سُوْرَۃُ التِّیْنِ
تفسیر کبیر (جلد ۱۳), حصہ 9
اِلَّا الَّذِيْنَ اٰمَنُوْا وَ عَمِلُوا الصّٰلِحٰتِ فَلَهُمْ اَجْرٌ باستثناء ان لوگوں کے جو ایمان لائے اور جنہوں نے مناسب حال عمل کئے سو ان کے لئے ایک نہ ختم ہونے والا غَيْرُ مَمْنُوْنٍؕ۰۰۷ (نیک) بدلہ ہوگا۔تفسیر۔اس آیت میں اللہ تعالیٰ بعض لوگوں کا استثنیٰ کرتے ہوئے فرماتا ہے کہ وہ لوگ جو ایمان لاتے اور اعمال صالحہ کی بجاآوری میں ہمیشہ مشغول رہتے ہیں ان کو ہم اَسْفَلَ سٰفِلِيْنَ میں نہیں لوٹاتے کیونکہ وہ فطرت کو صحیح راستہ پر چلاتے اور اپنی قوتوں کا جائز اور برمحل استعمال کرتے ہیں۔یہاں سوال پیدا ہوسکتا ہے کہ اللہ تعالیٰ نے احسن تقویم کے ذکر میں ثُمَّ رَدَدْنٰهُ اَسْفَلَ سٰفِلِيْنَ کو پہلے کیوں رکھاہے اور اِلَّا الَّذِيْنَ اٰمَنُوْا وَ عَمِلُوا الصّٰلِحٰتِ کا ذکر پیچھے کیوں کیا ہے؟ اور اس تقدیم و تاخیر میں کیا حکمت ہے۔ا س کا جواب یہ ہے کہ ایمان اور اعمال صالحہ چونکہ طبعی اور فطری قویٰ کے صحیح استعمال کا نام ہے اور جو شخص احکام الٰہیہ پر ایمان لاتا ہے اور پھر ان کے مطابق اعمال صالحہ بھی بجالاتا ہے وہ درحقیقت اس راستہ پر چلتا چلا جاتا ہے جو فطرت کا راستہ ہے اور اس کے نتیجہ میں اسے مذہب جیسی نعمت حاصل ہوتی ہے اور وہ ایمان اور اعمال کی برکات سے متمتع ہوتا ہے۔اس لئے ضروری تھا کہ اللہ تعالیٰ ایسے لوگوں کا اِلَّا کہہ کر علیحدہ طور پر ذکر فرماتا اور اس طرح اَسْفَلَ سٰفِلِيْنَ میں جانے والوں اور فطری استعدادوں سے صحیح طور پر کام لینے والوں میں ایک مابہ الامتیاز قائم ہوجاتا۔رہا یہ سوال کہ اَسْفَلَ سٰفِلِيْنَ میں گرنے والوں کا پہلے کیوں ذکر کیا ہے۔اس کا جواب یہ ہے کہ چونکہ وہ لوگ اپنی پیدائش کے مقصد کو فراموش کرنے والے تھے اس لئے ضروری تھا کہ جب یہ ذکر کیا گیا تھا کہ ہم نے انسان کو معتدل القویٰ پیدا کیا ہے اور اس کی فطرت میں نیکی اور بھلائی کی قوتیں رکھ دی ہیں وہاں ساتھ ہی اس شبہ کا ازالہ بھی کردیاجاتا کہ اگر ایسا ہے تو بعض لوگ بد کیوں ہوتے ہیں۔چنانچہ اس کا جواب یہ دیا ہے کہ گو ہم نے انسان کو اسی مقصد کے لئے پیدا کیا ہے مگر پھر بھی بعض لوگ چونکہ اپنی فطرت کو مسخ کردیتے اور اللہ تعالیٰ کی عطا کردہ قوتوں کا ناجائز استعمال کرتے ہیں وہ مقام رفعت سے گر کر ذلت اور ادبار کے گڑھے میں جا پڑتے ہیں اور انسانیت کے لئے ان کا وجود ننگ و عار کا باعث بن جاتا ہے۔یہ ان کا اپنا قصور ہوتا ہے خدا تعالیٰ اس کا ذمہ دار نہیں۔اس کے بعد اِ
