سُوْرَۃُ التِّیْنِ
تفسیر کبیر (جلد ۱۳)
سُوْرَۃُ التِّیْنِ مَکِّیَّۃٌ سورۂ تین۔یہ سورۃ مکی ہے۔وَھِیَ ثَـمَانِیَ اٰیَاتٍ دُوْنَ الْبَسْمَلَۃِ وَ فِیْـھَا رَکُوْعٌ وَّاحِدٌ اور اس کی بسم اللہ کے سوا آٹھ آیات ہیں اور ایک رکوع ہے۔سورۃ التین مکی ہے جمہور کے نزدیک یہ سورۃ مکی ہے۔قرطبی نے حضرت ابن عباسؓ سے روایت نقل کی ہے کہ یہ مدنی ہے۔قتادہ کا بھی قول نقل کیا گیا ہے کہ یہ مدنی ہے۔مگر اس کے مقابل میں ابن ا لفریس، نحاس، ابن مردویہ اور بیہقی نے ابن عباسؓ سے ہی روایت کی ہے کہ اُنْزِلَتْ سُوْرَۃُ التِّیْنِ بِـمَکَّۃَ یعنی سورۂ تین مکہ میں نازل ہوئی تھی (فتح البیان زیر سورۃ التین و تفسیر قرطبی زیر سورۃ التین نیز روح المعانی زیر سورۃ التین )۔یہ دوسری روایت قرطبی کی روایت کو رد کرتی ہے اور اس سے ثابت ہوتا ہے کہ ابن عباس ؓکی طرف سے بھی یہی روایت ہے کہ یہ سورۃ مکی ہے۔ابن مردویہ نے عبداللہ بن زبیر ؓ سے بھی اس قسم کی روایت نقل کی ہے۔گویا ابن عباسؓ کے علاوہ عبداللہ بن زبیرؓ بھی اس سورۃ کو مکی قرار دیتے ہیں۔بقیہ علماء نے بھی باوجود اس روایت کے جو قرطبی نے نقل کی ہے اسے مکی ہی قرار دیا ہے۔بخاری، مسلم،ابو دائود اور ابن ماجہ وغیرہ میں اور اسی طرح بعض اور کتب میں بھی براء بن عازب سے روایت نقل کی گئی ہے کہ کَانَ النَّبِیُّ صلی اللہ علیہ وسلّم فِیْ سَفَرٍ فَصَلَّی الْعِشَاءَ فَقَرَأَ فِیْ اِحْدَی الرَّکْعَتَیْنِ بِالتِّیْنِ وَالزَّیْتُوْنِ فَـمَا سَـمِعْتُ اَحَدًا اَحْسَنَ صَوْتًا وَّ لَا قِرْأَ ۃً مِّنْہُ یعنی ایک دفعہ رسول کریم صلی اللہ علیہ وسلم سفر میں جا رہے تھے کہ آپ نے عشاء کی نماز پڑھائی اور اس کی پہلی دو رکعتوں میں سے ایک میں آپ نے سورۂ تین پڑھی۔میں نے کسی شخص کو اس سے زیادہ خوبصورت آواز اور اچھی قرأت کے ساتھ قرآن کریم کو پڑھتے نہیں سنا جیسے رسول کریم صلی اللہ علیہ وسلم کو میں نے پڑھتے سنا۔ایک دوسری روایت جو انہی کی ہے اس میں بھی یہ واقعہ بیان کیا گیا ہے مگر ابن الخطیب میں براء بن عازب کی جو روایت آتی ہے اس میں عشاء کی بجائے مغرب کا لفظ ہے۔نولڈکے جرمن مستشرق اسے سورۃ البروج کے ساتھ کی نازل شدہ بتاتا ہے۔یعنی یہ بھی ابتدائی زمانہ کی مکی سورۃ
ہے۔ویری بھی اس کی تائید کرتا ہے اور کہتا ہے کہ اس کا سٹائل مکی ہے۔(A Comprehensive Commentary on the Holy Qur’an by Wherry vol:4 Page257) میں نے کئی دفعہ بتایا ہے کہ یہ اس کی زبردستی ہے۔وہ عربی بھی اچھی طرح نہیں جانتا سٹائل کو کہاں پہچان سکتا ہے۔اسی طرح وہ کہتا ہے کہ اس سورۃ میں هٰذَا الْبَلَدِ الْاَمِيْنِ کے جو الفاظ آتے ہیں یہ بھی بتاتے ہیں کہ یہ سورۃ مکی ہے۔کیوں کہ اس میں هٰذَا کا لفظ استعمال کیا گیا ہے اور کہا گیا ہے کہ ’’یہ شہر مکہ‘‘ جس سے صاف پتہ لگتا ہے کہ یہ سورۃ مکی ہے۔ویری کی یہ دلیل وزنی ضرور ہے مگر قطعی نہیں۔ہم اتنے حصہ میں اس سے متفق ہیں کہ یہ مکی ہے۔مگر اس نے اپنے بُغض کی وجہ سے یہ بھی لکھاہے کہ بعض مسلمان مصنف ان حدیثوںکی اندھا دھندتقلید میں جو قرآن کریم کو واضح کرنے کے لئے بنائی گئی ہیں اسے مدنی قرار دیتے ہیں نہایت ناپسندیدہ فعل ہے۔یہ فقرہ اس کے بُغض پر دلالت کرتا ہے۔کیوں کہ جمہور مسلمان تو اسے مکی قرار دیتے ہیں اور ہمارا اپنا فائدہ بھی اگر مسلمان فائدہ اٹھانے کے لئے حدیثیں بناتے ہیں تو اسے مکی قرار دینے میں ہی ہے۔پس جبکہ جمہور بھی اسے مکی قرار دیتے ہیں مسلمان مصنفوں پر اس قدر رکیک الزام اور خصوصاً احادیث پر نہایت قابل شرم امر ہے۔میں بتا چکا ہوں کہ روائتیں اسے مکی قرار دے رہی ہیں صرف قرطبی نے ایک روایت نقل کی ہے جس میں اسے مدنی قرار دیا ہے مگر ممکن ہے کہ وہاں کتابت کی غلطی کی وجہ سے مکی کی بجائے مدنی لکھا گیا ہواور اگر وہ کتابت کی غلطی نہیں تب بھی قرطبی اصل راوی نہیں بلکہ وہ دوسروں کی روائتوں کو نقل کرنے والا ہےاور جیسا کہ بتایا جا چکا ہے اصل راوی سب اس بات پر متفق ہیں کہ یہ سورۃ مدنی نہیں بلکہ مکی ہے۔لیکن ویری کا اسے سٹائل کی وجہ سے مکی قرار دینا محض دھینگا مشتی ہے۔