سُوْرَۃُ الْقَدْرِ
تفسیر کبیر (جلد ۱۳)
سُوْرَۃُ الْقَدْرِ مَکِّیَّۃٌ سورۃ القدر۔یہ سورۃ مکّی ہے۔وَھِیَ خَـمْسُ اٰیَاتٍ دُوْنَ الْبَسْمَلَۃِ وَ فِیْہَا رُکُوْعٌ وَّاحِدٌ اوراس کی بسم اللہ کے سوا پانچ آیات ہیں اور ایک رکوع ہے۔سورۃ القدر مکی ہے سورۃالقدر مکی سورۃ ہے (فتح البیان زیر سورۃ القدر) لیکن بعض مفسرین نے کہا ہے کہ یہ مدنی ہے چنانچہ واحدی کا قول ہے کہ ھِیَ اَوَّلُ سُوْرَۃٍ نَزَلَتْ بِالْمَدِیْنَۃِ یہ پہلی سورۃ ہے جو مدینہ میں نازل ہوئی (روح المعانی زیر سورۃ القدر)۔مفسرین کے نزدیک لفظ جمہور کا خلاف اصول استعمال اس سورۃ پر بحث کرتے ہوئے مفسرین نے جمہور کی عجیب تعریف کی ہے بعض کہتے ہیں عِنْدَالْـجُمْھُوْرِ مَکِّیَّۃٌ اور بعض کہتے ہیں عِنْدَالْـجُمْھُوْرِ مَدَنِیَّۃٌ۔معلوم نہیں وہ کون سے جمہور ہیں جن کا یہاں ذکر کیا گیا ہے کہ جمہور کے نزدیک یہ مکی بھی ہے اور جمہور کے نزدیک یہ مدنی بھی ہے۔لطیفہ یہ ہے کہ مفسرین یہ تو کہتے ہیںکہ جمہور کے نزدیک یہ سورۃ مدنی ہے مگر کسی صحابی کانام نہیں لیتے کہ فلاں فلاں نے اس سورۃ کو مدنی قرار دیا ہے آخر رسول کریم صلی اللہ علیہ وسلم کے صحابہؓ ہی تھے جو اس کو مکی یا مدنی قرار دے سکتے تھے پس جب ان کے نزدیک جمہور نے اسے مدنی قرار دیا ہے تو چاہیے تھا کہ وہ کچھ صحابہ کا ذکر کرتے اور کہتے کہ فلاں فلاں صحابی نے اسے مدنی قرار دیا ہے مگر باوجود یہ لکھنے کے کہ عِنْدَالْـجُمْھُوْرِمَدَنِیَّۃٌ پھر اس قسم کی روایتوں کا بھی تفاسیر میں ذکر آتا ہے کہ حضرت عبداللہ بن عباس ؓ حضرت عبداللہ بن زبیرؓ اور حضرت عائشہ ؓ کے نزدیک یہ مکی ہے(فتح البیان زیر سورۃ القدر)۔جب صحابہؓ اسے مکی قرار دیتے ہیں تو پھر یہ لکھنے کے کیا معنے ہوئے کہ عِنْدَ الْـجُمْھُوْرِمَدَنِیَّۃٌ اس سے معلوم ہو سکتا ہے کہ جمہور کا محاورہ جو ہماری کتب میں استعمال کیا جاتاہے کیسا خلاف ِ اصول ہے کہ ہر لکھنے والا جب اپنی رائے کے مطابق دو چار لوگوں کی آراء دیکھ لیتا ہے تو فوراً کہنا شروع کر دیتا ہے کہ جمہور کے نزدیک فلاں بات یوں ہے حالانکہ یہ بات واضح ہے کہ ہر صحابی اس امر کا ذکر نہیں کیا کرتا کہ فلاں سورۃ مکی ہے یا مدنی۔صرف چند صحابہ ایسے امور کا ذکر کیا کرتے ہیں اور جب انہوں نے کھلے لفظوں میں اسے مکی قرار
دیا ہے اور مفسرین خود بھی اس امر کو تسلیم کرتے ہیں تو پھر نہ معلوم ان کو کیا خیال آگیا کہ صحابہ ؓ کی اس قطعی رائے کے باوجود انہوں نے اسے مدنی قراردے دیا۔مستشرقین جن میں سے بعض تو دیانتدارانہ طورپر حقیقت کو معلوم کرنے کی کوشش کرتے ہیں اور بعض پادری یا پادری نما جان بوجھ کر یا تعصب سے واقعات کو بدل دیتے ہیں۔انہوں نے بھی اسے مکی ہی قرار دیا ہے۔نولڈ کے مشہور مستشرق بھی اسے سورۂ ضُـحیٰ کے معاً بعد کی قرار دیتاہے۔(A Comprehensive Commentary on the Holy Qur’an by Wherry Vol:iv Page 263) بعض احادیث میں اس کے نزول کی عجیب وجہ بیان کی گئی ہے۔لکھا ہے کہ چار نبیوں کے متعلق یہود میںیہ خیال تھاکہ انہوں نے اسّی ۸۰ سال بلا ناغہ بغیر گناہ کے ارتکاب کے خدا تعالیٰ کی عبادت کی ہے اور وہ چار نبی یہ ہیں ایوب، زکریا، حزقیل، یوشع، جب یہودیوں کا یہ قول صحابہ ؓ نے سنا تو ان کو رشک پیدا ہوا کہ چار آدمی ایسے گذرے ہیں جنہوں نے اسّی سال تک بغیر کسی غلطی کے ارتکاب کے اللہ تعالیٰ کی عبادت کی ہے اس پر یہ سورۃ نازل ہوئی کہ اِنَّاۤ اَنْزَلْنٰهُ فِيْ لَيْلَةِ الْقَدْرِ وَ مَاۤ اَدْرٰىكَ مَا لَيْلَةُ الْقَدْرِ لَيْلَةُ الْقَدْرِ١ۙ۬ خَيْرٌ مِّنْ اَلْفِ شَهْرٍ یعنی تم تو اسّی سال کی عبادت پر رشک کرتے ہو اور اسلام کی یہ کیفیت ہے کہ اگر کسی کو لیلۃ القدر میںاللہ تعالیٰ کی عبادت نصیب ہو جائے تو اس ایک رات کی عبادت ہی ہزار مہینوں یعنی ترا۸۳سی سال کی عبادت سے بڑھ جاتی ہے۔مگر میرے نزدیک یہ روایت قابلِ قبول نہیں اوراسے تسلیم کرنا عقلی طور پر ناممکن ہے کیونکہ اگر واقعہ میںکسی کو اسّی ۸۰ سال عبادت کرنے کا موقع مل جاتا ہے تو اس پر کسی شخص کو محض ایک رات میں عبادت کرنے کی وجہ سے کس طرح فضیلت دی جا سکتی ہے۔