سُوْرَۃُ الْبَیِّنَۃِ
تفسیر کبیر (جلد ۱۳), حصہ 6
اللہ تعالیٰ یہ بیان فرماتا ہے کہ وہ جہنم کی آگ میں داخل کئے جائیں گے اور اُس میں رہتے چلے جائیں گے پھر فرماتا ہے اُولٰٓىِٕكَ هُمْ شَرُّ الْبَرِيَّةِ یہی وہ لوگ ہیں جو تمام مخلوق میں سے بد ترین ہیں۔اس کے مقابل میں مومنوں کا ذکر کرتے ہوئے فرماتا ہے اُولٰٓىِٕكَ هُمْ خَيْرُ الْبَرِيَّةِ وہ لوگ تمام مخلوق میں سے بہتر ہیں۔شر اور خیر کے الفاظ ایسے ہیں جو ہیں تو اِسم تفضیل مگر کثرتِ استعمال کی وجہ سے اُن کا ہمزہ اُڑگیا ہے اس لئے اشر اور اخیر کی شکل میں استعمال نہیں ہوتے۔شَرُّ الْبَرِيَّةِ اور خَيْرُ الْبَرِيَّةِ کا مطلب شَرُّ الْبَرِيَّةِ کے معنے ہیں بنی نوع انسان میں سب سے بد تر یعنی یہ لوگ صرف بُرے نہیں بلکہ تمام مخلوق میںسے بد ترین ہیں اور خَيْرُ الْبَرِيَّةِ کے یہ معنے ہیں کہ وہ لوگ جو ایمان لائے اور جنہوں نے نیک اعمال کئے وہ تمام مخلوق میںسے بہترین ہیں۔گویا کفار سب سے بُرے ہیں اور مومن سب سے اچھے ہیں یہاں سوال پیدا ہوتا ہے کہ اہل کتاب اور مشرکین کن دوسرے لوگوں سے بُرے ہیں۔جبکہ اہل کتاب اور مشرکین کے علاوہ غیر مسلم دنیا میں اور کوئی قوم ہی نہیں؟ میں بتا چکا ہوں کہ قرآن کریم میں جب بھی اہل کتاب اور مشرکین کا ذکر کیا جائے تو اُس سے مراد تمام غیر مسلم دنیا ہوتی ہے کیونکہ غیر مسلم دو حلقوں میں ہی تقسیم کئے جا سکتے ہیں یا وہ اہل کتاب ہوںگے یا وہ مشرک ہوں گے۔پس جب کہ دنیا میں صرف دو ہی گروہ پائے جاتے ہیں۔اہل کتاب اور مشرک۔تو سوال یہ ہے کہ اہل کتاب اور مشرک بُرے کن سے ہوئے۔اسی طرح جب مومنوں کے سوا دنیا میں اور کوئی ایماندار جماعت ہی نہیں تو وہ اچھے کن سے ہوئے؟ بے شک ایک زمانہ ایسا گذرا ہے جب الگ الگ قوموں کی طرف الگ الگ انبیاء مبعوث ہوا کرتے تھے اور ہر قوم صرف اپنے نبی پر ایمان لانے کی پابند تھی اُسے یہ ضرورت نہیں تھی کہ وہ دوسری قوم کے نبی پر بھی ایمان لائے اُس وقت اگر یہ کہا جاتا کہ مومن تمام مخلوق میں سے بہترین ہیں تو خیال کیا جا سکتا تھا کہ اس سے مراد یہ ہے کہ وہ زرتشتی مومنوں سے اچھے ہیں یا کرشنی مومنوں سے اچھے ہیں یا موسوی مومنوں سے اچھے ہیں مگر جب مومنوں کا ایک ہی گروہ ہے تو وہ اچھے کس سے ہوئے۔اسی طرح جب اہل کتاب اور مشرکین کے سوا اور کوئی کافر ہی نہیں تو وہ بُرے کس سے ہوئے؟ یہ ایک بہت بڑا سوال ہے جو اس مقام پر پیدا ہوتا ہے کہ جب کافروں کے سوا اور کوئی کافر ہی نہیں تو وہ بُرے کس سے ہوئے اور جب مومنوں کے سوا اور کوئی مومن ہی نہیں تو وہ اچھے کس سے ہوئے؟ درحقیقت ان آیات میں رسول کریم صلی اللہ علیہ وسلم کی اُمت کا پہلے انبیاء کی اُمتوں سے مقابلہ کیا گیا ہے اسی طرح محمد رسول اللہ صلی اللہ علیہ وسلم کے دشمنوں کا مقابلہ پہلے انبیاء کے دشمنوں سے کیا گیا ہے اور اسی بناء
پر شَـرُّ الْبَـرِیَّۃ اور خَــیْـــرُ الْــبَـرِیَّۃ کے الفاظ استعمال کئے گئے ہیں اور مطلب یہ ہے کہ اہل کتاب اور مشرکین میں سے جنہوں نے محمد صلی اللہ علیہ وسلم کا انکار کیا ہے وہ پہلے تمام انبیاء کے دشمنوں سے بدتر ہیں اور وہ لوگ جنہیں محمد رسول اللہ صلی اللہ علیہ وسلم پر ایمان لانے کی سعادت حاصل ہوتی ہے وہ پہلے تمام انبیاء کی اُمتوں سے اچھے ہیں۔پس شَـرُّ الْبَـرِیَّۃ اور خَیْـرُ الْبَـرِیَّۃ کے الفاظ موجودہ زمانہ کی مخلوق کے لحاظ سے نہیں کہ یہ سوال پیدا ہو کہ جب مومنوں کے سوا اور کوئی مومن ہی نہیں تو وہ اچھے کس سے ہوئے؟ اور جب کفار کے سوا اور کوئی کافر ہی نہیں تو وہ برے کس سے ہوئے؟ بلکہ یہ الفاظ پہلے زمانہ کے لوگوں کے مقابل میں ہیں۔اور اُولٰٓىِٕكَ هُمْ شَرُّ الْبَرِيَّةِ کے معنے یہ ہیں کہ محمد صلی اللہ علیہ وسلم کے منکر موسٰی کے منکروں سے بھی بد تر ہیں۔عیسٰیؑ کے منکروں سے بھی بدتر ہیں۔کرشنؑ کے منکروں سے بھی بدتر ہیں۔زرتشتؑ کے منکروں سے بھی بد تر اور اُولٰٓىِٕكَ هُمْ خَيْرُ الْبَرِيَّةِ کے معنے یہ ہیں کہ محمد صلی اللہ علیہ وسلم کے مومن موسٰی کے مومنوں سے بھی اچھے ہیں۔عیسٰیؑ کے مومنوں سے بھی اچھے ہیں کرشنؑ کے مومنوں سے بھی اچھے ہیں۔زرتشتؑ کے مومنوں سے بھی اچھے ہیں۔غرض اُن کا مقابلہ پہلی اقوام کے ساتھ کیا گیا ہے اور اس مقابلہ کی بناء پر ہی کفار کو شَـرُّ الْبَـرِیَّۃ اور مومنوں کو خَیْـرُ الْبَـرِیَّۃ کہا گیا ہے کیوں؟ اس لئے کہ رسول کریم صلی اللہ علیہ وسلم وہ تعلیم لائے تھے جو فِیْھَا کُتُبٌ قَیِّمَۃٌ کی مصداق تھی، جو صحفِ مطہّرہ پر مشتمل تھی اور جس میں تمام انبیاء سابقین کی اعلیٰ تعلیم شامل تھی۔پس نوحؑ کی اُمّت نے صرف نوحؑکی تعلیم پر عمل کیا، موسٰی کی اُمت نے صرف موسٰی کی تعلیم پر عمل کیا۔عیسٰیؑ کی اُمّت نے صرف عیسیٰؑ کی تعلیم پر عمل کیا۔کرشنؑ کی اُمّت نے صرف کرشنؑ کی تعلیم پر عمل کیا۔