اگر پادری ویری کے سامنے ہی قرآن کریم کھول کر رکھ دیا جائے اور ان سے پوچھا جائے کہ اگر تم سٹائل کو پہچاننے کا ملکہ اپنے اندر رکھتے ہو تو بتائو اس میں سے مکی آیات کون سی ہیں اور مدنی آیات کون سی تو وہ بیسیوں غلطیاں کر جائیں گے یہاں چونکہ تمام روائتیں اس سورۃ کو مکی قرار دے رہی تھیں انہوں نے سمجھا کہ میں اس کے مکی ہونے کا ثبوت اس سورۃ کے سٹائل کو قرار دے کر ایک جدت پیدا کر دوںحالانکہ سٹائل کو پہچاننا کوئی آسان کام نہیں ہوتا۔حقیقت یہ ہے کہ اس قسم کا انسان جورات اور دن غور کرتا رہا ہو اورجس نے باریک طور پر تدبر اور دماغی کاوش سے کام لیاہو اُس کے لئے بھی سٹائل کو الگ طور پر پہچاننا مشکل ہوتا ہے اور باقی لوگوں کے لئے تو اس قدر مشکل مرحلہ ہے کہ میں سمجھتا ہوں کہ لاکھوں میں سے کسی ایک کے لئے یہ بات ممکن ہوتو ہوباقی کسی کے لئے سٹائل کو پہچاننا ممکن نہیں ہے۔یہی بات دیکھ لو سب مسلمان قرآن جانتے اور اسے پڑھتے ہیں مگر پھر کئی مقرر مسلمان بعض ضعیف حدیثیں پیش کر کے کہہ دیتے ہیںکہ قرآن کریم میں ایسا لکھا ہے حالانکہ وہ ویری سے زیادہ قرآن جانتے ہیں۔
مو لوی محمد احسن صا حب امروہی میں یہ مرض تھا کہ حضرت مسیح مو عودعلیہ الصلوٰ ۃ والسلام جب بھی کوئی بات کرتے وہ درمیان میں جلدی جلدی بو لنا شروع کر د یتے تھے اور واہ وا! اور سبحان اللہ کہنے لگ جاتے مثلاً حضرت مسیح موعودعلیہ الصلوٰ ۃ والسلام جب کسی گفتگو میں فر ما تے کہ قر آ ن کریم نے فلا ں بات نہایت لطیف طور پر بیان کی ہے تو وہ کہنا شروع کر دیتے تھے کہ سبحا ن اللہ بڑی لطیف بات ہے کس کی طاقت ہے کہ ایسی بات کہہ سکے۔ایک دفعہ حضرت مسیح مو عودعلیہ الصلوٰ ۃ والسلام سیر کے لیے جا رہے تھے میں بھی ساتھ تھا کہ حضرت مسیح مو عودعلیہ الصلوٰۃ والسلام نے فرمایا مجھے آج ایک الہام ہوا ہے جس سے معلوم ہو سکتا ہے کہ خدا تعالیٰ کے کلام اور بندے کے کلام میں کتنا بڑا فرق ہوتا ہے۔جب حضرت مسیح مو عودعلیہ الصلوٰ ۃ والسلام نے یہ بات بیان فرمائی تو مولوی محمداحسن صاحب نے جھٹ ہاتھ مارنے شروع کردئیے اور کہا حضور فرق ـ!خدا کے کلام اور بندہ کے کلام میں زمین اور آسمان کا فرق ہے حضور خدا کا کلام خدا کا کلام اور بندے کا کلام بندے کا کلام،بھلا ممکن ہے بندہ اپنے کلام میں خدا کا مقا بلہ کر سکے؟ یہ تو بالکل ناممکن ہے۔جب وہ ذرا خاموش ہوئے تو حضرت مسیح موعود علیہ الصلوٰۃ والسلام نے پھر بات شروع کی اور فرمایا دیکھو حریری عربی ادب کے لحا ظ سے کمال کو پہنچا ہوا تھا مگر الہام الٰہی میں جو باریکیاں ہوتی ہیں وہ اس کے کلام میں کہاں ہیں؟مولوی محمد احسن صاحب نے پھر کہنا شروع کردیا حضور حریری! بھلا حریری میں رکھا ہی کیا ہے؟ اس کی کیا طاقت ہے کہ وہ خدا کے کلام کا مقابلہ کرسکے۔خدا کا کلام جس شان اور عظمت کاحامل ہوتا ہے بھلا حریری کی طاقت ہے کہ اس جیسا کلام کہہ سکے۔اس کے بعد حضرت مسیح موعود علیہ الصلوٰۃ والسلام نے فرمایا مثلاً یہ فقرہ ہے ابھی وہ فقرہ مولوی محمد احسن صاحب نے سنا ہی تھا کہ انہوں نے جھٹ کہنا شروع کردیا۔حضور یہ بھی کوئی فقرہ ہے۔یہ بھی کوئی عربی ہے۔حریری کیا جانتا ہے کہ عربی کیا ہوتی ہے؟ حالانکہ وہ الہام تھا حریری کا فقرہ نہیں تھا۔حضرت مسیح موعود علیہ الصلوٰۃ والسلام نے فرمایا۔مولوی صاحب! سنیے تو سہی یہ حریری کا فقرہ نہیں یہ تو وہ الہام ہے جو مجھ پر خدا تعالیٰ کی طرف سے نازل ہوا ہے۔اب دیکھو مولوی محمد احسن صاحب مولوی آدمی تھے۔رات دن عربی کتابیں پڑھنے میں مشغول رہتے تھے اور اگر سٹائل کو پہچاننا ایسا ہی آسان کام ہوتا تو وہ فوراً پہچان لیتے کہ یہ انسانی کلام ہے یا خدائی کلام مگر پھر بھی وہ غلطی کرگئے اور انہوں نے الہام کو انسانی کلام سمجھ لیا۔اس میں کوئی شبہ نہیں کہ موانست اور مشابہت کی وجہ سے انسان بعض دفعہ اندازہ کرلیتا ہے کہ یہ مکی سورۃ ہے یا مدنی سورۃ ہے مگر یہ اندازہ دلیل نہیں بن جاتا۔مثلاً جہاں تک عربی الفاظ کا تعلق ہے جس طرح وہ الفاظ قرآن کریم میں استعمال ہوئے ہیں اسی طرح اور عربی کتب میں بھی استعمال ہوئے ہیں۔قرآن میں بھی رزق کا لفظ آتا ہے اور
