سُوْرَۃُ النُّوْرِ
تفسیر کبیر (جلد ۸), حصہ 13
لَقَدْ اَنْزَلْنَاۤ اٰيٰتٍ مُّبَيِّنٰتٍ ہم نے قرآن کریم کے ذریعہ ایسے نشانات نازل کئے ہیں جو خدا تعالیٰ کو بے نقاب کر کے انسان کے سامنے کھڑا کر دیتے ہیں۔غیروں کے لئے تو خدا تعالیٰ ایک پوشیدہ چیز ہے مگر مسلمانوں کے لئے وہ پوشیدہ چیز نہیں کیونکہ وہ نشانات کے ذریعہ اُن کے سامنے آجاتا ہے۔دوسری مثال رسول کریم صلی اللہ علیہ وسلم کے زمانہ میں حضرت عمر و بن العاص ؓ کی ہے۔حضرت عبداللہ بن عمرو ؓ ابتدائی صحابہ ؓ میں سے تھے اور اپنے باپ سے بہت پہلے مسلمان ہو گئے تھے۔آپ نے رسول کریم صلی اللہ علیہ وسلم کے ساتھ ہی مدینہ کی طرف ہجرت کی تھی آپ کا طریق تھا کہ آپ مسجد میں بیٹھے رہتے تاکہ رسول کریم صلی اللہ علیہ وسلم گھر سے باہر نکلیں اور کوئی بات کریں تو اسے لکھ لیںچونکہ ان کو لکھنا آتا تھا اس لئے وہ رسو ل کریم صلی اللہ علیہ وسلم کی احادیث لکھا کرتے تھے مگر بعد میں رسول کریم صلی اللہ علیہ وسلم نے انہیں ایسا کرنے سے منع کر دیا اور فرمایا میں قرآن کریم لکھواتا ہوں ایسا نہ ہو کہ کوئی لکھی ہوئی چیز دیکھ کر لوگوں کو یہ شبہ پیدا ہو کہ وہ بھی قرآن کریم کا ہی حصہ ہے۔جب اُن کے والد حضرت عمر و ؓ بن العاص فوت ہونے لگے تو یہ اُن کی خبر لینے کے لئے گئے موت کے وقت اُن کی حالت سخت کرب اور اضطراب کی تھی۔کبھی وہ دائیں کروٹ بدلتے اور کبھی بائیں اور کہتے یا اللہ! مجھے معاف کر مجھے معلو م نہیں میں نے کیا کیا گناہ کئے ہیں۔حضرت عبداللہ بن عمروؓ نے کہا۔آپ اتنا گھبراتے کیوں ہیں۔آپ کا انجام تو اچھا ہی ہے۔اور اللہ تعالیٰ نے آپ کو محمد رسول اللہ صلی اللہ علیہ وسلم پر ایمان لانے کی توفیق دی۔اور اب تک اسلام پر قائم رکھا۔پھر آپ کو فکر کرنے کی کیا ضرورت ہے۔حضرت عمرو ؓ بن العاص کہنے لگے میرے بیٹے تم ٹھیک کہتے ہو۔خدا تعالیٰ نے فضل کیا اور مجھے محمد رسول اللہ صلی اللہ علیہ وسلم پر ایمان لانے کی توفیق عطا فرمائی لیکن کاش میں اُسی وقت مار ا جاتا اور مجھے شہادت نصیب ہوتی۔میرے بیٹے ! رسول کریم صلی اللہ علیہ وسلم کی وفات کے بعد حضرت علی ؓ اور حضرت معاویہ ؓ میں لڑائیاں ہوئیں اور میں اُن جنگوں میں حضرت معاویہ ؓ کی طرف سے حصہ لیتا رہا مجھے معلوم نہیں کہ ان لڑائیوں میں مجھ سے کیا کیا غلطیاں ہوئیں۔اس خیال کے آنے پر مجھے گھبراہٹ ہوتی ہے کہ معلوم نہیں خدا تعالیٰ مجھے معاف بھی کرے گا یا نہیں۔پھر آپ نے فرمایا میرے بیٹے ! جب میں اسلام کا دشمن تھا تو میری دشمنی کا یہ حال تھا کہ اگر مجھے پتہ لگتا کہ محمد رسول اللہ صلی اللہ علیہ وسلم سامنے گلی میں آرہے ہیں تو میں اپنی آنکھیں بند کر لیتا تاکہ مجھے آپ کی شکل نظر نہ آئے۔اور اگر کوئی شخص اُس وقت مجھ سے پوچھتا کہ محمدؐ رسول اللہ کا حلیہ کیا ہے تو میں آپ کا حُلیہ نہیں بتا سکتا تھا کیونکہ جب آپ کی شکل سامنے آتی تھی میں آنکھیں بند کر لیتا تھا۔پھر جب میں ایمان لایا تو خدا تعالیٰ نے مجھے ایسا ایمان بخشا کہ آپ کی محبت اور رعب کی وجہ سے میں آپ کے چہرہ پر نظر نہیں ڈالتا تھا بلکہ
آپ کے سامنے میں ہمیشہ اپنی آنکھیں نیچی رکھتا اور میں خیال کرتا کہ آپ اتنے معزز اور بلند مقام پر ہیں کہ میرے جیسے گنہگار آدمی کو آپ کا چہرہ دیکھنے کا کوئی حق نہیں۔اے میرے بیٹے ! کفر کی حالت میں بھی محمد رسول اللہ صلی اللہ علیہ وسلم میرے سامنے آئے اور ایمان کی حالت میں بھی محمد رسول اللہ صلی اللہ علیہ وسلم میرے سامنے آئے لیکن اگر اب بھی مجھ سے کوئی پوچھے کہ محمد رسول اللہ صلی اللہ علیہ وسلم کا حلیہ کیا تھا تو میں نہیں بتا سکتا۔کیونکہ کفر میں بغض کی وجہ سے میں نے آپ کی شکل نہیں دیکھی اور ایمان میں محبت اور رعب کی وجہ سے میں نے آپ کی شکل نہیں دیکھی (اسد الغابۃ فی معرفۃ الصحابۃ عمرو بن العاصؓ۔والطبقات الکبریٰ لابن سعد، عمرو بن العاص)۔اب دیکھو عاص جیسے شدید دشمنِ اسلام کا بیٹا جو ایمان لانے سے پہلے خود بھی محمد رسول اللہ صلی اللہ علیہ وسلم سے سخت بغض رکھتا تھا اللہ تعالیٰ نے اس کو ایمان لانے کی سعادت بخشی۔