کتاب 25: روزہ اور اس کی اہمیت
حدیقۃ الصالحین, حصہ 2
حدیقۃ الصالحین 1258
حضرت ابو ہریرہؓ سے روایت ہے کہ رسول اللہ ﷺ نے فرمایا جس نے رمضان میں ایمان کے ساتھ اللہ کی رضا کی امید رکھتے ہوئے عبادت کی تو اس کے گذشتہ گناہ بخش دیئے جائیں گے۔
حدیقۃ الصالحین 2026
نبی ﷺ کی زوجہ مطہرہ حضرت عائشہ رضی اللہ عنہا فرماتی ہیں کہ نبی ﷺ رمضان کے آخری عشرہ میں اعتکاف بیٹھتے تھے یہاں تک کہ اللہ تعالیٰ نے آپؐ کو وفات دی۔ پھر آپؐ کے بعد آپؐ کی ازواج معتکف ہوتی تھیں۔
حدیقۃ الصالحین 2015
حضرت ابن عمر رضی اللہ عنہما سے روایت ہے کہ نبی ﷺ کے صحابہؓ میں سے کئی لوگوں کو آخری سات راتوں میں لیلۃ القدر خواب میں دِکھائی گئی تو رسول اللہ ﷺ نے فرمایا میں دیکھتا ہوں کہ تمہاری خوابیں آخری سات راتوں کے متعلق ایک دوسرے سے متفق ہیں۔ پس جس کو اس کی تلاش ہو تو چاہیے کہ وہ آخری سات راتوں میں تلاش کرے۔
حدیقۃ الصالحین 3513
حضرت عائشہ ؓ بیان فرماتی ہیں کہ میں نے کہا اے اللہ کے رسولؐ! اگر مجھے معلوم ہو جائے کہ کونسی رات لیلة القدر ہے تو میں اس میں کیا دعا مانگوں۔ اس پر حضورؐ نے فرمایا تم یوں دعا کرنا : اے میرے اللہ تو بخشنے والا ہے ، (عزت دینے والا ہے) بخشش کو پسند کرتا ہے ، مجھے بخش دے۔
حدیقۃ الصالحین 1175
حضرت ابو دداءؓ بیان کرتے ہیں کہ مجھے میرے حبیب ﷺ نے تین باتوں کی تاکید فرمائی۔ جب تک میں زندہ رہوں گا انہیں کبھی ترک نہیں کروں گا۔ ہر ماہ تین دن روزے رکھنا اور چاشت کی نماز پڑھنے کی اور یہ کہ میں اس وقت تک نہ سوؤں جب تک وتر نہ پڑھ لوں۔
حدیقۃ الصالحین 761
حضرت ابو ذرؓ بیان کرتے ہیں کہ رسول اللہ ﷺ نے فرمایا اے ابو ذر! تم ہر ماہ تین روزے رکھنا چاہو تو (ہر مہینہ کے ایام بیض یعنی چاند کی ) تیرہویں، چودہویں اور پندرہویں کو روزہ رکھو۔