دوسری عربی کتب میں بھی رزق کا لفظ آتا ہے۔قرآن میں بھی جہاد کا لفظ آتا ہے اور دوسری عربی کتب میں بھی جہاد کا لفظ آتا ہے۔قرآن میں بھی غَدًا کا لفظ آتا ہے اور دوسری عربی کتب میں بھی غَدًا کا لفظ آتا ہے مگر اس کے باوجود جس شان اور عظمت کے حامل قرآن کریم کے الفاظ ہیں اس شان اور عظمت کے پاسنگ بھی وہ الفاظ نہیں جو دوسری کتب میں پائے جاتے ہیں۔کیونکہ محض الفاظ کا اشتراک کوئی چیز نہیں بلکہ اصل چیز جو الہام الٰہی کی عظمت کو ظاہر کرتی ہے وہ ان الفاظ کا ایک ایسے ہار میں پرویا جانا ہے جس کی دنیا میں اور کہیں نظیر نہیں ملتی مگر پھر بھی قطعیت کے ساتھ صرف اجتہاد سے کوئی دعویٰ نہیں کرسکتا کہ وہ قرآنی اور غیرقرآنی عبارت کو بغیر قرآن کے حفظ کرنے یا کالحفظ کرنے کے قطعاً الگ الگ پہچان سکتا ہے۔پس ویری کا محض سٹائل کی بنا ء پر اس سورۃ کومکی قرار دینا اس کی خوش فہمی ہے۔اگر ان کے سامنے ہی قرآن کریم کی آیات الگ الگ رکھ دی جائیں اور ان سے پوچھا جائے کہ بتائو ان میں سے مکی کون سی ہیں اور مدنی کون سی تو وہ سینکڑوں غلطیوں کا ارتکاب کرجائیں گے۔وہ اگر سٹائل کو پہچانتے ہیں تو صرف اس نقطۂ نگاہ سے کہ اگر لمبی آیت ہوئی تو اس کے متعلق کہہ دیا یہ مدنی ہے اور اگر چھوٹی آیت ہوئی تو کہہ دیا یہ مکی ہے۔حالانکہ یہ امتیاز تو ایک بچہ بھی کرسکتا ہے۔پس ویری کا مسلمان مصنفوں اور مسلمانوں کی حدیثوں پر یہ حملہ نہایت ناواجب ہے اور اُس بُغض اور کینہ کا ثبوت ہے جو اس کے دل میں اسلام کے متعلق پایا جاتا ہے۔کیونکہ خود مسلمان راوی بھی اس کو مکی قرار دیتے ہیں بلکہ حقیقت یہ ہے کہ مسلمان راویوں کے کہنے کی وجہ سے ہی انہوں نے اس سورۃ کو مکی قرار دیا ہے ورنہ اگر وہ نہ بتاتے تو یہ خود کچھ بھی نہ کہہ سکتے کہ یہ سورۃ مکی ہے یا مدنی۔سورۃ تین کا پہلی سورتوں سے تعلق۔ترتیب اس سورۃ کا سورۃ الانشراح سے یہ تعلق ہے کہ سورئہ انشراح میں بتایا گیا تھا کہ محمد رسول اللہ صلی اللہ علیہ وسلم کا انجام اچھا ہوگا کیونکہ نیک انجام کے لئے جن امور کی ضرورت ہوتی ہے وہ آپ کوحاصل ہیں۔اب اس سورۃ میںیہ بتایا گیا ہے کہ پہلی اقوام کی شہادت اس امر کی تائید میں موجود ہے۔دنیا میں جب کوئی عقلی دلیل دیتاہے تو انسان کی پوری تسلی نہیں ہوتی وہ چاہتا ہے کہ مجھے کوئی نقلی دلیل بھی دی جائے تاکہ میں سمجھ سکوں کہ واقعہ میں اس کے مطابق کام ہو سکتا ہے یا نہیں۔سورۃ الانشراح میں عقلی دلیل دی گئی تھی اب اس سورۃ میںنقلی دلیل دی گئی ہے اور بتایا گیا ہے کہ ایسے ہی حالات میں اللہ تعالیٰ نے بعض پہلی قوموں کو بھی ترقی دی ہے اس سے تم نتیجہ نکال سکتے ہو کہ جس طرح آدمؑ اور نوحؑ اور موسٰی کے وقت میں ہوا کہ باوجود مخالف حالات کے محض روحانی سامانوں سے ان کو فتح حاصل ہوئی اب بھی ایسا ہی ہوگا۔اس کے بعد اِقْرَاْ بِاسْمِ رَبِّكَ الَّذِيْ خَلَقَ میں بھی اسی مضمون کو جاری رکھا گیا ہے۔
بِسْمِ اللّٰهِ الرَّحْمٰنِ الرَّحِيْمِ۰۰۱ ( میں) اللہ کا نام لے کر جو بے حد کرم کرنے والا (اور) بار بار رحم کرنے والا ہے (شروع کرتا ہوں)۔وَ التِّيْنِ وَ الزَّيْتُوْنِۙ۰۰۲وَ طُوْرِ سِيْنِيْنَۙ۰۰۳ (مجھے) قسم ہے انجیر کی اور زیتون کی۔اور سینین کے پہاڑ کی۔وَ هٰذَا الْبَلَدِ الْاَمِيْنِۙ۰۰۴ اور اس امن والے شہر کی۔تفسیر۔تین و زیتون کی تشریح پرانے مفسرین کے قلم سے فرماتا ہے قسم ہے ہم کو یاہم شہادت کے طور پر پیش کرتے ہیں انجیر کو بھی۔زیتون کو بھی۔طور سیناء کو بھی اور اس بلد الامین کو بھی۔فتح البیان میں لکھا ہے قَالَ اَکْثَرُ الْمُفَسِّـرِیْنَ اَلتِّیْنُ ھُوَالتِّیْنُ الَّذِیْ یَاْکُلُہُ النَّاسُ وَالزَّیْتُوْنُ ھُوَالَّذِیْ یَعْصِـرُوْنَ مِنْہُ الزَّیْتَ الَّذِیْ ہُوَ اِدَامُ غَالِبِ الْبُلْدَانِ وَ دُھْنُـھُمْ وَ یَدْخُلُ فِیْ کَثِیْـرٍ مِّنَ الْاَدْوِیَۃِ یعنی اکثر مفسرین کے نزدیک تین سے مراد وہی تین ہے جو لوگ کھاتے ہیں یعنی اس سورۃ میں جو وَ التِّيْنِ کا لفظ استعمال کیا گیاہے اس سے مراد وہی عام انجیر ہے جسے لوگ کھایا کرتے ہیں اور زیتون سے مراد بھی وہی زیتون ہے جسے لوگ کھاتے ہیں۔جو اکثر ملکوں میں بطور سالن اور چکنائی کے استعمال ہوتاہے اور بہت سی دوائوں میں بھی پڑتا ہے۔گویا یہاں اس سورۃ میں جو وَ التِّيْنِ وَ الزَّيْتُوْنِ فرمایا گیا ہے اس میں کوئی بات استعارۃً یا تمثیلاً بیان نہیں کی گئی بلکہ اس سے وہی انجیر مراد ہے جو کھانے کے کام آتی ہے اور وہی زیتون مراد ہے جس کا تیل لوگ اچاروں میں ڈالتے یا سالن کے طور پر استعمال کرتے ہیں۔ہمارے ہاں اچار میں تیل یا سرکہ ڈالتے ہیں مگر مغربی ممالک میںعموماً زیتون کا تیل استعمال کیاجاتا ہے۔وَ قَالَ الضَّحَّاکُ اَلْمَسْجِدُ الْاَقْصٰی اور ضحاک کہتے ہیں کہ تین سے مراد مسجد بیت الحرام اور زیتون سے مراد مسجد اقصیٰ ہے۔وَ قَالَ ابْنُ زَیْدٍ مَسْجِدُ بَیْتِ الْمُقَدَّسِ اور ابن زید کہتے ہیں کہ اس سے مراد بیت المقدس کی مسجد ہے۔وَقَالَ قَتَادَۃُ الْـجَبَلُ الَّذِیْ عَلَیْہِ بَیْتُ الْمُقَدَّسِ اور قتادہ کہتے ہیں اس سے مراد وہ پہاڑ ہے جس پر بیت المقدس بنایا گیا ہے وَقَالَ عِکْرِمَۃُ وَ کَعْبُ الْاَحْبَارِ بَیْتُ الْمُقَدَّسِ اور عکرمہ اور کعب الاحبار کہتے ہیں
