیہ الصلوٰۃوالسلام کونماز باجماعت کاکتنا خیال رہتاتھا۔بڑاآدمی اگرخود نماز باجماعت نہیں پڑھتاتو وہ منافق ہے۔مگروہ لو گ جو اپنے بچوں کونماز باجماعت اداکرنے کی عادت نہیں ڈالتے وہ ان کے خونی اورقاتل ہیں۔اگرماں باپ بچوں کو نماز باجماعت کی عادت ڈالیں توکبھی ان پر ایساوقت نہیں آسکتاکہ یہ کہاجاسکے کہ ان کی اصلاح ناممکن ہے اوروہ قابل علاج نہیں رہے۔اس میں کوئی شبہ نہیں کہ آجکل مسلمان مساجد میں جاکر نماز یں بھی پڑھتے ہیںاورپھر مسجد سے نکل کرکسی قسم کے گناہ سے بھی ان کو پرہیز نہیں ہوتا۔جھو ٹ وہ بولتے ہیں رشوت وہ لیتے ہیں۔فریب وہ کرتے ہیں۔خیانت سے ان کوپرہیز نہیں۔تجارتی دھوکوں سے وہ مجتنب نہیں۔غرض ہزاروں قسم کے گناہوں میں مبتلاہیں۔مگراس کی وجہ یہ ہے کہ وہ نماز کو ان شرائط کے ساتھ ادانہیں کرتے جواسلام نے مقرر کی ہیں۔اگروہ ان شرائط کے ساتھ نماز اداکرتے توان کے قلوب پاک ہوجاتے اورگناہوں کی میل دورہوجاتی اورہرقسم کے گناہوں اور بدیوں سے وہ محفوظ ہوجاتے
۔کیونکہ نماز کوسنوار کرپڑھنے والا اوران شرائط کوملحوظ رکھنے والا جواللہ تعالیٰ نے ادائے نماز کے لئے مقرر فرمائی ہیں اپنے اند رفوراً ایک تبدیلی پاتاہے اورزیادہ دن نہیں گذرتے کہ اس کے اند رایک خاص ملکہ پیدا ہوجاتا ہے جس سے اسے بدیوں کی شناخت ہوجاتی ہے اورپوشیدہ درپوشیدہ بدیوں پر اسے اطلاع دی جاتی ہے اورمخفی درمخفی گناہوں کا علم جودوسروں کونہیں ہوتا اسے دیاجاتاہے۔اورملائکہ اسے ہرموقعہ پرہوشیار کردیتے ہیں۔کہ دیکھنا یہ گناہ ہے ہوشیار ہوجانا۔ااوراسے شیطان کے مقابلہ کی مقدرت عطاہوتی ہے۔کیونکہ نمازی اللہ تعالیٰ کی تسبیح اور تحمید کرتاہے اورخدا تعالیٰ کسی کااحسان نہیں رکھتابلکہ اپنے بندہ کواس کے اعمال کااعلیٰ سے اعلیٰ بدلہ دیتاہے۔جب نماز میں کمال تذلل اورخشوع او رخضوع کے ساتھ انسان خدا تعالیٰ کے حضور میں گرجاتاہے اوروہ تمام تذلل کے طریق جن کو کسی ملک کے باشندوں نے اظہار عبودیت کے لئے تجویز کیا ہے استعما ل کرتاہے تواللہ تعالیٰ اسے اٹھاتاہے اورجس طرح وہ اللہ تعالیٰ کی تسبیح کرتاہے خدا تعالیٰ ملائکہ کو فرماتا ہے کہ دیکھو میرے اس بندہ نے میری پاکیزگی کا اقرار کیاہے تم اسے پاک کردو۔اوراس نے میری حمد کی ہے تم اس کی حمد کودنیا میں پھیلائو۔اوراس نے میرے حضور میں کمال تذلل اورانکسار کااظہار کیاہے تم اس کو عزت و رفعت دو۔غرض جوں جو ںا نسان نمازیں پڑھتاہے اوراللہ تعالیٰ کی پاکیزگی اور حمد اورعظمت کااقرار کرتاہے خدا تعالیٰ اس کے اعمال حسنہ کے ترازو کو بوجھل کرتاجاتاہے اور انسان کا رفع ہوتاجاتاہے۔اور چونکہ گناہ نتیجہ ہے مادیت کے تعلق کا۔جب انسان اس عالم سے بلند ہوتاجاتاہے تواس کاتعلق مادیت سے کم ہوتاجاتاہے اوروہ گناہوں سے محفوظ ہو جاتا ہے۔پھر فرماتا ہے وَلَذِکْرُ اللّٰہِ اَکْبَرُ۔بری اور ناپسندیدہ باتوں سے رکنا بھی ایک بڑامقصد ہے۔مگرنماز میں جو اللہ تعالیٰ کویاد کیا جاتا ہے یہ اس سے بھی بڑامقصد ہے۔وَاللّٰہُ یَعْلَمُ مَاتَصْنَعُوْنَ اوراللہ تعالیٰ تمہارے کاموں سے خوب واقف ہے۔اس لئے جب تم اللہ تعالیٰ کویاد کروگے تووہ بھی تمہیں یاد کرے گا۔