صحیح بخاری 6174: باب قَوْلِ الرَّجُلِ لِلرَّجُلِ اخْسَأْ
سالم نے کہا: میں نے حضرت عبداللہ بن عمرؓ سے سنا۔ وہ کہتے تھے: اس کے بعد رسول اللہ ﷺ اور حضرت اُبَیّ بن کعب انصاریؓ اس نخلستان کا قصد کرتے ہوئے گئے جس میں ابن صیاد تھا۔ جب رسول اللہ ﷺ باغ میں داخل ہوئے تو رسول اللہ ﷺ کھجوروں کے تنوں کی آڑ میں بچتے ہوئے چلنے لگے اور آپؐ ابن صیاد سے چپکے سے کچھ سننا چاہتے تھے پیشتر کہ وہ آپؐ کو دیکھے۔ اور ابن صیاد اپنے بستر پر اپنی ایک چادر اوڑھے ہوئے لیٹا ہوا تھا جس میں سے کچھ گنگنانے یا بھنبھنانے کی سی آواز آرہی تھی۔ ابن صیاد کی ماں نے نبی ﷺ کو دیکھ لیا جبکہ آپؐ کھجوروں کے تنوں کی آڑ میں چھپتے ہوئے چلے آرہے تھے۔ ابن صیاد سے کہنے لگی: اے صاف! اور یہ اس کا نام تھا۔ یہ تو محمدؐ آن پہنچے۔ یہ سن کر ابن صیاد چپ ہوگیا۔ رسول اللہ ﷺ نے فرمایا: اگر اسے رہنے دیتی تو ظاہر ہو جاتا۔
Urdu translation: Hazrat Syed Zain-ul-Abidin Waliullah Shah