سُوْرَۃُ الْفَلَقِ

تفسیر کبیر (جلد ۱۵)

سُوْرَۃُ الْفَلَقِ مَدَنِیَّۃٌ سورۃ الفلق۔یہ سورۃ مدنی ہے وَھِیَ سِتُّ اٰیَاتٍ مَعَ الْبَسْمَلَۃِ اور بسم اللہ سمیت اس کی چھ آیات ہیں سورۃ الفلق مدنی سورۃ ہے حسن، عطاء، عکرمہ اور جابر کہتے ہیں کہ یہ سورۃ مکّہ میں نازل ہوئی۔حضرت ابن عباسؓ کا ایک قول یہ ہے کہ یہ سورۃ مدنی ہے او رقتادہؓ بھی یہی کہتے ہیں۔(روح المعانی تعارف سورۃ الفلق) سورۃ الفلق کے نزول کے متعلق ایک روایت علّامہ جلال الدین سیوطی نے اپنی کتاب اتقان میں لکھا ہے کہ مختار قول یہی ہے کہ یہ سورۃ مدنی ہے۔جولوگ اس بات کے حق میں ہیں کہ یہ سورۃ مدنی ہے ان کی دلیل یہ ہے کہ اس سورۃ اور اس کے بعد کی سورۃ کا تعلق نبی کریم صلی اللہ علیہ وسلم کی اس بیماری کے ساتھ ہے جس میں یہ سمجھا گیا تھا کہ یہود کی طرف سے آپ پر جادو کیا گیا ہے۔اس وقت یہ دو سورتیں نازل ہوئیں اور آپ نے ان کو پڑھ کر پھونکا۔مفسّرین کہتے ہیں کہ چونکہ یہ واقعہ مدینہ میں ہوا تھا اس لئے سورۃ الفلق اور سورۃ الناس مدنی ہیں۔بہر حال ترجیح اسی کو دی گئی ہے کہ یہ دونوں سورتیں مدنی ہیں۔یہ مفسرین کا ایک استدلال ہے تاریخی شہادت نہیں۔گو ہمارے پاس بھی ایسی کوئی یقینی شہادت نہیں کہ جس کی بنا پر ہم کہہ سکیں کہ یہ مکّی سورۃ ہے۔مگر جو استدلال کیا گیا ہے وہ بھی بودا ہے کیونکہ خواہ یہ سورۃ مکّہ میں نازل ہوتی تب بھی تورسول کریم صلی اللہ علیہ وسلم بیماری کے موقع پر اس کو پڑھ کر اپنے اوپر پھونک سکتے تھے۔پس محض پھونکنے سے یہ سمجھنا کہ یہ مدینہ میں نازل ہوئی تھی یہ استدلال درست نہیں۔لیکن چونکہ ان سورتوں سے قرآن کریم کو ختم کیاگیا ہے ہم اس سے یہ استدلال کرتے ہیں کہ یہ سورۃ یا تو مکہ اور مدینہ دونوں میں نازل ہوئی ہے اور یا پھر مدنی ہے۔کیونکہ قرآ ن کریم کا اختتام مدینہ منورہ میں ہواہے۔رسول کریم صلی اللہ علیہ وسلم کا بیمار ہونا اور لوگوں کا یہ سمجھنا کہ آپ پر یہودیوں کی طرف سے جادو کیا گیا ہے یہ واقعہ جن الفاظ میں روایت کیا گیا ہے وہ الفاظ یہ ہیں :۔عَنْ عَائِشَۃَ رَضِیَ اللہُ تَعَالٰی عَنْـھَا قَالَتْ سُـحِرَ رَسُوْلُ اللہِ صَلَّی اللہُ عَلَیْہِ وَسَلَّمَ حَتّٰی اَنَّہٗ

لَیُخَیَّلُ اِلَیْہِ اَنَّہٗ فَعَلَ الشَّیْءَ وَلَمْ یَکُنْ فَعَلَہٗ حَتّٰی اِذَا کَانَ ذَاتَ یَوْمٍ اَوْ ذَاتَ لَیْلَۃٍ دَعَا اللہَ ثُمَّ دَعَا ثُمَّ دَعَا قَالَ اَشْعَرْتِ یَاعَائِشَۃُ اَنَّ اللہَ تَعَالٰی قَدْ اَفْتَانِیْ فِیْـمَا اسْتَفْتَیْتُہٗ فِیْہِ قُلْتُ وَمَا ذَاکَ یَا رَسُولَ اللہِ فَقَالَ جَآءَ نِیْ رَجُلَانِ فَـجَلَسَ اَحَدُھُمَا عِنْدَ رَأْسِیْ وَالْاٰخَرُ عِنْدَ رِجْلِیْ فَقَالَ الَّذِیْ عِنْدَ رَأْسِیْ لِلَّذِیْ عِنْدَ رِجْلِیْ اَوِالَّذِیْ عِنْدَ رِجْلِیْ لِلَّذِیْ عِنْدَ رَأْسِیْ مَا وَجَعُ الرَّجُلِ قَالَ مَطْبُوْبٌ قَالَ مَنْ طَبَّہَ قَالَ لَبِیْدُ بْنُ الْاَعْصَمِ قَالَ فِیْ اَیِّ شَیْ ءٍ قَالَ فِیْ مُشْطٍ وَّ مُشَاطَۃٍ وَجُفِّ طَلْعَۃٍ ذَکَرٍ قَالَ فَاَیْنَ ھُوَ قَالَ فِیْ بِئْرِذِیْ أَرْوَانَ قَالَتْ فَاَتَاھَا رَسُوْلُ اللّٰہِ صَلَّی اللہُ عَلَیْہِ وَسَلَّمَ فِیْ اُنَاسٍ مِنْ اَصْـحَابِہٖ ثُمَّ قَالَ یَا عَائِشَۃُ وَاللہِ لَکَاَنَّ مَاءَھَا نُقَاعَۃُ الْـحِنَّآءِ وَلَکَاَنَّ نَـخْلَھَا رُؤُوْسُ الشَّیَاطِیْنِ قَالَتْ فَقُلْتُ یَا رَسُوْلَ اللّٰہِ اَفَلَا اَحْرَقْتَہٗ قَالَ لَا اَمَّا اَنَا فَقَدْ عَافَانِیْ اللّٰہُ تَعَالیٰ وَکَرِھْتُ اَنْ اُثِیْرَ عَلَی النَّاسِ شَـرًّا فَاَمَرْتُ بِـھَا فَدُفِنَتْ وَھَذَانِ الْمَلَکَانِ عَلٰی مَایَدُلُّ عَلَیْہِ رِوَایَـۃُ ابْنُ مَـرْدَوَیْـہِ مِـنْ طَــرِیْقِ عِکْرَمَۃَ عَنِ ابْنِ عَبَّاسٍ ھُمَا جِبْرِیْلُ وَمِیْکَائِیْلُ عَلَیْھِمَا السَّلَامُ وَمِـنْ حَـدِیْـثِــھَـا فِی الــدَّلَائِـلِ لِلْبَیْـھَقِیْ بَعْدَ ذِکْرِ حَدِیْثِ الْمَلَکَیْنِ فَلَمَّا اَصْبَحَ رَسُوْلُ اللہِ صَلَّی اللہُ عَلَیْہِ وَسَلَّمَ غَدًا وَمَعَہٗ اَصْـحَابُہٗ اِلَی الْبِئْرِ فَدَخَلَ رَجُلٌ فَاسْتَخْرَجَ جُفَّ طَلْعَۃٍ مِنْ تَـحْتِ الرَّاعُوْثَۃِ فَاِذَا فِیْـھَا مِشْطُ رَسُوْلِ اللہِ صَلَّی اللہُ عَلَیْہِ وَسَلَّمَ وَمِنْ مُّشَا طَۃِ رَأْسِہٖ وَاِذَا تِمْثَالٌ مِنْ شَـمْعٍ تِـمْثَالُ رَسُوْلِ اللہِ صَلَّی اللہُ عَلَیْہِ وَسَلَّمَ وَاِذَا فِیْـھَا اِبَـرٌ مَغْرُوْزَۃٌ وَاِذَا وُتِرَ فِیْہِ اِحْدٰی عَشَـرَۃَ عُقْدَۃً فَاَتَاہُ جِبْرِیْلُ عَلَیْہِ السَّلَامُ بِالمُعَوِّذَتَیْنِ فَقَالَ یَا مُـحَمَّدُ قُلْ اَعُوْذُ بِرَبِّ الْفَلَقِ وَحَلَّ عُقْدَۃً۔