کتاب 5: كتاب الغسل
صحیح بخاری, حصہ 2
صحیح بخاری 268
ہم سے محمد بن بشار نے بیان کیا، کہا: معاذ بن ہشام نے ہم سے بیان کیا۔ معاذ نے کہا: میرے باپ نے مجھے بتلا یا۔ انھوں نے قتادہ سے روایت کی۔ کہتے تھے کہ حضرت انس بن مالک نے ہمیں بتلا یا۔ کہا: نبی ﷺ رات کو یا دن کو ایک ہی وقت میں اپنی بیویوں کے پاس ہو آتے اور وہ گیارہ تھیں۔ کہتے تھے کہ میں نے حضرت انس سے کہا: کیا آپ اس کی طاقت رکھتے تھے ؟ تو انہوں نے کہا کہ ہم آپس میں کہا کرتے تھے کہ آپ کو تیس آدمیوں کی قوت دی گئی ہے اور سعید نے قتادہ سے روایت کرتے ہوئے کہا کہ حضرت انس نے انہیں بتلایا کہ نو (۹) بیویاں تھیں۔
Urdu translation: Hazrat Syed Zain-ul-Abidin Waliullah Shah
صحیح بخاری 269
ہم سے ابو الولید نے بیان کیا، کہا: زائدہ نے ہمیں بتلایا۔ انہوں نے ابو حصین سے۔ ابو حصین نے ابو عبد الرحمن سے۔ انہوں نے حضرت علیؓ سے روایت کی۔ کہتے تھے کہ میں ایسا آدمی تھا جس کو مذی کا عارضہ تھا تو میں نے ایک شخص کو بوجہ اس کے کہ آپ کی بیٹی میرے ہاں تھی، نبی ﷺ۔ سے پوچھنے کے لیے کہا: اس نے پوچھا اور آپ نے فرمایا: وضو کرو اور اپنی شرم گاہ دھولو۔
Urdu translation: Hazrat Syed Zain-ul-Abidin Waliullah Shah
صحیح بخاری 270
ہم سے ابونعمان نے بیان کیا، کہا: ابوعوانہ نے ہمیں بتلایا، انہوں نے ابراہیم بن محمد بن منتشر سے، ابراہیم نے اپنے باپ سے روایت کی کہ میں نے حضرت عائشہ سے پوچھا اور ان سے حضرت ابن عمر کا یہ قول ذکر کیا ”مجھے پسند نہیں کہ میں احرام کی حالت میں صبح اٹھوں اور خوشبو سے مہک رہا ہوں۔“ اس پر حضرت عائشہ نے کہا: میں نے رسول اللہ ﷺ کو خوشبو لگائی۔ پھر آپ نے اپنی بیویوں کے پاس چکر لگایا اور پھر صبح احرام باندھا۔
Urdu translation: Hazrat Syed Zain-ul-Abidin Waliullah Shah
صحیح بخاری 271
ہم سے آدم (بن ابی ایاس) نے بیان کیا، کہا: شعبہ نے ہم سے بیان کیا، کہا: حکم نے ہمیں بتلایا۔ انہوں نے ابراہیم سے۔ ابراہیم نے اسود سے۔ اسود نے حضرت عائشہ سے روایت کی۔ وہ کہتی تھیں: جیسے کہ میں اب بھی خوشبو کی چمک نبی ﷺ کی مانگ میں دیکھ رہی ہوں۔ حالانکہ آپ احرام کی حالت میں تھے۔
Urdu translation: Hazrat Syed Zain-ul-Abidin Waliullah Shah
صحیح بخاری 272
ہم سے عبدان نے بیان کیا، کہا: عبداللہ نے ہمیں بتلایا۔ انہوں نے کہا: ہشام بن عروہ نے ہم سے بیان کیا۔ انہوں نے اپنے باپ سے۔ ان کے باپ نے حضرت عائشہ سے روایت کی۔ وہ کہتی تھیں رسول اللہ ﷺ جب جنابت کی وجہ سے غسل فرماتے تو اپنے دونوں ہاتھ دھوتے اور وضو کرتے جس طرح کہ نماز کے لیے وضو کیا کرتے۔ اس کے بعد نہاتے پھر اپنے ہاتھ سے اپنے بالوں کا خلال کرتے، یہاں تک کہ جب سمجھتے کہ آپ نے اپنی جلد اچھی طرح تر کر لی ہے تو آپ اس پر تین بار پانی بہاتے۔ پھر اپنا ( باقی ماندہ ) سارا جسم دھوتے۔