کہ اس سے مراد بیت المقدس ہے۔وَعَنِ ابْنِ عَبَّاسٍ قَالَ بِلَادُ فَلَسْطِیْن اور ابن عباسؓ کی روایت ہے کہ اس سے مراد فلسطین کا علاقہ ہے۔وَقَالَ اَیْضًا بَیْتُ الْمُقَدَّسِ اسی طرح ان سے یہ بھی روایت ہے کہ اس سے مراد بیت المقدس ہے۔فتح البیان کے مصنف ان معانی کو درج کرنے کے بعد لکھتے ہیں: ’’لَیْتَ شِعْرِیْ مَا الْـحَامِلُ لِھٰؤُلَاءِ الْاَئِـمَّۃِ عَلَی الْعُدُوْلِ عَنِ الْمَعْنَی الْـحَقِیْقِیِّ فِی اللُّغَۃِ الْعَرَبِیَّۃِ وَالْعُدُوْلُ اِلٰی ھٰذَہِ التَّفْسِیْـرَاتِ الْبَعِیْدَۃِ عَنِ الْمَعْنَی الْمَبْنِیَّۃِ عَلٰی خَیَالَاتٍ لَّا تُرْجَعُ اِلٰی عَقْلٍ وَّ نَقْلٍ وَّ اَعْـجَبُ مِنْ ھٰذَا اِخْتِیَارُ ابْنِ جَرِیْرٍ لِلْاٰخِرِ مِنْـھَا مَعَ طُوْلِ بَاعِہٖ فِیْ عِلْمِ الرِّوَایَۃِ وَالدِّرَایَۃِ‘‘(فتح البیان زیر آیت والتین۔۔۔۔۔)۔یعنی مجھے بڑی حیرت آتی ہے اور میری سمجھ سے یہ بات باہر ہے کہ یہ جو بڑے بڑے آئمہ ہیں ان کو کس چیز نے اس بات پر آمادہ کیا ہے کہ لغت عرب میں تین اور زیتون کے جو حقیقی معنی ہیں ان کو چھوڑ کر انہوںنے اور اَور معنے کرنے شروع کردیئے اور بعید از قیاس ایسی تفسیریں کرنی شروع کردیں جو ایسے خیالات پر مبنی ہیں جن کی نہ عقل تصدیق کرتی ہے نہ نقل تائید کرتی ہے۔پھر وہ کہتے ہیں مجھے سب سے زیادہ تعجب ابن جریر پر آتا ہے (ابن جریر بہت بڑے مفسر اور محدث ہیں اور ان کی عقلی رائے بھی نہایت اعلیٰ پایہ کی ہوتی ہے) کہ وہ بھی آخری معنوں کی تصدیق کرتے ہیں کہ تین اور زیتون سے یا تو بیت المقدس مراد ہے یا پھر فلسطین کا علاقہ حالانکہ درایت اور روایت میں ان کو بڑا دخل حاصل ہے یعنی باوجود اس قدر علم و فضل کے انجیر اور زیتون کے سیدھے سادے معنے کرنے کی بجائے وہ ادھر اُدھر کی دور از قیاس باتوں میں چلے گئے ہیں۔پھر صاحب فتح البیان لکھتے ہیں قَالَ الْفَرَّاءُ سَـمِعْتُ رَجُلًا یَّقُوْلُ التِّیْنُ جِبَالُ حُلْوَانَ اِلٰی ھَمْدَانَ وَالزَّیْتُوْنُ جِبَالُ الشَّامِ۔یعنی فراء کہتے ہیں میں نے ایک آدمی سے سنا وہ یہ کہہ رہا تھا کہ تین سے مراد حلوان کے پہاڑ ہیں جن کا ہمدان تک سلسلہ چلتا چلا جاتا ہے اور زیتون سے مراد شام کے پہاڑ ہیں۔فراء جیسے آدمی کا یہ مضمون بیان کرنا ایک ایسی بات ہے جس پر واقعہ میں ہنسی آتی ہے۔چنانچہ فتح البیان والوں نے یہاں ایک ایسا مزیدار فقرہ لکھا ہے جسے پڑھتے وقت مجھے ہنسی آگئی تھی وہ لکھتے ہیں ھَبْ اَنَّکَ سَـمِعْتَ ھٰذَا الرَّجُلَ فَکَانَ مَاذَا فَلَیْسَ بِـمِثْلِ ھٰذَا تَثَبُّتُ اللُّغَۃِ وَلَا ھُوَ نَقْلٌ عَنِ الشَّارِعِ کہتے ہیں میاں اگر تم نے کسی آدمی سے ایسا سن بھی لیا تھا تو پھر ہوا کیا۔کسی نے گپ ہانک دی تو تم اس کو لے اڑے۔یہ بھی کوئی دانائی اور عقلمندی ہے۔مان لیا کہ تم نے ایک آدمی سے یہ بات سنی تھی مگر کیا اس کے یہ معنے ہیں کہ اس نے جو کچھ کہا تھا وہ قرآن کریم کی تفسیر ہوگئی۔یہ ایک ایسا بے ساختہ فقرہ صاحب فتح البیان کی قلم سے نکلا ہے جس کی داد دینی پڑتی ہے۔واقعہ میں یہ حیرت کی بات ہے کہ فراء
جیسے آدمی نے اس قسم کی بات نقل کردی۔وہ روایت یہ کرتے ہیں کہ میں نے ایک آدمی کو یہ کہتے سنا تھا کہ تین اور زیتون سے یہ مراد ہے۔حالانکہ وہ کوئی بچہ بھی ہوسکتا ہے۔پاگل بھی ہوسکتا ہے لغت سے ناواقف بھی ہوسکتا ہے۔ایک غیرمعروف الحال شخص کی ایک بے ہودہ بات پر قرآن کریم کی تفسیر کی بنیاد رکھنا کس طرح درست ہو سکتا ہے۔یا تو وہ کہتے کہ میں لغت کو جانتا ہوں اس لئے میرے نزدیک اس کے یہ معنے ہیں یا فلاں ادیب سے میں نے ایسا سنا ہے یا فلاں قبیلہ میں اس کے یہ معنے کئے جاتے تھے مگر وہ کہتے یہ ہیں کہ میں نے ایک شخص سے سنا وہ یہ کہہ رہا تھا کہ تین سے یہ مراد ہے اور زیتون سے وہ مراد ہے۔