اور اُسے ایسا مقام دیا کہ اُس نے اسلام کے لئے بڑی بڑی جنگیں لڑیں۔اور مصر کو اسلام کے لئے فتح کیا۔مسلمان جب پڑھتے ہوںگے کہ اسلام کے شدید دشمنوں ولید اور عاص کی اولاد اسلام کی گود میں آگئی اور اُن کے بیٹوں نے اسلام لانے کے بعد بڑی بھاری قربانیاں کیں تو اُن کا ایمان کس قدر بڑھتا ہو گا۔پھر میں نے ہندہ کا واقعہ بیان کیا ہے۔اُس کے بغض کی یہ کیفیت تھی کہ اُس نے رسول کریم صلی اللہ علیہ وسلم کے چچا حضرت حمزہ ؓ کا کلیجہ نکلوایا اور آپ کا ناک اور کان کٹوائے۔جب رسول کریم صلی اللہ علیہ وسلم نے مکہ فتح کیا تو آپ نے جن لوگوں کے گرفتار کر نے اور قتل کرنے کا حکم دیا تھا اُ ن میں ہندہ بھی شامل تھیں جب عورتوں کی بیعت کا وقت آیا تو ہندہ بھی مونہہ چھپائے اُ ن میں جا بیٹھی اور بیعت میں شامل ہوگئی۔جب قرآنی ہدایت کے مطابق رسول کریم صلی اللہ علیہ وسلم نے یہ اقرار لیا کہ ہم چوری نہیں کریں گی۔زنا نہیں کریں گی۔جھوٹ نہیں بولیں گی ، شرک نہیں کریں گی۔تو اس آخری فقرہ پر کہ ہم شرک نہیں کریں گی۔ہندہ بول اٹھی کہ یا رسول اللہ ! آپ کیا کہتے ہیں۔کیا ہم اب بھی شرک کریں گی۔ہم مکہ والے متحد ہو کر آپ کے مقابلہ میں آئے۔سارا عرب ہمارے ساتھ تھا اور آپ اکیلے تھے۔ہم نے آپ کے ساتھ لڑائی کی مگر آپ نے کہا کہ خدا تعالیٰ میرے ساتھ ہے اور وہ میری مدد کرے گا۔اور ہم نے کہا کہ آپ کا خدا جھوٹا ہے وہ آپ کی مدد نہیں کرے گا۔ہمارے بُت آپ کے خدا سے زیادہ طاقتور ہیں وہ آپ کے خلاف ہماری مدد کریں گے۔مگر ہوا کیا۔ہوا یہ کہ آپ جیت گئے اور ہم ہار گئے۔اگر ہمارے بتوں میں کوئی طاقت ہوتی اور آپ کا خدا جھوٹا ہوتا تو ہم یقیناً جیت جاتے۔اتنے بڑے نشان کو دیکھنے کے بعد اب ہم کس طرح شرک کر سکتی ہیں۔جب ہندہ کی آواز رسول کریم صلی اللہ علیہ وسلم نے سنی تو آپ نے فرمایا۔ہندہ ہے ؟ وہ جھٹ بول
اٹھی کہ ہوں تو ہندہ۔مگر اب میں مسلمان ہو گئی ہوں اور خدا تعالیٰ نے اسلام لانے پر میرے سارے گناہ معاف کر دیئے ہیں۔اب آ پ مجھے کچھ نہیں کہہ سکتے۔آپ نے فرمایا۔ہندہ تو ٹھیک کہتی ہے(البدایۃ والنھایۃ فصل مبایعۃ رسول اللہ الناس یوم الفتح علی الاسلام۔الدرالمنثور سورة الممتحنة زیر آیت ۱۰) جس طرح ہندہ کے لئے فتح مکہ آیات ِ مبینات میں سے تھی اسی طرح اُس کی یہ گفتگو ہمارے لئے آیات ِ مبینات میں سے ہے۔ایسی شدید دشمنِ اسلام عورت کو خدا تعالیٰ نے ہدایت دے دی اور اُس کا دل کھل گیا۔اور پھر ایسا دل کھلا کہ وہ بعد میں عیسائیوں کے مقابلہ میں لڑی جانے والی جنگوں میں شامل ہوئی۔اس کا ایک لڑکا یزید جو حضرت معاویہ ؓ سے بڑا تھا اور بہت مخلص تھا اور اس کا خاوند ابو سفیان ؓ جو اسلام لانے سے پہلے اسلام کا شدید دشمن تھا دونوں عیسائیوں کے ساتھ لڑنے کے لئے ایک جنگ میں شریک ہوئے۔عیسائیوں کا لشکر بہت بڑا تھا اور مسلمانوں کی تعدا د اس کے مقابلہ میں بہت کم تھی۔اس جنگ میں ایک موقعہ پر اسلامی لشکر پیچھے کو بھاگا۔بھاگنے والوں میں ابو سفیان اور اُن کے بیٹے یزید بھی تھے۔پیچھے عورتیں کھڑی تھیں۔اگراُ س وقت مسلمانوں کے قدم نہ جمتے تو مدینہ تک دشمن کے راستہ میں کوئی روک نہیں تھی۔ہندہ نے مسلمان سپاہیوں کو بھاگتے ہوئے دیکھا۔تو اس نے عورتوں کو جمع کیا۔اور کہا مردوں کے پائوں اکھڑ گئے ہیں۔آئو ہم اسلام کے لئے لڑائی کریں انہوں نے کہا کہ ہمارے پاس لڑنے کے لئے کیا سامان ہے ؟ ہندہ نے کہا سامان تو نہیں ہے لیکن ایک چیز ہے۔خیموں کی چوبیں اتار لو اور ہاتھ میں لے لو۔اور مسلمان سپاہی جو دوڑتے ہوئے آرہے ہیں۔اُن کے اونٹوں کو ان چوبوں سے مارو۔اور کہو بے شرمو !تم کافروں سے بھاگ رہے ہو۔چنانچہ عورتوں نے چوبیں اتار لیں۔ہندہ نے بھی ایک چوب اتار لی۔اور سب عورتوں کو لےکر بھاگتے ہوئے اسلامی لشکر کے آگے کھڑی ہو گئی۔سب سے آگے اُس کا خاوند ابو سفیا ن اور اُس کا بیٹا یزید تھے۔عورتوں نے اُن کے اونٹوں کے مونہوں پر چوبیں ماریں اور کہا بے شرمو ! تمہیں شرم نہیں آتی کہ تم کافروں کے مقابلہ میں شکست کھا کر بھاگے چلے آرہے ہو۔