سُوْرَۃُ اِبْرٰھِیْمَ
تفسیر کبیر (جلد ۵), حصہ 7
کہ تیری مقدس عبادت گاہ کی خدمت اور آبادی کے لئے میں نے اپنی اولاد کو یہاں چھوڑا ہے اور اس نیت سے یہاں چھوڑا ہے کہ وہ تیرے ذکر کو بلند کریں اور یہ جانتے ہوئے چھوڑا ہے کہ اس جگہ دنیوی آرام کا کوئی سامان نہ موجود ہے نہ ہوسکتا ہے۔پس اب میں تجھ سے دعا کرتا ہوں کہ ایک تو جس مقصد کے لئے میں نے ان کو یہاں رکھا ہے وہ پورا ہو۔لوگ ان کی طرف توجہ کریں اور ان کی تبلیغ اور ان کے وعظ میں اثر ہو اور یہ تیری عبادت قائم کرنے میں کامیاب ہوں۔دوسرے ان کی جسمانی حالت کی درستی کا بھی خیال رکھ۔اور باوجود اس کے کہ انہیں میں ایسے علاقہ میں چھوڑ رہا ہوں کہ گھاس کی پتی بھی وہاں نظر نہیں آتی تو اعلیٰ سے اعلیٰ پھل بھی ان تک پہنچا۔تاکہ انہیں معلوم ہوجائے کہ جو خدا تعالیٰ کے لئے قربانی کرتا ہے خدا تعالیٰ اسے دنیا میں بھی ضائع نہیں کرتا۔حضرت ابراہیم کی دعا کا اثر اس دعا کا اثر دیکھو کتنا وسیع ہوا ہے۔آج سب دنیا مکہ والے کے نام پر قربان ہے اور دل آپ ہی آپ اس کی تعلیم کی طرف جھکے جارہے ہیں اور اب تو مسیح موعود علیہ السلام کی بعثت سے اور بھی ترقی کے سامان پیدا ہورہے ہیں۔یہ تو دینی حصہ کی دعا کا حال ہے۔باقی رہا دنیوی حصہ۔سو وہ عجیب طرح پورا ہورہا ہے۔اس بے آب و گیاہ علاقہ میں ہر قسم کے اور عمدہ سے عمدہ پھل میسر ہیں۔میں نے ایسے اچھے انگور اور انار مکہ میں کھائے ہیں کہ نہ ہندوستان میں نہ شام میں نہ اٹلی اور فرانس میں ویسے نظر آئے۔دنیا بھرکا پھل وہاں جاتا اور ابراہیمی دعا کی قبولیت کا ثبوت دیتا ہے۔اَفْىِٕدَةً مِّنَ النَّاسِ میں من بعضیہ نہیں بلکہ زائدہ ہے اَفْىِٕدَةً مِّنَ النَّاسِ کے متعلق بعض علماء نے کہا ہے کہ اس میں من بعضیہ ہے یعنی کچھ لوگوں کے دل ان کی طرف متوجہ ہوں۔مگر یہ درست نہیں۔دعا کرنے والا کبھی تھوڑی چیز نہیں مانگتا۔پس یہاں من بعضیہ نہیں بلکہ زائدہ ہے۔حروف زائدہ معنوں میں زور پیدا کرنے کے لئے آتے ہیں حروف زائدہ تاکید کے لئے آتے ہیں یعنی وہ معنوں میں زور پیدا کر دیتے ہیں یعنی جومفہوم بغیر حروف زائدہ کے پیدا ہوتا تھا اس میں ان کے ذریعہ سے قوت اور طاقت پیدا کر دی جاتی ہے۔چنانچہ اَفْىِٕدَةً مِّنَ النَّاسِ میں سے مِنْ کو اڑا دیا جائے تو اَفْئِدَۃُ النَّاسِ رہ جائے گا اور اس کے معنے ’’لوگوں کے دل‘‘ کے ہوں گے۔چونکہ ال خصوصیت اور کمال کے لئے بھی آتا ہے اور یہی اس جگہ مراد ہے۔پس اس جملہ کے معنے ہوئے۔’’ کامل اور خاص لوگوں کے دل‘‘ مِنْ نے داخل ہوکر ان معنوں میں اور زور پیدا کر دیا اور مراد یہ ہوئی کہ مکہ والوں کی طرف جھکنے والے دل نہایت پاک اور نہایت کامل لوگوں کے دل ہوں۔
یاد رکھنا چاہیے کہ حروف زائدہ سے مراد لغو اور بے کار اور زائد حروف نہیں بلکہ ان سے مراد معنوں میں زیادتی کرنے والے حروف ہیں اور اسی وجہ سے ان کے معنے تاکید کے ہوتے ہیں۔وَ ارْزُقْهُمْ مِّنَ الثَّمَرٰتِ لَعَلَّهُمْ يَشْكُرُوْنَ۔ظاہری پھلوں کے علاوہ یہ مراد بھی ہوسکتی ہے کہ ان کی عبادات اور ان کی قربانیاں ضائع نہ ہوں بلکہ ان کے اعلیٰ نتائج نکلتے رہیں۔حضرت ابراہیم کی یہ دعا حضرت نبی کریم ؐ کے وجود میں پوری ہوئی میرے نزدیک یہ دعا آنحضرت صلعم کے لئے ہے۔آپؐ سے پہلےتَهْوِيْۤ اِلَيْهِمْ کا مفہوم کب پورا ہوا۔آپؐ سے پہلے صرف عرب لوگ ہی مکہ جاتے تھے۔مگر اب آنحضرت صلعم کے بعد تمام جہان کے لوگ وہاں دوڑے چلے جاتے ہیں۔پس میرے نزدیک اس دعا میں ایسے رسول کی دعا کی گئی تھی جو سب دنیا کی طرف مبعوث ہو اور جس کی آواز کو سن کر سب دنیا کے لوگ مکہ میں حج کے لئے جمع ہوں اور مکہ کو توحید کا مرکز بنا کر شرک اور مشرکوں سے پاک کر دیا جائے۔