کہہ کر ایمان لانے والوں اور عمل صالح کی بجاآوری میں مشغول رہنے والوں کا استثنیٰ کردیا اور بتادیا کہ جو لوگ احسن تقویم پر قائم رہتے اور اس راستہ پر چلتے چلے جاتے ہیں جو فطرت صحیحہ کا ہے اللہ تعالیٰ ان کو دولت ایمان سے مشرف کردیتاہے۔اور انہیں اس بات کی بھی توفیق عطا فرما دیتا ہے کہ وہ اعمال صالحہ بجالائیں۔گویا ایمان اور عمل صالح کا راستہ فطرت صحیحہ کی لائن کے ساتھ ساتھ چلتا ہے۔جو لوگ فطرت کو بگاڑ لیتے ہیں اور اپنے قوائے استعدادیہ سے صحیح رنگ میں کام نہیں لیتے وہ تو اَسْفَلَ سٰفِلِيْنَ میں جاگرتے ہیں لیکن وہ لوگ جو فطری اور طبعی راستہ پر چلتے چلے جاتے ہیں اپنی قوتوں کو برمحل استعمال کرتے ہیں اور فطرت کو مسخ کرنے کی کوشش نہیں کرتے ان کو ایمان بھی عطا کیا جاتا ہے اور ان میں اعمال صالحہ بھی پیدا ہوجاتے ہیں۔ایسے لوگ اَسْفَلَ سٰفِلِيْنَ میں نہیں لوٹائے جاتے بلکہ اللہ تعالیٰ کی طرف سے ان کو غَيْرُ مَمْنُوْنٍ یعنی جزائے غیر مقطوع حاصل ہوتی ہے اور اس طرح صحیح علم اور اس کے صحیح استعمال کی وجہ سے وہ ہمیشہ کے لئے اعلیٰ انعامات کے مستحق ہوجاتے ہیں۔اٰمَنُوْا میں صحیح علم کی طرف اشارہ ہے یعنی وہ علم جو مناسب حال ہو اور عَمِلُوا الصّٰلِحٰتِ میں اس علم کے صحیح استعمال یعنی صحیح عمل کی طرف اشارہ ہے اور یہی دو چیزیں ہیں جو روحانی ترقی میں کام آیا کرتی ہیں۔فَمَا يُكَذِّبُكَ بَعْدُ بِالدِّيْنِؕ۰۰۸ پس اس (حقیقت کے کھل جانے) کے بعد کون سی چیز تجھ کو جزاء سزا کے معاملے میں جھٹلاتی ہے۔حلّ لُغات۔کَذَّبَہٗ کَذَّبَہٗ کے معنے ہوتے ہیں نَسَبَہٗ اِلَی الْکِذْبِ اس کی طرف کذب کا ارتکاب منسوب کیا۔قَالَ لَہٗ اَنْتَ کَاذِبٌ یعنی اس کی نسبت کہا کہ تو جھوٹا ہے وَجَعَلَہٗ کَاذِبًا یا اس کو کاذب قرار دیا (اقرب)۔اَلدِّیْن اَلدِّیْنُ کے معنے ہیں اَلْـجَزَاءُ وَالْمُکَافَاۃُ جزا سزا۔اَلطَّاعَۃُ اطاعت۔اَلْـحِسَابُ حساب۔اَلْقَہْرُ وَالْغَلَبَۃُ وَالْاِسْتِعْلَاءُ غلبہ۔اَلسُّلْطَانُ وَالْمُلْکُ وَالْـحُکْمُ بادشاہت۔اَلتَّدْبِیْـرُ تدبیر۔اِسْـمٌ لِّـجَمِیْعٍ مَّایُعْبَدُ بِہِ اللہ مختلف مذاہب کا عبادت کا طریق۔اَلْوَرَعُ پاکیزگی۔اَلْمَعْصِیَۃُ گناہ۔اَلْاِکْرَاہ جبر۔اَلْمِلَّۃُ مذہب۔اَلْعَادَۃُ عادت۔اَلْقَضَاءُ قضاء۔اَلْـحَالُ حال۔اَلشَّاْنُ شان (اقرب)۔تفسیر۔کشاف کے نزدیک فَمَا يُكَذِّبُكَ بَعْدُ بِالدِّيْنِ سے مراد یہ ہے کہ کون سی چیز تجھے ان دلائل کے بعد اس بات پر ابھارتی ہے کہ جزا سزا کا انکار کرکے تو کاذب ہوجائے۔گویا ان کے نزدیک يُكَذِّبُكَ کا خطاب کفار