اگر کہو کہ ایک رات کی عبادت اتنے سوزو گداز سے لبریز ہو گی ، اتنی محبت اور اللہ تعالیٰ کے اتنے عشق کو ظاہر کرنے والی ہو گی کہ باوجود ایک رات کی عبادت ہونے کے اپنی شان اور عظمت میں اسّی سال کی عبادتوں سے بڑھ جائے گی تو یہ کوئی ایسی بات نہیںتھی جسے خاص طورپر بیان کیا جاتا۔ہر شخص جانتا ہے کہ ایک رات کا بھی سوال نہیں اگر ایک گھنٹہ میں بھی کوئی شخص اپنے اخلاص اور اپنی محبت کا کوئی ایسا ثبوت دے دیتا ہے جو دوسرے کی اسّی ۸۰سالہ زندگی میں بھی نہیں ملتا تو یقیناً اس کے ایک گھنٹے کا اخلاص دوسرے کی اسّی ۸۰ سالہ کوششوں کے نتائج سے بڑھ جائے گا بلکہ میں کہتا ہوں ایک گھنٹے کا بھی سوال نہیں اگر کسی پر ایک منٹ بھی ایسا آجائے تو اس کا وہ ایک منٹ دوسرے شخص کی اسّی۸۰ یا سو۱۰۰ سالہ عبادت سے بڑھ جائے گا۔چنانچہ دیکھ لو حضرت ابراہیم علیہ السّلام پر ایک وقت آیا جبکہ اسّی سال کی عمر کے بعد ان کے ہاں ایک بچہ پیدا ہوا اور پھر جیسا کہ بائبل اور قرآن کریم دونوں سے ثابت ہے جب وہ بڑا ہوا تو اللہ تعالیٰ نے ان کو حکم دیا کہ اپنے اس بیٹے کو خدا کی راہ میں ذبح کر دو۔( الصّٰفّٰت: ۱۰۳۔پیدائش باب ۲۲ آیت ۱تا۱۴)
گومیرے نزدیک اس کی تعبیر یہ تھی کہ اپنے بیٹے کو اس وادیٔ غیر ذی زرع میں چھوڑ آئو جہاںنہ کھانے کو کچھ ملتا ہے نہ پینے کو۔اور اس طرح ظاہری رنگ میں اپنی طرف سے اس پر موت وارد کر دو۔مگر چونکہ اس وقت تک انسانی قربانی کا بھی رواج تھا اللہ تعالیٰ نے اس رنگ میںان کو یہ نظارہ دکھا دیا تا کہ ساتھ ہی اس مسئلہ کو بھی حل کر دیا جائے۔حضرت ابراہیم علیہ السلام نے اپنے زمانہ کے دستور کو دیکھتے ہوئے سمجھا کہ یہ میرا امتحان ہے اور غالباً اللہ تعالیٰ کی مراد یہی ہے کہ اسّی سال کے بعد میرے ہاں جو بیٹا پیدا ہوا ہے میں اسے عملاً اللہ تعالیٰ کی راہ میںذبح کر دوں۔انہوں نے اپنے بیٹے سے ذکر کیا حضرت اسمٰعیل علیہ السلام نے (کہ ہمارے نزدیک وہی تھے جنہوں نے اپنے آپ کو قربانی کے لئے پیش کیا اس اچھی تربیت کے ماتحت جو اپنے ماں باپ سے انہیں حاصل ہو رہی تھی) اس بات پر آمادگی کا اظہار کر دیا اور کہا کہ جب اللہ تعالیٰ کا حکم یہی ہے کہ مجھے ذبح کر دیا جائے تو پھر مجھے اس حکم کی تعمیل میں کوئی عذر نہیں ہو سکتا۔حضرت ابراہیم علیہ السلام اپنے بیٹے کو ذبح کرنے کے لئے جنگل میں لے گئے اور انہوں نے حضرت اسمٰعیل علیہ السلام کو ماتھے کے بل گرادیا وہ چھری پھیرنے کے لئے تیار ہی تھے کہ اللہ تعالیٰ کی طرف سے الہام ہوا يٰۤاِبْرٰهِيْمُ۠ قَدْ صَدَّقْتَ الرُّءْيَا(الصّٰفّٰفت:۱۰۵،۱۰۶) اے ابراہیم تم نے اس رؤیا کو اپنی طرف سے پورا کردیا ہے لیکن ہمارا منشاء یہ نہ تھا تم اس واقعہ کی یادگار میں ایک بکرا ذبح کر دو۔یہ خواب کسی اور صور ت میں پورا ہونے والا ہے۔حضرت ابراہیم علیہ السلام کی وہ گھڑی جس میں وہ اللہ تعالیٰ کی خاطر اپنے بیٹے کو ذبح کرنے کے لئے تیار ہوگئے تھے یقیناً کئی لوگوں کی اسّی اسّی بلکہ سو سو سال کی عبادت سے بھی بڑھ کر تھی۔آخر دنیا میںایسے کئی لوگ موجود ہوتے ہیں جو اسّی سال کی عمر پاتے ہیں بلکہ سو سو سال تک زندہ رہنے والے لوگ بھی دنیا میںپائے جاتے ہیں۔ایسے لوگ بھی پائے جاتے ہیں جنہوں نے ایک سو بیس ، ایک سو تیس۔ایک سو چالیس یا ایک سو پچاس سال کی عمر پائی۔میںنے خود ایک شخص کو دیکھا ہے جنہوں نے ایک سو چالیس سال سے اوپر عمر پائی تھی۔وہ جب میری بیعت کے لئے آئے تو لاہور سے پیدل چل کر آئے تھے۔انہوں نے اپنی عمر کا ذکر کرتے ہوئے مجھے بتایا کہ مہاراجہ رنجیت سنگھ صاحب ایک دفعہ میرے استاد کے پاس کسی کام کے متعلق دعا کرانے کے لئے آئے تھے اور انہوں نے ایک بھینس ان کو تحفہ کے طور پر دی تھی میںاس وقت اتنا جوان تھا کہ وہ بھینس جو مہاراجہ رنجیت سنگھ صاحب نے میرے استاد کو دی اس کے متعلق میرے استاد نے مجھے کہا کہ جائو اور اس کو نہلا لائو۔یہ روایت انہوں نے آج سے بیس سال پہلے بیان کی تھی اگریہ فرض کر لیا جائے کہ اس وقت وہ صاحب بیس پچیس سال کے تھے جب یہ واقعہ ہوا تو چونکہ بیعت
