سُوْرَۃُ الضُّحٰی
تفسیر کبیر (جلد ۱۳), حصہ 4
آیت میںلوگوں کے اس خیال کی تردید کرتا ہے اور فرماتا ہے تو اگر علیحدگی اختیار کرتا ہے تو ہمارے ذکر کے لئے۔اور اگر لوگوں سے ملتا ہے تو ہمارے حکم کے ماتحت۔پس تیرے متعلق لوگوں کا یہ خیال کرنا قطعی طورپر غلط اور بے بنیاد ہے۔تیری علیحدگی ذکر کے لئے ہوتی ہے اور تیرا پبلک میں آنا محض بنی نوع انسان کے فائدہ کے لئے ہوتا ہے۔اپنے نفس کے لئے نہیں ہوتا۔چنانچہ فرماتا ہے وَ لَلْاٰخِرَةُ خَيْرٌ لَّكَ مِنَ الْاُوْلٰى۔اے محمد رسول اللہ صلی اللہ علیہ وآلہٖ وسلم یہ نادان تیری زندگی سے ناواقف ہیں انہیں اتنا بھی معلوم نہیںکہ علیحدگی کی حالت تجھے ہمیشہ پیاری رہتی ہے تو اگر لوگوں سے ملتا ہے تو محض خد ا کے لئے پس وَ لَلْاٰخِرَةُ خَيْرٌ لَّكَ مِنَ الْاُوْلٰى میں یہ بتایا کہ آخرۃ تجھے اُولیٰ سے زیادہ راحت والی معلوم ہوتی ہے۔خَیْرٌ کے معنے راحت والی یا آرام پہنچانے والی چیز کے ہیں۔اب ہم دیکھتے ہیںکہ ان آیات میںکون سی چیز آخرۃ کہلا سکتی ہے اور کون سی اُولیٰ۔سو پہلی آیت میں ضُـحٰی کو پہلے بیان کیاگیا ہے اور لیل کو بعدمیں۔پس آخرۃ لیل ہوئی اور اُولیٰ ضـحٰی ہوئی اور ضـحٰی یعنی دن کے وقت چونکہ انسان لوگوں سے ملتا ہے اس لئے وہ ضـحٰی جلوت کا قائم مقام سمجھی جائے گی اور رات کو وہ چونکہ علیحدہ ہوتا ہے اس لئے لَیْل خلوت کا قائم مقام سمجھی جائے گی ان معنوں کے مطابق آیت کا یہ مفہوم ہو گا کہ اے ہمارے رسول ! تجھے خلوت سے جلوت کی نسبت زیادہ راحت معلوم ہوتی ہے۔لوگ تجھے جاہ پسند سمجھتے ہیں حالانکہ تولوگوں سے محض ہمارے حکم کے ماتحت ملتاہے ورنہ رات کو ہم سے راز و نیاز کی باتیںکرنا تجھے زیادہ پسند ہیںاور جو برکات تجھے رات کو ہم دیتے ہیںوہ دن کو ملنے والے انسان تجھے کہاں دے سکتے ہیں۔پس جب کہ تیری تمام ترقیات تیر ی خلوت کی گھڑیوں سے وابستہ ہیں اور تو اسے دل سے جلوت پر ترجیح دیتا ہے تو لوگوںکا یہ کہنا کہ تو جاہ پسند ہے تیرے دل کو کیوں دکھ پہنچائے کہ یہ اعتراض حقیقت سے دور اور سر تا پا جھوٹ ہے۔یہ ایسی ہی بات ہے جیسے کہ حضرت مسیح موعود علیہ الصلوٰۃ والسلام نے اپنے متعلق بھی بیان فرمائی ہے کہ ’’میںپوشیدگی کے حجرہ میںتھا اور کوئی مجھے نہیں جانتا تھا اور نہ مجھے یہ خواہش تھی کہ کوئی مجھے شناخت کرے۔اُس نے گوشہ ٔتنہائی سے مجھے جبراً نکالا۔میںنے چاہا کہ میں پوشیدہ رہوں اور پوشیدہ مروں مگر اس نے کہا کہ میںتجھے تما م دنیا میںعزت کے ساتھ شہرت دوں گا۔پس یہ اس خدا سے پوچھو کہ ایسا تو نے کیوں کیا؟میرا اس میںکیا قصور ہے۔‘‘ (حقیقۃ الوحی روحانی خزائن جلد ۲۲صفحہ۱۵۳) وَ لَلْاٰخِرَةُ خَيْرٌ لَّكَ مِنَ الْاُوْلٰى میںاسی مضمون کو بیان کیا گیا ہے کہ خدا تعالیٰ نے محمد رسول اللہ صلی اللہ علیہ وآلہٖ وسلم کو جبراً گوشہ ٔتنہائی سے باہر نکالا۔ورنہ ان کی خواہش یہی تھی کہ وہ خلوت میںاللہ تعالیٰ کو یاد کرتے رہیں۔
چنانچہ دیکھ لو غارحرا میںجب فرشتے نے کہا اِقْرأْ تو آپؐنے یہی جواب دیا کہ مَا اَ نَا بِقِارِیٍٔ۔(صحیح بخاری کتاب بدء الوحی باب کیف کان بدء الوحی اِلَی رسول اللہ صلی اللہ علیہ وسلّم) میرے سپرد یہ کام کیوں کیاجاتا ہے میںتو اپنے رب کی عبادت پسند کرتا ہوں۔پس اس آیت میں اللہ تعالیٰ نے کفار کے اس اعتراض کو رد کیا ہے کہ محمد رسول اللہ صلی اللہ علیہ وسلم وجاہت پسند ی کے لئے لوگوں سے ملتے ہیںاور بتایا ہے کہ ان نادانوں کو یہ معلوم نہیںکہ ساعت آخرت یعنی لَیْل تیرے لئے اچھی ہوتی ہے اور تواس سے بہت زیادہ راحت محسوس کرتا ہے۔لوگوں کو ملنا تجھے پسند نہیں۔تو اگر ملتا ہے تو محض خدا تعالیٰ کے حکم سے۔تیری ذاتی خواہش کا اس میںکوئی دخل نہیںہوتا۔وَ الضُّحٰى وَ الَّيْلِ اِذَا سَجٰى۔مَا وَدَّعَكَ رَبُّكَ وَ مَا قَلٰى کے ایک معنے یہ بھی کئے گئے تھے کہ ترقی اور تنزل دونوں دَور میں ہم تیرے ساتھ رہیں گے اور تیرے کام کو تباہ نہیں ہونے دیں گے۔ان معنوں کے رُو سے وَلَلْاٰخِرَةُ خَيْرٌ لَّكَ مِنَ الْاُوْلٰى کا یہ مفہوم ہوگا کہ ہمیشہ رات کے بعد ضُـحٰی آتی رہے گی یہ معنے نہیں کہ آخری زمانہ پہلے سے اچھا ہوگا بلکہ تاریکی اور روشنی کے دَور دو طرح آسکتے ہیں ایک یہ کہ پہلے روشنی اور پھر تاریکی کا دَور آئے اور دوسرے یہ کہ پہلے تاریکی پھر روشنی کا دَور آئے۔