سُوْرَۃُ التِّیْنِ
تفسیر کبیر (جلد ۱۳), حصہ 3
اور پاک طینت لوگوں کی ایک جماعت اسے عطا کی جائے گی جو اس کی قدرو منزلت کوسمجھتے ہوئے ہر قسم کی قربانیاںاس کے لئے کرے گی اور اگر تم نوحؑکے دشمنوںکی طرح ہو تب بھی تمہیں معلوم ہونا چاہیے کہ بے شک نوحؑنے ہجرت کی مگر خدا نے اس کے دشمنوں کو غرق کر دیا اور اسے زیتون کے پتے کے ذریعہ نجات کی بشارت دی اسی طرح بےشک تم محمدصلی اللہ علیہ وسلم کو اپنے شہر میں سے نکال دو تم نوحؑکے دشمنوں کی طرح غرق کیے جاؤ گے اور محمدصلی اللہ علیہ وسلم کی کشتی جودی پہاڑ پر جا ٹھہرے گی اور اللہ تعالیٰ کی طرف سے اسے زیتون کی شاخ عطا کی جائے گی۔مدینہ کیا تھا؟وہ جودی تھی جہاں محمدرسول اللہ صلی اللہ علیہ وسلم کی کشتی ٹھہری اور مدینہ کے انصار کیا تھے؟وہ زیتون کے پتے تھے جو محمد رسول اللہ صلی اللہ علیہ وسلم کو عطا کیے گئے چنانچہ تعطیرالانام میں لکھا ہے مَنْ رَاٰی وَرَقَ الزَّیْتُوْنِ فِی ا لْمَنَامِ فَقَدِ اسْتَمْسَکَ بِالْعُرْوَۃِ الْوُثْقٰی اگر کوئی شخص خواب میں زیتون کے پتے دیکھے تو اس کی تعبیر یہ ہو گی کہ اس نے ایک نہ ٹوٹنے والا کڑا مضبوطی سے پکڑلیا ہے۔پس زیتون کا عطا کیا جانایہ معنے رکھتا تھا کہ خدا تعالیٰ کی طرف سے آپ کو ایک ایسی جماعت دی جا ئے گی جو عروۃ الوثقی کو پکڑنے والی ہو گی وہ ایمان میں مضبوط ہو گی وہ قربانی میں کامل ہو گی وہ اطاعت میںحد کمال تک پہنچی ہوئی ہو گی اور کسی قسم کی تکلیف اس کے پائے ثبات میںجنبش پیدانہ کرے گی۔درحقیقت عروۂ وثقی کو مضبوطی سے پکڑلیناایمان باللہ کا ایک طبعی نتیجہ ہوتا ہے وہ شخص جس کے دل میں سچے طور پر ایمان پایا جاتاہے وہ الٰہی تعلیم کو ایسی مضبوطی کے ساتھ پکڑکر بیٹھ جاتا ہے کہ بڑے سے بڑے طوفان اورزلازل بھی اس کو ادھر ادھر نہیں کر سکتے۔وہ میدان کا بہادر اور جرأت واستقلال کا پیکر ہوتاہے اور خدا تعالیٰ کی راہ میںہر قسم کی موت کو اختیار کرنا لذیذ ترین نعمت سمجھتا ہے۔پس اللہ تعالیٰ فرماتا ہے کہ ہم تین کا واقعہ بھی تمہارے سامنے پیش کرتے ہیں اور زیتون کا واقعہ بھی تمہیں یاد دلاتے ہیںدونوں جگہ ہجرت ہوئی مگر دونوں جگہ شیطان کو نا کامی ہوئی آدمؑ نے ہجرت کی مگر آخرآدمؑ ہی دشمن پر کامیاب ہوا۔نوحؑنے ہجرت کی مگر آخر نوحؑ ہی دشمن پر کامیاب ہوا۔نوحؑکے بعد وہ ملک جس میں آپ رہتے تھے پھر بسا نہیں بلکہ تباہ ہو گیا۔اسی طرح محمدصلی اللہ علیہ وسلم کی ہجرت کے بعد تم تباہ کر دیئے جائو گے تمہارے لیے شیطان کی طرح ہر طرف لعنت ا ور پھٹکار ہو گی اور محمدصلی اللہ علیہ وسلم کے لیے تین کے پتے ہوں گے جو اسے عطا کیے جائیں گے۔تم نوحؑکے دشمنوں کی طرح غرق کیے جائو گے اور محمد صلی اللہ علیہ وسلم کے لیے مدینہ کے لوگ اپنے ہاتھوں میںزیتون کی پتیاں لئے آگے بڑھیںگے اور کہیں گے یا رسول اللہ ہمارے ہاں تشریف لایئے ہم آپ کے لئے اپنی جانیں قربان کرنے اور آپ کے پسینہ کی جگہ اپنا خون بہانے کے لیے تیار ہیں۔
غرض اللہ تعالیٰ فرماتا ہے کہ کیا وہ زیتون کی ٹہنی تمہیں یاد ہے جو نوحؑکو ہجرت کے بعد ملی تھی؟ کچھ خبر بھی ہے؟وہی محمد رسول اللہ صلی اللہ علیہ وسلم کے لیے تیار ہو رہی ہے اور یہ اس بات کا ثبوت ہوگاکہ لَقَدْ خَلَقْنَا الْاِنْسَانَ فِيْۤ اَحْسَنِ تَقْوِيْمٍ۔جب ہم نے انسان کی فطرت کو نیک بنایا ہے تو وہ دیر تک نیکی سے محروم نہیں رہ سکتا۔طور سینین سے مراد زیتون کے بعد طُوْرِ سِيْنِيْنَ کی قسم کھائی گئی ہے یعنی اسے بھی شہادت کے طورپر پیش کیا گیا ہے۔سِيْنِيْنَ کیا چیزہے؟اس کے متعلق یاد رکھنا چاہیے کہ سینین ایک علاقہ ہے جودشت سینا کہلاتا ہے اس سے مسلمانوں کو بھی دلچسپی ہے۔کیونکہ قرآن کریم میں اس کا ذکر آتا ہے اور یوروپین مصنفین کو بھی دلچسپی ہے کیونکہ بائبل میں اس کا ذکر آتا ہے لیکن یہ سوال کہ سینا اور طور سینا کہاں ہے؟اس میں بہت سے اختلافات پائے جاتے ہیں۔بعض مؤرخین کے نزدیک دشت سینا مصر کے شمال مشرقی حصہ میں ہے ان لوگوں کا خیال ہے کہ موسٰی کے سمندر پار ہونے کا واقعہ جو بیان کیا جاتا ہے وہ درست نہیں۔