کے وقت تک اندازاً سو سال کا عرصہ اس واقعہ پر گذر چکا تھا اس لئے جب وہ میری بیعت کے لئے آئے اس وقت وہ ایک سو بیس سال کے تھے اور مجھے دوستوں نے بتایا کہ اس کے بعد بھی وہ پندرہ بیس سال زندہ رہے تھے گویا ایک سو چالیس سال سے اوپر عمر انہوں نے پائی اور ایک سو بیس سال کی عمر میں وہ اتنے مضبوط تھے کہ لاہور سے پیدل چل کر قادیان آئے۔اب اگر وہ ساری عمر دین کی طرف متوجہ رہے ہوں اور انہوںنے ایک سو بیس سال تک اللہ تعالیٰ کی عبادت کی ہو تب بھی حضرت ابراہیم علیہ السلام کی وہ ایک گھڑی کی عبادت ان کی ایک سو بیس سالہ عبادت سے بڑھ گئی اور خدا تعالیٰ کے فعل نے بھی نتیجہ ظاہر کر دیا کیونکہ جو سلوک اللہ تعالیٰ نے حضرت ابراہیم علیہ السلام سے کیا ہے وہ ان سے نہیں کیا۔اللہ تعالیٰ تو کسی کی نیکی ضائع نہیںکرتا وہ خود فرماتا ہے فَمَنْْ یَّعْمَلْ مِثْقَالَ ذَرَّۃٍ خَیْرًا یَّرَہٗ (الزلزال :۸) جو شخص ایک ذرہ کے برابر بھی نیکی کرتا ہے وہ اس کے اچھے نتیجہ کو ضرور دیکھ لیتا ہے۔جب اللہ تعالیٰ کسی کی ایک ذرہ کے برابر نیکی بھی ضائع نہیں کرتا تو یہ کس طرح ہو سکتا ہے کہ وہ اس کی ایک سو بیس سال کی عبادت کو ضائع کر دے اور یہ کہنا کہ سوزو گداز اور اخلاص کی وجہ سے بعض دفعہ ایک رات کی عبادت تراسی۸۳ سال کی عبادت سے بڑھ جاتی ہے۔یہ جواب بھی اس موقعہ پر چسپاں نہیں ہو سکتا کیونکہ روایت میںہے کہ پہلے نبیوں نے اسّی سال عبادت کی تھی جس کی خبر سن کر صحابہ کو افسوس ہوا کہ ہم اس کے مقابل پر کیا پیش کریں گے۔اگر یہ روایت اس جگہ چسپاں کی جائے تو پھر اس کے یہ معنے ہوں گے کہ نبیوں کی اسّی سالہ عبادت سے غیر نبی کی ایک رات کی عبادت بڑھ جاتی ہے کیونکہ اس میںزیادہ سوز و گداز ہوتا ہے اور یہ دعویٰ بالبداہت باطل ہے۔بغرض محال یہ درست بھی ہو تو پھر اس مضمون کو ان الفاظ میںبیان کرنا تو بلاغت کے خلاف ہے اس صورت میں تو یوں کہنا چاہیے تھا کہ محمد رسول اللہ صلی اللہ علیہ وسلم کے صحابہ ؓ کے دل اس قدر پاک ہیںکہ ان کے ایک لمحہ کی عبادت یا ان کی ایک رات کی عبادت ان لوگوں کی اسّی سال کی عبادت سے بہتر ہے مگر اس کی بجائے فرمایا یہ گیا ہے کہ ایک خاص رات کی عبادت دوسرے اسّی۸۰ سال کی عبادت سے اچھی ہے اور یہ بات یقیناً اس یہودی روایت کا جواب نہیں ہو سکتی۔کیونکہ صرف ایک رات کو بغیر اور کسی خصوصیت کے دوسرے سالوں پر ترجیح دے دینا عقل کے خلاف ہے اور صرف زبردستی اور دھینگا مشتی ہے جو اللہ تعالیٰ کی شان کے خلاف ہے۔یہ بھی سوچنا چاہیے کہ اگر اس آیت کے یہ معنے ہیں کہ ایک معمولی مومن اور متقی انسان اگر ایک رات عبادت میںگزار دے تو وہ پہلے انبیاء کی اسّی سالہ عبادتوں سے بھی بڑھ جاتاہے تو اس سے بڑھ کر ظلم اور کوئی نہیں ہو سکتا کہ ان انبیاء کو اسّی سال عبادت کرنے کے بعد بھی اتنا انعام نہ ملے جتنا انعام ایک معمولی مسلمان کو محض ایک رات عبادت
کرنے کی وجہ سے دے دیا جائے۔پس اس حدیث کا یہ مفہوم قرآنی تعلیم اور عقل کے بالکل خلاف ہے۔ترتیب۔سورۃ القدر کا سورۃ العلق سے تعلق اس سورۃ کا پہلی سورۃ سے تعلق ظاہر ہے وہاں فرمایاتھا اِقْرَاْ بِاسْمِ رَبِّکَ الَّذِیْ خَلَقَ اپنے رب کے نام کے ساتھ پڑھ جس نے پیدا کیا ہے اور مطلب یہ تھا کہ قرآن پڑھ۔اب اس سورۃ میںقرآن کریم کی فضیلت اور اس کی عظمت کا اظہار کیا گیا ہے اور بتایا گیا ہے کہ اِنَّاۤاَنْزَلْنٰهُ فِيْ لَيْلَةِ الْقَدْرِ یہ قرآن لیلۃ القدر میںنازل کیا گیا ہے یعنی یہ وہ کتاب ہے جو دنیا کی ترقی اور اس کے تنزل کے ساتھ تعلق رکھنے والے تمام فیصلوں پر حاوی ہے یا یوںکہہ لو کہ قرآن کریم دنیا کی ترقی اور اس کے تنزّل کے تمام سامانوں کی تفصیل اپنے اندر رکھتا ہے اور بتاتا ہے کہ آئندہ دنیا کن اصول کے مطابق چل کر ترقی کر سکتی ہے اور کن امور کی پیروی کر کے تباہ ہو سکتی ہے۔جو چیز ایسی اہم ہو کہ اس کو قبول کرنے میںدنیا کی نجات اور اس کو رد کرنے میںدنیا کی تباہی ہو اس کا پڑھنا اور بار بار لوگوںکو سنانا جس قدر ضروری ہو سکتا ہے وہ ایک ظاہر امر ہے ہم تو دیکھتے ہیں دنیا میںلوگ معمولی معمولی باتوں پر ڈھنڈورا پیٹ دیتے ہیں۔عید کا چاند دیکھتے ہیں تو ڈھنڈورا پیٹنا شروع کر دیتے ہیں کہ کل عید ہو گی۔نیا مال آتا ہے تو تاجر اور دکاندار لوگوں میں یہ ڈھنڈورا پیٹ دیتے ہیںکہ فلاں فلاں مال ہمارے پاس آیا ہے آئو اور اسے لے جائو۔کسی بادشاہ کے ہاں بیٹا پیدا ہو تو اعلانات کے ذریعہ اس خبر کی خوب تشہیر کی جاتی ہے حالانکہ بعض دفعہ وہ چند دنوں کے بعد ہی مر جاتا ہے اور بعض دفعہ بڑے ہو کر وہ ایسا نالائق ثابت ہوتا ہے کہ باپ دادا کی ساری سلطنت کو کھو دیتا ہے۔