حضرت ابراہیم کے خواب کی تعبیر میرے نزدیک حضرت ابراہیمؑ نے جو یہ خواب میں دیکھا تھا کہ وہ حضرت اسمٰعیل ؑ کو ذبح کررہے ہیں اس کی تعبیر یہی تھی کہ وہ انہیں ایک دن ایک غیرذی زرع وادی میں چھوڑ جائیں گے۔ایسی جگہ پر چھوڑنا ان کو اپنے ہاتھ سے ذبح ہی کرنا تھا۔حضرت ابراہیم نے زمانہ کے رواج کے مطابق اس کی تعبیر غلط سمجھی تھی۔کیونکہ اس زمانہ میں لوگ انسانوں کی قربانی کیا کرتے تھے۔انہوں نے یہی سمجھا کہ شاید اللہ تعالیٰ کا یہی منشاء ہے کہ حضرت اسمٰعیل ؑ کو ذبح کر دیا جائے لیکن دراصل اس کی تعبیر یہی تھی کہ وہ ان کو ایک غیرذی زرع وادی میں چھوڑیں گے۔اللہ تعالیٰ نے حضرت ابراہیم علیہ السلام کو فوراً ہی خواب کی تعبیر نہ سمجھائی کیونکہ وہ چاہتا تھا کہ حضرت ابراہیم علیہ السلام کو انسانی قربانی کا منسوخ قرار دینے والا بنائے۔چنانچہ جب حضرت ابراہیم ؑ اپنی خواب کو لفظاً لفظاً پورا کرنے کے لئے تیار ہو گئے تو اس نے انہیں بتا دیا کہ تمہارا اخلاص بھی ظاہر ہو گیا اور یہ حکم بھی قائم ہو گیا کہ آئندہ انسان کو بغیر جنگ یا بغیر قصاص کے قتل نہ کیا جائے گا۔آئندہ انسانی قربانی بامعنی ہو گی۔یعنی انسان اپنے وقت، اپنے علم، اپنے مال کو قربان کرکے خدا تعالیٰ کا قرب حاصل کرے گا نہ کہ اپنے گوشت کو قربان کرکے۔پس تم ظاہر میں ردبلا کے طور پر بکرے کی قربانی کردو۔اور حقیقت میں اپنے بچہ کی ایک تلخ قربانی کے لئے تیار ہو جاؤ جو آئندہ پیش آنے والی ہے۔
رَبَّنَاۤ اِنَّكَ تَعْلَمُ مَا نُخْفِيْ وَ مَا نُعْلِنُ١ؕ وَ مَا يَخْفٰى عَلَى اے ہمارے رب جو کچھ ہم چھپاتے ہیں اور جو کچھ ہم ظاہر کرتے ہیں تو یقیناً (سب) جانتا ہے اور اللہ (تعالیٰ) سے اللّٰهِ مِنْ شَيْءٍ فِي الْاَرْضِ وَ لَا فِي السَّمَآءِ۰۰۳۹ کوئی چیز نہ زمین میں چھپی رہ سکتی ہے اور نہ آسمان میں تفسیر۔حضرت ابراہیم ؑ نے حضرت اسمعیل ؑ کو خدا تعالیٰ کی خوشنودی کے لئے جنگل میں چھوڑا اس آیت میں بتایا ہے کہ حضرت ابراہیم ؑ کا یہ فعل نہایت نیک نیت کی بناء پر تھا۔ضمناً اس میں بائبل کے ایک اعتراض کا جواب دیا گیا ہے۔بائبل میں ہے کہ حضرت سارہؓ ناراض ہوگئی تھیں۔اس لئے ان کو خوش کرنے کے لئے حضرت ابراہیمؑ نے حضرت اسمٰعیلؑ اور ان کی والدہ کو جنگل میں چھوڑا تھا(پیدائش باب ۲۱ آیت ۸ تا ۱۲)۔یعنی ایک نبی نے اپنی ایک بیوی کی رضامندی کے لئے بعض بے گناہوں پر ظلم کیا۔قرآن کریم اس امر کا جو حضرت ابراہیم کے نام پر دھبہ ہے خود حضرت ابراہیم کے منہ سے دفعیہ کرواتا ہے اور ان کی مذکورہ بالا دعا نقل کرکے بتاتا ہے کہ یہ بیان بائبل کا غلط اور بے بنیاد ہے۔اس دعا کا مطلب یہ ہے کہ اے رب! تو تو جانتا ہے کہ میری نیت ان کو جنگل میں چھوڑنے سے کیا ہے؟ میں ایسا کسی دنیوی غرض کی وجہ سے نہیں کررہا۔بلکہ محض تیری خوشنودی کے حصول کے لئے اپنے بیوی بچوں کو اس جنگل میں چھوڑے جارہا ہوں۔مَا يَخْفٰى عَلَى اللّٰهِ مِنْ شَيْءٍ میں مِنْ کا جو لفظ آیا ہے اس کا مفہوم اس جگہ ’’بھی‘‘ کے لفظ سے ملتا ہے۔یعنی کوئی چیز بھی اللہ سے پوشیدہ نہیں اور اللہ تعالیٰ نے اس فقرہ کو اس لئے دوہرایا ہے کہ جس طرح ابراہیمؑ نے فرمایا تھا کہ اے اللہ! تو میری نیت کو خوب جانتا ہے اسی طرح اللہ نے بھی ان کے قول کی تصدیق کرتے ہوئے فرمایا کہ مَا يَخْفٰى عَلَى اللّٰهِ مِنْ شَيْءٍ۔بے شک ہم بھی اس کی نیت سے واقف ہیں اور جانتے ہیں کہ اس کا یہ فعل بیوی کی رضا حاصل کرنے کے لئے نہیں بلکہ ہماری رضا حاصل کرنے کے لئے تھا۔
