سُوْرَۃُ اللَّھَبِ

تفسیر کبیر (جلد ۱۵)

سُوْرَۃُ اللَّھَبِ مَکِّیَّۃٌ سورۃ اللھب۔یہ سورۃ مکّی ہے وَھِیَ سِتُّ اٰیَاتٍ مَعَ الْبَسْمَلَۃِ اور اس کی بسم اللہ سمیت چھ آیات ہیں۔سورۃ لہب مکّی ہے سورۃ اللّہب مکی سورۃ ہے اوراس بارہ میں کوئی اختلاف نہیں۔ابن مردویہ نے حضرت ابن عباس، حضرت عائشہ اور ابن الزبیر سے روایت کی ہے کہ یہ سورۃ مکہ میں نازل ہوئی تھی۔( فتح القدیر سورۃ اللّہب) تفسیر اتقان میں علامہ سیوطی نے جو ترتیب نزول مختلف راویوں سے بیان کی ہے اس میں سورۃ اللّہب کو پانچویں نمبر پر بیان کیا ہے یعنی ان کی تحقیقات میں سب سے پہلے سورۃ العلق نازل ہوئی پھر نون والقلم پھر مزّمّل پھر مدّثّر پھر سورۃ اللّہب۔(الاتقان النوع الاول فی معرفۃ المکی والمدنی ) گویا یہ سورۃ بالکل ابتدائی سورتوں میں سے ہے۔وہیری کے نزدیک اس سورۃ کا نزول نبوت کے پانچویں یا چھٹے سال ہواتھا۔ترتیب و تعلق مضمون کے اعتبار سے سورۃ اللّہب قرآن کریم کی آخری سورۃ ہے۔کیونکہ ہماری ترتیب کے لحاظ سے اس پر قرآن کریم کا مضمون ختم ہوجاتا ہے۔اس کے بعد کی تین سورتوں میں قرآن کریم کا خلاصہ بیان کر دیا گیا ہے۔سورۃ لہب کا تعلق پہلی سورۃ سے اس سورۃ کا پہلی سورۃ سے یہ تعلق ہے کہ پہلی سورۃ میں رسول کریم صلی اللہ علیہ وسلم کو یہ تسلی دی گئی تھی کہ وہ فتوحات جو آپ کو ہورہی ہیں وہ آپ کی حیات تک محدود نہیں بلکہ ان فتوحات کے دروازے آپ کی وفات کے بعد بھی کھلے رہیں گے۔یہاں تک کہ اسلام دنیا پر غالب آجائے گا۔اور پھر یہ بھی بیان کیا گیا تھا کہ جب بھی اسلام کو کسی ایسے شخص کی ضرورت ہو گی جو اس کی کشتی کو بھنور سے نکالے اور اس کا جھنڈا سر نگوں نہ ہونے دے۔اللہ تعالیٰ اس وقت کسی ایسے شخص کو کھڑا کر دے گا اور اُمّت محمدیہ کی دستگیری فرمائے گا۔سورۃ لہب کا خلاصہ مضمون سورۂ لہب میں سورۃ نصر کے مضمون کو مکمل کیا گیا ہے اور بتایا گیا ہے کہ صرف یہی نہیں ہوگا کہ رسول کریم صلی اللہ علیہ وسلم کی وفات کے بعد فتوحات کے دروازے کھلتے چلے جائیں گے اور اسلام

غالب ہو جائے گا بلکہ اگر کسی نے اسلام کومٹانے کے لئے اس پر حملہ کیا تو اللہ تعالیٰ اس حملہ آورکو تباہ کر دے گا نہ صرف اس کو بلکہ ان کو بھی جو اس حملہ آور کی تائید میں ہوں گے۔ایسے لوگ جو اسلام کے خلاف حملہ آور ہونے والے تھے ان کو اس سورۃ میں ابو لہب کے نام سے پکارا ہے۔اور ان کو جو ایسے لوگوں کی تائید میں ہوں گے بیوی کے لفظ سے تعبیر کیا ہے۔گویا ابو لہب سے مراد ائمہ کفر ہیں اوراس کی بیوی سے مراد ان کے اتباع۔جیسا کہ آدم علیہ السلام کی بیوی سے مراد آدم کے اتباع بھی ہیں۔گویا اس سورۃ میں سورۂ نصر میں بیان ہونے والے مضمون سے پیداشدہ ایک سوال کا جواب دیاگیا ہے اور وہ یہ کہ طبعی طور پر دل میں خیال آسکتا تھا کہ اگر رسول کریم صلی اللہ علیہ وسلم کے بعد فتوحات کے دروازے کھل بھی گئے اور اسلام غالب بھی آگیا۔لیکن پھر کسی وقت کوئی ایسا زبردست دشمن پیدا ہوگیا جس نے اسلام پرحملہ کر کے اس کے غلبہ کو ختم کردیا تو اس عارضی غلبہ کا کیا فائدہ؟ اس سوال کا جواب سورۂ لہب میں دیا گیا ہے اور بتایا گیا ہے کہ اے محمد رسول اللہ ! یہ امر اچھی طرح یاد رکھیں کہ نہ صرف یہ کہ اسلام غالب آئے گا بلکہ اس کا غلبہ دائمی ہوگا اگر کسی وقت کسی دشمن نے اسلام پر حملہ کرکے اس کو مٹانے کی کوشش کی توا للہ تعالیٰ اپنی زبردست طاقت سے ایسے دشمن کو تباہ کر دے گا اور اسلام کی کمزوری کو دور کرکے پھر اس کو غالب کردے گااور اگر اسلام کے اندرکسی وقت ضعف پیدا ہوا تو وہ تھوڑی دیر کے لئے ہو گا اور اس کے بعد پھر سے اسلام کا سورج ساری دنیا کو منوّر کرنے لگ جائے گا۔اس سورۃ کا تعلق سورۂ کوثر سے بھی ہے۔سورۂ کوثر میں رسول کریم صلی اللہ علیہ وسلم سے دو وعدے کئے گئے تھے۔(۱)کثرت جماعت کا وعدہ۔(۲) دشمنوں کی تباہی کا وعدہ۔گویا پہلے وعدہ کے پورا ہونے کا ذکر سورۃ نصر میں کیا گیا ہے اور دوسرے وعدے کے پورا ہونے کا ذکر سورۂ لہب میں ہے۔اللہ تعالیٰ نے اس سورۃ کو بالکل ابتدائی زمانہ میں نازل فرما کر مسلمانوں کی ہمت بندھائی کہ گھبرائو نہیں گو تم کمزور اور ضعیف ہو۔