سمندر مصروفلسطین کے درمیان خاکنائے کے جنوب کی طرف ہے اور اس طرف حضرت موسٰی آئے ہی نہیں بلکہ آپ شمال کی طرف نکل گئے تھے بعض کا یہ خیال ہے کہ فلسطین سے ورے اور مصر اور فلسطین کے درمیان جو خاکنائے ہے جس میںسے اب آبنائے سویز بن گئی ہے اس میں خلیج عقبہ کے اوپر جو حصہ ہے وہ دشت سینا کہلاتا ہے گویا وہ دشت سینا کو خلیج عقبہ سے کچھ اوپر قرار دیتے ہیں لیکن بعض کے نزدیک دشت سینا کا علاقہ فلسطین کی طرف جھکا ہوا ہے بعض نے سینا اور طور کا کلی طور پر انکار کیا ہے اور کہا ہے کہ یہ محض ایک روایت ہے جس کے اندر کوئی حقیقت نہیںپائی جاتی(The Jewish Encyclopedia under word "Sinai Mount")۔بہرحال قرآن کریم نے طور کا لفظ استعمال کیا ہے اور طور کے معنے پہاڑ کے بھی ہوتے ہیں۔پس طور سینین کے یہ معنے ہیں کہ سینا کا ایک پہاڑ۔قرآن کریم سے یہی معلوم ہوتا ہے کہ اس نے طور کو اس پہاڑ کا نام قرار نہیں دیا بلکہ طور بمعنے پہاڑ استعمال کیا ہے۔یوروپین مؤرخ بھی اسی طرف گئے ہیں کہ طور کسی پہاڑ کا نام نہیں۔سورۂ طور میں وَالطُّوْرِ وَكِتٰبٍ مَّسْطُوْرٍ کہہ کرطور پرالف لام لایا گیا ہے لیکن اس آیت میںاللہ تعالیٰ نے الف لام چھوڑ دیا ہے۔اس سے صاف ظاہر ہے کہ سورئہ طور میں جو الف لام لایا گیا تھا تو اس کی وجہ یہ تھی کہ وہاں طور کی کسی اور چیز کی طرف اضافت کرکے اس کی تعیین نہیں کی گئی تھی اس لئے اَلطُّوْر کہہ کر اس طرف اشارہ کردیا گیا کہ ہماری مراد موسٰی والے طور یا سینا والے طور سے ہے جس کو تم جانتے ہی ہو لیکن یہاں چونکہ سینین کی طرف طور کی اضافت موجود ہے اس لئے الف لام کو چھوڑ دیا گیا۔بہرحال اس سے انکار نہیں کیا جاسکتا کہ طور ایک نکرہ ہے جو اضافت سے ہی خاص معنے پاتا ہے بغیر اضافت کے اس کے کوئی خاص معنے نہیں سمجھے جاسکتے۔جیسے پہاڑ کا لفظ اگر ہم اپنی گفتگو میں استعمال
کریں تو اس کے معنے ہمالیہ پہاڑ کے نہیں ہوسکتےلیکن اگر ہم کہیں ہمالیہ کا پہاڑ تو اس کے معنے ہوں گے وہ پہاڑ جسے ہمالیہ کہتے ہیں یا اگر ہم کہتے ہیں کشمیر کا پہاڑ یا ہزارہ کا پہاڑ یا افغانستان کا پہاڑ یا درہ خیبر کا پہاڑ تو اس کے بھی مخصوص معنے ہوں گے۔پس طور سینین کے یہ معنے ہوئے کہ سینا کا وہ پہاڑ جس پر موسیٰ علیہ السلام کا کوئی خاص واقعہ ہوا تھا۔وَالطُّوْرِ وَ كِتٰبٍ مَّسْطُوْرٍ میں انہی معنوں کو الف لام کی زیادتی سے ظاہر کیا گیاہے۔بعض مفسرین نے جو یہ سمجھا ہے کہ طور کسی پہاڑ کا نام ہے یہ درست نہیں۔طور کے معنے محض ایک پہاڑ کے ہیں اور انہیں معنوں میں یہ لفظ قرآن کریم میں استعمال ہوا ہے البتہ عرفِ عام میں بوجہ ایک خاص مناسبت کے اس نے مخصوص معنے پیدا کرلئے ہیں جیسے بعض دفعہ ایک چیز تو عام ہوتی ہے لیکن کسی خاص چیز کی طرف منسوب ہوتے ہوتے آخر اس کا ایک نام بن جاتی ہے۔مثلاً کتاب ایک عام لفظ ہے جو ہر کتاب کے متعلق استعمال ہوتا ہے لیکن ’’اَلْکِتَاب‘‘ ایک مخصوص لفظ ہے جو بائبل کے متعلق استعمال ہوتا ہے اس کا یہ مطلب نہیں کہ اَلْکِتَاب کے معنے بائبل کے ہیں بلکہ بائبل کی طرف یہ لفظ منسوب ہوتے ہوتے اتنا عرصہ گزرچکا ہے اور اس قدر زبان زدِ خلائق ہوچکا ہے کہ اب اَلْکِتَاب کا لفظ جب بھی استعمال ہوگا یہی سمجھا جائے گا کہ اس سے بائبل مراد ہے۔یا مثلاً انجیل کے لفظی معنے بشارات کے ہیں اور شروع میں انہی معنوں میں انجیل کا لفظ استعمال ہوا تھا کہ حضرت عیسیٰ علیہ السلام کی وہ بشارات جو آپ نے اپنی قوم کو دیں مگر اب انجیل کا لفظ بولو تو اس کے یہ معنے نہیں ہوں گے کہ زید کی بشارتیں یا بکر کی بشارتیں بلکہ ہر شخص کے ذہن میں فوراً یہ بات آجائے گی کہ اس سے مراد حضرت عیسیٰ علیہ السلام کی کتاب ہے۔حالانکہ لفظی معنے اس کے صرف بشارات کے ہیں۔اسی طرح طورِ سینین کے معنے ہیں سینا کا ایک پہاڑ مگر چونکہ سینا کے پہاڑ کا ذکر لوگوں کے زبان پر آتا ہے جس پر موسیٰ علیہ السلام سے اللہ تعالیٰ نے کلام کیا اس لئے رفتہ رفتہ طور سے مخصوص طور پر وہی پہاڑ سمجھا جانے لگا جس پر یہ واقعہ ہوا تھا۔حالانکہ معنوں کے لحاظ سے طور ہر پہاڑ کو کہا جاسکتا ہے۔سینا کے متعلق میں بتاچکا ہوں کہ اس کی تعیین میں مؤرخین کو بہت کچھ اختلاف ہے۔بعض تو سینا نام کا کوئی علاقہ تسلیم ہی نہیں کرتے مگر بعض اس علاقہ کے وجود کو تسلیم کرتے ہیں مگر ان لوگوں میں بھی بہت کچھ اختلاف ہے۔بعض کسی جگہ کو سینا قرار دیتے ہیں اور بعض کسی جگہ کو۔میرے خیال میں اس اختلاف کی بڑی وجہ یہ ہے کہ بعض لوگوں کو یہ شوق ہوتا ہے کہ ہم کوئی جدید چیز پیدا کریں اور اس شوق کی وجہ سے وہ واقعات اور حقائق کو نظر انداز کرکے محض اپنی کسی تھیوری اور قیاس پر بنیاد رکھ کر ایک نئی بات لوگوں کے سامنے پیش کردیتے ہیں اور خیال کرتے ہیں کہ اس طرح ہم بھی موجد قرار پا جائیں گے۔ہم روزانہ دیکھتے ہیں کہ بعض لوگ جب سنتے ہیں کہ فلاں نے یہ چیز ایجاد کی