اَلْحَمْدُ لِلّٰهِ الَّذِيْ وَهَبَ لِيْ عَلَى الْكِبَرِ اِسْمٰعِيْلَ وَ ہر ایک(قسم کی) تعریف اللہ (تعالیٰ ہی) کے لئے (مخصوص) ہے (وہ اللہ) جس نے (میرے) بڑھاپے کے اِسْحٰقَ١ؕ اِنَّ رَبِّيْ لَسَمِيْعُ الدُّعَآءِ۰۰۴۰ باوجود مجھے(دو بیٹے) اسمعیل اور اسحاق عطا کئے ہیں۔میرا رب یقیناً خوب (ہی) دعائیں سننے والا ہے حل لغات۔وَھَبَ لَہٗ مَالًا۔اَعْطَاہُ اِیَّاہُ بِلَا عَوَضٍ۔بغیر بدلہ کے اُسے مال دیا۔(اقرب) تفسیر۔جیسا کہ اوپر کی آیات سے ظاہر ہے اس جگہ حضرت ابراہیم علیہ السلام کی عمر کے اس حصہ کا ذکر ہے جبکہ وہ خانہ کعبہ کی بنیاد رکھ رہے تھے۔کیونکہ جو دعائیں اس جگہ مذکور ہیں وہ اس وقت کی ہیں (دیکھو سورۃ بقرہ ع ۱۵/۱۵) اس آیت میں حضرت ابراہیم علیہ السلام کے الحمد للہ کہنے کا مطلب اس پر کہا جاسکتا ہے کہ پھر اس موقعہ پر اولاد کے ملنے کا ذکر اور اس پر الحمدللہ کہنے سے کیا مراد ہے اور اس کا کیا موقع ہے؟ اس کا جواب یہ ہے کہ حضرت ابراہیم علیہ السلام اس موقع پر اولاد کے ملنے پر الحمدللہ نہیں کہہ رہے بلکہ اس بات پر الحمدللہ کہہ رہے ہیں کہ وہ اپنی زندگی میں عبادت قائم کرنے کی بنیاد رکھ رہے ہیں۔ان کو محض اس بات کی خوشی ہے کہ وہ اپنی اولاد کے ذریعہ سے خدا کی عبادت کی بنیاد رکھ چلے ہیں۔اس آیت سے یہ بھی معلوم ہوتا ہے کہ حضرت اسحاق ؑ بھی وقف تھے کیونکہ ان کو بھی دعا میں شامل کیا ہے۔ابراہیم علیہ السلام کے ایمان کا یہ آیت ایک بے مثل ثبوت پیش کرتی ہے۔بڑھاپے کی ا ولاد بڑا لڑکا بے آب و گیاہ جنگل میں چھوڑ کر آئے ہیں۔جہاں میٹھے پانی اور خوراک تک کا پہنچنا مشکل ہے۔لیکن اللہ تعالیٰ کی باتوں پر اس قدر یقین ہے کہ جب دنیا کی نگاہ میں انہوں نے اپنے بیٹے کے مستقبل کو تباہ کر دیا وہ نہایت جوش و خروش سے اللہ تعالیٰ کے شکریہ میں لگے ہوئے ہیں کہ سب تعریف اللہ تعالیٰ ہی کا حق ہے۔جس نے مجھے بڑھاپے میں اسماعیل اور اسحاق دیئے اور ان کے حق میں میری دعاؤں کو سنا۔گویا انہیں اس بڑھاپے میں بھی اولاد کی خواہش تھی تو صرف اس لئے کہ وہ اللہ کی راہ میں قربان ہو اور اس کے دین کو دنیا میں قائم کرے۔سو اسمٰعیل کی قربانی سے یہ مقصد پورا ہو گیا۔اپنے پیارے اور بڑے بیٹے کو اس طرح جنگل میں چھوڑ دینے کے بعد جبکہ خطرات سامنے نظر آرہے تھے اولاد کی پیدائش اور کامیاب زندگی پر خدا تعالیٰ کا شکریہ ادا کرنا صرف ابراہیمؑ اور اس کی قسم
کے لوگوں کا ہی کام ہے۔اَللَّھُمَّ صَلِّ عَلَیْھِمْ وَارْفَعْ دَرَجَاتِھِمْ۔رَبِّ اجْعَلْنِيْ مُقِيْمَ الصَّلٰوةِ وَ مِنْ ذُرِّيَّتِيْ١ۖۗ رَبَّنَا وَ تَقَبَّلْ (اے) میرے رب مجھے اور میری اولا د میں سے (ہر ایک کو)نماز کو عمدگی سے ادا کرنے والا بنا (اے )ہمارے دُعَآءِ۰۰۴۱ رب(مجھ پر فضل کر) اور میری دعا (پوری طرح) قبول فرما حل لغات۔مُقِیْمُ الصَّلٰوۃِ مُقِیْمٌ اَقَامَ سے اسم فاعل ہے جو قَامَ کا مجرد ہے۔کہتے ہیں قَامَ الْاَمْرُ۔اِعْتَدَلَ۔معاملہ درست ہو گیا۔عَلَی الْاَمْرِ۔دَامَ وَثَبَتَ یعنی کسی چیز پر دوام اور ثبات اختیار کیا اور قَامَ السُّوْقُ کے معنے ہیں نَفَقَتْ۔بازار بارونق ہو گیا اور اَقَامَ الصَّلٰوۃَ کے معنے ہیں اَدَامَ فِعْلَھَا۔نماز پر دوام اختیار کیا۔اَقَامَ لِلصَّلٰوۃِ کے معنے ہیں نَادٰی لَھَا۔نماز کے لئے پکارا۔اَقَامَ اللہُ السُّوْقَ جَعَلَھَا نَافِقَۃً۔بازار کو بارونق بنا دیا۔(اقرب) پس رَبِّ اجْعَلْنِيْ مُقِيْمَ الصَّلٰوةِ وَ مِنْ ذُرِّيَّتِيْ کے معنے ہوں گے کہ ہمیں ایسا بنا دے کہ نماز کا رواج دینے والے ہوں۔اور لوگوں کو اس طرف لانے والے ہوں اور نماز کی طرف لوگوں کو پکارنے والے ہوں۔تفسیر۔حضرت ابراہیم کا اِقَامةِ صَلوٰة کی دعا کرنے کا مطلب حضرت ابراہیمؑ نبوت کے مقام پر پہنچ چکے ہیں اور اولاد بھی ہوچکی ہے۔پھر وہ جوان ہے اور پھر اس کو دین کے لئے وقف بھی کر چکے ہیں۔پھر کیوں کہتے ہیں رَبِّ اجْعَلْنِيْ مُقِيْمَ الصَّلٰوةِ وَ مِنْ ذُرِّيَّتِيْ۔کیا آپ کو اس بات میں کہ آپ نماز کی پابندی کرتے رہیں گے کوئی شبہ تھا۔