یہ تو ایسی ہی بات ہے جیسے غالب اور ذوق کہیں کہ ہم نے ایک گائوں کے جاہل اور اجڈ لڑکے کو فلاں شعرکے یہ معنے کرتے سنا ہے۔غرض فتح البیان والوں کا یہ فقرہ بڑا لطیف ہے اور اس کے معنے یہ ہیں کہ اوّل تو مجھے یقین نہیں آتا کہ تم نے ایسا سنا ہو۔لیکن اگر سن بھی لیا تھا تو اس پر قرآن کریم کی تفسیر کی بنیاد رکھنا کس طرح درست تھا۔فتح البیان والے اگر اس اصول پر قائم رہتے تو بہت اچھا ہوتا مگر وہ خود بھی ایسی بہت سی باتیں کہہ گئے ہیں۔قَالَ مُـحَمَّدُ بْنُ کَعْبٍ اَلزَّیْتُوْنُ مَسْجِدُ اِیْلِیَا۔محمد بن کعب کہتے ہیں کہ زیتون سے مراد مسجد ایلیا ہے۔وَقِیْلَ اِنَّہٗ عَلٰی حَذْفِ مُضَافٍ اَیْ وَ مَنَابِتِ التِّیْنِ وَالزَّیْتُوْنِ بعض نے کہا ہے کہ یہاں حذف مضاف ہے اور مراد یہ ہے کہ ہم تین اور زیتون اگانے والی جگہوں کوپیش کرتے ہیں۔قَالَ النُّحَاسُ لَا دَلِیْلَ عَلٰی ھٰذَا مِنْ ظَاہِرِ التَّنْزِیْلِ وَلَا مِنْ قَوْلِ مَنْ لَّا یَـجُوْزُ خِلَافَہٗ نحاس کہتے ہیں کہ اس توجیہہ کے متعلق قرآن کریم کی کوئی تصدیقی دلیل نہیں ملتی اور نہ کسی ایسے آدمی کا قول ملتا ہے جس کی بات کو ردّ کرنے کی جرأت نہ ہوسکے۔قَالَ الرَّازِیُّ اَمَّا الزَّیْتُوْنُ فَھُوَ فَاکِھَۃٌ مِّنْ وَّجْہٍ وَّ دَوَاءٌ مِّنْ وَّجْہٍ وَّ یُسْتَصْبَحُ بِہٖ۔رازی کہتے ہیں کہ زیتون سے مراد وہی شے ہے جو ایک لحاظ سے میوہ ہے کہ لوگ اسے کھاتے ہیں اور ایک لحاظ سے دوا بھی ہے اور اس سے دیئے بھی جلائے جاتے ہیں۔پھر کہتے ہیں وَمَنْ رَأَی وَرَقَ الزَّیْتُوْنِ فِی الْمَنَامِ اِسْتَمْسَکَ بِالْعُرْوَۃِ الْوُثْقٰی اگر کوئی شخص خواب میں زیتون کے ورق دیکھ لے تو اس کے معنے یہ ہوتے ہیں کہ اس نے ایک مضبوط اور نہ ٹوٹنے والا کڑا اپنے ہاتھ میں پکڑ لیا۔اب ہم تفسیر ابن کثیر کو دیکھتے ہیں۔اس میں لکھا ہے قَالَ الْقُرْطَبِیُّ ھُوَ مَسْجِدُ اَصْـحَابِ الْکَہْفِ قرطبی کا بیان ہے کہ اس سے اصحاب کہف کی مسجد مراد ہے۔وَرَوَی الْعَوْفِیُّ عَنِ ابْنِ عَبَّاسٍ مَسْجِدُ نُوْحٍ اَلَّذِیْ عَلَی الْـجُوْدِیِّ عوفی نے ابن عباس سے روایت کی ہے کہ اس سے وہ مسجد نوح مراد ہے جو جودی پہاڑ پر ہے جہاں طوفان
کے بعد حضرت نوح علیہ السلام کی کشتی ٹھہری تھی۔وَقَالَ بَعْضُ الْاَئِـمَّۃِ ھٰذِہٖ مَـحَالٌّ ثَلَاثَۃٌ بَعَثَ اللہُ فِیْ کُلِّ وَاحِدٍ مِّنْـھَا نَبِیًّا مُّرْسَلًا مِّنْ اُولِی الْعَزْمِ اَصْـحَابِ الشَّـرَائِعِ الْکِبَارِ بعض آئمہ کہتے ہیںکہ یہ تین اہم مقامات ہیں جن میں سے ہر مقام میں اللہ تعالیٰ نے اپنے اولوالعزم اور صاحب شریعت انبیاء کو بھیجا تھا۔فَالْاَوَّلُ مَـحَلَّۃُ التِّیْنُ وَالزَّیْتُوْنُ وَھِیَ بَیْتُ الْمُقَدَّسِ الَّتِیْ بَعَثَ اللہُ فِیْـھَا عِیْسَی ابْنَ مَرْیَمَ عَلَیْہِ السَّلَامُ پہلے نبی کے اترنے کا محل تین اور زیتون کا مقام ہے اور اس سے مراد وہ بیت المقدس ہے جہاں اللہ تعالیٰ نے حضرت مسیح ابن مریمؑ کو نازل کیا تھا۔گویا ان کے نزدیک تین اور زیتون دونوں سے مراد بیت المقدس ہے گو بعض آئمہ نے صرف تین کے متعلق یہ کہا تھا کہ اس سے مراد بیت المقدس ہے مگر یہ کہتے ہیں تین اور زیتون دونوں سے بیت المقدس مراد ہے کیونکہ یہاں حضرت عیسیٰ علیہ السلام بھیجے گئے تھے۔وَالثَّانِیْ طُوْرُ سِیْنِیْنَ اور دوسرا مقام طور سینین ہے۔وَھُوَ طُوْرُ سَیْنَاءَ الَّذِیْ کَلَّمَ اللہُ عَلَیْہِ مُوْسَی بْنَ عِـمْرَانَ اوراس سے مراد وہ طور ہے جس پر اللہ تعالیٰ نے موسٰی بن عمران سے باتیں کی تھیں۔وَالثَّالِثُ مَکَّۃُ اور بلد الامین جس کا تیسرے مقام پر ذکر آتا ہے اس سے مراد مکہ ہے۔وَ ھٰذَا الْبَلَدُ الْاَمِیْنُ الَّذِیْ مَنْ دَخَلَہٗ کَانَ اٰمِنًا اور یہ وہی بلد الامین ہے جس میں داخل ہوکر انسان کو امن حاصل ہوجاتا ہے۔وَھٰذَا وَالَّذِیْ اُرْسِلَ فِیْہِ مُـحَمَّدٌ صَلَّی اللہُ عَلَیْہِ وَسَلَّمَ اور یہی وہ جگہ ہے جس میں رسول کریم صلی اللہ علیہ وسلم مبعوث ہوئے۔اس کے بعد ابن کثیر والے لکھتے ہیں کہ وَ قَالُوْا وَفِیْ اٰخِرَۃِ التَّوْرَاۃِ ذِکْرُ ھٰذِہِ الْاَمَاکِنِ الثَّلَاثَۃِ یعنی بعض مفسرین نے جو یہ معنے کئے ہیں کہ تین اور زیتون سے مراد تین اور زیتون کے پیدا ہونے کی جگہ ہے خصوصاً تین اور زیتون سے مراد حضرت عیسیٰ علیہ السلام کا وہ مقام ہے جہاں آپ نازل ہوئے۔