Urdu translation: Hazrat Syed Zain-ul-Abidin Waliullah Shah
صحیح بخاری 273
اور (حضرت عائشہ) کہتی تھیں کہ میں اور رسول اللہ ﷺ ایک ہی برتن سے نہایا کرتے ہم اکٹھے ہی اس سے پانی چلو بھر بھر کر لیا کرتے تھے۔
Urdu translation: Hazrat Syed Zain-ul-Abidin Waliullah Shah
صحیح بخاری 274
ہم سے یوسف بن عیسی نے بیان کیا، کہا: فضل بن موسیٰ نے ہمیں بتلایا، انہوں نے کہا: اعمش نے ہم سے بیان کیا۔ انہوں نے سالم سے۔ سالم نے حضرت ابن عباس کے مولیٰ کریب سے۔ کریب نے حضرت ابن عباس سے۔ حضرت ابن عباس نے حضرت میمونہ سے روایت کی۔ وہ کہتی تھیں: رسول اللہ نے غسل جنابت کرنے کے لیے پانی رکھا اور اپنے دائیں ہاتھ سے بائیں ہاتھ پر پانی دو دفعہ یا تین دفعہ اُنڈیلا۔ پھر اپنی شرمگاہ دھوئی۔ پھر اپنا ہاتھ زمین پر یا دیوار پر دو دفعہ یا تین دفعہ ملا۔ پھر کلی کی اور ناک میں پانی لیا اور اپنا منہ اور دونوں بازو دھوئے۔ پھر اپنے سر پر پانی بہایا۔ پھر اپنا جسم دھویا۔ اس کے بعد ایک طرف ہو گئے اور اپنے دونوں پاؤں دھوئے۔ کہتی تھیں کہ پھر میں ایک کپڑا لائی تو آپ نے اسے نہ چاہا اور اپنے ہاتھ سے (پانی ہو) جھاڑنے لگے۔
Urdu translation: Hazrat Syed Zain-ul-Abidin Waliullah Shah
صحیح بخاری 275
ہم سے عبداللہ بن محمد نے بیان کیا، کہا: عثمان بن عمر نے ہم سے بیان کیا، کہا: یونس نے ہمیں بتلایا۔ انہوں نے زہری سے، زہری نے ابوسلمہ سے، ابوسلمہ نے حضرت ابو ہریرہ سے روایت کی۔ وہ کہتے تھے: نماز کے لیے تکبیر اقامت کہی گئی اور صفیں جبکہ لوگ کھڑے ہو گئے سیدھی کی گئیں اور رسول اللہ ہمارے پاس باہر آئے۔ جب آپ اپنی نماز کی جگہ کھڑے ہوئے تو آپ کو یاد آیا کہ آپ جنبی ہیں۔ آپ نے ہمیں فرمایا: اپنی جگہ کھڑے رہو۔ (یہ کہہ کر) آپ واپس چلے گئے۔ آپؐ نے غسل کیا۔ پھر ہمارے پاس باہر آئے اور آپ کے سر سے (پانی کے) قطرے ٹپک رہے تھے۔ آپ نے اللہ اکبر کہا اور ہم نے آپ کے ساتھ نماز پڑھی۔ عبدالاعلیٰ نے معمر سے۔ معمر نے زہری سے بھی اسی طرح یہ (بات) روایت کی اور اوزاعی نے بھی زہری سے اسی طرح روایت کی۔
Urdu translation: Hazrat Syed Zain-ul-Abidin Waliullah Shah
صحیح بخاری 276