اسی طرح ٹِڈی سے ملک کو نقصان پہنچنے کا احتمال ہو تو گورنمنٹ اخباروں میں اعلانات کراتی ہے کہ ٹڈّی دَل آیا ہوا ہے اس سے بچنے کے لئے احتیاطی تدابیر پر فوری طور پر عمل کرنا چاہیے یا مثلاً گورنمنٹ کو معلوم ہو جائے کہ اس دفعہ غلہ کی اچھی قیمت ہو گی یا کپاس کا نرخ بڑھ جائے گا یا بارشیںزیادہ ہوں گی تو گورنمنٹ بار بار ان باتوں کا اعلان کرتی ہے اور کوشش کرتی ہے کہ ہر شخص کے کان تک یہ باتیں پہنچ جائیں۔جب معمولی معمولی چیزوں کے متعلق ڈھنڈورے پیٹے جاتےاور بڑے جوش سے اعلان کئے جاتے ہیں تو وہ چیز جو بنی نوع انسان کی تقدیر کو لے کرآئی ہو ، جو اپنے اندر دنیا کی ترقی اور اس کے تنزل کے سامانوں کی تفصیل رکھتی ہو ، جس پر عمل لوگوں کو نجات دلانے والااور جس سے انحراف ان کو تباہی کے گڑھے میں گرانے والا ہے اس کا زور و شور سے اعلان کرنا کیوں ضروری نہیں؟ پس اِقْرَاْ بِاسْمِ رَبِّکَ الَّذِیْ خَلَقَ میں جو یہ کہا گیا تھا کہ قرآن کریم کا دنیا میں خوب ڈھنڈورا پیٹو اور اس کی تعلیم کا بار بار اعلان کرو۔اس سورۃمیں اسی مضمون کی طرف اشارہ کرتے ہوئے فرماتا ہے کہ قرآن کریم کا دنیا میں
شائع کرنا اس لئے ضروری ہے کہ ہم نے اس کو ایک اندازہ والے زمانہ میں اتارا ہے یعنی یہ کتاب دنیا کی ترقی اور اس کے تنزل کے متعلق تمام اندازے اپنے اندر رکھتی ہے۔بِسْمِ اللّٰہِ الرَّحْمٰنِ الرَّحِیْمِ۰۰۱ (میں) اللہ کا نام لے کر جو بے حد کرم کرنے والا (اور) بار بار رحم کرنیوالا ہے (شروع کرتا ہوں)۔اِنَّاۤ اَنْزَلْنٰهُ فِيْ لَيْلَةِ الْقَدْرِۚۖ۰۰۲ ہم نے یقیناً اس (قرآن یا محمد رسول اللہ ) کو ایک (عظیم الشان) تقدیر والی رات میں اتارا ہے۔حلّ لُغات۔لَیْلَۃٌ لَیْلَۃٌ اَللَّیْلُ : مِنْ مَّغْرَبِ الشَّمْسِ اِ لٰی طُلُوْعِ الْفَجْرِ الصَّادِقِ اَوْ اِلٰی طُلُوْعِ الشَّمْسِ وَ ھُوَ خِلَافُ النَّـھَارِ۔یعنی سورج کے غروب ہونے کے وقت سے لے کر صبح صادق کے طلوع ہونے کے وقت کو لَیْل کہتے ہیں اور بعض کے نزدیک سورج کے نکلنے تک کے وقت کو اور لَیْل کا لفظ نَـھَار یعنی دن کے بالمقابل بولا جاتا ہے۔بعض علماء لغت کا خیال ہے کہ لَیْلٌ اور لَیْلَۃٌ ایک ہی چیز ہے۔جیسے عربی میں عَشِیٌّ اور عَشِیَّۃٌ ہم معنے ہیں۔لیکن مرزوقی عالمِ لغت کہتے ہیں کہ لَیْل کا لفظ نَـھَار کے مقابل پر بولا جاتا ہے اور لَیْلَۃ کا یَوْم کے مقابل پر (اقرب ) قَدْرٌ قَدْرٌ کے معنے مَبْلَغُ الشَّیْءِ کے ہوتے ہیں یعنی کسی چیز کی جو قیمت ہوتی ہے اس کو قَدْرٌ کہتے ہیں۔اسی طرح قَدْرٌ ایک چیز کے دوسری چیزسے مساوی ہونے کو بھی کہتے ہیں چنانچہ عرب کہتے ہیں ھَذَا قَدْرُ ھٰذَا اَیْ مُـمَاثِلُہٗ وَمُسَاوٍ لَہٗ یعنی فلاں چیز فلاں کے مساوی ہے۔اسی طرح طاقت کے معنوں میں بھی یہ لفظ استعمال ہوتا ہے اور قَدْرٌ کے معنے حرمت کے بھی ہوتے ہیں اور وقار کے بھی ہوتے ہیںاور غِنَاءٌ کے بھی ہوتے ہیں اور قوت کے بھی ہوتے ہیں اور قَدْرٌ کے معنے اَلْوَقْتُ الَّذِیْ یَلْزَمُ لِفِعْلِہٖ کے بھی ہوتے ہیںیعنی جتنے وقت میںکوئی کام ہو سکتا ہو اس کو بھی قَدْرٌ کہتے ہیںاور چونکہ یہ مصدر ہے اس لئے سارے مصدری معنے بھی اس میںپائے جائیںگے۔اس لحاظ سے اس کے معنے تنگی کے بھی ہیںاور حکم کے بھی اور اقتدار کے بھی اور تعظیم کے بھی اور تدبیر کے بھی اور لیلۃ القدر وہ رات بھی ہے جو رمضان کے آخری عشرہ کی طاق راتوں میںسے کسی ایک رات میں آتی ہے(اقرب) قرآن کریم میں بعض اور مقامات پر بھی اس رات کا ذکر آتا ہے مگر وہاں الفاظ اس آیت سے مختلف ہیں۔
ایک جگہ فرماتا ہے اِنَّاۤاَنْزَلْنٰهُ فِیْ لَیْلَۃِ مُّبٰرَکَۃٍ (الدّخان:۴) یعنی ہم نے اسے ایک مبارک رات میں اتارا ہے۔پس لیلۃ القدر لیلۃ المبارکہ بھی ہے ایک دوسری جگہ فرماتا ہے شَهْرُ رَمَضَانَ الَّذِيْۤ اُنْزِلَ فِيْهِ الْقُرْاٰنُ هُدًى لِّلنَّاسِ وَبَيِّنٰتٍ مِّنَ الْهُدٰى وَ الْفُرْقَانِ(البقرۃ:۱۸۶)رمضان کا مہینہ وہ ہے جس میں اللہ تعالیٰ کی طرف سے قرآن اتارا گیا۔ان دونوں آیات پر نظر ڈالنے سے معلوم ہوتا ہے کہ رمضان المبارک کی کسی رات میںقرآن کریم کا نزول ہوا اور اس وجہ سے اس رات کو خاص طور پر مبارک قراردیا گیا۔تفسیر۔