مِنْ شَرِّ مَا خَلَقَ وَحَلَّ عُقْدَۃً۔حَتّٰی فَرَغَ مِنْـھَا وَحَلَّ الْعُقَدَ کُلَّھَا وَجَعَلَ لَا یَنْزِعُ اِبْرَۃً اِلَّا وَجَدَ لَھَا اَلَمًا ثُمَّ یَـجِدُ بَعْدَ ذٰلِکَ رَاحَۃً فَقِیْلَ یَا رَسُوْ لَ اللہِ لَوْ قَتَلْتَ الْیَـھُوْدِيَّ قَالَ قَدْ عَافَانِیْ اللہُ تَعَالٰی وَمَا یَرَاہُ مِنْ عَذَابِ تَعَالٰی اَشَدُّ وَفِیْ رِوَایَۃٍ اِنَّ الَّذِیْ تَوَلَّی السِّحْرَ لَبِیْدُبْنُ الْاَعْصَمِ وَبَنَاتُہٗ فَـمَرِضَ النَّبِیُّ صَلَّی اللہُ عَلَیْہِ وَسَلَّمَ فَنَزَلَ جِبْرِیْلُ بِالْمُعَوِّذَتَیْنِ وَاَخْبَرَہٗ بِـمَوْضِعِ السِّحْرِ وَبِـمَنْ سَحَرَہٗ وَبِمَ سَـحَرَہٗ فَاَرْسَلَ صَلَّی اللہُ عَلَیْہِ وَسَلَّمَ عَلِیًّا کَرَّمَ اللّٰہُ تَعَالیٰ وَجْھَہٗ وَالزُّبَیْرَ وَعَمَّارًا فَنَزَحُوْا مَآءَ الْبِئْرِ وَھُوَ کَنُقَاعَۃِ الْحِنَّآءِ ثُمَّ رَفَعُوْا رَاعُوْثَۃَ الْبِئرِفَاَخْرَجُوْا اَسْنَانَ الْمِشْطِ وَمَعَھَا وِتْرٌ قَدْ عُقِدَ فِیْہِ اِحْدٰی عَشَـرَۃَ عُقْدَۃً مُغَرَّزَۃً بِالْاِبَرِ فَـجَاءُوْا بِـھَا النَّبِيَّ صَلَّی اللہُ عَلَیْہِ وَسَلَّمَ فَـجَعَلَ یَقْرَأُ الْمُعَوِّذَتَیْنِ عَلَیْـھَا فَکَانَ کُلَّمَا قَرَأَ اٰیَۃً اِنْـحَلَّتْ عُقْدَۃٌ وَوَجَدَ عَلَیہِ الصَّلٰوۃُ والسَّلَامُ خِفَّۃً حَتّٰی اِنْـحَلَّتِ الْعُقْدَۃُ الْاَخِیْرَۃُ عِنْدَ تَـمَامِ السُّوْرَتَیْنِ فَقَامَ صَلَّی اللہُ عَلَیْہِ وَسَلَّمَ کَاَنَّـمَااُنْشِطَ مِنْ عِقَالٍ۔اَلْـخَبَرُ

وَالرِّوَایَۃُ الْاُوْلٰی اَصَـحُّ مِنْ ھٰذِہٖ۔(روح المعانی ) چونکہ مفسّرین نے حضرت عائشہ رضی اللہ تعالیٰ عنھا کی روایت کو ترجیح دی ہے اس لئے ہم صرف اسی روایت کا ترجمہ کرتے ہیں۔’’حضرت عائشہ رضی اللہ عنھا سے روایت ہے کہ نبی کریم صلی اللہ علیہ وسلم پر یہودیوں کی طرف سے جادو کیا گیا اور اس کا اثر یہاں تک ہوا کہ آپ بعض اوقات یہ سمجھتے تھے کہ آپ نے فلاں کام کیا ہے حالانکہ وہ کام نہیں کیا ہوتا تھا۔ایک دن یا ایک رات رسول کریم صلی اللہ علیہ وسلم نے اللہ تعالیٰ سے دعا کی پھر دعا کی او رپھر دعا کی۔پھر فرمایا اے عائشہ ! اللہ تعالیٰ سے جو کچھ میں نے مانگا تھا وہ اس نے مجھے دے دیا۔حضرت عائشہؓ کہتی ہیں کہ میں نے عرض کیا یا رسول اللہ وہ کیا ہے۔توآپ نے فرمایا کہ میرے پاس دو آدمی آئے ایک میرے سر کے پاس بیٹھ گیا اور دوسرا میرے پائوں کے پاس۔پھر وہ شخص جو میرے سر کے پاس بیٹھاہواتھا اس نے پائوں کے پاس بیٹھنے والے کو مخاطب کر کے کہا۔یا غالباً یہ فرمایا کہ پائوں کے پاس بیٹھنے والے نے سر کے پاس بیٹھنے والے کو مخاطب کر تے ہوئے کہا کہ اس شخص (یعنی محمد رسول اللہ) کو کیا تکلیف ہے تو دوسرے نے جواب دیا کہ جادوکیا گیا ہے۔اس نے کہا کہ کس نے جادو کیا ہے۔تو اس نے جواب دیا۔لبید بن الاعصم یہودی نے۔تب پہلے نے کہا کہ کس چیز میں جادو کیاگیا ہے۔تو دوسرے نے جواب دیا کہ کنگھی او رسر کے بالوں پر جو کھجور کے خوشہ کے اندر ہے۔پہلے نے پوچھا یہ چیزیں کہاں ہیں۔تودوسرے نے کہا یہ ذی اروان کے کنوئیں میں ہیں۔حضرت عائشہؓ کہتی ہیں کہ نبی کریم صلی اللہ علیہ وسلم اپنے صحابہؓ سمیت اس کنویں کے پاس تشریف لے گئے پھر فرمایا اے عائشہ اللہ کی قسم کنویں کا پانی یوں معلوم ہوتا تھا جیسے مہندی کے نچوڑ کی طرح سرخ ہوتاہے (معلوم ہوتا ہے یہودیوں میں یہ رواج تھا کہ جب وہ کسی پر جادو ٹونا کرتے تھے تو مہندی یا اسی قسم کی کوئی اور چیز پانی میں ڈال دیتے تھے۔یہ ظاہر کرنے کے لئے کہ جادو کے زور سے پانی کو سرخ کیا گیا ہے ) اور وہاں کی کجھوریں ایسی تھیں جیسے شیاطین یعنی سانپوں کے سر ( اس میں کجھور کے گابھوں کو سانپوں کے سروں سے تشبیہ دی گئی ہے۔یعنی کجھوریں گابھوں والی تھیں) حضرت عائشہ رضی اللہ عنہاکہتی ہیں میں نے کہا یا رسول اللہ آپ نے اس چیز کو جس پر جادو کیا گیا تھا جلا کیوں نہ دیا۔رسول کریم صلی اللہ علیہ وسلم نے فرمایا مجھے جب اللہ تعالیٰ نے شفا دے دی تو میں نے ناپسند کیا کہ کوئی ایسی بات کروں جس سے شر کھڑا ہو۔(یعنی یہودیوںکو یہ شور مچانے کا موقع ملے کہ انہوں نے ہماری چیزوں کو جلا دیا ہے )اس لئے میں نے حکم دیا کہ ان اشیاء کو دفن کردیا جائے چنانچہ ان کو دبادیا گیا ہے۔حضرت عائشہ رضی اللہ عنہا کی روایت میں جن دو مردوں کا ذکر