فرماتا ہے تیرے لئے ہمیشہ روشنی کا دَور آخری ہوتا چلا جائےگا۔بعض لوگ پہلے ترقی کرتے ہیں پھر گر جاتے ہیں اور ان کی پہلی ترقی کی وجہ سے لوگ اُن پر رشک نہیں کرتے اُن کی آخری تباہی کی وجہ سے اُن کے حالات سے عبرت پکڑتے ہیں۔پھر قومی طور پر بعض اقوام یک دم بڑھ کر گرجاتی ہیں اور بعض گرتی ہیں پھر اونچی نکل جاتی ہیں پھر گرتی ہیں پھر اونچی نکل جاتی ہیں۔اِسی طرف اِ س آیت میں اشارہ کیا گیا ہے کہ محمد رسول اللہ صلی اللہ علیہ وسلم کا ذاتی معاملہ بھی ایسا ہوگا کہ آپ پہلے تکالیف اُٹھائیں گے مگر پھر ترقی کر جائیں گے اور آپ کی قوم سے بھی یہ معاملہ ہوگا کہ ہرتنزل کے بعد اللہ تعالیٰ مامورین یا مجددین کے ذریعہ سے اس کے اُبھارنے کے سامان کرتا چلا جائے گا اور اسی طرح بعد میں آنے والا دَور اپنے سے پہلے تنزل کے دور سے بہتر ہوگا۔یہ یاد رکھنا چاہیے کہ اس جگہ یہ ذکر نہیںکہ ہر آنے والا روحانی دور پہلے روحانی زمانہ سے اچھا ہوگا کیونکہ اس طرح تو یہ ماننا پڑے گا کہ نعوذ باللہ آئندہ روحانی دَور محمد رسول اللہ صلی اللہ علیہ وسلم کے زمانہ سے اچھے ہوں گے اور یہ بالبداہت غلط ہے۔پس اس آیت میں یہ بتایا گیا ہے کہ ہر تنزل کے بعد اس سے بہتر زمانہ اُمتِ اسلامیہ پر لایا جائے گا جس میں اس کی روحانی حالت پھر ترقی کر جائے گی۔پس پہلے روحانی دَوروں کا مقابلہ نہیں بلکہ ہر دَور روحانی
کا مقابلہ پہلے تنزل کے دور سے ہے۔اور یہ جو حدیثوں میں آتا ہے کہ میں نہیں جانتا کہ میری قوم کا پہلا حصہ اچھا ہے یا آخری (مسند احمد عن انس) اس کے یہ معنی نہیں کہ آخری زمانہ پہلے زمانہ سے بلحاظ روحانیت کے بہتر ہوگا بلکہ اس زمانہ کو بہتر اس وجہ سے قرار دیا گیا ہے کہ اس نے اسلامی تنزل کے ایک بہت بڑے دَور کے گذرنے کے بعد آنا تھا اور آپ کا صرف یہ مطلب ہے کہ میں نہیں کہہ سکتا کہ اسلام پر جو مشکلات ابتدائی دور میں آئی ہیں اُن کو زیادہ سخت کہوں یا اُن مشکلات کو زیادہ سخت کہوں جو آخری زمانہ میں آنے والی ہیں اور چونکہ خوشی مشکلات کی نسبت سے ہوتی ہے آپ نے فرمایا کہ میں نہیں جانتا کہ اُن کو اچھا کہوں جو اَب ہیں یا اُن کو جو آخری دَور میں پیدا ہونے والے ہیں یعنی مشکلات کو مد نظر رکھتے ہوئے نہیں کہہ سکتے کہ موجودہ دَور کے لوگ کامیابی کے لحاظ سے زیادہ خوش قسمت ہیں یا آئندہ دَور کے لوگ زیادہ خوش قسمت قرار دیئے جانے کے مستحق ہوں گے۔بہر حال آیت کے یہ معنے نہیں کہ ہر پچھلا زمانہ پہلے زمانہ سے روحانیت کے لحاظ سے بہتر ہوگا بلکہ معنے یہ ہیں کہ قربِ قیامت تک تیرے لئے روشنی کا دَور ہمیشہ آخر میں آئے گا البتہ اس میں ایک استثنیٰ ہے اور وہ یہ کہ قیامت صرف اشرار پر آئے گی چنانچہ قرآن کریم سے بھی پتہ لگتا ہے اور حدیثوں سے بھی کہ خرابی کا وہ آخری دَور جو قرب قیامت کے وقت ہوگا صرف اشرار پر آئے گا ابرار اُس وقت دنیا میں نہیں رہیں گے۔پس وہ دَور بہر حال وَ لَلْاٰخِرَةُ خَيْرٌ لَّكَ مِنَ الْاُوْلٰى سے مستثنیٰ ہے لیکن اسے اس لحاظ سے مستثنیٰ بھی نہیں سمجھنا چاہیے کہ وہ نبوت محمدیہ کے ختم ہونے کا زمانہ ہوگا۔اُس دَور کو رسول کریم صلی اللہ علیہ وسلم کا زمانہ قرار نہیں دیا جاسکتا کیونکہ دنیا ختم ہوجائے گی اور محمد رسول اللہ صلی اللہ علیہ وسلم کا کام اس دنیا میں ختم ہو جائے گا۔وَ لَسَوْفَ يُعْطِيْكَ رَبُّكَ فَتَرْضٰىؕ۰۰۶ اور ضرور تیرا رب تجھے (وہ کچھ ) دے کے رہے گا جس پر تُو خوش ہوجائے گا۔تفسیر۔وَ لَسَوْفَ يُعْطِيْكَمیں اسلامی فتوحات کی پیشگوئی اس آیت کے ایک تو یہ معنے ہیں کہ گو اس وقت چاروں طرف مخالفت کا ایک شور برپا ہے اور اسلام اور مسلمانوں کو کچلنے کے لئے کفار نے اپنی تدابیر کو انتہاء تک پہنچایا ہوا ہے مگر چونکہ ہم پیشگوئی کر چکے ہیں کہ اسلام پر ضُـحٰی کا دَور آنے والا ہے اِس لئے ہم تمہیں خوشخبری دیتے ہیں کہ عنقریب وہ زمانہ آنے والا ہے جب تم اپنے مقصد میں کامیاب ہو جاؤ گے کفر کو نابود ہوتے اپنی