اِنَّاۤ اَنْزَلْنٰهُ میں هُ کی ضمیر سے مراد قرآن کریم اِنَّاۤ اَنْزَلْنٰهُ فِيْ لَيْلَةِ الْقَدْرِ کے یہ معنے ہیں کہ ہم نے قرآن کریم کو لیلۃ القدر میںنازل کیا ہے۔چونکہ پہلی سورۃ میںقرآن کریم کا ذکر آچکا تھا اس لئے یہاں بجائے یہ کہنے کے کہ اِنَّاۤ اَنْزَلْنَا الْقُرْاٰنَ فِيْ لَيْلَةِ الْقَدْرِ اللہ تعالیٰ نے صرف اس کی طرف ضمیر پھیر دی اور کہہ دیا کہ اِنَّاۤ اَنْزَلْنٰهُ فِيْ لَيْلَةِ الْقَدْرِ۔کیونکہ یہ بات ہر شخص پہلی سورۃ پر نظر ڈال کر آسانی کے ساتھ سمجھ سکتا تھا اور اس بات کی ضرورت نہیں تھی کہ قرآن کریم کا خاص طورپر نام لیا جاتا۔لفظ لَیْل اور لَیْلَۃ کے استعمال میں ایک فرق لَیْلَۃ اور لَیْل کے معنے رات کے ہوتے ہیں۔مرزوقی عالمِ لغت کا قول ہے کہ لَیْل کا لفظ نَـھَار کے مقابل استعمال ہوتا ہے اور لَیْلَۃ کا لفظ یَوْم کے بالمقابل استعمال ہوتا ہے (اقرب) قرآن کریم میں لَیْل اور لَیْلَۃ دونوں الفاظ استعمال ہوتے ہیںلیکن لَیْل کا لفظ زیادہ استعمال ہوا ہے اور لَیْلَۃ کا کم۔میری گنتی کے مطابق لَیْل کا لفظ ۷۹ دفعہ قرآن کریم میںاستعمال ہوا ہے اور لَیْلَۃ کا لفظ صرف آٹھ دفعہ اور عجیب بات یہ ہے کہ لفظ لَیْلَۃ کا استعمال نزول کلام الٰہی یا اس کے متعلقات کے ساتھ استعمال ہوا ہے۔مثلاً ایک دفعہ رمضان کی رات کے لئے یہ لفظ استعمال ہوا ہے فرماتا ہے اُحِلَّ لَكُمْ لَيْلَةَ الصِّيَامِ الرَّفَثُ اِلٰى نِسَآىِٕكُمْ(البقرۃ: ۱۸۸) یعنی تمہارے لئے روزوں کی راتوں میںاپنی عورتوں سے بے تکلف ہونا جائز ہے اور روزوںکے مہینہ یعنی رمضان کے متعلق آتا ہے شَهْرُ رَمَضَانَ الَّذِيْۤ اُنْزِلَ فِيْهِ الْقُرْاٰنُ (البقرۃ: ۱۸۶) یعنی رمضان میںقرآن اترنا شروع ہوا تھا۔پس رمضان کی راتوں کو لَیْلۃ کے لفظ سے یاد کرنا لَیْلۃٌ کا تعلق کلام الٰہی والے مہینہ سے ظاہر کرتا ہے۔اسی طرح تین جگہ لَیْلۃ کا لفظ حضرت موسٰی کی موعود چالیس راتوں کے متعلق استعمال ہوا ہے اور یہ وہ عرصہ ہے جس میںتورات کے اہم احکام نازل کئے گئے تھے اور جن میں رسول کریم صلی اللہ علیہ وسلم کی بعثت کی پیشگوئی کی گئی تھی۔چنانچہ سورۂ بقرہ میںہے وَ اِذْ وٰعَدْنَا مُوْسٰۤى اَرْبَعِيْنَ لَيْلَةً (البقرۃ:۵۲)اور یاد کرو جب ہم نے موسیٰ سے چالیس راتوں کا وعدہ کیا۔پھر سورۂ اعراف میںآتا ہے وَ وٰعَدْنَا مُوْسٰى ثَلٰثِيْنَ لَيْلَةً وَّ اَتْمَمْنٰهَا بِعَشْرٍ
فَتَمَّ مِيْقَاتُ رَبِّهٖۤ اَرْبَعِيْنَ لَيْلَةً (الاعراف: ۱۴۳) یعنی اللہ تعالیٰ نے پہلے موسیٰ سے تیس راتیں کلام کرنے کا وعدہ کیا مگر بعد میںدس راتیں اور بڑھادیں اور اس طرح اپنے وعدہ کو مکمل کر دیا۔ان تینوں آیتوں میںبھی لَیْلَۃ کالفظ کلام الٰہی کے نزول کے لئے استعمال ہوا ہے۔ان کے علاوہ چار اور مقام پر لَیْلَۃ کا لفظ استعمال ہوا ہے اور چاروں مقامات میںہی نزولِ قرآن کے متعلق نازل ہوا ہے سورۂ دخان میں آتا ہے اِنَّاۤ اَنْزَلْنٰهُ فِيْ لَيْلَةٍ مُّبٰرَكَةٍ (الدّخان:۴) ہم نے اس قرآن کو مبارک رات میں اتارا ہے اور دوسرے اسی سورۃ زیر تفسیر میں ہے۔اِنَّاۤ اَنْزَلْنٰهُ فِيْ لَيْلَةِ الْقَدْرِ ہم نے قرآن کریم کو بڑے اندازہ والی رات میں اتارا ہے پھر اسی سورہ میں اس سے اگلی آیت میں فرماتا ہے وَ مَاۤ اَدْرٰىكَ مَا لَيْلَةُ الْقَدْرِ اور تجھے کس نے بتایا ہے کہ لیلۃالقدر کیا ہے۔پھر اس آیت سے اگلی آیت میں فرماتا ہے لَيْلَةُ الْقَدْرِ١ۙ۬ خَيْرٌ مِّنْ اَلْفِ شَهْرٍ۔لیلۃ القدر ہزار راتوں سے بھی اچھی ہے۔گویا آٹھ مقامات پر لَیْلَۃ کا لفظ استعمال ہوا ہے او ر ہر جگہ نزول کلام الٰہی یا اس کے متعلقات کے متعلق استعمال ہوا ہے۔یہ امر اتفاق نہیں کہلا سکتا ضرور اس میں کوئی حکمت ہے اور لَیْل اور لَیْلَۃ کے استعمال کا یہ فرق بے معنی نہیں ہے۔میرے نزدیک کلام الٰہی والی راتوں کے متعلق لَیْلَۃ کا استعمال اور دوسری راتوں کے متعلق لَیْلٌ کا استعمال عربی زبان کے اس قاعدہ کی وجہ سے ہے کہ حروف کی زیادتی یا بعد میں آنے والے حروف کی تبدیلی ہمیشہ معنوںمیں زور اور قوت پیدا کرنے کے لئے ہوتی ہے مثلاً رَبَسَ اور رَبَضَ کے ملتے جلتے معنے ہیں لیکن رَبَسَ سے رَبَضَ میں زیادہ زور ہے رَبَسَ کے معنے مارنے کے ہوتے ہیں اور رَبَضَ کے معنے ہیں شیر کا اپنے شکار کو دبوچ کر دبا لینا۔