طورِ سینین سے مراد وہ مقام ہے جہاں اللہ تعالیٰ نے حضرت موسیٰ علیہ السلام سے کلام کیا اور بلد الامین سے مراد وہ مکہ ہے جہاں رسول کریم صلی اللہ علیہ وسلم مبعوث ہوئے ان تینوں مقامات کا تورات کے آخر میں ذکر آتا ہے۔چنانچہ لکھا ہے جَاءَ اللہُ مِنْ طُوْرِ سَیْنَاءَ۔۔۔۔۔۔۔وَاَشْـرَقَ مِنْ سَاعِیْـرَ۔۔۔۔۔۔۔وَاسْتَعْلَنَ مِنْ جِبَالِ فَارَانَ یعنی ’’خداوند سینا سے آیا اور شعیر سے ان پر طلوع ہوا۔فاران ہی کے پہاڑ سے وہ جلوہ گر ہوا‘‘ (استثناء باب ۳۳ آیت ۲) یہ ایک مشہور حوالہ ہے جو رسول کریم صلی اللہ علیہ وسلم کی بعثت کے متعلق بائبل میں پایا جاتا ہے اور میرے نزدیک یہ پہلا حوالہ ہے جو مفسرین نے صحیح طور پر پیش کیا ہے اور اس میں رسول کریم صلی اللہ علیہ وسلم کے متعلق پیشگوئی بھی پائی جاتی ہے ورنہ مفسرین بائبل کے جو حوالہ جات دیتے ہیں وہ اکثر غلط ہوتے ہیں یا تو وہ حوالے بائبل میں ملتے ہی
نہیں اور اگر ملتے ہیں تو اُس رنگ میں نہیں ہوتے جس رنگ میں مفسرین ان کا ذکر کرتے ہیں۔یہ پہلا حوالہ ہے جو انہوں نے صحیح طور پر پیش کیا ہے۔چنانچہ جَاءَ اللہُ مِنْ طُوْرِ سَیْنَاءَ کے ساتھ انہوں نے بطور تشریح لکھا ہے یعنی الَّذِیْ کَلَّمَ اللہُ عَلَیْہِ مُوْسٰی اور اَشْـرَقَ مِنْ سَاعِیْـرَ کے ساتھ لکھا ہے یعنی جَبَلُ بَیْتِ الْمُقَدَّسِ الَّذِیْ بَعَثَ اللہُ مِنْہُ عِیْسٰی اور وَاسْتَعْلَنَ مِنْ جِبَالِ فَارَانَ کے ساتھ لکھا ہے۔یعنی جِبَالُ مَکَّۃَ الَّتِیْ اَرْسَلَ اللہُ مِنْـھَا مُـحَمَّدًا صَلَّی اللہُ عَلَیْہِ وَسَلَّمَ۔پھر اس کے بعد وہ ایک نوٹ میں لکھتے ہیں فَذَکَرَھُمْ مُّـخْبِـرًا عَنْـھُمْ عَلَی التَّـرْتِیْبِ الْوُجُوْدِیِّ بِـحَسَبِ تَرْتِیْبِـھِمْ فِی الزَّمَانِ یعنی اس پیشگوئی میں جو بائبل میں بیان کی گئی ہے ان تینوں انبیاء کا جو ذکر کیا گیا ہے وہ اسی ترتیب سے ذکر ہے جس ترتیب کے ساتھ یہ تینوں انبیاء یکے بعد دیگرے آئے۔پہلے طُوْرِ سِیْنَا میں حضرت موسیٰ علیہ السلام کا ذکر کیا ہے اور اَشْـرَقَ مِنْ سَاعِیْـر میں حضرت عیسیٰ علیہ السلام کا ذکر کیا ہے اور اسْتَعْلَنَ مِنْ جِبَالِ فَارَانَ میں رسول کریم صلی اللہ علیہ وسلم کا ذکر کیا ہے کیونکہ اسی ترتیب سے یہ انبیاء آئے تھے۔پہلے حضرت موسیٰ علیہ السلام آئےتھے، پھر حضرت عیسیٰ علیہ السلام آئے اور آخر میں رسول کریم صلی اللہ علیہ وسلم آگئے گویا جس ترتیب سے ان انبیاء نے ظاہر ہونا تھا اسی ترتیب سے اللہ تعالیٰ نے اس پیشگوئی کا بائبل میں ذکر کیا ہے۔وَلِھٰذَا اَقْسَمَ بِالْاَشْـرَفِ ثُمَّ الْاَشْـرَفِ مِنْہُ ثُمَّ بِالْاَشْـرَفِ مِنْـھُمَا یہاں معلوم ہوتا ہے کوئی عبارت رہ گئی ہے یا ترتیب زمانی چونکہ پہلے بیان ہوچکی تھی اس لئے انہوں نے خیال کرلیا کہ لوگ خودبخود اس بات کو سمجھ جائیں گے کہ قرآن کریم نے بائبل کی ترتیب کے خلاف پہلے حضرت عیسیٰ علیہ السلام کا پھر حضرت موسیٰ علیہ السلام کا اور پھر رسول کریم صلی اللہ علیہ وسلم کا جو ذکر کیا ہے تو درجہ کی ترتیب کے لحاظ سے کیا ہے۔چنانچہ وہ کہتے ہیں قرآن کریم نے زمانی ترتیب کو نہیں لیا بلکہ درجہ کی ترتیب کو لیا ہے اور اس لئے پہلے تین اور زیتون کا ذکر کیا ہے جس سے حضرت عیسیٰ علیہ السلام مراد ہیں کیونکہ وہ باقی دو انبیاء سے درجہ میں چھوٹے ہیں۔اس کے بعد طورِ سینین میں حضرت موسیٰ علیہ السلام کا ذکر کیا گیا ہے کیونکہ وہ درجہ میں حضرت عیسیٰ علیہ السلام سے بڑے ہیں۔آخر میں وَ هٰذَا الْبَلَدِ الْاَمِيْنِ کہہ کر رسول کریم صلی اللہ علیہ وسلم کا ذکر کیا گیا کیونکہ آپ عیسٰیؑ اور موسٰی دونوں سے افضل ہیں۔یہ توجیہ ابن کثیر والوں کی نہایت معقول اور درست ہے میں نے دیکھا ہے کہ اکثر مقامات پر ان کی عقل خوب چلتی ہے۔وہ کہتے ہیں بائبل نے تو ان کی ترتیب وجودی کومدنظر رکھا تھا مگر قرآن کریم نے ان کی ترتیب مقامی کو مدنظر رکھا ہے۔وہاں یہ ذکر تھا کہ پہلے کون ہوگا پھر کون ہوگا اور پھر اس کے بعد کون ہوگا۔لیکن یہاں یہ ذکر ہے کہ ان تینوں میں سے چھوٹا درجہ کس کا ہے اور پھر اس سے بڑا درجہ کس کا ہے اور پھر ان دونوں سے بڑا درجہ کس کا ہے۔یہ