آتاہے کہ وہ نبی کریم صلی اللہ علیہ وسلم کے پاس آئے معلوم ہوتا ہے کہ وہ دوفرشتے تھے جو رسول کریم صلی اللہ علیہ وسلم کو دکھائے گئے۔اگر وہ انسان ہوتے تو حضرت عائشہؓ کو بھی نظر آجاتے۔یہ روایت جو حضرت عائشہؓ سے بیان کی گئی ہے اس کا صرف اتنا مطلب ہے کہ اللہ تعالیٰ نے نبی کریم صلی اللہ علیہ وسلم کو فرشتوں کے ذریعہ سے خبردی کہ یہودیوں نے آپؐپر جادو کیا ہواہے۔اس کا یہ مطلب نہیں کہ جس طرح جادو کا اثر تسلیم کیا جاتا ہے اسی طرح نبی کریم صلی اللہ علیہ وسلم پر جادو کا اثر ہوبھی گیا تھا۔بلکہ اصل حقیقت یہ ہے کہ جب کوئی شخص اس قسم کا ہو جو دوسرے سے شدید عناد رکھتا ہو تو اس کی توجہ دوسرے شخص پر مرکوز ہوجاتی ہے اور جس طرح مسمریزم کا دوسرے پر اثر پڑتا ہے اسی طرح جادو کا بھی ایک اثر پڑتا ہے۔گویا یہ بھی مسمریزم کی ایک قسم ہوتی ہے جس میں دوسرے پر توجہ ڈالنے کی کوشش کی جاتی ہے۔اسی طرح یہودیوں نے بھی نبی کریم صلی اللہ علیہ وسلم کے متعلق کوشش کی اور بعض دفعہ دشمن جب خاص طور پر کسی امر کے متعلق اجتماع خیال کرتا ہے تو اس کااثر مسمریزم کے طور پر دوسرے پر بھی ہو جاتاہے۔جب نبی کریم صلی اللہ علیہ وسلم نے ان کے جادو ٹونے کی چیزیں نکال کر زمین میں دفن کردیں تو یہودیوں کو خیال ہو گیا کہ انہوں نے جو جادو کیا تھا وہ باطل ہوگیا ہے۔ادھر اللہ تعالیٰ نے آپؐکو صحت عطا فرما دی۔خلاصہ کلام یہ کہ یہودی یہ یقین رکھتے تھے کہ انہوں نے نبی کریم صلی اللہ علیہ وسلم پر جادو کر دیا ہے اس وجہ سے طبعی طور پر ان کی توجہ اس طرف مرکوز ہوئی کہ آپ بیمار ہوجائیں چنانچہ اس کا اثر آپ کے جسم پر بھی پڑا۔لیکن جب خدا تعالیٰ نے حقیقت ظاہر کردی اور آپؐنے ان کی چیزیں دفن کرا دیں تو یہودیوں کی وہ توجہ ہٹ گئی اور اللہ تعالیٰ نے نبی کریم صلی اللہ علیہ وسلم کو صحت عطا فرما دی۔اس روایت سے جہاں یہودیوں کے اس عناد کا پتہ چلتا ہے جو ان کو نبی کریم صلی اللہ علیہ وسلم کی ذات سے تھا۔وہاں یہ بات بھی واضح ہوجاتی ہے کہ نبی کریم صلی اللہ علیہ وسلم خدا تعالیٰ کے سچے رسول تھے۔کیونکہ اللہ تعالیٰ کی طرف سے آپؐکو ان تمام باتوں کا علم دے دیا گیا جو یہودی آپؐکے خلاف کررہے تھے۔پس آپؐکو غیب کی باتوں کا معلوم ہوجانا اور یہودیوں کا اپنے مقصد میں ناکام رہنا آپؐکے سچا رسول ہونے کی واضح اوربیّن دلیل ہے۔فضائل مسلم، ترمذی اور نسائی میں روایت آتی ہے قَالَ رَسُوْلُ اللہِ صَلَّی اللہُ عَلَیْہِ وَسَلَّمَ اُنْزِلَتْ عَلَيَّ اللَّیْلَۃَ اٰیَاتٌ لَمْ اَرَ مِثْلَھُنَّ قَطُّ قُلْ اَعُوْذُ بِرَبِّ الْفَلَقِ وَقُلْ اَعُوْذُ بِرَبِّ النَّاسِ (روح المعانی سورۃ الفلق) یعنی نبی کریم صلی اللہ علیہ وسلم پر جب سورۃ الفلق اور سورۃ الناس نازل ہوئیں تو حضورنے فرمایا کہ آج رات مجھ پر ایسی بے مثل آیات اتاری گئی ہیں کہ ان جیسی پہلے نازل نہیں ہوئیں اور پھر اس کے بعد سورۃ الفلق اور سورۃ الناس پڑھی۔

یہ سورتیں چونکہ ایک طرف قرآن کریم کا خلاصہ ہیں اور دوسری طرف ان میں مضامین کی کثرت ہے اور بعض آئندہ زمانہ کے متعلق پیشگوئیاں بھی ہیں۔اس لئے نبی کریم صلی اللہ علیہ وسلم کا یہ فرمانا کہ یہ سورتیں بے مثل ہیں یہ ان کے فضائل اور کثرت مضامین کی طرف اشارہ ہے۔بخاری، ابو دائود، نسائی اور ابن ماجہ نے حضرت عائشہ رضی اللہ عنھا سے روایت کی ہے۔اَنَّ النَّبِیَّ صَلَّی اللہُ عَلَیْہِ وَسَلَّمَ کَانَ اِذَآ اٰویٰ اِلیٰ فِرَاشِہٖ کُلَّ لَیْلَۃٍ جَمَعَ کَفَّیْہِ ثُمَّ نَفَثَ فِیْـھِمَا فَقَرَأَ فِیْـھِمَا قُلْ ھُوَاللّٰہُ اَحَدٌ وَقُلْ اَعُوْذُ بِرَبِّ الْفَلَقِ وَقُلْ اَعُوْذُ بِرَبِّ النَّاسِ ثُمَّ یَـمْسَحُ بِـھِمَا مَااسْتَطَاعَ مِنْ جَسَدِہٖ۔یَبْدَأُ بِـھِمَا عَلیٰ رَأْسِہٖ وَوَجْھِہٖ وَمَا اَقْبَلَ مِنْ جَسَدِہٖ۔