ہے اور فلاں نے وہ چیز ایجاد کی ہے تو ان کے دلوں میں بھی شوق پیدا ہوتا ہے کہ ہم بھی کوئی نئی چیز ایجاد کریں۔اس پر بعض خیالات ان کے دل میں پیدا ہوتے ہیں اور وہ فوراً اخبارات میں اعلان کرادیتے ہیں کہ ہم نے اس قسم کی چیز ایجاد کرلی ہے مگر جب زیادہ کرید کی جائے تو معلوم ہوتا ہے کہ ایجاد کوئی نہیں صرف ایک نئی تھیوری انہوں نے پیدا کی ہے۔اسی طرح بعض مؤرخوں نے سمجھا کہ اگر ہم یہ کہہ دیں گے کہ حضرت موسٰی شمال کی طرف گئے تھے اورسینا بھی شمال میں ہی تھاتو تاریخ میں ہم بھی موجد سمجھے جائیں گے۔چنانچہ وہ معمولی معمولی شبہات کی بناء پر دوسروں کی باتوں کو ردّ کردیتے ہیںاور ایک نئی تھیوری اور نیا خیال پیدا کرکے خوش ہوجاتے ہیں اور سمجھتے ہیں کہ آئندہ جب بھی اس واقعہ کی تحقیق کی جائے گی لوگ کہیں گے کہ ایک تھیوری فلاں شخص کی بھی تھی اس پر بھی غور کرلیا جائے۔ایسے لوگوں کو تاریخ کی صحت مدنظر نہیں ہوتی بلکہ اپنی ذات کی شہرت ان کا سب سے بڑا مقصد ہوتا ہے۔بجائے اس کے کہ وہ حقائق پر غور کریں ان کو ہر وقت یہی شوق رہتا ہے کہ کسی طرح ہمارا نام نکل جائے۔ایسے ہی لوگ بعض دفعہ یہاں تک کہہ دیتے ہیں کہ موسٰی کوئی تھا ہی نہیں۔بعض کہہ دیتے ہیں کہ عیسٰیؑ کوئی شخص نہیں تھا۔بعض کہہ دیتے ہیں کہ سینا کوئی علاقہ نہیں تھا۔اسی طرح زرتشت ؑ کے متعلق بعض لوگوں کا خیال ہے کہ ان کا کوئی وجود نہیں تھا۔یہی حال کرشنؑ اور رامچندرؑ کا ہے کہ ان کے وجود کا بعض لوگوں کی طرف سے انکار کیا جاتا ہے۔میں سمجھتا ہوں اس میں بھی اسلام کا معجزہ ہے کہ اگر کسی شخص کے وجود کا انکار نہیں ہوا تو وہ صرف محمد رسول اللہ صلی اللہ علیہ وسلم ہیں۔ورنہ بعض عیسائی ایسے ہیں جنہوں نے حضرت عیسیٰ علیہ السلام کا وجود تسلیم کرنے سے انکار کیا ہے اور کہا ہے کہ یہ محض ایک تمثیلی ذکر ہے۔اسی طرح پروفیسر فرائیڈ جو خود یہودی ہے اس نے حضرت موسیٰ علیہ السلام کے وجود کا انکار کیا ہے(The Life and Work of Sigmund Freud;p31)۔بعض ہندو ایسے ہیں جو یوروپین مشککین کی اتباع میں کرشنؑ اور رامچندرؑ کے وجود کا انکار کرتے ہیں اور بعض پارسی ہیں جو زرتشتؑ کے وجود کا انکار کرتے ہیں اور اس کو محض ایک تمثیلی وجود قرار دیتے ہیں لیکن اگر کسی عظیم الشان نبی کے وجود کا انکار نہیں کیا گیا تو وہ رسول کریم صلی اللہ علیہ وسلم ہی کی ذات ہے۔میرے نزدیک اس میں بھی ایک بہت بڑی الٰہی حکمت کام کررہی ہے۔اللہ تعالیٰ نے اس ذریعہ سے دنیا کو بتایا ہے کہ اگر کوئی قابل اعتناء ذات ہے تو وہ صرف محمد رسول اللہ صلی اللہ علیہ وسلم کی ذات ہے باقی سب انبیاء کا اگر تم انکار بھی کردو تو اس میں کوئی حرج نہیں۔غرض طور کے وجود کا بھی بعض لوگوں نے انکار کیا ہے اور سینا کے وجود کا بھی بعض لوگوں نے انکار کیا ہے لیکن جو لوگ طور کو مانتے ہیں وہ کہتے ہیں کہ سینا کے نیچے جنوب میں خلیج عقبہ کے اوپر تیس چالیس میل لمبا ایک پہاڑ ہے جس
کو طور کہتے ہیں(The Jewish Encyclopedia under word "Sinai Mount")۔مگر میرے نزدیک یہ درست نہیں کہ اس پہاڑ کا نام طور تھا۔طور کے معنے پہاڑ کے ہیں اور طور کے لفظ سے اس پہاڑ کی طرف اشارہ کیا گیا ہے جس پر حضرت موسٰی سے کلام ہوا اور اس واقعہ کو چونکہ ہزاروں لوگوں نے بار بار بیان کیا آہستہ آہستہ طور کالفظ ہی بجائے پہاڑ کے ایک خاص پہاڑ کا عَلَمیعنی مخصوص نام سمجھا جانے لگا۔بہرحال خلیج عقبہ کے اوپر ایک پہاڑی ہے جہاں حضرت موسیٰ علیہ السلام سے اللہ تعالیٰ نے کلام کیا اور تاریخوں سے ثابت ہے کہ یہودی ہمیشہ اس پہاڑی کی زیارت کے لئے جایا کرتے تھے۔میرے نزدیک قرآن کریم اور بائبل سے جو کچھ ثابت ہوتا ہے اس کے لحاظ سے خلیج عقبہ کے اوپر والا علاقہ ہی سینا کا ہے اور اسی علاقہ میں وہ پہاڑ ہے جسے عرفِ عام میں طور کہا جاتا ہے۔مجھے تعجب آتا ہے کہ جب قرآن کریم اور بائبل دونوں سے اس علاقہ کا وجود ثابت ہے اور تاریخ بھی بتاتی ہے کہ یہودی ہمیشہ اس پہاڑ کی زیارت کے لئے جایا کرتے تھے (The Jewish Encyclopedia under word "Sinai Mount") تو پھر کسی مؤرخ کا کیا حق ہے کہ وہ یہ کہے کہ طور کوئی پہاڑ ہی نہیں تھا یا سینا کوئی علاقہ ہی نہیں تھا۔