یہ ظاہر ہے کہ صرف مارسے شیر کا اس طرح جھپٹا مار کر دبوچ لینا اور اپنے نیچے دبا لینا زیادہ سخت ہے۔اسی طرح قَصم اور قضم دونوں کے معنے توڑنے کے ہیں مگر قصم کے معنے خالی توڑنے کے ہیں اور قضم کے معنے توڑ کر کھا جانے کے ہیں اس لئے کہ ص سے ض بعد میں آتا ہے۔پس ص کا حرف جس لفظ میں آئے گا اسی مفہوم کے اس لفظ کے معنے زیادہ زور دار ہوں گے جس میں ص کی جگہ ض آجائے گا۔اسی طرح مسّ اور مصّ کے الفاظ ہیں مسّ کے معنے چھونے کے ہیں اور مصّ کے معنے اوپر منہ رکھ کر چوسنے کے ہیںیعنی خالی چھونا نہیں بلکہ اُسے اپنی طرف کھینچنا اسی طرح نَسَّ النَّاقَۃَ کے معنی ہیں اسے چلایا اور ڈانٹا اور نَصَّ النَّاقَۃَ کے معنے ہیں اسے چلنے پر خوب انگیخت کیا اور اسے اتنا مجبور کیا کہ وہ اپنی انتہائی طاقت کے مطابق دوڑنے لگی۔اسی طرح فسل اور فصل دونوں لفظ جدائی پر دلالت کرتے ہیں لیکن فصل کی جدائی فسل سے زیادہ ہے کیونکہ ص س کے بعد آتا ہے۔اسی طرح حروف کی
زیادتی سے بھی معنوں میں فرق پڑجاتا ہے مثلاً لَبَبٌ کے معنے ہیں کھلے سینہ والا۔لیکن لَبْلَبٌ جس میں ایک کی جگہ دو لام آجاتے ہیں اس کے معنے ہیں اَلْبَرُّ بِاَھْلِہِ وَالْمُحْسِنُ اِلٰی جِیْرَانِہٖ (اقرب)اپنے اہل سے حد سے زیادہ نیک سلوک کرنے والا اور اپنے ہمسائیوں پر احسان کرنے والا۔گویا خالی سینہ کی وسعت کے معنے ہی نہیں بلکہ اعلی درجہ کا سلوک عملاً کرنے والا لَبْلَبٌ کہلاتا ہے اس لئے کہ لَبَبٌ میںتین حرف ہیں اور لَبْلَبٌ میںچار ہیں۔عربی قواعد میں یہ قاعدہ بیان کیا گیا ہے کہ بعض دفعہ تاء اسم فاعل کے آخر میں مبالغہ کے لئے لگا دی جاتی ہے اور بطور قاعدہ صفت مشبہ کے آخر میں لگائی جاتی ہے اور اس میں مبالغہ کے معنے پیدا ہو جاتے ہیں۔مثلاً راوی عام روایت کرنے والے کو کہتے ہیں اور شعراء کے شعر بیان کرنے والے کو راویۃ کہتے ہیں کیونکہ وہ بالعموم ہزاروں لاکھوں شعروں کی روایت کرتے تھے۔اسی طرح نَسَّاب نسب بیان کرنے والے کو کہتے ہیں اور نَسَّابۃ مبالغہ کے لئے آتا ہے یعنی خوب اچھی طرح نسب بیان کرنے والا(اقرب) پس لَیْل اور لَیْلۃ میںچونکہ لَیْلَۃ کے حروف لَیْل سے زیادہ ہیں اس لئے اس کے معنوں میں لَیْل سے زیادہ وسعت ہے اور یہی وجہ ہے کہ لَیْلَۃ یَوْم کے بالمقابل استعمال ہوتا ہے جس کے معنے نَـھَار سے زیادہ وسیع ہیں اور لَیْل نَـھَار کے بالمقابل استعمال ہوتا ہے جس کے معنے یَوْم سے محدود ہیں۔پس لَیْلَۃ کا لفظ ان راتوں یا اس زمانہ کی نسبت استعمال کر کے جن میںکلام الٰہی نازل ہوتا ہے ان راتوں کی بزرگی اور عظمت کی طرف اشارہ کیا گیا ہے۔چونکہ الٰہی کلام میں اعلیٰ ادب کے قواعد کے مطابق کبھی الفاظ اپنے لغوی معنوں میں استعمال ہوتے ہیں اور کبھی مجازی معنوں میں۔اس آیت کے متعلق بھی یہ سوال ہے کہ آیا اس میں لَیْلَۃ کا لفظ محض رات کے معنوں میں استعمال ہوا ہے یا ایک لمبے تاریک زمانہ کے متعلق۔تمام گزشتہ مفسرین اسی طرف گئے ہیں کہ اس آیت میں لَیَلَۃ کے معنے محض رات کے ہیں اور لَیْلَۃُ الْقَدْر کے معنے ہیں اندازہ کی رات۔مفسرین کے نزدیک سورۂ دخان میں جو اِنَّاۤ اَنْزَلْنٰهُ فِيْ لَيْلَةٍ مُّبٰرَكَةٍ آیا ہے اس سے بھی یہی رات مراد ہے اور یہ رات رمضان کے مہینہ کی رات ہے جیساکہ سورۂ بقرہ میں آتا ہے شَهْرُ رَمَضَانَ الَّذِيْۤ اُنْزِلَ فِيْهِ الْقُرْاٰنُ۔پس لیلۃالقدر سے مراد رمضان کی وہ رات ہے جس میں قرآن کریم نازل ہوا تھا وہ رات مبارک تھی اور اندازہ کی رات تھی یعنی آئندہ خیر و شر کا اندازہ اللہ تعالیٰ نے اس میں کیا(الکشّاف زیر آیت اِنَّاۤ اَنْزَلْنٰهُ فِيْ لَيْلَةٍ مُّبٰرَكَةٍ۔فـتح البیان زیر آیت اِنَّاۤ اَنْزَلْنٰهُ فِيْ لَيْلَةٍ مُّبٰرَكَةٍ۔الجامع لاحکام القراٰن زیر آیت وَ مَاۤ اَدْرٰىكَ مَا لَيْلَةُ الْقَدْرِ)۔قرآن شریف کے نازل ہونے کے متعلق اختلاف ہے بعض کے نزدیک سارا قرآن اسی رات کو لوحِ محفوظ سے اتر کر بیت العزۃ نامی مقام پر آگیا اس کے بعد آہستہ آہستہ تیئیس سال تک