ہم سے عبدان نے بیان کیا، کہا: ابو حمزہ نے ہمیں بتلایا۔ انہوں نے کہا: میں نے اعمش سے سنا۔ وہ سالم (بن ابی جعد) سے، سالم کریب سے، کریب حضرت ابن عباس سے روایت کرتے تھے۔ انہوں نے کہا: حضرت میمونہ کہتی تھیں کہ میں نے نبیؐ کے لیے نہانے کا پانی رکھا اور آپ کو ایک کپڑے سے پردہ کیا۔ آپ نے دونوں ہاتھوں پر پانی ڈالا اور انہیں دھویا۔ پھر اپنے دائیں ہاتھ سے اپنے بائیں ہاتھ پر پانی ڈالا اور اپنی شرمگاہ کو دھویا۔ پھر اپنا ہاتھ زمین پر رکھا اور اسے ملا۔ پھر اسے دھویا۔ پھر گھی کی اور ناک میں پانی لیا اور اپنے چہرے اور اپنے دونوں بازوؤں کو دھویا۔ اس کے بعد آپ نے اپنے سر پر پانی ڈالا اور اپنے جسم پر (پانی) بہا دیا۔ پھر ایک طرف ہو گئے اور اپنے دونوں پاؤں دھوئے۔ پھر میں نے آپ کو ایک کپڑا دیا تو آپ نے اسے نہ لیا اور آپ چل پڑے۔ آپ اپنے دونوں ہاتھوں کو جھاڑتے جاتے تھے۔
Urdu translation: Hazrat Syed Zain-ul-Abidin Waliullah Shah
صحیح بخاری 277
ہم سے خلاد بن یحیی نے بیان کیا، کہا: ابراہیم بن نافع نے ہمیں بتلایا۔ انہوں نے حسن بن مسلم سے۔ حسن نے صفیہ بنت شیبہ سے۔ صفیہ نے حضرت عائشہ سے روایت کی کہ ہم میں سے جب کوئی جنسی ہوتی تو وہ اپنے ہاتھوں سے تین بار پانی لے کر اپنے سر پر ڈالتی پھر اپنے ہاتھ سے اپنے داہنے حصہ پر ڈالتی اور دوسرے ہاتھ سے اپنے بائیں حصہ کو دھوتی۔
Urdu translation: Hazrat Syed Zain-ul-Abidin Waliullah Shah
صحیح بخاری 278
ہم سے اسحاق بن نضر نے بیان کیا، کہا: عبد الرزاق نے ہمیں بتلایا۔ انہوں نے معمر سے۔ معمر نے ہمام بن منبہ سے، ہمام نے حضرت ابو ہریرہ سے۔ حضرت ابو ہریرہ نے نبی ﷺ سے روایت کی کہ آپ نے فرمایا: بنی اسرائیل جنگے نہایا کرتے تھے (اور) وہ ایک دوسرے کو دیکھا کرتے تھے اور حضرت موسیٰ اکیلے نہایا کرتے تھے تو انہوں نے کہا: اللہ کی قسم موسیٰ کو ہمارے سامنے نہانے سے سوائے اس کے اور کوئی بات نہیں روکتی کہ وہ فتق سے بیمار ہے۔ ایک دفعہ حضرت موسیٰ نہانے کے لیے گئے اور اپنے کپڑے حجر کے پاس رکھے اور حجر آپ کے کپڑے لے کر بھاگ گیا تو حضرت موسیٰ اس کے پیچھے دوڑے اور یہ کہتے جاتے تھے: حجر! میرا کپڑا، میرا کپڑا۔ آخر بنی اسرائیل نے حضرت موسیٰ کو دیکھ لیا اور انہوں نے کہا کہ اللہ کی قسم موسیٰ کو تو کوئی بیماری نہیں۔ آپ نے اپنے کپڑے (اس سے) لے لیے اور حجر کو مارنے لگے۔ حضرت ابو ہریرہ نے کہا: اللہ کی قسم اس حجر پر چھ یا سات زخم کے نشان ہیں اس مار کی وجہ سے جو حجر کو پڑی۔
Urdu translation: Hazrat Syed Zain-ul-Abidin Waliullah Shah
صحیح بخاری 279