لیکن تمہارا مددگار وہ طاقت ور خدا ہے کہ جس کے منشاء کے ماتحت زمین و آسمان کے ذرّات حرکت میں آتے ہیں۔پس جو بھی تمہاری مخالفت کرے گا وہ رسوا و خوار ہو گا اور تباہی کا منہ دیکھے گا۔پھر مضمون کے اعتبار سے اس سورۃ کو بالکل آخر میں رکھا تا آئندہ آنے والی نسلوں کے حوصلے بلند ہوں اور کسی زمانہ میں کفر کی طاقت کو دیکھ کر مسلمان گھبرا نہ جائیں۔بلکہ یہ یقین رکھیں کہ اسلام کا خدا غالب خدا ہے اور وہ اس کے دشمنوں کو خود تباہ کر دے گا۔گویا سورۃ نصر اور سورۃ لہب اُمت کے نام دو آخری پیغام ہیں۔ایک زیادتیٔ ایمان اور ترقیٔ ایمان کی طرف لے جاتا ہے اور دوسرا کفر کی ہلاکت کی طرف ذہن کو منتقل کرتا ہے۔

سورۃ لہب کا سبب نزول اس سورۃ کے سبب نزول کے متعلق مختلف روایات تفاسیر میں بیان ہوئی ہیں۔سب سے پہلی روایت یہ آتی ہے:۔قَالَ ابْنُ عَبَّاسٍ کَانَ رَسُوْلُ اللہِ صَلَّی اللہُ عَلَیْہِ وَسَلَّمَ یَکْتُمُ اَمْرَہٗ فِیْ اَوَّلِ الْمَبْعَثِ وَیُصَلِّی فِیْ شِعَابِ مَکَّۃَ ثَلَاثَ سِنِیْنَ اِلیٰ اَنْ نَزَلَ قَوْلُہٗ تَعَالیٰ وَاَنْذِرْ عَشِیْرَتَکَ الْاَقْرَبِیْنَ فَصَعِدَالصَّفَا وَنَادٰی یَااٰلَ غَالِبٍ فَــخَـرَجَتْ اِلَیہِ غَــالِــبٌ مِّـنَ الْـمَـــسْـــجِـــدِ فَــقَــالَ اَ بُـــوْلَھَبٍ ھٰــذِہِ غَــالِبٌ قَدْ اَتَـتْـکَ فَـمَــا عِــنْـدَکَ ثُمَّ نَـادٰی یَا اٰلَ لُــؤَیٍّ فَــرَجَــعَ مَــنْ لَّــمْ یَــکُــنْ مِّــنْ لُــؤَیٍّ فَقَالَ اَ بُــوْ لَــھَــبٍ ھٰــذِہٖ لُـــؤَیٌّ قَــدْ اَتَتْکَ فَـمَا عِنْدَکَ ثُمَّ قَالَ یَا اٰلَ مُـــرَّۃَ فَـــرَجَـــعَ مَــنْ لَّــمْ یَــکُــنْ مِّــنْ مُّــرَّۃَ فَــقَــالَ اَ بُــوْلَــھَــبٍ ھٰــذِہٖ مُــرَّۃُ قَـدْ اَتَتْکَ فَـمَا عِنْدَکَ ثُمَّ قَالَ یَا اٰلَ کِلَابٍ ثُمّ قَالَ بَعْدَہٗ یَا اٰلَ قُصَیٍّ فَقَالَ اَبُوْ لَھَبٍ ھٰذِہٖ قُصَیٌّ قَد اَتَتْکَ فَـمَا عِنْدَکَ فَقَالَ اِنَّ اللّٰہَ اَمَرَنِی اَنْ اُنْذِرَعَشِیْرَتِیَ الْاَقْرَبِیْنَ وَ اَنْتُمُ الْاَقْرَبُوْنَ۔اِعْلَمُوْا اَنِّی لَا اَمْلِکُ لَکُمْ مِّنَ الدُّنْیَا حَظًّا وَّلَا مِنَ الْاٰخِرَۃِ نَصِیْبًا اِلَّا اَنْ تَقُوْلُوْا لَا اِلٰہَ اِلَّا اللہُ فَاَشْھَدُ بِـھَا لَکُمْ عِنْدَ رَبِّکُمْ فَقَالَ اَبُوْلَھَبٍ عِنْدَ ذٰلِکَ تَبًّا لَکَ اَلِھٰذَا دَعَوْتَنَا فَنَزَلَتِ السُّوْرَۃُ۔( التفسیر الکبیر للامام رازی سورۃ المسد) یعنی حضرت ابن عباس کہتے ہیں کہ بعثت کے ابتدائی زمانہ میں یعنی تین سال تک رسول کریم صلی اللہ علیہ وسلم زیادہ زور سے تبلیغ نہیں فرماتے تھے اور مکّہ کی مختلف گھاٹیوں میں نماز اداکر لیا کرتے تھے یہاں تک کہ اللہ تعالیٰ نے یہ آیت نازل فرمائی۔وَاَنْذِرْ عَشِیْرَتَکَ الْاَقْرَبِیْنَ کہ اپنے قریبی رشتہ داروں کو انذار کرو۔چنانچہ رسول کریم صلی اللہ علیہ وسلم کوہِ صفا پر چڑھ گئے اور مختلف قبائل کو بلانا شروع کیا۔سب سے پہلے آل غالب کو بلایا اور وہ مسجد حرام سے نکل کر آگئے۔ابو لہب نے رسول کریم صلی اللہ علیہ وسلم کو مخاطب کر کے کہا کہ آل غالب تو آگئے ہیں اب مقصود بیان کریں۔لیکن رسول کریم صلی اللہ علیہ وسلم نے ابو لہب کی بات پر توجہ نہ دی اور لویّ قبیلہ کے افراد کو پکارا۔اس پر وہ بھی پہنچ گئے پھر ابولہب نے کہا کہ اب تو لؤیّ قبیلہ بھی آگیا۔اب آپ بتائیں کہ کیاکہنا چاہتے ہیں۔لیکن رسول کریم صلی اللہ علیہ وسلم نے اس کی بات کی طرف توجہ نہ دی اور آل مُرّہ کو پکارا۔چنانچہ وہ بھی پہنچ گئے پھر رسول کریم صلی اللہ علیہ وسلم نے آل کلاب اور آل قصیّ کو بلایا۔جب سب آگئے تو آپ نے ان سب کو مخاطب کرتے ہوئے فرمایا کہ اللہ تعالیٰ نے مجھے حکم دیا ہے کہ میں اپنے اقرباء کو آنے والے عذاب سے خبردار کروں۔سوتم میرے اقرباء ہو اور تمہیں یاد رکھنا چاہیے کہ میں تمہارے لئے دنیا اور آخرت سے کسی چیز کا ضامن نہیں ہو سکتا۔سوائے اس کے کہ تم خدا تعالیٰ کی توحید کا اقرار کرو۔اور لَاۤ اِلٰهَ اِلَّا اللّٰهُ کہو۔اس پر ابولہب غصہ میں آگیا اور اس نے بڑے جوش