آنکھوں سے دیکھ لو گے اور وہ کام جسے دنیا ناممکن سمجھتی ہے الٰہی تائید اور نصرت کےساتھ اپنی تکمیل کو پہنچ جائے گا اور تیرا رب جلد ہی تجھ کو وہ سب کچھ دے گا جس سے تُو راضی ہو جائے گا۔درحقیقت کام ہی ایک ایسی چیز ہے جس سے کسی شخص کی شان اور اس کی عظمت کا اندازہ لگایا جا سکتا ہے رسول کریم صلی اللہ علیہ وسلم کے سپرد اللہ تعالیٰ کی طرف سے جو کام کیا گیا تھا وہ بظاہر بہت بڑا وقت چاہتا تھا، بہت بڑی جدو جہد اور بہت بڑی قربانی کا تقاضا کرتا تھا اور انسان اس کام کو دیکھ کر یہ خیال کرتاتھا کہ اس کے لئے تو عمرِ نوح کی ضرورت ہے تھوڑے سے وقت میں اتنا عظیم الشان کام کس طرح انجام دیا جا سکتا ہے۔مگر اللہ تعالیٰ نے آپ کو اطمینان دلایا کہ بے شک کام بڑا ہے اور بظاہر بہت بڑا وقت چاہتا ہے مگر ہم یہ کام تجھ سے جلدی کروا دیں گے چنانچہ ایک قلیل ترین عرصہ میں رسول کریم صلی اللہ علیہ وسلم نے جو حیرت انگیز کام کر کے دکھایا اُس کی مثال دنیا میں کہیں نظر نہیں آسکتی۔تم اپنے صوبہ پنجاب کو ہی لے لو، سندھ کو لے لو، سرحد کو لے لو باوجود اس کے کہ یہ صوبے سو سال سے تعلیم حاصل کرنے میں مشغول ہیں پھر بھی وہ پوری تعلیم حاصل نہیں کر سکے۔باوجود اس کے کہ وہ سو سال سے اپنے تمدن کی ترقی میں مصروف ہیں پھر بھی وہ اپنے تمدن کو پورے طور پر ترقی نہیں دے سکے۔باوجود اس کے کہ وہ سو سال سے لوگوں کے اخلاق کی درستی میں لگے ہوئے ہیں پھر بھی وہ درستی ٔاخلاق میں پوری طرح کامیاب نہیں ہو سکے۔غرض الگ الگ جماعتیں الگ الگ کاموں کے لئے سو سو سال سے مصروف ہیں مگر ہنوز روزِ اوّل والا معاملہ ہے۔نہ انہیں تعلیمی ترقی حاصل ہوئی ہے نہ اُنہیں تمدنی ترقی حاصل ہوئی ہے نہ انہیں اخلاقی ترقی حاصل ہوئی ہے۔اس کے مقابل میں اسلام ایک ایسا منزل مقصود تھا جس سے اونچا اور بلند تر کوئی اور منزل مقصود نہیں ہو سکتا۔پھر اسلام وہ مذہب تھا جو حاوی تھا تمام اقسام کی اصلاحات پر۔اُس میں تمدنی اصلاح بھی شامل تھی۔اُس میں اقتصادی اصلاح بھی شامل تھی۔اُس میں عائلی اصلاح بھی شامل تھی۔اُس میں سیاسی اصلاح بھی شامل تھی۔اُس میں فکری اصلاح بھی شامل تھی۔غرض ایک نہیں ساری اصلاحیں اُس میں شامل تھیں اور پھر ہر ایک کا آئیڈیل IDEAL اور منزلِ مقصود بہت بالا تھا۔جب یہ عظیم الشان کام رسول کریم صلی اللہ علیہ وسلم کے سپرد ہوا اور ساتھ ہی اللہ تعالیٰ کی طرف سے یہ خبر بھی دے دی گئی کہ تم اپنی آنکھوں سے ضُـحٰی بھی دیکھ لو گے تو چونکہ محب اپنے محبوب سے زیادہ دیر تک جدا نہیں رہ سکتا بلکہ محب اپنے محبوب کے پاس جانا ہی پسند کرتا ہے اس لئے رسول کریم صلی اللہ علیہ وسلم کے دل میں بے چینی پیدا ہوتی تھی کہ نہ معلوم یہ کام کب ختم ہو۔آپ کہتے ہوں گے الٰہی پتہ نہیں یہ کام پچاس سال میں ختم ہو، ساٹھ سال میں ختم ہو، سو سال میں ختم ہو۔کیا میں اتنی دیر تجھ سے جدا رہوں گا اللہ تعالیٰ اسی مضمون کو اس آیت
میں بیان کرتا ہےا ور فرماتا ہے ہم تیرے اُن کاموں کا ذکر کر رہے ہیں جو دنیا سے متعلق ہیں اور تُو اپنے دل میں کہہ رہا ہوگا کہ اصل مطلب کا ذکر ہی نہیں۔اس لئے ہم کہتے ہیں کہ کام بڑا ہے مگر ہم جلدی کروا دیں گے اور جلد ہی تم کو وہ دے دیں گے جس سے تو راضی ہو جائے گا۔یعنی اس کام کے لئے بظاہر تو سینکڑوں سال کی عمر چاہیے مگر تیرے سب دنیوی کام جلد ہو جائیں گے اور تُو اِلَی الرَّفِیْقِ الْاَعْلٰی کہتا ہوا ہمارے پاس آجائے گا اور اس طرح تجھے وہ چیز مل جائے گی جو تُو پسند کرتا ہے یعنی ہمارا وصال تجھے حاصل ہوجائے گا اور فراق کی یہ کٹھن گھڑیاں کٹ جائیں گی۔احادیث میں آتا ہے جب رسول کریم صلی اللہ علیہ وسلم پر یہ سورۃ نازل ہوئی کہ اِذَا جَآءَ نَصْرُ اللّٰهِ وَ الْفَتْحُ۔وَرَاَيْتَ النَّاسَ يَدْخُلُوْنَ فِيْ دِيْنِ اللّٰهِ اَفْوَاجًا۔فَسَبِّحْ بِحَمْدِ رَبِّكَ وَ اسْتَغْفِرْهُ١ؔؕ اِنَّهٗ كَانَ تَوَّابًا۔تو آپؐنے ایک خطبہ پڑھا اور فرمایا ہر نبی کے زمانہ کا ایک کام ہوتا ہے جب وہ اُس کام کو ختم کر لیتا ہے تو خدا تعالیٰ ایک دوسرا دَور شروع کردیتا ہے۔پھر آپ نے فرمایا خدا کا ایک بندہ تھا اُس سے خدا تعالیٰ نے کہا کہ تم اگر چاہو تو دنیا میں رہو اور اگر چاہو تو ہمارے پاس آجاؤ اُس نے کہا کہ یا اللہ! میں اب دنیا میں نہیں رہنا چاہتا میری خواہش یہی ہے کہ تُو مجھے اپنے پاس بُلا لے جب رسول کریم صلی اللہ علیہ وآلہٖ وسلم نے یہ واقعہ بیان فرمایا تو حضرت ابو بکرؓ رو پڑے اور اس قدر روئے کہ گھِگھی بندھ گئی باقی صحابہ کو سخت حیرت ہوئی کہ ابو بکرؓ رو کیوں رہے ہیں۔