سے ہے اور اس کے معنے جھٹلانے کے نہیں بلکہ اپنے آپ کو جھوٹا اور کاذب بنانے کے ہیں۔عام طور پر ان معنوں کو قبول کیا گیا ہے۔مگر یہ درست معلوم نہیں ہوتے۔یہاں خطاب رسول کریم صلی اللہ علیہ وسلم سے ہے اور قاضی اور فراء کا یہی قول ہے اور مراد یہ ہے کہ جزا سزا کے متعلق اب تیری کون تکذیب کرسکتا ہے۔(فتح البیان زیر آیت فَمَا يُكَذِّبُكَ بَعْدُ بِالدِّيْنِ) فَمَا يُكَذِّبُكَ میں مَا کے معنے یہ امر یاد رکھنا چاہیے کہ مَا اپنے معروف معنوں کے سوا کبھی مصدریہ ہوتا ہے اور کبھی مَنْ کے معنے بھی دیتا ہے یہاں مصدری معنوں میں استعمال نہیں ہوا بلکہ یا تو اپنے معروف معنوں میں یعنی غیرذوی الا رواح کے لئے استعمال ہوا ہے یا مَنْکے معنوں میں استعمال ہوا ہے(منجد)۔اگر یہاں مَا کا استعمال غیر ذی روح کے لئے سمجھا جائے تو فَمَا يُكَذِّبُكَ کے معنے ہوں گے وہ کون سی چیز ہے جو تجھے جھٹلاتی ہے اور اگر مَا کو مَنْ کے معنوں میں سمجھا جائے تو فَمَا يُكَذِّبُكَ بَعْدُ بِالدِّيْنِ کے معنے ہوں گے وہ کون سا شخص ہے جو تجھے جھٹلاتا ہے۔فَمَا يُكَذِّبُكَ کے چھ معنے اس دلیل کے بعد اور بِالدِّيْنِ کے معنے ہوں گے دین یا جزا سزا کے متعلق (با کے معنے اس صورت میں فِیْ کے کئے جائیں گے )یا دین کے ذریعہ سے یعنی یہ تین مثالیں جو اوپر پیش کی جا چکی ہیں کہ آدمؑ آئے شیطان نے ان کا مقابلہ کیا اور اس نے سمجھا کہ میں آدمؑ کو شکست دینے میں کامیاب ہوجائوں گا مگر آخر شیطان نے ہی شکست کھائی اور آدم ؑکامیاب وبامراد ہوا۔پھر نوحؑ آئے دشمن نے ان کا مقا بلہ کیا ان کو ناکام کرنے کے لئے اس نے پورا زور لگایا اور سمجھا کہ میں نوحؑکو شکست دینے میں کا میاب ہو جائوں گا مگر آخر نوحؑہی کامیاب ہوئے اور ان کا دشمن ناکامی کی حالت میں تباہ ہو گیا۔اس کے بعد موسٰی آئے ان کے مقابل میں بھی دشمن اپنے لشکر سمیت اٹھا اور اس نے موسٰی کو ناکام کرنے کے لئے پورا زور لگایا مگر آخر موسٰی ہی کا میاب ہوئے اور دشمن نا کام ہوا۔ان تین مثالوں کے بعد تیرے دشمن کس دلیل کی بنا پر تجھے جھٹلا سکتے ہیں اور کون سی بات ہے جو وہ تیرے خلاف پیش کر سکتے ہیں۔وہ کہیں گے کہ تو کمزور اور نا تواں ہے تو ہمارے مقا بلہ میں کا میاب نہیں ہو سکتا مگر کیا وہ نہیں دیکھتے کہ آدمؑ بھی کمزور تھا۔نوحؑبھی کمزور تھا۔موسٰی بھی کمزور تھا۔اور ان کے متعلق بھی یہی سمجھا جاتا تھا کہ وہ کا میاب نہیں ہوں گے پھر اگر وہ اپنی کمزوری کے با وجود کا میاب ہو گئے تو تو کمزور ہونے کے باوجود ان پر کیوں غالب نہیں آسکتا۔وہ کہیں گے تو نہتہ ہے اس لئے ہمارے مقابلہ میں تو جیت نہیں سکتا۔مگر وہ اس بات کا کیا جواب دیں گے کہ آدم بھی نہتہ تھا۔نوح بھی نہتہ تھا، موسیٰ بھی نہتہ تھا۔پس وہ اگر نہتے ہو کر دنیا پر غالب آگئے تو تُو نہتہ ہو کر کیوں دنیا پر