سے کہا تَبًّا لَکَ یعنی اے محمد (صلی اللہ علیہ وسلم) تم ہلاکت کامنہ دیکھو۔کیا تم نے اسی غرض کے لئے ہمیں جمع کیا تھا؟ ابو لہب کے اس قول کے مطابق یہ سورۃ نازل ہوئی۔اور یہ بتایا گیا کہ تباہی ابو لہب کے لئے ہوگی نہ کہ محمد رسول اللہ صلی اللہ علیہ وسلم کے لئے۔دوسری روایت سبب نزول کے متعلق یہ بیان ہوئی ہے۔عَنِ ابْنِ عَبَّاسٍ قَالَ لَمَّا نَزَلَت وَاَنْذِرْ عَشِیْـرَتَکَ الْاَقْرَبِیْنَ صَعِدَ النَّبِیُّ صَلَّی اللہُ عَلَیْہِ وَسَلَّمَ عَلَی الصَّفَا فَـجَعَلَ یُنَادِیْ یَا بَنِیْ فِھْرٍ یَا بَنِیْ عَدِیٍّ لِبُطُوْنِ قُرَیْشٍ حَتّٰی اِجْتَمَعُوْا فَـجَعَلَ الرَّجُلُ اِذَا لَمْ یَسْتَطِعْ اَنْ یَّـخْرُجَ اَرْسَلَ رَسُوْلًا لِیَنْظُرَ مَاھُوَ فَـجَآءَ اَبُوْ لَھَبٍ وَقُرَیْشٌ فَقَالَ اَرَاَیْتَکُمْ لَوْ اَخْبَرْتُکُمْ اَنَّ خَیْلًا بِالْوَادِیْ تُرِیْدُ اَنْ تُغِیْرَ عَلَیْکُمْ اَکُنْتُمْ مُصَدِّقِیَّ قَالُوْا نَعَمْ مَا جَرَّبْنَا عَلَیْکَ اِلَّا صِدْقاًقَالَ فَاِنِّی نَذِیْرٌ لَّکُمْ بَیْنَ یَدَیْ عَذَابٍ شَدِیْدٍ۔فَقَالَ اَبُوْلَھَبٍ تَبًّا لَکَ سَائِرَا لْاَیَّامِ اَلِھٰذَا جَـمَعْتَنَا فَنَزَلَتْ وَیُرْوٰی اَنَّہٗ مَعَ ذٰلِکَ الْقَوْلِ اَخَذَ بِیَدَیْہِ حَـجَرًا لِیَـرْمِیَ بِـھَا رَسُوْ لَ اللّٰہِ صَلَّی اللہُ عَلَیْہِ وَسَلَّمَ۔( روح المعانی سورۃ اللھب) یعنی جب رسول کریم صلی اللہ علیہ وسلم پر وَاَنْذِرْ عَشِیْرَتَکَ الْاَقْرَبِیْنَ کی آیت نازل ہوئی۔تو رسول کریم صلی اللہ علیہ وسلم کوہ صفا پر چڑھے اور عرب کے مختلف قبائل کو پکارنے لگے۔یہاں تک کہ لوگ کوہ صفا پر پہنچ گئے اور جو خود نہ آسکا اس نے اپنا ایلچی بھیج دیا تاکہ معلوم کر کے اطلاع دے کہ کس غرض کے لئے بلایا گیا ہے۔چنانچہ اس موقعہ پر قبیلہ قریش اور ابو لہب بھی پہنچ گیا۔تب رسول کریم صلی اللہ علیہ وسلم نے فرمایا کہ اے لوگو! اگر میں تم کو یہ خبر دوں کہ اس پہاڑ کے پَرے وادی میں ایک لشکر چھپا ہوا ہے جو تم پر شب خون مارنا چاہتا ہے۔تو کیا تم میری بات مان لو گے؟ لوگوں نے کہا کیوں نہیں۔ہمارا یہ تجربہ ہے کہ آپ ہمیشہ سچ بولاکرتے ہیں۔اس پر رسول کریم صلی اللہ علیہ وسلم نے فرمایا۔لو سنو ! میں تمہیں ایک اہم خبر سناتاہوں کہ میں اللہ تعالیٰ کی طرف سے رسول بنا کر بھیجا گیا ہوں اور میں تم کو آنے والے عذاب سے ڈراتا ہوں۔اس پر ابو لہب بھڑک اٹھا اور اس نے کہا تَبّاً لَکَ۔اے محمد (نعوذباللہ) تم پر ہلاکت ہو۔کیا تم نے اس معمولی سی بات کے لئے ہم کو جمع کیا تھا؟ چنانچہ اس کے جواب میں یہ سورۃ نازل ہوئی۔بعض روایات میں یہ بھی آتا ہے کہ ابو لہب نے ایک پتھر اپنے دونوں ہاتھوں سے اٹھا کر رسول کریم صلی اللہ علیہ وسلم پر پھینکنا چاہا۔اس لئے یہ آیت نازل ہوئی کہ تَبَّتْ يَدَاۤ اَبِيْ لَهَبٍ کہ ابو لہب کے دونوں ہاتھ تباہ ہو گئے۔غرض یہ دو روایات سورۃ لہب کے سبب نزول کے متعلق بیان کی جاتی ہیں۔لیکن اس بارہ میںیہ بات یاد رکھنی چاہیے

کہ آیات کے سبب نزول کے متعلق رسول کریم صلی اللہ علیہ وسلم کی طرف سے کچھ بھی مروی نہیں۔صرف صحابہ کرام کی بیان کردہ روایات ہوتی ہیں تبھی بعض اوقات ان میں اختلاف بھی ہو جاتا ہے۔اور ایک آیت کے متعلق کئی کئی سبب نزول بیان ہو جاتے ہیں۔اس سورۃ کے متعلق بھی جو سبب نزول بیان کیا گیا ہے وہ حضرت ابن عباسؓ کی طرف منسوب ہے اور تفاسیر میں اس سورۃ کے متعلق ان کے سوا کسی اور کی طرف سے بیان کردہ روایت نہیں پائی جاتی۔حالانکہ یہ سورۃ ابتدائی زمانہ کی ہے اور اس زمانہ کے صحابہ میں سے حضرت ابن مسعودؓ اور حضرت علیؓ بڑے پایہ کے ہیں۔لیکن انہوں نے کوئی روایت نہیں کی۔حضرت ابن عباسؓ تو اس وقت پیدا بھی نہیں ہوئے تھے جب کہ یہ سورۃ نازل ہوئی۔انہوں نے مدینہ میں جا کر ہوش سنبھالی ہے۔اور ان کا علم مکی سورتوں کے متعلق صرف سماعی ہے۔پس ان حالات میں ہم یہ حتمی طور پر نہیں کہہ سکتے کہ اس سورۃ کے متعلق بیان کردہ شان نزول قطعی اور یقینی ہے۔بےشک قرآن کریم کی ہر سورۃ کے پہلے مصداق رسول کریم صلی اللہ علیہ وسلم اور آپ کے زمانہ کے لوگ ہی ہیں لیکن جیساکہ پہلی سورتوں میں بتایا جا چکا ہے آخری چند سورتوں کی ترتیب یہ ہے کہ ایک سورۃ زیادہ تر رسول کریم صلی اللہ علیہ وسلم کے زمانہ کی طرف توجہ دلاتی ہے اور ایک زیادہ تر آخری زمانہ کی طرف۔