حضرت عمرؓ کہتے ہیں مجھے تو اُن کے رونے سے سخت غصہ آیا اور میں نے کہا اسلام کے لئے فتح کا وقت آیا ہے تو یہ بڈھا رونے لگ گیا ہے۔یہ بد شگونی کیوں کرتا ہے خدا تعالیٰ نے اپنے کسی بندے کو اختیار دیا کہ وہ اگر چاہے تو دنیا میں رہے اور اگر چاہے تو اللہ تعالیٰ کے پاس چلا جائے۔اُس نے اللہ تعالیٰ کے پاس جانے کو ترجیح دی اور دنیا میں رہنا پسند نہ کیا۔اس میں رونے کا کون سا مقام ہے اور پھر ایسی حالت میں جبکہ اللہ تعالیٰ کی طرف سے اسلام کی فتح اور اُس کے غلبہ کی پیشگوئی ہوئی ہے مگر ابوبکرؓ تھے کہ اُن کا رونا تھمتا ہی نہیں تھا۔آخر رسول کریم صلی اللہ علیہ وسلم نے فرمایا لَـــوْ کُـــنْــتُ مُــتَّــخِـذًاخَــــلِــیْــلًا مّــِنْ اُمَّــتِیْ لَاتَّـــخَــذْتُ اَبَا بَکْرٍ۔اگر کسی کو خلیل بنانا جائز ہوتا تو میں ابو بکر کو خلیل بناتا۔پھر آپ نے فرمایا لَا یَبْقَیَنَّ فِی الْمَسْجِدِ بَابٌ اِلَّا سُدَّ اِلَّا بَابُ اَبِیْ بَکْرٍ۔مسجد میں جس قدر کھڑکیاں کھلتی ہیں وہ سب کی سب بند کر دو سوائے ابوبکر کی کھڑکی کے۔(بخاری کتاب الصلٰوۃ باب الـخوخۃ والممرّ فِی الْمَسْجِدِ ) اس طرح آپ نے اس امر کا اظہار فرما دیا کہ ابو بکر سمجھ گئے ہیں کہ میرا اس واقعہ کے بیان کرنے سے کیا منشاء تھا مجھے دنیا میں رہنے کی خوشی نہیں بلکہ میری ساری خوشی اور میری ساری راحت اپنے آقا اور محبوب کے پاس جانے میں ہے اب چونکہ میرا کام ختم ہوچکا ہے اس لئے میرا دنیا میں ٹھہرنا عبث ہے میری خواہش اور میری آرزو یہی ہے کہ میرا رب مجھے
اپنے پاس بُلا لے۔باقی صحابہؓ تو رسول کریم صلی اللہ علیہ وسلم کے مطلب کو نہ سمجھے مگر ابو بکر سمجھ گئے اور اُن سے رِقّت برداشت نہ ہو سکی۔رسول کریم صلی اللہ علیہ وسلم نے اُن کو تسلّی دے دی کہ اگر تم کو مجھ سے محبت ہے تو مجھے بھی تم سے محبت ہے۔چنانچہ آپ نے فرمایا اگر دنیا میں کسی کو خلیل بنانا جائز ہوتا تو میں ابو بکر کو اپنا خلیل بناتا۔پھر اس کے ساتھ ہی آپ نے اس طرف بھی اشارہ فرما دیا کہ میرے بعد کام کی ذمہ داری ابو بکر پر پڑنے والی ہے چنانچہ آپ نے فرمایا سب کھڑکیاں بند کردو سوائے ابو بکرؓ کی کھڑکی کے جس میں حکمت یہ تھی کہ ابو بکرؓ کو نمازیں پڑھانے کے لئے مسجد میں آنا پڑے گااِس لئے اُن کی کھڑکی کا کھلا رہنا ضروری ہے۔غرض رسول کریم صلی اللہ علیہ وسلم کی سب سے بڑی خوشی اِسی بات میں تھی کہ آپ کو اپنے رب کا وصال حاصل ہو۔دنیوی کام کو آپ جلد سے جلد سر انجام دیں اور رفیق اعلیٰ کے پاس لَبَّیْکَ اَللّٰھُمَّ لَبَّیْکَ کہتےہوئے حاضر ہوجائیں چنانچہ رسول کریم صلی اللہ علیہ وسلم جب مرض الموت سے بیمار ہوئے تو آخری وقت میں آپ کی زبان پر یہی الفاظ جاری تھے کہ اِلَی الرَّفِیْقِ الْاَعْلٰی یعنی اے میرے رب میری خواہش اب یہی ہے کہ میں تیرے پاس آجائوں۔پس وَ لَسَوْفَ يُعْطِيْكَ رَبُّكَ فَتَرْضٰى۔کے الفاظ میں اس طرف اشارہ کیا گیا ہے کہ اے محمد صلی اللہ علیہ وسلم ہم اپناکام جو تیرے سپرد کرتے ہیں بظاہر وہ بہت لمبا نظر آتا ہے مگر ہم تجھے ایسی توفیق دے دیں گے کہ تو اس کام کو جلدی ختم کر لے گا چنانچہ دیکھ لو رسول کریم صلی اللہ علیہ وسلم نے تیئس سال کی قلیل مدت میں اپنے تمام کام کو ختم کر لیا۔اتنے قلیل عرصہ میں اس قدر عظیم الشان کام کو سرانجام دینے کی مثال دنیا میںاور کہیں نظر نہیںآسکتی بلکہ اس کام کی مثال تو کیا اس کے ہزارویں بلکہ لاکھویںحصہ کی مثال بھی دنیا کے اور کسی شخص کی زندگی میں نہیں مل سکتی۔دنیا میںبڑے بڑے لوگ گذرے ہیںمگر ان کا انجام کتنا تلخ اور عبرت ناک ہو اہے۔ہٹلر کو دیکھ لو اس کا کیا انجام ہوا۔نیپولین کو دیکھ لو وہ کیسی خراب حالت میںمرا۔یہ لوگ بڑے بڑے دعووں کے ساتھ اٹھے تھے اور انہوں نے بظاہر کچھ کامیابی بھی حاصل کی مگر آخر ناکامی کے سوا ان کو کچھ ہاتھ نہ آیا۔پھر یہ بھی ایک غور کرنے والی بات ہے کہ یہ لوگ جن قوموںمیں پیدا ہوئے اور جن لوگوں کو اپنے ساتھ لے کر ترقی کی طرف بڑھے وہ پہلے ہی قربانی کی روح اپنے اندر رکھنے والے تھے۔پہلے ہی ان کے اندریہ جوش پایا جاتا تھا کہ ہم دنیاپر حکومت کریں اور لوگوںپر غلبہ و اقتدار حاصل کریں۔نیپولین نے بے شک ترقی حاصل کی مگر وہ ایک ترقی یافتہ قوم کو اپنے ساتھ لے کر آگے بڑھا۔اسی طرح ہٹلرنے بے شک فتوحات حاصل کیںمگر ہٹلر ابھی پیدا بھی نہیں ہوا تھا کہ جرمن قوم دنیا میںسب سے زیادہ منظم اور سب سے زیادہ قربانی کی روح اپنے اندر رکھنے والی سمجھی جاتی تھی لیکن عرب کیا تھا؟ محمد رسول اللہ صلی اللہ علیہ وسلم