غالب نہیں آسکتا؟ غرض فرماتا ہے فَمَا يُكَذِّبُكَ بَعْدُ بِالدِّيْنِ اے محمد رسول اللہ صلی اللہ علیہ وسلم ان مثالوں کے بعد یہ لوگ تیرے انعام پانے اور اپنے ہلاک ہونے میں دین حقہ کی بناء پر کس طرح شک کر سکتے ہیں۔ان مثالوں کے بعد کون سی دلیل ہے جو ان کو شبہ میں مبتلا رکھ سکتی ہے یا کون سا انسان ہے جو دین کی بناء پر تیری تکذیب کرسکتا ہے۔گذشتہ انبیاء کے واقعات تیری صداقت کو روز روشن کی طرح واضح کر رہے ہیںاور ہر شخص جو تعصّب سے خالی ہوکر ان پر غور کرے وہ یہ اقرار کرنے پر مجبور ہوگا کہ فطرت صحیحہ آخر بنی نوع انسان کی مدد کے لئے ابھر آ تی ہے اور بنی نوع انسان دیر تک صداقت کا انکار نہیں کر سکتے۔پس جس فطرت کے ہتھیار سے سابق انبیاء اپنے مقاصد میں کامیاب ہوئے اسی طرح تو بھی اپنے مقصد میں کامیاب ہو جائے گا۔دنیا بےشک مخالفت کرے وہ جس قدر منصوبے سوچنا چاہتی ہے سوچ لے۔آخر وہی ہو گا جو ہمیشہ سے ہوتا چلا آیا ہے کہ فطرت صحیحہ خدا کے رسول کی مدد کے لئے اٹھ کھڑی ہوئی اور وہ غالب آگیا۔اور اس کے دشمن ذلت اور ناکامی کی موت مرے۔دوسرے معنے اس آیت کے یہ ہیں کہ ان پہلی تین مثالوں کی موجودگی میں خدا تعالیٰ کی طرف سے آنے والے دین یعنی الہامی دین کا یہ لوگ کس طرح انکار کر سکتے ہیں۔ان معنوں کے رو سے یہاں دین کے معنے جزا سزا کے نہیں ہوں گے بلکہ دین کے معنے شریعت کے ہوں گے اور آیت کا یہ مفہوم ہوگا کہ ان دلائل کے بعد دین کے معاملہ میں کون شخص تیرا انکار کر سکتا ہے جب وہ مانتے ہیں کہ آدمؑ کو بھی الہام ہوا۔نوحؑکو بھی الہام ہوا۔موسٰی کو بھی الہام ہوا اور یہ لوگ خدا تعالیٰ کی طرف سے لوگوں کے لئے دین لائے تو اب یہ کس طرح کہتے ہیں کہ خدا تعالیٰ کی طرف سے الہام نہیں ہو سکتا یا اس کی طرف سے کوئی نیا دین لوگوں کی ہدایت کے لئے نازل نہیں ہو سکتا۔تیسرے معنے اس آیت کے یہ ہیں کہ ان دلائل کے بعد آیا کوئی بھی مذہبی دلیل تیرے خلا ف پیش کی جا سکتی ہے یقیناً اگر وہ غور کریں تو انہیں تیری تکذیب کے لئے کسی مذہبی دلیل کا سہارا نہیں مل سکتا کیونکہ آدمؑ،نوحؑاورابراہیمؑ کی سنت تجھ سے پہلے موجود ہے جس معیار پر ان نبیوں کو پرکھا گیا اگر انہی دلائل پر تجھے پرکھا جائے تو تیری صداقت یقیناً ثابت ہو گی۔تکذیب کا موجب وہی دلیل ہو سکتی ہے جس کی زَد ان کے مسلمہ نبیوں پر نہ پڑتی ہو اور یہ ایسی کوئی دلیل پیش نہیں کر سکتے۔ان کے عقلی ڈھکونسلے تیرے ہی خلاف نہیں پڑتے بلکہ سب سابقہ انبیاء کے خلاف بھی پڑتے ہیں۔چوتھے معنے اس آیت کے یہ ہیں کہ کیا اس کے بعد کوئی شخص بھی یہ سمجھ سکتا ہے کہ میں تدبیر کرکے تجھے جھوٹا