اور حضرت ابو ہریرہ سے روایت ہے کہ نبی ﷺ نے فرمایا کہ ایک دفعہ حضرت ایوب ننگے نہا رہے تھے کہ سونے کی مکڑیاں ان پر آگریں اور حضرت ایوب انہیں اپنے کپڑے میں لپیں بھر بھر کر ڈالنے لگے۔ اس پر ان کے رب نے انہیں پکارا: ایوب! کیا میں نے تجھے اس سے جس کو تو دیکھ رہا ہے، بے نیاز نہیں کر دیا؟ انہوں نے کہا: ہاں، بے شک تیری عزت کی قسم، لیکن مجھے تیری برکت سے بے نیازی نہیں ہے۔ یہ روایت ابراہیم نے موسیٰ بن عقبہ سے، موسیٰ نے صفوان بن سلیم سے، صفوان نے عطاء بن یسار سے۔ عطاء نے حضرت ابو ہریرہ سے۔ حضرت ابو ہریرہ نے نبی ﷺ سے روایت کی۔ انہوں نے یوں کہا: اسی اثناء میں کہ حضرت ایوب ننگے نہا رہے تھے۔
Urdu translation: Hazrat Syed Zain-ul-Abidin Waliullah Shah
صحیح بخاری 280
عبد اللہ بن مسلمہ نے ہم سے بیان کیا۔ انہوں نے مالک سے۔ مالک نے عمر بن عبید اللہ کے مولیٰ ابو نضر سے روایت کی کہ ابو طالب کی بیٹی حضرت ام ہانی کے مولیٰ ابو مرہ نے ان کو بتلایا کہ انہوں نے ابو طالب کی بیٹی حضرت ام ہانی سے سنا۔ وہ کہتی تھیں کہ جس سال مکہ فتح ہوا، میں رسول اللہ ﷺ کے پاس گئی اور میں نے آپ کو نہاتے پایا اور حضرت فاطمہ آپ کو پردہ کیے ہوئے تھیں۔ آپ نے پوچھا: یہ کون ہے؟ تو میں نے کہا: ام ہانی ہوں۔
Urdu translation: Hazrat Syed Zain-ul-Abidin Waliullah Shah
صحیح بخاری 281
ہم سے عبدان نے بیان کیا، کہا: عبداللہ نے ہمیں بتلایا۔ انہوں نے کہا: سفیان نے ہمیں خبر دی۔ انہوں نے اعمش سے۔ اعمش نے سالم بن ابی جعد سے۔ ابو جعد نے کریب سے۔ کریب نے حضرت ابن عباس سے۔ حضرت ابن عباس نے حضرت میمونہ سے روایت کی کہ وہ کہتی تھیں: میں نبی ﷺ کو پردہ کیے ہوئے تھی اور آپ غسلِ جنابت فرما رہے تھے۔ آپ نے اپنے دونوں ہاتھ دھوئے، پھر اپنے دائیں ہاتھ سے اپنے بائیں ہاتھ پر پانی ڈالا اور اپنی شرم گاہ کو اور جو کچھ اسے لگا ہوا تھا اس کو دھویا۔ پھر اپنا ہاتھ دیوار یا زمین پر مل لیا۔ پھر آپ نے وضو کیا جیسا کہ نماز کے لیے وضو کیا کرتے تھے۔ آپ نے پاؤں نہیں دھوئے۔ اس کے بعد آپ نے اپنے جسم پر پانی ڈالا۔ پھر ایک طرف ہو کر آپ نے اپنے دونوں پاؤں دھوئے۔ ابو عوانہ اور ابن فضیل نے پردہ کرنے کے متعلق انہی کی طرح حدیث بیان کی۔
Urdu translation: Hazrat Syed Zain-ul-Abidin Waliullah Shah
صحیح بخاری 282
ہم سے عبداللہ بن یوسف نے بیان کیا، کہا: مالک نے ہمیں بتلایا۔ انہوں نے ہشام بن عروہ سے۔ ہشام نے اپنے باپ سے۔ ان کے باپ نے حضرت ابو سلمہ کی بیٹی حضرت زینب سے۔ حضرت زینب نے ام المؤمنین حضرت ام سلمہ سے روایت کی کہ وہ کہتی تھیں: حضرت ابو طلحہ کی بیوی حضرت ام سلیم رسول اللہ ﷺ کے پاس آئیں اور کہا: یا رسول اللہ! اللہ تعالیٰ حق سے نہیں شرماتا۔ کیا عورت بھی نہائے جب اسے احتلام ہو؟ رسول اللہ ﷺ نے فرمایا: ہاں، جب پانی دیکھے۔
Urdu translation: Hazrat Syed Zain-ul-Abidin Waliullah Shah
صحیح بخاری 283