ہماری ترتیب کے مطابق سورۃ لہب اس مقام پر ہے جو زیادہ تر آخری زمانہ کی طرف توجہ دلاتی ہے کیونکہ سورۃ لہب سے پہلی سورۃ یعنی سورۂ نصر رسول کریم صلی اللہ علیہ وسلم کے زمانہ کے ساتھ تعلق رکھتی ہے۔مفسرین کہتے ہیں کہ رسول کریم صلی اللہ علیہ وسلم کے ایک چچا کا نام عبدالعزیٰ تھا جس کی کنیت ابولہب پڑ گئی تھی۔کیونکہ اس کا رنگ بہت سرخ و سفید تھا (البحر المحیط سورۃ اللہب)۔قرآن شریف نے سورۃ لہب میں اس کی مخالفتوں کا ذکر کیا ہے۔لیکن یاد رکھنا چاہیے کہ مخالفت کے لحاظ سے ابو جہل جس کا نام ابوالحکم تھا عبدالعزیٰ سے بہت بڑھا ہواتھا۔اور سارے قرآن کریم کے دیکھنے سے معلوم ہوتا ہے کہ کسی مخصوص دشمن یا منافق کا نام قرآن کریم میں نہیں آیا۔بلکہ اگر کسی دشمن کا ذکر آیا ہے تو اشارہ کے ساتھ آیا ہے جو عام الفاظ میں ہے اور مختلف انسانوں پر چسپاں ہوسکتا ہے۔مثلاً آدمؑ کے دشمن کو دو صفاتی ناموں سے یاد کیا گیا ہے۔ایک شیطان اور ایک ابلیس (دیکھو سورۂ بقر ہ ع ۴ و اعراف ع۲ و طٰہٰ ع۷) یعنی وہ حق سے دور تھا اورخدا کی رحمت سے مایوس تھا۔اسی طرح رسول کریم صلی اللہ علیہ وسلم کے ایک شدید مخالف کوجو آپ کے خلاف لوگوں کو لڑائی کے لیے اکساتاتھا شیطان کے لفظ سے یاد کیا ہے۔لیکن اس کا اصل نام نہیں لیا۔( سورۃ الانفال ع ۶ آیت ۴۸) اس سورۃ میں بھی ایسے الفاظ نہیں ہیں جن سے کسی خاص شخص کی طرف اشارہ ہو۔بلکہ کئی لوگوں پر یہ مضمون چسپاں ہو سکتا ہے۔

اس طریق کلام کو مدّ ِنظر رکھتے ہوئے اور اس بات کو دیکھتے ہوئے کہ عبدالعزیٰ جو رسول کریم صلی اللہ علیہ وسلم کا چچا تھا وہ مخالفت میں کئی اور دشمنوں سے ادنیٰ تھا۔ہم یہ کہہ سکتے ہیں کہ اس سورۃ میں جہاں تک رسول کریم صلی اللہ علیہ وسلم کا تعلق ہے بعض ایسے دشمنوں کا ذکر کیا گیا ہے جو رسول کریم صلی اللہ علیہ وسلم کے خلاف لڑائی پر لوگوں کو اکساتے تھے۔اور مفسروں کا یہ کہنا کہ اس میں رسول کریم صلی اللہ علیہ وسلم کے ایک ایسے چچا کا ذکر ہے جس کا چہرہ سرخ و سفید تھا درست معلو م نہیں ہوتا۔ابولہب کے الفاظ بتاتے ہیں کہ وہ شخص آگ بھڑکاتا تھا۔اور آیت وَّ امْرَاَتُهٗ حَمَّالَةَ الْحَطَبِ بھی بتاتی ہے کہ یہاں آگ بھڑکانے کا ذکر ہے، چہرہ کی سفیدی کا ذکر نہیں۔اگر چہرہ کی سفیدی کی وجہ سے کسی کو ابو لہب کہا گیا ہے۔تو اس کی بیوی کے لکڑیا ں اٹھا کر لانے اور آگ میں جھونکنے کا کیا مطلب ہے۔کیا اس کی لکڑیوں سے ابو لہب کے چہرہ کی سفیدی بڑھا کرتی تھی؟ پس حقیقت یہ ہے کہ اس سورۃ میں ان شدید دشمنوں کا ذکر ہے جو رسول کریم صلی اللہ علیہ وسلم کے خلاف فتنہ کی آگ بھڑکاتے رہتے تھے۔اور بتایا ہے کہ وہ ناکام رہیں گے۔لیکن سورتوں کی ترتیب کو مدّ ِنظر رکھتے ہوئے ( جو تفسیر میں سب سے اہم مقام رکھتی ہے ) اس سورۃ میں آخری زمانہ کا ذکرہے۔اورایک ایسی قوم کا ذکر ہے جو رسول کریم صلی اللہ علیہ وسلم کے خلاف یا اسلام کے خلاف سخت آگ بھڑکائے گی۔اور بتایا گیا ہے کہ وہ جماعت کوشش کرکے اپنی ہمسایہ قوموں کواپنے ساتھ ملائے گی اور وہ اس کے ہاتھ کی مانند ہوںگے یعنی اس کے مددگار ہوں گے۔ہم دیکھتے ہیں کہ اس زمانہ میں دوہی جتھے ایسے ہیں جو کہ اسلام یا رسول کریم صلی اللہ علیہ وسلم کے خلاف متحد ہیں۔ایک جتھہ بعض مغربی طاقتوں پر مشتمل ہے اورایک جتھہ مشرقی طاقتوں اور ان کے ساتھیوں کا ہے۔ابو لہب سے مراد یہ دونوں جتھے ہیں۔جو ظاہر میں بھی ابو لہب ہیں کیونکہ ان کے رنگ سرخ و سفید ہیں اور باطنی لحاظ سے بھی ابو لہب ہیں کیونکہ آگ کی جنگ کی تیاریاں کر رہے ہیں اور ایٹم بم اور ہائیڈروجن بم تیار کر رہے ہیں اور اس لحاظ سے بھی وہ ابو لہب ہیں کہ ان میں سے بعض رسول کریم صلی اللہ علیہ وسلم کے خلاف لٹریچر پیدا کرتے رہتے ہیں اور اسلامی حکومتوں کے خلاف کارروائیاں کرتے رہتے ہیں۔اور ایک جتھہ ایسا ہے جو اللہ تعالیٰ کے خلاف کوشش کر رہا ہے اور دہریت پھیلا رہا ہے۔یعنی مشرقی جتھہ جس نے بہت بڑی اسلامی حکومتوں کو تہ و بالا کر دیا ہے مثلاً سمر قند، بخارا اور سنکیانگ کے علاقے اس نے اپنے قبضہ میں کر لئے ہیں۔اور ٹرکی اور عراق اور ایران کے خلاف وہ منصوبے کرتا رہتا ہے۔پس یہ دونوں طاقتیں اس وقت اپنی ظاہری تدبیروں اور مذہبی مخالفتوں کی وجہ سے ابو لہب کہلانے کی مستحق ہیں۔اس سورۃ میںیہ بتایا گیا ہے کہ ابولہب کے نام کی مستحق اقوام جو آخری زمانہ میں پیدا ہوں گی۔اللہ تعالیٰ ان کو