رسول کریم صلی اللہ علیہ وسلم پر نازل ہوا (تفسیر ابن کثیر زیر سورۃ القدر) اسی طرح ابن عباس سے ابن مردویہ نے روایت کی ہے کہ ان سے مقسم نے سوال کیا کہ میرے دل میں ایک شک پیدا ہو گیا ہے۔قرآن کریم میں تو آتا ہے کہ قرآن رمضان کے مہینہ میں نازل ہوا ہے لیکن واقعہ یہ ہے کہ ایک لمبے عرصہ میں کچھ کسی مہینہ میں کچھ کسی مہینہ میں اور کچھ کسی مہینہ میں اترا ہے۔اس پر ابن عباس نے جواب دیا کہ اِنَّہٗ اُنْزِلَ فِیْ رَمَضَانَ فِیْ لَیْلَۃِ الْقَدْرِ وَفِیْ لَیْلَۃٍ مُّبَارَکَۃٍ جُـمْلَۃً وَّاحِدَۃً ثُمَّ اُنْزِلَ عَلٰی مَوَاقِعِ النُّجُوْمِ تَرْتِیْلًا فِی الشُّھُوْرِ وَالْاَیَّامِ(تفسیر ابن کثیر زیر آیت شَهْرُ رَمَضَانَ الَّذِيْۤ اُنْزِلَ فِيْهِ الْقُرْاٰنُ)۔یعنی قرآن کریم سب کا سب ایک ہی بار رمضان کے مہینہ اور لیلۃ القدر کی رات میں جو لیلہ مبارکہ بھی کہلاتی ہے اترا تھا۔مگر زمین پر مختلف مہینوںاور دنوں میں آہستہ آہستہ نازل ہوا۔گویا ان لوگوںکے نزدیک قرآن کریم کے لیلۃ القدر میں اترنے کے معنے یہ ہیں کہ اس رات کو لوح محفوظ سے (یعنی اس مقام سے جہاں ان کے نزدیک ازل سے قرآن کریم لکھا پڑا تھا ) قرآن کریم اتراتھا۔بعض کے نزدیک شہر رمضان میں قرآن کریم اترنے سے مراد اس کے نزول کی ابتدا ء ہے۔چنانچہ علامہ ابن حیان لکھتے ہیں وَقِیْلَ الْاِنْزَالُ ھُنَا ھُوَ عَلٰی رَسُوْلِ اللہِ صَلَّی اللہُ عَلَیْہِ وَسَلَّمَ فَیَکُوْنُ الْقُرْاٰنُ مِـمَّا عُبِّـرَ بِکُلِّہٖ عَنْ بَعْضِہٖ وَالْمَعْنٰی بُدِیَٔ بِاِنْزَالِہٖ فِیْہِ عَلٰی رَسُوْلِ اللہِ صَلَّی اللہُ عَلَیْہِ وَسَلَّمَ(تفسیـر البحر المحیط زیر آیت شَهْرُ رَمَضَانَ الَّذِيْۤ اُنْزِلَ فِيْهِ الْقُرْاٰنُ) یعنی بعض علماء اس کے یہ معنے کرتے ہیں کہ قرآن کے اترنے سے مراد اس کا رسول کریم صلی اللہ علیہ وسلم پر اترنا ہے نہ کہ بیت العزت پر۔اور قرآن کریم اترنے سے مراد اس کے کچھ حصہ کا اترنا ہے۔پس آیت کے یہ معنے ہیں کہ اس مہینہ میں قرآن کریم رسول کریم صلی اللہ علیہ وآلہٖ وسلم پر اترنا شروع ہوا تھا۔بعض نے اُنْزِلَ فِيْهِ الْقُرْاٰنُ کے یہ معنے کئے ہیں کہ رمضان کے بارہ میں قرآن اترا ہے نہ یہ کہ رمضان کے مہینہ میںقرآن اترا ہے۔چنانچہ تفسیر فتح البیان میںلکھا ہے وَ قِیْلَ فِیْ مَعْنَی الْاٰیَۃِ الَّذِیْ نَزَلَ بِفَرْضِ صِیَامِہِ الْقُرْاٰنُ کَمَا تَقُوْلُ نَزَلَتْ ھٰذِہِ الْاٰیَۃُ فِی الصَّلٰوۃِ وَالزَّکٰوۃِ وَ نَـحْوَ ذَ الِکَ ( فتح البیان زیر آیت شَهْرُ رَمَضَانَ الَّذِيْۤ اُنْزِلَ فِيْهِ الْقُرْاٰنُ) یعنی بعض مفسرین نے کہا ہے کہ اس آیت کے یہ معنے ہیں کہ قرآن کریم کی وحی روزوں کی فرضیت کے بارہ میںنازل ہوئی ہے یہ اسی طرح کا استعمال ہے جیسے کہتے ہیں یہ آیت فِی الصَّلٰوۃِ ہے یعنی یہ آیت نماز کے بارہ میں ہے۔عربی لغت سے ثابت ہے کہ فِیْ کے معنے بارہ کے بھی ہوتے ہیں اور اسے فِیْ تعلیلیہ کہتے ہیں یعنی فِیْ کے بعد میں آنے والی چیز فِیْ سے پہلے کے مضمون کا سبب ہوتی ہے۔چنانچہ قرآن کریم میںدوسری جگہ آتا ہے فَذٰلِكُنَّ الَّذِيْ
لُمْتُنَّنِيْ فِيْهِ( یوسف :۳۳) یہ وہ یوسف ہے جس کے بارہ میں یا جس کے سبب سے تم مجھ پر الزام دھرتی تھیں۔اسی طرح حدیث میں ہے عُذِّبَتِ امْرَاَۃٌ فِیْ ھِرَّۃٍ حَبَسَتْـھَا (بخاری کتاب المساقاہ باب فضل سقی الماء ) یعنی ایک عورت ایک بلی کو بے کھلائے پلائے باندھ دینے کی وجہ سے دوزخ میںڈالی گئی۔انہی معنوں میں فِیْ کا حرف آیت اُنْزِلَ فِيْهِ الْقُرْاٰنُمیں استعمال ہوا ہے اور ا س کے معنے یہ ہیں کہ رمضان ایسا مہتم بالشان مہینہ ہے کہ اس کے بارہ میں قرآنی حکم نازل ہوا ہے یعنی قرآن میں جو احکام نازل ہوئے ہیں وہ اہم اور ضروری احکام ہیں۔جس بارہ میں قرآن میں حکم آیا ہو سمجھ لینا چاہیے کہ وہ اہم حکم ہے۔صحفِ ابراہیم، توراۃ، انجیل کے رمضان میں اترنے کے متعلق ایک روایت اور اس کا صحیح مطلب جن لوگوں کے نزدیک اس آیت کے یہ معنے ہیں کہ رمضان کی ایک خاص رات میں سارا قرآن لوح محفوظ سے سماء الدنیا کے بیت العزۃ میں اترا یا جن کے نزدیک اس آیت کے یہ معنے ہیں کہ رمضان کی ایک خاص رات کو قرآن کریم کی پہلی وحی نازل ہوئی۔ان میں اس خاص رات کے متعلق بھی اختلاف پایا جاتا ہے اور اس کے متعلق مختلف احادیث بھی بیان کی جاتی ہیں۔