کے ہاتھ میں گوبر دیا گیا جسے بیس سال کے قلیل عرصہ میں انہوں نے سونا بنا دیا اور خالی سونا نہیں بلکہ صاف اور کھرا سونا۔اخلاق ان کے درست ہو گئے، تمدن ان کا درست ہو گیا، علمی حالت ان کی درست ہو گئی، رعب اور دبدبہ ان کا بڑھ گیا، عزت ان کی بڑھی، رتبہ اور شان و شوکت ان کو حاصل ہوا۔غرض کوئی پہلو ایسا نہ تھا جو نامکمل رہ گیا ہو۔کوئی شعبہ ایسا نہ تھا جس میں اُن کو کمال تک نہ پہنچا دیا گیا ہو۔ہر قسم کی اصلاح خواہ وہ اخلاقی ہو یا دینی، مذہبی ہو یا عائلی، اقتصادی ہو یا سیاسی، محمد رسول اللہ صلی اللہ علیہ وسلم نے سر انجام دی۔پس فرمایا وَلَسَوْفَ يُعْطِيْكَ رَبُّكَ فَتَرْضٰى۔گھبرائو نہیں ہم جلدی ہی اس عظیم الشان کام سے تمہیں فارغ کر دیں گے۔بے شک ہم نے ایک بہت بڑے کام کی تم پر ذمہ داری ڈالی ہے مگر ہم جانتے ہیں کہ تمہاری اصل خوشی ہمارے پاس آنے میں ہے اس لئے ہم تم سے وعدہ کرتے ہیں کہ ہم تجھے جلد ہی ان مقاصد میںکامیاب کر دیںگے۔چنانچہ اتنے تھوڑے عرصہ میںاتنا بڑا کام دنیا میں اور کسی نے بھی نہیں کیا۔رسول کریم صلی اللہ علیہ وسلم کی عمر وفات کے وقت شمسی لحاظ سے صرف باسٹھ سال تھی اتنی قلیل عمر میں کتنا عظیم الشان کام آپؐنے کیا کہ اسے دیکھ کر حیرت آتی ہے۔وَ لَسَوْفَ يُعْطِيْكَ رَبُّكَ فَتَرْضٰى میں آنحضرت صلعم کی طرف کامل شریعت نازل کئے جانے کی طرف اشارہ دوسرے معنے اس کے یہ ہیں کہ کامل شریعت تجھ پر نازل ہو جائے گی کیونکہ انسان کمال پر راضی ہوتا ہے فرماتا ہے وَلَسَوْفَ يُعْطِيْكَ رَبُّكَ فَتَرْضٰى۔ہم تجھے اتنا دیں گے کہ توآپ ہی آپ کہہ دے گا کہ اب ترقی کی گنجائش نہیں۔جب آخری شریعت آپؐکو دے دی گئی توا س کے بعد آپؐنے اور کیا مانگنا تھا۔بے شک جہاں تک الٰہی قرب اور اس کے مدارج کا سوال ہے وہ غیر محدود ہیں اور کبھی کوئی مقام ایسا نہیںآسکتا جب انسان یہ کہے کہ اب مجھے کسی اور درجہ قرب کی احتیاج باقی نہیں رہی مگر جہاں تک شریعت کا سوال ہے آخری اور کامل شریعت کے بعد اور کون سی بات باقی رہ سکتی ہے پس فرماتا ہے ہم تجھے وہ کچھ دیں گے کہ تو بھی یہ کہہ دے گا کہ اس سے اوپر اور کوئی درجہ نہیں۔چنانچہ جہاں تک انسانی تعلق ہے اس کے لحاظ سے آخری شریعت سے بڑھ کر اور کیا ہو سکتا ہے؟ پس اس کے دوسرے معنے یہ ہیں کہ ہم شریعت کاملہ تجھے عطا کریں گے۔اسلام کے بچاؤ کے لئے مستقل نظام قائم کئے جانے کا وعدہ تیسرے معنے اس کے یہ ہیں کہ آئندہ اسلام کے بچائو کے لئے ایک مستقل نظام قائم کر دیا جائے گا۔درحقیقت پہلی خواہش انسان کے دل میں یہ ہوتی ہے کہ میںاپنا کام جلد سے جلد پورا کر لوں۔دوسری خواہش یہ ہوتی ہے کہ جو کام میرے سپرد ہو وہ اپنی ذات میں کامل ہو۔تیسری خواہش یہ ہوتی ہے کہ وہ کام مٹے نہیں۔وَلَسَوْفَ يُعْطِيْكَ رَبُّكَ فَتَرْضٰى میں یہ تینوں باتیں اللہ تعالیٰ نے
بیان کر دیں کہ ہم تجھے اس کام سے جلد سے جلد فارغ کر دیں گے، ہم کامل شریعت تجھے عطا کریں گے اور پھر ایک زائد وعدہ تجھ سے یہ کرتے ہیں کہ جب بھی اس کام میںکوئی نقص پیدا ہو گا اللہ تعالیٰ تیری روحانی اولا د میں سے کسی کو اصلاح خلق کے لئے کھڑا کر دے گا اور اسلام کو تباہ نہ ہونے دے گا۔اولاد پیدا ہوتی ہے تو لوگ کتنے خوش ہوتے ہیں محض اس لئے کہ وہ ان کے نام کو زندہ رکھے گی لوگوں کی یہ خوشی تو بعض دفعہ بالکل بے حقیقت ہوتی ہے اور جس اولاد کی پیدائش پر وہ خوش ہوتے ہیں وہی ان کو ذلیل کرنے والی بن جاتی ہے مگر فرماتا ہے تیرے لئے یہ حقیقی خوشی کی بات ہے کہ جب بھی کسی روحانی بیٹے کی تجھے ضرورت محسوس ہو گی ہم اسے پیدا کر دیں گے جو تیرے کام کو پھر دنیا میںزندہ کر دے گا۔اَلَمْ يَجِدْكَ يَتِيْمًا فَاٰوٰى۰۰۷ کیا اس نے تجھے یتیم پا کر (اپنے زیر سایہ ) جگہ نہیں دی۔تفسیر۔فرماتا ہے تیرے مستقبل کے متعلق لوگوں کے دلوں میں شبہ پیدا ہو سکتا ہے کہ یہ تو محض باتیں ہوئیں ہم کس طرح مان سکتے ہیں کہ ایسا ہو جائے گا۔