زرتشتؑ کی اُمّت نے صرف زرتشتؑکی تعلیم پر عمل کیا۔مگر فِيْهَا كُتُبٌ قَيِّمَةٌ کے ماتحت محمد صلی اللہ علیہ وسلم کی اُمت نے نوحؑکی تعلیم پر بھی عمل کیا، موسٰی کی تعلیم پر بھی عمل کیا، عیسٰیؑ کی تعلیم پر بھی عمل کیا، کرشنؑ کی تعلیم پر بھی عمل کیا، زرتشتؑکی تعلیم پر بھی عمل کیا۔جس قوم نے سب نبیوں کی تعلیم پر عمل کر لیا وہ پہلی تمام اقوام سے اچھی نہیں ہوگی تو کیا ہوگی۔فرض کرو زید کے پاس آنہ ہے، بکر کے پاس دونّی ہے، عمرو کے پاس چونّی ہے، خالد کے پاس اٹھنّی ہے، سلیم کے پاس روپیہ ہے۔اِسی اثناء میں ایک اور آدمی باہر سے آجاتا ہے اُس کا نام عبد اللہ ہے اور اُس کے پاس روپیہ بھی ہے، اٹھنّی بھی ہے، چونّی بھی ہے، دونّی بھی ہے اور اکنّی بھی ہےتو لازماً عبد اللہ، زید سے بھی مالدار ہوگا، بکر سے بھی مالدار ہوگا، عمرو سے بھی مالدار ہوگا، خالد سے بھی مالدار ہوگا اور سلیم سے بھی مالدار ہوگا۔پس چونکہ رسول کریم صلی اللہ علیہ وسلم کے متعلق اللہ تعالیٰ نے یہ فرمایا تھا کہ يَتْلُوْا صُحُفًا مُّطَهَّرَةً اور قرآن کریم کے متعلق یہ بتایا گیا تھا کہ فِيْهَا كُتُبٌ قَيِّمَةٌ اس لئے فرمایا کہ اِنَّ الَّذِيْنَ اٰمَنُوْا وَ عَمِلُوا الصّٰلِحٰتِ١ۙ
اُولٰٓىِٕكَ هُمْ خَيْرُ الْبَرِيَّةِ وہ قوم جو محمد رسول اللہ صلی اللہ علیہ وسلم کو ماننے والی ہے باقی تمام اقوام سے اچھی ہے کیونکہ ساری قوموں کی تعلیموں پر اس نے عمل کیا ہے اس کے مقابل میں دشمن کو شَـرُّ الْبَـرِیَّۃ کیوں کہا گیا؟ اس لئے کہ نوحؑکے دشمن نے صرف نوحؑکی تعلیم کا انکار کیا تھا موسٰی کے دشمن نے صرف موسٰی کی تعلیم کا انکار کیا تھا۔عیسٰیؑ کے دشمن نے صرف عیسٰیؑ کی تعلیم کا انکار کیا تھا۔کرشنؑ کے دشمن نے صرف کرشنؑ کی تعلیم کا انکار کیا تھا زرتشت کے دشمن نے صرف زرتشتؑ کی تعلیم کا انکار کیا تھا مگر محمد صلی اللہ علیہ وسلم کے دشمن نے نوحؑکی تعلیم کا بھی انکار کیا۔موسٰی کی تعلیم کا بھی انکار کیا۔عیسٰیؑ کی تعلیم کا بھی انکار کیا۔کرشنؑ کی تعلیم کا بھی انکار کیا زرتشتؑکی تعلیم کا بھی انکار کیا۔اِسی طرح ایک لاکھ چوبیس ہزار انبیاء جو مختلف اوقات میں اللہ تعالیٰ کی طرف سے مبعوث ہوئے اُن سب کی تعلیم کا اُس نے انکار کیا۔پس وہ شَــرُّ الْـبَـرِیَّۃ یعنی تمام مخلوق میں سے بدترہے۔گویا صُحُفًا مُّطَهَّرَةً اور فِیْھَا کُتُبٌ قَیِّمَۃٌ کا لازماً یہ نتیجہ تھا کہ منکر شَـرُّ الْبَـرِیَّۃ ہوں اور مومن خَیْـرُ الْبَـرِیَّۃ۔