طُوْرِ سِيْنِيْنَ میں سینین لفظ جمع استعمال کرنے کی وجہ اس جگہ یہ سوال پیدا ہوتا ہے کہ اللہ تعالیٰ نے یہاں سینین کا لفظ کیوں استعمال کیا جبکہ سورئہ مومنون میں وَ شَجَرَةً تَخْرُجُ مِنْ طُوْرِ سَيْنَآءَ تَنْۢبُتُ بِالدُّهْنِ وَصِبْغٍ لِّلْاٰكِلِيْنَ(مؤمنون: ۲۱) کہہ کر اس کا نام سینا بتایا گیا ہے نہ کہ سینین۔اس کا جواب بعض لوگوں نے یہ دیا ہے کہ سینا اور سینین دونوں عَلَم ہیں لیکن بعض مفسرین نے کہا ہے کہ سینا کی بجائے سینین کا لفظ وقف کی وجہ سے بدل دیا گیا ہے (روح البیان زیر آیت طُوْرِ سِیْنِیْنَ) اور یہ ایسا ہی ہے جیسے سورئہ صافات میں اللہ تعالیٰ فرماتا ہے سَلٰمٌ عَلٰۤى اِلْ يَاسِيْنَ(الصّٰفّٰت:۱۳۱) حالانکہ وہاں صرف ایک الیاس مرادہیں آخر میں یا اور ن کا اضافہ قافیہ بندی کے لئے کیا گیا ہے۔مگر ہمارے نزدیک یہ بات درست نہیں کہ سَلٰمٌ عَلٰۤى اِلْ يَاسِيْنَ میں صرف وقف کے لئے یا اور ن کا اضافہ کیا گیا ہے بلکہ جیسا کہ ہماری جماعت کا اعتقاد ہے الیاس کی بجائے الیاسین کا لفظ اللہ تعالیٰ نے اس لئے استعمال کیا ہے کہ یہاں ایک سے زیادہ الیاس مراد ہیں۔ایک تو وہ الیاس ہیں جو اسرائیلی انبیاء کے وسط میں گزر چکے ہیں۔دوسرے الیاس یوحنا ہیں جو حضرت عیسیٰ علیہ السلام سے معاً پہلے آئے اور تیسرے الیاس حضرت سید احمد صاحب بریلوی ہیں جو حضرت مسیح موعود علیہ الصلوٰۃ والسلام سے پہلے آئے۔چونکہ نزول قرآن سے پہلے دو الیاس دنیا میں آچکے تھے اور ایک الیاس نے ابھی آنا تھا اس لئے اللہ تعالیٰ نے سَلَامٌ عَلٰی اِلْیَاسٍ کی بجائے سَلٰمٌ عَلٰۤى اِلْ يَاسِيْنَ کہہ کر ان سب کی طرف اشارہ کردیا۔اسی طرح ممکن ہے سینا کے متعلق لوگوں میں جو اختلاف پایا جاتا ہے سینین میں اس
کی طرف اشارہ ہو اور یہ بھی ممکن ہے کہ مختلف قوموں میں مختلف علاقوں کو سینا کہتے ہوں۔مثلاًعرب لوگ پنجاب اور اس کے اردگرد کے علاقہ کا نام ہند رکھ دیتے ہیں۔چنانچہ عربی کتابوں میں بعض جگہ لکھا ہوتا ہے کہ ہند اور بنگال میں فلاں فلاں بات پائی جاتی ہے حالانکہ ان دنوں بنگال ہندوستان کا حصہ ہے مگر وہ چونکہ صرف پنجاب اور اس کے اردگرد کے علاقہ کا نام ہند رکھ دیتے ہیں اس لئے بنگال کو وہ علیحدہ شمار کرتے ہیں۔اسی طرح بعض لوگ افغانستان صرف قندھار تک کے علاقہ کو کہتے ہیں۔بعض افغانستان کی حدود پشاور تک سمجھتے ہیں اور بعض دریائے سندھ تک کے علاقہ کو افغانستان قرار دیتے ہیں اس لحاظ سے طُوْرِ سِيْنِيْنَ کے الفاظ میں اس طرف بھی اشارہ ہوسکتا ہے کہ اس علاقہ میں سینا کے نام سے کئی دشت مشہور ہیں مگر وہ پہاڑ جس پر موسٰی سے کلام ہوا ایک ہی ہے ہم ان سینائوں کے طور کی طرف اشارہ کرتے ہیں۔میں بتاچکا ہوں کہ وَ التِّيْنِ وَ الزَّيْتُوْنِ میں آدمؑ اور نوحؑکی ہجرتوں کی طرف اشارہ کیا گیا ہے اور بتایا گیا ہے کہ باوجود اس کے کہ ان ہجرتوں سے دشمن کو ایک جھوٹی خوشی حاصل ہوئی اور اس نے سمجھا کہ میں کامیاب ہوگیا ہوں پھر بھی خدا نے اپنے نبیوں کو کامیاب کیا اور دشمن کو ان کے مقابلہ میں ذلیل اور رسوا ہونا پڑا۔اسی طرح اب مکہ والوں کا یہ خیال کرنا صریح نادانی ہے کہ ہم محمد رسول اللہ صلی اللہ علیہ وسلم کو مکہ سے نکال کر کامیاب ہوجائیں گے جس طرح سابق انبیاء کے دشمنوں کایہ خیال کہ ہم جیت جائیں گے اور نبی ہار جائے گا باطل ثابت ہوا تھا اسی طرح اب بھی مکہ والوں کا خیال باطل ثابت ہوگااور اللہ تعالیٰ ان کی جھوٹی خوشی کو ایک دن ہمیشہ کی ذلت اور رسوائی میں بدل دے گا۔اب اسی مضمون کی وضاحت کے لئے اللہ تعالیٰ موسٰی کی ہجرت کا واقعہ بطور مثال پیش کرتا ہے۔قرآن کریم سے معلوم ہوتا ہے کہ طور کا واقعہ ہجرت کے بعد ہوا ہے چنانچہ قرآن کریم کے ابتداء میں ہی جہاں بنی اسرائیل کا ذکر کیا گیا ہے وہاں آتا ہے وَ اِذْ فَرَقْنَا بِكُمُ الْبَحْرَ فَاَنْجَيْنٰكُمْ۠ وَ اَغْرَقْنَاۤ اٰلَ فِرْعَوْنَ وَ اَنْتُمْ تَنْظُرُوْنَ۔وَ اِذْ وٰعَدْنَا مُوْسٰۤى اَرْبَعِيْنَ لَيْلَةً ثُمَّ اتَّخَذْتُمُ الْعِجْلَ مِنْۢ بَعْدِهٖ وَ اَنْتُمْ ظٰلِمُوْنَ (البقرۃ:۵۱،۵۲) اللہ تعالیٰ فرماتا ہے اے بنی اسرائیل یا دکر وجب ہم نے تمہارے لئے سمندر کو پھاڑ دیا تھا ہم نے تمہیں نجات دی اور آل فرعون کو ہم نے غرق کردیا اور تم دیکھ رہے تھے پھر اس وقت کو یاد کرو جب موسٰی سے ہم نے چالیس راتوں کا وعدہ کیا (جب آپ سینا کے پہاڑ پر تشریف لے گئے تھے) اور تم نے بچھڑے کو مبعود بنا کر شرک کا ارتکاب شروع کردیااور خدا تعالیٰ کی نگاہ میں ظالم بن گئے۔ان آیات سے معلوم ہوتا ہے کہ ہجرت پہلے ہوئی ہے اور طور کا واقعہ بعدمیں ہوا ہے۔پہلے آپ نے بنی اسرائیل کے ساتھ مصر کو چھوڑا پھر خدا تعالیٰ آپ کو طور پر لے گیا۔جہاں اس نے