ثابت کر دوں گا۔یہ بتایا جا چکا ہے کہ دین کے ایک معنے تدبیر کے بھی ہوتے ہیں۔پس آیت کا یہ مطلب ہوا کہ کیا اتنے بڑے نشانوں کے بعد جو ہم نے تیری صداقت میں ظاہر کئے ہیں کوئی شخص یہ خیال بھی کر سکتا ہے کہ تو ہار جائے گا اور دشمن جیت جائے گا۔آدمؑ آیا تو دشمن نے اس کے خلاف کتنی تدابیر کی تھیں نوحؑ آیا تو اس کو ناکام بنانے کے لئے دشمن نے کیسی کیسی تدابیر اختیار کی تھیں۔موسٰی آیا تو اس کی شکست کے لئے فرعون اور اس کے ساتھیوں نے کیسی کیسی کوششوں سے کام لیا تھا۔پھر اگر پہلے انبیاء کے دشمن نا کا م ہوگئے اور ان کی تدابیر کسی کام نہ آئیںتو یہ لوگ کس طرح خیال کر سکتے ہیں کہ ہم محمد رسول اللہ صلی اللہ علیہ وسلم کے مقا بلہ میں اپنی تدابیر سے غالب آجائیں گے۔پانچویں معنے اس آیت کے یہ ہیں کہ تقویٰ قائم رکھتے ہوئے کون شخص تیری مخالفت کرے گا۔کیونکہ دین کے ایک معنے ورع یعنی تقویٰ اور روحانیت کے بھی ہیں اور مطلب یہ ہے کہ خدا تعالیٰ کی خشیت اور اس کی سزا کا خوف اپنے دل میں رکھتے ہوئے اور تقویٰ اور روحانیت کی راہوں پر چلتے ہوئے کوئی شخص تیری مخالفت نہیں کر سکتا۔صرف وہی گندے اور ناپاک طبع دشمن تیری مخالفت میں کھڑے ہو سکتے ہیں جن کے اندر تقویٰ کا ایک شائبہ بھی نہ ہو اور جو نیکی اور روحانیت کے مقام سے ایسے ہی دور ہوں جیسے مشرق سے مغرب دور ہوتا ہے۔چھٹے معنے یہ ہیں کہ اب اس کے بعد کون اِکراہ کے ساتھ تیری تکذیب کرے گا یعنی سابق دشمنوں کا انجام دیکھ کر پھر کون بد نیت ہوگا جو جبر کے ہتھیار سے تیرا مقابلہ کرنا چاہے اور یہ خیال کرے کہ میں مار پیٹ کر سیدھا کر لوں گا پہلے نبیوں کو بھی مارنے پیٹنے کی دھمکیاں دی گئی تھیں مگر کیا ان کے دشمن کامیاب ہو گئے دشمن کا اکراہ اس کے کسی کام نہ آیا اور اس کا جبر خدا تعالیٰ کے دین کی اشاعت کو روک نہ سکا۔ان مثالوں کے بعد اب ان لوگوں کے دلوں میں یہ خیال کس طرح آسکتاہے کہ ہم نے اگر جبرو تشدد سے کام لیا تو ہم کامیاب ہو جائیں گے اللہ تعالیٰ کا دین بہرحال پھیل کر رہے گا۔اسلام دنیا پر غالب آئے گا اور کسی قسم کی روک اس کی ترقی میں حائل نہیں ہو سکے گی۔اَلَيْسَ اللّٰهُ بِاَحْكَمِ الْحٰكِمِيْنَؒ۰۰۹ کیا (اب بھی کوئی خیال کر سکتا ہے کہ )اللہ سب حاکموں سے بڑا حاکم نہیں؟ تفسیر۔فرماتا ہے کیا ان سارے دلائل اور نصیحتوں کو سن کر بھی ان کی سمجھ میں یہ بات نہیں آتی کہ اللہ تعالیٰ
سے بہتر فیصلہ کرنے والا اور کوئی نہیں۔جس بات کا وہ فیصلہ کر دے اس کو دنیا کی کوئی بڑی سے بڑی طاقت بھی روک نہیں سکتی۔اس نے فیصلہ کیا کہ آدمؑ کامیاب ہو سو وہ کامیاب ہو گیا۔اس نے فیصلہ کیا کہ نوحؑکو اپنے دشمنوں پر غلبہ حاصل ہو سو اسے غلبہ حاصل ہو گیا اس نے فیصلہ کیا کہ موسٰی کو ترقی حاصل ہو سو اسے ترقی حاصل ہو گئی اب اس نے فیصلہ کیا ہے کہ محمد رسول اللہ صلی اللہ علیہ وسلم کو ترقی دے سو اسے ترقی حا صل ہو جائے گی۔اور مکہ والوں کی ہوائی باتیں اللہ تعالیٰ کے فیصلہ کے مقابلہ میں ٹھہر نہیں سکیں گی اور دنیا دیکھ لے گی کہ آخری فیصلہ اللہ تعالیٰ ہی کے ہاتھ میں ہے۔