ہم سے علی بن عبد اللہ نے بیان کیا، کہا: انہوں نے ہم سے بیان کیا۔ انہوں نے کہا: حمید نے ہم سے بیان کیا، کہا: بکر نے ہم سے بیان کیا۔ انہوں نے ابو رافع سے۔ ابو رافع نے حضرت ابو ہریرہ سے روایت کی کہ نبی ﷺ مدینہ کے راستے پر کسی جگہ پر انہیں ملے اور وہ جنبی تھے۔ (وہ کہتے تھے) میں آپ سے جھجک کر پیچھے ہٹا اور پھر وہ گئے اور نہائے اور اس کے بعد آئے تو آپ نے فرمایا: ابوہریرہ! تم کہاں تھے؟ انہوں نے کہا کہ میں جنبی تھا اس لیے میں نے ناپسند کیا کہ میں آپ کے ساتھ بیٹھوں در آنحالیکہ میں ناپاک ہوں۔ آپ نے فرمایا: سبحان اللہ! مومن تو ناپاک نہیں ہوتا۔
Urdu translation: Hazrat Syed Zain-ul-Abidin Waliullah Shah
صحیح بخاری 284
ہم سے عبدالاعلیٰ بن حماد نے بیان کیا، کہا: یزید بن زریع نے ہم سے بیان کیا، انہوں نے کہا: سعید نے قتادہ سے روایت کرتے ہوئے ہمیں بتلایا کہ حضرت انس بن مالک نے ان سے بیان کیا کہ نبی ﷺ ایک ہی رات میں اپنی بیویوں کے پاس ہو آتے تھے اور آپ کی اس زمانہ میں نو بیویاں تھیں۔
Urdu translation: Hazrat Syed Zain-ul-Abidin Waliullah Shah
صحیح بخاری 285
ہم سے عیاش نے بیان کیا، کہا: عبدالاعلیٰ نے ہم سے بیان کیا کہ حمید نے ہمیں بتلایا۔ انہوں نے بکر سے۔ بکر نے ابو رافع سے۔ ابو رافع نے حضرت ابو ہریرہ سے روایت کی۔ انہوں نے کہا کہ مجھے رسول اللہ ﷺ ملے اور میں جنبی تھا۔ آپ نے میرا ہاتھ پکڑا اور میں آپ کے ساتھ چل پڑا، یہاں تک کہ آپ بیٹھ گئے تو میں کھسک کر چلا گیا اور ڈیرے میں آیا اور نہایا۔ اس کے بعد آیا اور آپ بیٹھے ہوئے تھے تو آپ نے فرمایا: ابو ہریرہ! تم کہاں تھے؟ میں نے آپ کو بتلایا تو آپ نے فرمایا: سبحان اللہ، ابو ہریرہ! مومن ناپاک نہیں ہوتا۔
Urdu translation: Hazrat Syed Zain-ul-Abidin Waliullah Shah
صحیح بخاری 286
ابو نعیم نے ہم سے بیان کیا، کہا: ہشام اور شیبان نے ہمیں بتلایا۔ انہوں نے ابو سلمہ سے روایت کی۔ انہوں نے کہا کہ میں نے حضرت عائشہ سے پوچھا: آیا نبی ﷺ ایسی حالت میں سویا کرتے تھے کہ آپ جنبی ہوں؟ تو انہوں نے کہا: ہاں، اور آپ وضو کر لیا کرتے تھے۔
Urdu translation: Hazrat Syed Zain-ul-Abidin Waliullah Shah
صحیح بخاری 287
ہم سے قتیبہ نے بیان کیا، کہا: لیث نے ہم سے بیان کیا۔ انہوں نے نافع سے۔ نافع نے حضرت ابن عمرؓ سے روایت کی کہ حضرت عمر بن خطاب نے رسول اللہ ﷺ سے پوچھا: کیا ہم میں سے کوئی اس حالت میں سو جائے کہ وہ جنبی ہو؟ آپ نے فرمایا: ہاں۔ جب تم میں سے کوئی وضو کر لے اور وہ جنبی ہو تو وہ سو سکتا ہے۔
Urdu translation: Hazrat Syed Zain-ul-Abidin Waliullah Shah