اس موقعہ پر ہندہ نے ابو سفیان کو مخاطب کرکے کہا جب تو کافر تھا تو بہادری کے ساتھ اونٹ پر سوار ہو کر تو محمد رسول اللہ کے لشکر پر حملہ کرنے جایا کرتا تھا۔اب تُو مسلمان ہو گیا ہے تو تُو عیسائیوں کو پیٹھ دکھا رہا ہے۔تجھے ایسا کرتے ہوئے شرم نہیں آتی۔اس کا ابو سفیان ؓ پر ایسا اثر ہوا کہ اُس نے اپنے بیٹے کی طرف مڑ کر دیکھا اور کہا بیٹا ! عورتوں کے سونٹے عیسائیوں کی تلواروں سے زیادہ خطرناک ہیں چلو واپس لوٹو اب خواہ ہم مر یں یا جیئیں اس کی پرواہ نہیں۔چنانچہ دونوں واپس لوٹے اور پھر سارا اسلامی لشکر بھی واپس لوٹا اور اُن کی شکست فتح سے بدل گئی۔یہ تھی وہ ہندہ جو ایک وقت اسلام کی اتنی شدید دشمن تھی کہ شعر پڑھ پڑھ کر کفار کومسلمانوں کے خلاف جنگ کرنے کے لئے اُکسایا کرتی
تھی۔فتح مکہ کے بعد اُسی کے قتل کا فتویٰ جاری کیا گیا لیکن قبل اس کے کہ اُسے گرفتا ر کیا جاتا وہ عورتوں میں چُھپ کر بیعت میں شامل ہو گئی۔کیا اُس کے متعلق اس وقت کوئی انسان یہ خیال بھی کرسکتا تھا کہ کسی وقت یہ عورت اسلام میں داخل ہوگی اور پھر اسلام کے لئے شاندار قربانیاں کرنے والی ہوگی۔لیکن وہی ہندہ جو اسلام کی شدید دشمن تھی اسلام لانے کے بعد اسلامی فتوحات میں حصہ دار بن گئی۔غرض تاریخِ اسلام کا ایک ایک واقعہ پڑھا جائے تو یُوں محسوس ہوتا ہے کہ وہلَقَدْ اَنْزَلْنَاۤ اٰيٰتٍ مُّبَيِّنٰتٍ کے مطابق ایک ایسا نشان ہے جو حقیقت ِ حال کو کھو ل کر سامنے رکھ دیتا ہے اور بتاتا ہے کہ اے مسلمانو! تم پر اسلام میں داخل ہونا کوئی بوجھ نہیں کیونکہ دوسرے لوگوں کے لئے اُن کے مذہب غیب نہیں۔لیکن تمہارا مذہب وہ ہے جو خدا تعالیٰ کی غیبی طاقتوں کو ظاہر کر دیتا ہے اور اس کے مقابلہ میں کوئی اور مذہب نہیں ٹھہر سکتا۔پھر دیکھ لو یہ نمونہ آج تک چلا آرہا ہے ! اسلام میں ہر زمانہ میں ایسے لوگ پیدا ہو ئے جولَقَدْ اَنْزَلْنَاۤ اٰيٰتٍ مُّبَيِّنٰتٍ کے ذریعہ اسلام کی روشنی کو ظاہر کرتے رہے۔چنانچہ ابتدائی زمانہ میں حضرت جنید بغدادی ؒ ہوئے۔حضرت سیّد عبدالقادر صاحب جیلانی ؒ ہوئے۔شبلی ؒ ہوئے۔ابراہیم ادھم ؒ ہوئے۔ابن تیمیہ ؒ ہوئے۔ابن قیم ؒ ہوئے۔امام غزالی ؒ ہوئے۔حضرت محی الدین صاحب ابن عربی ؒ ہوئے۔اور ان کے علاوہ ہزاروں اور بزرگ ہوئے۔پھر آخری زمانہ میں حضرت شاہ ولی اللہ صاحب ؒ محدث دہلوی ہوئے۔خواجہ باقی باللہ ؒ ہوئے۔خواجہ معین الدین صاحب چشتی ؒ ہوئے۔شیخ شہاب الدین صاحب سہروردی ؒ ہوئے۔خواجہ بہائو الدین صاحب نقشبندی ؒ ہوئے۔نظام الدین صاحب اولیا ؒ ہوئے۔خواجہ قطب الدین صاحب بختیار کاکی ؒ ہوئے۔فرید الدین صاحب شکر گنج ؒ ہوئے۔حضرت سید احمد صاحب ؒبریلوی ہوئے۔حضرت شیخ احمد صاحب ؒ سرہندی مجدد الف ثانی ہوئے۔یہ سب لوگ خدا تعالیٰ کا قرب پا کر اٰيٰتٍ مُّبَيِّنٰتٍ کا مقام حاصل کر گئے اور ان میں سے ہر شخص کو دیکھ کر لوگ اپنا ایمان تازہ کرتے تھے۔پھر جب اُن کا نور دھندلا ہوا تو خدا تعالیٰ نے حضرت مسیح موعود علیہ السلام کو ہمارے اندر پیدا کیا اور آ پ کا وجو د ہمارے لئے آیات مبینات بن گیا۔جو شخص بھی آپ کے پاس بیٹھا اُس کو قرآن کریم اور محمد رسول اللہ صلی اللہ علیہ وسلم کی سچائی نظر آگئی اور کوئی چیز اس کو اسلام سے ہٹانے والی نہ رہی۔حضرت مسیح موعود علیہ السلام پر جب کرم دین بھیں والا مقدمہ ہو ا تو مجسٹریٹ ہندو تھا آریوں نے اسے ورغلایا اور کہا کہ وہ حضرت مسیح موعود علیہ السلام کو ضرور کچھ نہ کچھ سزا دے اور اُس نے ایسا کرنے کا وعدہ بھی کر لیا۔خواجہ کما ل الدین صاحب نے یہ بات سنی تو ڈر گئے۔وہ حضرت مسیح موعود علیہ السلام کی خد مت میں گورداسپور حاضر ہوئے جہاں مقدمہ کے دوران میں آپ ٹھہرے ہوئے
