حدیقۃ الصالحین 1421: خلوصِ نیت اور حسنِ ارادہ
حضرت ابوہریرہ ؓ سے روایت ہے کہ رسول اللہ ﷺ نے فرمایا کہ ایک دفعہ ایک آدمی نے کہا کہ آج میں کچھ صدقہ دوں گا۔ وہ اپنا صدقہ لے کر باہر نکلا تو ایک چور کو غریب آدمی سمجھتے ہوئے اس کے ہاتھ پر وہ رکھ دیا۔ جب صبح ہوئی تو لوگ باتیں کرنے لگے کہ اب تو چور کو بھی صدقہ دیا جانے لگا ہے۔ اس شخص کو جب علم ہوا تو اس نے کہا اے میرے اللہ تو ہی حمد کا مالک ہے۔ میں ضرور صدقہ دوں گا۔ وہ صدقہ لے کر نکلا تو ایک بدکار عورت کو یہ صدقہ دے دیا۔ جب صبح ہوئی تو لوگ باتیں کرنے لگے کہ رات کو بدکار عورت کو صدقہ دیا گیا ہے۔ جب اس آدمی کو یہ بات پہنچی تو اس نے کہا اے اللہ! تو ہی حمد کا مالک ہے۔ مجھ سے ایک زانیہ کو صدقہ دینے میں غلطی ہوئی۔ میں ضرور صدقہ دوں گا۔ وہ صدقہ لے کر نکلا اور ایک دولت مند کو یہ صدقہ دے دیا۔ جب صبح ہوئی تو لوگ کہنے لگے اب تو امیر کو صدقہ دیا جانے لگا ہے۔ اس پر اس نے کہا۔ اے میرے اللہ! تو ہی حمد کا مالک ہے میں نے ایک دفعہ چور کو صدقہ دے دیا۔ ایک دفعہ بدکار کو اور ایک دفعہ دولت مند کو۔ وہ اسی سوچ میں تھا کہ اسے آواز آئی تو نے ایک چور کو جو صدقہ دیا ہے ہو سکتا ہے کہ وہ اپنی ضرورت پوری ہوتی دیکھ کر چوری سے باز آ جائے۔ اسی طرح بدکار پر جو تو نے خرچ کیا ہے ہو سکتا ہے کہ وہ یہ رقم پا کر بدکاری چھوڑ دے۔ رہا دولت مند تو اس کو صدقہ دینے کا یہ نتیجہ ہو سکتا ہے کہ اس دولت مند کو عبرت حاصل ہو اور وہ سوچے کہ دوسرے تو خداتعالیٰ کی راہ میں خرچ کرتے ہیں لیکن میں اس برکت سے محروم ہوں۔ اس طرح وہ نادم ہو کر اپنے اس مال کو اللہ تعالیٰ کی راہ میں خرچ کرنے کی توفیق پائے جو اللہ تعالیٰ نے اس کو دیا ہے۔