یوں تو ہر شخص دوسروں کو تسلی دے سکتا ہے اور کہہ سکتا ہے کہ یوںہو جائے گا، ووںہو جائے گا۔اس قسم کی باتوں سے کیا بن سکتا ہے۔اللہ تعالیٰ فرماتا ہے وہ لوگ جن کے دلوں میں یہ شبہ پایا جاتا ہے وہ تیرا ماضی دیکھ لیںتُو بھی دیکھ اور دنیا بھی دیکھے کہ کیا ہم نے تجھے یتیم نہیں پایا تھا اور کیا ہر موقع پر ایسا نہیںہوا کہ ہم نے تجھے پناہ دی اور تجھے ہر قسم کے نقصان سے بچایا۔اَلَمْ يَجِدْكَ يَتِيْمًا فَاٰوٰى کی صداقت کا ثبوت رسول کریم صلی اللہ علیہ وسلم ابھی رحم مادر میںہی تھے کہ آپؐکے والد فوت ہو گئے۔جب آپؐکی پیدائش ہوئی تو اللہ تعالیٰ نے آپ کے دادا عبدالمطلب کے دل میں آپ کی غیر معمولی طور پر محبت پیدا کر دی۔عام طور پر ایسے حالات میںانسان کی توجہ پوتوں کی بجائے اپنے دوسرے بیٹوں کی طرف ہوتی ہے مگر عبدالمطلب کی حالت یہ تھی کہ وہ اپنے بیٹوں کو تو ڈانٹ ڈپٹ لیتے مگر رسول کریم صلی اللہ علیہ وسلم سے ہمیشہ محبت اور پیار رکھتے حالانکہ ان کے لڑکے جوان تھے اور وہ ان کی خدمت بھی کرتے رہتے تھے مگر اس کے باوجود اللہ تعالیٰ نے ان کے دل میں رسول کریم صلی اللہ علیہ وسلم کی ایسی محبت پیدا کر دی کہ آپؐاگر تھوڑی دیر کے لئے بھی ان کی نظروں سے اوجھل ہو جاتے تو وہ بے چین ہو جاتے تھے۔آپؐکو ہر وقت گودی میں اٹھائے رکھتے
تھے۔آپؐکی محبت میں اشعار پڑھتے رہتے تھے اور اپنے بچوں کو ڈانتے رہتے تھے کہ اس کی قدر کیوں نہیں کرتے پھر عربوں میں رواج تھا کہ وہ بچے پالنے کے لئے دائیاں رکھا کرتے تھے آپؐکی والدہ نے چاہا کہ انہیں بھی کوئی دائی مل جائے مگر غربت کی وجہ سے کوئی دائی نہ ملی۔آخر اللہ تعالیٰ نے حلیمہ کو اس عظیم الشان خدمت کے لئے منتخب فرمایا۔حلیمہ وہ تھی جسے ہر دروازہ سے محض اس لئے رد کیا گیا تھا کہ وہ ایک غریب عورت تھی اگر اسے بچہ دیا گیا تو وہ اسے کھلائے گی کہاںسے؟ گویا وہ جس کے گھر میں اللہ تعالیٰ نے رسول کریم صلی اللہ علیہ وسلم کی پرورش کا سامان کرنا تھا اس کے لئے اللہ تعالیٰ نے مکہ کے تمام بچے حرام کر دیئے۔وہ جس گھر میںبھی گئی اسے یہی کہا گیا کہ ہم تمہیں اپنا بچہ نہیںدے سکتے، تم بچہ لے گئیں تو اسے کھلائو گی کہاں سے۔گویا سارے مکہ میں اس روز ایک بچہ ایسا تھا جسے کوئی دایہ نہ ملی اور ایک دایہ ایسی تھی جسے کوئی بچہ نہ ملا۔جب شام ہو گئی اور ادھر حلیمہ کسی بچہ کے ملنے سے مایوس ہو گئی اور رسول کریم صلی اللہ علیہ وسلم کی والدہ کسی دایہ کے ملنے سے مایوس ہو گئیں تو اللہ تعالیٰ نے حلیمہ کے دل میں ڈالا کہ گو یہ بچہ غریب گھرانے کا ہے اور اس کا والد فوت شدہ ہے مگر میرا خالی جانا دوسرے لوگوں کی ہنسی کا موجب ہو گا چلو میں اسی کو لے چلوں چنانچہ وہ آئی اور رسول کریم صلی اللہ علیہ وسلم کو لے گئی۔اس کے بعد اللہ تعالیٰ نے اس کے دل میں رسول کریم صلی اللہ علیہ وسلم کی ایسی محبت ڈال دی کہ آپؐکا دم بھر کے لئے آنکھوں سے اوجھل ہونا اس پر سخت گراں گزرتا اور وہ آپؐکی محبت میںبے تاب ہو جاتی۔تاریخوں میںآتا ہے کہ آپؐذرا بھی اس کی آنکھ سے اوجھل ہو تے تو وہ اپنے بچوں کو ڈانٹنے لگ جاتی کہ تم اسے چھوڑ کر کیوں آگئے ہو اور پھر آپؐکو لانے کے لئے دوڑ پڑتی(السیرۃ الـحلبیۃ باب وفاۃ والدۃ)۔غرض باپ کے بعد آپؐکو پرورش کے لئے حلیمہ جیسی دائی ملی، عبدالمطلب جیسا محبت کرنے والا دادا ملااور پھر جب عبد المطلب فوت ہو گئے تو اللہ تعالیٰ نے آپؐکے چچا ابو طالب کے دل میں آپؐکی محبت ڈال دی۔ابو طالب کو بھی آپؐسے بےانتہا محبت تھی ایسی محبت کہ میرے نزدیک دنیا میںبہت کم چچا ہوں گے جنہوں نے اپنے کسی بھتیجے کو اس محبت کے ساتھ پالا ہو۔جوان ہوئے تو اللہ تعالیٰ نے ایک مالدار عورت کے دل میں آپؐکی محبت پیدا کر دی اور خود اس کے دل میںیہ خواہش پیدا ہوئی کہ میں ان سے شادی کر لوں کیونکہ یہ بہت ہی بلند اخلاق کے مالک ہیں۔اس طرح اللہ تعالیٰ نے آپؐکے لئے گھربار کا سامان پیدا کر دیا۔پھر یتیم کے لئے ساتھیوں کی ضرورت ہوتی ہے۔ماں باپ زندہ ہوتے ہیںتو ان کی خوشنودی کے لئے لوگ دوستیاں اختیار کرتے ہیں لیکن جب مر جاتے ہیں تو ان کے تمام تعلقات ٹوٹ جاتے ہیں اور دوستی کا خیال تک بھی ان کے دل میں کبھی نہیں آتا۔رسول کریم صلی اللہ علیہ وسلم کے والدین چونکہ فوت ہو چکے تھے اس لئے طبعی طور پر آپؐکو بھی ساتھیوں اور دوستوں کی