تھے اور کہنے لگے حضور بڑے فکر کی بات ہے۔آریوں نے مجسٹریٹ سے کچھ نہ کچھ سزا دینے کا وعدہ لے لیا ہے اُس وقت حضرت مسیح موعود علیہ السلام لیٹے ہوئے تھے آپ فوراً اُٹھ کر بیٹھ گئے اور فرمایا۔خواجہ صاحب خدا کے شیر پر کون ہاتھ ڈال سکتا ہے ؟ میں خدا کا شیر ہوں وہ مجھ پر ہاتھ ڈال کر تو دیکھے۔چنانچہ ایسا ہی ہو ا۔دو مجسٹریٹ تھے جن کی عدالت میں یکے بعد دیگر ے یہ مقدمہ پیش ہوا اور ان دونوں کو بڑی سخت سزا ملی ان میں سے ایک تو معطل ہو ااور ایک کا بیٹا دریا میں ڈوب کر مر گیا اور وہ اس غم میں نیم پاگل ہو گیا۔اس پر اس واقعہ کا اتنا اثر تھا کہ ایک دفعہ میں دہلی جا رہا تھا کہ وہ لدھیانہ کے سٹیشن پر مجھے ملا اور بڑے الحاح سے کہنے لگا کہ دُعا کریں اللہ تعالیٰ مجھے صبر کی توفیق دے مجھ سے بڑی بڑی غلطیاں ہوئی ہیں۔اور میری حالت ایسی ہے کہ میں ڈرتا ہوں کہ میں کہیں پاگل نہ ہو جائوں۔اب میرا ایک اور بیٹا ہے دُعا کریں کہ اللہ تعالیٰ اسے اور مجھے دونوں کو تباہی سے بچائے۔غرض حضرت مسیح موعود علیہ السلام کی وہ بات پوری ہوئی کہ خدا تعالیٰ کے شیر پر کون ہاتھ ڈال سکتا ہے اور آریوں کو اُن کے مقصد میں ناکامی ہوئی۔یہ آیات مبینات ہیں جن کے ذریعہ اللہ تعالیٰ دنیا میں اپنے انبیاء کی سچائی ظاہر کرتا رہتا ہے۔مگر فرماتا ہے۔وَ اللّٰهُ يَهْدِيْ مَنْ يَّشَآءُ اِلٰى صِرَاطٍ مُّسْتَقِيْمٍ۔آیا ت مبینات کے ذریعہ اللہ تعالیٰ دنیا کو اپنا چہرہ تو دکھا دیتا ہے لیکن حقیقت یہ ہے کہ صراط مستقیم اللہ تعالیٰ کے فضل کے بغیر میسر نہیں آسکتا اس لئے انسان کو چاہیے کہ وہ ہمیشہ اللہ تعالیٰ کے حضور عاجز انہ طور پر دعائیں کرتا رہے کہ وہ خود اس کی صراطِ مستقیم کی طرف راہنمائی فرمائے اور پھر اُسے صراط مستقیم پر ہمیشہ کے لئے قائم بھی رکھے کیونکہ سورۂ فاتحہ کی دعا نے بتا دیا ہے کہ صراط مستقیم حاصل ہو جانے کے بعد بھی انسان کے لئے گِرنے اور مغضوب یا ضال ہونےکا خطرہ ہوتا ہے اور اس خطرہ سے نجات کی طرف یہی صورت ہوتی ہے کہ انسان ہر وقت آستانۂ الوہیت پر گرا رہے اور دُعائوں سے اس کی مدد حاصل کرتا رہے۔وَ يَقُوْلُوْنَ اٰمَنَّا بِاللّٰهِ وَ بِالرَّسُوْلِ وَ اَطَعْنَا ثُمَّ يَتَوَلّٰى اور وہ کہتے ہیں ہم اللہ اور اُس کے رسول پر ایمان لائے اور ہم نے اطاعت کا وعدہ کر لیا پھراُن میں سے فَرِيْقٌ مِّنْهُمْ مِّنْۢ بَعْدِ ذٰلِكَ١ؕ وَ مَاۤ اُولٰٓىِٕكَ بِالْمُؤْمِنِيْنَ۰۰۴۸ ایک گروہ اس کے بعد (اپنے اقرار سے) پھر جاتا ہے۔اور ایسے لوگ ہر گز مومن نہیں۔اور جب اُن کو اللہ اور
وَ اِذَا دُعُوْۤا اِلَى اللّٰهِ وَ رَسُوْلِهٖ لِيَحْكُمَ بَيْنَهُمْ اِذَا فَرِيْقٌ اس کے رسول کی طرف اس لئے بلایا جاتا ہے تا کہ وہ اُ ن کے درمیان فیصلہ کرے۔تو اُن میں سے ایک گروہ مِّنْهُمْ مُّعْرِضُوْنَ۰۰۴۹وَ اِنْ يَّكُنْ لَّهُمُ الْحَقُّ يَاْتُوْۤا اِلَيْهِ اعراض کر نے لگ جاتا ہے۔اور اگر کوئی بات اُن کے حق میں ہو تو وہ فوراً اظہار اطاعت کر تے ہوئے مُذْعِنِيْنَؕ۰۰۵۰اَفِيْ قُلُوْبِهِمْ مَّرَضٌ اَمِ ارْتَابُوْۤا اَمْ يَخَافُوْنَ آجاتے ہیں۔کیا اُن کے دلوں میں کوئی بیماری ہے ؟ یا وہ شبہ میں پڑے ہوئے ہیں یا وہ ڈرتے ہیں کہ اللہ اور اَنْ يَّحِيْفَ اللّٰهُ عَلَيْهِمْ وَ رَسُوْلُهٗ١ؕ بَلْ اُولٰٓىِٕكَ هُمُ اُس کا رسول اُ ن پر ظلم کرےگا۔ایساہر گز نہیں بلکہ وہ خود ظالم ہیں۔مومنوں کا جواب جب وہ اللہ اور الظّٰلِمُوْنَؒ۰۰۵۱اِنَّمَا كَانَ قَوْلَ الْمُؤْمِنِيْنَ اِذَا دُعُوْۤا اِلَى اُس کے رسول کی طرف بلائے جائیں کہ وہ اُن کے درمیان فیصلہ کریں یہ ہوا کرتا ہے کہ ہم نے سنا اللّٰهِ وَ رَسُوْلِهٖ لِيَحْكُمَ بَيْنَهُمْ اَنْ يَّقُوْلُوْا سَمِعْنَا وَ اور ہم نے مان لیا۔اور وہی لوگ کامیاب ہوا کرتے ہیں۔اور جو لوگ اللہ اور اَطَعْنَا١ؕ وَ اُولٰٓىِٕكَ هُمُ الْمُفْلِحُوْنَ۰۰۵۲وَ مَنْ يُّطِعِ اللّٰهَ وَ اس کے رسول کی اطاعت کریں اور اللہ سے ڈریں اور رَسُوْلَهٗ وَ يَخْشَ اللّٰهَ وَ يَتَّقْهِ فَاُولٰٓىِٕكَ هُمُ الْفَآىِٕزُوْنَ۠۰۰۵۳ اس کا تقویٰ اختیار کریں وہ با مراد ہو جاتے ہیں۔حلّ لُغَات۔مُذْعِنِیْنَ۔اَذْعَنَ سے اسم فاعل کا صیغہ مُذْعِنٌ آتا ہے اور مُذْعِنِیْنَ جمع کا صیغہ ہے۔اَذْعَنَ الرَّجُلُ کے معنے ہوتے ہیں۔اَسْرَعَ الطَّاعَۃَ اُس نے جلدی سے اطاعت کی۔خَضَعَ وَذَلَّ وَاِنْقَادَ۔