ایک ایسی بات ہے جو میں نے اور کسی تفسیر میں نہیں دیکھی۔باقی تفاسیر کی تو یہ حالت ہے کہ جہاں حضرت مسیحؑ کا ذکر آجاتا ہے وہ بوجہ ان روایتوں کے جو حضرت ابوہریرہؓکی مہربانی سے احادیث میں آگئی ہیں ڈرجاتے ہیں اور خیال کرتے ہیں کہ ایسا نہ ہو ہم حضرت مسیحؑ سے کسی اور نبی کو افضل قرار دے کر آپ کی ہتک کے مرتکب ہوجائیں مگر ابن کثیر نے جو نہایت اعلیٰ پایہ کے مفسر ہیں قطعی اور حتمی طور پر حضرت مسیح ناصری کو حضرت موسیٰ علیہ السلام سے کم درجہ رکھنے والا قرار دیا ہے۔مولوی محمد علی صاحب اپنی تفسیر میں لکھتے ہیں۔انجیر کا ذکر دوسری جگہ قرآن کریم میں نہیں ہے مگر زیتون کا سورۂ نور میں ذکر ہے جہاں نور محمدی کو زیتون سے مشابہت دی ہے دوسری طرف بائبل میںانجیر کو سلسلہ موسویہ سے مشا بہت دی ہے چنانچہ یرمیاہ باب۲۴میںلکھا ہے ’’دو ٹوکریاںانجیروں کی خداوندکی ہیکل کے سامنے دھری تھیں۔ایک ٹوکری میں اچھے سے اچھے انجیر تھے۔۔۔۔اور دوسری ٹوکری میںبُرے سے بُرے انجیر‘‘ اورپھر آگے چل کر اچھے انجیروں کو بنی اسرائیل کے اچھے لوگ قرار دیاہے اور بُرے انجیروں کو بُرے لوگ اور حضرت عیسی علیہ اسلام کے مشہور انجیر کے درخت پر لعنت کر نے کے واقعہ میںبھی در حقیقت اسی طرف اشارہ ہے دیکھو متی باب ۲۱ ’’اور جب صبح کوشہر میں جا نے لگا اسے بھوک لگی تب انجیر کا ایک درخت راہ کے کنارے دیکھ کر اُس پاس گیا اور جب پتوں کے سوا اس میں کچھ نہ پایا تو کہا اب تجھ میں کبھی پھل نہ لگے وہیں انجیر کا درخت سوکھ گیا‘‘ پھر لکھتے ہیں بے موسم پھل نہ لگنے پر درخت پرکیا خفگی ہو سکتی تھی۔اصل میں یہ ایک تمثیل تھی۔انجیر کا درخت سلسلۂ بنی اسرائیل کا قائم مقام تھا جسے لفظ پرست انجیل نویسوںنے واقعہ کارنگ دے دیا(بیان القرآن جلد سوم زیر سورۃ التین)۔مگر یہ بات بھی ویری کی طرح کہی گئی ہے واقعہ یہ ہے کہ انجیل کے ما ننے والے بھی اس واقعہ کوظاہری نہیںمانتے بلکہ وہ اس کو ایک تمثیلی واقعہ قرار دیتے ہیںچنانچہ مجھے یاد ہے کہ حضرت مسیح مو عود علیہ الصلوٰۃ والسلام نے جب اس واقعہ سے حضرت مسیح ناصری کے اخلاق کے متعلق استدلال کیا اور لکھا کہ کیا یہی حضرت مسیحؑ کے اخلاق تھے کہ ایک انجیر کے درخت پر محض اس وجہ سے آپ نے لعنت کر دی کہ اس پر پھل نہیں تھا۔حالانکہ اس میں درخت کا کوئی قصور نہ تھا(چشمۂ مسیحی روحانی خزائن جلد ۲۰ صفحہ ۳۴۶) تو عیسائیوں نے اس کے جواب میں یہ لکھا کہ ہم اس کو ظاہری واقعہ تسلیم نہیں کرتے۔خود انجیل سے ثابت ہے کہ وہ پھلوں کا موسم نہیں تھا اس لئے یہ کس طرح ہو سکتا تھا کہ حضرت مسیحؑ ایک انجیر کے درخت کی طرف اس کے پھل کی امید میں ایسے موسم میں جاتے جس میں پھل ہو ہی نہیں سکتا تھا۔درحقیقت انجیر کے درخت سے یہودی لوگ مراد ہیں۔حضرت مسیحؑ نے چاہا کہ یہودی قوم ان پر ایمان لا کر زندہ
ہو جائے اور وہ بھی روحانی پھل پیدا کرنے لگے مگر یہودی قوم نے آپ کو ماننے سے انکار کر دیااس پر حضرت مسیحؑ نے لعنت کی جس کا مفہوم یہ تھا کہ آئندہ یہ قوم خدا تعالیٰ کی نعمتوں سے ہمیشہ محروم رہے گی مولوی محمد علی صاحب نے سمجھا ہو گا کہ میں ایک بہت بڑا نکتہ نکال کر پیش کر رہا ہوں حالانکہ عیسائی بھی یہی معنے کرتے ہیں کہ اس واقعہ میں یہودیوں کی تباہی کی طرف اشارہ تھا اور مراد یہ تھی کہ انجیر کے درخت پر اب پتے ہی باقی رہ گئے ہیں پھل نہیں۔یعنی یہودیوں میں صرف ظاہرہی ظاہر رہ گیا ہے۔پھل اور روحانیت ان میں نہیں رہی اس لئے آئندہ یہ درخت سوکھ جائے گا۔یعنی کوئی نبی ان میں نہیں آئے گا۔پس انجیر سلسلۂ اسرائیل کا قائم مقام ہے اور زیتون سلسلہ محمدیہ کا اور انجیر اور زیتون الگ مثال نہیں ہیں بلکہ طور اور بلدالامین ہی کی طرف اشارہ کرتی ہیں پہلے ان کے ذریعہ سے مخفی اشارہ موسوی اور محمدیؐ سلسلہ کی طرف کیا گیا پھر طور و بلد الامین کہہ کر اس اشارہ کو واضح کر دیا گیا۔تین و زیتون کی تفسیر حضرت خلفیۃ المسیح الاوّلؓکی زبانی حضرت خلیفۃ المسیح الاوّل رضی اللہ عنہ لکھتے ہیں (خلاصہ میرے الفاظ میں ہے) کہ ان کی قسم اس لئے کھائی یعنی تین اور زیتون کی کہ علاوہ غذا کے دواکے طور پر بھی یہ استعمال ہوتی ہیں۔کبھی طبیب تین تجویز کرتا ہے تو کبھی زیتون۔مطلب یہ کہ ایک زمانہ میں خدا تعالیٰ نے طور سینین کا نسخہ استعمال کیااور اس زمانہ میں بلدالامین کا نسخہ اس نے تجویز کر دیا(حقائق الفرقان جلد ۴ صفحہ ۴۱۷)۔گویا وہی لف و نشر کی مثال ہے۔