جَزَآؤُهُمْ عِنْدَ رَبِّهِمْ جَنّٰتُ عَدْنٍ تَجْرِيْ مِنْ تَحْتِهَا اُن کا بدلہ اُن کے رب کے حضور میں قائم رہنے والے باغات ہوں گے جن کے تلے نہریں بہتی ہوں گی۔الْاَنْهٰرُ خٰلِدِيْنَ فِيْهَاۤ اَبَدًا١ؕ رَضِيَ اللّٰهُ عَنْهُمْ وَ رَضُوْا وہ اُن میں ہمیشہ ہمیش رہتے چلے جائیں گے اللہ اُن سے راضی ہو گیا اور وہ اُس ( اللہ) سے راضی ہو گئے۔عَنْهُ١ؕ ذٰلِكَ لِمَنْ خَشِيَ رَبَّهٗؒ۰۰۹ یہی (جزا) اس کے لئے ہے جو اپنے رب سے ڈرتا ہے۔تفسیر۔جَنّٰتُ عَدْنٍ سے مراد ہمیشہ کی جنات جَنّٰتُ عَدْنٍ کے معنے بعض تفاسیر میں یہ لکھے ہوتے ہیں کہ ’’عدن کی جنتیں‘‘۔مگر یہ صحیح نہیں۔عربی زبان میںعدن کےمعنے ’’ہمیشہ ‘‘کے ہوتے ہیں۔پس جَنّٰتُ عَدْنٍ تَجْرِيْ مِنْ تَحْتِهَا الْاَنْهٰرُ کے معنے یہ ہیں کہ اُن کو ہمیشہ قائم رہنے والی جنتیں ملیں گی جن کے ساتھ نہریں بھی متعلق ہوں گی۔یہ نہیں ہوگا کہ جیسے لائل پور اور سرگودھا وغیرہ میں زمیندار نہروں سے پانی حاصل کرتے ہیں اسی طرح جنتیوںکو بھی دوسروں کی نہروں سے پانی لینا پڑے بلکہ ہر جنت کی اپنی نہر ہوگی اور جنتیوں کو ان پر
تصرف کا پورا حق حاصل ہوگا۔رَضِيَ اللّٰهُ عَنْهُمْ وَ رَضُوْا عَنْهُ۔’’اللہ تعالیٰ اُن سے راضی ہوگیا اور وہ اللہ تعالیٰ سے راضی ہوگئے‘‘ اللہ تعالیٰ اُن سے کیوں راضی ہوا؟ اس لئے کہ لِيَعْبُدُوا اللّٰهَ مُخْلِصِيْنَ لَهُ الدِّيْنَ١ۙ۬ حُنَفَآءَ وَ يُقِيْمُوا الصَّلٰوةَ وَ يُؤْتُوا الزَّكٰوةَ پر انہوں نے پوری طرح عمل کیا۔جب یہ صفات اُن کے اندر پائی جاتی ہیں تو اللہ تعالیٰ اُن سے کیوں راضی نہ ہو اور وہ اللہ تعالیٰ سے کیوں راضی ہوگئے؟ اس لئے کہ جَزَآؤُهُمْ عِنْدَ رَبِّهِمْ جَنّٰتُ عَدْنٍ تَجْرِيْ مِنْ تَحْتِهَا الْاَنْهٰرُ ایک معاملہ انہوں نے خدا تعالیٰ سے کیا اور ایک معاملہ خدا تعالیٰ نے اُن سے کیا۔دنیا میں تمام مذہبی لڑائیاں اور فسادات اِس وجہ سے واقعہ ہوتے ہیں کہ لوگ غلطی سے ایک جہت کا نام مذہب رکھ لیتے ہیں حالانکہ اصل مذہب نام ہے اِس بات کا کہ بندے اللہ تعالیٰ سے راضی ہوں اور اللہ تعالیٰ اپنے بندوں سے راضی ہو اُن کے اعمال ایسے ہوں کہ خدا تعالیٰ کی رضا اُن کو حاصل ہو رہی ہو اور خدا تعالیٰ کا سلوک اُن سے یہ ہو کہ وہ اُن پر اپنے انوار اور برکات کی بارش برسا رہا ہو۔