اُس نے عاجزی کی او ر اس کے سامنے جُھک گیا ( اقرب) پس مُذْعِنٌ کے معنے ہوںگے جلدی اطاعت کرنےوالا اور مُذْعِنِیْنَ کے معنے ہوںگے جلدی اطاعت کرنے والے۔یَحِیْفُ۔یَحِیْفُ حَافَ سے مضارع کا صیغہ ہے اور حَافَ عَلَیْہِ کے معنے ہوتے ہیں جَارَ وَظَلَمَ۔اُس پر ظلم کیا اور زیادتی کی۔( اقرب) پس یَحِیْفُ کے معنے ہوںگے وہ ظلم اور زیادتی کرےگا۔تفسیر۔فرماتا ہے بعض لوگ اللہ اور رسو ل کے ساتھ ہونے کا دعویٰ تو کر دیتے ہیں لیکن جب آزمائش کا موقعہ آتا ہے تو وہ پیٹھ پھیر لیتے ہیں اور یہ اس بات کا ثبوت ہوتا ہے کہ وہ مومن نہیں اور وقت پر کچے دھاگے ثابت ہوتے ہیں۔ہاں اگر اُن کو کچھ ملنا ہو تو دوڑے چلے آتے ہیں اور اگر نہ ملنا ہو تو بھاگ جاتے ہیں جو اس بات کا ثبوت ہوتا ہے کہ یا تو ان کے دلوں میں کوئی بیماری ہے یا اُن کو ایمان نصیب نہیں ہو ا۔یا وہ اس بات سے ڈرتے ہیں کہ اللہ اور اس کے رسول کی بات کو مانا تو اُن کو نقصان پہنچے گا۔اس کے مقابل میں مومنوں کا رویہ یہ ہوتا ہے کہ جب اُن کو اللہ اور اس کے رسول کی طرف کسی فیصلہ کے لئے بلایا جاتا ہے تو وہ کہتے کہ ہم نے سُن لیا اور عمل سے اطاعت کرتے ہیں اور آخر اس کے نتیجہ میں کامیاب ہو جاتے ہیں۔کیونکہ اللہ اور رسول کی اطاعت اور اللہ تعالیٰ سے ڈرنے اور اُس کا تقویٰ اختیار کرنے کے نتیجہ میں انسان ہمیشہ کامیاب ہی ہوا کرتا ہے۔یہ آیات قومی ترقی سے تعلق رکھنے والے ایک نہایت ہی اہم اصل پر مشتمل ہیں اور ان میں بتا یا گیا ہے کہ آپس کے اختلافات میں جب تک خدا اور اس کے رسول کو حَکَم نہ بنایا جائے اُس وقت تک مسلمان بہ حیثیت مجموعی کبھی ترقی حاصل نہیں کرسکتے۔یہ منافقت اور بے ایمانی کی علامت ہوتی ہے کہ جہاں اپنا فائدہ دیکھا وہاں تو خدا اور اس کے رسول کی بات مان لی۔اور جہاں یہ نظر آیا کہ اگر میں نے خدا اور اُس کے رسول کی بات مانی تو مجھے نقصان پہنچے گا وہاں ان کے فیصلہ کو تسلیم کرنے سے انکار کر دیا۔اسلام اس قسم کی منافقت کو جائز قرار نہیں دیتا۔وہ کہتا ہے کہ تمہارے ایمان کی علامت یہ ہے کہ تم نہ صرف مذہبی امور میں محمد رسول اللہ صلی اللہ علیہ وسلم کی اقتداء کرو بلکہ اپنے سیاسی اور معاشرتی امور میں بھی آپ کی اقتداء کرو او ر آپ کو اپنا حَکَم تسلیم کرو۔درحقیقت اسلام اُن مذاہب میں سے نہیں جو مذہب کا دائرہ عمل صرف چند عبادات اور افکار تک محدود رکھتے ہیں اور امورِ اعمالِ دنیوی کو ایک علیٰحدہ عمل قرار دیتے ہیں اور اُن میں کوئی دخل نہیں دیتے۔ایسے مذہب یہ تو کہیں گے کہ نمازیوُں پڑھو۔روزے یُوں رکھو۔صدقہ و خیرات یوں کرو۔لوگوں کے حقوق یوں بجا لائو مگر کوئی ایسا حکم نہیں دیں گے جس کا نظام کے ساتھ تعلق ہو یا اقتصادیات کے ساتھ تعلق ہو۔یا بین الاقوامی حالات کے ساتھ تعلق ہو یا لین دین کے معاملات کے ساتھ تعلق ہو یا
ورثہ کے ساتھ تعلق ہو۔اسی قسم کے مذاہب میں سے ایک مسیحی مذہب ہے اور اس مذہب میں جو شریعت کو لعنت قرار دینے پر زور دیا گیا ہے۔اس کی وجہ بھی زیادہ تر یہی ہے کہ وہ افراد کے اعمال کو مذہب کی پابندیوں سے الگ رکھنا چاہتے ہیں۔وہ کہتے ہیں مذہب کا کا م صرف یہ ہے کہ وہ کہے تم عبادت کرو۔تم روزے رکھو تم غریبوں کی خبر گیری کرو۔تم عیسیٰ کو خدا سمجھو اسے اس بات سے کیا واسطہ ہے کہ قتل اور فساد اور چوریوں اور ڈاکوں کے متعلق کیا احکام ہیں۔یا یہ کہ قومیں آپس میں کس طرح معاہدات کریں۔یا اقتصاد کو کس طرح حدود میں رکھا جا سکتا ہے۔ان کے نزدیک شریعت کا ان امور سے کوئی واسطہ نہیں۔چنانچہ اگر لڑکوں اور لڑکیوں کو ورثہ میں حصہ دینے کا سوال ہو تو وہ کہہ دیں گے کہ اس میں شریعت کا کیا دخل ہے۔یہ ہمارے ملک کی پارلیمنٹ کا کام ہے کہ وہ جس امر میں قوم کا فائدہ دیکھے اسے بطور قانون نافذ کر دے۔اسی طرح وہ کہتے ہیں اگر ہم فیصلہ کر لیں کہ ہم سود لیں گے چاہے روپیہ کی صورت میں لیں اور چاہے جنس کی صورت میں تو مذہب کو کیا حق ہے کہ وہ یہ کہے کہ روپیہ کے بدلہ میں سودی روپیہ لینا ناجائز ہے۔