یَفْعَلُ ذٰلِکَ ثَلَاثَ مَرَّاتٍ۔وَجَآءَ فِی الْـحَدِیْثِ اَنَّ مَنْ قَرَأَھُمَا مَعَ سُوْرَۃِ الْاِخْلَاصِ ثَلَاثًا حِیْنَ یُـمْسِیْ وَثَلَاثَ حِیْنَ یُصْبِحُ کَفَتْہُ مِنْ کُلِّ شَیْءٍ۔(روح المعانی مقدمۃ سورۃ الفلق) یعنی نبی کریم صلی اللہ علیہ وسلم جب رات کے وقت اپنے بستر میں آرام فرماتے تو اپنی دونوں ہتھیلیوں کو جمع کرتے اور سورۃ الاخلاص، سورۃ الفلق اور سورۃ الناس کی تلاوت فرماتے اور ہتھیلیوں میں پھونکتے اور سر سے لے کر پائوں تک سارے جسم پر مَل لیتے اور یہ فعل تین بار کرتے۔نیز حدیث میں یہ بھی آتاہے کہ جو شخص ان دونوں سورتوں کو سورۃ الاخلاص کے ساتھ ملا کر صبح وشام پڑھے گا اس کے لئے یہ کافی ہوجائیں گی اور اس کی ضرورت پوری ہو گی اور دکھ درد سے محفوظ رہے گا۔اس سے مراد یہ ہے کہ قرآنی تعلیم انسان کو دکھوں سے بچاتی ہے کیونکہ جو شخص صبح و شام معوّذتین پڑھے گا لازماً قرآنی تعلیم خلاصتہً صبح وشام اس کے سامنے آتی رہے گی اور جس کے سامنے صبح وشام قرآنی تعلیم آتی رہے گی اسے عمل کا بھی خیال آئے گا۔اور اس طرح وہ دکھوں سے بھی محفوظ رہے گا۔اسی طرح ابن مردویہ نے عقبہ بن عامر سے روایت کی ہے کہ نبی کریم صلی اللہ علیہ وسلم نے فرمایا اِقْرَأُوْا بِالْمُعَوِّذَاتِ فِیْ دُبُرِ کُلِّ صَلوٰۃٍ۔(درمنثور سورۃ الفلق ) یعنی اے لوگو! ہر نماز کے بعد سورۃ الفلق اور سورۃ الناس کو پڑھا کرو۔اسی طرح سے ابن مردویہ نے حضرت امّ سلمہ ؓ سے روایت کی ہے کہ نبی کریم صلی اللہ علیہ وسلم نے فرمایا مِنْ اَحَبِّ السُّوَرِ اِلَی اللّٰہِ قُلْ اَعُوْذُ بِرَبِّ الْفَلَقِ وَ قُلْ اَعُوْذُ بِرَبِّ النَّاسِ کہ اللہ تعالیٰ کو سب سے زیادہ پسند یہ دو سورتیں ہیں یعنی سورۃ الفلق اور سورۃ الناس۔پھر یہ روایت بھی آتی ہے کہ نبی کریم صلی اللہ علیہ وسلم سورۃ الاخلاص اور معوذتین کو ملاکر وتر کی آخری رکعت میں پڑھا کرتے تھے۔(درمنثورسورۃ الفلق)

یہ سب روایات ان سورتوں کے فضائل کو ظاہر کرتی ہیں اور ہمیں اس طرف راہنمائی کرتی ہیں کہ ہمیں ہروقت اللہ تعالیٰ پر نگاہ رکھنی چاہیے اور اس کی پناہ میں رہنے کی دعا کرتے رہنا چاہیے۔وتر کی آخری رکعت چونکہ دن کی نمازوں کے خاتمہ پرہوتی ہے اس لئے رسول کریم صلی اللہ علیہ وسلم اس میں یہ دونوں سورتیں ملا کر پڑھتے تھے۔اورآپؐکا یہ فرمانا کہ جو شخص صبح و شام ان سورتوں کو پڑھے گا وہ آفات سے محفوظ ہو جائے گا۔اس کے معنے یہ ہیں کہ انسان کو اپنی ابتدا بھی قرآنی تعلیم پر رکھنی چاہیے اور اپنی انتہا بھی قرآنی تعلیم پر رکھنی چاہیے۔بعض لوگوں نے سورۃ الفلق اور سورۃ الناس کے متعلق یہ خیال ظاہر کیا ہے کہ یہ سورتیں دراصل قرآن کریم کا حصہ نہیں۔اگرچہ وہ یہ تسلیم کرتے ہیں کہ ان کو نبی کریم صلی اللہ علیہ وسلم نے قرآن کریم کے ساتھ لکھوایا ہے اور قرآن کریم کے خاتمہ پر انہیں پڑھا کرتے تھے اور پڑھنے کا حکم دیتے تھے۔مگر باوجود اس کے ان کا خیال ہے یہ سورتیں قرآن کریم کاحصہ نہیں۔چنانچہ حضرت عبداللہ بن مسعودؓ جو نبی کریم صلی اللہ علیہ وسلم کے مقرب صحابہ میں سے تھے ان کی یہی رائے ہے۔لیکن اس کی بنیاد کسی دلیل پر نہیں۔واقعات کے متعلق دلیل صرف وہی شہادت ہوسکتی ہے جو یا تو نظری ہو یا سماعی۔یعنی یاتو اس کی شہادت جس نے خود واقعہ دیکھا ہے یا پھر اگر کسی اور کی طرف اس فیصلہ کو منسوب کرے تو اس کے الفاظ بیان کرے۔لیکن حضرت عبداللہ بن مسعودؓ کا یہ بیان نہیں کہ انہوں نے نبی کریم صلی اللہ علیہ وسلم سے اس طرح سنا بلکہ وہ کہتے ہیں کہ ان دونوں سورتوں کے ذریعہ سے اللہ تعالیٰ نے نبی کریم صلی اللہ علیہ وسلم کو حکم دیا ہے کہ ان کے ساتھ استعاذہ کیاکریں۔اور چونکہ یہ دونوں سورتیں استعاذہ ہیں۔اس لئے معلوم ہوا کہ قرآن ختم ہو گیا۔ظاہر ہے کہ یہ محض ان کا قیاس ہے اس کے مقابل دوسرے مقتدر صحابہ کا بیان ہے کہ نبی کریم صلی اللہ علیہ وسلم نے یہ سورتیں انہیں قرآن کے حصہ کے طور پر لکھوائیں۔اس لئے حضرت عبداللہ بن مسعودؓ کا قیاس درآنحالیکہ وہ خود بھی تسلیم کرتے ہیں کہ نبی کریم صلی اللہ علیہ وسلم کے زمانہ میں یہ قرآن کریم کے ساتھ لکھی اور پڑھی جاتی تھیں کوئی وقعت نہیں رکھتا۔پس یہ سورتیں یقیناً قرآن کریم کا حصہ ہیں اور قرآن کریم کے خاتمہ کے لئے خدا تعالیٰ نے ان کو چنا ہے۔تعلق جیسا کہ قبل ازیں سورۃ الاخلاص کی تفسیر میں ذکر کیا جا چکا ہے کہ آخری تین سورتیں مجموعی لحاظ سے قرآن مجید کا اسی طرح خلاصہ ہیں جس طرح کہ سورۃ فاتحہ قرآن مجید کا خلاصہ ہے۔چنانچہ سورۃ الاخلاص میں وہی مضمون بیان ہوا ہے جو سورۃ فاتحہ کی آیات اَلْحَمْدُ لِلّٰہِ۔اِيَّاكَ نَعْبُدُ وَ اِيَّاكَ نَسْتَعِيْنُ۔اور اِهْدِنَا الصِّرَاطَ الْمُسْتَقِيْمَ میں بیان ہوا ہے۔سورۃ الاخلاص کے بعد سورۃ الفلق ہے۔اس میں سورۃ فاتحہ کی آیات رَبِّ الْعٰلَمِیْنَ اور