وہ کلام آپ پر نازل کیا جس میں یہودی قوم کو دس ایسے احکام دیئے گئے تھے جو تمام تورات کا مغز سمجھے جاتے ہیں۔بائبل سے بھی یہی پتہ لگتا ہے کہ طور کا واقعہ حضرت موسیٰ علیہ السلام کے مصر سے نکل آنے کے بعد ہوا ہے۔چنانچہ خروج میں پہلے ہجرت کا ذکر کیا گیا ہے پھر دشت سینا میں بنی اسرائیل کے پہنچنے کا ذکر آتا ہے اور پھر آخر میں طور کا واقعہ بیان کیا گیا ہے۔یہ ترتیب ظاہر کررہی ہے کہ ہجرت پہلے ہوئی ہے اور واقعہ طور بعد میں ہوا ہے۔ہجرت کا ذکر خروج باب ۱۴ میں آتا ہے۔دشت سینا میں پہنچنے کا ذکر خروج باب ۱۶ میں آتا ہے اور واقعہ طور کا ذکر خروج باب ۱۹ میں آتا ہے۔خروج باب ۱۴ میں جو کچھ بیان کیا گیا ہے اس کا خلاصہ پرانی بائبل میں اس طرح درج ہے۔’’اس بیان میں کہ خدا بنی اسرائیل کو ان کی راہ بتاتا فرعون اُن کا پیچھا کرتا۔بنی اسرائیل کُڑکُڑاتے۔موسیٰ ان کو دلاسا دیتا۔خدا موسیٰ کو سکھلاتا۔بدلی کا ستون لشکر کی پشت پرجا ٹھہرتا۔بنی اسرائیل دریائے قلزم کے بیچ سے ہوکے جاتے اسی میں اہل مصر غرق ہوتے‘‘۔یہ تو ہجرت کا واقعہ ہوا۔اس کے بعد خروج باب ۱۶ کا خلاصہ یوں لکھا ہے۔’’اس بیان میں کہ بنی اسرائیل سین میں جاپہنچتے۔خوراک نہ ہونے کے باعث سب کُڑکُڑاتے۔خدا آسمان سے روٹی بھیجنے کا وعدہ کرتا۔ان کے لئے بٹیریں بھیجی جاتیں۔من بھی بھیجا جاتا۔ہر ایک کو من کے جمع کرنے کا حکم ہوتا۔سبت کے دن وہ نہ مل سکے گا۔من کا اُومر بھر قرنوں کو دکھانے کے لئے حفاظت سے رکھتے‘‘۔اس کے بعد خروج باب ۱۹ کا خلاصہ ان الفاظ میں درج ہے۔’’اس بیان میں کہ بنی اسرائیل سینا کے بیابان میں آتے ان کے لئے خدا کا پیغام پہاڑ پر سے موسیٰ کی معرفت آتا۔وے لوگ اس کا جواب دیتے۔تیسرے دن کے لئے تیار ہوجاتے۔پہاڑ کا چھونا منع ہوتا۔پہاڑ کے اوپر یہوواہ ہیبت ناک وضع سے ظاہر ہوتا‘‘۔غرض بائبل اور قرآن دونوں اس امر پر متفق ہیں کہ ہجرت کا واقعہ پہلے ہوا ہے اور طور کا واقعہ بعد میں۔غرض اللہ تعالیٰ آدمؑ اور نوحؑ کی مثالیں پیش کرنے کے بعد فرماتا ہے ہم تیسری مثال تمہارے سامنے موسٰی کی پیش کرتے ہیں۔موسٰی کو دشمن کے مظالم کی وجہ سے ہجرت کرنی پڑی تھی اور وہ اپنی قوم کو ساتھ لے کر مصر سے باہر نکل آیا تھا۔موسیٰ کے دشمنوں نے سمجھا ہوگا کہ چلو چھٹی ہوئی۔ہمیں اس کے فتنہ سے نجات ملی مگر خدا نے اس ہجرت کو دشمنوں کی تباہی اور بنی اسرائیل کی ترقی کا موجب بنا دیا۔اگر یہ لوگ مصر میں ہی رہتے تو خواہ فرعون کے مظالم سے
آزاد ہوجاتے مگر پھر بھی وہ محکوم ہی رہتے۔لیکن طورِسینین کے واقعہ کے بعداللہ تعالیٰ نے ایسی برکات نازل کیں کہ نہ صرف بنی اسرائیل فرعون کی غلامی سے ہمیشہ کے لئے آزاد ہوگئے بلکہ اللہ تعالیٰ نے آئندہ بادشاہت کا وعدہ دے کر یہودی قوم کی حکومت کی بنیاد رکھ دی جو ایک ہزار سال تک نہایت مضبوطی کے ساتھ قائم رہی۔یاد رکھنا چاہیے کہ اللہ تعالیٰ یہاں یہ مضمون بیان کررہا ہے کہ محمد رسول اللہ صلی اللہ علیہ وسلم کو تمہاری تدبیروں سے کوئی نقصان نہیں پہنچ سکتا۔تین اور زیتون اور طورِ سینین کے واقعات تمہارے سامنے ہیں۔آدمؑکو شیطان نے دھوکا دیا تو تین نے اس کا ننگ ڈھانک لیا۔نوحؑکے زمانہ میں طوفان آیا تو زیتون کی شاخ سے اس کو خوشخبری ملی۔مصر سے موسٰی کو بھاگنا پڑا تو طورِ سینین پر اس کو پناہ مل گئی۔چونکہ یہاں غلبہ اور ترقی کا مضمون ہے اس لئے اللہ تعالیٰ نے دشمن کی تکالیف والے حصہ کو بیان نہیں کیا۔ورنہ دراصل وَ التِّيْنِ کے معنے ہیں شیطان کا آدمؑکو دھوکا دینا اور تین سے اس کا کامیاب ہونا۔وَ الزَّيْتُوْنِ کے معنے ہیں نوح کے لئے عرصہ حیات کا تنگ کیا جانا۔طوفان آنا اور پھر زیتون سے نوحؑکو اپنی کامیابی کی بشارت ملنا۔طُوْرِ سِيْنِيْنَ کے معنے ہیں مصرسے موسٰی کا بھاگنا اور طُوْرِ سِيْنِيْنَ پر اس کو اپنی کامیابیوں کی بشارات ملنا اور هٰذَا الْبَلَدِ الْاَمِيْنِ کے معنے ہیں مکہ سے محمد رسول اللہ صلی اللہ علیہ وسلم کا بھاگنا اور پھر آپ کا فاتح اور حکمران ہونے کی حیثیت سے مکہ میں واپس آنا۔مگر تکالیف اور ہجرت وغیرہ کا ذکر چونکہ مضمون سے خود بخود نکل آتا ہے اس لئے اللہ تعالیٰ نے اس کا ذکر محض اشارۃً کیا ہے۔