غرض وہ مذہب کے ان احکام سے جو نظام کے ساتھ تعلق رکھتے ہیں شدید نفرت کرتے ہیں۔اسی لئے انہوں نے شریعت کو لعنت قرار دے رکھا ہے۔اس کے بالمقابل بعض دوسرے مذاہب ایسے ہیں جنہوں نے مذہب کے دائرہ کو وسیع کیا ہے اور انسانی اعمال اور باہمی تعلقات اور نظامِ حکومت وغیرہ کے متعلق بھی قواعد بنائے ہیں۔اور جو لوگ ایسے مذاہب کو مانتے ہیں لازمًا انہیں یہ بھی ماننا پڑتا ہے کہ حکومت کے معاملات میں بھی مذہب کو دخل اندازی کا حق حاصل ہے اور نیز یہ کہ اِن احکام کی پابندی افراد اور جماعتوں پر اسی طرح واجب ہے جس طرح عقائد اور انفرادی احکام۔مثلاً نماز اور روزہ وغیر ہ میں واجب ہے۔اس کی مثال میں یہودی مذہب کو پیش کیا جا سکتا ہے۔اگر کوئی شخص موسوی شریعت کو پڑھے تو اُسے جابجا یہ لکھا ہوا نظر آئےگا کہ اگر کوئی قتل کرے تو اُسے یہ سزا دی جائے۔چوری کرے تو یہ سزا دی جائے۔جنگ ہو تو ان قواعد کو ملحوظ رکھا جائے۔قربانی کرنی ہو تو ان اصول کے ماتحت کی جائے اسی طرح لین دین اور تجارت وغیرہ معاملات کے متعلق وہ ہدایات دیتا ہے۔غرض وہ معاملات جو حکومت کے ساتھ تعلق رکھتے ہیں یہودی مذہب اُن میں دخل دیتا ہے۔اَب ہمیں دیکھنا چاہیے کہ اسلام کس قسم کے مذاہب سے مشابہت رکھتا ہے۔آیا اول الذکر قسم سے یا دوسری قسم کے مذاہب سے اس غرض کے لئے جب قرآن کریم اور احادیث نبویہ کو دیکھا جاتا ہے تو اُن پر ایک سر سری نظر ڈالنے سے ہی یہ امر ثابت ہو جاتا ہے کہ اسلام پہلی قسم کے مذاہب میں شامل نہیں بلکہ دوسری قسم کے مذاہب میں شامل ہے اُس نے صرف بعض عقائد اور انفرادی اعمال بتانے پر ہی اکتفاء نہیں کیا بلکہ اُس نے ان احکام
کو بھی لیا ہے جو حکومت اور قانون سے تعلق رکھتے ہیں۔چنانچہ وہ صرف یہی نہیں کہتا کہ نمازیں پڑھو۔روزے رکھو۔حج کرو۔زکوٰۃ دو بلکہ وہ ایسے احکام بھی دیتا ہے جن کا حکومت اور قانون سے تعلق ہوتا ہے۔مثلاً وہ میاں بیوی کے تعلقات پر بحث کرتا ہے۔وہ بتا تا ہے کہ مرد اور عورت کے درمیان اگر جھگڑا ہو جائے تو کیا کیا جائے اور اُن کی باہمی مصالحت کے لئے کیا تدابیر عمل میں لائی جائیں اور اگر کبھی مرد کو اس بات کی ضرورت پیش آئے کہ وہ عورت کو بدنی سزا دے تو وہ کتنی اور کیسی ہو۔اسی طرح وہ لین دین کے قواعد پر بھی بحث کرتا ہے اور بتاتا ہے کہ قرض کے متعلق کتنے گواہ تسلیم کئے جا سکتے ہیں۔قرضہ کی کون سی صورتیں جائز ہیں اور کون سی ناجائز۔و ہ تجارت اور فنائینس کے اصول بھی بیان کرتا ہے جن پر قضاء کی بنیاد ہے۔چنانچہ وہ بتاتا ہے کہ کیسے گواہ ہونے چاہئیں کتنے ہونے چاہئیں۔ان کی گواہی میں کن کن امور کو ملحوظ رکھنا چاہیے اسی طرح وہ قضاء کے متعلق کئی قسم کے احکام دیتا ہے اور بتا تا ہے کہ قاضیوں کو کس طرح فیصلہ کرنا چاہیے پھر ان مختلف انسانی افعال کی وہ جسمانی سزائیں بھی تجویز کرتا ہے جو عام طور پر قوم کے سپرد ہوتی ہیں مثلاً قتل کی کیا سزا ہے یا چوری کی کیا سزا ہے۔اسی طرح وہ وراثت کے قوانین بھی بیان کرتا ہے۔حکومت کو ٹیکس کا جو حق حاصل ہے اس پر بھی پابندیاں لگا تا ہے اور ٹیکسوں کی تفصیل بیان کرتا ہے۔حکومت کو ان ٹیکسوں کے خرچ کرنے کے متعلق جو اختیارات حاصل ہیں اُن کو بھی بیان کرتا ہے۔فوجوں کے متعلق قواعد بیان کرتا ہے۔معاہدات کے متعلق قواعد بیان کرتا ہے۔وہ بتا تا ہے کہ د وقومیں جب آپس میں کوئی معاہدہ کرنا چاہیں تو کن اصول پر کریں اسی طرح بین الاقوامی تعلقات کے متعلق قواعد بیان کرتا ہے۔مزدور اور ملازم رکھنے والوں کے متعلق قواعد بیان کرتا ہے۔سڑکوں وغیرہ کے متعلق قواعد بیان کرتا ہے۔چنانچہ اسی ہدایت کے ماتحت جب بغداد بنایا گیا تو بڑی سڑکیں ساٹھ فٹ کی رکھی گئیں اور چھوٹی سڑکیں تیس فٹ کی رکھی گئیں۔غرض وہ تمام امور جو حکومت سے تعلق رکھتے ہیں اُن سب کو اسلام بیان کرتا ہے۔اور ساتھ ہی وہ تفقہ کاقانون بھی بیان کرتا ہے جس سے قوانین بنانے والوں کی راہنمائی ہو جاتی ہے۔پس جو شخص اسلام کو مانتا ہے اور اس میں حکومت کے متعلق تمام احکام کو تفصیل سے بیان کیا ہوا دیکھتا ہے وہ یہ نہیں کہہ سکتا کہ مذہب کو ان امور سے کیا واسطہ بلکہ اُسے تسلیم کرنا پڑےگا کہ رسول کریم صلی اللہ علیہ وسلم کے وہ افعال جو حکومت سے تعلق رکھتے ہیں وہ بھی ویسے ہی قابلِ تقلید ہیں جیسے نماز اور روزہ وغیرہ کے متعلق احکام۔کیونکہ جس خدا نے یہ کہا ہے کہ نماز پڑھو۔جس خدا نے یہ کہا ہے کہ روزے رکھو۔جس خدا نے یہ کہا ہے کہ حج کرو۔جس خدا نے یہ کہا ہے کہ زکوٰۃ دو اُسی خدا نے امور سیاست اور تنظیم ملکی کے متعلق بھی احکام بیان کئے ہیں۔اور فرمایا ہے