غَیْرِ الْمَغْضُوْبِ عَلَیْھِمْ کا مضمون بیان کیا گیاہے۔کیونکہ سورۃ الفلق کی ابتدا میں قُلْ اَعُوْذُ کے الفاظ ہیں جو بتاتے ہیں کہ اس جگہ کسی شرّ کا ذکر ہے جس سے پناہ مانگنے کے لئے کہا گیا ہے۔چنانچہ فرمایا قُلْ اَعُوْذُ بِرَبِّ الْفَلَقِ۔مِنْ شَرِّ مَا خَلَقَ۔یعنی میں اس خدا سے جو ہر چیز کا پیدا کرنے والا ہے دنیا کی ہر شے کی برائی سے پناہ مانگتاہوں۔پس رَبِّ الْفَلَقِ میں خدا تعالیٰ کے رَبِّ الْعٰلَمِیْنَ ہونے کا ذکر آگیا۔اور مَا خَلَقَ کے شر سے پناہ مانگنے میں غَیْرِ الْمَغْضُوْبِ عَلَیْھِمْ والی دعا آگئی۔مِنْ شَرِّ غَاسِقٍ اِذَا وَقَبَمیں جس کے معنے ہیں کہ جب تاریکی سب طرف چھاجاتی ہے یہ بتایا کہ بعض اوقات ربوبیتِ عالمین کی صفت دنیاسے مخفی ہو جاتی ہے۔میں اس سے پناہ مانگتاہوں اور مِنْ شَرِّ حَاسِدٍ اِذَا حَسَدَ میں جس کے معنے ہیں ہر حسد کرنے والے کے حسد سے میں محفوظ رہوں۔ربوبیت کے مخصوص اخفاء کا ذکر کیا۔کیونکہ حسد تب ہوتا ہے جب کچھ لوگوں پر انعام ہو رہا ہو اور کچھ پر سزا نازل ہورہی ہو۔پس سورۃ الفلق میں دعا سکھائی کہ خدا یا جب دنیا میں تیرا عام غضب نازل ہورہا ہو اس وقت بھی ہم کو بچا اور جب خاص غضب نازل ہو رہا ہو اس وقت بھی ہم کو بچا تاکہ نہ ہم حاسد بنیں اور نہ محسود ناکام۔کیونکہ بعض محسود بھی دوسروں کے حسد کے نتیجہ میں ناکام ہوجاتے ہیں۔الغرض سورۃ فاتحہ کے مضمون کا کچھ حصہ سورۃ الاخلاص میں آگیا اور کچھ سورۃ الفلق میں اور باقی حصہ سورۃ الناس میں بیان ہواہے اور اس طرح وہ سارا مضمون جو سورۃ فاتحہ میں بیان ہواہے۔آخری تین سورتوں میں دہرا دیا گیا ہے۔اس سورۃ کا سورۃ اخلاص سے یہ تعلق بھی ہے کہ سورۃ اخلاص میں توحید کامل کا سبق سکھایا گیا ہے او ربتایا گیا ہے کہ سارے قرآن مجید کا خلاصہ یہ ہے کہ اللہ ایک ہے اور اس کا کوئی شریک نہیں۔پھر اس کے بعد سورۃ الفلق اور سورۃ الناس میں ہر مسلمان کو یہ ہدایت کی گئی ہے کہ وہ اپنے اپنے زمانہ میں خدا تعالیٰ کی توحید کے جھنڈے کو بلند رکھے۔اور کسی جابر، ظالم اور دشمنِ اسلام سے ڈرے نہیں۔اور یہ یقین رکھے کہ صرف ایک خدا تعالیٰ کی ہستی ہی ہے جس کے اشارہ پر ساری کائنات حرکت کرتی ہے اور وہ خدا ہر خیر کے دینے او رہر شر سے محفوظ رکھنے پر قادر ہے۔پس اس کی توحید کا اعلان کرنے کے لئے مخلوق میں سے کسی سے ڈرنے کی ضرورت نہیں۔کیونکہ جب کوئی شخص توحید کی اشاعت کے لئے کھڑا ہوگا تو اللہ تعالیٰ اس کی خود حفاظت کرے گا اور بڑے سے بڑا بادشاہ بھی اس کا مقابلہ نہ کرسکے گا۔سورۃ الفلق کا تعلق سورۃ نصر سے بھی ہے۔سورۃ نصر میں اللہ تعالیٰ نے یہ خبر محمد رسول اللہ صلی اللہ علیہ وسلم کو دی تھی کہ اسلام بڑھے گا، پھولے گا اور پھلے گا اور کوئی اس کی ترقی کو روک نہیں سکتا۔سورۃ الفلق میں یہ بتایا کہ اے

مسلمانو! جب تمہیں خدا تعالیٰ کی پیشگوئیوں کے مطابق غلبہ مل جائے تو تم اللہ تعالیٰ کے حضور جُھک جانا اور دعا کرنا کہ تمہارے اندر کوئی ضعف پیدانہ ہو اور تمہارا سورج کبھی ڈوبنے نہ پائے بلکہ نصف النہار پر چمکتا رہے۔اور کسی قسم کا شر پیدا نہ ہواور نہ توتمہارا اندرونی نظام درہم برہم ہو کر تمہارا شیرازہ بکھر ے اور نہ کوئی بیرونی حاسد کھڑا ہوجائے اور تمہاری حکومت کو تباہ کردے۔بِسْمِ اللّٰہِ الرَّحْمٰنِ الرَّحِیْمِ۰۰۱ (میں ) اللہ کا نام لے کر جو بے انتہا کرم کرنے والا (اور ) بار بار رحم کرنے والا ہے ( اس سورۃ کو شروع کرتاہوں) قُلْ اَعُوْذُ بِرَبِّ الْفَلَقِۙ۰۰۲ (ہم ہر زمانہ کے مسلمان سے کہتے ہیںکہ) تُو (دوسرے لوگوں سے ) کہتا چلا جا کہ میں مخلوقات کے رب سے (اس کی) پناہ طلب کرتا ہوں۔