اصل ذکر غلبہ اور کامیابی کا کیا ہے تاکہ دشمن اپنی عارضی کامیابی پر خوش نہ ہو اور وہ یہ خیال نہ کرے کہ اس نے اللہ تعالیٰ کے انبیا ء کو شکست دےدی ہے۔غرض طُوْرِ سِيْنِيْنَ میں اس بات کا ذکر کیا گیا ہے کہ موسیٰ کو جب مصر سے نکالا گیا تو فرعون تو سمند ر کی تہہ میں ڈوبا مگر موسٰی کو ہم نے پہاڑ پر تجلی دکھائی۔گویا ایک نیچے کی طرف چلا گیا اور دوسرا اوپر کی طرف نکل گیا۔تجلی دونوں نے ہی دیکھی مگر ایک نے سمندر کی تہہ میں دیکھی اور دوسرے نے طورِ سینین پر تجلی دیکھی۔اے مکہ والو! تمہارے ساتھ بھی یہی ہونے والا ہے۔بظاہر موسٰی فرعون اور اس کی قوم کے مظالم سے تنگ آکر مصر سے بھاگ گئے تھے وہ اپنے گھروں سے نکل گئے تھے انہوں نے اپنے مکانوں اور اپنی جائیدادوں کو چھوڑ دیا تھا مگر اللہ تعالیٰ نے طورِ سینین پر موسٰی کو تجلی دکھا دی اور اللہ تعالیٰ کی طرف سے اسے اپنی قوم کے غلبہ کا وعدہ مل گیا۔محمد رسول اللہ صلی اللہ علیہ وسلم کے لئے بھی طورِ سینا تیار ہورہا ہے۔یہ طورِ سینا مدینہ تھا جو رسول کریم صلی اللہ علیہ وسلم کو عطا کیا گیا۔فرماتا ہے کہ تم خود سمجھ لو کہ تمہارے لیے کیا مقدر ہے؟ محمد ؐرسول اللہ کو نکال کر دیکھ لو میں فرعون کی طرح تم کو غرق کردوں گا اور محمدؐ رسو ل اللہ کو طورِ سینا پر بلند جگہ دوں گا اور ثابت کردوں گا کہ انسانی فطرت پاک ہے۔پاک فطرت لوگ اس کی طرف دوڑیں گے اور
اس بات کے شاہد ہوں گے جس طرح موسٰی کے وقت ہوئے کہ خدا تعالیٰ نے انسان کو اَحْسَنِ تَقْوِیْمٍ میں پیدا کیا ہے۔اس کے بعد اللہ تعالیٰ فرماتا ہے وَ هٰذَا الْبَلَدِ الْاَمِيْنِ کہ ہم اس بلد الامین کو بھی شہادت کے طو رپر پیش کرتے ہیں۔امین کے معنے یا تو اٰمِنٌ کے ہوتے ہیںاور یا مَاْمُوْنٌ کے ہوتے ہیں یعنی یا تو اس کے یہ معنے ہیں کہ وہ بلد جو دنیا کو امن دیتا ہے اور یا پھر اس کے یہ معنے ہیں کہ وہ بلد جس کو خدا نے مامون کردیا ہے۔میرے نزدیک بلدالامین کے دونوں معنے ہوسکتے ہیں یہ بھی کہ وہ شہر جو امن دینے والا ہے اور یہ بھی کہ وہ شہر جسے امن دیا گیا ہے۔امین کا لفظ جو اس آیت میں استعمال کیا گیا ہے اس سے صاف پتہ لگتاہے کہ جس وقت یہ سورۃ نازل ہوئی ہے اس وقت کے مکہ کی حالت کا اس میں ذکر نہیں کیونکہ اس وقت تو جو کچھ کیفیت تھی اس کا ذکر اللہ تعالیٰ ان الفاظ میں کرچکا ہے کہ اَنْتَ حِلٌّۢ بِهٰذَا الْبَلَدِ تجھے اس بلد میں حلال سمجھا جارہا ہے کوئی تکلیف نہیں جو تجھے نہ پہنچائی جاتی ہو اور کوئی ظلم نہیں جو تجھ پر توڑا نہ جاتا ہو۔ہرقسم کے تیروں کا نشانہ انہوں نے تجھ کو بنایا ہوا ہے اور وہ سمجھتے ہیں کہ ایک جائز فعل کا ارتکاب کررہے ہیں۔جس شہر میں محمد صلی اللہ علیہ وسلم جیسے امن پسند انسان پر ظلم کیا جاتا تھا وہ بلدالامین کس طرح کہلاسکتا تھا۔پس بلدالامین سے درحقیقت مکہ کی وہ حالت مراد ہے جو فتح مکہ کے بعد پیدا ہوئی جب ہر قسم کے مظالم کا سلسلہ جاتا رہا تھااور مسلمانوںکو کفار پر غلبہ اور اقتدار حاصل ہوگیا تھا۔ورنہ فتح مکہ سے پہلے وہ بلدالامین کہاں تھا۔نہ اس میں روحانی لحاظ سے امن تھا نہ جسمانی لحاظ سے۔دینی امن لو تو مکہ وہ شہر تھا جہاں لوگوں کے ایمانوں پر ڈاکہ ڈالا جاتا تھا اورانہیں خدائے واحد کی پرستش کی بجائے بتوں کی پرستش کرنے پر مجبور کیا جاتا تھا اور اگر جسمانی لحاظ سے دیکھو تو مکہ والوں کی طرف سے خطرناک سے خطرناک ظلم ایک ایسی قوم پر ہورہا تھا جو انصاف پسند اور مخلوق کی خیرخواہ تھی جو اس مقصد کو لے کر کھڑی ہوئی تھی کہ دنیا میں امن قائم ہونا چاہیے، ایک دوسرے کے حقوق کو ادا کرنا چاہیے اور الٰہی فرائض کو پوری دیانت داری کے ساتھ ادا کرنا چاہیے۔کون کہہ سکتا ہے کہ ان میں سے کوئی ایک مقصد بھی ایسا ہے جس پر مکہ والوں کو غصہ آنا چاہیے تھا اور جس کی بنا پر انہیں اپنی ترکش کا ہر تیر مسلمانوں کے سینہ کی طرف پھینکنا چاہیے تھا مگر ہوا یہی کہ مسلمانوں کو دکھ دیا گیا، ان کو ستایاگیا، ان کو مارا گیا، ان کے ننگ وناموس پر حملہ کیا گیا اور انہیں شدید سے شدید عذاب میں ایک لمبے عرصہ تک مبتلا کیا گیا۔پھر یہی نہیں بلکہ ان کے محبوب آقا پر جس کی غلامی وہ اپنے لئے فخر کا موجب سمجھتے تھے اور جس کے اشارہ پر وہ اپنی ہر چیز قربان کرنے کے لئے تیار رہتے تھے متواتر اور مسلسل مظالم کئے گئے حالانکہ قوم کا آپ کے متعلق فتویٰ یہ تھا کہ آپ صدوق اور امین ہیں۔گویا مکہ میں ایک کافر کو امن حاصل تھا، ایک بت پرست کو امن حاصل تھا، ایک جھوٹے اور دغا باز کو امن حاصل تھا، ایک ظالم اور غاصب کو امن حاصل تھا