تین سے مراد بنی اسرائیل اور زیتون سے مراد بلدالامین سے تعلق رکھنے والے لوگ ہیں گویا وہ مضمون جو مولوی محمد علی صاحب نے بیان کیا ہے۔در حقیقت حضرت خلیفہ اوّل رضی اللہ عنہ کا بیان کردہ ہے۔اسی طرح دو ٹوکریوں کی مثال جو مولوی محمد علی صاحب نے پیش کی ہے یہ بھی حضرت خلیفہ اوّل رضی اللہ عنہ کی زبان سے میں نے خود سنی ہے۔مگر افسوس ہے کہ آپ کے درس کے چھپے ہوئے نوٹوں میں یہ بات نہیں جس کی وجہ یہ ہے کہ مفتی محمد صادق صاحب اور قاضی اکمل صاحب نے یہ نوٹ لکھے ہیں اور وہ مضمون کا بہت سا حصہ چھوڑ کر صرف مختصر نوٹ لینے پر اکتفا کیا کرتے تھے لیکن پھر بھی ان نوٹوں میں یہ بات موجود ہے کہ ’’تین اور زیتون ان دو چیزوں کو قسمیہ بطور شہادت کے اس لئے بیان کیا کہ علاوہ غذا کے جسمانی امراض کے لئے بھی بطور دوا کے یہ دونوں چیزیں استعمال کی جاتی ہیں کبھی طبیب تین تجویز کرتا ہے تو کبھی تبدیل نسخہ کے لئے زیتون مفید سمجھتا ہے۔‘‘ گویاحضرت خلیفہ اوّل رضی اللہ عنہ کے مضمون میں ایک زائد بات یہ ہے کہ آپ فرماتے ہیں جس طرح طبیب کبھی تین کو چھوڑ کر زیتون استعمال کراتا ہے اسی طرح خدا نے اگر تین والے نسخے کو بدل کر زیتون والا نسخہ استعمال کرانا شروع کر دیا تو اس میں اعتراض کی کون سی بات ہے۔خدا حکیم ہے اور وہ ہمیشہ مرض کے مطابق آسمان سے علاج نازل
کیا کرتا ہے۔جب تین کے نسخہ کی ضرورت تھی اس نے تین نازل کر دی اور جب زیتون کے نسخہ کی ضرورت تھی اس نے زیتون نازل کر دیا۔اس تبدیلی سے خدا تعالیٰ پر کوئی اعتراض عائد نہیں ہوتا۔بلکہ اس کی حکمت پر ایمان لانا پڑتا ہے کہ وہ جو کچھ کرتا ہے بندوں کے فائدہ اور مخلوق کی نفع رسانی کے لئے کرتا ہے۔یہ مضمون جو نہایت ہی لطیف تھا مولوی محمد علی صاحب نے چھوڑ دیا کیونکہ مضمون ظاہر کر رہا تھا کہ اس نکتہ کو بیان کرنے والا کوئی طبیب ہے۔انہوں نے وہ حصہ تو لے لیا جس کے بیان کرنے سے حضرت خلیفہ اوّل ؓ کی طرف اشارہ نہیں ہوتا تھا۔مگر وہ حصہ ترک کر دیا جس کو بیان کرنے سے آپ کی طرف اشارہ ہو جاتا تھا۔بے شک مولوی محمد علی صاحب نے یہ مضمون بیان کر کے لوگوں سے واہ وا لے لی ہو گی اور وہ ہزاروں غیر احمدی جو ان کی تفسیر میں اس نکتہ کو پڑھتے ہوں گے خیال کرتے ہوں گے کہ مولوی محمد علی صاحب نے نہایت عجیب بات نکالی ہے مگر افسوس ہے کہ جس شخص نے قرآن کریم کا یہ لطیف نکتہ نکال کر پیش کیا تھا اس کا ذکر انہوں نے چھوڑ دیا اور اس کی محنت کو اپنی طرف منسوب کر لیا پھر جو کچھ انہوں نے بیان کیا ہے وہ بھی مکمل مضمون نہیں بلکہ جیساکہ میں پہلے بیان کر چکا ہوں وہ حضرت خلیفہ اوّل ؓ کے مضمون کے اس حصہ کو چھوڑ گئے ہیں کہ جس طرح طبیب حالات کی تبدیلی پر نسخہ تبدیل کر دیتا ہے اسی طرح خدا تعالیٰ نے تین کی بجائے زیتون کا نسخہ لوگوں کو استعمال کرانا شروع کر دیا۔یہ نکتہ نہایت ہی شاندار ہے کیونکہ رسول کریم صلی اللہ علیہ وسلم پر ایک نئی شریعت کے نزول سے لازمی طور پر یہ سوال پیدا ہوتا تھا کہ آخر وجہ کیا ہے کہ اللہ تعا لیٰ نے موسوی شریعت کو کالعدم قرار دے دیا اوراس کی جگہ محمدی شریعت کو نازل کر دیا۔اللہ تعالیٰ اس کا جواب دیتے ہوئے فرماتا ہے کہ کیا طبیب جب کسی مریض کے لیے نسخہ تجویز کر تا ہے تو ہمیشہ ایک ہی نسخہ رکھتا ہے؟ تم جانتے ہو کہ حالات کے بدلنے پر ہر سمجھدار طبیب نسخہ میں تبدیلی کر دیا کرتا ہے کبھی وہ تین استعمال کراتا ہے اور کبھی زیتون۔کبھی ایک دوا استعمال کراتا ہے اور کبھی دوسری۔جب روزانہ دنیا میں یہ نظارہ نظرآتا ہے اور تم جانتے ہو کہ کامل طبیب کی علامت یہی ہوتی ہے کہ وہ حالات کے مطابق نسخہ بدل دے تو تمہیں اللہ تعا لیٰ کے اس فعل سے کیوں تکلیف ہوئی اور کیوں تمہارے دل میں یہ اعتراض پیدا ہونا شروع ہو گیا کہ اس نے موسوی شریعت کی بجائے محمدی شریعت کیوں نازل کر دی ہے؟ غرض مولوی محمد علی صاحب نے حضرت خلیفہ اوّل رضی اللہ عنہ کے معنے اوّل تو ادھورے نقل کئے ہیں اور پھر آپ کا حوالہ دینے سے وہ کترا گئے ہیں حالانکہ دیانتداری کا تقاضا یہ تھا کہ جس شخص نے یہ معنے نکالے تھے اس کا ذکر بھی کیا جاتا۔میں نے حضرت خلیفہ اوّل رضی اللہ عنہ سے یہ بھی سنا ہوا ہے کہ تین اور زیتون مسیحؑ کے لیے، طور موسٰی کے لیے اور بلدالامین رسول کریم صلی اللہ علیہ وسلم کے لیے ہے گویا ابن کثیر والے مضمون کو بھی آپ پیش کیا کرتے تھے۔