مِنْ شَرِّ مَا خَلَقَۙ۰۰۳ اس کی ہر مخلوق کی (ظاہری اور باطنی ) برائی سے (بچنے کے لئے ) حلّ لُغات۔اَعُوْذُ۔عَاذَ سے مضارع متکلم کا صیغہ ہے۔اور عَاذَ بِہٖ مِنْ کَذَا کے معنے ہیں۔لَـجَأَ اِلَیْہِ وَاعْتَصَمَ۔کسی کی پناہ اور حفاظت میں آکر بچائوچاہا۔چنانچہ جب اَعُوْذُ بِاللّٰہِ مِنَ الشَّیْطٰنِ الرَّجِیْمِ کہتے ہیں تو اس کے معنے ہوتے ہیں۔اَلْتَجِیُٔ اِلَی اللہِ وَاعْتَصِمُ مِنَ الشَّیْطَانِ۔کہ میں اللہ کی پناہ میں آکر شیطان کے حملوں سے بچتاہوں۔اور جب عَاذَ بِالشَّیْءِ کہیں تو معنے ہوں گے لَزِمَہٗ اس کے ساتھ چمٹ گیا۔نیز جب عَاذَتْ بِوَلَدِ ھَا کافقرہ بولیں تو معنے ہوتے ہیں قَامَتْ مَعَہٗ۔یعنی فلاں عورت اپنے بچہ کے ساتھ کھڑی ہوگئی۔(اقرب) پس اَعُوْذُ کے معنے ہوں گے میں اللہ تعالیٰ کی پناہ میں آتا ہوں۔(۲) میں اللہ تعالیٰ کے ساتھ چمٹے رہنا چاہتاہوں۔اَلْفَلَق کے معنے ہیں۔اَلصُّبْحُ۔صبح۔اَلْـخَلْقُ کُلُّہٗ۔ساری مخلوقات۔جَھَنَّمُ۔جہنم۔اَلْمُطْمَئِنُّ مِنَ الْاَرْضِ بَیْنَ رَبْوَتَیْنِ۔دو چوٹیوں کے درمیان میدانی زمین۔مَقْطَرَۃُ السُّجَّانِ۔وہ لکڑی جس میں اتنے چوڑے سوراخ ہوتے ہیں کہ جس میں انسان کی پنڈلیاں آجائیں۔اس میں مجرموں کو قطار میں کھڑا کیا جاتا ہے۔اور

ایک کیلا گاڑ کے سوراخ کو اس طرح تنگ کردیا جاتا کہ کوئی پائوں نہ نکال سکے۔مَایَبْقٰی مِنَ اللَّبَنِ فِیْ اَسْفَلِ الْقَدَحِ۔دودھ کا وہ حصہ جو آخر میں پیالہ میں رہ جاتا ہے۔اور فلق اس دودھ کو بھی کہتے ہیں جو کھٹا ہو کر پھٹ جاتا ہے۔وَالشَّقُّ فِی الْـجَبَلِ۔اور پہاڑ میں جو شگا ف ہوتا ہے اس کو بھی فلق کہتے ہیں۔(اقرب) مفردات میں ہے۔اَلفَلْقُ : شَقُّ الشَّیْءِ وَاِبَانَۃُ بَعْضِہٖ عَنْ بَعْضٍ۔کہ فلق کے معنے ہیں کسی چیز کا پھاڑنا اور اس کے بعض حصوں کو دوسروں سے جد اکردینا۔وَقَوْلُہٗ قُلْ اَعُوْذُ بِرَبِّ الْفَلَقِ اَیْ اَلصُّبْحِ وَقِیْلَ الْاَنْـھَارِ الْمَذْکُوْرَۃِ فِیْ قَوْلِہٖ وَجَعَلَ خِلَالَھَا اَنْـھَارًا۔اور اللہ تعالیٰ کے ارشاد قُلْ اَعُوْذُ بِرَبِّ الْفَلَقِ میں فلق سے مراد صبح ہے (درحقیقت صبح کو فلق اس لئے کہتے ہیں کہ پوپھٹتی ہے اور اس میں سے سفیدی نمودار ہو کر فضا ء کو دوحصوں میں تقسیم کر دیتی ہے) نیز بعض لوگوں نے فلق کے معنے نہروں کے بھی کئے ہیں اور یہ معنے اس وجہ سے ہیں کہ نہروں کا پانی زمین کو پھاڑتا ہے۔(مفردات) پس قُلْ اَعُوْذُ بِرَبِّ الْفَلَقِ کے معنے ہوں گے۔۱۔میں اس خدا کی پناہ چاہتاہوں جو اندھیرے کے بعد روشنی پیدا کرتا ہے۔۲۔میں اس خدا کی پناہ چاہتا ہوں جس نے سب کچھ پیدا کیا ہے۔یا جس نے جہنم کو پیدا کیا ہے۔یا جس نے دوگھاٹیوں کے درمیان ایک عمدہ میدان بنایا ہے (یعنی اسلام جو افراط و تفریط کے درمیان ہے ) ۳۔یا میں اس خدا کی پناہ میں آتا ہوں جس کا اقتدار قید خانوں پر بھی ہے۔۴۔اس خدا کی پناہ چاہتاہوں جو نہروں کا رب ہے۔۵۔اس خدا کی پناہ چاہتا ہوں جس کے قبضے میں پیالے کا بچاہوا دودھ ہے۔تفسیر۔سورۃ الفلق اور سورۃ الناس کو معوّذتان کہتے ہیں۔یعنی وہ سورتیں جن کو پڑھ کر اللہ تعالیٰ کی پناہ طلب کی جاتی ہے اور ان کا یہ نام اس وجہ سے رکھا گیا ہے کہ ان دونوں کے ابتدا میں قُلْ اَعُوْذُ کے الفاظ رکھے گئے ہیں یعنی ہر پڑھنے والے کو یہ حکم دیا گیا ہے کہ وہ یہ اعلان کرے کہ میں ہر قسم کے شر سے بچنے کے لئے رب الفلق اور ربّ الناس کی پناہ میں آتا ہوں۔قومی لحاظ سے اور فردی لحاظ سے بھی۔یہ عجیب بات ہے کہ قرآن کریم میں اللہ تعالیٰ فرماتا ہے۔اِذَا قَرَاْتَ الْقُرْاٰنَ فَاسْتَعِذْ بِاللّٰہِ۔(النحل:۹۹) یعنی اے قرآن کریم کے ماننے والے جب تُو قرآن کو پڑھنے کا ارادہ کرے تو اللہ تعالیٰ سے استعاذہ کر لیا کر۔پس قرآن کریم کے شروع کرتے وقت اَعُوْذُ پڑھنے کا حکم تو دیا لیکن قرآن کریم کے شروع میں اَعُوْذُ نازل نہیں کیا۔