لیکن اگر کسی شخص کو مکہ میں امن حاصل نہیں تھا تو صرف اس کو جو قوم میں صدوق اور امین مشہور تھا(صحیح بخاری کتاب التفسیر سورۃ الشعراء باب وَ اَنْذِرْ عَشِيْرَتَكَ الْاَقْرَبِيْنَ)۔غرض روحانی طو رپر دیکھ لو یا جسمانی طور پر مکہ کو اس وقت کی حالت کے لحاظ سے قطعی طور پر بلد الامین نہیں کہا جاسکتا تھا۔روحانی طور پر یہ کیفیت تھی کہ مکہ میں لوگوں کے ایمانوں کو لوٹا جاتا تھا۔کبھی کہاجاتا لات پر چڑھاوا چڑھائو۔کبھی کہا جاتا عزیٰ پر چڑھاوا چڑھائو۔کبھی منات اور ھبل اور دوسرے بتوں کی پرستش پر مجبور کیا جاتا۔یہ بت پرستی مکہ میں اس قدر بڑھی ہوئی تھی کہ بیت اللہ جو خدائے واحد کی عبادت کے لئے بنایا گیا تھا خود اس میں تین سو ساٹھ بت رکھے گئے تھے اور ہر روز ایک نئے بت کے سامنے اپنے سر جھکائے جاتے تھے۔پس بلد الامین میں مکہ کی اس حالت کا ذکر نہیں جو اس سورۃ کے نازل ہونے کے وقت تھی بلکہ ان الفاظ میں اس آخری ترقی کا ذکر ہے جو رسول کریم صلی اللہ علیہ وسلم کو ہجرت کے بعد حاصل ہونے والی تھی۔تِیْن بھی ہجرت کے بعد کا واقعہ ہے جب آدمؑ شیطان پر کامیاب ہوئے۔زَیْتُوْن بھی ہجرت کے بعد کا واقعہ ہے جب نوحؑطوفان سے بچے۔طُوْرِ سِيْنِيْنَ بھی ہجرت کے بعد کا واقعہ ہے جب موسٰی کو آئندہ ترقیات کی خوشخبری ملی۔اسی طرح بَلَدِ الْاَمِيْنِ بھی ہجرت کے بعد کا واقعہ ہے جس کی ابتدائی مکی زندگی میں پیشگوئی کردی گئی تھی اور بتایا گیا تھا کہ گو آج مسلمانوں پر مظالم ڈھائے جاتے ہیں مگر ایک دن آنے والا ہے جب مکہ تمہارے لئے اور سب دنیا کے لئے بلدالامین ہوگا۔ہر قسم کے مظالم کا سلسلہ مٹ جائے گا اور محمد رسول اللہ صلی اللہ علیہ وسلم اور آ پ کے ساتھیوں کو امن حاصل ہوجائے گا۔گویا ہجرت بجائے مضر ہونے کے اسلام اور مسلمانوں کی ترقی کا ذریعہ ثابت ہوگی۔تم سمجھو گے کہ ہم نے اسلام کو تباہ کردیا مگر خدا تعالیٰ محمدرسول اللہ صلی اللہ علیہ وسلم کو پھر اس شہر میں واپس لائے گا۔آپ کو فتح اور کامرانی عطا کرے گا، آپ کے ہاتھ سے مکہ کے ایک ایک بت کو تڑوائے گا، شرک کا قلع قمع کردیا جائے گا اور خدائے واحد کا نام مکہ کی گلی کوچوں میں گونجنا شروع ہوجائے گا اور اس طرح روحانی امن قائم ہوجائے گا اس کے علاوہ اس وقت تم میں یہ طاقت نہ رہے گی کہ محمد رسول اللہ صلی اللہ علیہ وسلم اور آپ کے صحابہؓ کی طرف نظربد سے دیکھ سکو یا غریبوں پر ظلم کرسکو اور اس طرح جسمانی طور پر مکہ بلدالامین ہوجائے گا اور اگر امین کے معنے مامون کے لو تو اس آیت کا یہ مفہوم ہوگا کہ گو مکہ ہمیشہ سے محفوظ چلا آتا ہے مگر ایک موقع ایسا آنے والا ہے جب اس کو قسراً فتح کیا جائے گا۔جیسا کہ رسول کریم صلی اللہ علیہ وسلم نے فرمایا اِنَّ اللہَ حَرَّمَ مَکَّۃَ وَلَمْ یَـحِلُّ لِاَحَدٍ قَبْلِیْ وَلَا لِاَحَدٍ بَعْدِیْ وَ اِنَّـمَا حَلَّتْ لِیْ سَاعَۃً (بخاری کتاب البیوع باب ما قیل فی الصواع) کہ مکہ بلدالحرام ہے اور قیامت تک حرام ہی رہے گا کسی شخص کے لئے جائز نہیں ہے کہ وہ مکہ پر حملہ کرے یا اس کی حرمت کو کسی اور رنگ میں توڑنے کی
کوشش کرے۔صرف مجھے اللہ تعالیٰ نے اجازت دی ہے کہ میں قسراً مکہ کو فتح کروں مگر میرے لئے بھی یہ اجازت صرف چند گھڑیوں کے لئے تھی ہمیشہ کے لئے نہیں تھی۔یہ ایک طبعی بات ہے کہ لمبے عرصہ میں عارضی طور پر اگر کوئی واقعہ ہوجائے تو انسان اس کو نظرانداز کردیا کرتا ہے۔وہ شخص جو دس پندرہ سال تک تندرست رہے اگر ایک دن اسے بخار ہوجائے تو ہم یہ نہیں کہیں گے کہ وہ بیمار آدمی ہے کیونکہ یہ بیماری ایک لمبے عرصہ میں صرف تھوڑی سی دیر کے لئے اس پر آئی تھی۔اسی طرح بلدالامین میں اس طرف بھی اشارہ ہوسکتا ہے کہ بے شک مکہ پر ایک ایسا حملہ مقدر ہے جو اس کی حلت کو توڑ دے اور بے شک ایک دن محمد رسول اللہ صلی اللہ علیہ وسلم اسے قسراً فتح کریں گے مگر اس سے یہ نہ سمجھنا کہ مکہ بلدالامین نہیں۔اسے خدا تعالیٰ کی طرف سے امن دیا گیا ہے۔اس کی حرمت کو خدا تعالیٰ نے اپنے حکم سے قائم کیا ہے۔محمد رسول اللہ صلی اللہ علیہ وسلم کا اس میں قسراً داخلہ ایک وقتی چیز ہوگا جس کی اللہ تعالیٰ بعض پیشگوئیوں کو پورا کرنے کے لئے اجازت دے گا ورنہ مکہ بلدالامین تھا بلدالامین ہے اور بلدالامین رہے گا۔کوئی شخص اس کی حرمت کو توڑنے کی طاقت نہیں رکھتا۔