یہ بھی کیا مذہب ہے کہ نماز پڑھ رہے ہیں، روزے رکھ رہے ہیں، زکوٰۃ دے رہے ہیں، حج کر رہے ہیں اور خدا ہے کہ بولتا ہی نہیں وہ چُپ کر کے بیٹھا ہوا ہے۔کسی نے کہا ہے ؎ اُلفت کا تب مزا ہے کہ دونوں ہوں بے قرار دونوں طرف ہو آگ برابر لگی ہوئی رَضِيَ اللّٰهُ عَنْهُمْ وَ رَضُوْا عَنْهُ میں اللہ تعالیٰ نے یہی نکتہ بیان فرمایا ہے اور بتایا ہے کہ ہم اِس مذہب کے قائل نہیں کہ بندہ محبت کی آگ میں پُھنکا جا رہا ہو، فرقت کی گھڑیاں اس کو تڑپا رہی ہوں، وصلِ یار کی آرزو اس کے دِل بے تاب میں جذبات کا ایک تلاطم برپا کر رہی ہو، اُس کے دن تڑپتے اور راتیں جاگتے گذر رہی ہوں اور خدا ہو کہ آسمان پر خاموش بیٹھا ہو اور اُس کی طرف سے کوئی محبت کی آواز اُس کے کانوں میں نہ آتی ہو۔یا خدا تعالیٰ تو بُلا رہا ہو اور بندہ اُس کی محبت کے ہاتھ کو پرے کر رہا ہو۔حقیقی عشق اور محبت میں ایسا کبھی نہیں ہو سکتا۔حقیقی محبت اِسی کو کہتے ہیں جب ع دونوں طرف ہو آگ برابر لگی ہوئی اِدھر بندہ اللہ تعالیٰ کی محبت میں گداز ہو رہا ہو اور اُدھر عرش پر اللہ تعالیٰ اپنے بندہ کی محبت کے لئے بے قرارہو۔یہی وہ مقام ہے جو رَضِيَ اللّٰهُ عَنْهُمْ وَرَضُوْا عَنْهُ کا ہے۔حصہ آیت رَضِيَ اللّٰهُ عَنْهُمْ وَ رَضُوْا عَنْهُ سے دین اسلام کی فضیلت پس رَضِيَ اللّٰهُ عَنْهُمْ
وَرَضُوْا عَنْهُ ایک معیار ہے جو ہر سچے مذہب میں پایاجاتا ہے۔جو مذہب صرف ایک طرف کی چیز پیش کرتا ہے دوسری طرف کی نہیں وہ مذہب کچھ بھی چیز نہیں۔جیسے عیسائی ہیں کہ وہ شریعت کو لعنت قرار دے رہے ہیں۔اب اللہ تعالیٰ اُن کو خواہ کتنا بُلائے وہ اس سے کبھی نہیں بولیں گے کیونکہ انہوںنے شریعت کو لعنت قرار دیا ہوا ہے۔جب شریعت اُن کے نزدیک لعنت ہے تو وہ اُس پر عمل کس طرح کر سکتے ہیں اور عمل کے نتائج اُن کو کس طرح حاصل ہو سکتے ہیں۔اِس کے مقابل میں یہودیوں کو دیکھ لو یا موجودہ زمانہ کے مسلمانوں پر ہی نظر دوڑاؤ تمہیں دکھائی دے گا کہ وہ تسبیح پھیر رہے ہیں، ناکیں رگڑ رہے ہیں مگر اللہ تعالیٰ کی طرف سے کوئی حرکت ہی نہیں ہوتی۔مذہب یہی ہے کہ اِدھر بندہ کی طرف سے عبادت ہو اور اُدھر اللہ تعالیٰ کی طرف سے جواب ہو۔بندہ اپنے رب سے راضی ہو اور اللہ تعالیٰ اپنے بندہ سے راضی ہو۔ذٰلِكَ لِمَنْ خَشِيَ رَبَّهٗ۔