اوراُن کے ساتھیوںکو نا کام کردے گا۔یہ ایک سیاسی سوال ہے جس میںہم پڑنا نہیں چاہتے کہ اس وقت مشرقی طاقت کے کون سے دو مویّد ہیں۔جو اس کی جنگی کارروائیوں میں اس کا ساتھ دے رہے ہیں اور مغربی جمہوریت کے کون سے دو مویّد ہیں جو اس کی جنگی طاقتوں میں اس کی مدد کررہے ہیں۔بہر حال یہ ظاہر ہے کہ ایک طرف مغربی جمہوریت اپنے ساتھی بڑھا رہی ہے اور ایک طرف اس کے مقابل کی مشرقی طاقت اپنے ساتھی بڑھا رہی ہے اور دونوں جنگ کی تیاریوں میں مصروف ہیں۔یہ سورۃ بتاتی ہے کہ یہ اتحاد کام نہ دیں گے اور جن ہاتھوں پر امیدیں کی جارہی ہیں۔انہی ہاتھوں کو خدا شل کردے گا۔اس کے بعد فرماتا ہے کہ علاوہ غیرقوموں کے جو کہ بطور ہاتھ کے ہیں۔خود ان ملکوں میں بھی ایسے گروہ پائے جائیں گے جو کہ خدا تعالیٰ اور محمد رسول اللہ صلی اللہ علیہ وسلم کے خلاف جنگ کرنے کے لئے اپنی حکومتوں کو بھڑکائیں گے۔صاف ظاہر ہے کہ ایسے گروہ مغربی ممالک میں بھی موجود ہیں اور مشرقی ممالک میں بھی موجود ہیں۔ان گروہوں کانام اس مناسبت سے کہ وہ اندرونی ہیں۔اِمْرَاَۃٌ رکھا گیا ہے یعنی بیوی۔اور فرماتا ہے کہ ابو لہب کی بیوی بھی تباہ ہو جائے گی یعنی ان قوموں کے وہ گروہ بھی کمزور ہو جائیں گے اور نقصان اٹھائیں گے جو لکڑیاں ڈال ڈال کر حکومت کی آگ کی طاقت کو بڑھا رہے ہیں۔لکڑیاں ڈالنے سے اس جگہ مراد یہ ہے کہ وہ حکومت کو شہ دلاتے ہیں کہ تم ایسے کام کرو۔جیسا کہ مغربی ممالک میں ایسے لوگ موجود ہیں جو کہ اسلام کے خلاف لٹریچر لکھواتے ہیں اور اسرائیل کی تائید کے لئے ان ممالک کو اکساتے رہتے ہیں۔اسی طرح مشرق میں ایسے لوگ موجود ہیں جو اپنی قوم کو اور اپنی حکومت کو دہریت کی تائید میں اکساتے رہتے ہیں اور توحید کے خلاف جنگ پر آمادہ کرتے رہتے ہیں۔اس سورۃ سے پتہ لگتا ہے کہ آخر اللہ تعالیٰ ان دونوں فتنوں کو دور کردے گا۔نہ مغربی جمہوریت کے اشتعال پسند لوگ محفوظ رہیں گے نہ اس کے مقابل کی مشرقی طاقت کے اشتعال پسند لوگ محفوظ رہیں گے۔پھر فرماتا ہے کہ باوجود بچنے کی ساری تدبیروں کے ان کو کسی جنگ میں مبتلا ہونا پڑے گا جو بڑی شعلوں والی ہوگی۔اللہ تعالیٰ محفوظ رکھے۔اس سے معلوم ہوتا ہے کہ شائد کسی وقت ایٹم بم اور ہائیڈروجن بم کی جنگ ہو جائے گی۔لیکن اللہ تعالیٰ چاہے تو جیسا کہ قرآن شریف کی آیات سے پتہ لگتاہے، عذاب ٹل بھی جایا کرتے ہیں۔اگر یہ لوگ اللہ تعالیٰ کی طرف رجوع کریں اور سچی توبہ اور استغفار سے کام لیں تو یہ عذاب ٹل بھی سکتا ہے۔ضروری نہیں کہ اسی شکل میں آئے۔ممکن ہے کہ ایٹم بم کی جگہ اصولوں کی مخالفت اور مقابلہ کی صورت میں ہی یہ پیشگوئی پوری ہو جائے۔

بِسْمِ اللّٰهِ الرَّحْمٰنِ الرَّحِيْمِ۰۰۱ ( میں ) اللہ کا نام لے کر جو بے حد کرم کرنے والا ( اور ) بار بار حم کرنے والا ہے( شروع کرتاہوں) تَبَّتْ يَدَاۤ اَبِيْ لَهَبٍ وَّ تَبَّؕ۰۰۲ شعلہ کے باپ کے دونوں ہاتھ ہی شل ہو گئے ہیں اور وہ (خود ) بھی شل ہو کر رہ گیا ہے۔حلّ لُغات۔تَبَّتْ۔تَبَّتْ تَبَّ سے واحد مؤنث غائب کا صیغہ ہے اور تَبَّ یَتُبُّ تَبًّا کے معنے ہیں ھَلَکَ وَخَسِـرَ۔تباہ و برباد ہو گیا اور اس نے نقصان اٹھایا۔اور جب تَبَّتْ یَدَاہُ کا فقرہ بولیں تو اس کے معنی ہوں گے ضَلَّتَا وَخَسِـرَتَا۔اس کے دونوں ہاتھوں نے نقصان اٹھایا اور تباہ ہوئے۔(اقرب) مفردات امام راغب میں لکھا ہے اَلتَّبُّ وَالتَّبَابُ اَلْاِسْتِمرَارُ فِی الْـخُسْـرَانِ۔یعنی اَلتَّبُّ وَالتَّبَّابُ (جو تَبَّ فعل کے مصدر ہیں ) کے معنے ہیں ہمیشہ گھاٹا اٹھانا۔اور تَبَّتْ يَدَاۤ اَبِيْ لَهَبٍ کے معنے ہیں اِسْتَمَرَّتْ فِیْ خُسْـرَانِہٖ ابو لہب کے دونوں ہاتھ ضرور نقصان اٹھائیں گے۔اَلْیَدُ۔اَلْیَدُ کے معنے ہیں اَلْکَفُّ ہاتھ۔