اس سے آپ کی مراد یہ نہ تھی کہ میں نماز کو قائم نہ رکھ سکوں گا بلکہ ا س طرف اشارہ تھا کہ میرے ذریعہ اور میری اولاد کے ذریعہ سے دنیا میں نماز قائم رہے۔اِقَامةِ صَلٰوة شخصی بھی ہو سکتی ہے اور قومی بھی۔اس جگہ قومی اِقَامةِ صَلٰوة مراد ہے اِقَامَۃُ الصَّلٰوۃ شخصی بھی ہوسکتی ہے اور قومی بھی۔اس جگہ قومی مراد ہے اور حضرت ابراہیم کی دعا کا یہ مطلب ہے کہ میری کوششوں میں ایسا اثر دے کہ ہمیشہ میرے ذریعہ سے ایک نمازگذاروں کی جماعت قائم رہے اور اسی طرح میری اولاد میں سے بھی ہمیشہ ایسے لوگ ہوتے رہیں جو میرا ہاتھ بٹاتے رہیں اور لوگوں کو عبادت الٰہیہ کی طرف لاتے رہیں اور وہ بھی اپنی کوششوں میں کامیاب رہیں۔اس طرح تاقیامت میں نمازوں کا قائم رکھنے والا بن جاؤں۔یہ مقام
عام مُقِیْمُ الصَّلٰوۃِ سے بہت بڑھ کر ہے کیونکہ وہ شخص صرف اپنی نماز کو قائم کرتا ہے اور حضرت ابراہیم علیہ السلام دنیا کی نماز قائم کرنے کے لئے دعا کررہے ہیں۔حضرت نبی کریم ؐ کے متعلق دعا اور پیشگوئی دراصل یہ بھی آنحضرت صلی اللہ علیہ وسلم کے متعلق دعا اور پیشگوئی ہے کہ جس طرح میرے ذریعہ سے نمازیں قائم ہوئی ہیں اسی طرح آئندہ بھی میری اولاد سے ایک شخص نمازوں کا قائم کرنے والا پیدا ہو۔رَبَّنَا اغْفِرْ لِيْ وَ لِوَالِدَيَّ وَ لِلْمُؤْمِنِيْنَ يَوْمَ يَقُوْمُ (اے ) ہمارے رب جس دن حساب ہونے لگے اس دن مجھے اور میرے والدین کو الْحِسَابُؒ۰۰۴۲ اور تمام مومنوں کو بخش دیجئیو حلّ لُغَات۔غَفَرَ اِغْفِرْلِیْ غَفَرَ الشَّیْءَ غَفْرًا کے معنے ہیں سَتَرَہٗ۔اس کو ڈھانپ لیا۔الْمَتَاعَ فِی الْوِعَاءِ: اَدْخَلَہٗ وَسَتَرَہٗ۔سامان کو برتن میں داخل کیا اور اس کو ڈھانپ دیا۔الشَّیْبَ بِالْخِضَابِ۔غَطَّاہُ سفید بالوں کو خضاب سے ڈھانپا۔اللہُ لَہٗ ذَنْبَہٗ غَفْرًا غَطَّی عَلَیْہِ گناہوں پر پردہ ڈالا۔اَلْاَمْر بِغُفْرَتِہٖ۔اَصْلَحَہٗ بِمَا یَنْبَغِی اَنْ یُّصْلَحَ بِہٖ۔معاملہ کی اصلاح مناسب طریقہ سے کی۔(اقرب) پس غَفَرَ کے لفظ میں ڈھانپنے کے معنے پائے جاتے ہیں اور اِغْفِرْلِیْ کے معنے ہوں گے (۱) مجھے ڈھانپ لے۔مجھ پر پردہ ڈال دے۔یعنی میرا وجود مٹا کر اپنا وجود میرے ذریعہ سے ظاہر کر۔(۲) میری بشریت کو الوہیت کی چادر سے ڈھانپ لے۔یعنی میری کوششوں کے نتائج تیری شان کے مطابق نکلیں۔(۳) میرے تمام کاموں کی عمدہ طریقوں سے اصلاح فرمادے۔یعنی میرے تمام کام درست ہو جائیں۔اور میری اولاد کی کمزوریوں کو ڈھانپ کر ان کو ترقی کے منازل کی طرف لے جا۔تفسیر۔انبیاء کے استغفار کرنے کا مطلب نبی خدا کے فضل سے معصوم ہوتا ہے پھر نبی کا یہ کہنا کہ اِغْفِرْلِی اس کا کیا مطلب؟دراصل غیر عارف انسان کی نظر محدود ہوتی ہے۔اس کی نظر انسان تک ہی جاتی ہے اور انسان تک ہی تسلی پا جاتی ہے مگر عارف کی نظر اوپر جاتی ہے اور بلند ہوتی جاتی ہے۔وہ سمجھ لیتا ہے کہ بندے کی اللہ تعالیٰ کے مقابلہ میں کیا ہستی ہے۔سورج کے سامنے ایک ذرہ کی کیا حیثیت ہے؟ کیونکہ آخر انسان اسی کی مخلوق
ہے۔اس کی زندگی بھی اللہ تعالیٰ کی عطا کی ہوئی ہے اور ہدایت بھی اسی کی طرف سے آتی ہے۔غالب نے کیا ہی عمدہ کہا ہے ؎ جان دی دی ہوئی اسی کی تھی حق تو یہ ہے کہ حق ادا نہ ہوا اِغْفِرْلِیْ سے مراد پس نبی چونکہ عارف ہوتا ہے وہ اپنی ہستی کو دیکھتا ہے اور جانتا ہے کہ جو کچھ میں کررہا ہوں وہ میں نہیں بلکہ خدا ہی کر رہا ہے۔اس لئے وہ دعا کرتا ہے کہ اے اللہ! میرے وجود کو زیادہ سے زیادہ مخفی کر دے اور اپنے وجود کو زیادہ سے زیادہ ظاہر فرما۔گویا اِغْفِرْلِیْ کے اس صورت میں یہ معنے ہوتے ہیں کہ اے خدا! تجھے میری ہی محبت کا واسطہ ہے کہ اپنا پردہ مجھ پر ڈال دے۔یعنی میرا وجود مٹا کر تیرا وجود میرے ذریعہ سے ظاہر ہونے لگے اور یہ امر ظاہر ہے کہ بندہ کے ذریعہ سے جس قدر اللہ تعالیٰ کا وجود ظاہر ہوگا اسی قدر وہ اپنے نیک مقاصد میں کامیاب ہوگا۔