صحیح بخاری 6316: باب الدُّعَاءِ إِذَا انْتَبَهَ بِاللَّيْلِ

علی بن عبداللہ نے ہم سے بیان کیا کہ (عبدالرحمٰن) ابن مہدی نے ہمیں بتایا۔ انہوں نے سفیان (ثوری) سے، سفیان نے سلمہ (بن کہیل) سے، سلمہ نے کُرَیب سے، کُرَیب نے حضرت ابن عباس رضی اللہ عنہما سے روایت کی۔ انہوں نے کہا: میں حضرت میمونہؓ کے پاس رات رہا تو نبی ﷺ اُٹھے اور حاجت کو گئے۔ آپؐ نے اپنے منہ کو اور اپنے ہاتھوں کو دھویا۔ پھر آپؐ سو گئے۔ پھر (اس کے بعد) اُٹھے اور مشک کے پاس آئے اور اس کا بندھن کھولا۔ پھر آپؐ نے درمیانہ وضو کیا۔ پانی بہت استعمال نہیں کیا اور وضو بھی پورا کیا۔ آپؐ نماز پڑھنے لگے اور میں بھی اُٹھا۔ میں نے انگڑائی لی اس لئے کہ میں بُرا سمجھتا تھا کہ آپؐ یہ خیال کریں کہ میں آپؐ کو نظر بچا کر دیکھ رہا تھا۔ پھر میں نے وضو کیا اور کھڑا ہو کر نماز پڑھنے لگا اور میں آپؐ کے بائیں طرف کھڑا تھا۔ آپؐ نے میرا کان پکڑا اور مجھے گھما کر اپنی دائیں طرف لے آئے۔ آپؐ کی نماز تیرہ رکعتوں میں مکمل ہوئی۔ پھر آپؐ لیٹ گئے اور سو گئے اور آپؐ خراٹے لینے لگے۔ اور آپؐ کی عادت تھی کہ جب آپؐ سو جاتے تو خراٹے لیتے۔ پھر بلالؓ نے آپؐ کو نماز کی اطلاع کی اور آپؐ نے نماز پڑھائی اور (دوبارہ) وضو نہیں کیا۔ اور آپؐ اپنی دعا یوں کرتے: اے اللہ! میرے دل میں نور ڈال دے اور میری آنکھوں میں نور ڈال دے اور میرے کانوں میں نور ڈال دے اور میرے دائیں نور کر دے اور میرے بائیں نور کر دے اور میرے اوپر نور کر دے اور میرے نیچے نور کر دے اور میرے آگے نور کر دے اور میرے پیچھے نور کر دے اور میرے لئے نور بنا دے۔ کُرَیب نے کہا: اور جسم میں سات چیزیں ہیں (جن کو منور کرنے کی آپؐ نے دعا کی۔) (یہ سن کر) میں حضرت عباسؓ کی اولاد میں سے ایک شخص کو ملا تو اس نے مجھے وہ سات چیزیں بتائیں اور اس نے یہ ذکر کیا: میرے اعصاب میں اور میرے گوشت میں اور میرے خون میں اور میرے بالوں میں اور میرے بدن میں۔ اور انہوں نے دو اور چیزوں کا (بھی) ذکر کیا۔

حَدَّثَنَا عَلِيُّ بْنُ عَبْدِ اللَّهِ حَدَّثَنَا ابْنُ مَهْدِيٍّ عَنْ سُفْيَانَ عَنْ سَلَمَةَ عَنْ كُرَيْبٍ عَنِ ابْنِ عَبَّاسٍ ـ رضى الله عنهما ـ قَالَ بِتُّ عِنْدَ مَيْمُونَةَ فَقَامَ النَّبِيُّ صلى الله عليه وسلم فَأَتَى حَاجَتَهُ غَسَلَ وَجْهَهُ وَيَدَيْهِ ثُمَّ نَامَ ثُمَّ قَامَ فَأَتَى الْقِرْبَةَ فَأَطْلَقَ شِنَاقَهَا ثُمَّ تَوَضَّأَ وُضُوءًا بَيْنَ وُضُوءَيْنِ لَمْ يُكْثِرْ وَقَدْ أَبْلَغَ فَصَلَّى فَقُمْتُ فَتَمَطَّيْتُ كَرَاهِيَةَ أَنْ يَرَى أَنِّي كُنْتُ أَتَّقِيهِ فَتَوَضَّأْتُ فَقَامَ يُصَلِّي فَقُمْتُ عَنْ يَسَارِهِ فَأَخَذَ بِأُذُنِي فَأَدَارَنِي عَنْ يَمِينِهِ فَتَتَامَّتْ صَلاَتُهُ ثَلاَثَ عَشْرَةَ رَكْعَةً ثُمَّ اضْطَجَعَ فَنَامَ حَتَّى نَفَخَ ـ وَكَانَ إِذَا نَامَ نَفَخَ ـ فَآذَنَهُ بِلاَلٌ بِالصَّلاَةِ فَصَلَّى وَلَمْ يَتَوَضَّأْ وَكَانَ يَقُولُ فِي دُعَائِهِ " اللَّهُمَّ اجْعَلْ فِي قَلْبِي نُورًا وَفِي بَصَرِي نُورًا وَفِي سَمْعِي نُورًا وَعَنْ يَمِينِي نُورًا وَعَنْ يَسَارِي نُورًا وَفَوْقِي نُورًا وَتَحْتِي نُورًا وَأَمَامِي نُورًا وَخَلْفِي نُورًا وَاجْعَلْ لِي نُورًا ". قَالَ كُرَيْبٌ وَسَبْعٌ فِي التَّابُوتِ. فَلَقِيتُ رَجُلاً مِنْ وَلَدِ الْعَبَّاسِ فَحَدَّثَنِي بِهِنَّ فَذَكَرَ عَصَبِي وَلَحْمِي وَدَمِي وَشَعَرِي وَبَشَرِي وَذَكَرَ خَصْلَتَيْنِ.

باب 10: باب الدُّعَاءِ إِذَا انْتَبَهَ بِاللَّيْلِ

مربوط حوالہ جات

خلفاء کی کتب

  • دیباچہ تفسیر القرآن: اردو
  • خطاباتِ ناصر (جلد دوم ۔1974ءتا 1981ء): اردو
  • سیرت النبی ﷺ (جلد اوّل): اردو
  • سیرت النبی ؐ: اردو
  • نبیوں کا سردار ﷺ: اردو
  • انوارالعلوم (جلد 1): اردو

خطباتِ جمعہ

  • قرآنِ کریم کی منتخب مختلف دعائیں، احادیث مبارکہ نبویہﷺ سے دعاؤں کا انتخاب: اردو
آج 10 میں سے 10 باقی