ضرورت محسوس ہوتی تھی اللہ تعالیٰ نے ابوبکرؓ اور حکیم بن حزام جیسے دوست آپؐکو عطا فرما دیئے۔ابو بکرؓ تو شروع میںہی اسلام لے آئے مگر حکیم بن حزام مدتوں کافر رہا مگر کفرکی حالت میںبھی جب لوگ آپؐکی مخالفت کرتے تو وہ ان کے مقابلہ کے لئے کھڑا ہو جاتا۔ایک دفعہ وہ باہر تجارت کے لئے گیا تو وہاں اس کو ایک خاص قسم کا کپڑا ملا وہ کپڑا اسے بہت پسند آیا اور اس نے دل میںکہا کہ اس کپڑے کو پہننے کے قابل میرے دوست محمد (صلی اللہ علیہ وسلم ) سے زیادہ کوئی اہل نہیں۔چنانچہ وہ کپڑا لے کر مدینہ پہنچا اور رسول کریم صلی اللہ علیہ وسلم سے عرض کیا کہ مجھے یہ کپڑا بڑا پسند آیاتھا میںآپ کے لئے لے آیا ہوں کیونکہ آپ کے سوا یہ کسی کو نہیںسج سکتا۔رسول کریم صلی اللہ علیہ وسلم نے فرمایا کہ میںکافر کا تحفہ قبول نہیں کر سکتا ہاں اگر چاہو تو مجھ سے قیمت لے لو۔اس نے کہا اچھا اگر آپؐتحفہ قبول نہیںفرماتے تو قیمت ہی دے دیں کیونکہ میری خواہش یہی ہے کہ آپؐاس کپڑے کو پہنیں ( جمھرۃ نسب قریش وَ اَخْبَارِھَا تَـحْتَ حکیم بن حزام بن خویلد) یہ کتنا عشق ہے جو ایک کافر کے دل میں آپؐکے متعلق تھا اس نے اپنے مذہب کو نہیں چھوڑا مگر کفر کی حالت میں بھی آپؐسے اس قدر پیار تھا کہ سب سے اچھی چیز جو ملی اس کا مستحق آپؐکو قرار دیا اور تیرہ منزلیںمارتا ہوا مکہ سے مدینہ پہنچا تا آپؐکی خدمت میں وہ تحفہ پیش کر ے۔خدا تعالیٰ نے اس کو کافر رکھا اور دیر تک رکھا۔شاید یہ ثابت کرنے کے لئے کہ محمد رسول اللہ صلی اللہ علیہ وسلم کے اخلاق کی وجہ سے لوگ آپؐسے محبت کرتے تھے کسی اور وجہ سے نہیں۔پھر غلاموں میں سے زیدؓ اور رشتہ داروں میں سے علیؓ۔غرض اللہ تعالیٰ نے آپؐکو ایسے ساتھی دیئے جو کسی یتیم کو ملنے ناممکن ہوتے ہیں۔وَ وَجَدَكَ ضَآلًّا فَهَدٰى ۪۰۰۸ اور (دیکھ تو کہ جب) اس نے تجھے (اپنی قوم کی اصلاح کی فکر میں) سرگردان پایا تو صحیح راستہ بتا دیا۔حلّ لُغات۔ضَآلًّا ضَآلًّا : ضَلَّ سے اسم فاعل ہے اور ضَلَّ الرَّجُلُ کے معنے ہوتے ہیں۔ضِدُّ اِھْتَدٰی اَیْ جَارَ عَنْ دِیْنٍ اَوْ حَقٍّ اَوْطَرِیْقٍ۔وہ دین یا سچائی کے راستہ کو چھوڑ کر اِدھر اُدھر چلا گیا یا اصل راستہ سے اِدھر اُدھر ہو گیا نیز ضَلَّ فُلَانٌ الطَّرِیْقَ وَعَنِ الطَّرِیْقِ کے معنے ہیں لَمْ یَـھْتَدِ اِلَیْہِ۔اُسے راستہ کا پتہ نہ لگا وَکَذَاالدَّارَ وَالْمَنْـزِلَ وَکُلَّ شَیْءٍ مُّقِیْمٍ لَّا یُـھْتَدٰی لَہٗ۔اسی طرح ہر وہ چیز جس کا پتہ نہ لگے یا جس کی طرف جانے کا راستہ نہ ملے اس پر بھی اس لفظ کا اطلاق کیا جاتا ہے(اقرب)۔ایک ہوتا ہے راستہ بھول جانا اور گمراہ ہو جانا۔
اور ایک ہوتا ہے راستے کا علم نہ ہونا۔یہ دو الگ الگ مفہوم ہیں اور یہ دونوں معنے ضَلَّ میں پائے جاتے ہیں اور ضَلَّ فُلَانٌ اَلْفَرَسَ وَ الْبَعِیْرَ کے معنے ہوتے ہیں ذَھَبَا عَنْہُ گھوڑا یا اونٹ کھویا گیا اور ہاتھ سے جاتا رہا ضَلَّ عَنِّیْ کَذَا کہتے ہیں تو اس کے معنے ہوتے ہیں ضَاعَ۔وہ چیز ضائع ہو گئی۔اور ضَلَّ الرَّجُلُ کے معنے ہوتے ہیں مَاتَ وَصَارَ تُرَابًا وَعِظَامًا وہ مر گیا اور مر کے مٹی ہو گیا۔ضَلَّ الْمَآءُ فِی اللَّبَنِ کے معنے ہوتے ہیں خَفِیَ وَغَابَ۔دودھ میں پانی غائب ہو گیا (اقرب) ضَلَّ کے معنے کسی کام میںمنہمک ہو جانے کے بھی ہوتے ہیں جیسے قرآن کریم میں آتا ہے ضَلَّ سَعْيُهُمْ فِي الْحَيٰوةِ الدُّنْيَا (الکھف :۱۰۵) ان کی تمام تر کوششیں دنیوی زندگی کے کاموں میں ہی صرف ہو گئیں اسی طرح ضَلَالٌ کے ایک معنے محبت شدیدہ کے بھی ہوتے ہیں در اصل یہ معنی بھی ضَلَّ سَعْيُهُمْ والے معنوں سے ملتے جلتے ہیں کیونکہ محبت میں بھی انسان کامل طور پر ایک طرف متوجہ ہو جاتا ہے۔مفردات والے لکھتے ہیں یہ جو قرآن کریم میں آتا ہے کہ حضرت یعقوب علیہ السلام کی نسبت ان کے بیٹوں نے کہا اِنَّ اَبَانَا لَفِيْ ضَلٰلٍ مُّبِيْنِ( یوسف:۹ ) ہمارا باپ کھلی کھلی ضلال میں مبتلا ہے۔اس میں ضلال کے معنے گمراہی کے نہیں بلکہ اِشَارَۃً اِلٰی شَغَفِہٖ بِیُوْسُفَ وَشَوْقِہٖ اِلَیْہِ۔