غَفَر کے لفظ کے معنے حسب مراتب ہوتے ہیں ہاں جب دوسروں کے لئے یہ لفظ آئے تو اس وقت ان کے حسب مراتب اس لفظ کے معنے ہوں گے۔ایک اعلیٰ درجہ کا مومن یہ لفظ استعمال کرے گا تو اس کے یہ معنے ہوں گے کہ وہ کمزوریاں جو حصولِ کمال سے محروم کرتی ہیں ان سے مجھے بچا لے۔درمیانی درجہ کے مومن کے لئے یہ لفظ استعمال ہوگا تو اس کے یہ معنے ہوں گے کہ میری خطاؤں کو ڈھانپ کر مجھے اعلیٰ ترقیات کی توفیق دے اور عام مومن یہ لفظ استعمال کرے تو یہ مطلب ہوگا کہ میرے قدم کو ایمان پر استقلال سے قائم رکھ۔میرے گناہ مجھے کہیں لے نہ ڈوبیں اور ایک متلاشی حق یہ لفظ استعمال کرے تو اس کے یہ معنے ہوں گے کہ میرے گناہ مجھے ہدایت پانے سے محروم نہ کر دیں۔اس لئے میرے گناہ معاف کر۔اس لفظ کا استعمال مختلف مواقع کے لحاظ سے ایسا ہی ہے جیسے جبار کا لفظ ہے کہ جب اللہ تعالیٰ کے لئے آتا ہے تو اس کے معنے مصلح کے ہوتے ہیں اور جب یہی لفظ بندے کے لئے آتا ہے تو اس کے معنے سرکش اور قانون شکن کے ہوتے ہیں۔یاد رکھنا چاہیے کہ اللہ تعالیٰ اپنے نبیوں کی نسبت فرماتا ہے اللّٰهُ يَجْتَبِيْ مِنْ رُّسُلِهٖ(آل عمران :۱۸۰)۔تو جب اللہ تعالیٰ ان کو چن لیتا ہے تو پھر ان میں گناہ کہاں سے آسکتا ہے؟ جب وہ دنیا سے الگ کرکے خدا تعالیٰ کے قرب میں بٹھا دئیے گئے تو پھر ان کے پاس شیطان کہاں سے آئے گا؟ شیطان تو خدا تعالیٰ کے نام سے بھی بھاگتا ہے۔شیطان کا تسلّط اللہ کے بندوں پر نہیں ہوتا اسی طرح دوسری جگہ فرمایا ہے اِنَّ عِبَادِيْ لَيْسَ لَكَ عَلَيْهِمْ سُلْطٰنٌ(الحجر:۴۳)۔میرے بندوں پر یقیناً تجھے کوئی تسلط حاصل نہیں۔پس جب قانون یہ ہے کہ جو ادنیٰ عبودیت
کے مقام پر ہو اللہ تعالیٰ اسے بھی شیطان کے تسلط سے محفوظ رکھتا ہے تو انبیاء اللہ جو اللہ تعالیٰ کی خاص حفاظت میں ہوتے ہیں ان کے پاس شیطان کا گذر کیسے ہوسکتا ہے؟ آیت یوم الحساب والی دعا کا مطلب يَوْمَ يَقُوْمُ الْحِسَابُ۔یہ حساب اس دنیا میں بھی ہوتا ہے اور اگلے جہان میں بھی ہوگا۔دعا کا مطلب یہ ہے کہ جب اعمال کے نتیجے نکلنے لگیں اس وقت میری بشریت کو الوہیت کی چادر سے ڈھانپ لینا۔میری بشری کمزوری پر پردہ ڈالنا۔میری کوششوں کے نتائج میری طاقتوں کے مطابق نہ نکلیں بلکہ تیری شان کے مطابق نکلیں۔اگر قیامت کا دن مراد لیا جائے تو اس کے یہ معنے ہوں گے کہ اس دن مجھ سے وہ سلوک کیجئیو جو تیری شان کے مطابق ہو نہ کہ وہ جو میرے اعمال کے مطابق ہو اور میرے والدین اور مومنوں سے بھی ان کے درجہ کے مطابق غفران کا معاملہ کیجئیو۔وَ لَا تَحْسَبَنَّ اللّٰهَ غَافِلًا عَمَّا يَعْمَلُ الظّٰلِمُوْنَ١ؕ۬ اِنَّمَا اور(اے مخاطب)یہ ظالم جو کچھ کر رہے ہیں اس سے تو اللہ (تعالیٰ) کو بے خبر ہرگز نہ سمجھ۔يُؤَخِّرُهُمْ لِيَوْمٍ تَشْخَصُ فِيْهِ الْاَبْصَارُۙ۰۰۴۳ وہ انہیں صرف اس دن تک ڈھیل دے رہا ہے جس دن (ان کی ) آنکھیں(فیصلہ کے انتظار میں )کھلی ہوئی ہوںگی حلّ لُغَات۔تَشْخَصُ۔شَخَصَ سے مضارع ہے۔شَخَصَ الشَّیْءُ شَخُوْصًا کے معنی ہیں اِرْتَفَعَ بلند ہوئی۔شَخَصَ بَصَرُہٗ: فَتَحَ عَیْنَیْہِ وَجَعَلَ لَا یَطْرِفُ مَعَ دَوْرَانٍ فِی الشَّحْمَۃِ۔اور شَخَصَ بَصَرَہٗ کے معنے ہیں اپنی آنکھوں کو کھولا اور ایک جگہ ٹکٹکی لگا کر دیکھنا شروع کر دیا اور کسی اور طرف نہ دیکھ سکا۔اَلمَیِّتُ بَصَرَہٗ وَبِبَصَرِہٖ۔میت نے جان کندن کے وقت نظر اوپر اٹھا لی۔شَخَصَ مِنْ بَلَدٍ اِلٰی بَلَدٍ۔ایک شہر سے دوسرے شہر کو گیا۔اَلرَّجُلُ سَارَ فِیْ ارْتِفَاعٍ بلندی کی طرف چڑھا شَخَصَ السَّہْمُ۔اِرْتَفَعَ عَنِ الْھَدَفِ۔تیر نشانہ پر نہ لگا۔(اقرب) پس تَشْخَصُ فِیْہِ الْاَبْصَارُ۔کے معنے ہوں گے کہ اس دن ان کی آنکھیں اوپر اٹھیں گی۔(۲) نظریں چڑھ جائیں گی۔(۳) پھٹی کی پھٹی رہ جائیں گی۔وہ آنکھ جھپک نہیں سکیں گے۔وَ لَا تَحْسَبَنَّ اللّٰهَ غَافِلًا عَمَّا يَعْمَلُ الظّٰلِمُوْنَ اور تو ہرگز اللہ تعالیٰ کو غافل مت سمجھ اس سے جو ظالم کرتے ہیں۔یا ان کے عمل سے۔غافل کے یہ معنی نہیں کہ واقف نہیں بلکہ مطلب یہ ہے کہ یہ مت سمجھوکہ ان کو جب اللہ تعالیٰ سزا