اِنَّمَا كَانَ قَوْلَ الْمُؤْمِنِيْنَ اِذَا دُعُوْۤا اِلَى اللّٰهِ وَ رَسُوْلِهٖ لِيَحْكُمَ بَيْنَهُمْ اَنْ يَّقُوْلُوْا سَمِعْنَا وَ اَطَعْنَا١ؕ وَ اُولٰٓىِٕكَ هُمُ الْمُفْلِحُوْنَ( النور :۵۲ )کہ مومنوں کو جب خدا اور اس کا رسول بلاتے ہیں اور کہتے ہیں کہ آئو ہم تمہارے جھگڑے کا فیصلہ کردیں تو وہ یہی کہتے ہیں کہ سَمِعْنَا وَاَطَعْنَا۔حضور کا حکم ہم نے سُن لیا اور ہم ہمیشہ حضور کی اطاعت کر یں گے۔اور اللہ تعالیٰ فرماتا ہے اُولٰٓئِکَ ھُمُ الْمُفْلِحُوْنَ یہی لوگ ہیں جو کامیا ب ہو ںگے اور ہمیشہ مظفر و منصور رہیں گے۔اب ایک طرف رسول کریم صلی اللہ علیہ وسلم کے فیصلوں کو تسلیم کرنے کے ساتھ ایمان کو وابستہ قرار دینا اور دوسری طرف انہی لوگوں کو کامیاب قرار دینا جو سَمِعْنَا اور اَطَعْنَا کہیں اور آپ کے کسی فیصلہ کے خلاف نہ چلیں بتا تا ہے کہ اگر کوئی شخص ان احکام کو نہ مانے تو وہ خدائی گرفت میں آجاتا ہے۔اسی مضمون کی طرف سورۂ نساء میں بھی اللہ تعالیٰ نے ان الفاظ میں توجہ دلائی ہے کہفَلَا وَ رَبِّكَ لَا يُؤْمِنُوْنَ حَتّٰى يُحَكِّمُوْكَ فِيْمَا شَجَرَ بَيْنَهُمْ ثُمَّ لَا يَجِدُوْا فِيْۤ اَنْفُسِهِمْ حَرَجًا مِّمَّا قَضَيْتَ وَ يُسَلِّمُوْا تَسْلِيْمًا ( النساء :۶۶) یعنی یہ لوگ کبھی مومن نہیں کہلا سکتے جب تک یہ اپنے جھگڑوں میں اے محمد رسول اللہ صلی اللہ علیہ وسلم تجھے حَکَم تسلیم نہ کریں اور پھر تیری قضا ء پر دل و جان سے وہ راضی نہ ہوں۔اس آیت کریمہ میں دو نہایت اہم باتیں بیان کی گئی ہیں اوّل یہ کہ اللہ تعالیٰ اس آیت میں رسول کریم صلی اللہ علیہ وسلم کو آخری قاضی قرار دیتا ہے اور فرماتا ہے کہ آپ کے فیصلہ پر کسی اور کے پاس کسی کو اپیل کا ہر گز حق حاصل نہیں ہوگا اور آخری فیصلہ کا حق رسول کریم صلی اللہ علیہ وسلم کو دینا بتا تا ہے کہ اللہ تعالیٰ کی طرف سے آپ کو حکومت کے اختیارات حاصل تھے۔دوسری بات جو اس سے ظاہر ہوتی ہے وہ یہ ہے کہ خدا تعالیٰ ان فیصلوں کے تسلیم کرنے کو ایمان کا جزو قرار دیتا ہے۔چنانچہ فرماتا ہے۔فَلَا وَ رَبِّكَ لَا يُؤْمِنُوْنَ تیرے رب کی قسم وہ کبھی مومن نہیں ہو سکتے جب تک وہ تیرے فیصلوں کو تسلیم نہ کریں۔گویا یہ بھی دین کا ایک حصہ ہے اور ایسا ہی حصہ ہے جیسے نماز دین کا حصہ ہے۔جیسے روزہ دین کا حصہ ہے۔جیسے حج اور زکوٰۃ دین کا حصہ ہے۔فرض کرو زید اور بکر کا آپس میں جھگڑا ہو جاتا ہے۔ایک کہتا ہے میں نے دوسرے سے دس روپے لینے ہیں اور دوسرا کہتا ہے کہ میں نے کوئی روپیہ نہیں دینا۔دونوں رسول کریم صلی اللہ علیہ وسلم کے پاس پہنچتے ہیں۔اور اپنے جھگڑے کو آپ کے سامنے پیش کرتے ہیں۔اور رسول کریم صلی اللہ علیہ وسلم ایک کے حق میں فیصلہ کر دیتے ہیں تو دوسرا اس فیصلہ کو اگر نہیں مانتا تو اللہ تعالیٰ کہتا ہے وہ مومن نہیں رہا۔پس باوجود یہ کہ وہ نماز پڑھتا ہوگا وہ روزے رکھتا ہوگا وہ زکوٰۃ دیتا ہوگا۔وہ حج کرتا ہوگا۔اگر وہ اس حصہ میں آکر رسول کریم صلی اللہ علیہ وسلم کے کسی فیصلہ کو تسلیم کرنے سے انکار کر دیتا ہے تو اللہ تعالیٰ کا فتویٰ اس کے متعلق یہی ہے کہ اس انکار کے بعد وہ مومن نہیں رہا۔پس لَا یُؤْ مِنُوْنَ کے