نیز اس کے معنے ہیں اَلْـجَاہُ وَالْوَقَارُ۔عزت و رتبہ۔اَلْقُوَّۃُ وَالقُدْرَۃُ وَالسُّلْطٰنُ وَالْوِلَایَۃُ۔قوت و طاقت۔بادشاہت اور غلبہ۔اَلْـجَمَاعَۃُ۔جماعت۔اَلنِّعْمَۃُ وَالْاِحْسَانُ احسان اورنعمت۔(اقرب) اَلْاَبُ۔اَلْاَبُ: اَلَّذِیْ یَتَوَلَّدُ مِنْہُ اٰخَرُ مِنْ نَوْعِہٖ۔یعنی اس وجود کو جس سے اسی نوع کی چیز پیدا ہو جس نوع کا وہ خود ہے۔اَبٌ کہتے ہیں یعنی والد۔نیز اَبٌ کے معنے ہیں مَنْ کَانَ سَبَبًا فِیْ اِیْـجَادِ شَيْءٍ اَوْاِصْلَاحِہٖ اَوْ ظُھُوْرِہٖ جو کوئی کسی چیز کے ایجاد کرنے یا ظاہر کرنے اور وجود میں لانے کا سبب ہو اس کو بھی اَبٌ کہتے ہیں۔(اقرب) لَھَبٌ۔لَھَبٌ لَھِبَ کا مصدر بھی ہے اور اسم بھی ہے۔لَھِبَتِ النَّارُ کے معنے ہوتے ہیں اِشْتَعَلَتْ خَالِصَۃً مِّنَ الدُّخَانِ۔آگ ایسی تیزی سے بھڑک اٹھی کہ اس میںدھواں باقی نہ رہا۔اور اَللَّھَبُ کے معنے ہوتے ہیں۔لِسَانُ النَّارِ یعنی آگ کا شعلہ۔(اقرب) پس ابو لہب کے معنے ہوں گے شعلوں کا باپ۔یعنی ایسی چیزوں کاموجد جو آگ کو بھڑکائیں۔تفسیر۔آنحضرت صلعم کی صداقت کی ایک عظیم الشان دلیل محمد رسول اللہ صلی اللہ علیہ وسلم کی

صداقت اور آپ کے منجانب اللہ ہونے کے دلائل میں سے ایک زبردست دلیل یہ ہے کہ جب آپ نے دعویٰ کیا اس وقت آپ نے اللہ تعالیٰ کی وحی کے مطابق اعلان کیا کہ آپ جس مقصد کو لے کر کھڑے ہوئے ہیں اس میں آپ بہرحال کامیاب ہوں گے۔گودنیا آپ کی مخالفت کرے گی لیکن کوئی شخص آپ کا بال تک بیکانہیں کرسکے گا۔آپ وہ کونے کا پتھر ہیں کہ جس پر آ پ گرے وہ بھی چکنا چو رہوگااور جو آپ پر گرے گا وہ بھی چکنا چور ہوجائے گا۔تاریخ شاہد ہے کہ آپ کا یہ دعویٰ درست نکلا۔دعویٰ کے بعد مخالفت کے بڑے بڑے طوفان آئے لوگوں نے آپ کے قتل کے منصوبے کئے۔آپ کے متبعین کو ختم کرنے کی تدبیریں کی گئیں۔ایسے حالات میں جبکہ کامیابی کی کوئی امید نہیں ہوسکتی تھی۔رسول کریم صلی اللہ علیہ وسلم باربار یہی اعلان فرماتے کہ آپ کامیاب ہوںگے۔اسلام مغرب و مشرق میں پھیل جائے گا۔ساری دنیا آپ کے جھنڈے تلے جمع ہوگی اور پھر یہی نہیں کہ اسلام کی زبردست حکومت قائم ہوجائے گی بلکہ آخر اس پر ایک ایسا وقت آئے گا جب اسلام کے ماننے والے قرآن کریم پر عمل کرنا چھوڑدیں گے۔ان پر تنزّل وادبار آجائے گا ان کی حکومتیں ختم ہوجائیں گی اور بعض نئی برسراقتدار آنے والی قومیں اسلامی ممالک کو دبالیں گی اور اسلام بے سروسامانی کی حالت میں ہو جائے گا۔تب اللہ تعالیٰ محمد رسول اللہ صلی اللہ علیہ وسلم کی روح کو دنیا میں دوبارہ بھیجے گا اور پھر سے اسلام زندہ ہوگا۔اور اس کے دشمن ختم ہوں گے۔اور اسلام کادوبارہ احیاء ہوگا۔یہ وہ خبریں ہیں جو قرآن کریم میں ہمیں کثرت سے ملتی ہیں اور ایسی خبریں اور ان کی تفصیلات رسول کریم صلی اللہ علیہ وسلم نے اپنے صحابہؓ کے سامنے بیان فرمائیں جن میں سے بعض احادیث کی کتب میں محفوظ ہو کر ہم تک پہنچ گئی ہیں۔اور یہ سب باتیں لفظاً لفظاً پوری بھی ہو گئیں۔پس ایسے وقت میںجبکہ بظاہر کامیابی کے امکانات نظر نہیں آتے تھے۔اپنی ترقی اور اپنے عروج کی خبریں دینا اور عروج کے بعد پھر قوم کے تنزّل کی پیشگوئی کرنا اور پھر کہنا کہ اس تنزل کے بعد پھر عروج ہوگا یہ سب کچھ محض دماغ کے تصوّرات نہیں ہو سکتے۔بلکہ رسول کریم صلی اللہ علیہ وسلم کو خدا تعالیٰ نے ہی یہ سب خبریں دی تھیں تبھی تو غیر معمولی حالات میںپوری ہوئیں۔پس ان سب خبروں کا پورا ہونامحمد رسول اللہ صلی اللہ علیہ وسلم کی صداقت کا ایک زبردست ثبوت ہے اور یہ بتاتا ہے کہ آپ منجانب اللہ تھے۔آج یوروپین ممالک بام عروج پر پہنچے ہوئے ہیں۔ان کی تہذیب، ان کا تمدن اور ان کی ایجادات کو دیکھ کر سب دنیا دنگ ہے اور یہ لوگ خود بھی ان سب باتوں کواپنی فوقیت میں پیش کرتے ہیں۔آج ہر ملک کی نگاہ ان کی طرف اٹھتی ہے اور ہر قسم کے علوم کا منبع ان کے ممالک کو سمجھا جاتا ہے۔مسلمانوں کی وہ حکومتیں جن سے دنیا کانپ اٹھتی تھی جن کے سامنے یوروپین ملکوں کے لوگ شاگردوں کی طرح بیٹھتے تھے۔جن کے گھوڑوں نے ان کے ملکوں کو