نہیں دیتا تو ان کی طرف توجہ ہی نہیں ہے۔غافل دو طرح ہوسکتا ہے۔(۱) بے خبری سے (۲) توجہ نہ کرنے سے۔تو فرمایا کہ اللہ تعالیٰ ان کو بے سزا نہیں چھوڑے گا۔اِنَّمَا يُؤَخِّرُهُمْ لِيَوْمٍ تَشْخَصُ فِيْهِ الْاَبْصَارُ صرف ان کو ڈھیل دے رہا ہے اس دن کے لئے کہ جس دن لوگوں کی نظریں چڑھ جائیں گی۔یا پھٹی کی پھٹی رہ جائیں گی اور وہ آنکھ نہیں جھپک سکیں گے۔جب انسان پر حیرت کا وقت آتا ہے تو وہ آنکھ جھپک نہیں سکتا۔مطلب یہ کہ خدا تعالیٰ ان کو درمیانی ڈھیل دے رہا ہے۔اس دن تک جس دن ان پر آخری عذاب آئے گا۔اس وقت تک ان کو ڈھیل دے گا۔(اس آیت کی تفسیر اگلی آیت کے ساتھ دیکھیں۔) مُهْطِعِيْنَ مُقْنِعِيْ رُءُوْسِهِمْ لَا يَرْتَدُّ اِلَيْهِمْ (وہ) اپنے سروں کو اوپر اٹھائے ہوئے خوف زدہ ہو کر دوڑتے آرہے ہوں گے(اور ) ان کی نظریں (لوٹ کر) طَرْفُهُمْ١ۚ وَ اَفْـِٕدَتُهُمْ هَوَآءٌؕ۰۰۴۴ واپس نہیں آئیں گی اور ان کے دل (امیدوں سے )خالی ہوں گے۔حل لغات۔مُھْطِعِیْنَ- اَھْطَعَ سے اسم فاعل جمع کا صیغہ ہے۔جس کا مجرد ھَطَعَ ہے۔کہتے ہیں ھَطَعَ الرَّجُلُ اَسْرَعَ مُقْبِلًا خَائِفًا۔خوف زدہ ہو کر تیزی سے دوڑتا ہوا آیا۔اَقْبَلَ بِبَصَرِہٖ عَلَی الشَّیْءِ فَلَمْ یَرْفَعْہُ عَنْہُ۔کسی چیز پر ٹکٹکی لگا کر دیکھتا رہا۔اور وہاں سے نظر کو نہ ہٹایا۔اور اَھْطَعَ البَعِیْرُ کے معنی ہیں مَدَّ عُنُقَہٗ وَصَوَّبَ رَاْسَہٗ۔اونٹ نے گردن کو لمبا کیا۔ا ور سر کو اٹھایا۔اَسْرَعَ وَاَقْبَلَ مُسْرِعًا خَائِفًا لَایَکُونُ اِلَّا مَعَ خَوْفٍ۔اور اَھْطَعَ الرَّجُلُ کے معنے ہیں خوف زدہ ہوکر جلدی سے آیا۔(خوف کا ہونا ضروری ہے) وَقِیْلَ نَظَر بِخُضُوْعٍ۔اور بعض کہتے ہیں کہ اس کے معنے عاجزی کی نظر سے دیکھنے کے ہیں۔(اقرب) پس مُھْطِعٌ کے معنے ہوں گے (۱) خوف زدہ ہوکر دوڑنے والا۔(۲) عاجزی سے دیکھنے والا۔(۳) سر اوپر اٹھانے والا۔مُھْطِعِیْنَ اس کی جمع ہے۔مُقْنِعٌ مُقْنِعِیْ رُؤُوْسِھِمْ: اَقْنَعَ رَأْسَہٗ نَصَبَہٗ سر کو سیدھا اٹھایا۔وَقِیْلَ لَا یَلْتَفِتُ یَمِیْنًا وَشِمَالًا وَ جَعَلَ طَرَفَہٗ مُوَازِیًا لِمَا بَیْنَ یَدَیْہِ اور بعض نے اَقْنَعَ کے یہ معنے کئے ہیں کہ اپنے سر کو اٹھا کر بالکل سیدھا رکھے اور دائیں بائیں نہ موڑے۔اَقْنَعَ الصَّبِیَّ کے معنے ہیں وَضَعَ اِحْدَی یَدَیْہِ عَلٰی فَأْسِ قَفَاہُ وَجَعَلَ الْاُخْرٰی
َحْتَ ذَقَنِہٖ وَاَمَالَہٗ اِلَیْہِ فَقَبَّلَہٗ۔بچے کے سر کے پچھلی طرف ہاتھ رکھ کر اور دوسرا ٹھوڑی کے نیچے رکھ کر اسے اپنی طرف پھیرا اور اسے بوسہ دیا۔اَقْنَعَ حَلْقَہٗ وَفَمَہٗ۔رَفَعَہُ لِاسْتِیْفَاءِ مَا یَشْرَبُہٗ مِنْ مَّاءٍ اَوْلَبَنٍ اَوْغَیْرِھِمَا۔اس نے اپنے منہ کو اونچا کیا تاکہ پانی وغیرہ پوری طرح پی سکے۔بِیَدَیْہِ فِی الصَّلَوۃِ رَفَعَھُمَا فِی الْقُنُوْتِ۔اپنے ہاتھوں کو نماز میں قنوت کے لئے اٹھایا۔رَأْسَہٗ وَعُنُقَہٗ رَفَعَہٗ وَشَخَصَ بِبَصَرِہٖ نَحْوَالشَّیْءِ لَایَصْرِفُہٗ عَنْہُ۔اپنے سر کو اٹھایاا ور نظر ایسے طور پر کسی چیز پر جمائی کہ اس سے ہٹ نہ سکے۔(اقرب) مُهْطِعِيْنَ مُقْنِعِيْ رُءُوْسِهِمْ میں ان کی حیرانگی اور خوف زدہ ہونے کو ظاہر کیا گیا ہے۔کہ ان کی حالت ایسی ہوگی کہ وہ اپنے سر بلند کرکے آنحضرتؐ کے لشکر کو دیکھ رہے ہوں گے۔