تمہیں اپنے قرب اورالہام سے عزت بخشے گا اور تمہاری او رتمہاری قوم کی اصلاح کے سامان پیدافرمائے گا۔چنانچہ رسول کریم صلی اللہ علیہ وسلم نے جمعہ کے دوسرے خطبہ میں جو کلمات پڑھنے کی ہدایت فرمائی ہے اس کے کچھ الفاظ یہ بھی ہیں کہ اُذْکُرُوْااللّٰہَ یَذْکُرْکُمْ یعنی اللہ کویاد کروجس کے نتیجہ میں وہ تمہیں یاد کرے گا۔اسی طرح قرآن کریم میں آتاہے کہ فَاذْکُرُوْنِٓیْ اَذْکُرْکُمْ(البقرۃ:۱۵۳)یعنی چاہیے کہ تم مجھے یاد کرو اس کے نتیجہ میں میں بھی تمہیں یاد کروں گا۔یعنی تمہیں اپنے قرب میں جگہ دوں گا اور تمہاری ہرتکلیف اور مصیبت میں تمہاری مددکروںگااورظاہر ہے کہ جوشخص اللہ تعالیٰ کاقرب حاصل
کر لے گا وہ بہت سی بدیوں سے بچ جائے گا۔اورخدا تعالیٰ کامعاملہ بھی اس سے محبت او رپیار کاہوجائے گا۔اسی وجہ سے اسلام نے تما م اجتماعات میں ذکر الٰہی اورعبادت پر بڑازوردیاہے۔چنانچہ دیکھ لوہم حج کے لئے جاتے ہیں۔تووہاں بھی ذکر الٰہی ہوتاہے۔عیدین میں جاتے ہیں تووہاں بھی ذکرالٰہی ہوتاہے۔شادی اوربیاہ کے لئے جاتے ہیں تووہاں بھی ذکرالٰہی ہوتاہے۔جنازہ کے لئے جاتے ہیں تووہاں بھی ذکر الٰہی ہوتاہے۔گویاہمارے سب اجتماعوں کو بابرکت بنانے کا نسخہ رسول کرم صلی اللہ علیہ وسلم نے یہی بیان فرمایا ہے کہ ان میں ذکر الٰہی اورعبادت زیادہ کی جائے۔اسی وجہ سے رسول کریم صلی اللہ علیہ وسلم نے فرمایا ہے کہ جس مجلس میں خدا تعالیٰ کا ذکر ہوتاہے خدا تعالیٰ کے فرشتے اس میں اترآتے ہیں۔پس مومن کافرض ہے کہ وہ اپنے اوقات کو اس طرح صرف کر ے کہ ذکرالٰہی اس کی زبان پر جاری ہو اور نمازوں میں اسے شغف اور رغبت ہو۔ذکرالٰہی کرناگویا سوچ آن SWITCH ON کرناہے سوچ آن SWITCH ON کردیاجائے تو روشنی پیداہوجاتی ہے اوراگر سوچ آنSWITCH ON نہ کیاجائے توپھر اندھیراہی رہتا ہے۔اسی طرح اگر ذکرالٰہی نہ کیاجائے تو طبیعت روشن نہیں ہوتی۔پس اپنے اندر ذکر الٰہی کی عادت پیداکرو تا خدا سے تمہاراتعلق بڑھ جائے۔تمہارے اندرہمت پیداہوجائے تمہاری نظروں میں تاثیر پیداہوجائے اوردشمن کے دلوں میں بھی تمہارارعب بیٹھ جائے۔اوردشمن خود بول اٹھے کہ یہ لوگ واقعی روحانیت کے پتلے ہیں۔وَ لَا تُجَادِلُوْۤا اَهْلَ الْكِتٰبِ اِلَّا بِالَّتِيْ هِيَ اَحْسَنُ١ۖۗ اِلَّا اوراہل کتاب سے کبھی بحث نہ کرو مگراعلیٰ اورمضبوط دلیل کے ساتھ۔سوائے ان لوگوں کے جوان میں سے ظلم کرنے الَّذِيْنَ ظَلَمُوْا مِنْهُمْ وَ قُوْلُوْۤا اٰمَنَّا بِالَّذِيْۤ اُنْزِلَ اِلَيْنَا وَ والے ہوں (ان کو الزامی جواب دے سکتے ہو)اوران سے کہو کہ جو ہم پر نازل ہواہے ہم اس پر بھی ایمان لاتے ہیں اُنْزِلَ اِلَيْكُمْ وَ اِلٰهُنَا وَ اِلٰهُكُمْ وَاحِدٌ وَّ نَحْنُ لَهٗ مُسْلِمُوْنَ۰۰۴۷ اورجوتم پر نازل ہواہے اس پر بھی۔اورہماراخدااور تمہاراخداایک ہے۔اورہم اس کے فرمانبردار ہیں۔تفسیر۔چونکہ قرآنی تبلیغ کے بڑے مخاطب یہوداورعیسائی ہی ہوسکتے تھے اس لئے اللہ تعالیٰ نے اُتْلُ مَآاُوْحِیَ اِلَیْکَ مِنَ الْکِتٰبِ کاحکم دینے کے بعد اہل کتاب کاخصوصیت سے ذکرکیا اورفرمایاکہ جب تم قرآن ان کے