اس میں ان کی اس محبت اور شوق ملاقات کی طرف اشارہ ہے جو وہ حضرت یوسف علیہ السلام کے متعلق اپنے دل میں رکھتے تھے۔ضلال کے معنے بے انتہا محبت کے گویا ضلال کے ایک معنے کمال درجہ کی محبت اور انتہا درجہ کے شوق کے بھی ہیں اسی طرح قرآن کریم میںجو آتا ہے قَدْ شَغَفَهَا حُبًّا اِنَّا لَنَرٰىهَا فِيْ ضَلٰلٍ مُّبِيْنٍ (یوسف:۳۱ ) اس میں بھی ضلال کے معنے بے انتہا محبت کے ہیں غرض ضلال کا لفظ جہاں اور معنوںکے لئے استعمال ہوتا ہے وہاں اس کے ایک معنے انتہا درجہ کی محبت کے بھی ہوتے ہیں۔(مفردات) تفسیر۔حل لغات میں جو مختلف معانی بیان کئے جا چکے ہیں ان کے لحاظ سے وَ وَجَدَكَ ضَآلًّا فَهَدٰى کے بھی مختلف معنے ہو جائیں گے۔وَجَدَكَ ضَآلًّا فَهَدٰى کے چار معنے پہلے معنے تو اس آیت کے یہ ہیں کہ تمہیں ہمارا راستہ معلوم نہ تھا، تم شریعت سے بے خبر تھے، تمہیں معلوم نہیں تھا کہ اللہ تعالیٰ تک پہنچنے کے کیا ذرائع ہیں۔ایسی حالت میںہم نے اپنی شریعت تم پر نازل کی اور تمہیں اپنی طرف آنے کا راستہ دکھادیا۔دنیا کا کوئی شخص اس امر سے انکار نہیں کر سکتا کہ رسول کریم صلی اللہ علیہ وسلم ایک ایسے ملک میں پیدا ہوئے تھے جس میں کوئی شریعت نہیں تھی مگر اس کے باوجود آپؐدن رات خدا تعالیٰ کی طرف متوجہ رہتے تھے اور اس کے قرب اور وصال کے حصول کے متمنی تھے اُس ملک میں
عیسائی بھی موجود تھے اور یہودی بھی موجود تھے اور یہ دونوں قومیں وہ ہیں جن کے پاس خدا تعالیٰ کا کلام موجود تھا مگر باوجود اس کے کہ خدا تعالیٰ کا کلام ان کے پاس تھا انہیں خدا تعالیٰ کی طرف کوئی توجہ نہیں تھی اور وہ اس سے کلی بیگانگت کی حالت میں اپنی زندگی کے ایام بسر کر رہے تھے لیکن محمد رسول اللہ صلی اللہ علیہ وسلم کہ یہ حالت تھی کہ آپ کے پاس خدا تعالیٰ کا کوئی کلام نہیں تھا مگر پھر بھی آپ خدا تعالیٰ کی طرف متوجہ تھے۔پس یہ امر محمد رسول اللہ صلی اللہ علیہ وسلم کے درجہ کی بلندی اور آپؐکی عظمت کا ایک بیّن ثبوت ہے کہ خدا تعالیٰ کا کلام اپنے پاس رکھنے والے تو خدا تعالیٰ سے دور ہو گئے مگر جس کے پاس خدا تعالیٰ کا کوئی کلام نہیں تھا وہ خد ا تعالیٰ کے قریب ہوتا چلا گیا۔جب خدا تعالیٰ نے دیکھاکہ یہ وہ شخص ہے جو ہماری طرف آنا چاہتا ہے مگر اسے ہمارے قرب اور وصال کے راستوں کا علم نہیں ہے تو اس نے آپ پر شریعت نازل کر دی اور اس طرح تمام راستوں کو آپؐپرمنکشف کر دیا۔آپؐکا پہلے اس کوچہ سے ناواقف ہونا ہر گز قابل اعتراض امر نہیں۔ہر صاحب شریعت نبی پر جب خدا تعالیٰ کی وحی نازل ہوتی ہے تب اسے شرعی راستہ کا علم ہوتا ہے اس سے پہلے وہ اُس راستہ سے واقف نہیں ہوتا۔یہی بات اس جگہ بیان کی گئی ہے کہ اے محمد رسول اللہ صلی اللہ علیہ وسلم تجھے ہمارے راستے کا علم نہیں تھا پھر ہم نے اپنے فضل سے تجھے وہ راستہ دکھا دیا جس کی جستجو تیرے دل میں پائی جاتی تھی۔وَجَدَكَ ضَآلًّا فَهَدٰى کے دوسرے معنے ضَلَّ کے ایک معنے خَفِیَ وَ غَابَ کے بھی بتائے جا چکے ہیں اُن معنوں کے لحاظ سے اس آیت میں خدا تعالیٰ اپنی قدرت اور مہربانی کا ثبوت دنیا کے سامنے پیش کرتا ہے اور فرماتا ہے اے محمد صلی اللہ علیہ وسلم ایک دن ضُـحٰی آئے گی۔بڑی بڑی ترقیات اسلام اور مسلمانوں کو حاصل ہوں گی اور لوگ تیرے متعلق کہیں گے واہ وا کیا خوب آدمی تھا۔کتنے بڑے کمالات اپنے اندر رکھتا تھا، کتنے بڑے فضائل اور محاسن کا مالک تھا۔کس طرح اس نے دنیا میں ایک عظیم الشان تغیّر پیدا کر دیا اور بھولی بھٹکی مخلوق کو خدا تعالیٰ کے آستانہ پر لاڈالا۔مگر ہم ان سے کہتے ہیں وہ غور کریں اور سوچیںکہ آخر تجھے کس نے چنا۔کس نے دنیاکی ہدایت کے لئے تیرا انتخاب کیا، کون تھا جو تجھے گوشۂ گمنامی سے دنیا کے سامنے نکال کر لایا۔اے محمد رسول اللہ صلی اللہ علیہ وسلم یہ ہماری نظر ہی تھی جس نے تجھے منتخب کیا۔ہم نے دیکھا کہ ایک قیمتی موتی لوگوں کی نگاہوں سے اوجھل پڑا ہے لوگ اس کی قدر وقیمت سے نا آشنا ہیں اور وہ نہیں جانتے کہ وہ کس قدر آب و تاب رکھنے والا ہے۔ہم نے کان میں سے اس موتی کو نکالا اور اُسے دنیا کے سامنے لا رکھا۔ہم نے کفرستان میں ایک ہیرا پڑا ہوا دیکھا ایسا ہیرا جس کا کوئی ثانی نہیں تھا ہم نے کفرستان میں سے اس ہیرے کو اٹھایا اور انسانیت کے تاج میں لگا لیا۔آج تیری چمک کو دیکھ کر دنیا کی