ان کی آنکھیں پھٹی کی پھٹی رہ جائیں گی۔اور وہ سخت خوفزدہ ہو کر بھاگیں گے۔اَلْھَوَآءُ۔اَلشَّیءُ الْخَالِیُ۔خالی چیز۔اَلْـجَبَانُ لخِلُوِّ قَلْبِہٖ عَنِ الْجُرْأَۃِ۔بزدل پر بھی یہ لفظ بولا جاتا ہے۔کیونکہ اس کا دل جرأت سے خالی ہوتا ہے۔(اقرب) وَاَفْئِدَتُـھُمْ ھَوَاءٌ۔ان کے دل امیدوں سے خالی ہوں گے۔ان کے دل بیٹھے جارہے ہوں گے۔بزدلی ان پر چھائی ہوگی اور مقابلہ نہ کرسکیں گے۔تفسیر۔کفار کو ڈھیل حضرت ابراہیم ؑ کی دعا سے مل رہی تھی یہ بتا کر کہ حضرت ابراہیم علیہ السلام نے ایک ایسے نبی کے لئے دعا کی تھی جو دنیا میں اللہ تعالیٰ کی عبادت کو قائم کرے۔مکہ اس کا مرکز ہو اور شرک سے اس کی تعلیم پاک ہو اب اللہ تعالیٰ کفار مکہ کی طرف متوجہ ہوتا ہے اور فرماتا ہے کہ بے شک ان کو ڈھیل ملی ہے لیکن اس کی یہ وجہ نہیں کہ ہم ان کے اعمال سے ناواقف ہیں بلکہ اس کی وجہ اور ہے۔اس وجہ کو لفظاً اس جگہ نہیں بتایا کیونکہ اوپر کے رکوع سے وہ وجہ ظاہر ہو چکی ہے اور وہ بھی ابراہیم علیہ السلام کی دعا ہے کہ اے میرے رب !اگر میری اولاد مشرک ہو تو میرا ان سے کوئی تعلق نہیں۔ہاں! آپ بڑے بخشنے والے مہربان وجود ہیں۔اگر ان سے ترقی کا برتاؤ کریں تو آپ کی شان کے مطابق ہے۔یہ دعا علاوہ ان کی ہدایت کی خواہش کے اس ڈھیل کا موجب ہورہی تھی مگر جو لوگ ازلی شقی تھے وہ اس سے الٹے مغرور ہورہے تھے۔لیکن کب تک انہیں ڈھیل دی جاسکتی تھی۔ایک دن اصل دعا اپنا رنگ لائے گی اور مہلت سزا میں بدل جائے گی۔اس جملہ کو عَمَّا يَفْعَلُ الظّٰلِمُوْنَ سے ختم کیا ہے۔یہ نہیں کہا کہ جو تیرے مخالف کرتے ہیں یا مکہ والے کرتے ہیں اس سے اول یہ بتانا مطلوب ہے کہ خواہ کتنی ہی ڈھیل ملے ظالم آخر اپنے کیفر کردار کو پہنچ کر ہی رہے گا۔دوم محمد رسول اللہ صلعم اور صحابہؓ کے دل کو تسلی دینا مقصود ہے کہ ہم جانتے ہیں کہ یہ لوگ ظالم ہیں اور مسلمانوں پر ظلم کررہے ہیں۔ہم عدم توجہ کی وجہ سے ان کی طرف سے غافل نہیں ہیں۔مسلمانوں کے مظلوم ہونے کا خیال ہے لیکن ابراہیمؑ
کی وہ دعا کہ اے اللہ !میں تجھ سے بھی امید کرتا ہوں کہ میری اولاد غلطی کرے تو تو ان سے غفور رحیم کا سلوک کرے گا۔ہمیں عذاب میں جلدی کرنے سے روک رہی ہے۔آنحضرت ؐ کے منکرین پر عذاب کی خبر اس اظہار کے بعد کہ کیوں عذاب میں دیر ہوری ہے؟ عذاب کی خبر بھی دے دی اور اس کے متعلق بعض حالات بھی اشارۃً بتا دیئے یعنی وہ یکدم آئے گا۔یہ لوگ سخت گھبرا جائیں گے۔حیرت سے سر اٹھا کر عذاب کو دیکھیں گے۔نظر کو ادھر ادھر نہ ہٹا سکیں گے۔دل گر رہے ہوں گے۔مکہ میں لشکر اسلام کا داخل ہونا جب مکہ فتح ہوا تو بعینہٖ یہی حال کفار کا ہوا۔جب صلح حدیبیہ کے بعد مکہ والوں نے عہدشکنی کی اور رسول کریم صلی اللہ علیہ وسلم نے مکہ پر چڑھائی کی تو آپ نے ایسا انتظام فرمایا کہ کسی کو علم نہ ہوا کہ اسلامی لشکر مکہ پر حملہ آور ہوا ہے۔ابوسفیان دو دن پہلے ہی مدینہ سے روانہ ہوا تھا۔جہاں سے وہ ایک ناکام سفیر کی حالت میں لوٹا تھا۔ابھی وہ مکہ میں داخل نہ ہوا تھا کہ اسلامی لشکر جلد جلد منزلیں طے کرتا ہوا مکہ کے قریب پہنچ گیا۔ابوسفیان ا ور اس کے ساتھیوں نے دور سے جب لشکر دیکھا تو حیران رہ گئے کہ یہ لشکر کس کا ہے؟ کبھی کہتے فلاں قبیلہ ہے اور کبھی کہتے فلاں ہے۔انہیں یہ خیال ہی نہ آتا تھا کہ یہ لشکر آنحضرت صلی اللہ علیہ وسلم کا ہوسکتا ہے۔چنانچہ جب طلائع (یعنی لشکر کے آگے چلنے والا حصہ) آئے تو ان کو پتہ لگا کہ محمد رسول اللہ صلی اللہ علیہ وسلم آ گئے ہیں۔تب وہ حیران رہ گئے۔ابو سفیان کاآنحضرت ؐ کی صداقت کو دیکھ کر ایمان لانا وہ حیران کھڑے تھے کہ حضرت عباسؓ نظر آئے۔وہ گھوڑا دوڑاتے ہوئے آگے آئے (وہ بچپن سے اس کے دوست تھے) دیکھتے ہی کہا ابوسفیان! میرے پیچھے سوار ہو جاؤ ورنہ مارے جاؤ گے۔