چنانچہ مسند احمد حنبل میںابن الاسقع سے روایت نقل کی گئی ہے کہ رسول کریم صلی اللہ علیہ وآلہٖ وسلم نے فرمایا اُنْزِلَتْ صُـحُفُ اِبْرَاہِیْمَ فِیْ اَوَّلِ لَیْلَۃٍ مِّنْ رَّمَضَانَ وَ اُنْزِلَتِ التَّوْرَاۃُ لِسِتٍّ مَّضَیْنَ مِنْ رَمَضَانَ وَالْاِنْـجِیْلُ لِثَلَاثَ عَشْـرَۃَ خَلَتْ مِنْ رَّمَضَانَ وَاَنْزَلَ اللہُ الْقُرْاٰنَ لِاَرْبَعٍ وَّعِشْـرِیْنَ خَلَتْ مِنْ رَّمَضَانَ (مسند احمد بن حنبل عن واثلۃ ابن الاسقع )۔یعنی رسول کریم صلی اللہ علیہ وسلم نے فرمایا کہ ابراہیم ؑ کے صحیفے تو رمضان کی پہلی رات میںاترے تھے اور موسٰی کی کتاب تورات رمضان کے چھ دن گزرنے کے بعد یعنی ساتویںتاریخ کو اور انجیل تیرھویں کے گزرنے پر یعنی چودھویں رمضان کو اور اللہ تعالیٰ نے قرآن کریم رمضان کی چوبیس راتیں گزرنے پر نازل کیا۔بعض لوگوں نے اس سے مراد چھٹی تیرھویں اور چوبیسویںراتیں لی ہیں مگر میرے نزدیک چونکہ گذرنے کے بعد کے الفاظ ہیں اس لئے ساتویں، چودھویںاور پچیسویںراتیں بھی مراد ہو سکتی ہیں۔بہر حال اس روایت میں بتایا گیا ہے کہ نہ صرف قرآن کریم بلکہ پہلی کتب بھی رمضان کی خاص خاص راتوں میں اتری تھیں ایک روایت جابر بن عبداللہ سے ابن مردویہ میں بھی مروی ہے اس میں یہ زائد بات بھی بیان ہے کہ زبور رمضان کی بارہ تاریخوں کے گزرنے پر نازل ہوئی اور انجیل کی نسبت لکھا ہے کہ وہ اٹھارہ دن گزرنے پر نازل ہوئی۔ان روایات سے معلوم ہوتا ہے کہ (۱) قرآن کریم ہی نہیںدوسری کتب بھی رمضان میں ہی اتری ہیں (۲) ان کے
نزول میں ایک ترتیب مد نظر رکھی گئی ہے پہلے شروع رمضان میں کتاب اتری پھر ہفتہ بعد پھر ہفتہ بعد پھر کچھ دنوں بعد آخری چوبیسویںیا پچیسویںکو قرآن کریم نازل ہوا۔اگر ان احادیث کو ظاہر پر محمول کیا جائے تو ان کا مفہوم قرآن کریم، عقل اور نقل کے خلاف معلوم ہوتا ہے۔قرآن کریم کے خلاف اس لئے کہ قرآن کریم میںاللہ تعالیٰ فرماتا ہے کہ شَهْرُ رَمَضَانَ الَّذِيْۤ اُنْزِلَ فِيْهِ الْقُرْاٰنُ (البقرۃ:۱۸۶) یعنی رمضان کا مہینہ وہ ہے کہ جس میں قرآن کریم اترا ہے۔اگر پہلے انبیاء کا کلام بھی رمضان میںہی اترا تھا تو رمضان کی فضیلت اور بھی بڑھ جاتی ہے اور چاہیے تھا کہ قرآن کریم فرماتا کہ رمضان کا مہینہ تو وہ ہے جس میںہم نے سب کتب سماویہ اتاری ہیںلیکن قرآن کریم ان کا ذکر تک نہیںکرتا۔اس میں کوئی شک نہیں کہ کسی امر کا ذکر نہ کرنے سے اس کا انکار واجب نہیں آتا لیکن چونکہ ان معنوں کے رو سے ماننا پڑتا ہے کہ رمضان کے مہینہ کی فضیلت بتانی مقصود ہے اور پہلی کتب کا بھی رمضان میں اترنا اس کی فضیلت کو بڑھا دیتا ہے اس لئے ا س امر کا اس جگہ بیان کرنا نہایت ضروری تھا لیکن قرآن کریم نے یہاں اس بات کا ذکر نہیں کیا اور نہ کسی اور جگہ جس سے معلوم ہوتا ہے کہ اگر یہ حدیث درست ہے تو ا س کے معنے ظاہری الفاظ کے مطابق نہیںہیں۔دوسرا اعتراض ان روایات پر عقلی طور پر پڑتا ہے اور وہ یہ کہ رمضان قرآن کریم کے نزول کی وجہ سے مبارک ہو گیا۔یہ امر تو سمجھ میںآسکتا ہے لیکن یہ امر کہ جو کلام بھی اترے وہ رمضان میںاترے اس کی کوئی وجہ عقل سے معلوم نہیں ہوتی۔دوسرا عقلی اعتراض اس پر یہ پڑتا ہے کہ رمضان قمری مہینہ ہے اور اپنی جگہ بدلتا رہتا ہے اگر ایک خاص وقت کو کلام الٰہی سے کوئی خا ص تعلق ہو تو یہ امر بھی سمجھ میں آسکتا ہے لیکن جبکہ یہ مہینہ یہود میں رائج نہ تھا وہ یہ سمجھ بھی نہ سکتے تھے کہ ابراہیم ؑ یا موسٰی یا دائود ؑ یا مسیحؑ کے الہامات کب نازل ہوئے ہیں اور اگر کوئی خاص فائد ہ اس نزول میں تھا تو اس سے نفع نہیں اٹھا سکتے تھے کیونکہ انہیں اس امر کا نہ علم تھا اور نہ علم ہو سکتا تھا۔پھر ا س بات کی تعیین سے کیا فائدہ کہ کلام الٰہی ضرور رمضان میںاترے۔الٰہی فعل کسی حکمت سے خالی کس طرح ہو سکتا ہے ؟ تیسرا عقلی اعتراض ان روایات پر یہ پڑتا ہے کہ ان میں حضرت ابراہیم، موسیٰ، دائود اور عیسیٰ کا ذکر تو آتا ہے لیکن اور نبیوں کا ذکر نہیں آتا۔روایات بتاتی ہیں کہ پہلی رمضان کو حضرت ابراہیم ؑ پر کتاب اتری۔ساتویں کو حضرت موسٰی پر۔بارھویںکو حضرت دائود ؑ پر اور اٹھارھویں کو حضرت مسیحؑ پر۔اس سے ظاہر ہے پہلے نبی پر رمضان کی پہلی تاریخ میں۔دوسرے نبی پر اس کے بعد کی تاریخ میں۔تیسرے نبی پر اس کے بعد کی تاریخ میں۔چوتھے نبی پر اس کے بعد کی تاریخ میں کتاب نازل ہوئی گویا صرف رمضان میں کتاب کا اترنا ہی مقدر نہ کیا گیا تھا بلکہ رمضان کی