الفاظ نے بتا دیا کہ خدا تعالیٰ نے اس حصہ کو بھی دین کا ایک جزو قرار دیا ہے علیٰحدہ نہیں رکھا۔یہی مضمون اللہ تعالیٰ نے سورۂ نور کی ان زیر تفسیر آیات میں بیان فرمایا ہے اور مسلمانوں کو بتا یا ہے کہ تمہارا صرف منہ سے خدا اور رسول پر ایمان لانے کا دعویٰ کرنا کوئی چیز نہیں تمہارا ایمان اس وقت قابل قبول سمجھا جاسکتا ہے جب تم اپنے ہر معاملہ میں خدا اور اس کے رسول کو حَکَم تسلیم کرو اور کسی بات میں بھی اُن کے احکام سے انحراف کرنےکی جرأت نہ کرو۔وَ اَقْسَمُوْا بِاللّٰهِ جَهْدَ اَيْمَانِهِمْ لَىِٕنْ اَمَرْتَهُمْ اور وہ لوگ اللہ (تعالیٰ) کی پکی قسمیں کھاتے ہیں۔کہ اگرتو اُن کو حکم دے تو وہ فوراً گھروں سے نکل کھڑے لَيَخْرُجُنَّ١ؕ قُلْ لَّا تُقْسِمُوْا١ۚ طَاعَةٌ مَّعْرُوْفَةٌ١ؕ اِنَّ اللّٰهَ ہوںگے۔کہو قسمیں نہ کھائو۔ہمارا حکم تو تمہیں صرف ایسی اطاعت کا ہے جو عرفِ عام میں اطاعت سمجھی جاتی ہے خَبِيْرٌۢ بِمَا تَعْمَلُوْنَ۰۰۵۴قُلْ اَطِيْعُوا اللّٰهَ وَ اَطِيْعُوا اللہ( تعالیٰ) اُس سے جو تم کرتے ہو یقیناً خبر دار ہے۔تو کہہ اللہ کی اطاعت کرو اور اس کے رسول کی اطاعت کرو۔الرَّسُوْلَ١ۚ فَاِنْ تَوَلَّوْا فَاِنَّمَا عَلَيْهِ مَا حُمِّلَ وَ عَلَيْكُمْ مَّا پس اگر وہ پھر جائیں تو اس( رسول) پر صرف اس کی ذمہ داری ہے جو اُس کے ذمہ لگا یا گیا ہے۔اور تم پر اُس کی حُمِّلْتُمْ١ؕ وَ اِنْ تُطِيْعُوْهُ تَهْتَدُوْا١ؕ وَ مَا عَلَى الرَّسُوْلِ اِلَّا ذمہ واری جو تمہارے ذمہ لگا یا گیا ہے۔اور اگر تم اس کی اطاعت کرو تو ہدایت پا جائو گے۔اور رسول کے الْبَلٰغُ الْمُبِيْنُ۰۰۵۵ ذمہ تو بات کو کھول کر پہنچا دینا ہے۔تفسیر۔فرماتا ہے یہ لوگ پکی قسمیں کھاتے ہیں کہ اگر ہم کو لڑنے کا بھی حکم دیا گیا تو ہم ضرور لڑیں گے۔تُو ان سے کہہ دے کہ قسمیں کھانے کا کوئی فائدہ نہیں مومنوں والی اطاعت کا نمونہ اصل چیز ہے۔قسمیں تو منافق سے منافق انسان بھی کھا لیتا ہے۔پس اللہ اور رسول کی اطاعت کرو اور بڑھ بڑھ کر باتیں نہ بنائو۔مومنانہ طریق تو یہ ہوتا
ہے کہ اللہ اور اس کے رسول کی عملاً اطاعت کی جائے اور صرف زبانی دعووں پراپنے ایمان کا انحصار نہ سمجھاجائے۔لیکن اگر اس نصیحت کے باوجود یہ لوگ پیٹھ پھیر جائیں تو اس رسول پر اس کی کوئی ذمہ داری عائد نہیں ہوتی۔اس پر صرف اس پیغام کی ذمہ واری ہے جس کا پہنچانا اس کے سپر د کیا گیا ہے اور تم پر ان احکام کے بجا لانے کی ذمہ داری ہے جو تمہارے ذمہ لگائے گئے ہیں۔ہاں ہم اتنی بات تمہیں ضرور بتا دیتے ہیں کہ اگر تم اس بارہ میں محمد رسول اللہ صلی اللہ علیہ وسلم کی اطاعت کرو گے تو تمہیں کوئی نقصان نہیں ہوگا بلکہ تم کامیاب ہو جائو گے اور فتح پائو گے۔مگر ہم پھر تمہیں کہتے ہیں کہ رسول کا کام صرف دنیا تک خدا تعالیٰ کا پیغام پہنچا دینا ہے۔ورنہ عملی قدم اٹھانا تمہارا کام ہے۔جدوجہد کرنا تمہارا کا م ہے۔قربانیاں کرنا تمہارا کام ہے۔تم صرف اس بات پر خوش نہ ہو جائو کہ خدا کا ایک رسول تم میں آیا اور تم نے اُس کے ہاتھ پر ہاتھ رکھ دیا۔اللہ تعالیٰ تمہارے اعمال کو دیکھتا ہے اور اُس کے مطابق وہ تم سے سلوک کرے گا اگر تم مونہہ سے تو یہ کہتے ہو کہ ہم رسول کے ساتھ ہر میدان میں دشمن سے جنگ کرنے کے لئے تیار ہیں لیکن وقت آنے پر تمہارے قدم لڑکھڑانے لگتے ہیں اور جان دینا تمہیں دو بھر معلوم ہوتا ہے تو تم سمجھ لو کہ تمہارا ایمان خدا تعالیٰ کی نگاہ میں ایک رائی کے برابر بھی قیمت نہیں رکھتا۔موسیٰ ؑ کے ساتھیوں کی مثال تمہارے سامنے ہے۔انہوں نے بھی موسیٰ ؑ کی اطاعت کا اقرار کیا تھا مگر جب موسیٰ ؑ نے کہا کہ اٹھو اور کنعان کی سرزمین پر حملہ کردو۔تو انہوں نے کہہ دیا کہ اے موسیٰ ؑ تو اور تیرا رب دونوں جا کر لڑتے رہو۔ہم تو یہیں بیٹھے ہیں(المائدۃ:۲۵)۔مگر اس کا کیا نتیجہ نکلا۔چالیس سال تک وہ قوم صحرائوں میں بھٹکتی پھری اور کنعان میں داخل نہ ہو سکی۔اور اگر داخل ہوئی تو اس وقت جب وہ قربانیوں کے لئے تیار ہو گئی۔پس اصل چیز خدا اور اس کے رسول کی اطاعت ہے اور تمام کامیابیاں اسی رُوح کے ساتھ وابستہ ہیں جس قوم میں اطاعت کی رُوح ہوتی ہے و ہ دوسروں کے مقابلہ میں کمزور ہوتے ہوئے بھی کامیاب ہوجاتی ہے۔اور جس قوم میں سے اطاعت کی رُوح نکل جاتی ہے وہ زیادہ ہوتے ہوئے بھی ناکام رہتی ہے۔