حضرت مرزا طاہر احمد رحمہ اللہ

خلیفۃ المسیح الرابع

حضرت مرزا طاہر احمد رحمہ اللہ 18 دسمبر 1928ء کو قادیان میں پیدا ہوئے۔ آپ خلیفۃ المسیح الثانی کے بیٹے تھے۔ آپ نے جامعہ احمدیہ ربوہ اور لندن کے سکول آف اورینٹل اینڈ افریکن سٹڈیز میں تعلیم حاصل کی۔ 1982ء میں آپ خلیفۃ المسیح الرابع منتخب ہوئے۔

1974ء میں پاکستان کی پارلیمنٹ آئینی ترمیم کے ذریعہ احمدیوں کو غیر مسلم قرار دے چکی تھی۔ پھر 26 اپریل 1984ء کو صدر جنرل ضیاء الحق نے آرڈیننس نمبر 20 جاری کیا، جس کے تحت پاکستان میں احمدیوں کا اپنے آپ کو مسلمان کہنا، اپنے دین کو اسلام کہنا یا اذان دینا قابلِ سزا جرم بن گیا۔ چونکہ آپ پاکستان میں خلیفہ کی حیثیت سے اپنے فرائض ادا نہیں کر سکتے تھے، اس لیے چند دن بعد آپ لندن ہجرت کر گئے اور وہیں سے جماعت کی قیادت فرمائی۔ آپ کے بہت سے عظیم کارناموں میں سے چند یہ ہیں: ایم ٹی اے کا آغاز، جو تب سے دن رات ساری دنیا میں نشر ہو رہا ہے، مجالسِ سوال و جواب جن میں آپ ہر طبقے کے لوگوں کو کھلے دل سے جواب دیتے تھے، قرآن کریم کا اردو ترجمہ اور کتاب ”ریویلیشن، ریشنیلٹی، نالج اینڈ ٹرتھ“۔ آپ کی وفات 19 اپریل 2003ء کو لندن میں ہوئی۔