روند ڈالا۔آج سمٹ سمٹا کر محدود علاقوں میں رہ گئی ہیں۔وہ شیر جس کے سامنے سب ممالک چوہوں کی طرح تھے۔آج وہ شیر اتنا کمزور اور ضعیف ہے کہ یہ چوہے اس کے جسم پر دوڑتے پھر رہے ہیں اور اس کو نوچتے ہیں اور شیر میں اتنی قوت نہیں کہ ان چوہوں کو بدن سے ہٹا سکے۔آج کا مسلمان بھی مایوس ہو چکا ہے اور سمجھتا ہے کہ اسلام آج ہے تو کل نہیں۔اور جو کوئی یوروپین ممالک میں جاتا ہے اور وہاں کی ترقی اور عروج کوبنظرِخود مشاہدہ کرتا ہے وہ مجسم یاس اور ناامیدی بن جاتا ہے اور واپس پہنچ کر یہی پیغام دیتا ہے کہ اسلام کا اب خدا ہی حافظ ہے۔بظاہر اس کے دوبارہ ترقی کرنے کا امکان نہیں۔کیونکہ ایک طرف اس کے دشمنوں نے اس کی سیاسی طاقت کو ختم کردیا ہے اور دوسری طرف اسلام کے ماننے والوںنے خود اسلام کو خیرباد کہہ دیا اوریورپ کو اپنا امام سمجھ کر اس کی اقتدا کو فخر خیال کرنے لگ گئے اورانہوں نے یہ بھلا دیا کہ ایک مسلمان کو جو کتاب بطور مکمل ضابطہ حیات کے دی گئی ہے۔وہ اس لئے نہیں کہ یہ دوسروں سے راہنمائی حاصل کرے بلکہ اس لئے ہے تالوگ اس کے نور سے منور ہوں اور اس کی پیروی سے دین و دنیا میں فائدہ اٹھائیں۔اسلام کے عروج و زوال کی پیشگوئیاں درحقیقت اسلام کا تنزل اور یوروپین ممالک کا یہ عروج بھی محمد رسول اللہ صلی اللہ علیہ وسلم کی صداقت کی ایک زبردست دلیل ہے۔کیونکہ رسول کریم صلی اللہ علیہ وسلم نے یہ سب خبریں آج سے تیرہ سو سال پہلے بتا دی تھیںاور اتنی تفصیل سے بتائیں کہ انسان حیران رہ جاتا ہے۔یوں معلوم ہوتا ہے کہ جس طرح سینما کی فلم دکھائی جاتی ہے۔اسی طرح آپ کو وہ تمام حالات پردہ پر دکھادیئے گئے جن سے اسلام دوچار ہونے والا تھا اور ان سب واقعات کے رونما ہونے نے محمد رسول اللہ صلی اللہ علیہ وسلم کی صداقت پر مہر لگادی۔کیونکہ اتنا علم غیب جتنا رسول کریم صلی اللہ علیہ وسلم نے بیان فرمایا کبھی کسی شخص کو اس وقت تک معلوم نہیں ہوسکتا جب تک کہ خدائے عالم الغیب اس کو نہ بتائے۔پس اسلام کا یہ ضعف، یہ بے کسی اس واسطے نہیں کہ ہم گھبرا جائیں، ہم مایوس ہوجائیں بلکہ جس خدا نے اسلام کے تنزل کی خبر رسول کریم صلی اللہ علیہ وسلم کو دی اور آپ نے اپنے صحابہ کو بتائی اور وہ لفظ بلفظ پوری بھی ہوئی۔اسی خدا کی طرف سے آپ کو ایک اور خبر بھی دی گئی اور وہ یہ کہ اسلام دوبارہ ترقی کرے گا اور اپنے دشمنوں پر غالب آئے گا اس سے ٹکرانے والے پاش پاش ہوں گے۔اور اسلام کا جھنڈا ساری دنیا پر لہرائے گا۔لیکن یہ سب کچھ خدا تعالیٰ خود کرے گا۔جس طرح کہ محمد رسول اللہ صلی اللہ علیہ وسلم کے زمانہ میں ہواتھا اسی طرح آخری زمانہ میں دوبارہ محمد رسول اللہ صلی اللہ علیہ وسلم کی روح دنیامیں آئے گی اور خدا کی نصرت اور اس کے فضل کو جذب کرے گی اور ملائکہ کی فوجیں آسمان سے اتر کر کمزوروں کو طاقتور اور سلطنتوں کا وارث بنادیں گی۔پس کسی مسلمان

کے لئے مایوس ہونے کی کوئی وجہ نہیں۔اسے محمد رسول اللہ صلی اللہ علیہ وسلم کے دامن کو مضبوطی سے تھامے رکھنا چاہیے۔اور انتہائی کوشش میں لگے رہنا چاہیے کہ مناسب اسباب اور ذرائع کے اختیار کرنے سے جلد سے جلد وہ مقصد حاصل ہوجائے اور پورے وثوق کے ساتھ اس وقت کا انتظار کرنا چاہیے جس کی خبر محمد رسول اللہ صلی اللہ علیہ وسلم نے دی ہوئی ہے۔ذیل میں ہم بعض ان اخبار کا ذکر کرتے ہیں جو قرآن کریم اور حدیث میں موجودہ زمانہ کے متعلق بیان کی گئی ہیں۔اور ان کاتعلق سورۂ لہب کے مضمون کے ساتھ ہے۔تاایک مسلمان کے لئے ان کو پڑھ کر زیادتیٔ ایمان کا موجب ہو کہ کس طرح آج سے تیرہ سو سال قبل بیان کی ہوئی خبریں پوری ہورہی ہیں اور وہ یہ یقین کر لے کہ دوسری خبریں جو اسلام کی ترقی کے متعلق ہیں وہ بھی اسی طرح پوری ہوں گی جس طرح سے یہ خبریںپوری ہوئی ہیں۔سو جاننا چاہیے کہ آخری زمانہ میں اسلام نے جن مصائب اور فتنوں سے دوچار ہونا تھا ان فتنوں میں سے دووجودوں کا خاص طور پر ذکر آتا ہے۔اور ان وجودوں کے فتنوں کا خاص طور پر ذکر کرنے کی یہ وجہ ہے کہ ان سے اسلام کو خاص طور پر نقصان پہنچنا تھا۔ایک وجود کا نام دجّال رکھا گیا ہے اور دوسرے فتنہ کے دوظہور بیان کئے گئے ہیں۔ایک ظہور کا نام یاجوج اور ایک کانام ماجوج بتایا گیا ہے۔