چنانچہ سورۃ فاتحہ کی پہلی آیت بِسْمِ اللّٰہِ الرَّحْمٰنِ الرَّحِیْمِ ہے یہ نہیں کہ اَعُوْذُ بِاللّٰہِ مِنَ الشَّیْطٰنِ الرَّجِیْمِ سے شروع ہو۔الغرض قرآن کریم کو شروع کرتے وقت حکم تو دیا کہ اَعُوْذُ پڑھا کرو لیکن اَعُوْذُ اتارا نہیں۔اور قرآن کریم کے خاتمہ کے متعلق یہ نہیں فرمایا کہ جب تم قرآن کریم ختم کر لیا کرو تو اَعُوْذُ پڑھا کرو۔لیکن اس کے خاتمہ پر اپنی طرف سے وحی کی صورت میں اَعُوْذُ نازل کردیا ہے اور اس کے لئے دوسورتیں یعنی سورۃ الفلق اور سورۃ الناس بھی آخر میں رکھ دی ہیں۔جو لازماً قرآن کریم پڑھنے والے کو پڑھنی پڑتی ہیں۔سویاد رکھنا چاہیے کہ اس طریق کے اختیار کرنے میں کئی ایک حکمتیں ہیں :۔۱۔جب انسان کسی نیک کام کا ارادہ کرتا ہے تومحض ارادہ ہی کے ساتھ خدا تعالیٰ کے کامل فضلوں کا وارث نہیں ہوجاتا۔ارادہ کے ساتھ انسان کو خدا تعالیٰ کی طرف سے صحیح تعلیم مل جاتی ہے۔یعنی اس کے ارادہ میں مدد دی جاتی ہے یہی وجہ ہے کہ جب قرآن کریم کے ابتداء میں اَعُوْذُ پڑھنے کے متعلق فرمایا تو وحی کے ذریعہ اَعُوْذُ کو اتارا نہیں بلکہ صرف اتنا فرمایا کہ جب تم قرآن کریم پڑھنے کا ارادہ کرو تو اَعُوْذُ پڑھ لیا کرو۔گویا ارادہ کو مضبوط کرنے کا ذریعہ بتادیا۔لیکن جب قرآن کریم پڑھ لیا اور عمل کرلیا تو آخر میں اَعُوْذُ والی سورتیں رکھ دیں۔یعنی انسان کے اختیا رکے بغیر اللہ تعالیٰ نے اپنی مدد سے اَعُوْذُ پڑھوا دیا۔پس معلوم ہوا کہ جب انسان نے ارادہ کیا تو ارادہ ہی کی امداد دی گئی۔اور جب اس نے عمل کر لیا تو اس کو عمل کر کے امداد دی گئی۔۲۔جب بھی کوئی مسلمان قرآن کریم کو پڑھے گا خواہ ابتدا سے پڑھے یا درمیان سے یاآخر سے۔تو اس وقت تک وہ قرآنی احکام کی تفصیلات سے آگاہ نہیں ہوگا۔کیونکہ اس نے قرآن کریم کا ابھی مطالعہ نہیں کیا۔مگر جس وقت پڑھنے والا سارا قرآن کریم شروع سے آخر تک ختم کر لیتا ہے تو ایمان کی باریکیوں سے بھی واقف ہوجاتا ہے اور اس کے سامنے اعمال کی تفصیلات بھی آجاتی ہیں اور اسے معلوم ہو جاتا ہے کہ اسے کون کون سے اعمال بجالانے چاہئیں اور کن اعما ل کے کرنے سے مجتنب رہنا چاہیے اور پھر اسے یہ بھی علم ہوجاتا ہے کہ ٹھوکروں کی کیا کیا نوعیتیں ہوتی ہیں۔گویا قرآن کریم پڑھ لینے کے بعد انسان کا ذہن کھل جاتا ہے اور وہ اپنی ذمہ داریوں کو سمجھنے لگ جاتا ہے اور گھبراتا ہے کہ کہیں ایسا نہ ہو کہ میں اپنی ذمہ داریوں میں کوتاہی کروں۔پس ان دونوں حالتوں کے متعلق اللہ تعالیٰ نے ہمیں اَعُوْذُ سکھایا ہے۔قرآن کریم کی ابتدا کرتے وقت صرف اتنا ہی حکم دیا کہ اَعُوْذُ پڑھ لیا کرو۔اور اس اَعُوْذُ کے جو الفاظ نبی کریم صلی اللہ علیہ وسلم نے سکھائے ہیں وہ بہت ہی مختصر ہیں۔گویا قرآن کریم کے پڑھنے والے کی ذہنی کیفیت کے مطابق ہیں۔اور قرآن کریم کے آخر میں جو اَعُوْذُ اللہ تعالیٰ نے نازل فرمایا ہے وہ بہت زیادہ وسیع

مطالب پر حاوی ہے اور اس میں مضرات سے بچنے کے لئے کامل دعا سکھلائی گئی ہے۔اور یہ اس شخص کی ذہنی کیفیت کے مطابق ہے جو سارے قرآن کریم کو پڑھ لیتا ہے۔اور ہر اونچ نیچ کا اسے علم ہو جاتا ہے اور سمجھ لیتا ہے کہ مجھے فلاں فلاں چیز سے بچنا چاہیے اور فلاں فلاں قسم کی چیز کا طالب ہونا چاہیے۔پس ہر دو اَعُوْذُ خاص حکمتوں پر مشتمل ہیں۔قرآن کریم کے شروع اور آخر میں اَعُوْذُ پڑھنے کی مثال ایسی ہی ہے جیسے کوئی شخص مکان بناتے وقت نیک لوگوں کے ہاتھوں سے بنیاد رکھوائے اور عمارت کی تکمیل پر پھر دعا کرائے۔یہی حال نیکی کاہے جب کوئی انسان نیکی کی عمارت کھڑی کرنا چاہتا ہے تو ضروری ہے کہ وہ پہلی اینٹ خدا تعالیٰ کے ہاتھ سے رکھوائے۔اسی طرح ضروری ہے کہ جب وہ نیکی کی تعمیر پایۂ تکمیل کو پہنچ جائے تو اس وقت بھی خدا تعالیٰ کے ہاتھ سے آخری اینٹ رکھائے۔پس جو اَعُوْذُ ہم قرآن کریم کے ابتدا میں پڑھتے ہیں وہ خدا تعالیٰ سے اپنی نیکی کی بنیاد رکھواتے ہیں اور جب آخر میں اَعُوْذُ پڑھتے ہیں تو گویا خدا تعالیٰ کے ہاتھوں اس تقویٰ کے مکان کا افتتاح کراتے ہیں۔جب تک یہ دونوں باتیں نہ ہوں ایمان کی عمارت مکمل نہیں ہوسکتی۔یہ ایک گُر ہے جو ہمیں اَعُوْذُ پڑھنے کے حکم میں بتایا گیا ہے۔۳۔پھر قرآن مجید کے ابتدا میں اَعُوْذُ پڑھنے کا حکم دینے اور آخر میں اَعُوْذُ نازل کرنے میں اس بات کی طرف بھی اشارہ کیا گیا ہے کہ دنیوی امور کا تو کیا ذکر ہے دینی امور کی ابتدا بھی اللہ تعالیٰ کی پناہ سے ہونی چاہیے اور ان امور کی انتہا بھی اللہ تعالیٰ کی پناہ پر ہونی چاہیے کیونکہ کوئی شخص کتناہی دینی معاملات میں دسترس رکھتا ہو اور کتنا ہی اللہ تعالیٰ کا عرفان اسے حاصل ہو اللہ تعالیٰ کی نصرت اور اس کی حفاظت سے مستغنی نہیں ہوسکتا۔