یہ آیت اس غرض کے لئے نازل کی گئی تھی کہ آئندہ زمانہ میں مسلمان یہ نہ سمجھ لیں کہ رَضِيَ اللّٰهُ عَنْهُمْ وَرَضُوْا عَنْهُ کا مقام صرف صحابہؓ کے ساتھ تعلق رکھتا ہے مگر افسوس کہ مسلمانوں نے باوجود اِس واضح آیت کے غلطی سے یہ سمجھ لیا کہ رَضِيَ اللّٰهُ عَنْهُمْ وَرَضُوْا عَنْهُ کا انعام صرف صحابہؓ کے ساتھ مختص تھا اب آئندہ یہ انعام کسی اور شخص کو نہیں مل سکتا۔حالانکہ اللہ تعالیٰ صاف طور پر فرماتا ہے کہ ذٰلِكَ لِمَنْ خَشِيَ رَبَّهٗ۔اس میں صحابہؓ کی کوئی خصوصیت نہیں اُنہوں نے چونکہ اپنے اندر وہ صفات پیدا کر لی تھیں جو ہم چاہتے تھے اِس لئے اُنہیں یہ مقام حاصل ہو گیا اب اگر کوئی اور شخص یہ صفت اپنے اندر پیدا کر لے توہم اسے بھی یہ مقام دینے کے لئے تیار ہیں۔یہ انعام کسی خاص قوم کے ساتھ تعلق نہیں رکھتا بلکہ صفات حسنہ کے ساتھ تعلق رکھتا ہے۔جو لوگ اپنے اندر ہماری بیان کردہ صفات پیدا کر لیں ہم انہیں فوراً اپنا انعام دینے کے لئے تیار ہوجاتے ہیں۔غرض اللہ تعالیٰ نے اس آیت میںمسلمانوں کی ایک بہت بڑی غلط فہمی کا ازالہ کیا ہے اور بتایا ہے کہ اللہ تعالیٰ کے انعامات کسی خاص فرد یا کسی خاص قوم کے ساتھ مخصوص نہیں بلکہ ذٰلِكَ لِمَنْ خَشِيَ رَبَّهٗ ہماری یہ بات ہر اُس شخص کے متعلق پوری ہوجائے گی جو اپنے رب کی خشیت دل میں پیدا کرے۔یہ سوال نہیں کہ زید کرے گا تو اُسے یہ انعام ملے گا اور بکر کرے گا تو اُسے نہیں ملے گا بلکہ ہمارا دروازہ اور ہماری رضا کے مقام کا حصول ہر شخص کے لئے کھلا ہے جو شخص اِس انعام کا طالب ہے وہ آئے اور ہماری رضا حاصل کر لے۔ذٰلِكَ لِمَنْ میں ذٰلِكَ سے مراد رضا ذٰلِكَ کا اشارہ رضا کی طرف ہے اور مراد یہ ہے کہ ہماری رضا
کا دروازہ ہر ایسے شخص کے لئے کھلا ہے جو اپنے قلب میں اللہ تعالیٰ کی خشیت رکھتا اور اُس کے احکام پر مستعدی سے عمل کرتا ہے۔ہم اپنے کام کے ذمہ وار ہیں اور تم اپنے کام کے ذمہ وار ہو۔تم اپنے اندر خشیت پیدا کرو اور ہم سے راضی ہو جاؤ ہم وعدہ کرتے ہیں کہ ہم بھی تم سے راضی ہوجائیں گے۔گویا پہلا قدم تمہاری طرف سے اُٹھنا چاہیے پھر ہمارے قدم کا اٹھنا تو بالکل لازمی اور یقینی ہے۔تم اپنے اندر خشیت پیدا کرو گے تو یہ یقینی بات ہے کہ ہم تم سے خوش ہو جائیں گے۔یہ بات نہیں کہ رَضِيَ اللّٰهُ عَنْهُمْ وَرَضُوْا عَنْهُ کا انعام صرف صحابہؓ کے لئے تھا بلکہ جو شخص بھی اپنے اندر ہماری خشیت پیدا کرلے گا ہمارا یہ دروازہ اُس کے کھلا ہے اور ہمیشہ کھلا رہے گا۔