چنانچہ مسلم کی حدیث میں ہے :۔خروج دجال اور یاجوج وماجوج کے متعلق پیشگوئی عَنْ حُذَیْفَۃَ ابْنِ اُسَیْدٍ الْغَفَّارِیِّ قَالَ اِطَّلَعَ النَّبِیُّ صَلَّی اللہُ عَلَیْہِ وَسَلَّمَ عَلَیْنَا وَنَـحْنُ نَتَذَاکَرُ فَقَالَ مَا تَذْکُرُوْنَ قَالُوْا نَـذْکُرُ السَّاعَـــۃَ قَــالَ اِنَّـھَا لَنْ تَــقُــوْمَ حَـتیّٰ تَـرَوْا قَـبْـلَـھَا عَـشْــرَ اٰیَاتٍ۔فَـذَکَـرَ الـدُّخَانَ وَ الـدَّجَّالَ والدَّٓآ بَّۃَ وَطُلُوْعَ الشَّمْسِ مِنْ مَّغْرِبِـھَا وَنُزُوْلَ عِیْسَی ابْنِ مَرْیَمَ وَیَاجُوْجَ وَمَاجُوْجَ وَثَلٰثَۃُ خَسُوْفٍ خَسْفٌ بِالْمَشْـرِقِ، وَخَسْفٌ بِالْمَغْرِبِ، وَخَسْفٌ بِـجَزِيرَةِ الْعَرَبِ، وَآخِرُ ذَلِكَ نَارٌ تَـخْرُجُ مِنَ الْيَمَنِ، تَطْرُدُ النَّاسَ إِلَى مَـحْشَـرِهِمْ۔( مسلم بـحوالہ مشکوٰۃ کتاب الفتن الفصل الاول باب العلامات بین یدی الساعۃ ) یعنی حذیفہ ابن اسید الغفاری کہتے ہیں کہ ایک دن ہم چند لوگ بیٹھے قیامت کا ذکر کر رہے تھے کہ نبی کریم صلی اللہ علیہ وسلم نے ہم پر جھانکا اور دریافت فرمایا کہ کیا باتیں کررہے ہو۔ہم نے عرض کیا کہ ہم قیامت کا ذکر کررہے ہیں۔آپ نے فرمایا کہ اس کے برپا ہونے سے قبل دس علامات کا ظاہر ہونا ضروری ہے اور آپ نے حسب ذیل علامات گنوائیں۔دخان، خروج دجال، خروج دابہ، طلوع الشمس من المغرب، نزول عیسیٰ بن مریم، خروج یاجوج و ماجوج اور

تین ایسے واقعات جن سے لوگ زمین میں دھنسیں گے۔ایک ایسا واقعہ مشرق میں ہوگا اور ایک مغرب میں اور ایک جزیرہ عرب میں اور آخری علامت یہ بتائی کہ یمن کی طرف سے ایک آگ نکلے گی۔ان علامات میں دجّال اور یاجوج اور ماجوج کے نکلنے کا ذکر ہے او رغور کرنے سے معلوم ہوتا ہے کہ درحقیقت یہ دونوں فتنے آپس میں ملتے جلتے ہیں اور ایک ہی فتنہ کی مختلف شاخیں ہیں۔یہی وجہ ہے کہ قرآن کریم میں یاجوج و ماجوج کا تو ذکر آتا ہے لیکن دجال کا ذکرنہیں آتا۔حالانکہ رسول کریم صلی اللہ علیہ وسلم نے اس کی اہمیت زیادہ بیان فرمائی ہے۔چنانچہ حدیث کے الفاظ یہ ہیں :۔ذَکَرَ الدَّجَالَ فَقَالَ اِنِّیْ لَاُنْذِرُکُمُوْہُ وَمَامِنْ نَّبِیٍّ اِلَّا اَنْذَرَقَوْمَہٗ لَقَدْ ااَنْذَرَ نُوْحٌ قَوْمَہٗ۔(کنزالعمال جلد ۷ ص ۱۹۵ بحوالہ ابو داؤد و ترمذی ) یعنی دجال کا ذکر کرتے ہوئے آپ نے فرمایا کہ کوئی نبی ایسا نہیں گذرا جس نے اپنی امت کو دجال سے ہوشیار نہ کیا ہو۔نوح علیہ السلام نے بھی اپنی قوم کو اس سے ہوشیار کیا اور میں بھی اس کی خبر دیتا ہوں اور قوم کو ہوشیار رہنے کی تلقین کرتاہوں۔پس اتنے بڑے فتنے کا ذکر قرآن کریم میں نہ آنا اور یاجوج ماجوج کا ذکر آنا بتاتا ہے کہ در حقیقت یاجوج و ماجوج اور دجّال کا فتنہ ایک ہی چیز کے دونام ہیں یاایک ہی فتنہ کی دوشاخیں ہیں۔اس کی مزید تصدیق اس بات سے بھی ہوتی ہے کہ دجّال اور یاجوج وماجوج کا ایک ہی زمانہ ہے۔اور پھر یہ بھی معلوم ہوتاہے کہ دونوں ساری دنیا پر غالب آجائیں گے یہ باتیں بتاتی ہیں کہ یہ دجّال اور یاجوج و ماجوج کے فتنے کوئی الگ قسم کے فتنے یا الگ زمانوں کے فتنے نہیںہیں۔بلکہ ایک ہی فتنہ کے مختلف مظاہر ہیں۔درحقیقت دجال مذہبی پہلو سے اس فتنہ کا نام رکھا گیا ہے۔دجّال کے معنے ہوتے ہیں ملمّع ساز، فریب کرنے والا۔پس آخری زمانہ کا فتنہ جس سے کہ بنو اسرائیل کے انبیاء بھی ڈراتے رہے ہیں اس کے دو حصے ہونے تھے۔ایک حصہ تو مذہبی عقائد اور مذہبی خیالات میں فساد پیدا کرنے کے متعلق تھااور ایک حصہ سیاسی حالات اور سیاسی امن کو برباد کرنے کے متعلق تھا۔جو مذہبی عقائد سے متعلق فتنہ تھا اس کے بھڑکانے والی روح کو دجّال کہا گیا ہے یعنی فریب اور دھوکا دینے والی ہستی۔اور جو فتنہ کہ سیاسی پہلوئوں کے ساتھ تعلق رکھنے والا تھا اس کے بھڑکانے والی ہستیوں کو یاجوج اور ماجوج کہا گیا ہے۔یاجوج ماجوج کے الفاظ اجیج سے نکلے ہیں اور اَجَّتِ النَّارُ اَجِیْجًا کے معنے ہیں تَلَھَّبَتْ۔آگ بھڑک اٹھی اور جب اجَّـجْتَ النَّارَ کہیں تو معنے ہوں گے اَلْھَبَتْـھَا فَالْتَـھَبَتْ کہ آگ کو بھڑکا! تو وہ بھڑک اٹھی۔( اقرب) پس لفظ اَجَّ کے معنے آگ بھڑکانے کے

آج 10 میں سے 10 باقی