رسول کریم صلی اللہ علیہ وسلم جیسا انسان جو نہ صرف تمام انسانوں بلکہ تمام نبیوں کا سردار تھا اور جو مخلوق کے پیدا ہونے کا اصل موجب تھا۔یعنی اللہ تعالیٰ نے جب انسان کو پیدا کیا تو اس امر کو مدّ ِنظر رکھ کر پیدا کیا کہ محمد صلی اللہ علیہ وسلم کا وجود اس سے ظاہر ہونے والا ہے جس کا ذکر ایک حدیث قدسی میں اس طرح آتا ہے کہ لَوْ لَاکَ لَمَا خَلَقْتُ الْاَفْلَاکَ۔یعنی اے محمد رسول اللہ (صلی اللہ علیہ وسلم) اگر تیرا وجود نہ ہوتا تو میں زمین و آسمان اور مخلوق کو پیدا نہ کرتا۔اتنے بڑے وجود کے متعلق بھی احادیث میں آتا ہے کہ رسول کریم صلی اللہ علیہ وسلم تہجد میں اتنی اتنی دیر خدا تعالیٰ کے حضورکھڑے رہتے کہ آپ کے پائوں سوج جاتے۔حضرت عائشہ رضی اللہ عنہا نے جب یہ کیفیت دیکھی تو ایک دن رسول کریم صلی اللہ علیہ وسلم سے عرض کیا کہ یا رسول اللہ جب آپ کے اگلے اور پچھلے سب گناہ خدا تعالیٰ نے معاف کردئیے ہیں تو آپ کو تہجّد میں اس قدر کھڑے ہونے کی کیا ضرورت ہے؟ آپؐنے فرمایا اے عائشہؓ کیا میں عبد شکور نہ بنوں(بخاری کتاب التھجد باب قیام النبی صلی اللہ علیہ وسلم باللیل)۔یعنی جب خدا تعالیٰ نے مجھ پر اس قدر فضل

کیا ہے تو میری ذمہ داری بھی بڑھ گئی ہے اور میرے لئے ضروری ہو گیا ہے کہ میں پہلے سے بھی زیادہ اللہ تعالیٰ کی عبادت کروں۔اسی طرح حضرت عائشہ رضی اللہ عنہا سے ایک دفعہ رسول کریم صلی اللہ علیہ وسلم کی گفتگو ہوئی۔نجات کا ذکر تھا حضرت عائشہ رضی اللہ عنہا نے کہا۔یا رسول اللہ ہمیں تو اپنی نجات کے لئے اعمال کی ضرورت ہے لیکن جب خدا تعالیٰ کی طرف سے آپ کے لئے نجات مقدر ہے تو آپ کو اعمال کی کیا ضرورت ہے۔رسول کریم صلی اللہ علیہ وسلم نے فرمایا یہ صحیح نہیں۔میری نجات بھی اس کے فضل سے ہی وابستہ ہے۔تو انسان کتنا ہی اعمال صالحہ میں ترقی کرے اور کتنے بڑے بلند مدارجِ روحانیہ پر پہنچ جائے پھر بھی ایسے پہلو باقی رہ جاتے ہیں جن کی وجہ سے وہ خدا تعالیٰ کی حفاظت سے باہر نہیں نکل سکتا۔جب رسول کریم صلی اللہ علیہ وسلم یہ فرماتے ہیں کہ میں بھی خدا تعالیٰ کے فضل سے نجات حاصل کروں گا تو اور کون ہے جویہ دعویٰ کرسکے کہ میں اتنابڑا ہو گیا ہوں کہ اب میں خدا تعالیٰ کی رحمت سے مستغنی ہو گیا ہوں اور مجھے اس کے فضل کی ضرور ت نہیں رہی۔بلکہ اپنے زور سے ترقی حاصل کر لوں گا مگر باوجود اس کے کہ مسلمانوں کویہ تعلیم دی گئی ہے کہ وہ ہر حالت میں اللہ تعالیٰ کے آستانہ پر جھکے رہیں اور اس سے اس کی اعانت طلب کرتے رہیں۔اگر وہ چند دن بھی نیکی کا کوئی کام کرتے ہیں تو کبر اور خود پسندی میں مبتلا ہوجاتے ہیں۔تھوڑے دن نمازیں پڑھیں گے تو اللہ تعالیٰ پر احسان جتانے لگ جائیں گے۔چند روزے رکھیں گے تو سمجھ لیں گے کہ اب خدا تعالیٰ پر احسان ہو گیا اور اب اس کا فرض ہوگیا ہے کہ وہ ان کی خواہش پوری کرے۔چند ہ دیا تو اس وہم میں مبتلا ہونے لگیں گے کہ اب خدا تعالیٰ پر ان کاحق قائم ہوگیا ہے اور اگر وہ کوئی امتیازی سلوک ان سے نہیں کرتا تو نعوذ باللہ مجرم ہے۔یہی چیزیں ہیں جو انسان کو تباہ کردیتی ہیں اور جب کسی کے اندر یہ روح پیداہوجائے تو چاہے وہ ترقی کے تمام مدارج طے کر چکا ہو اس کے اعمال حبط ہو جاتے ہیں۔اور وہ ادنیٰ سے ادنیٰ مقام پر پہنچ جاتا ہے۔پس انسان کو ہمیشہ اللہ تعالیٰ کی پناہ طلب کرتے رہنا چاہیے تا وہ کسی موقعہ پر بھی کبر میں مبتلا ہو کر اللہ تعالیٰ کے انعامات سے محروم نہ ہو جائے۔کبر ابتدا میں بھی انسان کو نیکی سے محروم رکھتا ہے یعنی جب اس کے سامنے کوئی بات پیش کی جائے تو وہ اسے سن نہیں سکتااور کبر انتہا میں بھی انسان کی ہلاکت کا باعث بنتا ہے کیونکہ انسان یہ سمجھنے لگتاہے کہ اب وہ ایسے مقام پر پہنچ چکا ہے کہ اسے اللہ تعالیٰ کی مدد کی ضرورت نہیں۔ہندوستان کا ایک مشہور بادشاہ ہمایوں گذراہے جب اس نے بنگال میں افغانوں کے سوری خاندان کو شکست دی۔تو اس کے ساتھ بہت بڑا لشکر تھا۔صوبہ بہار میںسے وہ گذر رہا تھا کہ ایک دریا کے کنارے جب اس نے اپنے لشکر کو دور دور تک پھیلا ہوا دیکھا تو اس کے منہ سے یہ فقرہ نکل گیا کہ یہ اتنا بڑا لشکر ہے کہ اگر خدا بھی

آج 10 میں سے 10 باقی