چنانچہ رسول کریم صلی اللہ علیہ وسلم نے جب مکہ فتح کرلیا تو اس کے بعد آپ نے اعلان فرمایا کہ یہ حملہ صرف میرے لئے مقدر تھا۔آج کے بعد کسی انسان کے لئے جائز نہیں ہے کہ وہ مکہ کی حرمت کو توڑنے کی جرأت کرے۔پس چونکہ ایک زمانہ ابھی ایسا آنا تھا جس میں اللہ تعالیٰ کی طرف سے مکہ کی حرمت کو توڑا جانا مقدر تھا اور خود خدا نے یہ کہنا تھا کہ تمہارے لئے مکہ پر حملہ کرنا جائز ہے اس لیے جب تک وہ موقعہ آکر گزر نہ جاتا مکہ کامل طور پر بلدالامین نہیں کہلا سکتا تھا۔بے شک وہ پہلے بھی بلدالامین تھا اور بعد میںبھی وہ بلدالامین رہا مگر چونکہ درمیان میں ایک وقفہ ایسا آنا تھا جس میں اللہ تعالیٰ کے حکم کے ماتحت مکہ کو قسراًفتح کیا جانا مقدر تھا اس لیے کامل طور پرمکہ اگر بلدالامین کہلا سکتا تھا تو فتح مکہ کے بعد ہی نہ کہ اس سے پہلے۔چنانچہ جب رسول کریم صلی اللہ علیہ وسلم نے مکہ فتح کر لیا تو اس کے بعد آپ نے ہمیشہ کے لیے مکہ کی حرمت کو قائم فرما دیا بہرحال جب تک مکہ فتح نہیں ہوا تھا وہ کلی طور پر بلدالامین نہیں کہلا سکتا تھا کیونکہ ایک سانحہ موجود تھا جس میں اس کی حرمت کو ظاہری نگاہوں میں توڑا جانا تھا کلی طور پر اگر وہ بلدالامین قرار پایا توفتح مکہ کے بعد۔غرض یہ تینوں واقعات فتح مکہ کے ساتھ تعلق رکھتے ہیں۔اگر ایمان کے لحاظ سے مکہ کے امن کو لو توفتح مکہ کے بعد اس میں سے شرک نکلا اور اگر جسمانی لحاظ سے مکہ کے امن کو لو تو فتح مکہ کے بعد کفار کے جورو ستم کا سلسلہ بند ہوا اور اگر مکہ کا مامون ہونا لو تب بھی فتح مکہ کے بعد اسے امن حاصل ہوا جب تک مکہ آنحضرت صلی اللہ علیہ وسلم کے ہاتھ پر فتح نہیں ہوا وہ کامل طور پر بلد الامین نہیں کہلا سکتا تھا کیونکہ ایک سانحہ ابھی
آنے والا تھا جس میں مکہ کی حرمت کو اللہ تعالیٰ کے حکم کے ماتحت محمد رسول اللہ صلی اللہ علیہ وسلم نے توڑنااور اپنے لشکر سمیت اس کو فتح کرنا تھا غرض مکہ کا بلدالامین ہونا خواہ روحانی اور جسمانی لحاظ سے آمن ہونے کی صورت میں لو خواہ مکہ کے مامون ہونے کی صورت میں لو ہر طرح مکہ اگر بلدالامین بنا ہے تو فتح مکہ کے بعد۔اس سے پہلے نہ دینی لحاظ سے اس میں امن تھا نہ جسمانی لحاظ سے اس میں امن تھا اور نہ وہ خود کامل طور پر مامون سمجھا جا سکتا تھا۔اللہ تعالیٰ فرماتا ہے ہم یہ چاروں واقعات تمہارے سامنے پیش کرتے ہیں ان میں سے تین واقعات تو ہوچکے ہیں اور چوتھا ابھی ہونے والا ہے۔تم گزشتہ تین واقعات سے قیاس کر سکتے ہو کہ یہ چوتھا واقعہ بھی ہونے والا ہے اوریہ شہر جو آج محمدرسول اللہ صلی اللہ علیہ وسلم اور ان کے ساتھیوں کے لئے آگ ہے ہجرت کے بعد بلدالامین ہونے والا اوردنیا کو اس بات کی چوتھی شہادت مہیا کرکے دینے والا ہے کہ لَقَدْ خَلَقْنَا الْاِنْسَانَ فِيْۤ اَحْسَنِ تَقْوِيْمٍ۔لَقَدْ خَلَقْنَا الْاِنْسَانَ فِيْۤ اَحْسَنِ تَقْوِيْمٍٞ۰۰۵ یقیناً ہم نے انسان کو موزوں سے موزوں حالت میں پیدا کیا ہے۔حَلّ لغات: اَلتَّقْوِیْم اَلتَّقْوِیْم:اَلتَّعْدِیْل (اقرب) تقویم کے معنے تعدیل کے ہیں یعنی کسی چیز کو صحیح القویٰ بنانا اور ہر قسم کی کجی اور خرابی سے اس کو محفو ظ ر کھنا۔پس اَحْسَنِ تَقْوِيْمٍ کے معنے ہوئے اعلیٰ سے اعلیٰ اورنقص سے پاک اور بے عیب بنانا۔یہ الفاظ انسان کے لئے بطور حال استعمال ہوئے ہیں۔یعنی حَالَ کَوْنِہٖ فِیْ اَحْسَنِ تَقْوِیمٍ یعنی انسان کو ایسا بنایا ہے کہ تعدیل و اصلاح کرنے میں بے نظیر ہے۔یہاںمفسرین کو دقت پیش آئی ہے کہ اعتدال اور تقویم پیدا کرنے والا تو خدا تعالیٰ ہے انسان ایسا کس طرح ہو سکتا ہے؟اس کا جواب بعض لوگوں نے یہ دیا ہے کہ یہاں تقویم سے مراد قِوَام ہے اور مطلب یہ ہے کہ اللہ تعالیٰ نے انسان کو احسن قویٰ کے ساتھ پیدا کیا ہے۔لیکن بعض کہتے ہیں کہ یہاں حذف مضاف ہے اور تقدیر یہ ہے کہ فِیْ اَحْسَنِ قِوَامِ التَّقْوِیْمِ یعنی تقویم کے نتیجہ میں جو قوام پید اہوتا ہے اس کا احسن انسان کو حاصل ہے یعنی اللہ تعالیٰ کی بہترین مخلوق انسان ہے۔اور اسے دوسروں سے زیادہ قوام حاصل ہے۔اس لحاظ سے لَقَدْ خَلَقْنَا الْاِنْسَانَ فِيْۤ اَحْسَنِ تَقْوِيْمٍ کے معنے یہ ہوں گے کہ اللہ تعالیٰ نے اپنی پیدائش کی صفت کا بہترین نمونہ انسان کو بنایا ہے۔بعض نے کہا ہے کہ اس آیت میں فِيْ زائدہ ہے۔اور اَحْسَنِ تَقْوِيْمٍ اللہ تعالیٰ کے لئے حال ہے۔یعنی اللہ تعالیٰ نے انسان کو اپنی احسن تقویم سے