اس نے لیت و لعل کرنی چاہی تو انہوں نے ہاتھ پکڑ کر جھٹکا دیا اور اپنے پیچھے گھوڑے پر چڑھا لیا اور ان کو لے کر رسول کریم صلی اللہ علیہ وسلم کے خیمے کی طرف روانہ ہوئے۔آپ کے خیمہ کے پاس پہنچ کر زور سے ابوسفیان کو دھکا دیا اور آنحضرت صلی اللہ علیہ وسلم سے کہا کہ حضور یہ مسلمان ہونا چاہتا ہے۔ابوسفیان گھبرا گیا اور آنحضرت صلی اللہ علیہ وسلم حیران ہوئے۔حضرت عباسؓ نے ابوسفیان کی گھبراہٹ کو دیکھ کر کہا ابھی اپنے دین کا جھوٹا ہونا ظاہر نہیں ہوا؟ ہلاکت میں مت پڑ اور مسلمان ہو جا۔اور ابوسفیان کا ہاتھ آنحضرت صلی اللہ علیہ وسلم کی طرف بڑھایا۔آپ نے اس خیال سے کہ شاید یہ حضرت عباسؓ کے کہنے پر بیعت کرنا چاہتا ہے کچھ تردد کیا۔لیکن جب اسے مصر دیکھا اس کی بیعت لے لی۔ابوسفیان نے کہا یا رسول اللہ! میں اب مسلمان ہوا ہوں۔مکہ والوں کا سردار ہوں۔مجھے کچھ اعزاز دیا جائے۔آپ نے فرمایا جو تمہارے گھر میں داخل ہوگا اسے امان دی جائے
گی۔اس نے کہا میرا گھر بہت چھوٹا ہے۔فرمایا جو کعبہ میں داخل ہو اسے امان دی جائے گی۔اس نے کہا وہ بھی چھوٹا ہے۔آپ نے فرمایا جو اپنے گھر کا دروازہ بند کرلے گا اسے امان دی جائے گی۔ابوسفیان نے کہا بس! اب ٹھیک ہے اور دوڑ کر مکہ والوں کو آپ کے حملہ آور ہونے اور مذکورہ بالا امان دینے کا اعلان کیا(السیرة الحلبیة)۔مکہ والے جو اپنے آپ کو آنحضرت صلی اللہ علیہ وسلم سے کہیں زیادہ طاقتور سمجھتے تھے ان کے دلوں کی اس وقت کی حالت کا اندازہ کرنا آسان کام نہیں۔اپنی حکومت کو پائیدار اور غیر متزلزل سمجھنے والوں نے جب اپنے سردار کے منہ سے جو ایک نیا معاہدہ کرنے مدینہ گیا تھا یہ اعلان سنا ہوگا کہ مکہ والو! اپنے اپنے گھروں میں گھس کر دروازے بند کر لو کہ محمد (رسول اللہ) جسے تم نے دس سال پہلے تنہا مکہ سے نکالا تھا اس کا عظیم الشان لشکر چند فرسنگ پر سرعت سے مکہ کی طرف کو رخ کئے چلا آ رہا ہے۔اس لئے فوراً اپنے دروازوں کو بند کرکے بیٹھ جاؤ کہ اب اس سے تمہارے لئے کوئی امان کی صورت نہیں۔تو ان کا کیا حال ہوا ہوگا؟ یقیناً ان کی آنکھیں پھٹی کی پھٹی رہ گئی ہوں گی۔ان کے سر بلند ہوہو کر اس راستہ کو دیکھ رہے ہوں گے جس پر سے اسلامی لشکر بڑھا چلا آ رہا تھا اور دنیا کا اور کوئی مسئلہ ان کی توجہ کو اپنی طرف نہ کھینچ سکتا ہوگا۔اور ان کے دل اندر ہی اندر بیٹھے جاتے ہوں گے۔جب وہ دروازے بند کرکے اپنے گھروں میں بیٹھ گئے ہوں گے اور جھروکوں اور کواڑوں کے سوراخوں سے اسلامی لشکر کو مکہ کی گلیوں میں کوچ کرتے ہوئے دیکھ رہے ہوں گے ان کی اس وقت کیا حالت ہو گی؟ اس کا نقشہ ان قرآنی الفاظ سے زیادہ اور کون سے الفاظ کھینچ سکتے ہیں۔مکہ میں آنحضرت ؐ کا لشکر داخل ہونے کے وقت اہل مکہ کی حالت مکہ والوں کے لئے کیسی تلخی تھی؟ اس خیال میں کہ وہ محمد (رسول اللہ صلی اللہ علیہ وسلم) جسے انہوں نے تاریکی میں جب کہ سب مکہ کے دروازے بند تھے مکہ سے نکلنے پر مجبور کیا تھا اب دن کے وقت مکہ میں داخل ہو رہا تھا۔اور اب بھی مکہ کے دروازے بند تھے۔وہ دروازے جو ہجرت کے دن اس لئے بند تھے کہ محمد رسول اللہ صلی اللہ علیہ وسلم کو ان میں پناہ نہیں مل سکتی تھی فتح مکہ کے دن اس لئے بند تھے کہ محمد رسول اللہ صلی اللہ علیہ وسلم نے اس ذریعہ سے مکہ والوں کو پناہ دی تھی۔اَللّٰھُمَّ صَلِّ عَلٰی مُحَمَّدٍ وَبَارِکْ وَسَلِّمْ۔کفار کو آنحضرت ؐ کے لشکر کی آمد کا پتہ نہ ملنا خدا ئی تصرف تھا یہ صرف خدائی تصرف تھا کہ آپ کے آنے کا مکہ والوں کو پتہ نہ لگا حالانکہ آپ اس راستہ سے آئے تھے جو آمدورفت کا ایک عام راستہ تھا جہاں سے مکہ والوں کو فوراً خبر پہنچ سکتی تھی لیکن ان کو خبر نہ ہوئی اور اس طرح یہ پیشگوئی پوری ہوئی۔